Diciembre

Jesús ningo heʼi vaʼekue idisipulokuérare haʼeha ijovecha mimi (Juan 10:14). Ha upe komparasión ningo iporãiterei, pórke umi ovecha oikuaa la ipastorkuéra ñeʼẽ ha osegi chupe. Por ehémplo peteĩ vuéltape peteĩ turísta onohesẽmoʼã fóto umi ovechápe, péro haʼe heʼi: “Ore roñehaʼã rohenói umi ovecha, péro haʼekuéra nopenái orerehe pórke ndaorekuaái. Upéi katu ou ore rendápe peteĩ mitãʼi oikóva hesevekuéra, ha haʼe ohenóire chupekuéra umi ovecha oupaitéma voi hendápe”. La oiko vaʼekue pe turístare ohechauka umi ovecha siémpre ohenduha la ipastórpe. Ha upéva ñanemomanduʼa la Jesús heʼi vaʼekue idisipulokuérare: “Haʼekuéra ohendúta che ñeʼẽ”. Péro Jesús ningo oĩ yvágape, ¿mbaʼéichaiko upéicharõ ikatúta ñahendu la iñeʼẽ? Jajapóta upéva jastudiáramo umi mbaʼe haʼe omboʼe vaʼekue ha ñakumplíramo umíva (Mat. 7:24, 25). w21.12 16 párr. 1, 2

Apóstol Pablo ningo ymave opersegi mbarete vaʼekue kristianokuérape, péro tiémpo rire ohechakuaa upéva oĩ vaiha ha okambia (1 Tim. 1:12-16). Jehová oipytyvõ vaʼekue chupe ikatu hag̃uáicha okambia la ilája. Upéicha rupi, tiémpo rire oiko chugui peteĩ ansiáno imbaʼerechakuaáva, iñumíldeva, ha ombyasýva iñermanokuérape. Pablo oñehaʼãmbaite vaʼekue ani hag̃ua omboguapy ijehe umi idefektokuéra. Haʼe ojerovia Jehová ikatuha ombohasa reínte chugui umi mbaʼe, ha operdona chupe (Rom. 7:21-25). Pablo orrekonose vaʼekue umi ilimitasión ha ndoikói ohaʼarõ perfeksión ijehegui. Upéva rangue haʼe oñehaʼãnte okambia ohóvo saʼi saʼípe, ha ojerovia Jehová oipytyvõtaha chupe ojapo porã hag̃ua hembiapo (1 Cor. 9:27; Filip. 4:13). Umi ermánope ningo noñenombrái ansiáno perfékto haguére. Péro Jehová oipota haʼekuéra orrekonose umi ifallakuéra, ha oñehaʼã okambia oreko hag̃ua umi kualida iporãva (Efes. 4:23, 24). Upévare iporã vaʼerã umi ansiáno oanalisáramo la Biblia ha ohecha mbaʼépepa ikatu omehora. Upéicharõ Jehová katuete oipytyvõta chupekuéra ojapo hag̃ua upéva (Sant. 1:25). w22.03 29, 30 párr. 13-15

¿Mbaʼépa ikatu jajapo jahechakuaáramo ñandejehe japorokritikaitereimaha jaikóvo? Ñanemanduʼa vaʼerã jahayhu vaʼerãha ñane ermanokuérape (Sant. 2:8). Ñañemboʼe vaʼerã avei Jehovápe ha jajerure chupe tañanepytyvõ anive hag̃ua jahusga ñande rapichakuérape. Ha ñañemboʼe rire Jehovápe, ñañehaʼã ñañamiga pe persónare. Ikatu por ehémplo ñainvita chupe osẽ hag̃ua ñanendive predikasiónpe, térã ñainvita chupe ñande rógape okaru hag̃ua ñanendive. Jajapóramo péicha jaikuaa porãvéta hína pe persónape ha ifasilvéta ñandéve jahecha hag̃ua umi kualida porã orekóva. Péicha jajapóramo jasegíta hína Jehová ha Jesús ehémplo, ha ndajaikomoʼãvéima jahusga ñande rapichakuérape. Umi ovecha mimi iñeʼẽrenduháicha ipastórpe, ñande ñaneñeʼẽrendu avei Jesúspe. Upévare oiméramo ñande unhído térã ñaĩ umi “ótro ovechakuéra” apytépe, siémprekena ñañehaʼã ñaneñeʼẽrendu Jesúspe (Luc. 12:32; Juan 10:11, 14, 16). w21.12 19 párr. 11; 21 párr. 17, 18

Rehoboam oñepyrũmíre ogoverna, umi israelita ou vaʼekue ojerure chupe peteĩ mbaʼe. Haʼekuéra oipota kuri ombovevyive pe puévlope umi mbaʼe rréi Salomón ojerure vaʼekue chupekuéra. Ha oikoite la ojapo vaʼekue primerorã Rehoboam, pórke haʼe oho ojerure konsého umi kuimbaʼe ijedavéva oĩvape Israélpe. Ha haʼekuéra heʼi chupe iporãtaha openáramo pe puévlore, pórke upéicha haʼekuéra siémpre oapojáta chupe (1 Rey. 12:3-7). Péro posívlemente Rehoboámpe ndogustái kuri pe konsého omeʼẽva chupe koʼã kuimbaʼe, ha upémarõ ohónte oporandu umi ijaveguávape. Péro haʼekuéra heʼi chupe oexihivéntema vaʼerãha pe puévlope (1 Rey. 12:9-11). Iporãta kuri Rehoboam oñemboʼe Jehovápe ha oporandu chupe mbaʼépa haʼe opensa, ha togia chupe odesidi porã hag̃ua. Péro upéva rangue haʼe oaseptánte pe konsého omeʼẽ vaʼekue chupe umi kuimbaʼe imitãvéva. Ha ojapo rupi upéva, amo ipahápe Rehoboam tuichaiterei ojeperhudika ijupe voi ha avei Israélpe. Ha upéva ikatu avei hína oiko ñande kásope, pórke sapyʼánte a lo mehór nañandegustamoʼãi peteĩ konsého jarresivíva. Péro pe konsého oñemopyendáramo la Bíbliape, jaasepta vaʼerã upéva. w22.02 9 párr. 6

Peteĩ persóna iñumíldeva ha orrekonoséva umi mbaʼe ndaikatúiva ojapo, oñesentra umi mbaʼe si oikuaávare umi ermáno imitãvéva, ha ndahaʼéi umi mbaʼe ofaltávare chupekuéra oaprende. Haʼe nopensamoʼãi umi ermáno imitãvéva okompetiseha hendive, síno ohecháta chupekuéra ikompañéro de traváhoramo. Umi ijedávape g̃uarã ningo umi imitãva haʼe hína peteĩ rregálo oúva Jehovágui, ha oagradeseterei umi mbaʼe ojapóva hikuái. Umi ijedáva ningo naimbaretevéima, ha upévare oagradese oĩ haguére umi imitãvéva, ikyreʼỹ ha imbaretéva ojapo hag̃ua umi traváho kongregasiónpe. La Bíbliape jatopa Noemí ehémplo porãite. Haʼe ningo ijagradesída vaʼekue ha oheja oipytyvõ chupe inuéra Rut, imitãvéva chugui. Opyta rire viúda, Noemí omokyreʼỹ Rútpe oho jey hag̃ua oĩháme ihentekuéra. Péro Rut heʼi jey jey vaʼekue Noemíme ndohejamoʼãiha chupe ha oho hendive Belénpe. Noemí ovyʼaiterei Rut oho haguére hendive ha oheja Rútpe oipytyvõ chupe (Rut 1:7, 8, 18). Upéva ningo añetehápe ou porãiterei kuri mokõivévape (Rut 4:13-16). Umi ermáno ijedáva ha iñumíldeva osegi Noemí ehémplo. w21.09 10, 11 párr. 9-11

Ñande Túa Jehová oikuaa porã káda uno ñane situasión idiferenteha ojuehegui. Upévare ikatu oime nde voi ereko la posivilida ejapo hag̃ua hetave mbaʼe ne hénte ha ne amigokuéragui Jehová servísiope. Térã a lo mehór haʼekuéra ikatu ojapo hetave mbaʼe ndehegui. Ikatu oime koʼág̃a ndeedáma, nderasykatu térã ereko rresponsavilida nde rogapýpe, ha upéicha rupi ndaikatúi ejapo entéro mbaʼe ejaposéva Jehová servísiope. Oiméramo upéicha, aníkena reñedesanima (Gál. 6:4). Jehová ndahesaraimoʼãi umi mbaʼe nde rejapo vaʼekuégui. Reñehaʼãmbaitéramo ejapo hag̃ua la Jehovápe ogustáva rehayhúgui chupe, haʼe ndeguerohorýta katuete. Jehová ningo ohecha nde rejaposetereiha oimeraẽ mbaʼe hesehápe, ha upévante voi ja ovaletereíma chupe g̃uarã. Haʼe ningo oipota nde revyʼa ha reñeñandu porã umi mbaʼe ikatúvare ejapo eservi hag̃ua chupe. Ñande ningo koʼág̃ama voi ikatu ñañeñandu trankílo, pórke jaikuaa Jehová si o si oipytyvõha isiervokuérape ijetuʼu jave hendivekuéra (Is. 41:9, 10). Ndaipóri jaduda hag̃ua. ¡Jaservíramo ñande Túa Jehovápe, javyʼáta rreálmente! Ha heʼiháicha la Biblia, haʼe ‘omerese enterove omombaʼe ha ombotuicha’ chupe (Apoc. 4:11). w22.03 24 párr. 16; 25 párr. 18

Ñande ningo jasegise Jesús ehémplo, péro ndovaléi ñañedesanima nosẽiramo ñandéve opa mbaʼe haʼe ojapo hagueichaite (Sant. 3:2). Ñamoĩmína peteĩ ehémplo ñantende hag̃ua upéva. Peteĩ persóna oaprendeséramo ombopu mbaraka, ndaikatumoʼãi ensegída voi ojapóma imaéstro ojapohaichaite, pórke ojavýtante voi oñehaʼãmbaitéramo jepe. Péro oaprendéramo koʼã mbaʼégui, mbeguekatúpe ojoguátama avei ohóvo la imaéstrope, ha péicha osegíta omehora ombopukuaa peve la mbaraka. Upeichaite avei ñande kásope. Ñande ningo ñaaprendéma hetaiterei mbaʼe jastudia rupi la Biblia, ha ñañehaʼãmbaitéramo jakorrehi umi mbaʼe ndajajapoporãiva, mbeguekatúpe jajoguavétama jahávo Jesúspe ha jasegi porãvéta la iñehémplo (Sal. 119:59). Ko múndope ningo umi hénte siémpre oiko opensa ijehénte, péro ñande jaservíva Jehovápe katu ñanediferentete chuguikuéra. ¿Mbaʼérepa? Pórke opokoiterei ñanderehe pe ehémplo Jesús omoĩ vaʼekue ñandéve, ha ñaime desidído jasegitaha upéva (1 Ped. 2:21). Ñañehaʼãmbaitéramo jasegi Jesús ehémplo, katuete javyʼaitereíta pórke Jehová ñandeguerohorýta. w22.02 25 párr. 16, 18

Koʼág̃arupi, ñandegia hag̃ua Jehová oipuru Iñeʼẽ la Biblia. Ñañemotiémporamo jajepyʼamongeta hag̃ua umi mbaʼe Jehová ñanemboʼévare, jasegi porãta la igía ha jajapo porãta la haʼe onkarga vaʼekue ñandéve (1 Tim. 4:15, 16). Jehová ojevale avei pe ‘esklávo de konfiánsa ha iñarandúvare’ ñandegia hag̃ua (Mat. 24:45). Ha sapyʼánte ikatu hína pe esklávo omeʼẽ ñandéve algúna instruksión nañantendeporãiva. Por ehémplo, oĩ umi instruksión heʼíva mbaʼéichapa jajeprepara vaʼerã oikórõ g̃uarã peteĩ desástre naturál, ha a lo mehór ikatu hína ñapensa peichagua desástre núnka ndoikomoʼãiha pe sóna ñande jaikohápe. ¿Mbaʼépa ikatu jajapo nañantendeporãiramo umi instruksión oñemeʼẽva ñandéve, térã ñapensáramo ijexaheradoitereimaha? Ikatu ñanemanduʼa umi rreláto bíblico jastudiáma vaʼekuére. Heta vése Jehová puévlope oñemeʼẽma vaʼekue umi instruksión nontendeporãiva hikuái upe momentoitépe, péro tiémpo rire ohechakuaa hikuái umíva umi instruksión osalvaite hague chupekuéra (Juec. 7:7; 8:10). w22.03 18, 19 párr. 15, 16

Jesús ningo ojeroviaiterei Itúare, ha upévare heʼi vaʼekue la oĩva pe téxto koestediaguápe. Jesús oikuaa vaʼekue odependeha Jehováre oikove jey hag̃ua, ha oĩ vaʼekue segúro Itúa imanduʼataha hese. ¿Mbaʼépa ikatu ñaaprende pe Jesús heʼi vaʼekuégui? Ñaime vaʼerã dispuésto jaheja hag̃ua ñande rekove Jehová pópe. Jajapo hag̃ua upéva, ‘ñakonfia vaʼerã Jehováre ñande pyʼaite guive’ (Prov. 3:5). Jahechami Joshua ehémplo, peteĩ ermáno de 15 áño oreko vaʼekue peteĩ mbaʼasy ndaikatúivagui ojekuera. Haʼe ningo ndoaseptái vaʼekue umi tratamiénto médiko oñemoĩva Ñandejára léire. Ha omano mboyvemi heʼi isýpe: “Mama, che ningo aime Jehová pópe. [...] Ha ikatu haʼe ndéve mama aimeha segúro Jehová katuete chemoingove jeytaha. Haʼe oikuaa mbaʼépa oĩ che pyʼapýpe ha che ahayhueterei chupe”. Iporãta ñande káda uno ñañeporandúramo: “Ajecháramo peteĩ situasión ikatuhápe amano ajerovia haguére Jehováre, ¿amoĩtapa che rekove Jehová pópe, ha ajeroviátapa haʼe imanduʼataha cherehe?”. w21.04 12 párr. 15, 16

Jehová ningo ñanemombarete predikasión rupive. Japredika jave ótrope ñande ñañeñandu porã, umi hénte ñanerendu térã nañanerenduséiramo jepe. Oĩ umi ermáno oñandúva ndaikatuiha ojapo heta mbaʼe Ñandejára servísiope, pórke isituasión nopermitíri chupekuéra. Oiméramo ñañeñandu upéicha, ñanemanduʼa vaʼerã Jehová ovyʼaha ñameʼẽramo chupe pe iporãvéva. Jehová ningo ohecha ha omombaʼeterei pe deséo jarekóva japredika hag̃ua ndaikatúiramo jepe ñasẽ ñande rógagui. Haʼe ikatu omeʼẽ ñandéve oportunida japredika hag̃ua umi oñangarekóvape ñanderehe, umi doktór térã enfermerokuérape. Ñakomparáramo umi mbaʼe jajapóva koʼág̃a umi mbaʼe jajapo vaʼekuére yma, ikatu hína ñañedesanima. Péro jahechakuaáramo mbaʼéichapa Jehová ñanepytyvõ hína koʼág̃a, ñanembaretéta jagueropuʼaka hag̃ua vyʼápe oimehaichagua provléma. Ñande ningo ndajaikuaái moõpa oñembohapóta ha oñepyrũta okakuaa pe semílla ñañotỹva (Ecl. 11:6). w21.05 24, 25 párr. 14-17

Itaryrýi rupi, rréi David hesarái umi mbaʼe Jehová omeʼẽ vaʼekuégui chupe. Por ehémplo, omeʼẽ chupe rrikésa, autorida, ha avei oipytyvõ chupe ogana hag̃ua heta gérra. David oagradese ha orrekonose vaʼekue Jehová omeʼẽ hague chupe ‘hetaiterei mbaʼe’, ha ndaikatuiha voi okontapa umíva (Sal. 40:5). Péro upéi David ou noñekontentavéi. Hembireko hetáramo jepe, David oñepyrũ oĩse peteĩ tembireko ahénondi, Jehová heʼíramo jepe upéva oĩ vaiha. Upe kuña hína Bat-Seba ha iména haʼe vaʼekue Urías, pe hitita. David opensa ijehénte ha oreko rrelasión sexuál Bat-Sébandi, ha ombohyeguasu chupe. Ivaieterei ningo la David ojapo vaʼekue, péro pe ojapóva upéi ivaivéntema: ¡Haʼe ojukauka Uríaspe! (2 Sam. 11:2-15). ¿Mbaʼéiko la David oreko vaʼekue iñakãme? ¿Oimoʼãne piko raʼe Jehová ndohechamoʼãiha chupe? Jepe David oservíma vaʼekue Jehovápe heta tiémpore, haʼe ou vaʼekue itaryrýi ha oike heta akã rasýpe. Péro upéi haʼe omombeʼu la ipekádo ha oñarrepenti. ¡Ajépa oagradeseténe raʼe Jehovápe operdona haguére chupe! (2 Sam. 12:7-13). w21.06 17 párr. 10

Ikatu hína ndajajeroviái ñandejehe jajapokuaataha peteĩ estúdio bíblico. Ikatu ñapensa ñambostudia mboyve peteĩ persónape jaikuaa vaʼerãha hetave mbaʼe térã ñandevale vaʼerãha. Oiméramo ñañeñandu upéicha, jahechami mbohapy mbaʼe ñanekonvensétava ikatuha jajapo peteĩ estúdio bíblico. Primero, Jehová opensa ñanderehe ñandekatupyryha ñamboʼe hag̃ua ótrope. Segundo, Jesús, ‘pe orekóva ipoguýpe entéro mbaʼe oĩva yvágape ha ko yvy ape ári’, omanda ñandéve ñamboʼe vaʼerãha ótrope. Ha upéva ohechauka haʼe ojeroviaha ñanderehe (Mat. 28:18). Ha tercero, ikatu jajerovia Jehová ha ñane ermanokuéra ñanepytyvõtaha. Jehová ningo oipytyvõ vaʼekue Jesúspe oikuaa hag̃ua mbaʼépa heʼíta, ha katuete ojapóta avei upéva ñanderehehápe (Juan 8:28; 12:49). Jajerurekuaa avei ñane superintendénte de grúpope, peteĩ prekursór térã puvlikadór ikatupyrývape tañanepytyvõ ñamoñepyrũ ha jajapo hag̃ua peteĩ estúdio bíblico. Ñande ikatu hína ñañembokatupyry ha jajeroviave ñandejehe ñamoirũramo koʼã ermánope ojapo jave ijestúdio bíblico. w21.07 6 párr. 12

Koʼág̃a ningo hiʼag̃uimbaitéma pe fin, upévare mas ke núnka jajerovia vaʼerã Jehováre. ¿Mbaʼérepa? Pórke pe jehasa asy guasu aja, ikatu hína jarresivi umi instruksión haʼetévaicha naisentidopáiva o nañantendéiva. Ha upe tiémpope Jehová noñeʼẽmoʼãi ñandéve diréktamente, síno ke ojevaléta hína iñorganisasiónre ha umi ansianokuérare. Ág̃a oiko vove upéva nokonvenimoʼãi ñandéve jadudáramo ha ñañemoĩ ñapensa: “¿Kóva ko instruksión piko ou hína rreálmente Jehovágui? ¿Térã umi ansiánonte odesidi hína upéva oñantohágui reínte chupekuéra?”. ¿Mbaʼépa nepytyvõta ejerovia hag̃ua Jehováre ha iñorganisasiónre upe tiémpo iñimportantetévape? Ñande koʼág̃ama voi jajeroviáramo Jehováre, ha pyaʼe jasegi umi instruksión haʼe omeʼẽva ñandéve, jajapóta la mísma kósa pe jehasa asy guasu aja. w22.02 6 párr. 15

Jehová ningo oipytyvõ vaʼekue Gedeón ha umi 300 isoldádope ogana hag̃ua peteĩ gérra, ha haʼekuéra ikatu vaʼekue oñemombaʼeguasu upévare. Upéi umi kuimbaʼe Efraingua oho ojotopa Gedeón ndive, péro ndahaʼéi oguerohory hag̃ua chupe, síno ojodiskuti hag̃ua hendive, pórke noñeinvitái kuri chupekuéra oñepyrũ guive pe gérra oñorairõ hag̃ua (Juec. 8:1). Gedeón omomanduʼa umi Efrainguápe mbaʼeichaitépa Jehová ovendesíma chupekuéra, ha ohendúvo upéva “oñetrankilisa hikuái” (Juec. 8:3). Gedeón omboyke vaʼekue pe orgúllo ikatu hag̃uáicha oĩ pyʼaguapy Ñandejára puévlope. Umi Efraingua ehémplogui ñaaprende ndajaikói vaʼerãha jajepyʼapy mbaʼépa oñepensáta ñanderehe, síno ñandepyʼapyve vaʼerã mbaʼépa oñepensa Jehováre, ha ñamombaʼeguasu chupe. Oiméramo ñande peteĩ ansiáno térã ñamoakã hína ñande rogapy, ikatu ñaaprende peteĩ mbaʼe iñimportánteva Gedeóngui. Oĩramo ipochýva ñanendive peteĩ mbaʼe jajapo vaʼekuére, ñañehaʼã vaʼerã ñañemoĩ ilugárpe ha ñantende mbaʼérepa haʼe ipochy. Ikatu avei jaguerohory chupe umi mbaʼe ojapo porãvare. Jajapo hag̃ua upéva ningo tekotevẽ ñaneumílde. Péro iñimportanteve hína jaiko porã ñane ermánondi jahechaukase rangue mávapa la ojavy vaʼekue. w21.07 16, 17 párr. 10-12

Jehová ñandeapo vaʼekue ijoguahárõ. Haʼe ñandeapo rupi upéicha, ñande ikatu jahechauka umi kualida porãite haʼe orekóva. Por ehémplo, ikatu japorohayhu, japoroporiahuvereko, jahechauka ñandefielha ha jajapo iporãva (Sal. 86:15; 145:17). Ñañehaʼã jave jahechauka koʼã kualida, ñambotuicha hína Jehovápe, ha jahechauka jaagradeseha chupe ñandeapo haguére ijoguaháramo (1 Ped. 1:14-16). Ñande ningo javyʼa ha ñañeñandu porã jajapo jave umi mbaʼe ogustáva ñande Ru yvagapeguápe. Ha haʼe ñandeapo rupi ijoguaháramo, omeʼẽ ñandéve pe avilida jahechauka hag̃ua umi kualida porã haʼe ohaʼarõva oreko umi oĩtava ifamíliape. Jehová ojapo avei ñandéve g̃uarã peteĩ lugár iporãitereíva jaiko hag̃ua. Heta tiémpo ojapo mboyve Adánpe, Jehová opreparáma vaʼekue ko yvy yvyporakuérape g̃uarã (Job 38:4-6; Jer. 10:12). Jehová ivuéno ha ipojeraiterei rupi, ojapo hetaiterei mbaʼe ikatu hag̃uáicha jadisfruta (Sal. 104:14, 15, 24). Sapyʼánte haʼe oñemotiémpo vaʼekue opensa hag̃ua umi mbaʼe okrea vaʼekuére, ha “ohecha iporãha upéva” (Gén. 1:10, 12, 31). w21.08 3 párr. 5, 6

Ñande ningo enterove jareko la asignasión japredika ha jajapo hag̃ua disípulo (Mat. 28:19, 20; Rom. 10:14). ¿Mbaʼéichapa ikatu ñandevaleve ko traváho iñimportantetévape? Upearã ikatu jastudia pe folléto Ñamboʼe porãve hag̃ua, ha upéi ñamoĩ umi méta ñanepytyvõtava jajapo hag̃ua umi mbaʼe ñaaprendéva. Ñapensávo entéro umi méta ikatúvare ñamoĩ, ñanemanduʼákena umíva apytépe oĩha peteĩ iñimportantetereíva: Ñañehaʼã jareko umi kualida porã Jehová oguerohorýva (Col. 3:12; 2 Ped. 1:5-8). Katuete enterovépe hiʼãiterei jajapo hetave mbaʼe Jehová servísiope. Pe múndo pyahúpe ningo ikatúta jaservi porãiteve chupe, pórke ikatútama jajapo umi mbaʼe hiʼãitereímava ñandéve. Péro og̃uahẽ mboyve upe día, jaaprovechákena entéro oportunida jarekóva koʼág̃a Jehová servísiope. Péicha katuete javyʼavéta ha menove ñañeñandu vaíta. Iñimportanteveha, ñambotuicha ha ñamombaʼeguasúta hína Jehovápe, haʼéva ‘Ñandejára ovyʼáva’ (1 Tim. 1:11). Upéicharõ, ¡javyʼákena umi priviléhio jarekóvare koʼág̃a! w21.08 24, 25 párr. 18-20

¿Nde tuakuérapa haʼéma vaʼekue Testígo nde renasérõ guare? Oiméramo upéicha, nde reikuaáma Jehovápe nemichĩete guive ha reaprendéma haʼe haʼeha ñande Apohare. Avei reaprendéma haʼe orekoha heta kualida iporãitereíva, ha ojaposeha ko yvýgui peteĩ paraíso (Gén. 1:1; Hech. 17:24-27). Péro heta hénte ndogueroviái Ñandejára oexistiha térã haʼe ojapo hague opa mbaʼe. Upéva rangue, haʼekuéra oguerovia la vída oñepyrũ hague ijehegui reínte, ha opensa umi mbaʼe michĩvéva okambia hague ohóvo mbeguekatúpe oiko peve chuguikuéra umi mbaʼe tuichavéva. Ha oĩ voi umi hénte ijestúdio porãva ogueroviáva koʼã mbaʼe. Haʼekuéra heʼi la siénsia ohechaukáma hague la Biblia ojavyha, ha umi ivýrova, itavýva ha ijestudioʼívante ogueroviaha pe kreasión. Jaservímaramo jepe Jehovápe heta tiémpore térã ramoite guivénte, enterove jasegi vaʼerã ñamombarete ñande jerovia. Jajapóramo upéicha, nañandeguerahavaimoʼãi umi hénte heʼíva la Biblia omboʼéva japuha. Umíva hína umi ‘oipurúva yvypóra arandu ha heʼíva ñandéve vyrorei ñanembotavy hag̃ua’ (Col. 2:8). w21.08 14 párr. 1-3

Yma ningo Abel, Noé, Abrahán ha Job ohechauka vaʼekue ohayhu ha orrespetaha Jehovápe. Haʼekuéra ningo iñeʼẽrendu, ojerovia ha ojapo chupe sakrifísio. Ha ikatu ñaĩ segúro haʼekuéra ojapo hague pe iporãvéva omombaʼeguasu hag̃ua chupe. Tiémpo rire, Moisés rupive Jehová omeʼẽ vaʼekue umi léi Abrahán familiarépe. Umívape Jehová heʼi vaʼekue mbaʼéichapa haʼe oipota ojeadora chupe ikatu hag̃uáicha oasepta upéva. Jesús omano rire, Jehová nohaʼarõvéima ñakumpli pe léi omeʼẽ vaʼekue Moisés rupive, síno Jesús omeʼẽ vaʼekue peteĩ léi pyahu. Upévare ñande jasegi vaʼerã pe “Cristo léi” (Rom. 10:4; Gál. 6:2). Kóva ko léi ndorekói peteĩ lísta heʼíva ñandéve mbaʼépa jajapo ha ndajajapói vaʼerã. Upéva rangue ñande jasegínte vaʼerã Jesús ehémplo ha ñakumpli umi mbaʼe haʼe omboʼe vaʼekue. Upévare enterovéva ñañehaʼãmbaite hína jasegi porã Jesús ehémplo, ha upéva ningo ‘katuete ñanembopiroʼýta’ (Mat. 11:29). w22.03 20, 21 párr. 4, 5

Jehová ohendu ifamiliakuérape. Jesús oĩrõ guare ko yvy ape ári haʼe oñemboʼe vaʼekue heta vése, ha ikatu ñaime segúro Jehová ohendu hague chupe. Jehová ohendu vaʼekue Itaʼýrape oñemboʼérõ guare odesidi mboyve umi mbaʼe iñimportánteva, por ehémplo oiporavótarõ guare umi 12 ijapóstolpe (Luc. 6:12, 13). Avei Jehová ohendu vaʼekue Jesús ñemboʼe haʼe ojepyʼapyetereírõ guare. Judas otraisiona potaitérõ guare Jesúspe, haʼe oñemboʼe vaʼekue Itúape ipyʼaite guive, ha oñeʼẽ chupe pe pruéva tuichaite ombohovái potaitévare. Péro Jehová ndahaʼéi ohendúnteva Jesús ñemboʼe, síno ombou voi peteĩ ánhel omombarete hag̃ua Itaʼýra ohayhuetévape (Luc. 22:41-44). Koʼág̃arupi avei Jehová ohendu umi ñane ñemboʼe, ha ombohovái itiempoitépe ha iporãveháicha (Sal. 116:1, 2). Peteĩ ermána oikóva Índiape ohechakuaa vaʼekue mbaʼéichapa Jehová okontesta iñemboʼe. Ko ermána ningo oreko ansieda ivaietereíva. Upévare oñemboʼe asy Jehovápe ha omombeʼu chupe mbaʼéichapa oñeñandu. Haʼe heʼi: “Pe Broadcasting osẽ vaʼekue mayo 2019-pe ohechauka mbaʼépa ikatu jajapo jarekóramo ansieda térã ñañekevrantaitereíramo. Ha ahechakuaa Jehová okontesta hague umi che ñemboʼe ko prográma rupive, pórke upéva chéve g̃uarãite kuri”. w21.09 21, 22 párr. 6, 7

¡Eñeimahinamíntena mbaʼeichaitépa oiméne ijetuʼu raʼe umi kristiáno ypykuéndi! Haʼekuéra ojeroviámante vaʼerã kuri Jehová omeʼẽtaha chupekuéra la oikotevẽva. Péro oĩ vaʼekue peteĩ mbaʼe oipytyvõva chupekuéra. Cinco áño umi rrománo omongora mboyve Jerusalén, apóstol Pablo omeʼẽ peteĩ konsého iporãitereíva Hebreos 13:5, 6-pe. Upépe haʼe heʼi: “Aníkena peiko pendeplatarayhu, upéva rangue pevyʼáma vaʼerã umi mbaʼe perekóvare. Ñandejára heʼi voi: ‘Núnka ndorohejamoʼãi ha núnka nderepytamoʼãi neaño’. Upéicharõ, ani jakyhyje, síno jaʼe vaʼerã: ‘Jehová chepytyvõ hína, ndakyhyjemoʼãi asy, ¿mbaʼe piko ojapóta cherehe peteĩ persóna cheichagua?’”. Ko konsého oiméne tuicha oipytyvõ raʼe umi kristiáno iñeʼẽrendúvape, pórke ou mboyve jepe pe ehérsito rrománo haʼekuéra ja ojepokuaátama kuri oiko sensillomie. Ha upéi ohóvo oiko ótro lugárpe, ndahaʼemoʼãvéima ijetuʼuetereíva chupekuéra ojeadapta hag̃ua, ni ojerovia hag̃ua Jehová omeʼẽtaha chupekuéra la oikotevẽva oikove hag̃ua. w22.01 4 párr. 7, 9

Ñañeʼẽ jave peteĩ oiporiahuverekóvare hapichápe, oiméne ñapensa peteĩ persóna ivuénovare, ipyʼaporãva, oporombyasýva ha ipojerávare. Oiméne ou voi ñane akãme pe istória Jesús omombeʼu vaʼekue oñeʼẽva pe samaritano imbaʼeporãvare. Ko kuimbaʼe extranhéro ningo “oiporiahuvereko vaʼekue” peteĩ judío oñemonda ha oñembyepoti vaipaite vaʼekuépe. Pe samaritano “ombyasyeterei chupe”, ha mborayhúpe oñangareko hese (Luc. 10:29-37). Ko ehémplo ñanemboʼe Jehová ñandeporiahuverekoha, upéva ningo peteĩ kualida iporãitereíva haʼe orekóva. Ñandejára ningo ñandeporiahuvereko ñanderayhu rupi, ha haʼe ohechauka ñandéve upéva hetaiterei hendáicha káda día. Ojehechauka jepi avei ojeporiahuverekoha peteĩ persónape ndojekastigáiramo chupe, omereséramo jepe upéva. Upéicha rupi ikatu jaʼe Jehová ñandeporiahuverekoitereiha, pórke pe salmísta heʼi haguéicha: “Ñande japeka ha ñamerese kuri Ñandejára ñandekastiga, péro haʼe ndojapói upéva” (Sal. 103:10). Péro sapyʼánte Jehová okorrehi mbaretémante vaʼerã peteĩ opeka vaʼekuépe. w21.10 8 párr. 1, 2

Jehová ohechauka mborayhu ifiélva umi isiervokuérape añoite, umi orekóvape hendive peteĩ amista imbaretéva. Upéva jahechakuaa umi mbaʼe heʼi vaʼekuére rréi David ha proféta Daniel. Por ehémplo, David heʼi vaʼekue: “Jehová, nde ningo siémpre reiporiahuvereko ha rehechauka mborayhu ifiélva nde siervokuérape”. “Jehová ohechaukáta mborayhu ifiélva umi orrespetávape chupe”. Ha Daniel heʼi vaʼekue: “Jehová, nde ningo pe Dios verdadéro [...], ha rehechauka mborayhu ifiélva umi nderayhúvape ha umi okumplívape ne mandamientokuéra” (Sal. 25:6, nóta; 103:17, nóta; Dan. 9:4, nóta). Heʼiháicha koʼã téxto, Jehová ohechauka mborayhu ifiélva isiervokuérape pórke haʼekuéra oikuaa chupe, orrespeta ha ohayhu chupe, ha avei okumpli hikuái imandamientokuéra. Jehová ohechauka mborayhu ifiélva ipuévlope añoite, umi oadorávape chupe haʼe oipotaháicha. Ñande ñañepyrũ mboyve jaservi Jehovápe, haʼe ohechaukáma vaʼekue ñandéve pe mborayhu oñandúva yvyporakuérare en henerál (Sal. 104:14). Péro koʼág̃a ñande jaservíma rupi chupe, haʼe ohechauka avei ñandéve pe mborayhu ifiélva. w21.11 3, 4 párr. 8, 9

Koʼág̃arupi umi hénte itarovapa umi líder rrelihióso oñeʼẽkuaáva ha ifamósovare. Haʼekuéra ombotuichaiterei koʼã líder rrelihiósope ha haimetéma voi oadora chupekuéra. Umi hénte omyenyhẽ umi ijiglesiakuéra, ojogua umi ilívro ha omeʼẽ heta heta pláta oapoja hag̃ua chupekuéra. Oĩ umi ogueroviáva káda palávra heʼíva hikuái. ¡Ni Jesucristo voi ojaparesérõ chupekuéra noñeemosionaichéne la peichaite peve! Péro ñande jaadoráva Jehovápe haʼe oipotaháicha ndajasegíri umi yvypórape ni nañambotuichái chupekuéra. Jarrespetáramo jepe umi ñandegiávape, siémpre ñanemanduʼa ko Jesús heʼi vaʼekuére: “Peẽ enterovéva oñoermáno” (Mat. 23:8-10). Ñande nañamombaʼeguasúi umi yvypórape, tahaʼe umi líder rrelihióso térã governánte polítikope, ha ndajaapojái avei chupekuéra. Ñande ningo ndajaikéi polítikape ha ndajajeheʼái ko múndore. Entéro koʼã mbaʼépe ñande tuicha ñanediferénte umi rrelihión heʼívagui ijehe kristianoha (Juan 18:36). w21.10 20 párr. 6, 7

Ñande ningo jaipota Jehová heʼi ñanderehe ñanesantoha entéro mbaʼépe. Upévare nañapermitíri vaʼerã avave ni mbaʼevete asy ñandestorva jaservi hag̃ua chupe. Ha ñande haʼe rupi testígo de Jehová ndajajaposéi mbaʼeve oheja vaítava chupe (Lev. 19:12; Is. 57:15). Umi israelita ningo oadora hag̃ua Jehovápe okumpli vaʼerã kuri heta léi. Levítico 18:4 heʼi: “Peẽ pekumpli vaʼerã umi léi ameʼẽva peẽme, ha peiko vaʼerã che haʼeháicha peẽme. Che hína Jehová pende Jára”. Ha kapítulo 19-pe jatopa unos kuánto umi mandamiénto. Por ehémplo versíkulo 5-8, 21, 22 omombeʼu mbaʼépa oreko vaʼerã kuri enkuénta umi israelita osakrifikáta jave umi animál, ha oñatende vaʼerãha hikuái ani hag̃ua omongyʼa peteĩ mbaʼe sagrádova oñemeʼẽ vaʼekue Jehovápe. Koʼã versíkulo ñanemokyreʼỹ jajapo hag̃ua umi sakrifísio Jehovápe ogustaháicha pórke ñambovyʼase chupe, heʼiháicha Hebreos 13:15. w21.12 5 párr. 14, 15

Umi matrimónio imitãva ningo ikatu oñevenefisia pe experiénsia orekóvagui umi ermáno ha ermána oaprende vaʼekue ojerovia Jehováre. Por ehémplo, oĩ umi matrimónio oservíma vaʼekue Jehovápe de tiémpo kompléto hetaiterei áñore. ¿Mbaʼérepa napeporandúi chupekuéra mbaʼeichagua métapa ikatu pemoĩ? Péicha pehechaukáta hína pejeroviaha Jehováre (Prov. 22:17, 19). Penemanduʼákena, pe matrimónio ningo peteĩ rregálo oúva Jehovágui, ha haʼe oipota umi omendáva odisfruta ko rregálo (Mat. 19:5, 6). Peẽ matrimónio imitãva, ¿ikatúnepa pehecha mbaʼépa pemotenonde hína pende rekovépe? ¿Peñehaʼãmbaitépa hína pehechauka hag̃ua Jehovápe pemombaʼetereiha umi rregálo haʼe omeʼẽ vaʼekue peẽme? Peñemboʼékena Jehovápe, peheka Iñeʼẽme umi konsého penepytyvõtava pene situasiónpe ha upéi pesegi umi konsého haʼe omeʼẽva peẽme. ¡Ikatu peime segúro katuete pevyʼaitereitaha pene matrimóniope pemotenondéramo oñondive Jehová servísio! w21.11 18 párr. 16; 19 párr. 18

Santiago nopensái vaʼekue iñimportanteveha ótrogui. Haʼe nopensái vaʼekue upéicha, Jesús haʼéramo jepe iñermáno majór ha orekóramo jepe heta priviléhio kongregasiónpe. ¿Mbaʼérepa ikatu jaʼe upéva? Pórke oñeʼẽvo umi ótro kristiánope heʼi voi chupekuéra: “Che ermanokuéra pohayhuetéva” (Sant. 1:16, 19; 2:5). Santiago noñehaʼãi vaʼekue umi ótro opensa hag̃ua hese haʼe ndojavyiha voi. ¿Mbaʼépa ñaaprende? Ñanemanduʼa vaʼerã enterovéva jajavyha. Ndovaléi ñantendeka ñane estudiántepe ñande jahasaha chupe entéro mbaʼépe ha núnka nañanderupytymoʼãiha. ¿Mbaʼérepa? Pórke ñane estudiánte opensárõ ñande ndajajavyiha voi, haʼe opensáta núnka ndaikatumoʼãiha oiko Jehová oipotaháicha. ¿Mbaʼéichapa ikatu ñaipytyvõ ñane estudiántepe ani hag̃ua opensa upéva? Ikatu jaʼe chupe ñandéve avei sapyʼánte ijetuʼuha jajapo hag̃ua la Biblia heʼíva, ha upéi ñamombeʼu chupe mbaʼéichapa Jehová ñanepytyvõ ñaneñeʼẽrendu hag̃ua chupe. Péicha jajapórõ ñane estudiánte opensáta si ikatutaha oservi Jehovápe. w22.01 11 párr. 13, 14

Amáske ñapensa Jesúicha jajoguavéta chupe, ha péicha ifasilvéta ñandéve jareko hag̃ua pe kondúkta pyahu (Heb. 1:3). Péro sapyʼánte ikatu hína ñapensa: “Jesús ningo perfékto, ¿mbaʼéichaiko che ahupytýta chupe?”. Oiméramo ñapensa upéicha, jajepyʼamongetamína koʼã mbaʼére: Primero, Jehová ningo ñandekrea vaʼekue ijoguaháramo ha avei Itaʼýra joguaháramo. Upévare ñande ikatu jasegi iñehémplo ha jahechauka umi kualida haʼe orekóva (Gén. 1:26). Segundo, Jehová espíritu ningo ipoderosoiterei. Upévare haʼe ñanepytyvõramo ijespíritu rupive, ikatúta jajapo oimeraẽ mbaʼe ndaikatumoʼãiva jajapo ñaneaño rei. Ha tercero, Jehovángo nohaʼarõinte voi ñandehegui perfeksión. Upévare ani ejepyʼapy, haʼe oapartáma vaʼekue voi 1.000 áño ikatu hag̃uáicha jahupyty upéva (Apoc. 20:1-3). ¿Mbaʼépa upéicharõ la Jehová ohaʼarõva koʼag̃aite ñandehegui? Haʼe oipota jajapo la ikatumíva guive jasegi hag̃ua iñehémplo, ha oipota avei jajerovia haʼe ñanepytyvõtaha. w22.03 9 párr. 5, 6

Ndahaʼéi ningo ñañemboʼe javénte la ñañemoag̃uíva Jehováre. Jastudia jave la Biblia ha jaha jave rreunionhápe ñañemoag̃uínte hína avei hese. ¿Mbaʼe mbaʼépa ikatu rejapo eaprovecha porã hag̃ua pe tiémpo reipurúva tahaʼe restudiáta jave neaño térã reĩ jave rreunionhápe? Eñeporandumína: “¿Mbaʼe mbaʼépa chedistrae jepi rreunión aja térã añehaʼã jave astudia?”. ¿Erresivípa llamáda, mensáhe térã korréo elektróniko? Epilláramo ótro ladoite oĩha hína la ne akã, tahaʼe restudia jave neañoháme térã reĩ jave rreunionhápe, ikatu ejerure Jehovápe tanepytyvõ. Ijetuʼútante voi emboyke hag̃ua umi mbaʼe ndepyʼapýva, reñekonsentra hag̃ua la ojeʼévare rreunionhápe térã la releévare hína restudia aja. Péro iñimportanteterei ningo rejapo péicha. Ikatu voi eñemboʼe Jehovápe ikatu hag̃uáicha omeʼẽ ndéve pe pyʼaguapy oúva chugui, péva oñangarekóta ne korasõre ha ‘umi mbaʼe repensávare’ (Filip. 4:6, 7). w22.01 29 párr. 12-14

Rréi Uzías nohenduséi vaʼekue umi konsého. Una vuéltape haʼe oike vaʼekue pe témplope, peteĩ párte ikatuhápe oike sólamente umi saserdóte, ha ojeprepara voi oofrese hag̃ua insiénso upépe. Upévare umi Jehová saserdóte heʼi chupe: “¡Uzías, nde ndovaléi rehapy insiénso Jehovápe! Umi saserdóte añoite ohapy vaʼerã insiénso”. ¿Mbaʼéichapa orreaksiona raʼe rréi Uzías? Haʼe iñumílderire oaseptáta kuri pe konsého ha upepete osẽ pe témplogui. Upéicharire ikatu kuri Jehová operdona chupe. Péro haʼe “ipochyeterei”. ¿Mbaʼérepa Uzías nohenduséi raʼe pe konsého oñemeʼẽ vaʼekue chupe? Oiméne haʼe opensa raʼe haʼe rupi pe rréi, orekoha derécho ojapo hag̃ua oñantoháva chupe. Péro Jehová nopensaiete upéicha. Uzías ijorgullóso rupi ojagarrapaite chupe lépra, ha opyta upéicha “omanoha día peve” (2 Crón. 26:16-21). Rréi Uzías ehémplo ñanemboʼe álgo iñimportantetereíva: Tahaʼe haʼéva umi priviléhio jarekóva, nañapenáiramo umi konsého oñemopyendávare la Bíbliape, Jehová nañandeguerohorymoʼãi. w22.02 9 párr. 7

¿Mbaʼéichapa oñekomporta peteĩ persóna ndoipeʼáiva ijehegui pe “kondúkta yma guare”? (Col. 3:9). Peichagua hénte ningo opensa ijehénte, ipochypa rei, imalagradesído ha oñemombaʼeguasu. Avei ikatu oime ohecha jepi pornografía térã umi pelíkula itieʼỹ ha ivioléntova. Oiménengo oreko avei umi kualida iporãva, ha ikatu oime oñeñandu vai jepi heʼi térã ojapo jave peteĩ mbaʼe noĩporãiva. Upéicharõ jepe, ndorekói la fuérsa okambia hag̃ua la opensáva ha avei la ikondúkta (Gál. 5:19-21; 2 Tim. 3:2-5). Enterove ningo ñaneimperfékto, upéicha rupi ndaipóri la ikatúva kompletoite voi oipeʼa umi pensamiénto ha deséo vai orekóva. Ha upéicha rupi sapyʼánte jaʼe térã jajapo peteĩ mbaʼe upéi ñambyasýva (Jer. 17:9; Sant. 3:2). Péro ñañehaʼãmbaitéramo jaipeʼaite ñandejehegui ñane kondúkta yma guare, ndajaikomoʼãvéima tódo el tiémpo jajapo umi mbaʼe ivaíva ni ñapensa koʼã mbaʼére. Ha upéicha rupi ñakambiaite voi ñapensa lája ha ñañekomporta lája (Is. 55:7). w22.03 3 párr. 4, 5

Ansianokuéra, peñehaʼãkena siémpre pehecha umi kósa iporãva orekóva la ermanokuéra. Siérto, enterove ermáno ningo iñimperfékto, péro upéicha avei káda uno oreko heta kualida iporãitereíva. Peteĩ ansiáno ningo ikatu hína sapyʼánte opensa vai algún ermáno térã ermánare. Péro upéicha jave haʼe osegi vaʼerã apóstol Pablo ehémplo, ha oñehaʼã ohecha umi kualida porã orekóva umi ermáno oñekonsentra rangue umi ifallakuérare. Upévare iporãta umi ansiáno siémpre imanduʼáramo mbaʼéichapa umi ermáno iguapoiterei ha ohayhueterei Jehovápe. Upéicha umi ansiáno oipytyvõta ikatu hag̃uáicha kongregasiónpe entéro ojogueraha porã ha ojoayhu. Imanduʼa vaʼerã hikuái Jehová nohaʼarõiha chuguikuéra perfeksión. Haʼe oipotánte ifiél ha iñeʼẽrendu chupe hikuái (1 Cor. 4:2). Ansianokuéra, ikatu peĩ segúro Jehová omombaʼetereiha avei la peẽ pejapóva. Haʼe ningo “ndahesaraimoʼãi umi mbaʼe pejapo vaʼekuégui ha mbaʼéichapa pehayhu héra. Peẽ pehechauka koʼã mbaʼe pesegívo peservi umi ermánope, yma guive koʼág̃a peve” (Heb. 6:10). w22.03 31 párr. 19, 21