Diciembre

¿Oĩpa raʼe añete preparádo pe ofisiál etíope ojevautisa hag̃ua? Jahechamína. Pe ofisiál etíope oho vaʼekue “Jerusalénpe oadora hag̃ua Ñandejárape” (Hech. 8:27). Amalisia haʼe oike vaʼekue umi judío rrelihiónpe, ha upépe haʼe katuete oaprendéne raʼe Jehovágui umi Escrituras Hebreas rupive, péro haʼe oaprendeseve. Felipe otopárõ guare pe ofisiál rehe, haʼe olee hína kuri proféta Isaías oskrivi vaʼekue (Hech. 8:28). Haʼe osegise vaʼekue oaprende. Upéicha rupi oviaha Etiopía guive Jerusalén peve oadora hag̃ua Jehovápe pe témplope. Pe ofisiál etíope oaprende vaʼekue Felípegui heta enseñánsa iñimportantetereíva, umíva apytépe mávapa pe Mesías (Hech. 8:​34, 35). Ohayhueterei rupi Jehovápe ha Jesúspe haʼe ojedesidi okambia ha ojevautisa oiko hag̃ua chugui Jesús segidór. Felipe ohecha vaʼekue ko kuimbaʼére oĩmaha preparádo ojevautisa hag̃ua, upémarõ ovautisa chupe. w23.03 8, 9 párr. 3-6

Jehová ningo ni mbaʼevéicharõ nañandeguerohorymoʼãi ñande jaikóramo ñandejapu (Prov. 6:​16, 17). Koʼág̃arupi la héntepe g̃uarã normál la ombotavy hapichápe, péro ñande ñapensase Jehová opensaháicha (Sal. 15:​1, 2). Ñande ningo ndahaʼéi nañandejapúinteva ñande rapichápe, ndovaléi avei jaʼe algúna kósa ontendekátava chupe peteĩ mbaʼe ndasiértoiva. Ndovaléi avei jaiko ñamombeʼu umi chísme (Prov. 25:23; 2 Tes. 3:11). Oimérõ ñande ñañemongeta hína peteĩ persónandi, péro upéi oñepyrũ oñeʼẽ vai ñandéve ótrore, ¿mbaʼépa jajapo vaʼerã? Ñañehaʼã vaʼerã ñakambia pe téma de konversasión, ha ñañepyrũ ñañeʼẽ álgo iporãvare. Ko múndope amás día la hénte desastreve la oñeʼẽ lája, péro ñande jaipota Jehová oguerohory umi mbaʼe jaʼéva. Haʼe ningo katuete ñanevendesíta ñande ñañehaʼãramo ñañatende umi mbaʼe jaʼévare, tahaʼe predikasiónpe, rreunionhápe, ha avei ñañemongeta jave ñande rapichakuérandi. Ág̃a Jehová ohundi vove ko múndo aña, ifasilvétama ñandéve jaipuru porã hag̃ua ko rregálo porãite Jehová omeʼẽ vaʼekue ñandéve (Jud. 15). w22.04 9 párr. 18-20

Ñapensa jave mbaʼeichaitépa Jehová ha Jesús ñanderayhu, ñande avei jahayhueterei chupekuéra (1 Juan 4:10). Ha koʼýte jahayhuvéntema chupekuéra ñantendévo Jesús omano hague káda únore. Apóstol Pablo oagradeseterei vaʼekue ko rregálo, upévare oñeʼẽvo Jesús rehe oskrivi vaʼekue umi Galaciaguápe: “Haʼe ningo cherayhu ha omeʼẽ kuri hekove cherehehápe” (Gál. 2:20). Jesús sakrifísio rupive Jehová ndelehi nde haʼe hag̃ua iñamígo (Juan 6:44). Epensamíntena, Jehová ningo ohecha álgo iporãitereíva nderehe ha opaga pe présio ijyvatevéva oreko hag̃ua ne amista. ¿Akáso piko upéva nanemomýiri rehayhuve hag̃ua Jehová ha Jesúspe? Iporãiterei ningo káda uno ñañeporandu: “¿Mbaʼépa aime dispuésto ajapo ahayhúgui chupekuéra?”. Ñande ningo jahayhu Ñandejárape ha Crístope, ha upéva ñanemomýi avei jahayhu hag̃ua ñande rapichakuérape (2 Cor. 5:​14, 15; 6:​1, 2). w23.01 28 párr. 6, 7

La Biblia iñimportanteterei ikatu hag̃uáicha jaadora Jehovápe “peteĩ ñeʼẽme”. Ha heta mbaʼe oĩva la Bíbliape ningo ikatu ñantende ñaneumílderamo añoite (Luc. 10:21). Persóna oparupigua ningo olee la Biblia. Péro umi iñumíldeva añoite ontende ha ojapo la heʼíva pype (2 Cor. 3:​15, 16). Jehová ohechauka iñaranduha oipurúvo la Biblia ñanepytyvõ hag̃ua. Jahecháma haguéicha haʼe oipuru la Biblia omboʼe hag̃ua hetaiterei héntepe. Péro avei haʼe oipuru pe oĩva pype ñanepytyvõ ha ñanekonsola hag̃ua káda únope. Jaleévo Ñandejára Ñeʼẽ jahechakuaa mbaʼeichaitépa haʼe ojepyʼapy káda únore (Is. 30:21). Mboy vésemapa oime, jaheka algún konsého la Bíbliape ha jatopa peteĩ téxto ñandéve g̃uarãitéva voi. La Biblia ojeskrivíramo jepe hetaiterei héntepe g̃uarã, ¿mbaʼéichapa ikatu oĩ pype pe kavalete ñaikotevẽva? Upéva oiko pórke pe iñaranduvéva ko univérsope la oskrivika vaʼekue la Biblia (2 Tim. 3:​16, 17). w23.02 4, 5 párr. 8-10

Ñande ningo jahayhueterei Jehovápe, ha upévare jajapose la ikatumíva jaservi porã hag̃ua chupe. Péro jajapo hag̃ua upéva ñamoĩmante vaʼerã umi méta iservísiope, por ehémplo jareko hag̃ua hetave kualida iporãva, jajapokuaa hag̃ua peteĩ mbaʼe ipyahúva, ha jahecha hag̃ua mbaʼe mbaʼépa jajapokuaa ñaipytyvõ porãve hag̃ua ñane ermanokuérape. ¿Mbaʼérepa ñañehaʼãmbaite vaʼerã ñamoĩ umi méta ha japrogresa Jehová servísiope? Primeroite voi pórke jahayhueterei Jehovápe, ha jaipota haʼe ovyʼa ñandereheve. Ha Jehová ovyʼaiterei jaipuru jave umi mbaʼe jajapokuaáva ha umi avilida jarekóva iservísiope. Avei ñañehaʼãse japrogresa ñaipytyvõ porãve hag̃ua ñane ermanokuérape (1 Tes. 4:​9, 10). Jaservíramo jepe Jehovápe heta tiémpore, lomímonte ñañehaʼã vaʼerã ñamehora ha japrogresa. w22.04 22 párr. 1, 2

Koʼẽrõitéma umi goviérno ohundíta umi rrelihión japúpe haʼéva hína Babilonia Guasu. Ha oiko vove upéva oñepyrũta pe jehasa asy guasu. ¿Serápa upe tiémpope oĩta hetaiterei hénte oñemoag̃uíva Jehováre ha oserviséva chupe? Nahániri. Apocalipsis kapítulo 6-pe heʼi voi umi ndoservíriva Jehovápe ojeruretaha oprotehe hag̃ua chupekuéra umi goviérno ha pe sistéma komersiál oĩva ko múndope. Ha la Bíbliape oñekompara voi koʼã mbaʼe umi montáñare. Koʼã hénte en rrealida ndoapojamoʼãi Jehová goviérno, ha upéicha rupi haʼe heʼíta hesekuéra haʼeha ikontrário (Luc. 11:23; Apoc. 6:​15-17). La hénte ningo opárupi ojedesesperapáta pe jehasa asy guasu aja. Péro Jehová puévlo katu tuicha idiferénteta, pórke upe tiémpope ndaiporimoʼãi ótro grúpo ko yvy ape ári oservíva Jehovápe ha ndoapojáiva pe ‘animál salváhepe’ (Apoc. 13:​14-17). w22.05 16, 17 párr. 8, 9

Jesús disipulokuéra ndahaʼéi umi “notísia porã” añónte la opredikáva (Mat. 24:14). Pórke Apocalipsis 8 al 10 omombeʼu umi ánhel orekoha avei peteĩ mensáhe heʼíva oñehunditaha umi hénte aña. Ha Jesús disipulokuéra oapoja chupekuéra omombeʼu hag̃ua avei ko mensáhe. Upéicha rupi umi testígo de Jehová hetaiterei áñorema opredika oikóvo peteĩ mensáhe oñekomparáva ‘amandáu ha tatáre’, ha heʼíva mbaʼéichapa oñehundíta Satanás múndo aña (Apoc. 8:​7, 13). Upévare umi hénte oikuaámante vaʼerã ko mensáhe ikatu hag̃uáicha okambia ha oheja umi mbaʼe vai ojapóva ojesalva hag̃ua ág̃a ou vove Jehová ára guasu (Sof. 2:​2, 3). Péro heta hénte ningo nohenduséi ko mensáhe ha upévare tekotevẽmante ñandepyʼaguasu jasegi hag̃ua ñamombeʼu chupekuéra upéva. Péro jareko vaʼerã enkuénta pe jehasa asy guasu aja, ipohyive jeytaha pe mensáhe jagueraháva umi héntepe (Apoc. 16:21). w22.05 7 párr. 18, 19

Umi matrimónio oguerekótava família, oiméne heta vésema ohendu hikuái umi konsého heʼíva mbaʼéichapa oñemongakuaa vaʼerã umi mitãnguéra. Péro koʼág̃a og̃uahẽve avei chupekuéra oguerekómagui hikuái peteĩ mitã omongakuaa vaʼerã. ¡Péva ningo rreálmente haʼe peteĩ rresponsavilida tuicháva! Añetehápe ñande voi jahasárõ peteĩ situasiónre ñantende porãve jepi umi konsého oĩva la Bíbliape oñeʼẽva upe témare. Upévare voi entéro oservíva Jehovápe olee meme la Biblia, ha ojeʼe haguéicha umi rréi de Israélpe, ojepyʼamongeta vaʼerã hese oikove aja entéro (Deut. 17:19). Tuakuéra, peẽ ningo peguereko peteĩ priviléhio ndaijojaháiva: Pemboʼe pene famíliape Jehovágui. Péro ndahaʼéi upéva añónte pejaposéva, síno avei peipytyvõse pene famíliape ohayhu hag̃ua Jehovápe. w22.05 26 párr. 2, 3

Ndahaʼéi ñambyasýnteva umi mbaʼe vai jajapo vaʼekue, síno ñakambiaite vaʼerã. Peteĩ mbaʼe Jehová ogueraháva avei enkuénta oporoperdonáta jave haʼe upe persónapa okambia. Upéva heʼise ojevyha hape vaígui térã ohejaiteha umi mbaʼe vai ojapo vaʼekue ha oiko jey Jehová oipotaháicha (Is. 55:7). Upe persóna okambiaite vaʼerã la opensa lája ha oheja vaʼerã ogia chupe umi mbaʼe Jehová heʼíva (Rom. 12:2; Efes. 4:23). Avei ohejaite vaʼerã umi mbaʼe vai opensa ha ojapo vaʼekue (Col. 3:​7-9). Añetehápe ñande jajerovia rupi Jesús sakrifísiore, Jehová ñaneperdonáta ohecháramo ñañehaʼãmbaiteha ñakambia hag̃ua (1 Juan 1:7). w22.06 6 párr. 16, 17

Adán ha Eva opuʼã ypy guive Jehováre, la hénte ojapo ivaíva ojuehe (Ecl. 8:9). Por ehémplo la hénte oipuru ijautorida otrata vai hag̃ua ótrope, umi kriminál katu ojapo umi mbaʼe ivaietereíva, oĩ umi iñañágui omaltrata ha oamenasáva hapichápe eskuéla térã koléhiope, ha oĩ umi omaltrata vaietereíva hogayguápe voi. Upévare ndajahecharamói mbaʼérepa la hénte okyhyjepa ojuehegui. ¿Mbaʼéichapa Satanás oñehaʼã oipuru upéva ñane kóntrape? Satanás oñehaʼãmbaite ñanemongyhyje ñande rapichágui anivéma hag̃ua japredika térã anive hag̃ua jajapo umi ótra kósa Jehová heʼíva ñandéve jajapo hag̃ua. Oĩgui Satanás poguýpe, oĩ umi goviérno oproivíva ñane predikasión ha ñandepersegíva (Luc. 21:12). Satanás múndope oĩ heta umi omosarambíva umi informasión fálsa ha ivaíva testígo de Jehová kóntrape. Ha umi ogueroviáva koʼã mbaʼe oñembohory ñanderehe térã ikatu voi ñanemaltrata (Mat. 10:36). ¿Ñandévepa ñanesorprende Satanás oipuru haguére koʼã mbaʼe ñane kóntrape? Nahániri. Haʼe ningo ojapóma vaʼekue voi upéva yma síglo primérope (Hech. 5:​27, 28, 40). w22.06 16 párr. 10, 11

¿Máva mávapa hína umi ‘heta hénte’ oñepytyvõtava ojapo hag̃ua iporãva? Umíva hína umi orresusitátava, umi ohasáva pe jehasa asy guasu ha umi mitã onaséva pe múndo pyahúpe. Opa rire umi 1.000 áño, enterove oikóva ko yvy ape ári haʼétama perfékto. Ñanemanduʼa vaʼerã peteĩ persóna iperfékto haguérente ndeʼiseiha orekótamava pe vída etérna. Ñapensamíntena Adán ha Évare. Haʼekuéra ningo perfékto vaʼekue, péro ohechauka vaʼerã kuri iñeʼẽrenduha Jehovápe oñemeʼẽ hag̃ua chupekuéra pe vída etérna. Ha ñambyasýramo jepe, haʼekuéra naiñeʼẽrendúi kuri Jehovápe (Rom. 5:12). Ohasa rire umi 1.000 áño enterovéva haʼétama perfékto. ¿Enterovépa koʼã persóna perféktomava oapojáta Jehová goviérno, térãpa oĩta avei umi ojoguáva Adán ha Évape, naiñeʼẽrendúi vaʼekue Jehovápe iperféktoramo jepe? Ko pregúnta tekotevẽta oñekontesta. w22.09 22, 23 párr. 12-14

Rehechávo umi mbaʼe oikóva koʼág̃arupi, ¿ijetuʼúpa ndéve reguerovia hag̃ua oñemehorataha la situasión? Umi família ndojoayhuvéi, heta hénte iviolénto, opensa ijehénte ha iñaña. Ha heta persónape ijetuʼu okonfia hag̃ua umi orekóvare autorida. Péro entéro koʼã mbaʼe ikatu omeʼẽ ñandéve peteĩ esperánsa. ¿Mbaʼérepa jaʼe upéva? Pórke oiko lája koʼág̃a umi hénte okumpli hína peteĩ profesía bíblica oñeʼẽva ‘umi ára paháre’ (2 Tim. 3:​1-5). Ndaipóri ningo ikatúva onega oñekumpli porãitereiha entéro koʼã profesía jatopáva la Bíbliape, ha upéva ohechauka porãiterei ñandéve Jesús oñepyrũmaha ogoverna Ñandejára Rréinope. Péro kóva haʼe peteĩvante umi profesía oñeʼẽva pe Rréinore. Koʼã profesía opyta porã oñondive umi piésa de rrompekavésaicha. Upéva ñanepytyvõta jaikuaa hag̃ua mbaʼe pártepepa ñaime koʼã ára pahápe ha mbaʼe profesíapa ofalta gueteri oñekumpli. w22.07 2 párr. 1, 2

Pe pandémia de COVID-19 aja jarresivi kuri heta instruksión hesakã porãitereíva ohechaukáva mbaʼéichapa jajapo vaʼerã umi rreunión ha predikasión. Sapyʼaitérõ g̃uarã ñañepyrũma kuri jajapo umi rreunión ha asambléa videokonferénsia rupive. Avei ñañepyrũ japredika prinsipálmente kárta ha teléfono rupive. Ha Jehová ovendesi umi esfuérso jajapóva. Heta sukursál omombeʼu pe pandémia aja oĩ hague hetave puvlikadór. Añetehápe heta ermáno ha ermána oreko umi experiénsia iporãitereíva upe tiémpope. Ikatu oĩ algúno opensáva Jehová organisasión ojopyetereimaha omeʼẽvo ñandéve heta instruksión pe pandémia aja. Péro heta vése jahechakuaa ojejaserta hague oñemeʼẽvo umi instruksión jarresivi vaʼekue. Jajepyʼamongetáramo mbaʼeichaitépa Jesús ogia ipuévlope mborayhúpe, ha ndajaikuaáiramo jepe mbaʼépa oikóta amo gotyove, ñande ikatu ñaime segúro Jehová ha Itaʼýra oĩtaha ñanendive (Heb. 13:​5, 6). w22.07 13 párr. 15, 16

Ñamombaʼeguasu vaʼerã Jehovápe ñañemboʼe jave ha avei jaagradese vaʼerã chupe umi mbaʼe porãite omeʼẽvare ñandéve. Upéicha rupi ñande ikatu jaagradese chupe umi yvoty iporã porãitévare, umi diferénte kláse tembiʼu hetereívare ha umi ñane amígo jahayhuetévare. Koʼã mbaʼe ha hetave mbaʼe voi omeʼẽ ñandéve ñande Ru ñanderayhuetéva oipota rupi javyʼa (Sal. 104:​12-15, 24). Ha la iñimportantevéva, ñande jaagradese Jehovápe entéro umi instruksión omeʼẽvare ñandéve ikatu hag̃uáicha jasegi ñandejerovia mbarete, ha omeʼẽ haguére ñandéve esperánsa amo gotyove g̃uarã. Ikatu ningo ifásil ñanderesarái jaagradese hag̃ua Jehovápe entéro mbaʼe ojapóvare ñanderehehápe. ¿Mbaʼépa ñanemomanduʼáta jaagradese hag̃ua chupe? Ikatu ningo ñaanota umi mbaʼe jajerure vaʼekue Jehovápe ñane ñemboʼépe, ha upéi ñamaña jey hese jahecha hag̃ua mbaʼéichapa haʼe okontesta ñandéve umíva. Upéi ñañemboʼekuaa jaagradese hag̃ua chupe ñanepytyvõ haguére (Col. 3:15). w22.07 22 párr. 8, 9

Ñande jaikuaa porã ndahaʼeiha jastudiánte vaʼerã la Biblia heʼíva. Ikatu hag̃uáicha ñanevenefisia, jaiko vaʼerã la Biblia heʼiháicha. Upéva heʼise ñamoĩha en práktika umi mbaʼe ñaaprendéva. Upéicharõ añoite pe añetegua ikatu ñanembovyʼa (Sant. 1:25). ¿Mbaʼéichapa ñande ikatu jajasegura jaikoha la Biblia heʼiháicha? Peteĩ ermáno heʼi ikatuha jajepyʼamongeta ñandejehe jahecha hag̃ua ñamoĩpa hína en práktika umi mbaʼe ñaaprendéva ha moõpa tekotevẽ ñamehorave. Apóstol Pablo heʼi vaʼekue: “Oiméramo jahupytýma hína heta mbaʼe, jasegíkena jaiko upéicha ha jaha meme tenonde gotyo” (Filip. 3:16). Epensamíntena umi venefísio jahupytýmavare ‘jasegi rupi jaiko pe añetegua rapére’. Ndahaʼéi sólamente omehoráva ñande rekove, síno ñambovyʼa avei Jehovápe ha ñane ermanokuérape (Prov. 27:11; 3 Juan 4). Añetehápe koʼã mbaʼe ñanepytyvõ javalora ha jaiko hag̃ua pe añetegua heʼiháicha. w22.08 18, 19 párr. 16-18

¿Mbaʼéichapa ansianokuéra ikatu ohechauka ohayhuha Jehovápe ha Jesúspe? Oñangarekóvo mborayhúpe Jesús ovechakuérare (1 Ped. 5:​1, 2). Jesús ohechauka porãiterei vaʼekue apóstol Pédrope iñimportanteha upéva. Ñanemanduʼa Pedro onega hague Jesúspe 3 vése, upévare haʼe ohechaukasetereíne raʼe ohayhuha Jesúspe. Orresusita rire, Jesús oporandu Pédrope: “Simón, Juan raʼy, ¿cherayhu piko?”. Katuete Pedro ojapose kuri oimeraẽ mbaʼe ohechauka hag̃ua ohayhuha chupe. Upémarõ Jesús orresponde Pédrope: “Eñangareko che ovecha mimíre peteĩ pastór ojapoháicha” (Juan 21:​15-17). Upe guive Pedro oñangareko porãiterei Jesús ovechakuérare ha péicha ohechauka ohayhuha chupe. Ansianokuéra ohechauka vaʼerã iñimportanteha chupekuéra g̃uarã la Jesús heʼi vaʼekue Pédrope. ¿Mbaʼéichapa ikatu ojapo upéva? Umi ansiáno ohechauka ohayhuha Jehovápe ha Jesúspe omboyke memévo tiémpo omokyreʼỹ hag̃ua ermanokuérape ha oipytyvõ hag̃ua chupekuéra hetave hendáicha. Avei oñehaʼãmbaitévo oipytyvõ umi inaktívope oñemoag̃ui jey hag̃ua Jehováre (Ezeq. 34:​11, 12). w23.01 29 párr. 10, 11

Oĩ algúno opensáva ndaiporiha avave ikatu vaʼerã ontende mbaʼéichapa haʼe oñeñandu ni pe lúcha haʼe oguerekóva. Péro upe idéa peteĩ trámpa. ¡Aníkena jahejáti upéva ñanembotavy! Pórke ikatu hína jaju ñapensa nañanepohãveimaha, ha núnka ndaikatumoʼãiha ñamboykete upe pensamiénto vai. Péro la Biblia heʼi porã ñandéve: “Pehasa jave peteĩ mbaʼe ijetuʼúva, penepytyvõta pesẽ hag̃ua upe situasióngui ha peaguanta hag̃ua”. Upéva ñanepytyvõ ñantende hag̃ua imbaretetereíramo jepe umi pensamiénto vai, lomímonte ikatuha ñandepuʼaka hese, ha Jehová ñanepytyvõta upearã. A lo mehór ndaikatumoʼãi jaipeʼaite umíva ñane akãgui, péro haʼe ñanepytyvõgui ndajajapomoʼãi upe mbaʼe vai ñapensáva. Ñanemanduʼa vaʼerã enterovéva ñaneimperfektoha, ha upéicha rupi ndaikatumoʼãi voi jaipeʼaite ñane akãgui kompléto umi deséo vai. Péro si ikatu jadesidi nañapermitimoʼãiha umíva ñanedomina. Upearã jasegikuaa José ehémplo, pórke haʼe ensegída voi orrechasa vaʼekue Potifar rembirekópe (Gén. 39:12). Upéva ñanepytyvõ ñantende hag̃ua jarekóramo jepe umi deséo vai, natekotevẽiha jajapo upéva. w23.01 12, 13 párr. 16, 17

Jehová ihústo ha péva hína peteĩva umi ikualida iñimportantevéva (Deut. 32:4). Peteĩ persóna ihústova otrata enterovépe peteĩcha, ha Jehová otrata enterovépe peteĩcha (Hech. 10:​34, 35). Upéva jahechakuaa pe ojeskrivi lájare la Biblia, por ehémplo pe idióma ojeskrivi haguépe. Jehová opromete vaʼekue ‘umi enseñánsa verdadéra heta hetavetaha’ umi ára pahápe, upéva heʼise heta hénte ontendetaha la Bíbliape oĩva (Dan. 12:4). Upéva oiko pórke ñane tiémpope ojetradusíma hetaiterei idiómape, oñeguenohẽ ha oñemosarambi opárupi la Biblia ha umi puvlikasión bíblica. Péro Jehová puévlo otradusíma la Biblia en párte térã kompletoite mas de 240 idiómape, ha upéva ári koʼã Biblia enterovetéva ikatu okonsegi opagaʼỹre hese mbaʼevete. Upévare enterove hénte ko múndope ikatu ohendu “umi notísia porã oñeʼẽva Ñandejára Rréinore” og̃uahẽ mboyve pe fin (Mat. 24:14). Péicha Jehová omeʼẽ la oportunida enterovetépe oikuaa porãve hag̃ua chupe ha olee hag̃ua la Biblia iñidiomaitépe. ¡Ajépa ñanderayhuete Jehová ojapóvo ko mbaʼe ñanderehehápe! w23.02 5 párr. 11, 12

¿Ndépa emombaʼe hína pe hustísia? Katuete ningo. Péro enterove ñaneimperfékto ha jajedeskuidáramo ifásil ova hag̃ua ñanderehe mbaʼéichapa ko múndo ohecha pe hustísia (Is. 5:20). Ojeʼe jave peteĩ persóna ihustoha heta oĩ opensáva peichagua persóna haʼeha álgien ijorgullósova, oporohusgáva, térã opensáva haʼe ivaleveha hapichakuéragui. Péro Ñandejárape ndogustaiete umichagua kualida. Jesús oúrõ guare ko yvy ápe ári, ojaʼo vaʼekue umi líder rrelihióso upe tiempopeguápe, pórke haʼekuéra heʼi mbaʼépa la oĩ porãva asegún la opensávante hikuái (Ecl. 7:16; Luc. 16:15). Péro peteĩ persóna añetehápe ihústova ojapo umi mbaʼe Jehová heʼíva oĩ porãha, ha núnka nopensái ijehe ivaleveha hapichakuéragui. Jaguerohoryeterei ningo peteĩ persóna ihústovape. Peteĩ persóna ihústova heʼise ojapoha umi mbaʼe iporãva Jehová renondépe. La Bíbliape ojepuru jave pe palávra ihústova heʼise jepi upe persóna oikoha Jehová omandaháicha. w22.08 27 párr. 3-5

Jesús okonfia kuri idisipulokuérare ojavy mimíramo jepe hikuái (Juan 15: 16). Santiago ha Juan ojerurérõ guare Jesúspe peteĩ puésto espesiál pe Rréino yvagaguápe, Jesús ndodudái pe intensión orekóvagui hikuái oservi hag̃ua Jehovápe ni ndorrechasái chupekuéra ijapóstolramo (Mar. 10:​35-40). Ojejagarrárõ guare Jesúspe ojejuka hag̃ua, umi idisipulokuéra ohejapaite chupe (Mat. 26:56). Upéicharõ jepe Jesús siémpre okonfia vaʼekue hesekuéra. Haʼe ohechakuaa vaʼekue haʼekuéra iñimperfektoha ha upéicharõ jepe “ipahaite peve ohayhu chupekuéra” (Juan 13:1). Hiʼarive Jesús orresusita rire, omeʼẽ kuri umi 11 ijapóstolpe peteĩ rresponsavilida tuichaitereíva omoakã hag̃ua hikuái pe traváho ojejapo hag̃ua disípulo ha oñangareko hag̃ua umi ijovechakuéra mimíre (Mat. 28:​19, 20; Juan 21:​15-17). Haʼe ndojeroviareíri kuri hesekuéra. Haʼekuéra ningo ifiél kuri omano meve. Añetehápe Jesús omoĩ peteĩ ehémplo iporãitereíva ñakonfia hag̃ua ñande rapichakuéra imperféktore. w22.09 6 párr. 12

Ñande ñaime jave segúro Jehová ñanderayhuha ha oĩha ñande ykére, Satanás nañanemongyhyjemoʼãi ha ñandepuʼakáta hese. Por ehémplo pe oskrivi vaʼekue Salmo 118 ombohovái vaʼekue heta situasión ijetuʼuetereíva. Haʼe heta ikontrário ha umíva apytépe oĩ voi umi orekóva umi puésto yvate (versíkulo 9, 10). Heta vése ojejopy vaipaite voi chupe (versíkulo 13). Avei Jehová okorrehi mbarete vaʼekue chupe (versíkulo 18). Upéicharõ jepe pe salmísta opurahéi vaʼekue: “Ndakyhyjemoʼãi asy”. Pórke haʼe oikuaa okorrehíramo jepe chupe, Jehová pe Itúa yvagapegua ohayhuetereiha chupe. Pe salmísta oĩ vaʼekue segúro oimeraẽ situasiónpe, Ijára ohayhuetéva chupe siémpre oĩtaha oipytyvõ hag̃uáicha chupe (Sal. 118:29). Ñande ningo tekotevẽ ñaime segúro Jehová ñanderayhuha. Upéva ñanepytyvõta ikatu hag̃uáicha ñambohovái porã umi mbaʼe ñanemongyhyjéva. Por ehémplo: 1) Jakyhyje ndaikatúirõ g̃uarã ñamantene ñane famíliape, 2) jakyhyje ñande rapichágui, ha 3) jakyhyje ñamanórõ g̃uarã. w22.06 15 párr. 3, 4

Jajasegura vaʼerã ñamotenondépa hína Jehová adorasión ñande rekovépe. Jehová haʼe rupi ñande Apohare omerese jaadora chupe (Apoc. 4:11; 14:​6, 7). Upévare ñandéve g̃uarã la iñimportantevéva haʼe vaʼerã jaadora Jehovápe ogustaháicha chupe. Upéva heʼise jaheja vaʼerãha ‘pe espíritu sánto ñandegia ha jasegi vaʼerã umi enseñánsa verdadéra’ (Juan 4:​23, 24). Ñande jaipota Ñandejára espíritu ñandegia jaadora hag̃ua chupe asegún umi enseñánsa verdadéra oĩva la Bíbliape. Pe adorasión ñameʼẽva chupe haʼe vaʼerã pe iñimportantevéva ñandéve g̃uarã, jaikóramo jepe peteĩ lugár ojejoko térã ojeproivihápe ñane rembiapo. Koʼág̃arupi mas de 100 ermáno ha ermána oĩ préso haʼe haguére testígo de Jehová. Upéicharõ jepe, haʼekuéra ovyʼaiterei ha ojapo opa ikatúva oñemboʼe, ostudia ha oñeʼẽ hag̃ua hapichápe Ñandejárare ha pe Rréinore. Oĩramo jepe ñandejaʼóva térã ñandepersegíva, ñande javyʼaiterei jaikuaávo Jehová oĩha ñanendive ha katuete ñanevendesitaha (1 Ped. 4:14). w22.10 9 párr. 13

Lívro de Provérbiospe jatopa hetaiterei konsého ñanepytyvõtava ñamehora hag̃ua ñande rekove. Jahechamína 2 konsého iporãitereíva jatopáva pype. Primero, eñekontenta umi mbaʼe erekomívare. Proverbios 23:​4, 5 omeʼẽ ko konsého: ‘Ani rejopyeterei rekonsegi hag̃ua pláta ha repyta nekaneʼõiterei. Péva haʼete voi peteĩ ágila oveve ha ohóva yvágape’. Upéicharamo jepe, umi iplátava ha imboriahúva ojepyʼapyeterei koʼág̃arupi okonsegi hag̃ua pláta. Upévare oĩ umi ojapóva peteĩ mbaʼe oheja vaíva chupekuéra ótro renondépe, ombyai pe amista orekóva ótra persónandi ha ou hasy (Prov. 28:20; 1 Tim. 6:​9, 10). Segundo, epensa eñeʼẽ mboyve. Nañañatendéiramo umi mbaʼe jaʼévare ikatu japerhudika vai ñande rapichápe. Proverbios 12:18 heʼi: “Oĩ nopensáiva oñeʼẽ hag̃ua, ha umi mbaʼe heʼíva ñandekutu rasy peteĩ espádaicha, péro umi iñarandúva heʼíva haʼete peteĩ pohã ñanemongueráva”. Ñande ningo siémpre jajogueraha porãta ñande rapichakuérandi ñañatendéramo ani hag̃ua ñamorasambi upérupi mbaʼépepa ojavy ñane ermanokuéra (Prov. 20:19). w22.10 21 párr. 14; 22 párr. 16, 17

Ezequiel tekotevẽ vaʼekue ontende porã pe mensáhe haʼe oanunsiátava. Haʼe oguerovia vaʼerã pe mensáhe ikatu hag̃uáicha omomýi chupe opredika hag̃ua. Upéi oiko peteĩ mbaʼe osorprendetereíva chupe. Ezequiel ohechakuaa pe kuatiañeʼẽ ‘eiretéicha heʼẽ asyha’ (Ezeq. 3:3). ¿Mbaʼérepa? Pórke Ezequiélpe g̃uarã tuichaiterei mbaʼe orrepresenta Jehovápe. Chupe g̃uarã haʼetévaicha voi álgo heʼẽ asýva pórke ombopyʼarory ha ombovyʼa chupe (Sal. 19:​8-11). Haʼe oagradeseterei Jehovápe oiporavo haguére chupe haʼe hag̃ua iproféta. Upéi Jehová heʼi Ezequiélpe: “Eñatende porã ha ehendu entéro mbaʼe haʼéva hína ndéve” (Ezeq. 3:10). Péicha Jehová heʼi vaʼekue Ezequiélpe oñehaʼã hag̃ua imanduʼa umi mbaʼe ojeskrivívare pe kuatiañeʼẽme ha ojepyʼamongeta hag̃ua hese. Péicha Ezequiel omombareteve kuri ijerovia, ha oikuaáma pe mensáhe iñimportantetéva omeʼẽ vaʼerã umi héntepe (Ezeq. 3:11). Ezequiel ontende porã ha oguerovia rire Ñandejára mensáhe, haʼe oĩma preparádo oñepyrũ hag̃ua opredika ha osegi hag̃ua okumplipa peve pe iñasignasión. w22.11 6 párr. 12-14

Oiméramo ojejapo peteĩ kámbio Jehová organisasiónpe ha upéva ijetuʼu ñandéve g̃uarã, ¿mbaʼépa ikatu jajapo? Jaapoja vaʼerã ñande pyʼaite guive umi kámbio. Umi israelita oĩrõ guare pe desiértope, haʼekuéra orova ha orova vaʼekue la ikampaménto, ha káda ke ojejapo upéva, umi cohatita oraha pe Árka del Pákto enterove umi israelita renondépe (Núm. 3:​29, 31; 10:33; Jos. 3:​2-4). ¡Upéva tuichaiterei priviléhio vaʼekue! Péro umi israelita oike rire pe Tiérra Prometídape, upéva okambiaite. ¿Mbaʼérepa? Pórke upe moménto guive pe Árka ndojeguerovavéima. Upévare okambia umi cohatita asignasión (1 Crón. 6:​31-33; 26:​1, 24). Péro la Biblia ndeʼíri en ningún moménto umi cohatita ojeplagea hague okambia haguére la iñasignasión, ha ndeʼíri avei haʼekuéra ojerure hague peteĩ priviléhio iñimportantevéva. ¿Mbaʼépa ñanemboʼe la iñehemplokuéra? Ñande avei jaasepta vaʼerãha enteroite umi kámbio ojejapóva Jehová organisasiónpe, oiméramo jepe upéva oafekta peteĩ asignasión ñande jaguerekóva. Ñande javyʼa vaʼerã tahaʼe haʼéva la jajapóva Jehová servísiope. Pórke en rrealida Jehovápe g̃uarã la iñimportantevéva, ndahaʼéi hína pe asignasión jaguerekóva, síno ñaneñeʼẽrendu chupe. w22.11 23 párr. 10, 11

Onesíforo ojapo opa ikatúva otopa hag̃ua apóstol Páblore, ha otopárõ guare hese oñehaʼã oipytyvõ chupe oikotevẽhápe. Ojapóvo upéva, Onesíforo oarriesga vaʼekue hekove Pablo rehehápe. ¿Mbaʼépa ñanemboʼe upéva? Ñañehaʼã vaʼerãha jaapoja umi ermáno oaguantávape pe persekusión. Jakyhyjéramo jepe umi héntegui, ndajahejái vaʼerã upéva ñandejoko. Jasegi vaʼerã ñaipytyvõ ñane ermanokuérape, ha jajapo opa ikatúva ñadefende hag̃ua chupekuéra (Prov. 17:17). Haʼekuéra oikotevẽterei ñande jasegi jahayhu ha jaapoja chupekuéra. Epensamíntena mbaʼépa ojapo ñane ermáno ha ermanakuéra Rusiapegua oñeenkarsela jave umi ermáno ohayhuetévape hikuái. Algúno ermánope ojegueraha jave trivunálpe, hetaiterei ermáno oho avei upépe oapoja hag̃ua chupekuéra. ¿Mbaʼépa ikatu ñaaprende iñehemplokuéragui? Oĩ jave otakýva, oarrestáva térã opersegíva umi ermáno orekóvape rresponsavilida, ani rekyhyje. Eñemboʼe hesekuéra, eñangareko umi ifamíliare ha eheka fórma eapoja hag̃ua chupekuéra (Hech. 12:5; 2 Cor. 1:​10, 11). w22.11 17 párr. 11, 12

Ansianokuéra rresponsavilida hína omombarete ermanokuéra jerovia ha omokyreʼỹ chupekuéra (1 Ped. 5:2). Oikóramo peteĩ sarambi, umi ansianokuéra primeroite voi ohecha vaʼerã oĩ porãpa umi ermáno ha orekopápa umi mbaʼe oikotevẽva. Por ehémplo orekópa hikuái tembiʼu, ao o peteĩ lugár opytami hag̃ua. Péro posívlemente hetave tiémpore oikotevẽta hikuái umi ansiáno omombarete ha omokyreʼỹmi chupekuéra (Juan 21:15). Peteĩ ermáno hérava Harold, oĩva peteĩ komite de sukursálpe, heʼi: “Umi ermáno ojerrekupera hag̃ua peteĩ sarambígui ningo ikatu ogueraha heta tiémpo. Avése oĩ porãhágui hína hikuái, imanduʼa jey peteĩ ihénte omano vaʼekuére, peteĩ kósa ohayhuetereíva operde vaʼekuére térã ótra kósare, ha hasy asy jey chupekuéra upéva. Péro upéva ndeʼiséi ndojeroviaiha hikuái, normál ningo la ñañeñandu upéicha”. Iñimportánte umi ansiáno osegi ko konsého oĩva la Bíbliape: “Penerasẽ umi hasẽva ndive” (Rom. 12:15). w22.12 22 párr. 1; 24, 25 párr. 10, 11

Enterove ñaneimperfékto ha ijetuʼu ñandéve jajapo hag̃ua iporãva, péro Jehová omeʼẽ ñandéve ijespíritu sánto ñanepytyvõ hag̃ua. Upévare jastudia vaʼerã la Biblia, pórke ñanepytyvõ jarresivi hag̃ua ijespíritu. Avei iñimportanteterei ndajafaltái rreunionhápe, pórke upépe jarresivi avei espíritu sánto ha jahasa tiémpo ñane ermanokuérandi. Haʼekuéra ñandéicha avei oñehaʼãmbaite ojapo hag̃ua iporãva. Upéicha rupi umi rreunión tuichaiterei ñanemokyreʼỹ (Heb. 10:​24, 25; 13:7). Jehová omeʼẽ avei ñandéve pe ñemboʼe. Ñande ikatu jajerure chupe tañanepytyvõ ñandepuʼaka hag̃ua umi mbaʼe vai ñandestirávare, ha haʼe omeʼẽta ñandéve ijespíritu sánto ikatu hag̃uáicha ñanembarete ha jasegi jalucha umíva kóntrape. Siérto, entéro koʼã mbaʼe ndoipeʼaitemoʼãi ñane akãgui umi deséo vai, péro ñanepytyvõta ani hag̃ua jajapo mbaʼeve ivaíva. Ñande jajepokuaáma jajapo umi mbaʼe ñanemoag̃uíva Jehováre, ha iñimportanteterei ñañehaʼãmbaite ani hag̃ua jaheja rei koʼã mbaʼe jajapóva, ha jasegi ñapensa umi mbaʼe iporãvare. w23.01 11 párr. 13, 14

La Biblia ndahaʼéi peteĩ lívro oñeʼẽva mbaʼéichapa jakuida vaʼerã ñande salúre térã mbaʼéichapa jakaru vaʼerã, péro si ohechauka ñandéve mbaʼépa Jehová opensa koʼã mbaʼére. Haʼe heʼi voi ñandéve: “Ejehekýi umi mbaʼe ikatúvagui ndeperhudika”, térã umi mbaʼe ikatúvagui ñanembohasy (Ecl. 11:10). La Biblia heʼi porã ndovaleiha jakaru rasa ni jaʼu rasa vevída, pórke koʼãva ñandeperhudika ha oapeligra ñande rekove (Prov. 23:20). Jehová oipota jajejokokuaa koʼýte jakaru térã jaʼu jave vevída (1 Cor. 9:25). Jaipuru porãramo ñane akã ikatúta jadesidi porã ha upéicha umi mbaʼe jadesidíva rupi jahechaukáta ñamombaʼetereiha ñande rekove, pe rregálo oúva Ñandejáragui (Sal. 119:​99, 100; Prov. 2:11). Ha upéva ikatúta jahechauka jadesidíta jave mbaʼéichapa ñañalimentáta. Por ehémplo ñandéve ikatu ñandegusta peteĩ tembiʼu, péro jaikuaa upéva ñanembohasytaha. Upéicha rupi ñande ndajaʼúinte pe tembiʼu. Avei ñande jahechauka jaipuru porãha ñane akã jake porãramo, jajapóramo ehersísio, ñanepotĩramo ha avei ñamopotĩramo ñande róga. w23.02 21 párr. 6, 7

¿Mbaʼéichapa ikatu jatopa umi tesóro jalee jave la Biblia? Jahechamína la heʼíva 2 Timoteo 3:​16, 17-pe: “Entéro mbaʼe oĩva Ñandejára Ñeʼẽme”: 1) Ideprovécho ñaporomboʼe hag̃ua, 2) ohechauka ñandéve mbaʼépa oĩ vai, 3) jakorrehi hag̃ua entéro mbaʼe ha 4) ñanemboʼe jajapo hag̃ua umi mbaʼe oĩ porãva. Koʼã 4 mbaʼe ikatu ideprovécho ñandéve ha jahupyty jaleévo umi lívro bíblico ndajajepokuaáiva jalee. Ñaanalisa vaʼerã pe rreláto ikatu hag̃uáicha jahecha mbaʼépa ñanemboʼe Jehovágui, la ojapótavagui térã umi konsého bíblico oĩva pype. Avei ñaanalisa mbaʼéichapa ohechauka mbaʼépa oĩ vai. Ñañehaʼã jahechakuaa mbaʼéichapa umi versíkulo ñanepytyvõ japilla hag̃ua ha jarrechasa hag̃ua peteĩ mbaʼe vai ñandestiráva térã peteĩ kostúmbre jarekóva. Ha péicha jasegi hag̃ua ñandefiél Jehovápe. Ñaanalisa avei mbaʼéichapa pe rreláto ikatu ñanepytyvõ jakorrehi hag̃ua entéro mbaʼe, peteĩ pensamiénto naiporãiva, por ehémplo ikatu hína ñambohovái umíva predikasiónpe. Avei jahechakuaase umi mbaʼe oĩ porãva ñanemboʼeséva pe rreláto jajapo hag̃ua. Ha upéva ñanemboʼéta ñapensa hag̃ua Jehová opensaháicha. Upéicharõ jarekóramo enkuénta koʼã 4 mbaʼe ideprovechoitétava ñandéve, ñanepytyvõta jatopa hag̃ua umi tesóro oĩva la Bíbliape. w23.02 11 párr. 11

Peteĩ profesía jatopáva lívro de Daniélpe ohechauka Jesús oñepyrũtaha ogoverna Ñandejára Rréinope ohasa rire umi 7 tiémpo. ¿Ikatúpa ñande jaikuaa arakaʼetépa oiko rakaʼe upéva? (Dan. 4:​10-17, nóta). Umi “7 tiémpo” orrepresenta peteĩ tiémpo ipukúva 2.520 áño. Koʼã “7 tiémpo” oñepyrũ áño 607-pe a.C., umi babilonio ohundírõ guare Jerusalén, ha oipeʼa pe rréi israelita ogovernáva. Koʼã “7 tiémpo” opa áño 1914-pe oñemoĩrõ guare Jesúspe Rréiramo, ha haʼe hína “pe orekóva derécho” ogoverna hag̃ua Ñandejára Rréinope (Ezeq. 21:​25-27). ¿Mbaʼéichapa ñanevenefisia ko profesía? Oasegura ñandéve Jehová katuete okumpliha umi mbaʼe oprometéva itiempoitépe. Omoĩ haguéicha peteĩ tiémpo oiko hag̃ua Jesúsgui pe Rréi Irréinope, péicha avei Jehová oñenkargáta ikatu hag̃uáicha oñekumpli umi ótra profesía itiempoitépe. Umíva katuete oñekumplíta, “ni mbaʼevéicharõ ndotardamoʼãi” (Hab. 2:3). w22.07 3 párr. 3-5