Febrero

Jehová ningo oipota enterove isiervokuéra ovyʼa. Haʼe oĩ voi káda uno ykére, ha oikuaa ñañeñandu vai ha ñañedesanima jave (Sal. 145:18, 19). Ñapensamína mbaʼeichaitépa Jehová ojepyʼapy vaʼekue proféta Elías oñandúvare, ha mbaʼéichapa oipytyvõ chupe. Ko kuimbaʼe ojeroviaitéva Jehováre oiko vaʼekue peteĩ tiémpo ijetuʼuetereívape Israélpe. Umi hénte omanda guasúva Israélpe ha ndohayhúiva Jehovápe opersegi vaʼekue umi oservívape Ñandejárape, ha koʼýte ojukase vaʼekue hikuái Elíaspe (1 Rey. 19:1, 2). Avei Elías opensa vaʼekue haʼentemaha la proféta oservíva Jehovápe, ha upéva oiméne koʼýte odesanima rakaʼe chupe (1 Rey. 19:10). Ñandejára pyaʼe porã ohecha mbaʼéichapa oipytyvõta Elíaspe. Upearã ombou peteĩ ánhel oasegura hag̃ua iprofétape noĩriha haʼeño. Pe ánhel heʼi Elíaspe oĩha gueteri heta israelita oservíva Jehovápe fiélmente (1 Rey. 19:5, 18). Jesús mborayhúpe heʼi vaʼekue idisipulokuérape pe kongregasión haʼetaha peteĩ família chupekuéra g̃uarã (Mar. 10:29, 30). Ha Jehová, pe omoakãva ko família, opromete oipytyvõtaha umi oservisévape chupe (Sal. 9:10). w21.06 8, 9 párr. 3, 4

Heta hénte oñepysanga ha ñanderrechasa, pórke ñande jaipuru la Biblia jahechauka hag̃ua japuha heta mbaʼe oñemboʼéva umi rrelihiónpe. Por ehémplo, umi líder rrelihióso omboʼe umi héntepe Ñandejára okastigaha umi iñañávape infiérnope. Haʼekuéra oipuru pe enseñánsa japu omongyhyje hag̃ua umi héntepe ha oreko chupekuéra ipoguýpe. Péro Ñandejára ningo mborayhu, ha ñande jaservíva chupe jahechauka japuha upe enseñánsa. Umi rrelihión omboʼe avei ñane álma nomanoiha, péro ñande jahechauka ko enseñánsa noĩriha la Bíbliape, pórke oimérire upéva siérto nañaikotevẽmoʼãi kuri pe rresurreksión. Ha heta rrelihión omboʼéramo jepe entéro mbaʼe oikoha pe destíno káusare, ñande ñamboʼe enterove jarekoha liverta ha ikatuha jadesidi jaservítapa Ñandejárape. ¿Mbaʼéichapa orreaksiona jepi umi líder rrelihióso jahechauka jave japuha umi mbaʼe omboʼéva hikuái? Haʼekuéra pyʼỹinte orrenegaiterei. Péro ñande jahayhúramo la verda, jaasepta ha jajapo vaʼerã umi mbaʼe Ñandejára heʼíva (Juan 8:45, 46). Ñande ndajajoguaséi Satanáspe, ha upévare arakaʼeve nañamboykemoʼãi pe añetegua. Ñande ningo núnka ndajajapomoʼãi peteĩ mbaʼe oñemoĩva umi mbaʼe jagueroviávare (Juan 8:44). Ñandejára oipota isiervokuéra osegi Jesús ehémplo. Upévare heʼi ñandéve: “Ndapechaʼéi vaʼerã umi mbaʼe vaíre, ha pehayhu vaʼerã iporãva” (Rom. 12:9; Heb. 1:9). w21.05 10, 11 párr. 10, 11

¿Mbaʼépa ikatu jajapo jahechakuaáramo ñandejehe ñañepyrũmaha ñañemombaʼeguasu térã ñandetaryrýi? ¡Ñande ikatu hína ñakambia! Apóstol Pablo heʼi umi hoʼa vaʼekue pe Diablo ñuhãme ikatuha gueteri osẽ upégui (2 Tim. 2:26). Aníkena núnka ñanderesarái Jehová imbareteveha Satanásgui. Upévare jahejáramo Jehová ñanepytyvõ, ñande ikatúta ñasẽ oimeraẽ trámpa térã ñuhã pe Diablo omoĩvagui ñane renonderãme. Iporã ningo añete ñasẽ Satanás ñuhãgui, péro iporãiteve hína ndajaʼáiramo voi umívape. Upéva ikatúta jahupyty Ñandejára ñanepytyvõramo añoite. Upévare jajerure asýkena Jehovápe káda día tañanepytyvõ jahechakuaa hag̃ua umi mbaʼe ñapensa ha jajapóvare, noiméipa ñañepyrũma hína jahechauka koʼã mbaʼe vaiete (Sal. 139:23, 24). ¡Ñañehaʼãmbaitékena ani hag̃ua oñembohapo ñande pype koʼã mbaʼe vaiete! Ojapóma ningo hetaiterei áño Satanás haʼe hague pe kasadór. Péro koʼẽrõite chupehaitéma ojejagarráta ha oñeñapytĩta, ha upe rire katu oñehundíta chupe (Apoc. 20:1-3, 10). Hiʼãitereíma ningo og̃uahẽ upe día. Péro og̃uahẽ meve upe tiémpo, jasegi vaʼerã ñañatende ani hag̃ua jaʼa Satanás trámpape. Ñañehaʼãmbaitékena ani hag̃ua jaʼa pe orgúllo ha taryrýi ñuhãme. Jajedesidíkena ‘ñañemoĩ mbaretetaha pe Diáblore ha haʼe odiparáta ñandehegui’. w21.06 19 párr. 15-17

Jehová ningo ovyʼaiterei peteĩ persóna oasepta jave pe añetegua oĩva la Bíbliape, ha omombeʼu ótrope umi mbaʼe oaprende vaʼekue (Prov. 23:15, 16). ¡Upévare oiméne ovyʼaite ohechávo la oikóva koʼág̃arupi! Por ehémplo, oĩramo jepe pe pandémia ko múndo tuichakuére, pe áño de servísio 2020-pe ojejapo kuri 7.705.765 estúdio bíblico. Upéicha rupi 241.994 persóna oñemeʼẽ Jehovápe ha ojevautisa. Ha koʼã disípulo pyahu ojapóta avei estúdio bíblico ha oipytyvõta ótrope oiko hag̃ua chugui disípulo (Luc. 6:40). Ñande ningo ñaimekuaa segúro Jehová ovyʼaitereiha ohechávo ñaipytyvõha ótrope oiko hag̃ua chugui disípulo. Añetehápe heta ñañehaʼã vaʼerã jajapo hag̃ua upéva. Péro Jehová oĩ rupi ñande ykére ikatu ñaipytyvõ ótrope ohayhu hag̃ua ñande Ru yvagapeguápe. ¿Ikatúpa ñañehaʼã jajapo peteĩ estúdio bíblico jepe? Opyta porã jave jaofreséramo peteĩ estúdio bíblico entéro umi hénte jatopávape, ikatu hína ñanesorprende la oikóva. w21.07 6, 7 párr. 14-16

Rréi David ningo okontrivui vaʼekue hetaiterei pláta ha rrikésa imbaʼéva voi oñemopuʼã hag̃ua pe témplo (1 Crón. 22:11-16). Ha ñande, oiméramo ñandeedáma ha ndaikatuvéima ñambaʼapo umi konstruksión ojapóvape Jehová organisasión, lomímonte ikatu jasegi jaapoja koʼã projékto ñameʼẽvo ñane kontrivusión asegún la ñane situasión. Ha avei ikatu ñakomparti umi imitãvandi umi mbaʼe ñaaprende vaʼekue ñande rekove pukukuére. Ñapensami avei mbaʼeichaitépa apóstol Pablo ipojera vaʼekue. Haʼe ningo oinvita vaʼekue Timotéope, peteĩ kuimbaʼe imitãva, oho hag̃ua hendive umi viáhe ojapóvape opredika hag̃ua. Pablo noñemohakateʼỹi vaʼekue umi mbaʼe oikuaávare, síno ohechauka Timotéope mbaʼéichapa haʼe opredika ha oporomboʼe (Hech. 16:1-3). Pe entrenamiénto Pablo omeʼẽ vaʼekue Timotéope oipytyvõ chupe ivale hag̃ua opredika ha omboʼe hag̃ua umi notísia porã (1 Cor. 4:17). Upéi Timoteo oipuru avei umi mbaʼe Pablo omboʼe vaʼekue chupe ontrena hag̃ua ótrope opredika ha oporomboʼe hag̃ua. w21.09 12 párr. 14, 15

¿Mbaʼépa ikatu ñaaprende disípulo Apolos ha apóstol Pablo ehémplogui? Mokõivéva oikuaa vaʼekue hetaiterei mbaʼe oĩva Ñandejára Ñeʼẽme. Mokõivévante ikonosído ha oporomboʼe porãiterei vaʼekue. Ha mokõivéva oipytyvõ hetápe oiko hag̃ua chuguikuéra disípulo. Péro haʼekuéra ndoikói vaʼekue okompeti oñondive, ni noñakontrariái vaʼekue ojuehe (Hech. 18:24). Añetehápe, ojapo rire peteĩ tiémpo Apolos oho hague Coríntogui, Pablo ojerure joʼa joʼa chupe oho jey hag̃ua upépe (1 Cor. 16:12). Apolos oipuru porã vaʼekue umi mbaʼe ojapokuaáva: Haʼe oipuru umíva opredika hag̃ua umi notísia porã, ha omombarete hag̃ua iñermanokuérape. Ikatu avei ñaime segúro Apolos iñumílde hague. Por ehémplo, la Biblia nomombeʼúi haʼe ipochy hague Áquila ha Priscila ‘omyesakã porãve haguére chupe Ñandejára rape’ (Hech. 18:24-28). Apóstol Pablo oikuaa vaʼekue umi mbaʼe porã ojapóva Apolos. Péro haʼe ndojepyʼapýi vaʼekue umi hénte opensáta haguére Apolos ivaleveha chugui. Pablo ningo iñumílde ha iñakãguapy vaʼekue, ha upéva jahechakuaa pe kárta oskrivi vaʼekuére umi Corintoguápe (1 Cor. 3:4-6). w21.07 18 párr. 15-17

Adán ha Eva odesidi vaʼekue naiñeʼẽrendumoʼãiha Ñandejárape, upévare haʼekuéra omerese voi oñemosẽ Jehová famíliagui. ¿Péro mbaʼépa oikóta umi ifamiliarégui? Jehová ningo ohayhueterei yvyporakuérape, upévare ojapo la tekotevẽva ikatu hag̃uáicha umi iñeʼẽrendúva oĩ jey ifamíliape. ¿Mbaʼéichapa ojapo raʼe upéva? Ohejávo Itaʼýra peteĩete omano ñanderehehápe (Juan 3:16). Jesús sakrifísio rupive, Jehová ikatu vaʼekue oadopta itaʼýraramo 144.000 yvypóra ifiélvape (Rom. 8:15-17; Apoc. 14:1). Avei oĩ umi millones de persóna ifiélva Ñandejárape ha okumplíva umi mbaʼe haʼe ojeruréva. Haʼekuéra oreko avei la esperánsa oĩvo Jehová famíliape ohasa rire pe pruéva finál, ág̃a oñemohuʼãvo umi 1.000 áño (Sal. 25:14; Rom. 8:20, 21). Haʼekuéra koʼág̃ama voi ikatu heʼi Ijapohare Jehováre: ‘Che ru’ (Mat. 6:9). Avei umi oñemoingove jeýva ikatúta oaprende mbaʼépa Jehová ohaʼarõ chuguikuéra. Ha umi odesidíva iñeʼẽrendutaha chupe, ikatúta oĩ ifamíliape pára siémpre. w21.08 5 párr. 10, 11

Apóstol Páblope ningo oñenkarga vaʼekue opredika hag̃ua umi ndahaʼéivape judío, ha upéva haʼe vaʼekue pe traváho iñimportantevéva chupe g̃uarã. Upévare opredika vaʼekue “umi hénte renondépe ha ogahárupi” (Hech. 20:20). Haʼe oaprovechapaite vaʼekue entéro oportunida orekóva, ha opredika oimeraẽvape ha oimehápe. Por ehémplo haʼe ohaʼarõrõ guare iñamigokuérape Aténaspe, oñemoĩ opredika peteĩ grúpo de persóna oĩháme umi poguasukuéra, ha umíva apytégui oĩ vaʼekue heta ohendu porãva chupe (Hech. 17:16, 17, 34). Ha oĩrõ guare préso jepe haʼe opredika vaʼekue ikatúvape guive (Filip. 1:13, 14; Hech. 28:16-24). Pablo ningo oipuru porãiterei vaʼekue pe tiémpo ohasáva predikasiónpe, pórke ndahaʼéi opredikánteva, síno avei oaprovecha upe tiémpo ontrena hag̃ua umi ermánope. Upévare haʼe pyʼỹinte oinvita vaʼekue ótrope omoirũ hag̃ua chupe ojapo jave umi iviáhe de predikasión. Por ehémplo pe primer viáhepe oinvita vaʼekue Juan Márcospe, ha pe segundo viáhepe oinvita Timotéope (Hech. 12:25; 16:1-4). Jahechaháicha Pablo oñehaʼãmbaite vaʼekue ontrena porã koʼã ermánope, ikatu hag̃uáicha upéi haʼekuéra ogia porã pe kongregasión, okuida porã ermanokuérare, ha omboʼe porãve umi héntepe (1 Cor. 4:17). w22.03 27 párr. 5, 6

Oĩ ningo umi hénte ndogueroviáiva oexistiha peteĩ Kreadór, pórke heʼi ogueroviaha umi mbaʼe ohechávante. Péro añetehápe haʼekuéra ogueroviánte avei umi mbaʼe ndohecháiva, por ehémplo pe yvytu térã pe graveda, oĩgui pruéva umíva oexistiha. Ha pe jerovia oñeñeʼẽha la Bíbliape oreko avei umi pruéva ohechaukáva oexistiha umi mbaʼe ndajahecháiva (Heb. 11:1). Jastudia hag̃ua umi pruéva ningo tekotevẽ ñañemotiémpo ha ñañehaʼãmbaite, ha heta hénte ndojaposéi upéva. Upéicha rupi ndogueroviái hikuái Ñandejára oexistiha. Oĩ umi sientífiko oñekonvenséva Ñandejára ojapo hague ko univérso ostudia rire umi pruéva. Oĩ umi ogueroviántemava ndaiporiha peteĩ Apohare, pórke umi universidápe núnka noñemboʼéiva oĩha peteĩ Kreadór. Upéicharõ jepe, haʼekuéra oaprende Jehovágui ha oñepyrũ ohayhu chupe. Añetehápe ñande avei ñamombarete vaʼerã ñande jerovia Ñandejárare, tahaʼe haʼéva pe edukasión jarresivi vaʼekue. w21.08 14 párr. 1; 15, 16 párr. 6, 7

Jesús omombeʼu vaʼekue peteĩ istória opokoitereíva ñanderehe oñeʼẽva pe taʼýra ofalla vaʼekuére. Péicha ñanepytyvõ ñantende hag̃ua mbaʼeichaitépa Jehová ñandeporiahuvereko ñanderayhu rupi. Upe istóriape pe taʼýra osẽ oho hógagui “oiko iñakãre ha ogasta vaipa la orekomíva” (Luc. 15:13). Upe rire haʼe oñarrepenti hekovai haguére, oñemomirĩ ha oho jey hógape. ¿Mbaʼépa ojapo raʼe itúa? Jesús heʼi: “Itúa ohecha chupe ouha mombyry guive, ha oiporiahuverekoiterei chupe, upévare odipara hendápe, hatã oañuã itaʼýrape ha ohetũ chupe”. Itúa ningo ndojaʼói ni nomotĩri chupe. Upéva rangue, upepete voi oiporiahuvereko ha operdona itaʼýrape ha orresivi jey chupe ifamíliaramo. Pe taʼýra opeka vaieterei kuri, péro oñarrepenti rupi itúa operdona chupe. Pe túa ivuenoitéva orrepresenta hína Jehovápe, ha ko istória iporãitéva rupive Jesús ñanemboʼe Itúa operdonasetereiha umi pekadór oñarrepentívape ipyʼaite guive (Luc. 15:17-24). w21.10 8 párr. 4; 9 párr. 6

Ñane tiémpope, heta líder rrelihióso ojapo ikatúva guive ani hag̃ua umi hénte oikuaa Ñandejára réra. Por ehémplo, haʼekuéra oipeʼa Jehová réra umi Bíbliagui ha oproivi voi ojepuru upe téra umi ijiglesiakuérape. Ojekuaa porãiterei ningo ñande testígo de Jehová añoite jarrespeta ha ñambotuichaha Jehová réra haʼe omereseháicha. ¡Ndaipóri ningo ótra rrelihión oikuaaukáva peichaite peve Jehová réra ñande jajapoháicha! Ñande ñañehenói testígo de Jehová, upévare jajapo ikatúva guive jaikuaauka ha ñambotuicha hag̃ua Jehová réra (Is. 43:10-12). Ñande ñaguenohẽma mas de 240 millones de Biblia Traducción del Nuevo Mundo de las Santas Escrituras, oipurúva Jehová réra umi lugár umi ótra traduksión nomoĩri haguépe. Avei ñaguenohẽ mas de 1.000 idiómape umi puvlikasión bíblica oipurúva Jehová réra. w21.10 20, 21 párr. 9, 10

Ñande jaadora Jehovápe ñaipytyvõ jave ñane ermanokuéra oikotevẽvape. Jehová opromete vaʼekue umi israelítape ovendesitaha chupekuéra oipytyvõramo umi imboriahúvape (Deut. 15:10). Ha ñande kásope katu, káda ves ke ñaipytyvõ ñane ermanokuéra oikotevẽvape, Jehová heʼi voi la jajapóva haʼeha peteĩ rregálo chupe g̃uarã (Prov. 19:17). ¿Mbaʼérepa jaʼekuaa upeichaha? Vuéno, umi kristiáno oikóva Filípospe oipytyvõrõ guare apóstol Páblope oĩ aja préso, haʼe heʼi voi la ojapóva hikuái ojoguaha “peteĩ sakrifísio iporã ha hyakuã asývape Ñandejárape g̃uarã” (Filip. 4:18). Upévare iporãta ñapensáramo umi ermáno ha ermanakuéra oĩvare ñane kongregasiónpe, ha ñañeporandu: “¿Mávapepa ikatu che aipytyvõ?”. Jehová ningo ovyʼaiterei ohecha jave jaipuruha ñane tiémpo, ñande fuérsa, ñande avilida térã umi mbaʼe jarekóva ikatu hag̃uáicha ñaipytyvõ ñane ermanokuéra oikotevẽvape. Ha jajapo jave koʼã mbaʼe, Jehová heʼi voi jaadoraha hína chupe (Sant. 1:27). Oĩ ningo hetaiterei mbaʼe jajapóva jaservi hag̃ua Jehovápe. Péro ñandéve g̃uarã koʼã mbaʼe ndahaʼéi peteĩ kárga (1 Juan 5:3). ¿Mbaʼérepa? Pórke ñande jahayhueterei Jehovápe ha ñane ermanokuérape. w22.03 24 párr. 14, 15

Ñande ikatúta jahechauka jaiporiahuvereko ha ñanembaʼeporãha ñane ermanokuérandi ñapensáramo umi provléma ohasávare hikuái. Por ehémplo, ñamoĩ chupe peteĩ ermána orekoha peteĩ mbaʼasy igravetereíva. Haʼe ningo núnka ndojekeháiva la imbaʼasýgui, péro katuete omombaʼetereíta oĩramo oipytyvõva chupe. ¿Ikatúnepa ñande ñaipytyvõ ko ermánape ñakosinávo chupe g̃uarã, térã ñamopotĩvo chupe hóga? Térã ñamoĩ chupe peteĩ ermáno operde hague itraváho, ¿ikatúnepa japrepara peteĩ sovreʼi ha ñamoĩ pype michĩmi pláta ñaipytyvõ hag̃ua chupe otopa jey peve ótro itravahorã? Ikatu voi jajapo upéva oikuaaʼỹre mávapa omeʼẽ hína chupe. Natekotevẽi ningo ñane ermanokuéra heʼi raẽ ñandéve oikotevẽha ajúda jaiporiahuvereko hag̃ua chupekuéra. Ojapoháicha Jehová, ñande ñañemotenonde vaʼerã voi ñaipytyvõ hag̃ua chupekuéra. Jehová ningo oguenohẽ pe kuarahy káda día jajerureʼỹre chupe. Pe kuarahy ojopévo ovenefisia enterovépe, ndahaʼéi umi ijagradesídovapente. Omeʼẽvo ñandéve umi mbaʼe ñaikotevẽva, Jehová ohechauka hína ñanderayhuha, ha ñande katu jahayhueterei chupe imbaʼeporã ha ipojera haguére ñanendive. w21.09 23 párr. 12, 13

Pe mborayhu ifiélva omomýi Ñandejárape ñaneperdona hag̃ua. Peteĩ pekadór oñarrepenti jave ha okambia, pe mborayhu ifiélva omomýi Jehovápe operdona hag̃ua chupe. Pe salmísta David heʼi vaʼekue Jehováre péicha: “Ñande japeka ha ñamerese kuri Ñandejára ñandekastiga, péro haʼe ndojapói upéva. Ivai kuri upe jajapóva, péro haʼe nomeʼẽi ñandéve la ñamereséva” (Sal. 103:8-11). David ningo osufrieterei vaʼekue ikonsiénsia kyʼárõ guare Jehová renondépe. Péro haʼe oikuaa vaʼekue avei Jehová ‘oĩha operdona hag̃uáicha’. ¿Mbaʼépa omomýi Jehovápe ñaneperdona hag̃ua? La rrespuésta jatopa pe téxto koestediaguápe. David heʼi haguéicha oñemboʼérõ guare, Jehová oporoperdona ohechauka rupi mborayhu ifiélva enterove ojerurévape operdonami hag̃ua chupe. Japeka jave, oĩ porã hína la ñañeñandu vai, pórke upéva ñanemomýita ñakambia hag̃ua ha jajapo hag̃ua umi mbaʼe oĩ porãva. w21.11 5 párr. 11, 12

Jehová ningo ohayhu héra ha oipota voi enterove orrespeta upéva (Is. 42:8). Péro ojapóma hína 6.000 áño oñepyrũ hague oñemongyʼa héra porãite (Sal. 74:10, 18, 23). Upéva oñepyrũ vaʼekue pe Diablo (heʼiséva “oñeʼẽ vaíva ótrore”) heʼírõ guare Ñandejára nomeʼẽseiha Adán ha Évape peteĩ mbaʼe oikotevẽva hikuái (Gén. 3:1-5). Upe guive oñemboja rei Jehováre nomeʼẽseiha ñandéve umi mbaʼe añetehápe ñaikotevẽva. Jesús ojepyʼapyeterei vaʼekue oĩ haguére omongyʼáva Itúa réra. Jehová añoite ningo oreko pe derécho ogoverna hag̃ua pe yvága ha ko yvy, ha ndaipóri ótro ogoverna porãve vaʼerã chugui (Apoc. 4:11). Péro pe Diablo oñehaʼã ombotavy umi ánhel ha yvyporakuérape, opensa hag̃ua hikuái Ñandejára ndorekoiha derécho ogovernávo. Koʼẽrõite avavete asýma ndodudamoʼãvéi haʼe añoite orekoha pe derécho ogovernávo. Enterove oikuaáta Jehová ogoverna lája iporãveha, ha pe Irréino añoite oguerutaha pyʼaguapy ha segurida ko yvy ape ári. w21.07 9 párr. 5, 6

Peteĩ túa ningo omeʼẽsétante voi hembireko ha ifamiliakuérape umi mbaʼe oikotevẽva. ¿Ha mbaʼetekópa hína nendive la situasión? ¿Hendýpa hína? Oimérõ upéicha, reaprovecha vaʼerã upe situasión emombarete hag̃ua nde jerovia. Eñemboʼékena ha ejepyʼamongeta la Jesús heʼi vaʼekuére Mateo 6:25-34-pe. Ejepyʼamongetákena avei ótro ermáno experiénsiare, ohechaukáva Jehová nombofaltaiha mbaʼevete umi ombaʼapo jejopývape chupe g̃uarã (1 Cor. 15:58). Péicha rejapóramo reĩta segúro Jehová nepytyvõtaha, oipytyvõ haguéicha avei umi ótro ermánope. Jehová ningo oikuaa porã mbaʼépa reikotevẽ ha oikuaa avei mbaʼéichapa omog̃uahẽta ndéve. Rehechávo mbaʼéichapa Jehová nepytyvõ, tuicha rejeroviavéta hese, ha upéva nepytyvõta reaguanta hag̃ua umi situasión ijetuʼuvéva oútava hína. w21.11 20 párr. 3; 21 párr. 6

Heta kristiáno ohasáma umi pruéva ijetuʼúva ha ojepersegi mbarete avei chupekuéra. Upéicharõ jepe, haʼekuéra osegi opredika ha oaguanta hekove pukukue, imitãite guive ijeda peve ojerovia rupi pe rreskátere. Jahechamína apóstol Juan ehémplo. Haʼe ningo opredika vaʼekue fiélmente pe añetegua oñeʼẽva Cristo ha pe rreskátere, ha amalisia ojapo voi upéva mas de 60 áñorupi. Haʼe orekórõ guare haimete 100 áño, pe goviérno rrománo opensa hese haʼeha peteĩ persóna ipeligrósova. Upéicha rupi, omondo chupe hikuái pe ísla de Pátmospe. ¿Mbaʼépa raʼe la idelíto? ‘Oñeʼẽ Ñandejárare ha omombeʼu la verda Jesúsgui’ (Apoc. 1:9). ¡Ajépa iporãite la ehémplo oheja vaʼekue ñandéve Juan, pórke haʼe ojerovia mbarete vaʼekue ha iñaguánte! Umi lívro oskrivi vaʼekuépe, Juan heʼi mbaʼeichaitépa ohayhu Jesúspe ha omombaʼetereiha pe rreskáte. Haʼe mas de 100 vése voi oñeʼẽ pe rreskátere ha umi mbaʼe porã ikatúvare ojehupyty pe rreskáte rupive (1 Juan 2:2). Jahechakuaa upéicharõ Juan omombaʼeterei hague pe rreskáte. w21.04 17 párr. 9, 10

Jehová ningo oipota isiervokuéra imbaʼerechakuaa umi orekóvandi algúna diskapasida. Pe léi oproivi vaʼekue umi israelítagui omaldesi peteĩ nohendúivape. Por ehémplo, ndovaléi hovake voi oñeʼẽ vai hese térã oamenasa chupe. Ivaietereíta voi ningo la péicha ojejapóramo hese, pórke haʼe ndaikatumoʼãi ohendu la ojeʼéva ha ndaikatumoʼãi anga oñedefende. Avei Levítico 19:14-pe Jehová omanda isiervokuérape: “Neremoĩri vaʼerã mbaʼeve umi ohechaʼỹva renondépe oñepysanga térã hoʼa hag̃ua”. Ha peteĩ lívro oñeʼẽva umi persóna orekóvare diskapasida, heʼi: “Yma pe sóna oĩ haguépe Israel, heta hénte ojaprovechámi vaʼekue peichagua persónare”. Algúno ikatu voi omoĩ a propósito peteĩ mbaʼe, peteĩ isiégova oñepysanga hag̃ua ha péicha oñembohory hese. Péro legálmente ivaieterei la ojapóva hikuái. Omeʼẽvo ko léi, Jehová oipytyvõ ipuévlope imbaʼerechakuaa hag̃ua umi orekóvandi algúna diskapasida. w21.12 8, 9 párr. 3, 4

Jacob ningo okyhyjeterei kuri la iñermánogui ha oipyʼapy chupe oiméramo g̃uarã osegi gueteri ipyʼaro hese. Upévare haʼe oñemboʼe Jehovápe ipyʼaite guive, ha upéi katu oguerahaka peteĩ rregálo iporãitereíva iñermáno Esaúpe (Gén. 32:9-15). Ha amo ipahápe, haʼe ojotopárõ guare iñermánondi ohechauka orrespetaitereiha chupe. La Biblia heʼi voi haʼe oñakãityete hague Esaú renondépe, ha ndahaʼéi una térã 2 vésente, síno 7 vése voi. Péicha haʼe ohechauka iñumildeha ha orrespetaha iñermánope, ha ojapo rupi entéro koʼã mbaʼe Jacob ikatu kuri oiko porã jey hendive (Gén. 33:3, 4). ¿Mbaʼépa ñaaprende la ojapo vaʼekuégui Jacob ojotopa hag̃ua iñermáno Esaúndi? Primero ningo haʼe iñumílde ha ojerure voi Jehovápe toipytyvõ chupe. Upéi katu oprepara tekotevẽva guive ojotopa mboyve iñermánondi ikatu hag̃uáicha orresivi porã chupe. Ha ojotopárõ guare hikuái ndahaʼéi ku Jacob oñepyrũva ojodiskuti mbaʼe Esaúndi oikuaa hag̃ua mávapa oreko raʼe la kúlpa. Upéva rangue, Jacob oñehaʼãmbaite kuri oñemoĩ porã jey hag̃ua iñermánondi. ¿Mbaʼéichapa nde ikatu resegi iñehémplo? (Mat. 5:23, 24). w21.12 25 párr. 11, 12

Sapyʼánte ñapensa jave Jesús omano hague oñeperdona hag̃ua ñande pekádo, ikatu hína jaʼe: “Che ningo namereséi ko rregálo porãite”. ¿Mbaʼérepa ikatu ñañeñandu upéicha? Pórke ñane korasõ iñimperfékto, ha ikatu ñanembotavy ha ñanemopensa ndajavaleiha mbaʼeverã, térã nañamereseiha avave ñanderayhu (1 Juan 3:19). Ñañepyrũ jave ñapensa upéicha, ñanemanduʼa vaʼerã “Ñandejára tuichaveha ñane korasõgui”. Upévare tekotevẽ ñañekonvense ñandejupe voi Jehová ñanderayhuetereiha ha ñaneperdonaseha. Ha upearã pyʼỹinte jastudia vaʼerã Iñeʼẽ, ñañemboʼe meme chupe ha jahasa tiémpo ermanokuérandi. ¿Mbaʼérepa iñimportantete jajapo koʼã mbaʼe? Pórke umíva ñanepytyvõta jaikuaa porãve hag̃ua umi kualida porãite Jehová orekóva, ha jahechakuaáta mbaʼeichaite pevépa haʼe ñanderayhu. Jajepyʼamongetáramo káda día la Biblia heʼívare, ñapensa porãvéta, ha ikatúta “jakorrehi” umi mbaʼe vai ñapensáva ha ñañandúva (2 Tim. 3:16). w21.04 23, 24 párr. 12, 13

Jaikuaa haguérente heta mbaʼe ndeʼiséi jajerovia mbaretetamaha. Jastudia rire jajepyʼamongeta vaʼerã umi mbaʼe ñaaprendévare. Upéva ojapo kuri pe oskrivi vaʼekue pe Salmo 77. Haʼéngo oñeñandu vaieterei kuri pórke opensa Jehová ndoguerohoryveimaha chupe ni umi ótro israelítape. Haʼe oñeñandu vaieterei upévare ha ndaikatuvéi ni oke (versíkulo 2-8). ¿Mbaʼépa ojapo upémarõ? Haʼe heʼi Jehovápe: “Ajepyʼamongetáta ne rembiapokuére, ha siémpre apensáta umi mbaʼe rejapóvare” (versíkulo 12). Ko salmísta oikuaa porãiterei kuri umi mbaʼe Jehová ojapo vaʼekue ipuévlo rehehápe ymave, upéicharõ jepe haʼe heʼi: “Ñandejára ningo nopenavéi ñanderehe, ¿hesarái mbaʼe piko ñandehegui? ¿Ipochyeterei mbaʼe piko ajeve nombyasýi la oikóva ñanderehe?” (versíkulo 9). Ko kuimbaʼe ojepyʼamongeta avei umi mbaʼe porãita Jehová ojapo vaʼekuére yma ha mbaʼéichapa oiporiahuvereko ipuévlope (versíkulo 11). Opensa rire entéro koʼã mbaʼére, ¿mbaʼépa ohechakuaa raʼe haʼe? Pe salmísta ohechakuaa Jehová núnka ndohejamoʼãiha ipuévlope (versíkulo 15). w22.01 30 párr. 17, 18

¿Mbaʼéichapa Jehová oñeñandu imanduʼávo umi isiervokuéra ifiélva omano vaʼekuére? ¡Chupe ningo hiʼãitereíma ohecha jey chupekuéra! (Job 14:15). Ñapensamíntena mbaʼeichaitépa oiméne Jehová ohechagaʼu iñamígo Abrahánpe (Sant. 2:23). Oime vaʼerã ohechagaʼu avei Moiséspe, pórke haʼe oñemongeta vaʼekue voi hendive “frénte a frénte” (Éx. 33:11). Ha mbaʼeichaitépa oiméne ohenduseterei jeýma Davídpe, ha umi ótro salmístape opurahéivo umi músika pu rory porã omombaʼeguasu hag̃ua chupe (Sal. 104:33). Koʼã iñamigokuéra omanómaramo jepe, Jehová ndahesaráiri asy chuguikuéra (Is. 49:15). Haʼe imanduʼapaite mbaʼéichapa vaʼekue haʼekuéra. Koʼẽrõitéma haʼe omoingove jeýta chupekuéra, ohendu jeýta umi ñemboʼe porãite ojapóva hikuái ipyʼaite guive, ha oasepta jeýta pe adorasión omeʼẽva chupe hikuái. Oiméramo omano raʼe ndehegui peteĩ rehayhúva, katuete nekonsola ha nembopyʼaguapýta nemanduʼávo koʼã mbaʼére. Oñepuʼãrõ guare Jehováre Edénpe, haʼe oikuaa vaʼekue ivaivetaha ohóvo la situasión ha ndahaʼéi omehorátava. Jehová ndaijaʼeiete voi umi mbaʼe vai ojejapóvare, umi inhustísia ha violénsia oĩvare koʼág̃a ko múndope. w21.07 10 párr. 11; 12 párr. 12

Jahayhu jave ñane ermanokuérape, jahechauka ñamombaʼeha pe rreskáte. ¿Mbaʼérepa? Pórke Jesús omeʼẽ vaʼekue hekove, ndahaʼéi ñanderehehápente, síno ñane ermáno ha ermanakuéra rehehápe avei. Jesús oĩ vaʼekue dispuésto omanóvo hesehapekuéra. Upéicharõ, upéva ohechauka haʼekuéra ivaliosoitereiha chupe g̃uarã (1 Juan 3:16-18). Pe jatrata lájare ñane ermáno ha ermanakuérape, jahechauka hína jahayhuha chupekuéra (Efes. 4:29, 31–5:2). Por ehémplo, ikatu ñaipytyvõ chupekuéra hasykatu jave térã ohasa jave umi situasión ijetuʼúva, umíva apytépe ohupyty jave chupekuéra umi desástre naturál. ¿Péro mbaʼépa jajapo vaʼerã peteĩ ermáno heʼi térã ojapo jave peteĩ mbaʼe ñanembopochýva? ¿Ijetuʼúpa ñandéve sapyʼánte ñaperdona hag̃ua ñande rapichápe? (Lev. 19:18). Oiméramo upéicha, ikatu jasegi ko konsého: “Pesegíkena peñoaguanta ha peñoperdona pende pyʼaite guive, oĩramo jepe penembopochýva peteĩ mbaʼére. Jehová peneperdona haguéicha ipyʼaite guive, peẽ pejapo vaʼerã avei upéicha” (Col. 3:13). Ñaperdona jave ñane ermanokuérape, jahechauka hína ñande Ru yvagapeguápe ñamombaʼeha pe rreskáte ñande pyʼaite guive. w21.04 18 párr. 12, 13

Oiméne hetáma ñambaʼapo jejopy Jehovápe g̃uarã, ha ñaipytyvõma hetápe ojevautisa hag̃ua. Péro ñande jaikuaa jahupytyha entéro koʼã mbaʼe Jehová ñanevendesi rupínte. Avei ñaaprende Apolos ha apóstol Páblogui ko leksión: Amáske jarekove rresponsavilida kongregasiónpe, jarekove avei hetave oportunida ñaipytyvõ hag̃ua oĩ hag̃ua pyʼaguapy kongregasiónpe. Jaagradesete ningo umi ansiáno ha siérvo ministeriálpe ñanepytyvõ haguére ñaime hag̃ua en unida ha pyʼaguapýpe. Haʼekuéra ojapo upéva oguenohẽ jave la Bíbliagui umi konsého omeʼẽva ñandéve, ha avei ndoikói jave oñemoimportantese, síno oipytyvõ enterovépe kongregasiónpe iñeʼẽrendu hag̃ua Jesúspe ha osegi hag̃ua iñehémplo (1 Cor. 4:6, 7). Káda únope Ñandejára omeʼẽ vaʼekue peteĩ avilida, térã ñanepytyvõ ñandevale hag̃ua peteĩ mbaʼépe. Ñande ningo ikatu ñapensa pe jajapóva naiñimportanteguasuiha. Péro oñemopuʼã hag̃ua peteĩ óga, káda ladríllo oñemboguapýva iñimportánte hína, upéicha avei umi mbaʼe michĩva jajapóva oipytyvõ hína oĩ hag̃ua unida kongregasiónpe. Upéicharõ, ñañehaʼãmbaitékena jasegi ñambaʼapo jejopy ani hag̃ua ñakompeti ótrondi. Ha jajedesidíkena jajapotaha opa ikatúva oĩ hag̃ua unida ha pyʼaguapy kongregasiónpe (Efes. 4:3). w21.07 19 párr. 18, 19

Nde ikatu reĩ segúro oikove jeytaha umi rehayhúva omano vaʼekue. Jesús ipyʼaite guive ombyasy vaʼekue iñamigokuérape, ha upévare hasẽ. Upéva ohechauka ñandéve haʼe ipyʼaite guive avei omopuʼãse jeymaha umi omano vaʼekuépe (Juan 11:35). Nde ikatu avei reipytyvõ umi oñembyasývape. Jesús hasẽ vaʼekue Marta ha Maríandi, péro avei ohendu ha okonsola chupekuéra (Juan 11:25-27). Ha ñande ikatu avei jajapo upéicha. Peteĩ ansiáno oikóva Austráliape, hérava Dan, heʼi: “Omano rire che rembireko, aikotevẽterei kuri ótro chepytyvõ. Heta matrimónio naiprovlemaiete vaʼekue chepytyvõ hag̃ua. Ára ha pyhare añekomunika hendivekuéra. Che amombeʼu chupekuéra mbaʼéichapa añeñandu. Sapyʼánte cherasẽ voi chupekuéra, ha haʼekuéra naiprovlemaiete cherendu hag̃ua. Haʼekuéra ojapo avei heta mbaʼe cherehehápe che nameʼẽvéima jave. Por ehémplo, ojohéi chéve che áuto, oho ombaʼejogua che vése, ha ogueru chéve tembiʼu. Heta vése oñemboʼe avei chendive hikuái. Koʼã ermáno ha ermána ohechauka haʼeha ‘amígo verdadéro’, pórke oĩ che ykére ‘ahasa asy jave’” (Prov. 17:17). w22.01 16 párr. 8, 9

Jehová ningo oipota iporãvante ñandéve g̃uarã (Prov. 4:20-22). Upévare ñaneakonseha jave Iñeʼẽ rupive, umi puvlikasión rupive, térã peteĩ ermáno iñexperiénsiava rupive, en rrealida ohechauka hína haʼe ñanderayhuetereiha (Heb. 12:9, 10). Oñemeʼẽ jave ñandéve peteĩ konsého, ñañekonsentra vaʼerã la ojeʼévare ñandéve, ha ndahaʼéi la ojeʼe lájare. Sapyʼánte ikatu hína nañandegustapái la oñemeʼẽ lája ñandéve peteĩ konsého. Upévare oiméramo ñaakonseháta álgienpe, ñañemoĩ vaʼerã ilugárpe ha ñapensa mbaʼéichapa ikatu jaʼe porãnte chupe la jaʼeséva (Gál. 6:1). Péro oiméramo ñande hína la jarresivíva peteĩ konsého, iporãta ñañekonsentráramo la ojeʼévare ñandéve oiméramo jepe nañandegustái la ojeʼe lája kuri. Ikatu voi ñañeporandu koʼã mbaʼe: “Ndachegustáiramo jepe la oñemeʼẽ lája chéve ko konsého, ¿noiméi piko irrasón raʼe? ¿Ikatúpa aaprende álgo ko konséhogui, iñimperféktoramo jepe pe persóna cheakonseha vaʼekue?”. Jahupytýta ningo hetaiterei mbaʼe porã ñañehaʼãmbaitéramo jasegi umi konsého oñemeʼẽva ñandéve. w22.02 12 párr. 13, 14

Jehová oikuaa ñaikotevẽtaha tiémpo ikatu hag̃uáicha jaipeʼa ñandejehegui umi pensamiénto vai ha avei umi vísio (Sal. 103:13, 14). Upévare, ikatu hag̃uáicha ñanepytyvõ haʼe oipuru iñorganisasión, Iñeʼẽ la Biblia ha ijespíritu sánto. Péicha haʼe ñanemombarete, ñanemoarandu ha ñandeapoja ñakambia hag̃ua jahávo tekotevẽhápe. Eipurúkena la Biblia eikuaa hag̃ua mbaʼéichapa eho hína hese. Ñandejára Ñeʼẽ ningo ojogua peteĩ espéhope ha ikatu nepytyvõ ehecha hag̃ua mbaʼetekópa oĩ hína umi mbaʼe repensáva, umi mbaʼe eréva ha avei eñekomporta lája (Sant. 1:22-25). Ha Jehová voi avei siémpre oĩta ndéve g̃uarã reikotevẽha óra hese. Haʼe oikuaa mbaʼéichapa ikatu nepytyvõ, ha oikuaa avei mbaʼépa ereko nde pyʼapýpe (Prov. 14:10; 15:11). Upévare siémpre eñemboʼe vaʼerã chupe ha ejepokuaa estudia porã la Biblia káda día. Avei eime vaʼerã segúro la Jehová heʼíva siémpre iporãveha. Jajapóramo la Jehová heʼíva ningo katuete ñasẽ porãta. Umi oikóva Jehová oipotaháicha ningo rreálmente ovyʼa, isentído chupe la hekove ha ndahaʼéi ku oikóva oñeñandu yvýre hína (Sal. 19:8-11). w22.03 4 párr. 8-10

Ñande jaadora Jehovápe jaapojávo umi projékto de konstruksión orekóva iñorganisasión. La Biblia ningo heʼi pe traváho ojejapo vaʼekue pe tavernákulope ha umi muévle oĩ vaʼekue upépe sagrádo hague (Éx. 36:1, 4). Koʼág̃arupi avei Jehovápe g̃uarã sagrádo hína umi traváho ojejapóva oñemopuʼã hag̃ua peteĩ Salón del Reino ha umi ótro lugár ojepurúva ojeadora hag̃ua chupe. Oĩ ningo umi ermáno ha ermanakuéra oipurúva heta itiémpo ojapo hag̃ua koʼã mbaʼe. ¡Ajépa ñamombaʼete la ojapóva hikuái Ñandejára Rréino rehehápe! Jaikuaaháicha haʼekuéra opredika avei, ha oĩ voi ijapytepekuéra ojaposéva iprekursorádo. ¿Mbaʼéichapa umi ansiáno ikatu oapoja umi konstruksión ha avei umi ermáno ombaʼapóvape umívape? Por ehémplo, peteĩva ojeruréramo iprekursorádo rregulár ha okalifika upearã, ndaipóri provléma oñenombra hag̃ua chupe. Ha ñande ndahaʼéiramo jepe profesionál la konstruksiónpe, lomímonte enterove ikatu ñaipytyvõ ñamopotĩ ha ñamantene hag̃ua ñane Salón. w22.03 22 párr. 11, 12