Noviembre

Ñande kristiáno ndovaléi ni mbaʼevéicharõ ñanetieʼỹ térã ñandejurukyʼa. Péro oĩ avei ótra kósa tekotevẽva ñañatendeterei. Por ehémplo, naiporãmoʼãi jaiko ñañeʼẽ vai umi héntere haʼe rupi ótro paisgua, térã oreko rupi ótra kostúmbre. Avei naiporãmoʼãi peteĩ kristiáno oiko otalla térã oñembohory hapicháre. Jaʼékena umi mbaʼe omokyreʼỹtava ñande rapichakuérape. Jaiko rangue jakritika o ñañeʼẽ vai ótrore, iporãvéta jafelisitáramo chupekuéra. Ñapensamíntena umi israelítare. Chupekuéra Jehová omeʼẽ vaʼekue hetaiterei mbaʼe porã, péro haʼekuéra lomímonte noñekontentái. Ha unos kuántonte oñemoĩrõ guare ojeplagea, upéva upéi ovapaitéma el rréstore. Por ehémplo, 10 espíante la oñeʼẽ vai vaʼekue pe Tiérra Prometídare, péro upe haguére “enterovete umi israelita oñepyrũ ojeplagea Moisés ha Aarón kóntrape” (Núm. 13:31–14:4). Péro jaguerohorýramo ótrope ñamokyreʼỹta chupe ojapo hag̃ua iporãva. Upévare, jahekákena la oportunida jafelisita hag̃ua ñane ermanokuérape. w22.04 8 párr. 16, 17

Ymaite guive, Jehová oipytyvõma hetaiterei mitãrusu ha mitãkuñáme oiko hag̃ua chuguikuéra iñamígo. Ha ne família ohayhúramo chupe, haʼe katuete oipytyvõta avei chupe (1 Cor. 3:​6, 7). Ha kon el tiémpo haʼetéramo jepe la ne família oñemomombyrýva ohóvo Jehovágui, haʼe ni mbaʼevéicharõ ndahesaraimoʼãi chuguikuéra (Sal. 11:4). Ha peichahágui ohecháramo haʼekuéra michĩmi jepe oñeinteresa jeyha pe añeteguáre, pyaʼeterei voi ojapóta la tekotevẽva guive omoag̃ui jey hag̃ua chupekuéra ijehe (Hech. 13:48; 2 Crón. 16:9). Por ehémplo, ikatu nepytyvõ ere hag̃ua hustíto la haʼekuéra oikotevẽva ikyreʼỹ ha imbarete jey hag̃ua (Prov. 15:23). Térã ikatu avei ojevale peteĩ ermáno o ermánare oipytyvõ hag̃ua chupekuéra. Ne membykuéra okakuaapa rire jepe, Jehová omomanduʼakuaa hína chupekuéra álgo nde remboʼe vaʼekue chupekuéra imitãme (Juan 14:26). Upévare, esegíramo eñehaʼãmbaite emboʼe chupekuéra umi mbaʼe eréva ha ejapóva rupive, Jehová katuete nevendesíta. w22.04 21 párr. 18

Satanás ndaikatuvéima oho yvágape, ha upévare oñemoĩ kon tódo oataka umi unhído hembývape, pórke haʼekuéra Ñandejára rrepresentánte ko yvy ape ári ha chupekuéra ‘oñenkarga vaʼekue pe traváho oñeʼẽ hag̃ua Jesús rehe’ (2 Cor. 5:20; Efes. 6:​19, 20). Áño 1918-pe, 8 ermáno ogiávape Jehová organisasión ojegueraha vaʼekue préso ha oñekondena chupekuéra opyta hag̃uáicha kárselpe heta áñore. Upéicha rupi haʼetévaicha pe traváho ojapóva umi unhído opa rei hague térã heʼiháicha pe profesía “omano” (Apoc. 11:​3, 7-11). Áño 1919-pe umi 8 ermáno ojegueraha vaʼekue kárselpe ojelivera, pórke ojehechakuaa ojeakusa reínte hague chupekuéra. Koʼã ermáno pyaʼe voi omoñepyrũ jeýma pe predikasión. Péro Satanás lomímonte osegi vaʼekue oataka Jehová puévlope. Upe tiémpo guive, haʼe “peteĩ rríoicha” omondo hiʼarikuéra la persekusión (Apoc. 12:15). Upévare oiméramo jahasa hína koʼãichagua mbaʼe, tekotevẽ ñaaguanta ha jajerovia (Apoc. 13:10). w22.05 5, 6 párr. 14-16

Peteĩ visiónpe, apóstol Juan ohecha vaʼekue mokõi grúpo oapojáva Jehová goviérno ha haʼekuéra iñeʼẽrendu rupi, Jehová omeʼẽ chupekuéra vída etérna. Pe primer grúpope oĩ en totál 144.000 persóna. Koʼãvape ojeporavo ko yvýgui ha oñemeʼẽ chupekuéra pe priviléhio ohóvo yvágape ogoverna hag̃ua Jesúsndi umi oĩvape ko yvy ape ári (Apoc. 5:​9, 10; 14:​3, 4). Pe visiónpe Juan ohecha voi koʼã 144.000 oñemboʼyha Jesús ndive pe Sérro Siónpe (Apoc. 14:1). Hetaiterei tiémporema Jehová oiporavo oikóvo máva mávapa oĩta koʼã 144.000 apytépe (Luc. 12:32; Rom. 8:17). Péro pe visiónpe oñemombeʼu Juánpe koʼãvagui unos kuántontema oĩtaha ko yvy ape ári umi ára pahápe (Apoc. 12:17). Ha en algún moménto oñepyrũ rire pe jehasa asy guasu ojegueraháta chupekuéra yvágape oĩ hag̃ua umi ótro 144.000 ifiél vaʼekuéndi omano meve. Upépe oikóta chuguikuéra rréi ogoverna hag̃ua Jesús ndive Ñandejára Rréinope (Mat. 24:31; Apoc. 5:​9, 10). w22.05 16 párr. 4, 5

Jesús oipytyvõ vaʼekue ijapostolkuérape ani hag̃ua ijorgullóso, péro oipytyvõ vaʼekue avei chupekuéra ohechakuaa hag̃ua haʼekuéra ivaliosoitereiha Jehovápe g̃uarã. Upévare heʼi vaʼekue chupekuéra: “Umi pene akãrangue jepe haʼe okontapa” (Mat. 10:30). Katuete ko mbaʼe Jesús heʼi vaʼekue ñanekonsolaitereíta, oiméramo ijetuʼu jepi ñandéve jahechakuaa hag̃ua ñandevaliosoha Jehovápe ha upévare ñapensa ndajavaleiha mbaʼeverã. Ñanemanduʼa vaʼerã ñande haʼeha Jehová resaʼỹi, haʼe hakateʼỹ formál ñanderehe. Upévare núnka nañapensaséi nañamereseiha haʼe ñanderayhu ni nañamereseiha ñaime pe múndo pyahúpe. Ojapo 15 áño peteĩ rrevísta Ñemañaha omeʼẽ hague ñandéve ko konsého: “Ñañatende vaʼerã ani hag̃ua jajekreeterei ni ñapensa ñaneimportantetereiha. Péro upéicha avei ñañatende vaʼerã ani hag̃ua ñapensa ñaneinutilha ha ndajavaleiha mbaʼeverã. Upéva rangue iporãvéta ñapensa porãnte ñandejehe. Jaikuaa oĩha heta mbaʼe ndaikatúiva jajapo, péro si ñandevale avei heta mbaʼépe. Upévare ñañehaʼã vaʼerã ñandeekilivrádo. w22.05 24, 25 párr. 14-16

¿Mbaʼéichapa ikatu ñamombarete pe unida oĩva kongregasiónpe? Ñañehaʼãmbaitékena jaiko hag̃ua pyʼaguapýpe ñane ermanokuérandi (Mat. 5:9; Rom. 12:18). Káda ke ñande ñañehaʼã jajapo ñande párte jajogueraha porã hag̃ua ñane ermanokuérandi, ñaipytyvõ hína pe paraíso espirituál iporãve hag̃ua amás día. Aníkena ñanderesarái Jehová haʼe hague upe ñandeguerúva ko paraíso espirituálpe (Juan 6:44). Epensamíntena mbaʼeichaitépa oiméne Jehová ovyʼa ohechávo ñañehaʼãmbaiteha jaiko hag̃ua pyʼaguapýpe ha en unida (Is. 26:3; Ageo 2:7). ¿Mbaʼépa ikatu jajapo jaaprovechapaite hag̃ua umi vendisión Jehová omeʼẽva isiervokuérape? Iporãitereíta jajepyʼamongetáramo umi mbaʼe jaleévare la Bíbliape. Jastudia ha jajepyʼamongetáramo ikatúta jaguereko umi kualida iporãva ñanemomýitava jajoayhu hag̃ua ñande pyʼaite guive “oñoermáno teéicha” (Rom. 12:10). w22.11 12, 13 párr. 16-18

Ñande jaaseptáramo Jehová ñaneperdonaha ikatúta javyʼa, ñañeñandu porã ha ñanekonsiénsia potĩ. Peichagua perdón Jehová añoiténte ikatu omeʼẽ ñandéve (Hech. 3:19). Jehová ñaneperdona jave ikatu jey jaiko iñamígoramo. Jehová ñaneperdona rire hesaraietéma umi mbaʼe vai jajapo vaʼekuégui (Is. 43:25). Jehová omomombyry ñandehegui umi ñane rembiapo vaikue ‘pe kuarahyresẽ mombyryháicha pe kuarahyreikégui’ (Sal. 103:12). Jajepyʼamongetáramo mbaʼeichaitépa Jehová oporoperdonakuaa, upéva ñanemomýita jaagradese hag̃ua chupe (Sal. 130:4). Jehová oporoperdonáta jave ndoguerahái enkuénta pe pekádo igrávepa raʼe térãpa nahániri. Jehová haʼe ñande Kreadór, pe omeʼẽva umi léi, ha peteĩ vuén Hués, ha koʼã mbaʼe oipytyvõ chupe odesidíta jave ñaneperdonátapa térã nahániri. w22.06 5 párr. 12-14

Jehová omeʼẽ peteĩ promésa iporãitereíva umi ohayhúvape chupe. Haʼe koʼẽrõite oipeʼátama umi mbaʼe ñanembohasa asýva, ndaiporimoʼãvéima oñelamentáva ni omanóva (Apoc. 21:​3, 4). Avei Jehová oipytyvõta umi ivuénovape ojapo hag̃ua ko yvýgui peteĩ paraíso (Sal. 37:​9-11). Upe tiémpope oikóta ñandehegui Jehová amigoite ha iporãvéta voi ohóvo pe amista jarekóva hendive. ¡Ajépa iporãite pe esperánsa jaguerekóva! ¿Péro mbaʼérepa ñaimekuaa segúro Jehová promesakuéra oñekumplitaha? Haʼe siémpre okumplipaite umi mbaʼe heʼíva, ha ñande jaikuaa porã mbaʼérepa ikatu jajerovia hese (Sal. 27:14). ¿Ha mbaʼéichapa jahechauka jajeroviaha Jehováre? Vyʼápe ñahaʼarõvo Jehová okumplipaite umi promésa ojapo vaʼekue ñandéve (Is. 55:​10, 11). Jasegíkena avei ñandefiél Jehovápe ha ñaĩ segúro haʼe “omyengovia porãha umi oñehaʼãvape ipyʼaite guive oadora chupe”. w22.06 20 párr. 1; 25 párr. 18

Ñande ningo Jehová família ha ikatu voi ñaime segúro haʼe katuete okumplitaha upe omanda vaʼekue entéro omoakãvape ifamília ojapo hag̃ua heʼiháicha 1 Timoteo 5:8. Ñande ñaime jave segúro Jehová ñanderayhuha ha ohayhuha ñane famíliape, ndajadudamoʼãi asy haʼe omeʼẽtaha ñandéve umi mbaʼe ñaikotevẽva (Mat. 6:​31-33). Jehová omeʼẽse ñandéve umi mbaʼe ñaikotevẽva jaikove hag̃ua. ¡Ajépa haʼe ñanderayhuete ha ipojera ñanendive! Haʼe okreárõ guare ko yvy ndahaʼéi omoĩnte vaʼekue umi mbaʼe ñaikotevẽva jaikove hag̃ua, síno haʼe mborayhúpe ojapo vaʼekue hetaiterei mbaʼe ko yvy ape ári ikatu hag̃uáicha javyʼa ha jadisfruta (Gén. 2:9). Sapyʼánte ikatu jahupyty umi mbaʼe ñaikotevẽvante ha nahembýi ñandéve ótra kosarã, upéicha jave ñanemanduʼa vaʼerã mbaʼérepa jareko umi mbaʼe ñaikotevẽva: Jehová hína la omeʼẽva ñandéve umíva (Mat. 6:11). Ñande ningo siémpre ñanemanduʼa vaʼerã Jehová omeʼẽha ñandéve umi mbaʼe iñimportantevéva ani hag̃ua ñañentrega koʼág̃a, ha amo gotyove katu omeʼẽta voi ñandéve vída etérna (Is. 65:​21, 22). w22.06 15 párr. 7, 8

Umi oñepyrũva ostudia la Biblia, tekotevẽ oikuaa porã Jehovápe ha avei umi enseñánsa bíblica. Péro ndahaʼéi haʼekuérante la tekotevẽva ojapo upéva, síno ñande avei. Apóstol Pablo oskrivi vaʼekue umi omoĩva en práktika umi mbaʼe omboʼéva la Biblia oaprendetaha “odiferensia hag̃ua mbaʼépa iporã ha mbaʼépa ivai”. Ñane tiémpope heta hénte hekovai ha hekokyʼaiterei, upévare sapyʼánte ikatu ijetuʼu ñandéve ñaneñeʼẽrendu hag̃ua Jehovápe. Péro Jesús ojasegura ñande ñaaprende hag̃ua umi mbaʼe ñaikotevẽva ikatu hag̃uáicha jasegi ñandejerovia mbarete. Ha ñande jarresivi koʼã instruksión Ñandejára Ñeʼẽ la Biblia rupive. Jesús ojapo haguéicha, ñambotuicha Ñandejára réra haʼe omereseháicha (Juan 17:​6, 26). Por ehémplo 1931-pe ñaguenohẽ la Bíbliagui voi ñañembohéra hag̃ua testígo de Jehová, ha péicha jahechauka ñandéve g̃uarã iñimportantetereiha Ñandejára réra ha jaipotaha umi hénte ñandekuaa Itestígoramo (Is. 43:​10-12). Avei Ñandejára Ñeʼẽ La Biblia Traducción del Nuevo Múndope oñemoĩ jey Ñandejára réra umi lugár tekotevẽhápe oĩ. w22.07 11 párr. 11, 12

Ñañeʼẽvo pe añeteguáre ñañeʼẽ avei Ñandejára Rréinore. Jesús okompara vaʼekue pe Rréino pláta yvyguýre. Upéva jatopa Mateo 13:​44-pe, upépe Jesús heʼi: “Pe Rréino yvagapegua ojogua pláta yvyguy oĩvape peteĩ ñúme. Peteĩ kuimbaʼe otopa pe tesóro ha oñomi jey. Haʼe ovyʼaitereígui oho ovendepa ikosakuéra ha ojogua upe ñu”. Jahechaháicha pe kuimbaʼe ndohekái hína kuri pláta yvyguy, péro otopa rire ojapo heta sakrifísio okonsegi hag̃ua upe tesóro. Upearã ovendepaite la orekomíva. ¿Mbaʼérepa? Haʼe oikuaa rupi ivaliosoitereiha upe tesóro. Jaikuaa porãiterei entéro mbaʼe oofreséva ñandéve ko múndo ndaikatuiha ñakompara pe vyʼa jarekóvare jaservi rupi Jehovápe ha pe esperánsa jaikovévo pára siémpre pe Rréino poguýpe. Tuichaiterei mbaʼe ningo jareko Jehovápe ñane amígoramo, ha upéva ovaleve voi oimeraẽ sakrifísio ikatúvagui jajapo. Ndaipóri voi ótra kósa ñanembovyʼavéva jaikuaávo Jehová ‘ñandeguerohoryha entéro mbaʼépe’ (Col. 1:10). w22.08 15 párr. 8; 17 párr. 9, 12

¿Mbaʼéicha piko José oikuaa vaʼekue Ñandejára renondépe peteĩ oporomoakãratĩva ‘ojapoha peteĩ mbaʼe ivaietereíva’? Moisés léipe oĩ vaʼekue ko mandamiénto: “Ani remoakãratĩ ne ména térã ne rembirekópe”, ha upe léi oñemeʼẽ vaʼekue umi israelítape amo 200 áño upe riréma (Éx. 20:14). Upéicharõ jepe, José ohechakuaa vaʼekue Jehová renondépe oĩ vaiha pe ñemoakãratĩ. Por ehémplo, José katuete oikuaáne rakaʼe Jehová oforma hague pe matrimónio oĩ hag̃ua peteĩ kuimbaʼe ha peteĩ kuñánte, ha oiméne oikuaa rakaʼe avei mbaʼéichapa Jehová oprotehe vaʼekue ivisavuéla Sárape osegi hag̃ua ifiél iménape (Gén. 2:24; 12:​14-20; 20:​2-7). José oiméne ojepyʼamongeta rakaʼe koʼã mbaʼére ha ohechakuaa mbaʼépa la oĩ porãva ha oĩ vaíva Ñandejárape g̃uarã. José ohayhu vaʼekue Jehovápe, upévare haʼe omombaʼe la Jehová heʼíva oĩ porãha ha ojedesidi ojapotaha umíva. w22.08 26 párr. 1, 2

¿Mbaʼépa oikóta pe aty guasúgui ohasa rire pe jehasa asy guasu? Ko profesía oĩva Daniélpe noñeʼẽi hína pe rresurreksión espirituál térã oĩ porã jeytaha Ñandejára renondépe isiervokuéra koʼã ára pahápe, péicha ñantende vaʼekue anteve. Upéva rangue oñeʼẽ pe rresurreksión oikótavare ko yvy ape ári pe múndo pyahúpe. ¿Mbaʼérepa jaʼe upéva? Job 17:​16-pe ojepuru pe ñeʼẽ ‘yvy’ ha upépe heʼise ‘Sepultúra’. Upéicharõ Daniel 12:​2-pe oñeñeʼẽ pe rresurreksión oikótavare ko yvy ape ári ohasa rire umi ára paha ha pe Armagedón rire. ¿Mbaʼépa heʼise Daniel 12:​2-pe jatopáva, heʼívo oĩtaha orresusitáva “oikove hag̃ua pára siémpre”? Upéva heʼise umi orresusitátava osegi vaʼerãha oikuaa ha iñeʼẽrendu Jehová ha Jesúspe umi 1.000 áño aja oikove hag̃ua pára siémpre (Juan 17:3). w22.09 21 párr. 6, 7

Upéva ndeʼiséi Jehová oipotaha ñakonfia reínte ñane ermanokuérare. Upéva rangue haʼe ohaʼarõ ñandehegui ñakonfia hesekuéra, pórke haʼekuéra ohechaukáma ikatuha ñakonfia hesekuéra. Ñakonfia hag̃ua ñande rapicháre ningo ogueraha la itiémpo. ¿Mbaʼépa ikatu nde ejapo ekonfia hag̃ua ermanokuérare? Eñehaʼã eikuaa porã chupekuéra. Ikatu rejapo upéva reñemongetávo hendivekuéra rreunionhápe térã resẽvo hendivekuéra predikasiónpe. Nepasiénsiakena hesekuéra ohechauka hag̃ua ndéve ikatuha rekonfia hesekuéra. Ñepyrũrã ningo nde ikatu neremombeʼúi upe ermánope umi mbaʼe reñandúva, péro amás ke eikuaa porãve chupe ha ereko chupe ne amígoramo ikatútama emombeʼu chupe umi mbaʼe epensáva ha eñandúva (Luc. 16:10). ¿Péro mbaʼépa ikatu rejapo peteĩ ermáno ombyaíramo pe konfiánsa eguerekóva hese? Aníkena upe haguérente nerekonfiavéima hese, síno emeʼẽ chupe tiémpo ani hag̃ua eperde pe amista erekóva hendive. Ani avei oiko haguére nderehe upéicha, nerekonfiavéima umi ótro ermanokuérare. w22.09 4 párr. 7, 8

Peteĩ ansiáno hérava Miqueas oñandu vaʼekue peteĩ vuéltape unos kuánto ansiáno otrata vai hague chupe. Upéicharõ jepe, haʼe oñehaʼã oñetrankilisa ha ndohejái odomina chupe umi mbaʼe oñandúva. Haʼe pyʼỹinte oñemboʼe Jehovápe ha ojerure chupe ijespíritu sánto oaguanta hag̃ua upe situasión. Avei oñemoĩ oheka heta informasión ñane puvlikasionkuérape ikatúva oipytyvõ chupe upe situasiónpe. ¿Mbaʼépa ñanemboʼe iñehémplo? Oiméramo peteĩ ermáno térã ermána ñanemoñeñandu vai raʼe avei ñandéve, ñañehaʼã vaʼerã ñañetrankilisa ha ani jaheja ñanedomina umi mbaʼe ñañandúva. Ñandéicha avei ñane ermanokuéra ohasa heta mbaʼe ijetuʼúva, upévare ndajaikuaái mbaʼérepa haʼekuéra heʼi térã ojapo raʼe algúna kósa. Upéicha jave ñañemboʼékena Jehovápe ha jajerure chupe tañanepytyvõ ñañemoĩ hag̃ua pe ermáno lugárpe. Upéva ñanepytyvõta ani hag̃ua ñapensa vai hese ha ñambohasa reínte hag̃ua la ojapo vaʼekue ñanderehe (Prov. 19:11). Ñanemanduʼákena Jehová ohechapaiteha umi mbaʼe jahasáva, ha katuete ñanemombaretéta ñaaguanta hag̃ua umi mbaʼe ijetuʼúva (Ecl. 5:8). w22.11 21 párr. 5

Eelehi ne amigorã umi ohayhúva Jehovápe. Eprogresa hag̃ua espirituálmente tekotevẽterei eelehi porã umi ne amigorã (Prov. 13:20). Julien, koʼág̃a haʼéva peteĩ ansiáno, omombeʼu: “Chemitãrusúpe aguereko heta amígo apredika rupi umi ermanokuérandi. Koʼã che amigokuéra ikyreʼỹeterei vaʼekue predikasiónpe, ha upéva chepytyvõ avyʼa hag̃ua avei predikasiónpe [ . . . ]. Upépe ahechakuaa ikatuha aguereko amígo teete ha chepytyvõtava ndahaʼéiramo jepe cheavegua hikuái”. ¿Mbaʼépa ejapo vaʼerã ehechakuaáramo ejeheʼaiterei rupi peteĩ oĩvandi kongregasiónpe ikatuha ombyai ne amista Jehovándi? Apóstol Pablo oikuaa porã vaʼekue yma pe kongregasiónpe jepe ikatuha oĩ umi noñekomportáiva peteĩ kristiánoicha. Upévare heʼi vaʼekue Timotéope oñemomombyry hag̃ua umichaguágui (2 Tim. 2:​20-22). Pe ñane amista jaguerekóva Jehovándi ningo iporãiterei. Upévare ñambaʼapo jejopy ñañemoag̃ui hag̃ua Jehováre ha ndajahejaséi avavete ombyai ñandehegui pe amista jarekóva hendive. w22.08 5, 6 párr. 13-15

Ñande ndajajoguaséi umi orrechasávape Jehová konsého. Upéva rangue ñaaprende javalora hag̃ua Jehová opensa lája ha umi ileikuéra. Ikatu ñamombaʼeve koʼã mbaʼe ñakomparávo umi mbaʼe jahupytýva ñaneñeʼẽrendúramo ha umi mbaʼe jahupytýva nañaneñeʼẽrendúiramo. Ikatu ñapensa por ehémplo mbaʼéichapa oiko koʼág̃arupi umi hénte nopenáiva umi konsého oúvare Jehovágui, haʼekueraite voi okausa provléma ijupe. Koʼág̃a ikatu ñapensami ñandejehe mbaʼeichaitépa jaiko porãve ñaneñeʼẽrendu rupi Jehovápe (Sal. 32:​8, 10). Jehová oofrese pe arandu oúva chugui enterovépe, péro haʼe ndoovligái avavépe oasepta hag̃ua ko arandu. Upéva rangue haʼe omombeʼu ñandéve mbaʼépa oikóta umi persóna orrechasávagui pe arandu añetegua (Prov. 1:​29-32). Haʼekuéra oaguantámante vaʼerã umi mbaʼe ohupytýva chupekuéra naiñeʼẽrendúi haguére Jehová konsehokuérape. Umichagua persóna ohasa asy, iprovléma heta ha amo ipahápe Jehová ohundíta chupekuéra. Péro umi iñeʼẽrendúva Jehovápe ha omoĩvape en práktika umi konsého oúva chugui, haʼe opromete chupekuéra: “Pe iñeʼẽrendúva chéve, oikóta pyʼaguapýpe, ndokyhyjemoʼãi ojehúramo g̃uarã chupe mbaʼeve ivaíva” (Prov. 1.33). w22.10 20, 21 párr. 11-13

Jarrespeta Jehovápe heʼise ndajajaposeiha umi mbaʼe haʼe ndoguerohorýiva (Prov. 16:6). Upévare ñañehaʼãmbaite ñamboyke umi mbaʼe vai ha jajapo entéro mbaʼe Jehová omandáva ñandéve, ha koʼã mbaʼe jatopa hína la Bíbliape (2 Cor. 7:1). Ñamboykéramo entéro mbaʼe Jehovápe ombojeguarúva ha jajapóramo iporãva, katuete javyʼáta (Sal. 37:27; 97:10; Rom. 12:9). Ikatu oime peteĩ persóna oikuaa Jehová orekoha pe autorida odesidi hag̃ua mbaʼépa oĩ porã ha mbaʼépa oĩ vai, péro avei iñeʼẽrendu vaʼerã Ñandejára mandamientokuérape (Rom. 12:2). Umi mbaʼe jajapóvare ojekuaáta jagueroviaha iporãveha ñakumpli umi mbaʼe Jehová omandáva (Prov. 12:28). David oguerovia vaʼekue upéva, upéicha rupi heʼi vaʼekue Jehovápe: “Nde reikuaauka chéve mbaʼe tapérupipa aguata vaʼerã ahupyty hag̃ua jeikove opaveʼỹva. Ne renondépe che aikóta vyʼápe opa árare, nde cheguereko rupi nde ykére” (Sal. 16:11). w22.10 8 párr. 9, 10

Jesús ningo siémpre iñumílde vaʼekue. Por ehémplo haʼe ou mboyve ko yvy ape ári ojapo vaʼekue hetaiterei mbaʼe Jehovápe g̃uarã ha rreálmente impresionánte entéro mbaʼe haʼe ojapo vaʼekue. La Biblia heʼi: “Ñandejára ojevale hese ojapo hag̃ua entéro mbaʼe oĩva yvágape ha yvy ape ári” (Col. 1:16). Ha Jesús ojevautisárõ guare, oiméne imanduʼa raʼe entéro koʼã mbaʼe haʼe ojapo vaʼekuére (Mat. 3:16; Juan 17:5). Péro upe haguére haʼe ndahaʼéi oúva ojekree ni ijejapo, síno ke haʼe siémpre iñumílde vaʼekue. Upévare haʼe heʼi: “Che ndajúi ótro cheservi hag̃ua, síno aservi hag̃ua ótrope. Aju ameʼẽ hag̃ua che rekove, ha péicha apaga pe rreskáte aguenohẽ hag̃ua heta héntepe pekádo poguýgui” (Mat. 20:28). Haʼe orrekonose vaʼekue avei ndaikatuiha ojapo mbaʼevete asy ijehegui reínte. ¡Ajépa iñumildete vaʼekue Jesús! Upéicha rupi oheja ñandéve peteĩ ehémplo iporãitereíva. w22.05 24 párr. 13

Oporoperdonáta jave Jehová ohecha pe pekadórpa oikuaa porã raʼe la ojapo vaʼekue oĩ vaiha. Jesús omyesakã upéva Lucas 12:​47, 48-pe. Peteĩ persóna ojapóva peteĩ mbaʼe vai oikuaa porãramo jepe Jehovápe ndogustaiha, ivaieterei hína la ipekádo. Ikatu voi Jehová odesidi noñeperdonamoʼãiha chupe upevakuére (Mar. 3:29; Juan 9:41). ¿Ikatúpa ñaneperdona péicha jave Jehová? Si ikatu. Ótra kósa Jehová ogueraháva avei enkuénta haʼe hína pe pekadórpa oñarrepenti ipyʼaite guive. Upéva heʼise okambiaiteha umi mbaʼe opensáva ha ojapóva. Heʼise pe persóna oñarrepenti ha ombyasyetereiha pe mbaʼe vai ojapo vaʼekue. Ha ndahaʼéi oñembyasýnteva umi mbaʼe vai ojapo vaʼekuére, síno ohechakuaa mbaʼépa la ogueraha vai vaʼekue chupe hoʼa hag̃ua pe pekádope. w22.06 5, 6 párr. 15-17

Ñane enemigokuéra omosarambi japu ikatu hag̃uáicha oheja vai umi ermáno orekóvape rresponsavilida Jehová organisasiónpe (Sal. 31:13). Algúno ermánope ojegueraha kárselpe ha ojeʼe guaʼu hesekuéra haʼeha kriminál. Umi kristiáno síglo primérope guare ombohovái vaʼekue avei peichagua situasión. Upérõ apóstol Páblope ojeakusa rei ha ojegueraha chupe kárselpe inhústamente. Apóstol Pablo oĩrõ guare préso Rómape oĩ vaʼekue unos kuánto kristiáno oheja reíva chupe (2 Tim. 1:​8, 15; 2:​8, 9). Oime vaʼerã Pablo oñeñandu vaieterei kuri. Haʼe oaguanta vaʼekue hetaiterei provléma ha oĩ voi kuri dispuésto omanóvo umi ermanokuéra rehehápe (Hech. 20:​18-21; 2 Cor. 1:8). Ñande núnka ndajajoguaséi umi oheja rei vaʼekuépe Páblope. Upéicharõ, nañanesorprendéi vaʼerã Satanás oatakaseha espesiálmente umi ermáno orekóvape rresponsavilida. Haʼe oipotaiterei koʼã ermáno oheja Jehovápe ha oipota ñande jakyhyje (1 Ped. 5:8). Upévare, esegíkena koʼã ermáno ykére ha eapoja chupekuéra (2 Tim. 1:​16-18). w22.11 16, 17 párr. 8-11

Posívlemente pe kriminál oñemosaingo vaʼekue Jesús ykére ha oñarrepentíva haʼe kuri judío. Umi judío ningo oadora vaʼekue peteĩ Dióspe añónte, péro umi ótro paispegua katu oadora heta ótro dióspe (Éx. 20:​2, 3; 1 Cor. 8:​5, 6). Upéicharõ pe kriminál ndahaʼéirire judío posívlemente pe pregúnta jatopáva pe téxto koestediaguápe péichata kuri: “¿Nde piko nderekyhyjéi mbaʼe umi diósgui?”. Ótra pruéva ohechaukáva ko kuimbaʼe haʼéne hague judío haʼe ke Jesúspe oñemondo vaʼekue oipytyvõ hag̃ua umi Israelguápente (Mat. 15:24). Avei Ñandejára heʼíma voi kuri umi israelítape haʼe omoingove jeytaha umi omanóvape, ha por lo vísto ko kuimbaʼe oikuaa kuri upéva. Haʼe oñemeʼẽne raʼe enkuénta Jehová omoingove jeytaha Jesúspe ogoverna hag̃ua Irréinope, ha oipota kuri Ñandejára omoingove jey chupe avei. Pe kriminál haʼe rupi judío, oiméne oikuaa kuri Jehová omoĩ hague Adán ha Évape peteĩ paraísope ko yvy ape ári. Upéicha rupi Jesús oñeʼẽrõ guare chupe pe paraísore oñemensionáva Lucas 23:​43-pe oiméne haʼe opensa kuri peteĩ hardín iporãitereíva oĩtavare ko yvy ape ári (Gén. 2:15). w22.12 8, 9 párr. 2, 3

Koʼág̃arupi Satanás oñorairõ hína ñane kóntrape ñandejokoségui ani hag̃ua japredika, upévare ikatu jaʼe ñande avei ikatuha japredika Ñandejára espíritu ñanepytyvõ rupi añoite (Apoc. 12:17). Satanás ipoderosoiterei, upévare haʼetévaicha ñande ndaikatumoʼãiva ñandepuʼaka hese, péro pe predikasión rupive en rrealida ñande ñagana hína chupe (Apoc. 12:​9-11). ¿Mbaʼérepa ikatu jaʼe upéva? Pórke Satanás ñaneamenasáramo jepe, japredika jave jahechauka hína ndajakyhyjeiha chugui. Ñande ñasẽ jave japredika, Satanás operde hína pe ñorairõ. Upéicharõ hesakã porãiterei ñandéve Jehová ñanemombareteha ijespíritu sánto rupive ha haʼe ñandeguerohoryha (Mat. 5:​10-12; 1 Ped. 4:14). Ñandejára espíritu ikatu omeʼẽ ñandéve pe fuérsa ñaikotevẽva ñambohovái hag̃ua oimehaichagua provléma jatopáva predikasiónpe (2 Cor. 4:​7-9). Upéicharõ, ¿mbaʼépa ikatu jajapo jajasegura hag̃ua jasegitaha jarresivi Ñandejára espíritu? Tekotevẽ ñañemboʼe kontinuadoite ha jajerovia Jehová ohendutaha ñane ñemboʼe. w22.11 5, 6 párr. 10, 11

Ñañehaʼãmbaitéramo jajogueraha porã ñane ermanokuérandi, jahechaukáta jahayhuha chupekuéra. Jajapo vaʼerã ikatúva guive ñaporoperdona hag̃ua Jehová ojapoháicha. Ñapensamíntena, Jehová opermiti Itaʼýra omano ñande pekadokuérare, ¿naiporãmoʼãipa upéicharõ pyaʼe voi ñaperdonáma ñane ermanokuérape ofalláramo ñanendive? Ajépa ndajajoguaseiete pe esklávo iñañaitévape Jesús oñeʼẽ hague peteĩ ehémplope. Upe esklávope ipatrón operdona kuri peteĩ kuénta tuichaitereíva, péro haʼe noperdonaséi ótro esklávope peteĩ kuénta michĩva (Mat. 18:​23-35). Upévare, oiméramo nde rejoavyʼimi peteĩ ermánondi, ¿ikatúpa rejapo álgo reiko porã jey hag̃ua hendive Konmemorasión mboyve? (Mat. 5:​23, 24). Ejapóramo upéva, ehechauka porãta ehayhuetereiha Jehovápe ha Jesúspe. w23.01 29 párr. 8, 9

Umi ansiáno oikuaa hag̃ua mbaʼépa oikotevẽ ermanokuéra, ikatu oporandu chupekuéra mbaʼetekópa oĩ hína hikuái (Prov. 20:5). ¿Orekopápa hikuái umi mbaʼe oikotevẽva káda día g̃uarã, por ehémplo hoʼu vaʼerã térã pohã? ¿Noiméipa opyta raʼe travahoʼỹre térã ndorekói moõpa ohóta? ¿Oikotevẽpa oñepytyvõ chupekuéra orresivi hag̃ua umi ajúda omeʼẽva pe goviérno? Jehová enterovetévape ojerure ñañopytyvõ ha ñañomokyreʼỹ hag̃ua (Gál. 6:10). Michĩmíramo jepe pe ikatúva jajapo, upéva ikatúma tuicha oipytyvõ umi ermanokuéra hasykatúvape. Por ehémplo umi mitã ojapokuaa peteĩ kartíta o peteĩ divúho peteĩ ermánope g̃uarã, umi mitãrusukuéra ikatu ojeofrese ojejokuái hag̃ua chupekuéra, ha oĩ umi ikatúva oprepara tembiʼu peteĩ hasykatúvape g̃uarã ha oheja chupe hógape. Avei ñanemanduʼa vaʼerã umi ansianokuéra oikotevẽha avei oñemokyreʼỹ chupekuéra. Upévare oĩ ermáno ojepokuaáva ojapo umi notaʼi oagradese hag̃ua la ojapóva umi ansiáno. Koʼýte omokyreʼỹ chupekuéra koʼã mbaʼe oĩ jave peteĩ mbaʼasy pyaʼeterei okorréva, pórke upéicha jave hetavéntema hembiapo hikuái. Upévare la Biblia omeʼẽ ñandéve ko konsého: “Pesegíkena peñomokyreʼỹ ha peñomombarete” (1 Tes. 5:11). w22.12 22 párr. 2; 23 párr. 5, 6

Umi saduséo oikuaa porãiterei vaʼekue la heʼíva umi 5 lívro oĩva iñepyrũrã Escrituras Hebréaspe, péro ndoaseptái vaʼekue hikuái peteĩ enseñánsa iñimportánteva oĩva Ñandejára Ñeʼẽme. Por ehémplo jahechamína mbaʼépa Jesús heʼi vaʼekue umi saduséo oporandúrõ guare chupe pe rresurreksiónre. Haʼe oporandu chupekuéra: “¿Napenemanduʼái piko Ñandejára heʼi vaʼekuére Moiséspe pe yvyramataʼi hatĩmbáva ypýpe? Ñandejára heʼi kuri: ‘Che hína Abrahán, Isaac ha Jacob Jára’” (Mar. 12:​18, 26). Umi saduséo oleémaramo jepe heta vése upe rreláto, la Jesús oporandu vaʼekue chupekuéra ohechauka haʼekuéra nontendeséi hague peteĩ enseñánsa iñimportánteva oĩva la Bíbliape: Pe rresurreksión (Luc. 20:38). ¿Mbaʼépa ikatu ñaaprende? Jalee jave peteĩ rreláto ñañatende porãse upe versíkulo heʼívare térã pe rreláto oĩvare la Bíbliape jaikuaa hag̃ua mbaʼépa ikatu ñaaprende chugui. Ndahaʼéi ñantendesénteva umi mbaʼe ndahasýiva, síno ñantendese umi enseñánsa ha konsého hypyʼũvéva oĩva pype. w23.02 11 párr. 9, 10

Entéro umi testígo oñemensionáva pe téxto koestediaguápe ohasa vaʼekue heta mbaʼe ijetuʼúva, péro osegi ifiél Jehovápe (Heb. 11:​36-40). ¿Ovalépa raʼe la péna pe aguánte ha jerovia haʼekuéra ohechauka vaʼekue? ¡Si ovale! Añetehápe haʼekuéra ndohechái vaʼekue umi promésa oñekumpli, péro siémpre ojerovia umívare ha Jehováre. Haʼekuéra oikuaa porãiterei vaʼekue Jehová oguerohoryha chupekuéra, upévare ojerovia hikuái ohechataha oñekumplívo umi promésa (Heb. 11:​4, 5). Ñapensa jave iñehemplokuérare ñanemokyreʼỹeterei jajerovia ha jareko hag̃ua esperánsa Jehováre. Ko múndo ningo ivaive ohóvo amás día (2 Tim. 3:13). Satanás siémpre omoĩ a pruéva Jehová siervokuérape. Toiko la oikóva, jasegíkena jaservi Jehovápe ñande pyʼaite guive, “pórke jareko esperánsa Ñandejára oikovévare” (1 Tim. 4:10). w22.06 25 párr. 17, 18

Ñande ningo ñañehaʼãmbaite ñaneresãi hag̃ua, pórke upéichamante ikatúta jaservi Jehovápe omeʼẽháicha ñande posivilida (Mar. 12:30). Upévare ñande jaevita umi mbaʼe jaikuaáva ikatuha ñanembohasy (Rom. 12:1). Añetehápe ikatu jajapo heta mbaʼe jasegi hag̃ua ñaneresãi, péro upéva ndoasegurái ñandéve nañanderasymoʼãiha. Péro lomímonte ñañehaʼãmbaite jakuida ñande salúre, jahechauka hag̃ua ñamombaʼetereiha pe rregálo porãite omeʼẽva ñandéve ñande Túa yvagapegua. Ñanderasykatu térã ñandeeda rupi ningo ikatu ndajajapokuaavéima heta mbaʼe yma guaréicha, ha upéva ikatu voi opoko ñanderehe ha ñanemoñeñandu vai. Péro ndahaʼéi upe haguére ñande nañañehaʼãmoʼãvéimava ñaneresãi hag̃ua. ¿Mbaʼérepa? Pórke ñanderasy térã ñandeedáramo jepe ikatu gueteri jaservi Jehovápe ojapo haguéicha rréi David. Ñanemokyreʼỹeterei jaikuaávo ñandevaliosoitereiha Jehovápe g̃uarã, jepénte ñanderasy térã ñandeedáma jahávo (Mat. 10:​29-31). Ha ñamanóramo jepe, Jehová ñanemoingoveseterei jeýta (Job 14:​14, 15). Upévare miéntra ke jasegi jaikove, jajapose opa ikatúva jasegi hag̃ua ñaneresãi ha péicha jakuida ñande rekovére. w23.02 20, 21 párr. 3-5

¿Osegítapa oĩ umi ótro ovechakuéra réra pe lívro de la vídape ohasa rire Armagedón? Si (Apoc. 7:14). Jesús heʼi vaʼekue koʼã persóna ojoguáva ovechápe ‘oikovetaha pára siémpre’ (Mat. 25:46). Péro umi ohasátava Armagedón ndahaʼemoʼãi upepete voi oñemeʼẽtava chupekuéra vída etérna. Jesús ogoverna aja umi 1.000 áño oñangarekóta hesekuéra ojapoháicha ‘peteĩ pastór, ha ogueraháta chupekuéra oĩháme yvu orekóvape y oporomoingovéva’. Umi osegíva Cristo gía ha amo ipahápe ojehusgávape ifielha Jehovápe, ojeskrivíta la herakuéra permanéntemente pe lívro de la vídape (Apoc. 7:​16, 17). Péro oĩ avei umi kavara oñehundítava Armagedónpe. Jesús heʼi vaʼekue hesekuéra ‘oñehunditaha opa ára g̃uarã’ (Mat. 25:46). Ha espíritu sánto rupive apóstol Pablo heʼi vaʼekue: “Ñande Ruvicha ohusgáta koʼãvape ha okastigáta chupekuéra ohundívo pára siémpre” (2 Tes. 1:9; 2 Ped. 2:9). w22.09 16 párr. 7, 8

Jehová kreasión oipytyvõkuaa entéro famíliape ojediverti ha oĩ hag̃ua trankílo, ha upéva ikatu ounive chupekuéra. Jehová ojapo vaʼekue umi lugár iporãitereíva ikatuhápe jajapo umi mbaʼe ñanembovyʼáva. Heta famíliape ogustaiterei ohasa tiémpo oñondive umi kámpore, umi arrójore téra umi sérrore. Pe múndo pyahúpe, umi tuakuéra ha ifamília odisfrutáta Jehová kreasión arakaʼeve ojapoʼỹ haguéicha. Ndajaikomoʼãi jakyhyje umi animalkuéragui, ni umi animál ndokyhyjemoʼãi ñandehegui (Is. 11:​6-9). Upépe hembypáta ñandéve la tiémpo jadisfruta hag̃ua opa mbaʼe Jehová ojapo vaʼekuégui (Sal. 22:26). Péro peẽ tuakuéra natekotevẽi pehaʼarõ og̃uahẽ raẽ pe múndo pyahu pemboʼe hag̃ua pene famíliape pe kreasión rupive. Koʼág̃a guive ikatúma pejevale pe kreasiónre pene família oikuaave hag̃ua Jehovápe. Péicha haʼekuéra heʼíta avei rréi David heʼi haguéicha: “Jehová ndaipóri ótro Dios ndeichagua, la nde rejapo vaʼekue iporãiterei, ndaikatúi ñakompara mbaʼevére” (Sal. 86:8). w23.03 25 párr. 16, 17