Enero

¿Mbaʼérepa Jehová ohayhuete vaʼekue Timotéope ha ideprovechoite vaʼekue iservísiope? Pórke haʼe oreko vaʼekue heta kualida iporãitereíva (Filip. 2:​19-22). Apóstol Pablo heʼi vaʼekue Timoteo iñumílde, ifiél, iguápo, ha ikonfiávle hague. Haʼe ohayhueterei vaʼekue iñermanokuérape, ha oñehaʼãmbaite vaʼekue oipytyvõ chupekuéra ikatumiháicha. Upévare Pablo ohayhueterei vaʼekue Timotéope, ha ndokyhyjéi omeʼẽ hag̃ua chupe heta asignasión iñimportánteva. Upeichaite avei oikóta ñande kásope, Jehová ñanderayhuvéta ha ñaipytyvõ porãvéta pe kongregasiónpe ñañehaʼãramo jareko hetave kualida iporãva (Sal. 25:9; 138:6). Iporãta ñañemboʼéramo Jehovápe, ha upéi jaiporavo espesífikamente peteĩ kualida tekotevẽva jareko. Ikatu ñañehaʼã ñandekalidave hag̃ua ñande rapichakuérandi, jajogueraha porã enterovéndi, ha ñaperdona oĩ jave ofalláva ñanendive. Tuichaiterei avei ñanepytyvõta ñaporandúramo peteĩ ñane amígope mbaʼépepa ikatu ñamehora (Prov. 27:6). w22.04 23 párr. 4, 5

Jehová oipota ñande javyʼa, ha jaikuaa upeichaha pórke pe vyʼa ou ijespíritu sántogui (Gál. 5:22). Avei javyʼaitereive ñameʼẽvo, ñandéve oñemeʼẽ rangue, upévare igustoiterei ñandéve japredika ha ñaipytyvõ ñane ermanokuérape (Hech. 20:35). Heʼiháicha pe téxto koestediaguápe, apóstol Pablo heʼi vaʼekue mokõi mbaʼe ñanepytyvõtava jasegi hag̃ua javyʼa. Primero, ñameʼẽ vaʼerã Jehovápe pe iporãvéva, ha katuete javyʼáta jajapóramo upéva (Mat. 22:​36-38). Segundo, ndovaléi ñañekompara ótrore. Ñande jaagradese vaʼerã Jehovápe umi mbaʼe ikatúvare jajapo ñaneresãi rupi, jarresivi rupi umi entrenamiénto térã ñandevale haguére. Avei oiméramo ótro ivaleve ñandehegui Jehová servísiope, javyʼa vaʼerã hendivekuéra oipuru haguére upe kapasida omombaʼeguasu hag̃ua Jehovápe. w22.04 10 párr. 1, 2

Umi rrelihión fálsa derrepentete oñehundíta ha upéva katuete osorprendéta umi héntepe (Apoc. 18:​8-10). Upéva oiko vove tuichaiterei oafektáta ko múndope, péro Ñandejára puévlo orekóta mokõi mbaʼe ombovyʼátava chupekuéra: Ko Ñandejára enemígo oñehundietéta pára siémpre, ha hiʼag̃uimbaitéta ojesalva hag̃ua ko múndo añágui. Pe profesía de Daniel heʼi voi vaʼekue ‘umi enseñánsa verdadéra heta hetavetaha’. Ha upéva ñande jahecha siertoiteha koʼág̃a. Ñande ñantende umi profesía oñekumplíva hína ko ñane tiémpope (Dan. 12:​4, 9, 10). Jahechávo mbaʼéichapa koʼã profesía oñekumpli porãiterei, ñanepytyvõ jajeroviave hag̃ua Jehováre ha Iñeʼẽre (Is. 46:10; 55:11). Upévare eñehaʼãmbaitékena emombarete nde jerovia restudia porãvo la Biblia ha reipytyvõvo ótrope ikatu hag̃uáicha oguereko peteĩ amista iporãva Jehovándi. Jehová oñangarekóta umi ojeroviávare hese ipyʼaite guive ha ‘oipytyvõta chupekuéra oiko hag̃ua pyʼaguapýpe’ (Is. 26:3). w22.07 6, 7 párr. 16, 17

Lívro de Apocalipsis ohechauka Ñandejára Rréino oñepyrũma hague ogoverna yvágape ha upe rire oñemosẽ hague Satanáspe upégui (Apoc. 12:​1-9). Oiko rire koʼã mbaʼe, umi ánhel oikóva yvágape tuichaiterei ipyʼaguapy jey, péro ko yvy ape ári katu oñepyrũ heta provléma. ¿Mbaʼérepa? Pórke Satanás ipochyeterei ha oñehaʼãmbaite operhudika Jehová siervokuéra oĩvape ko yvy ape ári (Apoc. 12:​12, 15, 17). ¿Mbaʼépa ñanepytyvõta jasegi hag̃ua ñaaguanta Satanás oñemoĩ mbaretéramo jepe ñanderehe? (Apoc. 13:10). Peteĩ mbaʼe haʼe hína jaikuaáramo mbaʼépa ñaneraʼarõ amo gotyove. Por ehémplo Apocalípsispe apóstol Juan omombeʼu mbaʼeichaitépa Jehová ñanevendesíta koʼẽrõite, ha umíva apytépe heʼi Ñandejára koʼẽrõitéma ohunditaha entéro ikontrariokuérape. Pe primer versíkulope, lívro de Apocalipsis omombeʼu Juan ohecha hague umi “visión” orrepresentáva heta mbaʼe (Apoc. 1:1). w22.05 8 párr. 1-3

Jehová siervokuéra iñeʼẽrendu rupi chupe, oĩta hetaiterei oñemoĩva hesekuéra. Upéicha rupi oĩta peteĩ grúpo de nasión oataka vaipaitétava Jehová siervokuérape ko múndo tuichakuére. Péva pe grúpo de nasiónpe la Biblia ohenói Gog de Magog (Ezeq. 38:​14, 15). ¿Mbaʼéichapa orreaksionáta Jehová ojeataka vove ipuévlope? Haʼe omombeʼu ñandéve: “Arrenegaitereíta” (Ezeq. 38:​18, 21-23). Ha Apocalipsis kapítulo 19 omombeʼu ñandéve mbaʼépa oikóta upe rire. Jehová omboúta itaʼýrape odefende hag̃ua ipuévlope ha ohundipaite hag̃ua iñenemigokuérape. Péro Jesús ndoumoʼãi haʼeño, oipytyvõta avei chupe “umi ehérsito yvagapegua”, umíva apytépe oĩ umi ánhel ha avei umi 144.000 (Apoc. 17:14; 19:​11-15). ¿Mbaʼéichapa opáta péva pe gérra? Oñehundipaitéta entéro umi oñemoĩva guive Jehováre (Apoc. 19:​19-21). w22.05 17 párr. 9, 10

Adán ha Eva opeka riremi, Jehová omeʼẽ vaʼekue esperánsa umi ifamiliarépe peteĩ profesía iñimportantetereíva rupive. Upéva jatopa hína Génesis 3:​15-pe: “Romoingo vaíta pe kuña ndive, ha ne familiare amoingo vaíta pe kuña familiare ndive. Nde reisuʼúta chupe ipytápe ha haʼe opyrũta ne akãre ha ombochipéta ndehegui”. Upe profesía jatopa pe primer lívro de la Bíbliape. Péro enterove lívro oĩva la Bíbliape oreko algúna koneksión ko profesíandi. Umi páhina orekóva umi lívro oñeuniháicha oñondive, upéicha avei umi mbaʼe heʼíva Génesis 3:​15-pe ouni oñondive kompletoite umi lívro oĩva la Bíbliape, pórke oñeʼẽ peteĩ mensáherente. Upéva heʼise Ñandejára omboúta hague peteĩ Salvadór ohundítava Satanáspe ha enterove umi isegidorkuéra iñañaitévape. ¡Ajépa tuichaite vendisión upéva enterove umi ohayhúvape g̃uarã Jehovápe! Jastudiávo la Biblia jahecháta mbaʼéichapa oñekumplíma ko profesía, ha mbaʼéichapa ñanevenefisia koʼág̃a. w22.07 14 párr. 1-3

Ejerure Jehovápe arandu reikotevẽva reipytyvõ hag̃ua ne famíliape ohayhu hag̃ua chupe (Sant. 1:5). Jehová haʼe pe persóna ikatúva omeʼẽ ndéve umi konsého iporãvéva. ¿Mbaʼérepa ikatu jaʼe upéva? Primeroite pórke Jehová haʼe pe mehór Papa oexistíva (Sal. 36:9). Segundo katu, pórke umi konsého haʼe omeʼẽva ñandéve siémpre ideprovécho (Is. 48:17). Jehová oipuru Iñeʼẽ la Biblia ha avei iñorganisasión ikatu hag̃uáicha penepytyvõ pemboʼe hag̃ua pene famíliape ohayhu hag̃ua chupe (Mat. 24:45). Por ehémplo, ikatu retopa umi konsého ideprovéchotava ndéve umi artíkulo héravape “Ideprovéchotava umi famíliape” osẽ vaʼekue ñande rrevísta ¡Pepaýke!-pe, koʼág̃a jatopáva avei ñande sítio de Internétpe. Ko sítiope avei ikatu retopa umi entrevísta ha avei hetave vidéo ikatúva oipytyvõ tuakuérape osegi hag̃ua umi konsého oúva Jehovágui oipytyvõ hag̃ua porã ifamíliape (Prov. 2:​4, 5). w22.05 27 párr. 4, 5

Ndaipóri ótro oporoperdonakuaavéva Jehovágui. Primero, haʼe oĩ siémpre ñaneperdona hag̃uáicha. Segundo, haʼe ñandekuaa porã. Upéicha rupi ndaipóri haʼéicha oikuaáva ñañarrepentípa ñande pyʼaite guive. Ha tercero, Jehová naimanduʼavéima umi mbaʼe vai jajapo vaʼekuére. Ha upéicha rupi ikatu jareko peteĩ konsiénsia potĩ ha oiko jey ñandehegui iñamígo. Añetehápe ñaneimperfékto aja, japekátante voi. Tuichaiterei ñanekonsola pe jatopáva Perspicacia para comprender las Escrituras, volúmen 1, páhina 209-pe, upépe heʼi: “Jehová ñandeporiahuvereko oikuaágui ñande ñaneimperfektoha ha pyʼỹinte jajavytaha. Upéicha rupi, isiervokuéra natekotevẽi oñeñandu vaieterei ojavy jave iñimperfékto haguére (Sal. 103:​8-14; 103:3). Upéva rangue, oñehaʼãmbaitéramo oiko Jehová oipotaháicha ikatúta ovyʼa (Filip. 4:​4-6; 1 Juan 3:​19-22)”. w22.06 7 párr. 18, 19

Satanás ñanemongyhyjese umi goviérno oñemoĩvagui ñanderehe. Péro ndahaʼéi upe ñuhãnte haʼe oipuruséva ñane kóntrape. Por ehémplo, oĩ umi okyhyjéva ihentekuéra opensátavagui hesekuéra oiko haguére chuguikuéra testígo de Jehová, ha sapyʼánte okyhyjeve upévagui ke la oñembyepoti térã oñemaltrata chupekuéra. Haʼekuéra ohayhueterei la ihentekuérape ha oipotaiterei oikuaa ha ohayhu Jehovápe. Haʼekuéra oñembyasy ohendúvo umi ihentekuéra oñeʼẽ vaiha Jehováre ha umi oadorávare chupe. Péro sapyʼánte oĩ umi ñane hénte ñepyrũrã oñemoĩ vaʼekue ñanderehe, ha upéi oikóva chugui Testígo. Péro ñamoĩ chupe oĩha umi ñane hénte ndotratasevéiva ñanendive oiko haguére ñandehegui testígo de Jehová. ¿Mbaʼéichapa ñarreaksionáta? Tuichaiterei ñanekonsola la heʼíva Salmo 27:10. Ñande ñanemanduʼáramo mbaʼeichaitépa Jehová ñanderayhu, ndajakyhyjemoʼãi umi mbaʼe ikatúvagui oiko, tahaʼe jepe raʼe umi ñane hénte la ñanderrechasáva. Ñande ikatu jajerovia Jehová ñanevendesitaha ñaaguanta haguére. Jehová omeʼẽta ñandéve entéro mbaʼe ñaikotevẽva jaikove hag̃ua, ñanepytyvõta ñandepyʼaguapy ha javyʼa hag̃ua, avei ñanepytyvõta jasegi hag̃ua ñaime ag̃ui chugui. w22.06 16, 17 párr. 11-13

Oĩrõ guare ko yvy ape ári, Jesúsre ojeʼe vaʼekue hetaiterei mbaʼe ivaíva. Por ehémplo ojeʼe hese ikaʼuha, okaruhárente oikoha, nokumpliriha pe sábado, ha oñeʼẽ vaiha Ñandejárare (Mat. 11:19; 26:65; Luc. 11:15; Juan 9:16). Péro Jesús noñemoĩri vaʼekue ojaʼo umi héntepe heʼi haguére hese koʼã mbaʼe. Upévare oiméramo predikasiónpe oĩ ñandetrata vaíva, ñande ñañehaʼã vaʼerã jasegi Jesús ehémplo (1 Ped. 2:​22, 23). Péro sapyʼánte jajejokopaitémante vaʼerã, ha upéva ikatu ijetuʼu (Sant. 3:2). ¿Mbaʼépa ñanepytyvõta upéicha jave? Oĩ jave ijarhélva ñandéve, nañapenáinte vaʼerã la heʼívare. Upéva rangue, jajapo vaʼerã la ojapóva peteĩ ermáno hérava Sam. Haʼe heʼi: “Che añemoĩ jepi apensa mbaʼeichaitépa pe persóna oikotevẽ hína ohendu umi notísia porã, ha añehaʼã avei apensa haʼe ikatuha okambia”. Sapyʼánte umi ogajára ikatu ñandetrata vai ikoʼẽ vai rupínte, térã oreko rupi peteĩ provléma okevrantaitereíva chupe. Upévare, oiméramo algúno ñandetrata upéicha, upepete ñañemboʼe ha jajerure Jehovápe ñanepytyvõmi hag̃ua jasegi hag̃ua trankílo, ha ani hag̃ua jaʼe álgo omoñeñandu vaítava pe persónape. w22.04 6 párr. 8, 9

Pestudiáramo la Biblia pene famíliandi peipytyvõta chupekuéra oñemoag̃uive hag̃ua Jehováre (2 Tim. 3:​14-17). Péro la Biblia heʼi umi imitãva ikatuha oikuaave Ñandejárape de ótra fórma avei. Lívro de Proverbios omensiona peteĩ túa heʼíva itaʼýrape oreko hag̃ua enkuénta umi Ñandejára kualida ikatúva ojehecha pe kreasión rupive (Prov. 3:​19-21). Oiméne peẽ tuakuéra pevyʼaiterei pedisfruta jave pene famíliandi pe naturalésa. Peaprovechákena koʼã oportunida pemboʼe hag̃ua chupekuéra Jehová kreasión ohechaukaha umi kualida porãite haʼe orekóva (Rom. 1:20). Jahechamína mbaʼéichapa Jesús oipuru vaʼekue Jehová kreasión oporomboʼe hag̃ua. Peteĩ jey Jesús heʼi vaʼekue idisipulokuérape omaña hag̃ua umi kuérvo ha umi líriore oĩva pe kámpore (Luc. 12:​24, 27-30). Omboʼe idisipulokuérape mbaʼeichaitépa ñande Ru yvagapegua imbaʼeporã ha oporohayhu. Jehová omeʼẽrõ umi kuérvope hoʼu vaʼerã ha omonde porãrõ umi yvotýpe, koʼýte omeʼẽta hiʼupy ha ijaorã umi isiervokuéra ifiélvape. w23.03 20, 21 párr. 1-4

Jaagradese Jehovápe ikatu haguére ñañemboʼe chupe Itaʼýra rupive. Jehová ojevale Jesús rehe omeʼẽ hag̃ua ñandéve umi mbaʼe jajeruréva chupe. Jehová ohendu ha okontesta umi ñemboʼe ojejapóva chupe Jesús rérape. Jehová operdona ñande pekádo pórke Jesús omeʼẽ vaʼekue hekove sakrifísioramo (Rom. 5:1). La Biblia heʼi Jesús rehe haʼeha ñane súmo saserdóte ‘ha haʼe oguapyha yvágape Ñandejára tróno deréchape’ (Heb. 8:1). Jesús haʼe voi ñane “ajudánte pe Túa renondépe” (1 Juan 2:1). Ajépa jaagradesete Jehovápe omeʼẽ haguére ñandéve peteĩ súmo saserdóte ontendéva ñaneimperfektoha ha ‘ojerure asýva hína ñanderehehápe’ (Rom. 8:34; Heb. 4:15). Jesús sakrifísio reheʼỹ ndaikatumoʼãi ñañemboʼe Jehovápe ñañemoag̃ui hag̃ua hese. Ñande ndaikatumoʼãi núnka jaagradesepa Jehovápe pe rregálo porãite omeʼẽvare ñandéve. Haʼe omeʼẽ vaʼekue ñanderehehápe pe Itaʼýra ohayhuetéva. w22.07 23 párr. 10-12

Peteĩ persóna de konfiánsa katuete okumplíta ipromésa ha siémpre heʼíta la verda (Sal. 15:4). Upévare entéronte ikatu okonfia hese. Ñande avei jaipota ñane ermanokuéra okonfia ñanderehe. Ñande ndaikatúi jaovliga peteĩ persónape okonfia hag̃ua ñanderehe, síno ñañehaʼã vaʼerã ñagana la ikonfiánsa. Upéva ikatu ñakompara pe plátare. Heta ñambaʼapo jejopy vaʼerã ñakonsegi hag̃ua pe pláta, péro ifasileterei la japerdepa hag̃ua. Añetehápe entéro mbaʼe Jehová ojapóvape ogana la ñane konfiánsa. Haʼe “ojapóva guive ohechauka ikatuha jajerovia hese” (Sal. 33:4). Ha haʼe ohaʼarõ ñande jasegi iñehémplo (Efes. 5:1). ¡Ajépa jaagradesete Jehovápe ñanemoag̃ui haguére ipuévlore, oĩháme ermáno ha ermanakuéra ikatúva jajerovia hesekuéra! Enterovéva tekotevẽ ñagana ñane ermanokuéra konfiánsa. Upévare ñambaʼapo meme vaʼerã jasegi hag̃ua japorohayhu, ñaneumílde, ñanearandu, ñaneonrrádo ha jajejokokuaa. Káda uno jajapóramo koʼã mbaʼe, ñaipytyvõta pe kongregasiónpe oĩ hag̃ua konfiánsa. Iporãitereíta ñahaʼangáramo Jehovápe, péicha jahechaukáta ikatuha ojejerovia ñanderehe. w22.09 8 párr. 1, 2; 13 párr. 17

Oĩramo jepe heta ermáno ha ermána kongregasiónpe, sapyʼánte lomímonte ikatu ñañeñandu ñaneaño. Sapyʼánte ikatu ñañembyasy térã jalucha vaʼerã ani hag̃ua jareko umi pensamiénto negatívo, pórke ñaimoʼã ñambohovái vaʼerãha umíva ñaneaño. Péro Jehová arakaʼeve ndoipotái ñañeñandu péicha. Jahechamína mbaʼéichapa otrata vaʼekue proféta Elíaspe. Por ehémplo omokyreʼỹ vaʼekue chupe omombeʼu hag̃ua umi mbaʼe oñandúva. Jehová oporandu vaʼekue Elíaspe 2 vése: “¿Mbaʼéiko rejapo hína koʼápe?” (1 Rey. 19:​9, 13). Ha káda ves ke Elías orresponde Jehovápe, haʼe ojapysaka porã hese. Avei haʼe oasegura Elíaspe Israélpe oĩha gueteri heta oadoráva chupe (1 Rey. 19:​11, 12, 18). Oiméne Elías oñeñandu porãiterei raʼe omombeʼu rire Jehovápe mbaʼéichapa oñeñandu ha ohendu rire avei umi mbaʼe heʼíva chupe. Avei Jehová omeʼẽ Elíaspe unas kuánta asignasión iñimportantetereíva. Por ehémplo ojerure chupe onombra hag̃ua Hazaélpe rréi de Siria, Jehúpe kómo rréi de Israel ha Eliséope katu proféta (1 Rey. 19:​15, 16). Jehová omeʼẽvo Elíaspe koʼã asignasión oipytyvõ chupe oñekonsentra hag̃ua umi mbaʼe iporãvare. Avei Ñandejára omeʼẽ Elíaspe peteĩ omoirũ vaʼerã chupe, ha upéva Eliseo kuri. w22.08 8 párr. 3; 9 párr. 5

¿Ne kongregasiónpa omopuʼãmava térã orrenovámava pene Salón del Reino? Oiméramo upéicha, nemanduʼáne eho jeýramo guare pe primera rreuniónpe pe Salón pyahúpe. ¡Mbaʼeichaitépa oiméne eagradese raʼe Jehovápe! Oiméne nderesay pororopa ha revyʼaitereígui ndaikatúi ni repurahéi oñepyrũtarõ guare pe rreunión. Pe Salón oñemopuʼã vaʼekue omombaʼeguasu Jehovápe. Péro oĩ hína ótra kósa ikatúva jajapo ñamombaʼeguasuve hag̃ua Jehovápe. Upéva tuichave mbaʼe peteĩ óga ñemopuʼãgui, pórke ñamopuʼã térã ñamombarete hína umi persóna oúvape koʼã lugárpe oadora hag̃ua Jehovápe. Apóstol Pablo imanduʼa vaʼekue upévare oskrivírõ guare umi mbaʼe heʼíva pe téxto koestediagua. Apóstol Pablo omoĩ ñandéve peteĩ ehémplo iporãitereíva, pórke haʼe oikuaa vaʼekue mbaʼéichapa omombaretéta umi ermanokuérape. Haʼe oñemoĩ vaʼekue ilugarpekuéra. Ñande ikatu jasegi Pablo ehémplo ñamombarete hag̃ua ñane ermanokuérape (1 Cor. 11:1). w22.08 20 párr. 1, 2

Peteĩ kristiáno ihustoséva Ñandejára renondépe noporombotavymoʼãi ojapo jave negósio, ijexáktota entéro mbaʼépe. Peteĩ persóna ihústova ndohechaseiete oĩ jave oporotratáva inhústamente. Ha oipotágui Jehová ‘oguerohory chupe entéro mbaʼépe’, pe persóna añetehápe ihústova ohecháta mbaʼépa Jehová opensa odesidíta jave peteĩ mbaʼe. La Biblia oñeʼẽvo Jehováre heʼi hese: “Jehovágui ou pe hustísia” (Jer. 50:7). Ha Jehová haʼe rupi ñande Kreadór haʼe añoite oreko la derécho heʼi hag̃ua mbaʼépa oĩ porã ha mbaʼépa oĩ vai. Haʼe oikuaa porã hína mbaʼépa oĩ porã ha mbaʼépa oĩ vai (Prov. 14:12; Is. 55:​8, 9). Upéicharõ jepe, Ñandejára ñandeapo vaʼekue ijoguaháramo. Upévare ñande ikatu jajapo umi mbaʼe heʼíva iporãha (Gén. 1:27). Ha ñande javyʼaiterei jajapóvo upéva. Jahayhu rupi ñande Ru yvagapeguápe ñañehaʼãmbaite jasegi iñehémplo opa ikatuháicha (Efes. 5:1). w22.08 27 párr. 5, 6

Ñañekevranta térã ñañedesanima jave ikatu jahekase algúna diversión ñanepytyvõtava ñanderesarái hag̃ua ñane provlemakuéragui. Ha upéva ndaivaíri, péro ñañatende vaʼerã ani hag̃ua jajapo peteĩ mbaʼe Jehovápe ombojeguarúva (Efes. 5:​10-12, 15, 16). Pe kárta apóstol Pablo oskrivi vaʼekuépe umi kristiáno Filiposguápe omokyreʼỹ chupekuéra osegi hag̃ua ojepyʼamongeta entéro mbaʼe ‘ihústovare, ipotĩvare ha ñanemomýivare japorohayhu hag̃ua’ (Filip. 4:8). Pablo noñeʼẽiramo jepe koʼápe umi diversiónre, umi mbaʼe heʼi vaʼekue ikatu ñanepytyvõ jadesidi porã hag̃ua mbaʼéichapa jajedivertíta. Etanteamíntena ko mbaʼe: Ehechápa pe versíkulope oĩha pe palávra “mbaʼe”. Koʼág̃a emoĩmi ivése “purahéi”, “pelíkula”, “lívro” térã “videohuégo”. Upéicha rejapóramo nepytyvõta rehechakuaa hag̃ua mbaʼépa ogustáta Ñandejárape ha mbaʼépa ndogustamoʼãi chupe. Añetehápe ñande ñakumpliseterei Jehová mandamientokuéra (Sal. 119:​1-3). w22.10 9 párr. 11, 12

Umi “iñinhústova” apytépe oĩ umi omano mboyve ojapo vaʼekue umi mbaʼe ivaietereíva. Upévare haʼekuéra oikotevẽta oñemboʼe chupekuéra mbaʼéichapa oiko vaʼerã umi Jehová léi ihústova heʼiháicha. Ha ojapo hag̃ua hikuái upéva, Ñandejára Rréino ojapóta pe traváho tuichavéva ko yvy ape ári oñemboʼe hag̃ua chupekuéra. ¿Mávapa omboʼéta umi iñinhústovape? Pe aty guasu ha umi ihústova orresusitátava. Umi iñinhústova réra ojeskrivi hag̃ua pe lívro de la vídape, haʼekuéra tekotevẽta oñepyrũ oreko peteĩ amista Jehovándi ha oñemeʼẽ chupe. Jesucristo ha umi unhído oñatende porãta hína yvága guive ohecha hag̃ua umi iñinhústovapa omoĩ en práktika umi mbaʼe oñemboʼéva chupekuéra (Apoc. 20:4). Umi ndoaseptaséivape upe ajúda noñepermitimoʼãi osegi oikove orekóramo jepe 100 áño (Is. 65:20). Jehová ha Jesús ikatu ohecha mbaʼépa oreko peteĩ persóna ikorasõme. Ha avavépe nopermitimoʼãi ojapo umi mbaʼe vai oporoperhudikátava pe múndo pyahúpe (Is. 11:9; 60:18; 65:25). w22.09 17 párr. 11, 12

Ko versíkulope pe fráse “umi autorida” oñeʼẽ hína umi goviérno umánore orekóva podér ha odomináva ótrope. Kristianokuéra iñeʼẽrendu vaʼerã koʼã goviérno umánope. Koʼã governánte omoĩ pyʼaguapy, ojasegura oñekumpli hag̃ua umi léi, ha sapyʼánte odefende Jehová puévlope (Apoc. 12:16). Upévare oñemanda ñandéve japaga hag̃ua impuésto, jarrespeta ha ñamombaʼe hag̃ua chupekuéra (Rom. 13:7). Péro koʼã goviérno umáno oreko autorida Jehová opermiti rupínte chupekuéra upéva. Jesús ohechauka porã vaʼekue upéva ointerrogárõ guare chupe pe governadór rrománo Poncio Pilato. Ha Pilato heʼírõ guare haʼe orekoha autorida odesidi hag̃ua ojejukátapa Jesúspe térãpa nahániri, Jesús heʼi vaʼekue chupe: “Ndereguerekomoʼãi kuri mbaʼeveichagua autorida rejapo hag̃ua cherehe mbaʼeve, upéva nomeʼẽirire ndéve Ñandejára” (Juan 19:11). Pilátoicha avei koʼág̃arupi pe autorida orekóva enterove governánte ha polítiko umáno oreko hína límite. w22.10 13 párr. 6

Rréi David oskrivi vaʼekue peteĩ profesía ohechaukáva mbaʼéichapa la hénte oikóta ogoverna vove peteĩ rréi ikalidaitereíva (Sal. 37:​10, 11, 29). Pyʼỹinte ñande jalee jepi predikasiónpe upe profesía oĩva Salmo 37:​11-pe, ha oikoite upéva pórke Jesús voi osita vaʼekue la heʼíva upépe pe Sermón del Móntepe. Ha upéva ñanepytyvõ ñantende hag̃ua upe profesía oñekumplitaha avei amo gotyove (Mat. 5:5). Upéva oñekumplíma vaʼekue Salomón tiémpope, pórke upérõ guare la hénte ikatu vaʼekue oiko trankílo. La Biblia heʼi ‘pe yvýpe osyry hague kamby ha eirete’, upéva heʼise la hénte oiko porãiterei hague upérõ guare. Ñandejára heʼi vaʼekue umi israelítape: “Pesegíramo peiko che haʼeháicha, [ . . . ] amoĩta pyʼaguapy pene retãme ha peñenóta peke kyhyjeʼỹme” (Lev. 20:24; 26:​3, 6). Koʼã mbaʼe oñekumpli vaʼekue Salomón ogovernárõ guare (1 Crón. 22:9; 29:​26-28). Pe profesía jatopáva Salmo 37:​10, 11, ha 29-pe oñekumplíma vaʼekue yma ha oñekumpli jeýta avei amo gotyove. w22.12 10 párr. 8

Entéro kristiáno tekotevẽ jasegi umi instruksión. La Biblia omeʼẽ ñandéve ko konsého ideprovechoitereítava ñandéve: “Reho hag̃ua gerrahápe reikotevẽ peteĩ kuimbaʼe iñarandúvare ndegia hag̃ua. Oĩramo heta omeʼẽva konsého reganáta pe ñorairõ” (Prov. 24:​6, nóta). Epensamína mbaʼéichapa ko konsého ñanepytyvõ japredika ha ñaporomboʼe porãve hag̃ua. Jaiko rangue japredika ha ñaporomboʼe ñandéve ñandegustaháichante, jasegi umi instruksión oñemeʼẽva ñandéve. Umi rreunionkuérape jarresivi jepi umi gía ikatúva ñanembokatupyry, ñahendu mbaʼéichapa umi ermáno oguerekóva experiénsia ojapo umi diskúrso ha umi demostrasión. Koʼã mbaʼe ñanepytyvõta ñaporomboʼe porãve hag̃ua la Biblia. Avei Jehová organisasión omeʼẽ ñandéve umi erramiénta ñaikotevẽva. Por ehémplo, umi puvlikasión ha vidéo oipytyvõva umi héntepe ontende porã hag̃ua la Biblia omboʼéva. ¡Ajépa jaagradesete ikatu haguére jatopa umi konsého ideprovechoitereíva la Bíbliape! Jajedesidíkena jaikotaha pe arandu oúva Jehovágui heʼiháicha (Prov. 3:​13-17). w22.10 23 párr. 18, 19

Ñande jaʼu jave peteĩ tembiʼu ha upéi oguapy la ñane rembiʼu, upéi la ñande rete imbareteve. Ha jastudia jave Ñandejára Ñeʼẽ ha ñapensa hese, ñande jerovia imbareteve avei. Jehová oipota ñantende porã Iñeʼẽ. Upéva jajapo hína ñañemboʼévo, jaleévo ha jajepyʼamongetávo. Primero ñañemboʼe vaʼerã japrepara hag̃ua ñane korasõ, og̃uahẽ hag̃ua ñane korasõme umi mbaʼe haʼe opensáva. Upéi jalee peteĩ rreláto oĩva la Bíbliape, ha ñañemotiémpo jajepyʼamongeta ha ñapensa hag̃ua umi mbaʼe jalee vaʼekuére. ¿Mbaʼépa oikóta jajapóramo upéicha? Amáske jajepyʼamongeta, Ñandejára Ñeʼẽ og̃uahẽvéta ñane korasõme ha ñande jerovia imbaretevéta. ¿Mbaʼérepa iñimportantete jalee la Biblia ha jajepyʼamongeta hese? Jajapóramo upéicha ñanemombaretéta japredika hag̃ua umi notísia porã koʼág̃a, ha jaikuaauka hag̃ua pe mensáhe ipohyietéva ikatúva otoka ñandéve koʼẽrõite ñamog̃uahẽ umi héntepe. Avei jajepyʼamongetáramo umi kualida porãite Jehová orekóvare, ñane amista hendive imbaretevéta ha ñañemoag̃uivéta hese. w22.11 6, 7 párr. 16, 17

Jesús ohechauka umi isegidorkuéra ha avei entéro umi ótro hénte ohechakuaataha mávapa umi kristiáno tee oĩ rupi pe mborayhu ijapytepekuéra. Ha entéronte ohechakuaa pe mborayhu oĩva Ñandejára puévlope, péro añetehápe umi testígo de Jehová ndahaʼéi perfékto (1 Juan 1:8). Upévare amáske jaikuaa porãve umi oĩvape kongregasiónpe, ikatu hína heta vése jahecha avei umi defékto oguerekóva (Rom. 3:23). Ñambyasýramo jepe oĩ heta ohejáva umi ótro fálla omoñepysanga chupekuéra ha upévare ou ndoservivéi Jehovápe. ¿Mbaʼéichapa Jesús ohechauka vaʼekue ohayhuha ijapostolkuérape? ¿Mbaʼéichapa ikatu jasegi Jesús ehémplo koʼág̃arupi? Iporãitereíta entéro Testígo vautisádo jajepyʼamongetáramo avei koʼã porandúre. Upéva ñanepytyvõta jahechaukave hag̃ua upe mborayhu, espesiálmente oĩ jave ojavýva (Efes. 5:2). w23.03 26, 27 párr. 2-4

Amáske hiʼag̃ui pe fin, ikatu jaʼe pe kongregasiónpe oĩtaha heta situasión ijetuʼutahápe ñandéve jasegi hag̃ua ñandefiél Jehovápe. Upévare tekotevẽtamante ñandepositívo ha ñañehaʼã jahecha pe situasión Jehová ohechaháicha. Por ehémplo, ñañandúramo peteĩ ermáno ñandetrata vai hague, ani japyta ñandepyʼaro. Oĩramo peteĩ ñandekorrehíva, ñatĩramo jepe ñañehaʼã jasegi upe konsého ha ñakambia tekotevẽhápe. Ha oĩramo peteĩ kámbio Jehová organisasiónpe ñandeafektáva ñandéve, lomímontekena ñañehaʼã jaasepta upéva ha ñaneñeʼẽrendu Jehovápe. Esegíkena ndefiél Jehovápe ha iñorganisasiónpe, ijetuʼúramo jepe sapyʼánte la situasión. Upearã, esegi eime trankílo ha eñehaʼã ehecha pe situasión Jehová ohechaháicha. Tuichaiterei avei nepytyvõta restudiáramo umi Jehová siervokuéra yma guare ehémplo, pórke haʼekuéra sapyʼánte ohasa vaʼekue umi mbaʼe ñande jahasáva koʼág̃arupi. Ejerurekuaa avei ajúda Jehovápe ha ani eñemomombyry ermanokuéragui. Rejapóramo koʼã mbaʼe, tahaʼe haʼéva la Satanás ojapóva nemomombyry hag̃ua Jehovágui, haʼe núnka nokonsegimoʼãi upéva, ha nde esegíta ndefiél Jehovápe ha iñorganisasiónpe (Sant. 4:7). w22.11 24, 25 párr. 14-16

Ansianokuéra, peipytyvõkena umi ermánope oikuaa hag̃ua mbaʼépa ojapo vaʼerã hikuái oikóramo peteĩ desástre, ha oikuaa hag̃ua mbaʼéichapa oñekomunikáta penendive upéicha jave. Péro, ¿mbaʼépa ikatu káda uno jajapo? Oikóramo peteĩ sarambi ag̃ui pe jaikohágui ikatu ñaporandu umi ansiánope mbaʼéichapa ñaipytyvõkuaa. Por ehémplo, ikatu jaipuruka ñande róga opyta hag̃ua upépe umi ermáno. Térã ikatu avei ñaipytyvõ jarreparti hag̃ua umi provísta térã merkadería oñemeʼẽva chupekuéra g̃uarã. Péro ñande jaikóramo mombyry pe lugár oiko haguégui pe sarambi ikatúnte avei ñaipytyvõ. Por ehémplo ikatu ñañemboʼe umi ermanokuéra ohasa asývare hína, térã ñameʼẽ ñane kontrivusión pe óvra mundiálpe g̃uarã (2 Cor. 1:​8-11; 8:​2-5). Ha ikatúramo reho pe lugár oiko haguépe pe sarambi, eporandukuaa umi ansianokuérape mbaʼépepa ikatu reipytyvõ. Ha neinvitáramo hikuái, ikatu hína reñeentrena ndedeprovechove hag̃ua pe lugár oñekotevẽhápe. w22.12 24 párr. 8; 25 párr. 11, 12

Apóstol Pablo heʼi vaʼekue pe jaleéva pe téxto koestediaguápe umi ermáno ha ermána Corintoguápe. Algúno umíva apytépe desastrete vaʼekue, por ehémplo oĩ vaʼekue hekovaíva, ikaʼúva ha haʼéva omosexuál (1 Cor. 6:​9-11). ¿Ndépa ere haʼekuéra ojevautisa rire ndorekovéima hague núnka mas ni peteĩ deséo vai? Oime vaʼerã ndahaʼéi raʼe upéicha. Haʼekuéra haʼéramo jepe unhído iñimperféktoiti kuri, ha oime vaʼerã de ves en kuándo oreko vaʼekue avei hikuái umi pensamiénto naiporãiva. Jajepyʼamongetávo upévare tuichaiterei ñanemokyreʼỹ. ¿Mbaʼérepa? Pórke ñanepytyvõ ñantende hag̃ua oĩha heta ermáno ha ermána ipuʼakámava la mísma devilida ñande jarekóvare. Upéicha rupi la Biblia heʼi ñandéve ikatuha ‘jajerovia mbarete, jaikuaágui enterove ñane ermáno oĩva ko múndope oaguantaha avei koʼãichagua jehasa asy’ (1 Ped. 5:9). w23.01 12 párr. 15

Jesús ojerure Itúape oñangareko hag̃ua idisipulokuérare (Juan 17:11). ¿Mbaʼérepa upéva ñanepytyvõ ñandepyʼaguasu hag̃ua? Pórke Jehová ipoderosove entéro ñane enemigokuéragui (1 Juan 4:4). Jehová ohechapaite la oikóva. Aníkena jaduda, jajeroviáramo Jehováre ñandepyʼaguasúta ha nañandejokomoʼãi umi mbaʼe ñanemongyhyjéva. ¿Retĩpa sapyʼánte emombeʼu hag̃ua nde haʼeha testígo de Jehová? ¿Neʼĩrapa rejevautisa térã oiko ndehegui puvlikadór no vautisádo? ¿Embotapykuépa upe desisión rekyhyjégui? Aníkena nemongyhyje la ojeʼétava nderehe, ani repermiti upéva ndejoko ejapo hag̃ua la iporãva. Ejerure jey jey Jehovápe tanepytyvõ ha tanembopyʼaguasu ejapo hag̃ua ivolunta. Ehechávo mbaʼéichapa Jehová orresponde ne ñemboʼe, nembaretevéta ha ndepyʼaguasuvéta (Is. 41:​10, 13). w23.01 29 párr. 12; 30 párr. 14

Jesús oporandu vaʼekue: “¿Peẽ piko ndapeleéi?” ohechauka hag̃ua umi fariséope ijaktitu vai hague hikuái oleévo Ñandejára Ñeʼẽ (Mat. 12:​1-7). Upérõ umi fariséo heʼi vaʼekue Jesús disipulokuéra nokumplíri hague pe léi del sábado. Okontesta hag̃ua chupekuéra Jesús oipuru mokõi ehémplo oĩva Ñandejára Ñeʼẽme, ha osita peteĩ versíkulo Oséasgui ohechauka hag̃ua umi fariséo nontendéi hague maʼerãpa oñemoĩ vaʼekue pe léi del sábado ha umi fariséo ndoiporiahuverekoiha hapichápe. ¿Mbaʼérepa umi fariséo oleéramo jepe ndogiái chupekuéra Ñandejára Ñeʼẽ? Pórke haʼekuéra ijorgullóso ha olee vaʼekue oheka hag̃ua fállante hapichakuérare. Péicha ijaktitu vai rupi hikuái ndaikatúi ontende la oleéva (Mat. 23:23; Juan 5:​39, 40). Avei Mateo 19:​4-6-pe Jesús oporandu vaʼekue umi fariséope: “¿Ndapeleéiva piko?”. Haʼekuéra oleéramo jepe pe rreláto oñeʼẽva pe kreasiónre, ndoaseptái hikuái mbaʼéichapa Ñandejára ohecha pe matrimónio. Ñande tekotevẽ ñandeaktitu porã jalee jave la Biblia. Ndajajoguaséi umi fariséope, ñaneumílde vaʼerã ha ñaime vaʼerã dispuésto ñaaprende hag̃ua. w23.02 12 párr. 12, 13

Pe léi Jehová omeʼẽva umi israelítape oĩ vaʼekue umi mbaʼe haʼekuéra ojapo vaʼerã oevita hag̃ua umi aksidénte ivaíva hógape térã itravahohápe (Éx. 21:​28, 29; Deut. 22:8). Avei oĩramo ojukáva hapichápe ojukaseʼỹetére, upéva lomímonte ivai. Upéicha rupi, upe ojapo vaʼekue ndahaʼéi la ojeheja reínteva chupe (Deut. 19:​4, 5). Pe léi heʼi vaʼekue avei ojekastiga vaʼerãha oĩramo aksidentálmente olastimáva peteĩ mitãme oĩvape isy retepýpe onase mboyve (Éx. 21:​22, 23). Péicha jahecha porã Jehová oipotaha jajapo opa ikatúva ani hag̃ua ñañaksidenta. Jahechaukáta avei ñamombaʼetereiha ñande rekove ñañatendévo ani hag̃ua oiko aksidénte ñande rógape térã ñande travahohápe. Tekotevẽta jave ñamombo peteĩ mbaʼe haimbéva, peteĩ prodúkto kímiko, venéno o pohã, jajapose upéva ani hag̃uáicha operhudika ótrope. Avei jajasegura ani hag̃ua umi mitã otopa umíva. Ñande avei tekotevẽ ñañatende jajatapy jave, ñambopupu jave y térã jaipuru jave umi erramiénta eléktrika. Avei ñande nañamanehái ñande veíkulo jaʼúramo peteĩ pohã ikatúva ñandeafekta, jaʼu jave vevída, térã ñanderopehýi jave, avei nañamañái ñane teléfonore ñamaneha jave. w23.02 21, 22 párr. 7-9

Jehová ipasiénsia, ivuéno, ontende umi mbaʼe ohasáva iñalumnokuéra ha ohecha iporãvante hesekuéra (Sal.130:3). Jehová núnka nohaʼarõi ñandehegui jajapo umi mbaʼe ndaikatumoʼãiva jajapo. Haʼe omeʼẽ ñandéve peteĩ rregálo iporãitereíva haʼéva ñane apytuʼũ (Sal. 139:14). Ñande Apohare oipota jasegi ñaaprende pára siémpre ha jadisfruta jajapóvo upéva. Upéicharõ jajapo porãitereíta ‘ñañehaʼãmbaitéramo jaheka meme’ umi añetegua oĩva Ñandejára Ñeʼẽme (1 Ped. 2:2). ¿Mbaʼépa ikatu nepytyvõ? Upearã emoĩkuaa umi méta ikatúva rehupyty. Avei iporãta rejapóramo peteĩ prográma ha reanota mbaʼe órapa releéta ha restudiáta la Biblia, ha upéi eñehaʼãmbaite ekumpli upéva (Jos. 1:8). Katuete Jehová ajúda rupive ikatúta redisfruta restudiávo, ha amás día reaprendevéta chugui. Ñande ndahaʼéi jastudiáva jaikuaánte hag̃ua heta mbaʼe, síno jahayhuve hag̃ua Jehovápe ha jajeroviave hese (1 Cor. 8:​1-3). Amedída ke reaprendeve Jehovágui, esegíkena ejerure avei chupe omombarete hag̃ua nde jerovia, ha haʼe katuete okontestáta ne orasión (Luc. 17:5). w23.03 10 párr. 11, 13

¿Jesús piko heʼi raʼe idisipulokuérape ohaʼarõnte hag̃ua hikuái ojapoʼỹre mbaʼeve koʼã ára pahápe? Nahániri, Jesús omanda vaʼekue chupekuéra opredika hag̃ua “Jerusalénpe, oparupiete Judéape, Samáriape ha umi lugár mombyryvehápe jepe ko yvy ape ári” (Hech. 1:​6-8). Ko tembiapo Jesús oheja vaʼekue isegidorkuérape tuichaiterei, péro ojapóramo hikuái opa ikatúva okumpli hag̃ua, oipuru porãta itiémpo. Ñande tekotevẽ ñañatende mbaʼéichapa jaipuru ñane tiémpo. Heʼiháicha Eclesiastés 9:​11-pe, entéronte ‘ikatu jahasa peteĩ tiémpo ijetuʼúvare’. Upévare en kualkiér moménto okambiaite la ñane situasión, ha ikatu voi ñamano. Pe mbaʼe iporãvéva ikatúva jajapo jaipuru porã hag̃ua ñane tiémpo haʼe hína jajapo Jehová rembipota ha ñañemoag̃uive hese (Juan 14:21). Upearã ikatu jasegi pe konsého omeʼẽva la Biblia 1 Corintios 15:​58-pe: “Siémpre penerembiapo heta vaʼerã ñande Ruvicha servísiope”. Péicha oúramo pe fin térã ñamanóramo upe mboyve, nañambyasymoʼãi mbaʼéichapa jaipuru kuri ñane tiémpo Jehová servísiope (Mat. 24:13; Rom. 14:8). w23.02 18 párr. 12-14