Marzo

Pe ehémplo oĩvape Mateo 25:31-36-pe, “umi ovecha” haʼe hína umi ihústova oikóva koʼã ára pahápe, ha orekóva esperánsa oikóvo pára siémpre ko yvy ape ári. Koʼã ovecha ojapo ikatumíva oipytyvõ hag̃ua Cristo ermanokuérape opredika hag̃ua umi notísia porã ko yvy tuichakuére, ha ojapo hag̃ua la héntegui disípulo (Mat. 24:14; 28:19, 20). ¿Ha mbaʼéichapa umi ótro ovecha oipytyvõ avei Cristo ermanokuérape? Unas kuánta semána og̃uahẽ mboyve pe Konmemorasión, umi ótro ovecha ojapo jepi opa ikatúva oinvita hag̃ua la héntepe oho hag̃ua Konmemorasionhápe. Haʼekuéra ojapo avei opa ikatúva káda kongregasión oĩva ko yvy ape ári ojapo hag̃ua pe Konmemorasión. Umi ótro ovecha ovyʼaiterei oipytyvõ haguére péicha Cristo ermanokuérape. Haʼekuéra oikuaa Cristo heʼi hague opa mbaʼe ojapóva hikuái oipytyvõ hag̃ua iñermanokuérape, ojapoha hína hesehápe voi (Mat. 25:37-40). w22.01 22 párr. 11, 12

Ñande ikatu jatrata umi héntepe Jesús ojapo haguéicha, ha jahechauka umi kualida haʼe ohechauka vaʼekue. Por ehémplo, haʼe ningo oiporiahuvereko vaʼekue peteĩ leprósope, oñemoĩ peteĩ kuñakarai hasykatuetéva lugárpe, ha ombyasyeterei vaʼekue umi ihénte manóvape. Jasegi jave Jesús ehémplo, jasegi hína avei Jehová ehémplo (Mar. 1:40, 41; 5:25-34; Juan 11:33-35). Amáske jajoguave Jehovápe, ñañemoag̃uivéta hese. Jasegíramo Jesús pypore ko múndo aña ndaikatumoʼãi ñandedesvia Jehová servísiogui. Pe pyhare omano mboyve, Jesús ikatu vaʼekue heʼi: “Che aganáma ko múndope” (Juan 16:33). Haʼe heʼise vaʼekue ndohejái hague umi hénte oĩva ko múndope okambia chugui umi mbaʼe opensáva, ojapóva térã ohupytyséva. Jesús núnka ndahesaráiri vaʼekue maʼerãpa oñembou rakaʼe chupe ko yvy ape ári: Ombotuicha hag̃ua Jehová réra. ¿Mbaʼépa ikatu jaʼe ñandejehe? Ko múndope oĩ heta mbaʼe ikatúva ñandedesvia Jehová servísiogui. Péro jasegíramo Jesús ehémplo ha ñamotenonde umi mbaʼe Jehová oipotáva jajapo, ñande avei ‘ñaganáta ko múndope’ (1 Juan 5:5). w21.04 3, 4 párr. 7, 8

Apóstol Pablo oikuaa porã Jesús opromete hague: “Entéro umi ohechaukáva ojeroviaha [cherehe] ikatúta oikove pára siémpre” (Juan 3:16; Rom. 6:23). Jahechaháicha, Pablo ojerovia vaʼekue pe rreskátere. Haʼe oĩ vaʼekue segúro Jehová operdonasetereiha umi oñarrepentívape, ivaietereíramo jepe upe ojapo vaʼekue (Sal. 86:5). ¿Mbaʼépa oipytyvõ vaʼekue avei Páblope osegi hag̃ua oservi Jehovápe? Haʼe ojerovia vaʼekue Jehová ohayhuetereiha chupe, ha oĩ vaʼekue segúro upévagui pórke oikuaa Haʼe ombou hague Jesúspe omano hag̃ua hesehápe. Jahechamína mbaʼépa Pablo heʼi vaʼekue Ñandejára Raʼýre: “Haʼe ningo cherayhu ha omeʼẽ kuri hekove cherehehápe” (Gál. 2:20). Pablo nopensái vaʼekue haʼe iñañaitereiha Ñandejára ndaikatúi hag̃uáicha ohayhu chupe. Haʼe ndeʼíri vaʼekue: “Chéngo antende mbaʼérepa Jehová ohayhu umi che ermanokuérape, péro aniche vaʼerã la chéve cherayhu”. Upéva rangue, haʼe omomanduʼa vaʼekue umi rrománope: “Cristo omano ñanderehehápe ñande pekadór aja gueteri” (Rom. 5:8). ¡Ndaipóri ningo mbaʼeve ojoko vaʼerã Ñandejárape ñanderayhu hag̃ua! Pablo ningo oikuaa vaʼekue mbaʼeichaite pevépa imbarete Ñandejára mborayhu, ha oikuaa vaʼekue avei Jehová ipasiensiaiterei hague umi israelítare. w21.04 22 párr. 8-10

Jajapo jave peteĩ estúdio bíblico, ñaipytyvõ ñane estudiántepe ohayhu hag̃ua Jehovápe. ¿Mbaʼéichapa ikatu jajapo upéva? Jaheka umi oportunida ñamboʼe hag̃ua ñane estudiántepe umi kualida porã Jehová orekóva. Ñaipytyvõ chupe ohechakuaa hag̃ua Jehová haʼeha Ñandejára ovyʼáva, ha oĩha umi ohayhúva chupe ykére (1 Tim. 1:11; Heb. 11:6). Jahechauka pe estudiántepe mbaʼéichapa ideprovéchota chupe ojapóramo umi mbaʼe oaprendéva, ha mbaʼeichaitépa umíva ohechauka Jehová ohayhuha chupe (Is. 48:17, 18). Amáske pe estudiánte ohayhuve ohóvo Jehovápe, koʼýte okambiaséta tekotevẽhápe. Pe estudiánte ojesakrifika vaʼerã ikatu hag̃uáicha ojevautisa. Oĩ ningo umi estudiánte tekotevẽtava osakrifika umi imbaʼerepy. Avei heta estudiánte oheja vaʼerã umi iñamigokuéra ndohayhúiva Jehovápe. Ha ótrope katu ifamília oheja rei ndochaʼéi rupi Testigokuérare. Jesús opromete umi osegíva chupe ni mbaʼevéicharõ nombyasymoʼãiha upéva. Jehová ovendesi ha orresivíta chupekuéra ifamília ojoayhuetévape (Mar. 10:29, 30). w21.06 4 párr. 8, 9

Apóstol Pablo ohechauka jajapo jave disípulo haʼeteha ñañemitỹva hína, pórke ndahaʼéi ñañotỹnte vaʼerã pe semílla. Haʼe omomanduʼa vaʼekue umi Corintoguápe: “Che añotỹ pe semílla, Apolos orrega [...]. Peẽ haʼe Ñandejára kokue haʼe oñemitỹva hína” (1 Cor. 3:6-9). Ñande ningo ñambaʼapo hína ‘Ñandejára kokuépe’. Upévare ndahaʼéi ñañotỹnteva pe semílla, síno jarrega ha kontinuadoite jarrevisa okakuaa porãpa hína. Péro ñande ñarrekonose avei Ñandejára haʼeha pe omongakuaáva pe semílla. ¡Tuichaiterei priviléhio ningo japredika ha ñamboʼe ótrope pe añetegua! Añetehápe ko traváho ñanembovyʼaiterei voi. Apóstol Pablo ningo oipytyvõ vaʼekue heta Tesalonicaguápe oiko hag̃ua chuguikuéra disípulo, ha omombeʼu vaʼekue mbaʼéichapa oñeñandu heʼírõ guare: “Ág̃a oĩ aja ñande Ruvicha Jesús, ¿máva piko haʼéta ore esperánsa? ¿Máva piko orembovyʼáta, ha máva piko haʼéta ore prémio orembopyʼarorýva henondépe? ¿Ndahaʼéi piko peẽ? Añetehápe ore rovyʼa ha oreorgullóso pendereheve” (1 Tes. 2:19, 20; Hech. 17:1-4). w21.07 3 párr. 5; 7 párr. 17

Jehová ningo ñandegueru vaʼekue káda únope ha ñanemoag̃ui ijehe (Juan 6:44). Epensamína mbaʼépa upéva heʼise. Jehová ojesareko porã hína kuri umi millones de persóna oĩvare ko múndo tuichakuére, ha ohecha nde erekoha peteĩ mbaʼe ivaliosoitereíva chupe g̃uarã: Haʼe ohechakuaa nesinseroha ha ikatuha rehayhu chupe (1 Crón. 28:9). Jehová ningo ndekuaa, nentende ha nderayhueterei. ¡Ajépa ñanemokyreʼỹete jaikuaávo upéva! Jehová ningo nderayhueterei ha ohayhueterei avei enterove ñane ermanokuérape. Jahechakuaa hag̃ua upéva, Jesús okompara vaʼekue Jehovápe peteĩ pastór oñangarekóvare ijovechakuérare. Oiméramo ko pastór oreko 100 ovecha ha okañy chugui peteĩ, ¿mbaʼépa ojapóta? Haʼe oheja “umi 99 pe montáñape ha oñepyrũ oheka upe okañy vaʼekuépe”. Ha ág̃a otopa vove hese, ndaipochymoʼãi okañy haguére chugui. Upéva rangue haʼe ovyʼaitereíta. ¿Mbaʼépa ñanemboʼe ko ehémplo? Jehová hakateʼỹha káda uno umi ijovecha mimíre. Jesús heʼi vaʼekue: “Che Ru oĩva yvágape ndoipotái oñehundi ni peteĩ koʼã che disípulo iñumíldeva mitãicha” (Mat. 18:12-14). w21.06 20 párr. 1, 2

Jajepyʼamongetáramo mbaʼeichaitépa Jehová ñanderayhu, tuichaiterei ñanepytyvõta jahayhuve hag̃ua chupe ha avei ñañemoag̃uive hag̃ua hese (Rom. 8:38, 39). Avei ñanemokyreʼỹta jasegi hag̃ua Jesús ehémplo (1 Ped. 2:21). Og̃uahẽvo ohóvo pe Konmemorasión, ñande jalee jepi umi téxto omombeʼúva mbaʼépa Jesús ojapo una semána omano mboyve, mbaʼéichapa omano, ha mbaʼéichapa oikove jey. Upéi pe Konmemorasión díape pe diskúrso ñanemomanduʼa mbaʼeichaitépa Jesús ñanderayhu (Efes. 5:2; 1 Juan 3:16). Jaleévo mbaʼeichaitépa Jesús ojesakrifika vaʼekue ñanderehe ha jajepyʼamongeta hese, ñanemokyreʼỹta jaiko hag̃ua “Jesús oiko haguéicha” (1 Juan 2:6). Ñañehaʼãmbaite vaʼerã avei Jehová ñanderayhu hag̃ua (Jud. 20, 21). Jehová siémpre ñanderayhúta ñañehaʼãmbaitéramo ñambovyʼa chupe, ñamopotĩ héra ha ñaneñeʼẽrendu chupe (Prov. 27:11; Mat. 6:9; 1 Juan 5:3). Pe Konmemorasión ñanemokyreʼỹ jaiko hag̃ua siémpre Jehová oipotaháicha, péicha haʼetéta voi jaʼéva chupe: “Jehová, aipota siémpre cherayhu”. w22.01 23 párr. 17, 18; 25 párr. 19

Jehová omeʼẽ vaʼekue ñandéve pe liverta jadesidi hag̃ua. Ñande ningo ikatu jadesidi mbaʼépa jajapóta ñande rekovépe. Ñande Ru ñanderayhuetéva ningo ovyʼaiterei ñande jadesidi jave jaservitaha chupe (Sal. 84:11; Prov. 27:11). Ñande ikatu jaipuru upe liverta jarekóva jadesidi porã hag̃ua hetave mbaʼépe. Ikatu jasegi Jesús ehémplo jadesidi jave ñamotenonde ñande rapichakuéra oikotevẽva. Peteĩ díape, Jesús ha ijapostolkuéra ikaneʼõiterei vaʼekue ha oho hikuái peteĩ lugár itrankilohápe opytuʼuʼimi hag̃ua. Péro ndaikatúi jey opytuʼu hikuái, pórke peteĩ hénte aty oho hapykuerikuéra ha oipotaiterei Jesús omboʼe chupekuéra. Jesúspe katu nombopochýi upéva, síno ombyasyeterei umi héntepe ha “oñepyrũ omboʼe chupekuéra heta mbaʼe” (Mar. 6:30-34). Ñande jasegi jave Jesús ehémplo, ha jaipuru ñane tiémpo ha ñane mbaretekue ñaipytyvõ hag̃ua ótrope, ñambotuicha hína ñande Ru yvagapeguápe (Mat. 5:14-16). w21.08 3 párr. 7, 8

Jehovápe ningo ogustaiterei la varieda. Upéva ñande jaikuaa pórke haʼe ojapo vaʼekue diferénte kláse plánta, animál ha yvyporakuéra jepe. Káda uno ñande ñanediferénte ha ndaipóri voi ótro ñandeichaguaite. Upévare Jehová núnka nañanekomparái ótrore. Haʼe ohecha la oĩva ñane korasõme ha oikuaa mbaʼeichagua persónapa ñande (1 Sam. 16:7). Jehová oikuaa avei mbaʼépepa ñandevale, mbaʼépa ndajajapokuaái ha mbaʼéichapa ñañemongakuaa vaʼekue. Ha haʼe ndojeruréi ñandehegui umi mbaʼe ndaikatumoʼãiva jajapo. Tekotevẽ ningo jasegi Jehová ehémplo ha jajehecha ñandejupe haʼe ñanderechaháicha. Péicha ikatúta “ñapensa porã ñandejehe” ha ndajaikomoʼãi ñapensa ñaneimportantetereiha térã ndajavaleiha mbaʼeverã (Rom. 12:3). Ñande ningo ikatu ñaaprende ñande rapichakuéra ehémplogui. Ñamoĩ chupe jaikuaaha peteĩ ermána térã ermáno iguapoitereívape predikasiónpe (Heb. 13:7). Upéicharõ ñaaprendekuaa chugui mbaʼéichapa ikatu ñandekatupyryve predikasiónpe (Filip. 3:17). Péro ndahaʼéi hína la mísma kósa jasegi peteĩ persóna ehémplo ha ñañekompara hese. w21.07 20 párr. 1, 2

Ñande ikatu ñamombarete ñande jerovia ñande Apoharére jajesarekóvo umi animál, plánta ha estrellakuérare (Sal. 19:1). Amáske jastudia koʼãichagua mbaʼe, ñañekonvensevéta Jehová haʼeha opa mbaʼe Apohare. Jastudia jave umi mbaʼe oĩva ñande jerére, jajepyʼamongetákena mbaʼe mbaʼépa umíva ñanemboʼe ñande Apoharégui (Rom. 1:20). Por ehémplo, pe kuarahy ningo ombyaku ha ohesape ko yvy ikatu hag̃uáicha ojeikove pype. Péro pe kuarahy opoi avei umi rrájo ultravioléta ikatúva ñandeperhudika. Upévare ñaikotevẽmante peteĩ mbaʼe ñandeprotehe vaʼerã umívagui. Ha añetehápe oĩ voi peteĩ mbaʼe ñandeprotehéva. ¿Mbaʼépa hína upéva? Ko yvy ningo oreko pe kápa de osóno, haʼéva peteĩ gas oĩva ko yvy jerére ha ñandeprotehéva umi rrájo opoívagui pe kuarahy ha ikatúva ñandeperhudika. Amáske imbareteve umi rrájo ultravioléta, pe kápa de osóno iñanambusuve avei. ¿Ajépa upéva ohechauka oĩha peteĩ Kreadór ñanderayhuetereíva ha ivaletereíva? w21.08 17 párr. 9, 10

Peteĩ persóna ojevautisa rire jepe, jasegi vaʼerã jahayhu ha jarrespeta chupe (1 Juan 4:20). ¿Mbaʼéichapa ikatu jajapo upéva? Por ehémplo, ñane ermáno ojapóramo peteĩ mbaʼe ñande nañantendéiva, ndajaikomoʼãi ñapensa vai hese ni ñaimoʼã ojapoha upéva openságui ijehénte. Upéva rangue, ñakonfiáta hese, ñamombaʼéta chupe ha ñapensáta tuichaveha ñandehegui (Rom. 12:10; Filip. 2:3). Ñande ningo jahechauka vaʼerã ñambyasyha opaichagua héntepe ha ñanembaʼeporã hendivekuéra. Ñande ñaimeséramo Jehová famíliape pára siémpre, jaiko vaʼerã Ñandejára Ñeʼẽ heʼiháicha. Por ehémplo, Jesús omboʼe vaʼekue ñande jahechauka vaʼerãha ñambyasyha opaichagua héntepe, ha ñanembaʼeporã hendivekuéra, umi ñane enemígondi jepe (Luc. 6:32-36). Sapyʼánte ningo ikatu ijetuʼu ñandéve jajapo hag̃ua upéva. Oiméramo upéicha, ñaaprende vaʼerã ñapensa Jesús opensaháicha, ha jajapo umi mbaʼe haʼe ojapo vaʼekue. Ñañehaʼãmbaite jave ñaneñeʼẽrendu Jehovápe ha jasegi Jesús ehémplo, jahechauka hína ñande Ru yvagapeguápe ñaimeseha ifamíliape pára siémpre. w21.08 6 párr. 14, 15

Ñaaprende vaʼerã jajerovia Jehováre. Jajeroviáramo hese ha jajapóramo pe iporãvéva chupe g̃uarã, haʼe opromete voi ohykuavotaha ñande ári hetaiterei vendisión. La Bíbliape oñemombeʼu oĩ hague hetaiterei persóna ombaʼapo jejopy vaʼekue Ñandejára servísiope, ha ñande ikatu jasegi iñehemplokuéra. Heta vése haʼekuéra ohechauka raẽ vaʼerã kuri ojeroviaha Jehováre, haʼe ovendesi hag̃ua chupekuéra. Por ehémplo, Ñandejára ovendesi vaʼekue Abrahánpe haʼe oheja rire ae hóga, “ndoikuaáiramo jepe moõpa oho hína” (Heb. 11:8). Jacob katu orresivi vaʼekue peteĩ vendisión espesiál oñorairõ rire ae peteĩ ánhel ndive (Gén. 32:24-30). Ha umi israelita oike potaitérõ guare pe Tiérra Prometídape, umi hénte ikatu vaʼekue okrusa pe Rrío Jordán umi saserdóte opyrũ rire ae pe rrío oríllape, pe y osyry hatãitereíramo jepe (Jos. 3:14-16). Ñane tiémpope avei oĩ heta ermáno ha ermána ojeroviáva Jehováre ha oñehaʼãva ojapove iservísiope, ha ñande ikatu jasegi iñehemplokuéra. w21.08 29, 30 párr. 12-14

Peẽ ermáno ha ermanakuéra ijedáva peikuaa porã mbaʼéichapa yma ojejapo vaʼekue heta mbaʼe Jehová organisasiónpe. Péro pehechakuaa avei iñimportanteha jajadapta umi kámbiore. Ha peẽ ijedáva pejevautisa ramóva, peẽ peipytyvõkuaa avei ótrope heta hendáicha. Umi imitãva ningo ovyʼaitereíta peẽ pekaseáramo chupekuéra umi mbaʼe pehasa ha peaprende vaʼekue. Jehová katuete penevendesíta tuichaháicha peẽ ‘siémpre pendepojeráramo’ ha pekomparti umi mbaʼe peaprende vaʼekue pentrena hag̃ua ótrope (Luc. 6:38). Umi ijedáva ha umi imitãva oñemoag̃ui jave ojuehe tuichaiterei ikatu oñopytyvõ (Rom. 1:12). Káda uno oreko peteĩ mbaʼe ivaliósova pe ótro ndorekóiva. Umi ijedáva ningo iñarandu ha oreko heta experiénsia ohasáma rupi heta mbaʼe hekovépe. Ha umi imitãva katu imbarete ha ikyreʼỹ. Upévare umi ijedáva ha imitãva ombaʼapóramo oñondive oñoamigoitéicha omombaʼeguasúta Jehovápe, ñande Ru yvagapegua ñanderayhuetéva, ha haʼéta hikuái peteĩ vendisión enterovépe g̃uarã kongregasiónpe. w21.09 8 párr. 3; 13 párr. 17, 18

¿Mbaʼérepa Jesúspe ojejuka lája omoñepysanga vaʼekue heta judíope? Pórke Jesúspe ojejuka vaʼekue peteĩ yvyráre, ha upévare chupekuéra g̃uarã Jesús haʼe vaʼekue peteĩ kriminál ha pekadór, ndahaʼéi pe Mesías (Deut. 21:22, 23). Umi judío oñepysanga ha orrechasáva Jesúspe ndoaseptaséi vaʼekue haʼe iñinosenteha, ojeakusa rei hague chupe, ha ojejapo hague hese heta inhustísia. Umi hués okondena vaʼekue Jesúspe ndojapoiete voi hustísia. Pe Trivunál Suprémo Judío pyaʼe pyaʼéntema oñembyaty ohusga hag̃ua Jesúspe, ha ndosegiriete voi umi léi heʼíva mbaʼéichapa ojehusga vaʼerã peteĩ persónape (Luc. 22:54; Juan 18:24). Umi hués ningo ofavoreseʼỹre avavépe, ohendúnte vaʼerã kuri umi mbaʼe ojeʼéva Jesúsre ha umi pruéva oĩva ikóntrape. Péro upéva rangue, haʼekuéra voi oñemoĩ “oheka testígo fálso oakusa hag̃ua Jesúspe ikatu hag̃uáicha ojejuka chupe” (Mat. 26:59; Mar. 14:55-64). Ha Jesús orresusita rire jepe, umi hués osegi ojapo inhustísia. Haʼekuéra opaga “heta porã pláta” umi soldádo rrománo oñangareko vaʼekuépe Jesús sepultúrare, ikatu hag̃uáicha ijapu ha heʼi opárupi Jesús disipulokuéra omonda hague hetekue (Mat. 28:11-15). w21.05 11 párr. 12, 13

Jehová ningo ikatu ohundi ko múndo aña ogustaha óra chupe. Péro ajépa tuichaitéma ñanevenefisia haʼe ipasiénsia rupi. Enterove Adán ha Eva familiare ñanasérema voi ñaneimperfékto. Upéicharõ jepe, Jehová ñanderayhu ha oñangareko ñanderehe, ha opromete ohunditaha ko múndo aña (1 Juan 4:19). Haʼe omoĩma voi peteĩ fécha oipeʼaitetahápe umi mbaʼe ombohasa asýva ifamiliakuérape. Ñapensávo Jehová peichaite peve ñanderayhuha, upéva ñanemomýi vaʼerã jasegi hag̃ua ñaaguanta hendive tekotevẽha peve. Jehová ningo omoĩ ñandéve pe ehémplo de aguánte iporãvéva, ha Jesús osegi porã vaʼekue Itúa ehémplo. Haʼe oĩrõ guare ko yvy ape ári, ñanderayhupápe oaguanta vaʼekue heta mbaʼe vai ojeʼéva hese, oñemotĩ ha ultimoitépe katu ojetortura ha ojeklava chupe pe yvyráre (Heb. 12:2, 3). Jehová ehémplo de aguánte katuete omombareténe raʼe Jesúspe oaguanta hag̃ua. Ha ñandéve avei ikatu ñanemombarete. w21.07 12, 13 párr. 15-17

Ñande Ru yvagapegua ningo káda día ojapo upéva ñanderehehápe (Sal. 103:10-14). Jesús segidorkuéra iñimperfékto vaʼekue, péro haʼe lomímonte operdona chupekuéra. Jesús ningo omeʼẽ vaʼekue voi hekove jepe ñanderehehápe ikatu hag̃uáicha oñeperdona ñandéve ñande pekadokuéra (1 Juan 2:1, 2). Ñande ningo jajoayhuvéta ñane ermanokuérandi ‘ñañoperdonáramo ñande pyʼaite guive’ (Efes. 4:32). Péro jaikuaaháicha, sapyʼánte ikatu ijetuʼu ñandéve ñaperdona ñande rapichápe, upévare ñañehaʼãmante vaʼerã ñamehora. Peteĩ ermána oñandu oipytyvõ hague chupe pe artíkulo osẽva rrevísta Ñemañaháme, hérava “Peñoperdona pende pyʼaite guive”. Haʼe heʼi: “Pe artíkulo omyesakã kuri ñaporoperdona ndeʼiseiha jaheja reitanteha umi mbaʼe vai ojejapóva, térã ñapensa vyroreinteha upéva, ñandeperhudikaʼimíramo jepe. Ñaporoperdonakuaáramo ndajapytamoʼãi ñandepyʼaro pe ofalla vaʼekuéndi ha ñañehaʼãmbaitéta jasegi hag̃ua ñandepyʼaguapy”. Ñaperdonávo ñane ermanokuérape ñande pyʼaite guive, jahechauka hína jahayhuha chupekuéra ha jasegiha ñande Ru yvagapegua ehémplo. w21.09 24 párr. 15, 16

Jesús ningo ohayhu vaʼekue umi enseñánsa verdadéra, umíva hína umi enseñánsa ohechaukáva mbaʼeichaguápa Ñandejára ha mbaʼépa ojapóta. Umi mbaʼe Jesús ojapóvare, ohechauka vaʼekue haʼe ogueroviaha koʼã enseñánsa ha upévare omboʼe umíva umi héntepe (Juan 18:37). Jesús segidorkuéra teete ohayhueterei vaʼekue avei umi enseñánsa verdadéra (Juan 4:23). Apóstol Pedro heʼi vaʼekue voi pe rrelihión kristiána haʼeha ‘Ñandejára rape’, pórke ojegia umi enseñánsa verdadérare oadora hag̃ua chupe (2 Ped. 2:2). Umi kristiáno ypykue ningo ohayhu vaʼekue umi enseñánsa verdadéra. Upéicha rupi orrechasa hikuái umi idéa personál, umi kreénsia rrelihiósa ha umi kostúmbre oñemoĩva umi enseñánsa verdadérare (Col. 2:8). Upéicha avei, koʼág̃arupi umi kristiáno verdadéro oñehaʼãmbaite “oiko pe añetegua rapére”. Upévare ojasegura hikuái oñemopyendaha hína Jehová Ñeʼẽme pe oiko lája ha umi mbaʼe ogueroviáva (3 Juan 3, 4). Ñande testígo de Jehová ndajaʼéi ñandejehe jaikuaaha enteroite mbaʼe oĩva Ñandejára Ñeʼẽme. Sapyʼánte jajavy avei mbaʼéichapa ñantende peteĩ enseñánsa oĩva la Bíbliape térã mbaʼéichapa oñeorganisa pe kongregasión. Ha upéicha jave, ojejapo umi kámbio tekotevẽva. w21.10 21, 22 párr. 11, 12

Yma ningo umi murálla omongoráva umi siuda oprotehe vaʼekue umi héntepe iñenemigokuéragui. Ha pe mborayhu ifiélva Jehová ohechaukáva ojogua pe murállape pórke oprotehe pe amista jarekóva hendive, ani hag̃ua mbaʼevete asy ombyai ni omokangy ñandehegui. Ha ndahaʼéi upévante, pe mborayhu ifiélva Jehová ohechaukáva omomýi voi chupe ñanemoag̃ui hag̃ua ijehe (Jer. 31:3). Pe salmísta David oipuru vaʼekue avei ótra komparasión ohechauka hag̃ua mbaʼéichapa Jehová mborayhu ifiélva ñandeprotehe. Haʼe heʼi vaʼekue: “Ñandejára, nde ningo peteĩ lugár isegúro porãva ikatuhápe ajeprotehe, nde rehechauka chéve cherayhuha ha núnka nderefallái chendive”. David heʼi vaʼekue avei Jehováre: “Ñandejára cherayhueterei ha ndofallái chendive. Haʼe peteĩ lugár isegúro porãva ha siémpre chesalva. Ñandejára chéve g̃uarã peteĩ lugár ikatuhápe ajeprotehe. Haʼe hína che eskúdo ha che añemoag̃ui hese oñangareko hag̃ua cherehe” (Sal. 59:17; 144:2). ¿Mbaʼérepa David okompara vaʼekue Jehová mborayhu peteĩ lugár isegúro porãvare ikatuhápe ojeprotehe? Pórke tahaʼe haʼéva pe lugár jaikoha, jaservíma guive Jehovápe haʼe siémpre omeʼẽta ñandéve entéro mbaʼe ñaikotevẽva japrotehe hag̃ua pe amista jarekóva hendive. w21.11 6 párr. 14, 15

Peteĩ jey Jesús ha idisipulokuérape ojagarra peteĩ torménta vai pe márpe. Upérõ Jesús oaprovecha la oikóva omboʼe hag̃ua idisipulokuérape tekotevẽha ojeroviave (Mat. 8:23-26). Pe torménta ivaieterei kuri ha la y oikepa pe varkoʼípe, péro Jesús trankiloite oke hína kuri. Upéi idisipulokuéra okyhyje vaipáma ha omombáy Jesúspe osalvami hag̃ua chupekuéra. Péro haʼe heʼi: “¿Mbaʼére piko pekyhyje ha pejeroviaʼiete?”. ¿Ha mbaʼetekópa nde? ¿Ndejagarrámapa raʼe avei peteĩ torménta vai? Upéicha jave ikatu hína ijetuʼu. Ha oimérõ nandejagarrái peteĩ torménta, ikatu oime la ne provléma la ojoguáva la torméntape, pórke ndeahoʼipa ha ndereikuaái mbaʼépa rejapóta esẽ hag̃ua chugui. Por ehémplo, ikatu oime nderasy vai, ha upévare avése ikatu ejepyʼapyeterei ha nderesaráima Jehovágui. Péro aníkena eheja upéva oiko nderehe, lomímontekena ejerovia Jehováre. Eñemboʼékena avei chupe ha emombarete nde jerovia. Upearã ikatu epensa mbaʼéichapa Jehová nepytyvõma vaʼekue voi anteve (Sal. 77:11). Nde ikatu reĩ segúro Jehová núnka nanderejamoʼãiha, ni koʼág̃a ni amo gotyove. w21.11 22 párr. 7, 10

Algúno ikatu opensa nomondaiha hína ótrope ndoipeʼáiramo chugui a propósito mbaʼeve. Péro ndahaʼéi upévante, pórke la hénte ojapo jepi avei heta mbaʼe omonda hag̃ua hapichápe oñemeʼẽʼỹre enkuénta. Por ehémplo peteĩ komersiánte ndoipurúiramo peteĩ pésa térã valánsa ijexáktova, legálmente omonda hína umi ombaʼejoguávape chugui. Levítico 19:13 ohechauka upéva ñakumpli vaʼerãha avei jajapo jave umi negósio, pórke omensiona ótro detálle: “Nerembotavýi vaʼerã nde rapichápe”. Pe octavo mandamiénto heʼíramo jepe sólamente “ani remonda”, umi detálle oĩva kapítulo 19-pe ñanepytyvõ jaikuaa hag̃ua mbaʼéicha javépa ñakumpli vaʼerã avei upe léi, por ehémplo jajapo jave negósio. ¿Ha mbaʼéichapa ñanepytyvõ upéva ñandéve? Ñanemboʼe jareko vaʼerãha enkuénta la Jehová opensáva koʼã mbaʼére. Ha iporãta voi ñañeporandúramo mbaʼetekópa ñaime hína: “¿Akumplípa añetehápe la heʼíva Levítico 19:11-13? ¿Tekotevẽpa akambia algúna kósape ajapo jave negósio térã ambaʼapo lájape?”. w21.12 9, 10 párr. 6-8

Káda día ñañemboʼe jave ñaneañoháme, jaʼe Jehovápe mbaʼépepa jafalla raʼe ha jajerure chupe ñaneperdonami hag̃ua. Jaikuaaháicha, oiméramo japeka vai raʼe, ñaikotevẽta avei umi ansiáno ñanepytyvõ. Haʼekuéra ñanerendúta ha mborayhúpe omeʼẽta ñandéve umi konsého oĩva Ñandejára Ñeʼẽme. Haʼekuéra oñemboʼéta ñanendive ha ojeruréta Jehovápe ñaneperdona hag̃ua, ikatu hag̃uáicha jareko jey peteĩ amista iporãva hendive (Sant. 5:14-16). Jajepyʼamongetákena avei pe rreskátere. Katuete oiméne hasy asy ñandéve ñapensávo mbaʼeichaitépa heta osufri Ñandejára Raʼy. Péro amáske jajepyʼamongeta pe sakrifísio Jesús ojapo vaʼekuére, jahayhuvéta chupe ha Itúape. Ha káda áño ikatu jaagradeseve pe rreskátere jahávo Konmemorasionhápe jagueromanduʼa hag̃ua Jesús omano hague día, ha avei kyreʼỹme ñainvitávo ótrope ñanemoirũ hag̃ua. ¡Ajépa tuichaite priviléhio omeʼẽ ñandéve Jehová opermitívo ñamboʼe ótrope Itaʼýragui! w21.04 18, 19 párr. 13-16

Epensamína mbaʼépa ojapo vaʼekue Jesús peteĩ vuéltape oúrõ guare hetaiterei hénte hendápe peteĩ montáñape. Pe pyhare upe mboyve ningo Jesús tóda la nóche oñemboʼe kuri, ha oiméne ikaneʼõiterei raʼe. Péro ohechárõ guare umi hénte apytépe oĩha heta imboriahúva ha hasykatúva, oipytyvõseterei voi chupekuéra. Ha ndahaʼéi omongueránteva umi héntepe, síno upérõ guare ojapo vaʼekue peteĩva umi diskúrso iporãvéva ojejapóva koʼág̃a peve: Pe Sermón del Mónte (Luc. 6:12-20). Jesús oñemotiémpo vaʼekue avei oipytyvõ hag̃ua la héntepe, sapyʼánte oĩséramo jepe haʼeño. ¿Ikatúpa reñeimahina mbaʼéichapa oiméne haʼe oñeñandu raʼe oikuaárõ guare ojejuka hague Juan el Bautístape? La Biblia heʼi voi: “Ohendúvo upéva, Jesús ojupi peteĩ varkoʼípe ha oho upégui peteĩ lugár ikatuhápe oĩ haʼeño” (Mat. 14:10-13). Péro hetaiterei hénte oho hendápe pe lugár haʼe oho haguépe oĩ hag̃ua haʼeño (Mar. 6:31-33). Jesús ohechakuaa umi hénte oikotevẽha oñepytyvõ ha oñekonsola chupekuéra Ñandejára Ñeʼẽ rupive, ha upévare ojapo upéva (Luc. 9:10, 11). w22.02 21 párr. 4, 6

¿Mbaʼépa ikatu jajapo ñañemeʼẽramo enkuénta ñamoñeñandu vai hague peteĩ ermánope? Jajerure Jehovápe tañanepytyvõ. Por ehémplo, ikatu jajerure chupe ovendesi hag̃ua umi mbaʼe jajapóva jaiko porã jey hag̃ua ñane ermánondi. Iporãta ningo japytaʼimíramo ha ñapensa mbaʼetekópa ñaime hína ñande. Por ehémplo ikatu ñañeporandu koʼã mbaʼe: “¿Ijetuʼúpa chéve arrekonose hag̃ua ajavy hague ha ajediskulpa ikatu hag̃uáicha roiko porã jey? ¿Mbaʼéichapa oñeñandúta Jehová ha Jesús, che voi púntape añehaʼãramo añemoĩ porã jey che ermánondi?”. Asegún mbaʼéichapa ñarresponde koʼã pregúnta ikatu hína jahechakuaa tekotevẽha jajapo la Jesús heʼi vaʼekue ha ñaneumílde. Upéva ñanepytyvõta ikatu hag̃uáicha jajogueraha porã jey ñane ermanokuérandi. Ñañehaʼãramo ñañemoĩ porã jey peteĩ ermánondi, iñimportanteterei ñaneumílde (Efes. 4:2, 3). Jaha vove ñañemongeta hendive jareko vaʼerã enkuénta mbaʼépa la jahupytyséva. Ñande ningo jajogueraha porãse jey ñane ermánondi ha jaipota haʼe oñeñandu porã. Ñanemanduʼákena ñañemongetaha ñane ermánondi jajogueraha porã jey hag̃ua hendive, ha ndahaʼéi jaikuaa hag̃ua mávapa la kulpávle (1 Cor. 6:7). w21.12 25, 26 párr. 13-16

¿Mbaʼérepa Jesús oñeñandu vaiete raʼe? Pórke haʼe oikuaa oĩtaha heta judío orrechasátava umi notísia porã haʼe omombeʼúva. Upéicha rupi, Jerusalén oñehundíta kuri, ha umi nomanóiva ojeguerahapaitéta esklávoramo (Luc. 21:20-24). Ñambyasýramo jepe, oiko Jesús heʼi hagueichaite, ha la majoría umi hénte orrechasa chupe. ¿Ha mbaʼetekópa pe nde reikoha ládo? ¿Nerendu porãpa la hénte reñeʼẽ jave chupe umi notísia porãre? Oimérõ saʼi oĩ la nerendu porãva, ¿mbaʼépa ikatu nepytyvõ? Tuicha ikatu nepytyvõ pe rreláto omombeʼúva Jesús hasẽ hague hapicháre. Jehová ningo ojepyʼapy la héntere. Jesús hasẽrõ guare ohechauka kuri mbaʼeichaitépa Jehová voi ojepyʼapy la héntere. Jehová ningo “ndoipotái avave oñehundi, síno oipota enterove oñarrepenti” (2 Ped. 3:9). ¿Mbaʼéichapa ñande avei ikatu jahechauka koʼág̃arupi jahayhuha ñande rapichakuérape? Ñañehaʼãmbaitévo ñamombeʼu chupekuéra umi notísia porã opoko hag̃uáicha ikorasõrekuéra (Mat. 22:39). w22.01 16 párr. 10-12

Tuicha imbaretevéta ñande jerovia jajepyʼamongetáramo umi mbaʼe Jehová ojapóma vaʼekuére ipuévlo rehehápe ha umi mbaʼe ojapóma vaʼekuére avei ñanderehehápe. Ha la iñimportantevéva, jahayhuvéta Jehovápe. Upe mborayhu la tuichave ñanepytyvõtava ñaneñeʼẽrendu hag̃ua Jehovápe, ñambovyʼa hag̃ua chupe ijetuʼúramo jepe, ha ñaaguanta hag̃ua oimeraẽ mbaʼe (Mat. 22:37-39; 1 Cor. 13:4, 7; 1 Juan 5:3). Pe amista jarekóva Jehovándi iporãiterei, ndaipóri voi mbaʼeve iporãvéva upévagui (Sal. 63:1-7). Nemanduʼákena remombaʼeguasuha Jehovápe reñemboʼe jave chupe, restudia jave Iñeʼẽ ha rejepyʼamongeta jave hese. Jesúicha avei, ehekákena peteĩ lugár itrankílova rehasa hag̃ua tiémpo Jehovándi. Aníkena eheja mbaʼeve ndedistrae. Ejerure Jehovápe tanepytyvõ eñekonsentra hag̃ua restudia jave térã reĩ jave rreunionhápe. Reaprovecha porãramo pe tiémpo eguerekóva koʼág̃a, Jehová nevendesíta ha ikatúta reiko pára siémpre pe múndo pyahúpe (Mar. 4:24). w22.01 30, 31 párr. 18-20

Katuete ningo jajapo jepi umi mbaʼe ñapensáva jaikóvo. Upéicha rupi Jesús heʼi vaʼekue ñamboykete vaʼerãha umi pensamiénto ikatúva ñandegueraha vai ha upévare jaju japeka (Mat. 5:21, 22, 28, 29). Ñande ningo jaipotaiterei Jehová ovyʼa ñandereheve, ha upévare iñimportanteterei pyaʼe jaipeʼa umi pensamiénto vai ñane akãgui peichahágui oúramo ñandéve umíva. Jesús heʼi porã vaʼekue ‘umi mbaʼe jaʼéva osẽha ñane korasõgui’ (Mat. 15:18). Ha upéva siertoite, pórke umi mbaʼe jaʼéva ohechauka porãta mbaʼe rehepa ñapensa ha mbaʼépa jareko ñande pyʼapýpe. Jarekóvo enkuénta upéva, eñeporandumína: “¿Chépa aime desidído ni mbaʼevéicharõ ndachejapumoʼãiha, cheperhudikátaramo jepe haʼéramo la siertoguáva? ¿Amboyketépa umi chíste tieʼỹ ha oimeraẽ ótra kósa upeichagua? ¿Mbaʼéichapa arreaksiona jepi oĩ jave chemorrenegáva?”. Ha umi omendáva ikatu oñeporandu: “¿Añatendépa ani hag̃ua anovillea peteĩ ndahaʼéivare che ména térã che rembireko?”. Ndajaikóiramo ñandejurutieʼỹ, ñaneñeʼẽ arhél ni ñandejapu, ifasilvéta avei hína ñandéve jahejaite hag̃ua pe ñane kondúkta yma guare haʼeramoguáicha peteĩ ao. w22.03 5 párr. 12-14

Umi ojeruréva konsého ótrope normálmente odesidi porãve jepi heta mbaʼépe ha pyaʼeve oprogresa. Upéicha rupi ñañehaʼãmbaite vaʼerã ñande voi jajerure ermanokuérape tomeʼẽ ñandéve umi konsého ñanepytyvõtava. ¿Mbaʼéicha javépa iporãta jajerure konsého ñane ermanokuérape? Epensamína koʼã mbohapy situasiónre: 1) Peteĩ ermána ojerure peteĩ puvlikadóra iñexperiensiavévape oho hag̃ua hendive ojapo hag̃ua peteĩ estúdio bíblico, ha upéi ojerure chupe konsého ikatu hag̃uáicha omboʼe porãve la héntepe. 2) Peteĩ ermána soltéra ojoguase ijaorã, ha oporandu peteĩ ermána iñexperiensiavévape mbaʼépa opensa pe ao oelehi vaʼekuére. 3) Peteĩ ermánope oñeasigna ojapotaha primera ves peteĩ diskúrso púvliko. Upémarõ haʼe ojerure peteĩ ansiáno iñexperiénsiavape omeʼẽ hag̃ua chupe konsého ikatu hag̃uáicha ojapo porã pe diskúrso. Umi ermáno heta áñorema ojapóva diskúrso jepe iporãta ojeruréramo suherénsia ótro iñexperiénsiavape, ha upéi osegi umíva ikatu hag̃uáicha omehora omboʼe lája (Prov. 19:20). w22.02 13 párr. 15-17

Jesús oĩrõ guare ko yvy ape ári, Jehová ohechauka vaʼekue ohayhuha chupe ha ojepyʼapyha hese. Ha Jehová upeichaite avei ñanderayhu ha ojepyʼapy ñanderehe (Juan 5:20). Jehová ningo oipytyvõ vaʼekue Jesúspe osegi hag̃ua ijerovia mbarete, omokyreʼỹ chupe ojepyʼapyetereírõ guare ha omeʼẽ chupe opa mbaʼe oikotevẽva. Avei Jehová notĩri vaʼekue heʼi hag̃ua Itaʼýrape ohayhu ha oguerohoryha chupe (Mat. 3:16, 17). Jesús núnka noñeñandúi vaʼekue haʼeño, pórke oikuaa Itúa ohayhuetereiha chupe ha siémpre oĩtaha ijykére. Jesús rehe oiko haguéicha, ñande avei ñañandúma heta hendáicha Jehová ñanderayhuetereiha. Ñapensamíntena: Jehová ningo ñanemoag̃ui kuri ijehe ha omeʼẽ ñandéve peteĩ família ñanderayhuetereíva. Haʼe ojevale ñane ermáno ha ermanakuérare ñanembovyʼa ha ñanemokyreʼỹ hag̃ua ñañeñandu vai jave (Juan 6:44). Jehová omeʼẽ avei ñandéve enteroite mbaʼe ñaikotevẽva jasegi hag̃ua jajerovia mbarete ha ñandefiél chupe. Ha haʼe ñanepytyvõ avei ñakonsegi hag̃ua umi mbaʼe ñaikotevẽva ñañemantene hag̃ua (Mat. 6:31, 32). Ñapensávo mbaʼeichaitépa Jehová ñanderayhu, ñande avei amás día jahayhuve chupe. w21.09 22 párr. 8, 9

¿Mbaʼéichapa nde reiko vaʼekue restudia mboyve la Biblia umi testígo de Jehovándi? Heta ningo ñande apytépe ni naimanduʼaséi upe tiémpore, pórke desastrete vaʼekue. Ha ikatu oime upéva ojekuaa voi rakaʼe ñañekomporta lájare ha ñane píntare jepe. Ha oiméramo upéicha, upe tiémpope ‘jaiko vaʼekue esperansaʼỹre ha ndajaikuaái Ñandejárape’ (Efes. 2:12). Péro jastudia rire la Biblia ñaaprende ñande Túa oĩva yvágape ñanderayhuetereiha. Upéi ñañepyrũséma voi jajapo umi mbaʼe ogustáva Jehovápe ha jaservi chupe ipuévlondi. Oiméne tekotevẽ raʼe ñakambia heta mbaʼépe upearã, por ehémplo jaiko lája, ñane pínta, ha ñapensa lája jepe. Tekotevẽterei kuri jajapo koʼã mbaʼe ikatu hag̃uáicha jaiko chupe ogustaháicha (Efes. 5:3-5). Ñande Túa Jehová haʼe rupi ñande Kreadór oreko la derécho heʼi hag̃ua ñandéve mbaʼéichapa oipota ñañekomporta ñaimeséramo ifamíliape. Ha haʼe oipota peteĩ persóna ojevautisa mboyve ‘oipeʼaite ijehegui peteĩ aóicha pe kondúkta yma guare ha umi mbaʼe ojapo vaʼekue yma’. w22.03 2 párr. 1-3

Umi ótro ovechakuéra vyʼápe oho pe Konmemorasionhápe ha ojepyʼamongeta iñesperánsare. Haʼekuéra ohenduseterei pe diskúrso de Konmemorasión, pórke upépe oñemombeʼu mbaʼépa Jesucristo ha umi 144.000 ojapóta yvyporakuéra rehehápe. Por ehémplo, oñemombeʼu haʼekuéra ogovernataha 1.000 áñore, ha oipytyvõtaha entéro persóna ifiélvape iperfékto hag̃ua ha ojapo hag̃ua ko yvýgui peteĩ paraíso. Upe tiémpope oñekumplíta avei umi profesía oĩva koʼã téxtope: Isaías 35:5, 6; 65:21-23; ha Apocalipsis 21:3, 4. Pe Konmemorasión oipytyvõ chupekuéra oñeimahina hag̃ua oĩmaha pe múndo pyahúpe, ha okompartiha ihénte ha iñamigokuérandi. Péva oipytyvõ chupekuéra ovyʼa hag̃ua koʼág̃ama voi, ojeroviave hag̃ua iñesperánsare ha oservi hag̃ua Jehovápe pára siémpre (Mat. 24:13; Gál. 6:9). w22.01 21 párr. 5-7

¿Mbaʼépa hína pe rreskáte? Upéva hína pe présio Jesús opaga vaʼekue ojogua jey hag̃ua upe Adán operde vaʼekue (1 Cor. 15:22). ¿Mbaʼérepa oñekotevẽ vaʼekue pe rreskáte? Pórke heʼiháicha iléipe, Jehová hustísia heʼi oñemeʼẽ vaʼerãha vída por vída (Éx. 21:23, 24). Adán ningo operde vaʼekue pe hekove perfékto. Upéicharõ, Jesús omeʼẽ avei hekove perfékto ojejapo hag̃ua Jehová hustísia heʼiháicha (Rom. 5:17). Ha péicha Jesúsgui oiko peteĩ “Túa opa ára g̃uarã” enterove umi ojeroviávape g̃uarã pe rreskátere (Is. 9:6; Rom. 3:23, 24). Jesús oĩ vaʼekue dispuésto osakrifikávo hekove ohayhuetereígui Itúa yvagapeguápe ha ñanderayhuetereígui ñandéve (Juan 14:31; 15:13). Upe mborayhu omomýi vaʼekue Jesúspe ojerresolve hag̃ua osegitaha ifiél oikove aja pukukue, ha okumplitaha Itúa volunta. Ha Jesús ojapo upéva omanoite peve. Upéicha ojapo haguére, oñekumplíta Jehová oipota vaʼekue ymaite guive yvyporakuérape g̃uarã, ha ko yvýpe g̃uarã. w21.04 14 párr. 2, 3