Abril

Jesús naiprovlemaiete vaʼekue ou hag̃ua omano ñanderehehápe, ha péicha ohechauka ñanderayhuetereiha (Juan 15:13). Jehová ha Jesús ningo ñanderayhueterei ha núnka ndaikatumoʼãi japagapa chupekuéra la ojapo vaʼekue ñanderehehápe, péro umi mbaʼe jajapóvare káda día ikatu jahechauka ñandeagradesidoha (Col. 3:15). Umi unhído omombaʼeterei Jesús sakrifísio pórke upéva rupive haʼekuéra oreko esperánsa ohóvo yvágape (Mat. 20:28). Avei haʼekuéra ojerovia rupi pe sakrifísiore, Jehová heʼíma hesekuéra ihustoha ha oadopta chupekuéra itaʼýraramo (Rom. 5:1; 8:15-17, 23). Umi ótro ovechakuéra omombaʼeterei avei Jesús sakrifísio, pórke upéva rupive haʼekuéra oĩ porã Ñandejára renondépe, ha amo gotyove ‘osẽta pe jehasa asy guasúgui’ (Apoc. 7:13-15). Mokõive grúponte omombaʼe ha oagradeseterei Jesús sakrifísio, upévare káda áño oho hikuái pe Konmemorasionhápe. w22.01 23 párr. 14, 15

Jesúspe okevrantaiterei vaʼekue mbaʼérepa ojejukáta chupe. Haʼe ningo ohayhu Jehovápe ipyʼaite guive, péro oñemboja reiete vaʼekue hese oñeʼẽ vai hague Ñandejára kóntrape, upéva heʼise ndorrespetái hague Ñandejára réra ni chupe voi (Mat. 26:64-66). Jesúspe okevrantaiterei ojeakusáta haguére chupe oñeʼẽ vaiha Ñandejárare, upévare ojerure Itúape animínte hag̃ua opermiti oñemotĩ chupe upéicha (Mat. 26:38, 39, 42). Jesúspe oñemosaingo vaʼerã kuri peteĩ yvyráre olivera hag̃ua umi judíope peteĩ maldisión poguýgui (Gál. 3:10). Chupekuéra oñemaldesi vaʼekue pórke oñekompromete kuri okumplitaha Ñandejára léi, péro ndojapói upéva. Upéicha rupi, haʼekuéra ndahaʼéi omeresénteva omano haʼe rupi Adán familiare, síno avei oreko rupi hiʼarikuéra ko maldisión (Rom. 5:12). Ñandejára léi heʼi peteĩ kuimbaʼe opekáramo ha omerese voi la muérte upe haguére, upéicharõ ojejuka vaʼerã chupe. Upéi pe teʼongue oñemosaingo jepi peteĩ yvyráre (Deut. 21:22, 23; 27:26). Oñemosaingóvo chupe peteĩ yvyráre, Jesús orresivi vaʼekue upe maldisión umi judiokuéra vése, ha olivera chupekuéra upévagui. Ha orrechasáramo jepe hikuái Jesúspe, pe isakrifísio ikatu kuri oipytyvõ umi judío ojeroviávape hese upe rire. w21.04 16 párr. 5, 6

Epensamína mbaʼe mbaʼépa oiko vaʼekue pe último día Jesús omano mboyve. Umi rrománo ojagarra ha ombyepoti vaipaite chupe (Mat. 26:52-54; Juan 18:3; 19:1). Haʼekuéra oipuru peteĩ harreadór oikytĩva pe ipire ha oikéva pe hoʼóre. Pe ilómo huguypáramo jepe, haʼe oñehaʼã ogueraha ijapére peteĩ yvyra pohýi pe lugár ojejukatahápe chupe. Péro upe riremínte haʼe ikangypáma ha ndaikatuvéima ogueraha pe yvyra, upévare umi soldádo rrománo oovliga ótro kuimbaʼépe ogueraha hag̃ua ivése (Mat. 27:32). Ha og̃uahẽrõ guare pe lugár ojejukatahápe chupe, umi soldádo oklava Jesúspe pe yvyráre ipo ha ipýgui. Ha omoñemboʼývo hikuái pe yvyra, hasyetereivéntema chupe umi ijerída orekóva ipo ha ipýpe, pórke pe hete pohyikue omondoropa umíva. Iñamigokuéra oñembyasy joa ha isy katu hasẽ asy, péro umi judío governantekuéra oñembohory hese (Luc. 23:32-38; Juan 19:25). Káda óra ohasáva, Jesús osufrietereivéntema. Pe ikorasõ ha umi ipulmón ombaʼapo asypa ha ijetuʼuve chupe orrespira hag̃ua. Jesús oikuaa ifiél hague Jehovápe, upévare haʼe apenamíma orrespirárõ guare, oñemboʼe chupe última ves. Upéi oñakãity ha omano (Mar. 15:37; Luc. 23:46; Juan 10:18; 19:30). Añetehápe Jesús hetaiterei anga ohasa asy ha oñemotĩ omano mboyve. w21.04 16 párr. 4

Jesús oñeʼẽ vaʼekue umi 11 apóstol ifiélvape mokõi kompromísore. Peteĩva haʼe pe kompromíso pyahu, ha pe ótro katu haʼe pe kompromíso ogoverna hag̃ua hikuái hendive Irréinope (Luc. 22:20, 28-30). Koʼã kompromíso rupive, umi apóstol ha hetaitereive persónagui oikóta rréi ha saserdóte yvágape (Apoc. 5:10; 14:1). Umi unhído hembýva gueteri añoite ikatu hoʼu pe pan ha pe víno Konmemorasionhápe, pórke haʼekuérante oike umi mokõi kompromísope. Iporãitereíntema ningo pe esperánsa Jehová omeʼẽva chupekuéra. Por ehémplo haʼekuéra oikóta yvágape, orekóta peteĩ kuérpo ikatuʼỹva oñembyai ha ikatuʼỹva omano, ikatúta ogoverna Crístondi ha umi ótro 144.000-ndi, ha la iporãveha ikatúta ohecha Jehovaitépe voi (1 Cor. 15:51-53; 1 Juan 3:2). Umi unhído oikuaa ifiél vaʼerãha omano meve (2 Tim. 4:7, 8). w22.01 21 párr. 4, 5

Mokõi kriminálpe oñemoĩ vaʼekue Jesús ykére ojejuka hag̃ua avei chupekuéra (Luc. 23:40, 41). Peteĩva omaña Jesúsre ha heʼi chupe: “Nemanduʼákena cherehe reike vove ne Rréinope” (Luc. 23:42). Jesús oikuaa vaʼekue Itúa oporoporiahuverekoha, upévare omeʼẽ vaʼekue esperánsa ko kriminál omano mbotávape hína (Sal. 103:8; Heb. 1:3). Jehová ñaneperdonaseterei ha ohechaukase ñandeporiahuverekoha. Péro upearã ñambyasy vaʼerã ñande pyʼaite guive umi mbaʼe vai jajapo vaʼekue, ha jajerovia vaʼerã Jesús sakrifísiore (1 Juan 1:7). Algúnope ijetuʼu oguerovia hag̃ua Jehová ikatuha operdona chupekuéra. Oiméramo sapyʼánte ñande ñañeñandu upéicha, ñapensami ko mbaʼére: Omano mboyvemi, Jesús ohechauka vaʼekue oiporiahuverekoha pe kriminál oñepyrũ ramóvape ojerovia hese. Upéicharõ, koʼytevéntema Jehová oiporiahuverekóta umi isiérvo ifiélvape (Sal. 51:1; 1 Juan 2:1, 2). w21.04 9 párr. 5, 6

Osegi rupi ifiél omano meve, Jesús ohupyty heta mbaʼe iñimportánteva. Primero, haʼe ohechauka Satanás ijapuha. Jesús ohechauka peteĩ yvypóra perfékto ikatuha osegi ifiél Jehovápe tahaʼe haʼéva la Satanás ojapóva hese. Segundo, Jesús omeʼẽ hekove rreskáteramo. Haʼe omeʼẽ rupi hekove sakrifísioramo, yvyporakuéra imperfékto ikatu oreko peteĩ amista Ñandejára ndive, ha oreko esperánsa oikovévo pára siémpre. Ha tercero, Jesús odefende Itúa réra ha pe derécho Jehová orekóva ogoverna hag̃ua. ¡Jaikókena káda día haʼeramoguáicha pe último día jarekóva jahechauka hag̃ua ñandefielha Jehovápe! Upéicharõ, ñamanóramo jepe, ikatúta jaʼe: “Jehová, ajapo ikatúva guive asegi hag̃ua chefiél ndéve, ahechauka hag̃ua Satanás ijapuha ha adefende hag̃ua nde réra ha ne goviérno”. w21.04 12 párr. 13, 14

Jesúspe ojeakusa ha ojehusga peteĩ mbaʼe vai ndojapói vaʼekuére. Umi hénte oñembohory hese, upéi ojetortura ha ojeklava chupe peteĩ yvyráre. Umi klávo ningo ovandea umi ipo ha ipy, ha hasyeterei chupe ijeridakuéra oñeʼẽ ha orrespiráta jave. Péro haʼe oñeʼẽmante vaʼerã orekógui heta mbaʼe iñimportánteva heʼi hag̃ua. ¡Ajépa hetaite mbaʼe iñimportánteva ikatu ñaaprende umi mbaʼe Jesús heʼi vaʼekuégui omano mboyvemi! Ñanemomanduʼa tekotevẽha ñaperdona ñande rapichakuérape, ha jajerovia hag̃ua Jehová ñaneperdonataha avei. Ñamombaʼeterei ningo jareko haguére heta ermáno ha ermanakuéra haʼéva ñane família teéicha, ha oĩva ñande ykére ñanepytyvõ hag̃ua. Péro ñande ñaikotevẽ jave álgo, jajerure vaʼerã chupekuéra ajúda. Ñande jaikuaa Jehová ñanepytyvõtaha ñaaguanta hag̃ua oimehaichagua provléma oñepresentáva ñandéve. Ha jahecha avei iñimportanteha jaiko káda día, haʼeramoguáicha pe último día jarekóva jahechauka hag̃ua ñandefielha Jehovápe. Ha ñaime segúro Jehová ñanemoingove jeytaha jahejáramo ipópe ñande rekove. w21.04 8 párr. 1; 13 párr. 17

Jasegíramo Jesús pypore jaikovéta pára siémpre. Peteĩ mitãkariaʼy ipláta hetáva oporandúrõ guare Jesúspe mbaʼépa ojapo vaʼerã oikove hag̃ua pára siémpre, haʼe heʼi chupe: “Eju chemoirũ” (Mat. 19:16-21). Oĩ vaʼekue umi judío ndogueroviáiva Jesús haʼeha pe Cristo, umívape Jesús heʼi vaʼekue: ‘Che ovechakuéra ou che rapykuéri. Che ameʼẽta chupekuéra vída etérna’ (Juan 10:24-29). Ñande jahechauka jajeroviaha Jesúsre jajapóvo umi mbaʼe haʼe omboʼe vaʼekue, ha jasegívo iñehémplo. Jajapóramo upéicha, jasegíta pe tape oporoguerahávare vída etérnape (Mat. 7:14). Jasegi porã hag̃ua Jesús pypore tekotevẽta jaikuaa chupe. Jaikuaa Jesúspe haʼe hína peteĩ mbaʼe tekotevẽva jajapo kontinuadoite. Jasegi vaʼerã jaikuaa porãve chupe, por ehémplo umi kualida orekóva, pe opensa lája, ha umi mbaʼe ogia vaʼekue chupe. Oiméramo jepe jaservíma raʼe Jehovápe heta tiémpore, jasegi vaʼerã ñañehaʼã jaikuaa porã hag̃ua Jehovápe ha Itaʼýrape. w21.04 4 párr. 9, 10

Katueténgo oiméne Pablo oñeñandu vaietereíne rakaʼe imanduʼa jave umi mbaʼe vaiete ojapo vaʼekuére oiko mboyve chugui kristiáno. Haʼe heʼi voi ijehe haʼe hague “pe ipekádo vaive vaʼekue” (1 Tim. 1:15). ¡Ha ndareíri heʼi vaʼekue upéva ijehe! Haʼe oikuaa mboyve la verda, osẽ vaʼekue peteĩ siudágui ha oho ótrope opersegi mbarete hag̃ua umi kristianokuérape. Hetápe oguerahaka kárselpe, ha oapoja voi ojejuka hag̃ua chupekuéra (Hech. 26:10, 11). Ñapensamína ko situasiónre: Ñamoĩ chupe Pablo oikuaaha peteĩ mitãrusu kristiánope, péro upéi oñentera ko mitãrusu opyta hague ityreʼỹ Pablo voi ojukauka haguére ituakuérape. ¿Mbaʼéichapa oñeñandúne rakaʼe haʼe? Pablo ningo ombyasyeterei umi mbaʼe ojapo vaʼekue, péro ndaikatuvéima orremedia umíva. Haʼe oĩ vaʼekue segúro Cristo omano hague hesehápe, ha upévare heʼi: “Ñandejára imbaʼeporãiterei rupi, koʼág̃a che peteĩ apóstol” (1 Cor. 15:3, 10). ¿Mbaʼépa ñaaprende chugui? Ñaĩ vaʼerãha segúro Cristo omano hague ñanderehehápe, ha upéicha rupi koʼág̃a ikatu jareko peteĩ amista iporãva Jehovándi (Hech. 3:19). Ñanemanduʼa vaʼerã Ñandejárape g̃uarã iñimportanteveha umi mbaʼe jajapóva koʼág̃a ha amo gotyove, ha ndahaʼéi umi mbaʼe vai jajapo vaʼekue yma (Is. 1:18). w21.04 23 párr. 11

Heta judío Jesús tiémpope guare noĩmoʼãi vaʼekue pe Mesías omanotaha, péro añetehápe Ñandejára Ñeʼẽ heʼíma vaʼekue voi: “Haʼe ningo omeʼẽ hekove ha omano, ha ojeʼe hese pekadorha. Haʼe ogueraha ijapére umi hénte pekádo, ha oipytyvõ umi hembiapo vaívape” (Is. 53:12). Upévare umi judío noñesorprendéi ni ndorrechasái vaʼerã kuri Jesúspe ojeʼe haguére hese pekadorha ha ojejuka haguére chupe. Koʼág̃arupi, ñande jaikuaa vaʼerã avei siértopa umi mbaʼe ojeʼéva ani hag̃ua avave ñanemoñepysanga. Pe Sermón del Móntepe Jesús oavisa vaʼekue oĩtaha umi ‘oikóva ijapu ha heʼíva opaichagua mbaʼe vai’ idisipulokuérare (Mat. 5:11). Entéro koʼã japu ou Satanásgui. Haʼe omomýi ñane enemigokuérape omosarambi hag̃ua heta japu oheja vai hag̃ua umi ohayhúvape la verda (Apoc. 12:9, 10). Ñande nañahenduiete vaʼerã umi japu heʼíva ñane enemigokuéra. Aníkena núnka umichagua japu káusare jakyhyje jaservi hag̃ua Ñandejárape, ha ani avei jaheja umíva omokangy ñande jerovia. w21.05 12 párr. 14, 16

Ñaipytyvõ ñane estudiántepe ojerovia hag̃ua Jehováre. Jesús oasegura vaʼekue umi idisípulope Jehová ohayhuha chupekuéra, ha upévare siémpre oĩtaha hendivekuéra (Mat. 10:19, 20, 29, 30). Ñamomanduʼákena ñane estudiántepe Jehová oĩtaha avei ijykére. Ñande ikatu ñaipytyvõ chupe ojerovia hag̃ua Jehováre ñañemboʼévo hendive umi méta orekóvare. Franciszek, oikóva Polóniape heʼi: “Che instruktór pyʼỹinte imanduʼa vaʼekue iñemboʼépe umi méta che arekóvare. Ha ahechávo mbaʼéichapa Jehová ombohovái chupe iñemboʼe, che pyaʼéma avei añepyrũ añemboʼe. Añandu vaʼekue Jehová chepytyvõha tekotevẽrõ guare ajerure permíso che traváho pyahúpe aha hag̃ua rreunionhápe ha asambleahápe”. Jehová ningo ohayhueterei ñane estudiantekuérape, ha oikuaa ha omombaʼe avei mbaʼéichapa umi oporomboʼéva la Biblia ombaʼapo jejopy oipytyvõ hag̃ua la héntepe ikatu hag̃uáicha oñemoag̃ui hese, ha haʼe ohayhueterei chupekuéra upévare (Is. 52:7). Ikatu oime koʼag̃aite ndajarekói hína peteĩ estúdio bíblico. Péro ñamoirũkuaa ótrope ojapo hag̃ua ijestúdio, péicha ñande avei ñaipytyvõta umi estudiántepe ikatu hag̃uáicha ojevautisa. w21.06 7 párr. 17, 18

Pyʼỹinte jaleéramo Ñandejára Ñeʼẽ, jahechaukáta hína ñamombaʼe ha jaagradeseha jareko haguére ko rregálo porãite. Jareko vaʼerã peteĩ óra jalee ha jastudia hag̃ua la Biblia, ha ani jaʼe: “Ág̃a chetiémpo vovénte aguapýta alee”. Jajepokuaáramo jastudia meme, ikatu jasegi jajerovia mbarete. Ko múndope ningo ‘umi iñarandúva ha ivaléva’ ndojeroviái Ñandejára Ñeʼẽre, péro ñande ndajajoguái chupekuéra pórke jareko pruéva jajerovia mbarete hag̃ua la Bíbliare (Mat. 11:25, 26). Jastudia rupi Ñandejára Ñeʼẽ, ñande jaikuaa mbaʼérepa oĩ hetaite provléma ko múndope, ha jaikuaa avei mbaʼépa Jehová ojapóta osolusiona hag̃ua umíva. Upévare, jajedesidíkena ñamombaretetaha ñande jerovia, ha ñaipytyvõtaha opa ikatúvape ojerovia hag̃ua ñande Apoharére (1 Tim. 2:3, 4). Ha jasegíkena ñahaʼarõ vyʼápe pe día, ág̃a enterove persóna oĩva ko yvy ape ári omombaʼeguasu vove Jehovápe, ha heʼi hikuái umi mbaʼe jatopáva Apocalipsis 4:11-pe: “Ñandejára Jehová, nde rejapo entéro mbaʼe [...]. Upévare nde remerese enterove nemombaʼe ha nembotuicha”. w21.08 18, 19 párr. 18-20

Umi ansiánope ningo prinsipálmente otoka hína omeʼẽ hag̃ua konsého umi ermanokuérape. Haʼekuéra oñehaʼãmbaite vaʼerã omeʼẽ hag̃ua umi konsého oipytyvõ ha omokyreʼỹtava pe persónape (Prov. 27:9). Umi ansiáno ningo ohayhueterei umi ermáno ha ermanakuérape. Ha sapyʼánte ohechauka upéva oñemoñeʼẽ jave peteĩ ermánope oñepyrũva hína oho tape vaíre (Gál. 6:1). Péro oñeʼẽ mboyve upe ermáno térã ermánandi, pe ansiáno oreko vaʼerã enkuénta la heʼi vaʼekue apóstol Pablo: “Pe oporohayhúva ipasiénsia ha imbaʼeporã, [...] oaguanta entéro mbaʼe, osegi oguerovia entéro mbaʼe, siémpre oreko esperánsa ha ni mbaʼevéicharõ noñentregái” (1 Cor. 13:4, 7). Pe ansiáno ojepyʼamongetáramo la heʼívare ko téxto, upéva oipytyvõta chupe oñemoñeʼẽ hag̃ua pe ermánope ohayhúgui chupe. Ha pe ermáno térã ermána oñandúramo pe ansiáno rreálmente ojepyʼapyha hese, ifasilvéta chupe oasepta hag̃ua pe konsého. w22.02 14 párr. 3; 15 párr. 5

Jehová ningo ojapo vaʼekue umi ánhel ha yvyporakuérape perfékto, orekoʼỹre ni peteĩ defékto. Péro upéi peteĩva umi itaʼyrakuéra oĩva umi ánhel apytépe opuʼã hese ha oiko chugui Satanás (heʼiséva “peteĩ oñemoĩva ótrore”). Satanás okonvense umi yvypóra perféktope, Adán ha Évape, opuʼã hag̃ua avei Jehováre. Upe rire, hetave ánhel ha yvypóra oñemoĩma avei hese (Jud. 6). Ndareíri ningo Jehová oñandu rakaʼe oñetraisiona hague chupe. Péro haʼe odesidínte oaguanta upéva, ha osegíta hína oaguanta ohundipa peve umi rrevéldepe. Ág̃a upéva oiko vove, Jehová ha umi ifiélva chupe tuicha ipiroʼýta natekotevẽmoʼãvéima rupi oaguanta umi mbaʼe vaiete oikóva ko múndope. Satanás oakusa vaʼekue Jóbpe ha avei enterove Jehová siervokuéra ifiélvape, heʼívo hesekuéra oserviha Ñandejárape iñinteresádogui reínte (Job 1:8-11; 2:3-5). Pe Diablo osegi voi oakusa yvyporakuérape koʼag̃aite peve (Apoc. 12:10). Péro ñande ikatu jahechauka Satanás ijapuha ñaaguantávo umi situasión ijetuʼúva jahasáva, ha ñaneñeʼẽrendúvo Jehovápe jahayhúgui chupe. w21.07 9 párr. 7, 8

Apóstol Pablo oipuru vaʼekue peteĩ ehémplo iporãitereíva ohechauka hag̃ua mbaʼeichaite pevépa iñimportánte ñakambia tekotevẽhápe. Haʼe heʼi vaʼekue voi tekotevẽha jaklava “pe yvyráre” ñane kondúkta yma guare (Rom. 6:6). ¿Mbaʼépa heʼise upéva? Jaikuaaháicha Jesús oĩ vaʼekue dispuésto omanóvo pe yvyráre Jehová oguerohory hag̃ua chupe. Ha ñande jaipotáramo Jehová ñandeguerohory ñaime vaʼerã avei dispuésto jajapóvo oimeraẽ mbaʼe. Por ehémplo jaipeʼaite ñane akãgui oimehaichagua pensamiénto vai ha ndajajapói mbaʼeve ndogustáiva Jehovápe. Sólamente jajapóramo koʼã mbaʼe ikatúta ñanekonsiénsia potĩ ha jareko la posivilida jaikóvo pára siémpre pe paraísope (Juan 17:3; 1 Ped. 3:21). Jehová nokambiamoʼãi umi léi haʼe orekóva ñandéve nañandegustái haguérente umíva. Upéva rangue, ñande la ñakambia vaʼerã ikatu hag̃uáicha jaiko haʼe heʼiháicha (Is. 1:17, 18; 55:9). Jajevautisa rire jepe tekotevẽta gueteri ñañehaʼãmbaite jasupera hag̃ua umi devilida jarekóva. Jajerure Jehovápe tañanepytyvõ, ha ani jajerovia ñandejehénte síno ijespíritu sántore (Gál. 5:22; Filip. 4:6). Ñaime vaʼerã desidído jaipeʼaitetaha ñandejehegui ñane kondúkta yma guare haʼeramoguáicha peteĩ ao ha núnka nañamondemoʼãveimaha ñandejehe upéva. w22.03 6 párr. 15-17

Jehová opromete ñamotenondéramo Irréino ha jaikóramo haʼe heʼiháicha, siémpre omeʼẽtaha ñandéve jaʼumi vaʼerã, ao ha peteĩ lugár jaiko hag̃ua (Mat. 6:33). Ñande jajeroviáramo upe promésare, nañapensamoʼãi umi mbaʼerepy oofreséva ko múndo ñandeprotehe ha ñanembovyʼataha. Ñande jaikuaa jajapóramo añoite Jehová volunta jarekotaha pyʼaguapy añetetéva (Filip. 4:6, 7). Avei ikatúramo jepe jajogua heta mbaʼe, ñapensa vaʼerã jarekótapa pe tiémpo ha pe fuérsa jaipuru ha ñañangareko hag̃ua umívare. Iporã vaʼerã ñañeporandu: “¿Iñimportantetereípa chéve g̃uarã umi che kosakuéra ha amombaʼeterei voi la arekóva?”. Ñanemanduʼa vaʼerã Jehová omeʼẽ hague ñandéve ñane rembiaporã ifamíliape. Upévare, aníkena jaheja mbaʼeve ñandedistrae. Ñande ningo ndajajoguaseiete pe kuimbaʼe ipláta hetávape, pe odesidi vaʼekue ndosegimoʼãiha Jesúspe ohayhuetereígui ikosakuéra. Péicha haʼe operde vaʼekue la oportunida oservi hag̃ua Jehovápe ha oiko hag̃ua chugui itaʼýra (Mar. 10:17-22). w21.08 6 párr. 17

Jastudiakuévo la Biblia jaikuaáta mbaʼeichagua persónapa Jehová ha umi kualida haʼe orekóva. Ha koʼã kualida hína la ikatúva avei ñaaprende jastudiávo pe kreasión. Jaikuaa porãvévo jahávo umi kualida Jehová orekóva, umíva ñanekonvenséta haʼe añetehápe oexistiha ha ndahaʼeiha ñañeimahinánteva (Éx. 34:6, 7; Sal. 145:8, 9). Amáske jaikuaave Jehovápe, jajeroviavéta hese, jahayhuvéta chupe ha ñane amista hendive imbaretevéta. Ñañeʼẽ vaʼerã avei ótrondi umi mbaʼe jagueroviávare. Péro, ¿mbaʼépa jajapóta pe persóna japredikávape odudáramo Ñandejára oexistiha ha ndajaikuaái mbaʼéichapa ñambohováita? Ñañehaʼã jaheka peteĩ rrespuésta bíblica ñane puvlikasionkuérape, ha upéi ñañeʼẽ pe persónandi upévare. Ikatu avei jajerure peteĩ ermáno iñexperiénsiavape ñanepytyvõ hag̃ua. Pe persóna ohendu térã nohenduséiramo jepe pe rrespuésta omeʼẽva la Biblia, ñandéve lomímonte ideprovéchota pe ñainvestiga vaʼekue, pórke ñande jerovia katuete imbaretevéta. w21.08 18 párr. 14, 15

Jehová ñandeguerohory hag̃ua natekotevẽi jaheja entéro umi komodida jarekóva (Ecl. 5:19, 20). Péro ndajajapóiramo hetave mbaʼe Jehová servísiope ndajajesakrifikaséi rupínte, jajoguáta pe karai ipláta hetávape Jesús ehémplope guare. Haʼe tuicha ojavy vaʼekue, pórke ombaʼapo jejopy oiko porã hag̃ua péro hesarái Ñandejáragui (Luc. 12:16-21). Ñambohovái jave peteĩ provléma, ñande jajerure jepi Jehovápe tañanepytyvõmi, ha ñapensa porã mbaʼépa ikatu jajapo ñasolusiona hag̃ua upéva (Prov. 3:21). Jehová ningo ñanevendesi hetaiterei hendáicha. Ñande ikatu jaagradese chupe ñanevendesi haguére péicha, jajapóvo opa ikatúva ñamombaʼeguasu hag̃ua chupe (Heb. 13:15). ¿Mbaʼéichapa ikatu jajapo upéva? Ikatu jajapo peteĩ mbaʼe pyahu Jehová servísiope, ha péicha ñameʼẽta hína chupe oportunida hetave ñanevendesi hag̃ua. Káda díakena ñañehaʼã ‘ñatantea ha jahecha mbaʼeichaitépa Jehová ivuéno’ (Sal. 34:8). Jajapóvo upéicha jaʼéta avei Jesús heʼi haguéicha: “Che rembiʼu hína kóva: ajapo upe chembou vaʼekue volunta, ha atermina pe traváho haʼe omeʼẽ vaʼekue chéve” (Juan 4:34). w21.08 30, 31 párr. 16-19

Satanás oipota ñande jaju ñañemombaʼeguasu ha ñandeorgullóso. Haʼe oikuaa upéva oikóramo ñanderehe, jajoguataha chupe ha japerdetaha pe oportunida jaikovévo pára siémpre. Upéicha rupi, apóstol Pablo oavisa vaʼekue peteĩ persóna ikatuha “oñemombaʼeguasu ha oñekondena chupe oñekondena haguéicha pe Diáblope” (1 Tim. 3:6, 7). Upéva ningo oimeraẽvare ikatu oiko, tahaʼe jepe raʼe jaservímava Jehovápe heta áñore térã ramoite guivénte. Umi persóna ijorgullósova ningo opensa ijehénte. Satanás oipota ñapensave ñandejehe ñapensa rangue Jehováre, koʼýte ñaneprovléma jave. Por ehémplo, ¿oĩmapa raʼe omboja reíva nderehe rejapo hague peteĩ mbaʼe? ¿Térã ojejapómapa raʼe nderehe peteĩ inhustísia? Satanás ningo oipotaitereíta ndepochy Jehováre térã umi ermanokuérare. Pe Diablo oipota ñapensa ñasolusionataha ñane provléma ñandéve ñandegustaháichante, jasegi rangue umi konsého omeʼẽva ñandéve Jehová Iñeʼẽ rupive (Ecl. 7:16, 20). w21.06 15 párr. 4, 5

Jehová onkarga vaʼekue proféta Agéope ojapo hag̃ua peteĩ mbaʼe iñimportantetereíva. Áño 537-pe a.C., peteĩ grúpo de judío oĩ vaʼekue Babilóniape oho jey Jerusalénpe, ha amalisiami Ageo oho avei hendivekuéra. Og̃uahẽ riremi hikuái upépe, koʼã Jehová siervokuéra ifiélva oñepyrũ omopuʼã jey Ñandejára róga, ha omoĩmba pe témplo simiénto (Esd. 3:8, 10). Péro upe riremínte oiko peteĩ mbaʼe ñambyasyetereíva. Haʼekuéra ou oñedesanima ha nomopuʼãvéi pe témplo, pórke umi hénte oikóva ijererekuéra oñemoĩ hesekuéra (Esd. 4:4; Ageo 1:1, 2). Upévare áño 520-pe a.C., Jehová omondo Agéope omokyreʼỹ ha omombarete hag̃ua umi judíope ikatu hag̃uáicha ojapopa hikuái pe témplo (Esd. 6:14, 15). Pe mensáhe Ageo ogueraha vaʼekue oipytyvõ vaʼerã kuri umi judíope ojeroviave hag̃ua Jehováre. Pe fráse “Jehová, umi ehérsito yvagapegua ruvicha” oiméne omokyreʼỹ ha omoñeñandu raʼe chupekuéra segúro. Jehová ningo oreko ipoguýpe peteĩ ehérsito de ánhel tuichaitereíva, upévare umi judío osẽ porãséramo tekotevẽ kuri ojerovia Jehováre. w21.09 15 párr. 4, 5

Koʼág̃arupi testígo de Jehová ñaiméva ko múndo tuichakuére jajoayhu ha ñaime en unida. Ñande ningo ñanediferénte entéro umi ótro rrelihióngui, pórke ñaime hína peteĩ família tuichaitereívape jarekóramo jepe diferénte kultúra térã nasionalida. Umi rreunión ha asambleahápe ojekuaa porã voi mbaʼeichaitépa jajoayhu. Upéva ñanepytyvõ koʼytevéntema ñaime hag̃ua segúro jaadoraha Jehovápe haʼe oipotaháicha (Juan 13:34). La Biblia ningo heʼi ñandéve: “Pejoayhu vaʼerã pende pyʼaite guive” (1 Ped. 4:8). Ñande jahechauka jajoayhuha ñañoperdona jave ha ñaaguanta jave ñane ermanokuéra imperfeksión. Avei jaaprovecha umi oportunida jarekóva ñandepojera ha jarresivi porã hag̃ua ñane ermanokuérape, umi ñanembopochy vaʼekuépe jepe (Col. 3:12-14). Péicha jajoayhu rupi jahechauka hína ñande haʼeha kristiáno tee. w21.10 22 párr. 13, 14

¿Ikatúpa oñepytyvõ peteĩ pekadórpe oñarrepenti ha okambia hag̃ua oñemosẽramo chupe? Si ikatu. Heta ermáno opeka ha oñemosẽ vaʼekue kongregasióngui heʼi upéva oipytyvõ hague chupekuéra ohechakuaa hag̃ua mbaʼeichaitépa ivai la ojapo vaʼekue. Avei oipytyvõ chupekuéra oñarrepenti ha okambia hag̃ua oiko lája, ha ou jey hag̃ua Jehová rendápe (Heb. 12:5, 6). Oñemosẽ jave peteĩ persónape, ojehechauka hína avei ojeporiahuverekoha pe kongregasiónpe. Ñapensamína ko ehémplore. Ñamoĩ chupe peteĩ pastór ohechakuaaha peteĩva umi ijovecha hasyha hína. Haʼe oikuaa oipohãno hag̃ua ko ovechápe, oapartámante vaʼerãha chupe umi ótrogui. Péro umi ovecha ningo ndopytaséi jepi haʼeño. Haʼekuéra oĩse umi ótro ovechándi, ha ojedesespera voi oñemohaʼeñóramo chupekuéra. Upéicharõ, ¿heʼisépa upéva pe pastór iñañaha, térã ojopyetereimaha pe ovechándi ojapóvo upéva? Ni mbaʼevéicharõ. Haʼe oikuaa ohejáramo pe ovecha hasýva ojeheʼa umi ótrore, ikatuha oguerova hesekuéra la imbaʼasy. Péro oapartávo chupe, oñangareko hína pe ovecha aty kompletoitére. w21.10 10 párr. 9, 10

Jaagradeseterei ningo ñaime haguére peteĩ família tuichaitereívape ha ojoayhuetereíva. Ha jaipota voi heta hetave persóna ñanemoirũ jaadora hag̃ua Ñandejárape. Upévare ñañatende vaʼerã ani hag̃ua ñande káusare oñeñeʼẽ vai ñande Ru Jehováre, térã ipuévlore. Ñande siémpre ñañehaʼãmbaite vaʼerã ñañekomporta porã umi hénte oikuaase ha oservise hag̃ua ñande Ru yvagapeguápe. Sapyʼánte oĩ umi ñandeapoʼíva térã ñandepersegíva voi ñaneñeʼẽrendu haguére ñande Ru yvagapeguápe. ¿Mbaʼépa ikatu jajapo jakyhyjéramo ñañeʼẽ hag̃ua ótrondi umi mbaʼe jagueroviávare? Ñande ñaimekuaa segúro Jehová ha Itaʼýra katuete ñanepytyvõtaha. Jesús oasegura vaʼekue idisipulokuérape natekotevẽiha ojepyʼapy la heʼítavare ni mbaʼéichapa heʼíta. ¿Mbaʼérepa upéva? Jesús heʼi vaʼekue voi: “Upe moméntope Ñandejára penepytyvõta peikuaa hag̃ua mbaʼépa peje vaʼerã. Upe moméntope ndahaʼemoʼãi peẽnte la peñeʼẽtava, síno Ñandejára penepytyvõta peñeʼẽ hag̃ua ijespíritu rupive” (Mat. 10:19, 20). w21.09 24 párr. 17, 18

Moisés ningo okompara vaʼekue avei Jehovápe peteĩ lugár isegúro porãvare (Sal. 90:1). Péro ndahaʼéi upévante. Haʼe omano mboyvemi, omensiona vaʼekue avei ótro detálle iporãitereíva. Haʼe heʼi: “Ñandejára hína pe lugár oñekañyha ymaite guive, ijyva opa ára g̃uarãva ndejoko hína” (Deut. 33:27). ¿Mbaʼépa ñanemboʼe Jehovágui pe fráse “ijyva opa ára g̃uarãva ndejoko hína”? Ñande ñakonfiáramo Jehová ñandeprotehetaha, katuete ñañeñandúta segúro. Péro sapyʼánte ikatu hína ñañedesanima ha ñañandu nañameʼẽveimaha. ¿Mbaʼépa Jehová ojapóta ñanderehe upéicha jave? (Sal. 136:23). Haʼe haʼete ñandejagarrátava ñanderupi ijyva ári ha nanepytyvõta ñañakãrapuʼã jey hag̃ua (Sal. 28:9; 94:18). ¿Mbaʼéicha ñanevenefisia upéva? Ñande jaikuaa Jehová siémpre oĩtaha ñande ykére ñanepytyvõ hag̃ua, ha upéva ñanemomanduʼa jarekoha mokõi vendisión iporãitereíva: Primero, Jehová ñandeprotehéta tahaʼe haʼéva pe lugár jaikoha. Ha segundo, haʼe ñanderayhueterei ha ojepyʼapy ñanderehe. w21.11 6 párr. 15, 16

Jesús oikuaa vaʼekue idisipulokuérape ikatuha ijetuʼu ombohovái hag̃ua umi inhustísia. Ha oipytyvõ hag̃ua chupekuéra omombeʼu kuri peteĩ ehémplo, ha upéva jatopa lívro de Lúcaspe. Upe ehémplope Jesús oñeʼẽ peteĩ viúda ojerure asývare peteĩ huéspe ojapo hag̃ua chupe hustísia. Pe viúda manterei oho pe hués rógape, upévare haʼe oĩ kuri segúra algún día oñemeʼẽtaha chupe la oipotáva, ha upeichaite oiko kuri. ¿Mbaʼépa ñaaprende? Jehovángo naiñinhústoi, upévare Jesús heʼi: “¿Ha mbaʼégui piko upéicharõ Ñandejára noipytyvõmoʼãi umi haʼe oiporavo vaʼekuépe, ojerure asýva chupe hustísia ára ha pyhare?” (Luc. 18:1-8). Upéi Jesús heʼive: “Og̃uahẽ vove pe Yvypóra Raʼy, ¿otopáta ko yvy ape ári hénte peichaite peve ojeroviáva?”. Jahasáramo peteĩ inhustísia, jahechauka vaʼerã jajoguaha pe viúdape. Haʼe ipasiénsia vaʼekue ha noñentregái. Péicha jajeroviáramo, ñaĩta segúro Jehová ñanepytyvõtaha ha ojapotaha upéva itiempoitépe. Ha siémpre jareko vaʼerã enkuénta pe ñemboʼe iñimportantetereiha. w21.11 23 párr. 12; 24 párr. 14

Mitãrusu ha mitãkuñanguéra, ¿pepensápa sapyʼánte Jehová iñexihentetereimaha penendive? Añetehápe ningo Satanás haʼe hína la oipotáva pepensa upéicha. Haʼe oipota peñekonsentra la ojapóvare umi ohóva pe tape tuichávare ojediverti hag̃ua, ikatu hag̃uáicha pepensa haʼekuéra siémpre ovyʼaha. Haʼe oipota pepensa peservíramo Jehovápe ndaikatumoʼãiha voi pejediverti, ha upearã ikatu hína oipuru umi mbaʼe ojapóva pene kompañerokuéra térã umi mbaʼe pehecháva Internétpe. Satanás oipota pepensa umi ojapóva guive Jehová heʼíva núnka ndojedivertiriha. Péro penemanduʼákena Satanás ndoipotaiha peikuaa mbaʼépa la oĩva opakuévo pe tape tuicháva, péva ningo añetehápe oporogueraha hína ñehundípe (Mat. 7:13, 14). Jehová katu idiferentete, pórke haʼe omombeʼu porã peẽme mbaʼépa penderupytýta peneñeʼẽrendúramo chupe. Haʼe ningo oipota iporãvante peẽme g̃uarã, ha pejapóramo la haʼe heʼíva penevendesíta katuete (Sal. 37:29; Is. 35:5, 6; 65:21-23). w21.12 23 párr. 6, 7

Ñande jaikuaa ñaperdona vaʼerãha ñane ermanokuérape pórke upéva la oĩ porãva. Péro ikatu hína ijetuʼu ñandéve jajapo hag̃ua upéva. Amalisia apóstol Pedro oñeñandu vaʼekue avei upéicha sapyʼánte (Mat. 18:21, 22). ¿Mbaʼépa ikatu ñanepytyvõ? Primero, ñapensa mboy vésemapa Jehová ñaneperdona (Mat. 18:32, 33). Ñande ningo nañamereséi haʼe ñaneperdona, péro lomímonte ojapo upéva heta vése (Sal. 103:8-10). “Ñande jareko avei pe ovligasión jajoayhúvo”. Upévare ndaikatúi jaiporavo ñaperdonátapa térãpa nahániri. Upéva ñande jadeve voi ñane ermáno ha ermanakuérape (1 Juan 4:11). Segundo, ñapensa umi mbaʼe porã ojehupytývare ñaperdona jave. Ikatu ñaipytyvõ pe persóna ofalla vaʼekuépe ñanendive, ñaipytyvõ oĩ hag̃ua unida kongregasiónpe, japrotehe ñane amista Jehovándi, ha jaipeʼa ñande árigui peteĩ kárga ipohyietereíva ñandepyʼaguapy jey hag̃ua (2 Cor. 2:7; Col. 3:14). Ha tercero, ñañemboʼe Jehovápe. Haʼe hína pe ojeruréva ñandéve ñaporoperdona hag̃ua. Ani jaheja Satanás ombyai pe pyʼaguapy oĩva ñane ermáno ha ermanakuéra apytépe (Efes. 4:26, 27). Tekotevẽterei ningo Jehová ñanepytyvõ ani hag̃ua jaʼa Satanás ñuhãme. w21.06 22 párr. 11; 23 párr. 14

Saúl, pe rréi ipoderosoitéva oĩva Israélpe, ojukase oikóvo Davídpe, ha David okañýmante chugui. Péro upéi David ndoguerekovéima la hoʼu vaʼerã, upémarõ oho pe siuda héravape Nob ha upépe ojerure oñemeʼẽmi hag̃ua chupe 5 pan (1 Sam. 21:1, 3). Upéi, haʼe ha umi kuimbaʼe oĩva hendive oho okañy peteĩ kuévape (1 Sam. 22:1). ¿Mbaʼéicha rupípa David ojecha upe situasiónpe? Israélpe ningo entéro omombaʼe vaʼekue Davídpe pórke haʼe ogana heta gérra, ha upévare Saúl oúma oenvidiaiterei Davídpe. Saúl oikuaa vaʼekue Jehová orrechasa hague chupe idesovediénte rupi, ha oikuaa avei Jehová oelehi hague Davídpe opyta hag̃ua rréiramo hendaguépe (1 Sam. 23:16, 17). Péro ogovernáitirõ guare Israélpe, Saúl oreko kuri peteĩ ehérsito tuicháva ipoguýpe ha heta oipytyvõva chupe. Upévare David okañýmante chugui pono omano. ¿Oimoʼãne piko Saúl ikatutaha ojoko Jehovápe ani hag̃ua omoĩ Davídpe rréiramo? (Is. 55:11). La Biblia ndeʼíri upéva, péro oĩ peteĩ mbaʼe jaikuaa porãva: Umi oñemoĩva Jehováre katuete osẽ vaíta. Upévare Saúlpe nokonveniriete hína kuri la ojapóva. w22.01 2 párr. 1, 2

Jesús iguápo vaʼekue predikasiónpe. Haʼe ohechauka vaʼekue ohayhuha umi héntepe pórke osegi opredika chupekuéra tahaʼe haʼehápe (Luc. 19:47, 48). Jesús ojapo vaʼekue upéicha pórke ombyasyeterei hapichápe. Sapyʼánte, haʼe ha idisipulokuéra ndaikatúi vaʼekue voi ni okaru, pórke hetaiterei oĩ vaʼekue la ohenduséva Jesúspe (Mar. 3:20). Ha oĩrõ pyharekuénte ikatúva ohendu Jesúspe, haʼe naiprovlemaiete vaʼekue oñemotiémpo hag̃ua upe órape. Jesús opredika vaʼekue hetaiterei persónape, péro la majoría ndosegíri chupe. Upéicharõ jepe, haʼe enterovetévape oikuaauka umi notísia porã. Koʼág̃arupi avei, ñande ñameʼẽse la héntepe pe oportunida ohendúvo umi notísia porã (Hech. 10:42). Ha jajapo hag̃ua upéva jajadaptámante vaʼerã la héntere. Ndovaléi ñandeserrádo peteĩ órarente, upéva rangue jajadapta vaʼerã ha jahecha mbaʼe órapepa ikatúta jatopa hetave héntere. Jajapóramo upéicha, Jehová katuete ñandeguerohorýta. w22.01 17 párr. 13, 14

Umi héntepe ijetuʼu ojerovia hag̃ua umi orekóvare autorida. Por ehémplo, haʼekuéra ohecha mbaʼéichapa umi goviérno ha pe léi ombojeroviave umi irríko ha ipoderósovape, péro ndofavoreséi umi imboriahúvape. Avei umi líder rrelihióso koʼág̃arupi ojapo heta mbaʼe vai, ha upévare ijetuʼu umi héntepe ojerovia hag̃ua Ñandejárare. Upéicha rupi, peteĩ persóna oñepyrũramo ostudia ñanendive la Biblia, ñande ñaipytyvõ vaʼerã chupe ojerovia hag̃ua Jehováre ha avei umi kuimbaʼe haʼe onombra vaʼekuére ñandegia hag̃ua. Péro ndahaʼéi ningo umi estudiánte añónte la tekotevẽva ojerovia Jehováre ha iñorganisasiónre, ñande jaservíva Jehovápe are guivéma lomímonte jajapo vaʼerã upéva. Ha iñimportánte siémpre ñanemanduʼa ko mbaʼére: La Jehová ojapo lája entéro mbaʼe, siémpre iporãve. Péro sapyʼánte ikatu hína jahasa umi situasión ijetuʼuhápe ñandéve jajerovia Jehováre. w22.02 2 párr. 1, 2