Octubre

Enterovéva ningo ikatu japartisipa ñane rreunionkuérape japurahéivo oñondive, ha avei ñameʼẽvo umi komentário japrepara porã vaʼekue. Péro algúnope g̃uarã ijetuʼu lénto hína opurahéi hag̃ua oĩ jave ohendúva chupekuéra, térã okomenta hag̃ua rreunionhápe. ¿Ndévepa ijetuʼu avei? Oiméramo upéicha, ehechamína mbaʼe mbaʼépa ojapo raʼe ñane ermanokuéra oñeñandu vaʼekue avei upéicha osupera hag̃ua koʼã mbaʼe. Algúnope ningo oipytyvõ opurahéi ipyʼaite guive. ¿Mbaʼérepa ñande japurahéi umi kántiko? Ñande jajapo upéva ñamombaʼeguasu hag̃ua Jehovápe. Upéicharõ ñande rógape voi jajeprepara vaʼerã japurahéi hag̃ua umi kántiko, japreparaháicha entéro umi ótra párte orekóva pe rreunión. Ha ñañehaʼãmbaite avei ñantende mbaʼéichapa la létra orekóva umi kántiko ojogueraha pe téma oñeanalisátavare upe rreuniónpe. Avei ñañekonsentrave vaʼerã pe kántikore, ha ndahaʼéi la ñandepu lájare. Heta ermáno ha ermánape oforsaiterei anga okomenta. ¿Mbaʼépa ñanepytyvõta? Ñakomenta pyʼỹi rreunionhápe. Ñanemanduʼa vaʼerã ñane komentário isensíllo ha mbykymínteramo jepe oĩ porãitereimaha. Jehová omombaʼeterei ohechávo jadesidiha ñamombaʼeguasutaha chupe upéicha rreunionhápe. w22.04 7, 8 párr. 12-15

Algúno diksionário bíblico heʼi pe palávra “chepytyvõ” heʼiseha peteĩ persóna odiparáva oipytyvõ hag̃ua peteĩ ojerurévape hína ajúda. Koʼág̃a epensami Jehová odiparaha ohóvo oipytyvõ hag̃ua peteĩ persóna ohasávape hína peteĩ situasión ijetuʼúva. Añetehápe kóva ohechauka porã Jehová ipyʼaite guive ñanepytyvõseha. Upéicha jareko rupi Jehovápe ñande ykére, ikatúta ñaaguanta vyʼápe ñane provlemakuéra. ¿Mbaʼéichapa Jehová ñanepytyvõ? Lívro de Isaíaspe jatopa la rrespuésta. ¿Mbaʼérepa jaʼe upéva? Pórke heta umi profesía Isaías oskrivi vaʼekue Jehová espíritu rupive, ideprovechoiterei ñandéve koʼág̃arupi. Avei heta vése Isaías oipuru umi palávra ndahasýiva ñantende hag̃ua oñeʼẽ hag̃ua Jehováre. Por ehémplo pe kapítulo 30-pe oipuru umi ehémplo iporãitereíva oñeʼẽ hag̃ua mbaʼéichapa Jehová oipytyvõ isiervokuérape. Upépe heʼi: 1) Jehová ohendu ha ombohovaiha ñane ñemboʼe, 2) ñandegiaha, ha 3) ñanevendesitaha koʼág̃a ha amo gotyove. w22.11 8 párr. 2, 3

Jesús heʼi vaʼekue umi kongregasión de Esmirna ha Filadélfiape ani hag̃ua okyhyje oĩramo g̃uarã oñemoĩva hesekuéra, pórke Jehová katuete opremiáta chupekuéra osegíramo ifiél (Apoc. 3:10). Ikatu avei oĩ ñandepersegíva, péro ñande ñaĩ vaʼerã dispuésto ñaaguantávo upéva (Mat. 24:​9, 13; 2 Cor. 12:10). Lívro de Apocalipsis ñandeavisa porã voi ko tiémpope oĩtaha umi opersegíva Ñandejára puévlope (Apoc. 1:10). Apocalipsis kapítulo 12-pe por ehémplo oñemombeʼu Ñandejára Rréino oñepyrũrõ guare ogoverna yvágape, oñepyrũ hague upépe peteĩ gérra. Miguel ha hiʼanhelkuéra oñorairõ Satanás ha umi demoniokuéra kóntrape (Apoc. 12:​7, 8). Péro Satanás umíva operde ha upéicha rupi oñemosẽ chupekuéra yvágagui ha ou hikuái ko yvy ape ári ombosufri la héntepe (Apoc. 12:​9, 12). w22.05 5 párr. 12, 13

Jehová oporohusga jave siémpre ohechauka ihustoha ha avei ndoladeaiha avavépe. Upévare haʼe oporoperdona jave ndoguerahái enkuénta ipláta hetápa, ojekuaápa chupe térã ivalépa heta mbaʼépe (1 Sam. 16:7; Sant. 2:​1-4). Ndaipóri ikatúva ojopy térã okoimea Jehovápe oporoperdona hag̃ua. Haʼe ndoguerahái avei enkuénta umi mbaʼe oñandúvante oporohusgáta jave (Éx. 34:7). Añetehápe Jehová ontende ha oikuaa porãiterei rupi entéro mbaʼe, ikatu jaʼe hese haʼeha pe Hués Ijojahaʼỹva (Deut. 32:4). Umi oskrivi vaʼekue umi Escrituras Hebreas orrekonose Jehová perdón ndaijojahaiha. Haʼekuéra heta vése oipuru peteĩ palávra hebrea oñeʼẽ hag̃ua upévare. Peteĩ óvra de rreferénsia bíblica heʼi voi: “Haʼekuéra oipuru ko palávra espesiálmente oñeʼẽ hag̃ua pe perdón Ñandejára ohechaukávare umi pekadórpe, ha núnka ndoipurúi ko palávra oñeʼẽ hag̃ua pe perdón ohechaukávare peteĩ persóna ótro hapichápe”. Añetehápe Jehová añoiténte oreko pe podér operdonaite hag̃ua peteĩ pekadór oñarrepentívape. w22.06 4, 5 párr. 10, 11

Oiméramo nde remongakuaa hína neaño ne membykuérape térã ne ména ndahaʼéi Testígo, ikatu reime segúra ne ehémplo omombarete ha omokyreʼỹetereiha umi ndekuaávape guive. ¿Mbaʼépa ikatu rejapo haʼetéramo ndéve ndopokoiha ne membykuérare umi mbaʼe remboʼéva chupekuéra? Nemanduʼákena tekotevẽtanteha voi ohasa heta tiémpo emongakuaa porã hag̃ua ne membýpe. Por ehémplo, reñotỹramo peteĩ semílla ikatu hína ndereikuaái heñóitapa hína upéva, ha ehaʼarõmante vaʼerã okakuaa raẽ oñepyrũ hag̃ua hiʼa. Nde ndaikatúiramo jepe emongakuaa pe plánta, esegímante vaʼerã errega ikatu hag̃uáicha okakuaa (Mar. 4:​26-29). Upéicha avei ikatu hína heta vése eikuaase oimépa og̃uahẽ hína ne membykuéra korasõme umi mbaʼe emboʼéva chupekuéra. En rrealida ndaikatúiramo jepe eovliga chupekuéra oasepta hag̃ua umíva, si ikatu hína ejapo la oĩva entéro nde posivilidápe emboʼe porã hag̃ua chupekuéra. Péicha haʼetéta hína erregáva pe semílla, ha emeʼẽta ne membykuérape peteĩ oportunida iporãitereíva oñemoag̃ui hag̃ua Jehováre. w22.04 19, 20 párr. 16, 17

Salomón oadorárõ guare Jehovápe haʼe iñumílde vaʼekue. Por ehémplo, imitãme haʼe orrekonose vaʼekue Jehová añoite ikatutaha ogia porã chupe (1 Rey. 3:​7-9). Ha oñepyrũ ramóme ogoverna, Salomón orrekonose vaʼekue ipeligrosoitereiha ñandeorgullóso. Péro tiémpo rire, ni Salomón ndosegivéi ko konsého haʼe voi omeʼẽ vaʼekue. Upévare haʼe ou vaʼekue ijorgullóso ha ndosegivéi umi léi porãite Jehová oheja vaʼekue. Por ehémplo peteĩva umi léi heʼi vaʼekue: “Pe rréi nomendái vaʼerã heta kuñáre ani hag̃ua ikorasõ oñemomombyry Ñandejáragui” (Deut. 17:17). Péro Salomón nopenái vaʼekue ko léire, pórke haʼe oreko jepe vaʼekue 700 tembireko ha 300 konkuvína (1 Rey. 11:​1-3). Salomón oiméne opensa raʼe upéva ndoperhudikamoʼãiha chupe. Péro upéi ohechakuaa odesidi vaieterei hague, pórke oñemomombyry Jehovágui ha oike heta akãrasýpe (1 Rey. 11:​9-13). w22.05 23 párr. 12

Ñandejára Jehová oguereko la derécho ogoverna hag̃ua ko univérso. Péro pe ikontrário iñañaitéva Satanás katu oñemoĩ mbarete hese. Upévare si o si káda únomante jadesidi vaʼerã mávapepa jaapojáta, ndaikatúi japytánte mbytépe. Ha upéva iñimportanteterei, pórke ñande futúro odepende hína upe jadesidívare (Mat. 25:​31-33, 46). La Biblia ohechauka porã ñandéve pe jehasa asy guasu aja, ojehusgataha enterovépe ojekuaa hag̃ua mávapa ojesalváta ha mávapa oñehundíta (Apoc. 7:14; 14:​9-11; Ezeq. 9:​4, 6). Oiméramo nde edesidíma eapojataha Jehová goviérno, upéicharõ rreálmente edesidi porãiterei. Ha katuete eipytyvõse avei ótrope ojapo hag̃ua upéva. Heta vendisión ohupytýta entéro umi ifiélvape chupe, ha iporãta jastudia umíva. Upéva ñanepytyvõta ikatu hag̃uáicha jajedesidi ndajahejamoʼãiha Jehovápe. Ha avei ikatu jaipuru umi mbaʼe ñaaprendéva ñaipytyvõ hag̃ua ótrope odesidi porã hag̃ua ha ifiél hag̃ua Jehovápe. w22.05 15 párr. 1, 2

Ñande ningo siémpre ñahenduse Jehovápe, ndahaʼéi umi ñane enemígope, Job ojapo haguéicha. Haʼe oñatende porã vaʼekue Jehová oñeʼẽrõ guare chupe. Jehová omopensa porã hag̃ua Jóbpe, haʼete ku heʼíva chupe: “¿Epensa piko che ndaikatumoʼãiha añangareko nderehe?”. Jehová ivuenoiterei ha iñumílde haguére, Job heʼi chupe: “Chéngo yma ahendúnte vaʼekue ndehegui, péro koʼág̃a ikatúma haʼe rohechamaha” (Job 42:5). Job heʼírõ guare koʼã mbaʼe, amalisia haʼe oguapýiti kuri pe tanimbúpe ha hasykatu. Upe situasiónpe jepe, Jehová oasegura ohayhu ha oguerohoryha Jóbpe (Job 42:​7, 8). Koʼág̃arupi umi hénte ikatu ñandetrata vai térã ñandeapoʼi. Ikatu voi oime omongyʼase ñande réra térã Jehová organisasión heʼívo heta japu ñanderehe. Job ehémplo ñanemboʼe Jehová ojeroviaha ñanderehe jasegitaha ñandefiél chupe jahasáramo jepe heta mbaʼe ijetuʼúva. w22.06 23, 24 párr. 15, 16

¡Yvágape ojevyʼaitereíta ág̃a oñehundi vove Babilonia Guasu! Péro upe rire oikóta álgo iporãitereivéntemava (Apoc. 19:​1-3). ¿Mbaʼépa upéva? Lívro de Apocalipsis omombeʼu ñandéve pe Ovecha Raʼy omendataha. Entéro umi 144.000 ningo oĩtama yvágape oñepyrũ mboyvemi pe gérra de Armagedón. Péro upe tiémpope ndoikomoʼãiti péva pe kasamiénto (Apoc. 21:​1, 2). Upéicharõ, ¿arakaʼépa la oikóta? Pe Ovecha Raʼy ningo omendáta opa rire ae pe gérra de Armagedón ha oñehundi riréma entéro umi Ñandejára kontrariokuérape (Sal. 45:​3, 4, 13-17). ¿Mbaʼépa orrepresenta pe Ovecha Raʼy kasamiénto? Vuéno, peteĩ kuimbaʼe ha kuña ningo omenda vove oñekompromete oĩtaha oñondive pára siémpre. Upéicha avei kóva ko kasamiénto heʼise hína pe rréi Jesucristo ha umi 144.000 oĩtaha oñondive. Upéicha rupi oñekompara voi umi unhídope inóviare. Pe kasamiénto omoñepyrũta hína peteĩ goviérno pyahu ogovernátava ko yvy ape ári 1.000 áñore (Apoc. 20:6). w22.05 17 párr. 11-13

Jesús oprofetisa vaʼekue koʼã ára pahápe onombrataha peteĩ “esklávo de konfiánsa ha iñarandúva” ikatu hag̃uáicha omeʼẽ ñandéve umi instruksión oúva Ñandejára Ñeʼẽgui (Mat. 24:45). Jesús ojevale vaʼekue peteĩ grúpo michĩvare de unhído omeʼẽ hag̃ua Ñandejára puévlope ha umi oaprendesévape chugui “aliménto hiʼoraitépe”. Péro koʼã kuimbaʼe nomandái ñande jeroviáre (2 Cor. 1:24). Upéva rangue, haʼekuéra orrekonose Jesús haʼeha ñande “líder ha governánte” (Is. 55:4). Áño 1919 guive pe esklávo de konfiánsa oguenohẽ heta puvlikasión ikatu hag̃uáicha umi hénte oreko pe primera oportunida oaprende hag̃ua umi enseñánsa oĩva la Bíbliape. Áño 1921-pe, pe esklávo oguenohẽ pe lívro El Arpa de Dios ikatu hag̃uáicha oñepytyvõ umi persónape oaprende hag̃ua umi enseñánsa iñimportantevéva oĩva la Bíbliape. Ohasávo pe tiémpo, oñeguenohẽ ohóvo hetave puvlikasión. Ha nde kásope, ¿mbaʼe puvlikasiónpa nepytyvõ vaʼekue reikuaa ha rehayhu hag̃ua Jehovápe? w22.07 10 párr. 9, 10

Ndaipóri voi ningo ótra persóna Jehováicha ipojeráva. Tahaʼe haʼéva la ñande ñameʼẽva chupe, haʼe siémpre hetave jey omyengoviáta ñandéve (Mar. 10:​29, 30). Ko múndo aña oñehundi potaitémavape jepe, haʼe omeʼẽta ñandéve heta mbaʼe ijojahaʼỹva, iporãitereíva ha ñanembovyʼátava. Ha péva koʼág̃a ñepyrũrãnte hína. Nde ikatu voi reservi pára siémpre nde Túa rehayhuetévape. Amás día pe mborayhu peñandúva ojuehe nde ha Jehová imbaretevéta. Ha Jehováicha, reikove pukúta para siémpre. Nde redesidívo emeʼẽ nde rekove Jehovápe ha rejevautisa, ereko la priviléhio emeʼẽvo nde Túape peteĩ mbaʼe ivaliosoitereíva. Haʼe ningo omeʼẽ vaʼekue ndéve entéro mbaʼe porã ha redisfruta umívagui. Ha nde ikatu rerregala peteĩ mbaʼe ndoguerekóiva ko yvy ha yvága Járape: Reservi chupe fiélmente toiko la oikóva (Job 1:8; 41:11; Prov. 27:11). Ndaipóri voi ótra kósa iporãvéva ikatúva rejapo nde rekovépe. w23.03 6 párr. 16, 17

Nemitãrusu aja ningo pe deséo sexuál imbareteve, ha ikatu hína ótro nemboliga nderekovai hag̃ua. Ha Satanás oipota voi rejapo upéva. ¿Mbaʼépa nepytyvõta siémpre nderekopotĩ hag̃ua? (1 Tes. 4:​3, 4). Eñemboʼe jave neañoháme, emombeʼupaite Jehovápe umi mbaʼe reñandúva ha ejerure chupe nemombarete hag̃ua (Mat. 6:13). Nemanduʼákena Jehová nepytyvõsetereiha ha ndahaʼeiha nekondenaséva (Sal. 103:​13, 14). Aníkena ndénte esolusionase pe provléma reguerekóva. Eñeʼẽkena nde tuakuérandi, jepe ijetuʼu ndéve eñemongeta hag̃ua koʼã témare. Péro iñimportánte hína rejapo upéva. Elee rupi la Biblia ha ejepyʼamongeta umi konsého oĩvare pype, nepytyvõta redesidi hag̃ua Jehová oipotaháicha. Rehechakuaáta hína natekotevẽiha reguereko peteĩ rrégla káda situasiónpe g̃uarã. Upéva rangue rejegiáta umi konsého oĩvare la Bíbliape ha upéva nepytyvõta ehechakuaa hag̃ua mbaʼépa Jehová opensa peteĩ mbaʼére. w22.08 5 párr. 10-12

Peteĩ ermáno omoakãva hogapy ojagarra ensério pe rresponsavilida orekóva omantenévo ifamíliape. Oiméramo nde remoakã hína ne famíliape ikatu oime ejepyʼapy ekonsegi hag̃ua hoʼumi vaʼerã ne familiakuéra ha epaga hag̃ua nde alkilér térã emeʼẽ hag̃ua chupekuéra peteĩ lugár oikomi hag̃ua. Avei oiméne ekyhyje eñemosẽrõ g̃uarã nde travahohágui ha nderetopavéi ótro hekoviarã. Térã ikatu oime epensa ndaikatumoʼãiha eiko saʼive plátare. Satanás oipurúma koʼã mbaʼe omongyhyje hag̃ua heta ermánope ha péicha oheja hag̃ua Jehovápe. Satanás ningo oñehaʼãmbaite ogueroviaka ñandéve Jehová nañanderayhuiha ha haʼe nañanepytyvõmoʼãiha ñamantene hag̃ua ñane famíliape. Ha upévare ikatu jaju ñapensa jajapo vaʼerãha oimeraẽ mbaʼe ani hag̃ua japerde ñande traváho, ha ikatu voi jajapo umi mbaʼe ombyaítava ñane amista Jehovándi. w22.06 15 párr. 5, 6

Jaikuaa ningo Jehová haʼeha peteĩ Dios “oporoporiahuverekóva ha oporombyasýva, ndaipochyreíriva, oporohayhuetereíva ha nopyrũiva iñeʼẽre” (Éx. 34:6). Jehová ohayhu pe hustísia (Is. 61:8). Chupe hasyeterei voi ohechávo mbaʼéichapa jahasa asy ha oipotaitereíma og̃uahẽ pe tiémpo oipeʼatahápe entéro mbaʼe ñanembohasa asýva (Jer. 29:11). Ñandéve hiʼãitereíma avei og̃uahẽ upe tiémpo. ¡Ndareíri la jahayhuete Jehovápe! ¿Mbaʼérepa javalora pe añetegua? Pe añetegua ningo ñanevenefisia. Jahechamína peteĩ ehémplo. Ñañeʼẽvo pe añeteguáre ñañeʼẽ avei pe esperánsa jarekóvare amo gotyove g̃uarã. Peteĩ ánkla oipytyvõháicha peteĩ várkope ani hag̃ua okacha vaipa, péicha ñane esperánsa ñanepytyvõta ani hag̃ua umi ñane provlemakuéra ñanembokacha vaipa. Pe téxto koestediaguápe Pablo oñeʼẽ pe esperánsa oguerekóvare umi unhído. Upéicharõ jepe, la Pablo heʼi vaʼekue ikatu oipytyvõ avei umi kristiáno oguerekóvape pe esperánsa oikóvo pára siémpre ko yvy ápe ári (Juan 3:16). Añetehápe, jaikuaávo jaguerekoha pe esperánsa jaikotaha pára siémpre omeʼẽ sentído ñande rekovépe. w22.08 14, 15 párr. 3-5

Pe mborayhu ningo ñanepytyvõ ñakonfia hag̃ua ojuehe. 1 Corintios kapítulo 13-pe jatopa umi mbaʼe porã oúva pe mborayhúgui, ñanepytyvõtava jahayhu ha ñakonfia hag̃ua ñane ermanokuérare, térã ñakonfia jey hag̃ua hesekuéra (1 Cor. 13:​4-8). Por ehémplo pe versíkulo 4-pe heʼi ‘pe oporohayhúva ipasiénsia ha imbaʼeporãha’. Jehová ningo ipasiensiaite ñanderehe, jepe heta vése jajavy. Upéicharõ ñande avei ikatu jahechauka ñanepasiensiaha Jehováicha ñambohasa rei jave oĩramo peteĩ ñane ermáno heʼi térã ojapóva peteĩ mbaʼe ñanemoñeñandu vaietereíva. Pe versíkulo 5-pe heʼi avei ‘pe oporohayhúva ndaipochyreíri ha ndaipyʼaroiha’. Ñande ndajaikoséi ñanemanduʼa umi mbaʼe vai ojejapo vaʼekuére ñanderehe ha upéi jaipuru umíva japorohovaʼapi hag̃ua. Eclesiastés 7:9 heʼi voi ‘ani hag̃ua pyaʼeterei ñandepochy’. Ñande jahecha vaʼerã ñane ermanokuérape Jehová ohechaháicha. Jehová ningo ohayhu chupekuéra ha ndahaʼéi ku oikóva oheka moõpa ojavy hikuái, ha ñande avei jasegise Jehová ehémplo (Sal. 130:3). Ñande ndajaikói jajesareko umi ñane ermáno defektokuérare, síno umi kualida porã haʼekuéra oguerekóvare (Mat. 7:​1-5). w22.09 4, 5 párr. 6, 7

Pe lívro de Daniélpe jatopa umi mbaʼe ndaijojaháiva oikótava umi ára pahápe. Por ehémplo, Daniel 12:1 omombeʼu Miguel, haʼéva hína Jesucristo, ‘opuʼãtaha oñemboʼy oipytyvõ hag̃ua Ñandejára puévlope’. Ko profesía oñepyrũ kuri oñekumpli áño 1914-pe oñemoĩrõ guare Jesúspe rréiramo Ñandejára Rréinope. Avei Daniélpe ojeʼe Jesús ‘opuʼãtaha oñemboʼy peteĩ tiémpo ojeiko asytahápe, núnka ndoikóiva péicha oexisti guive umi nasión’. Ko “tiémpo ojeiko asytahápe” haʼe hína pe “jehasa asy guasu” oñemensionáva Mateo 24:​21-pe. Jesús ningo opuʼãta oñemboʼy odefende hag̃ua Ñandejára puévlope opakuévo pe tiémpo ojeiko asytahápe térã Armagedónpe. Lívro de Apocalípsispe oñehenói koʼãvape peteĩ aty guasu “osẽva pe jehasa asy guasúgui” (Apoc. 7:​9, 14). w22.09 21 párr. 4, 5

Umi persóna orekómava héra pe lívro de la vídape ikatu hína ojevorra upégui, upéva haʼete voi Jehová oñepyrũ vaʼekue oskrivi lápipe umi téra (Apoc. 3:5). Ñande ningo jajasegura vaʼerã ñande réra osegi hag̃ua upe lívrope ág̃a ojeskrivi peve tínta permanéntepe. Oĩ hína pe grúpo ojeporavo vaʼekue oho hag̃ua ogoverna Jesús ndive yvágape, herakuéra ojeskrivíma pe lívro de la vídape. Apóstol Pablo oskrivírõ guare umi omoirũvape chupe Filípospe, heʼíma vaʼekue ojeskrivíma hague pe lívro de la vídape umi unhído réra, umi ojeporavo vaʼekue ogoverna hag̃ua Jesús ndive (Filip. 4:3). Péro ani hag̃ua ojevorra herakuéra upe lívrogui, haʼekuéra osegi vaʼerã ifiél Jehovápe. Ha orresivi vove hikuái pe séllo finál, tahaʼe jepe raʼe omano mboyve térã oñepyrũ mboyve pe jehasa asy guasu, la herakuéra ojeskrivítama permanéntemente ko lívrope (Apoc. 7:3). w22.09 14 párr. 3; 15 párr. 5, 6

Ñamoĩ chupe álgien okosinaha ndéve g̃uarã peteĩ tembiʼu ndegustaitereíva, péro heʼupáma rupi nde óra térã rejedistrae rupi epensávo ótra kósare, pyaʼeterei ekaru ha nderedisfrutái. Upéi embyasy nderekarúi haguére mbeguemínte ikatu hag̃uáicha redisfruta pe tembiʼu ndegustaitéva. ¿Oikómapa nderehe avei upéva relee jave la Biblia? Relee rupi pyaʼe pyaʼénte ndaikatúi redisfruta umi mbaʼe Jehová nemboʼeséva. Upévare eñemotiémpokena relee hag̃ua Ñandejára Ñeʼẽ, eñeimahina umi mbaʼe eleéva rehendurõguáicha voi umi oñeʼẽvape ha eñehaʼãmbaite ejepyʼamongeta umi mbaʼe eleévare. Rejapóramo entéro koʼã mbaʼe katuete revyʼaitereíta. Jesús onkarga vaʼekue ‘pe esklávo de konfiánsa ha iñarandúvape’ omeʼẽ hag̃ua ñandéve aliménto espirituál hiʼoraitépe. Upévare ikatu jaʼe oñeñangareko porãitereiha ñanderehe espirituálmente (Mat. 24:45). La Biblia haʼe pe ingrediénte prinsipál oipurúva pe esklávo de konfiánsa oprepara hag̃ua umi informasión bíblica (1 Tes. 2:13). w22.10 7, 8 párr. 6-8

La Biblia heʼi vaʼekue voi umi ára pahápe hetataha umi oñembohorýva hapicháre (2 Ped. 3:​3, 4). Umi oñembohorýva hapicháre ‘ojapo umi mbaʼe vai chupekuéra ogustávante’ (Jud. 7, 17, 18). ¿Mbaʼépa ikatu jajapo ani hag̃ua oiko ñandehegui peteĩ oñembohorýva hapicháre? Ani jajeheʼa umi ojekehávare opa mbaʼégui (Sal. 1:1). Upéva heʼise nañahendúi ni ndajaleéi vaʼerãha umi mbaʼe oúva umi apóstatagui. Jajedeskuidáramo ikatu ñaimoʼãʼỹre jakritikáma umi mbaʼe ojejapóva Jehová organisasiónpe. Ñañatende vaʼerã ani hag̃ua jaju mbeguekatúpe jajekeha opa mbaʼégui, ha upéicha jadudáma Jehovágui ha umi instruksión omeʼẽvagui ñandéve iñorganisasión rupive. Ani hag̃ua oiko ñanderehe upéva, iporãta ñañeporandu: “¿Chépa ajepokuaa ajekeha oĩ jave peteĩ entendimiénto pyahu, térã jarresivi jave peteĩ instruksión pyahu? ¿Ahekápa defékto umi omoakãvare kongregasión?”. Ñañehaʼãramo pyaʼemi jaipeʼa ñandejehegui koʼãichagua lája, Jehová ovyʼaitereíta ñandereheve (Prov. 3:​34, 35). w22.10 20 párr. 9, 10

Ñandejára espíritu omombarete vaʼekue Ezequiélpe opredika hag̃ua umi hénte oĩvape iterritóriope, jepe haʼekuéra “ikaprichóso ha ndojaposéi la ojeʼéva chupekuéra” (Ezeq. 3:7). Jehová heʼi vaʼekue Ezequiélpe: “Che romombaretéta ikatu hag̃uáicha ndedesidído haʼekuéra ikaprichosoháicha, ha rombohovaʼatãta haʼekuéra hovaʼatãháicha. Rombohovaʼatãta peteĩ diamánteicha, nderovaʼatãvéta itágui. Ani rekyhyje ni reñemondýi chuguikuéra” (Ezeq. 3:​8, 9). Haʼete voi Jehová heʼi vaʼekue Ezequiélpe: “Ani reheja umi hénte kaprichóso nedesanima. Che romombaretéta”. Upéi Ñandejára espíritu ogueraha Ezequiélpe pe território opredikátavape. Haʼe oskrivi vaʼekue: “Añandu Jehová podér ombaʼapo pohyiha cherehe”. Una semána haguépe haʼe ontende porã pe mensáhe ikatu hag̃uáicha oĩ segúro la opredikátavare (Ezeq. 3:​14, 15). Upéi Jehová heʼi chupe oho hag̃ua peteĩ ñu guasúpe ha upépe ‘Ñandejára espíritu oike ipype’ (Ezeq. 3:​23, 24). Upérõ Ezequiel oĩma kuri preparádo oñepyrũ hag̃ua opredika. w22.11 4, 5 párr. 8, 9

Proféta Habacuc ombohovái vaʼekue heta provléma. Peteĩ vuéltape haʼe amalisia ou vaʼekue oduda Jehová oñangarekoha hese. Upémarõ omombeʼupaite Jehovápe umi mbaʼe oñandúva. Jehová orresponde ko ñemboʼe ojapo vaʼekue chupe ipyʼaite guive ko isiérvo ifieletéva (Hab. 2:​2, 3). Habacuc ojepyʼamongeta rire mbaʼéichapa Jehová osalva vaʼekue ipuévlope, ou vaʼekue ovyʼa jey. Haʼe oĩma segúro Jehová okuida ha oñeinteresaha hese, ha oipytyvõtaha chupe oaguanta hag̃ua oimeraẽ pruéva (Hab. 3:​17-19). ¿Mbaʼépa ikatu ñaaprende? Ñambohovái jave umi provléma, ñañemboʼe vaʼerã Jehovápe ha ñamombeʼupaite chupe mbaʼéichapa ñañeñandu. Upéi ñañehaʼã jahechakuaa mbaʼéichapa haʼe ñanepytyvõ. Jajapóramo koʼã mbaʼe ni michĩmi ndajadudamoʼãi Jehová omeʼẽtaha ñandéve pe fuérsa ñaikotevẽva ñaaguanta hag̃ua. Ha jahecha jave mbaʼéichapa haʼe ñanepytyvõ, ñande jerovia imbareteve. Ñañehaʼãramo jajapo meme umi mbaʼe omombaretétava ñande jerovia, ndajahejamoʼãi umi situasión ijetuʼúva térã umi dúda ñanemomombyry Jehovágui (1 Tim. 6:​6-8). w22.11 15 párr. 6, 7

Jesús ha umi mokõi kriminál ningo hetaiterei osufri kuri omano mboyve (Luc. 23:​32, 33). Ha oĩrõ guare hikuái pe yvyráre, umi kriminál oñepyrũ oñembohory hese (Mat. 27:44; Mar. 15:32). Péro peteĩva okambia ha heʼi voi Jesúspe: “Jesús, nemanduʼákena cherehe reike vove ne Rréinope”. ¿Mbaʼépa orresponde chupe Jesús? Haʼe heʼi chupe pe jatopáva pe téxto koestediaguápe (Luc. 23:​39-42). Umi mbaʼe Jesús heʼi vaʼekue pe kriminálpe ñanepytyvõ ñapensa hag̃ua mbaʼéichapa jaikóta pe paraísope. Ikatu avei ñaaprende pe paraísogui ñapensáramo mbaʼéichapa ojeiko vaʼekue pyʼaguapýpe rréi Salomón ogovernárõ guare. Ha la Biblia omombeʼu ñandéve Jesús tuichaveha Salomóngui. Upévare ikatu ñaime segúro Jesús ha umi unhído ojapotaha ko yvýgui peteĩ paraíso, jaikotahápe trankílo porã ha iporãitereitantemaha (Mat. 12:42). Upéicharõ jepe, umi “ótro ovechakuéra” ojapo vaʼerã álgo ikatu hag̃uáicha Jehová opermiti chupekuéra oĩ pe múndo pyahúpe (Juan 10:16). w22.12 8 párr. 1; 9 párr. 4

Isaías ohechauka Jehová ojapysaka porãha ñane orasión rehe ha pyaʼe voi okontestaha umíva. Isaías heʼi: “Haʼe okontestáta ndéve ohendumírente voi la eréva”. Koʼã ñeʼẽ iporãitéva ñanemomanduʼa ñande Túa Jehová ndahaʼeiha oipytyvõtanteva umi ojerurévape chupe ajúda, síno ke haʼe ojaposetereiha voi upéva. ¡Ajépa katuete vyʼápe ñaaguantáta oimeraẽ mbaʼe jaikuaa rupi upéva! Jehová ohendu umi orasión káda uno jajapóva chupe. ¿Mbaʼérepa jaʼe upéva? Pe primera párte pe kapítulo 30 de Isaíaspe Jehová oipuru pe palávra “peẽ” pórke oñeʼẽ pe ipuévlo kompletoitére, péro pe versíkulo 19-pe oipuru pe palávra “nde” pórke oñeʼẽ hína peteĩteĩ umi isiervokuérape. Isaías heʼi: “Nde nanerasẽmoʼãvéima. Nde Jára katuete ohendúta rejerure asy jave chupe nepytyvõmi hag̃ua. Haʼe okontestáta ndéve”. Jehová ningo ñanderayhueterei devísio, upévare ojepyʼapy káda uno ñanderehe ha haʼete voi oñenkarga ohendu hag̃ua umi ñemboʼe jajapóva chupe (Sal. 116:1; Is. 57:15). w22.11 9 párr. 5, 6

Jasegíramo japredika jajepersegíramo jepe, upéva ñanembovyʼáta ha ñanembopyʼaguapýta. Umi autorida oproivírõ guare umi apóstolgui opredika, haʼekuéra iñeʼẽrendu Jehovápe. Upévare osegi opredika hikuái ha upéva ombovyʼa chupekuéra (Hech. 5:​27-29, 41, 42). Jajepersegíramo ningo tekotevẽta añete ñañatendeve japredika jave. Péro upéicharamo jepe ñañehaʼãmbaitéramo siémpre jajapo upéva, ñambovyʼaitereíta Jehovápe ha ikatúta ñaipytyvõ ñande rapichakuérape ojesalva hag̃ua, ha upéva añetehápe ñanembovyʼaitereíta. Ñaimékena segúro ikatuha ñandepyʼaguapy ijetuʼúramo jepe ñanendive. Péicha jave ñanemanduʼa vaʼerã Ñandejára pyʼaguapy añoite ikatuha ñanepytyvõ. Jajeroviákena Jehováre oĩ jave peteĩ mbaʼasy pyaʼeterei okorréva, jahasa jave algún desástre naturál o jajepersegi jave. Aníkena núnka jaheja Jehová organisasión, ha siémprekena ñapensa pe esperánsa jarekóvare. Jajapóramo péicha, “Ñandejára omeʼẽva pyʼaguapy” oĩta ñanendive (Filip. 4:9). w22.12 21 párr. 17, 18

Upéva heʼise ñañehaʼã vaʼerãha avei ñakambia ñande lája. Por ehémplo, ñañehaʼãmbaite vaʼerã ani hag̃ua ñandepyʼaro, ñandepochypa rei ha ñarrenega vaipa (Efes. 4:​31, 32). ¿Mbaʼérepa ikatu ijetuʼueterei algúnope upéva? Vuéno, la Biblia heʼi voi oĩha umi “imitãite guive ojaposéva ivaívante voi” (Gén. 8:21). Upévare, oiméramo ñande upéicha vaʼekue la ñande lája, jajevautisa rire jepe jasegi vaʼerã ñañehaʼã ñakambia hag̃ua (Rom. 7:​21-23). Ñañemboʼe Jehovápe ha jajerure chupe tañanepytyvõ ñamehora hag̃ua la tekotevẽhápe. Ikatu ñaime segúro haʼe ñanerendutaha ha ñanepytyvõtaha (1 Juan 5:​14, 15). Siérto, Jehová ndojapomoʼãi peteĩ milágro oipeʼa hag̃ua ñandehegui peteĩ kostúmbre vai, péro si ñanemombaretéta ani hag̃ua ipuʼaka ñanderehe upéva (1 Ped. 5:10). ¿Ha mbaʼépa ñande ikatu jajapo upearã? Vuéno, ñamboykete vaʼerã umi mbaʼe nañanepytyvõmoʼãiva. Ha ani avei jaiko ñapensa umi mbaʼe naiporãivare, pórke upéva nañanepytyvõmoʼãi ñamehora hag̃ua (Filip. 4:8; Col. 3:2). w23.01 10 párr. 7, 9, 10

¿Mbaʼéichapa ikatu jahechauka jahayhuha ñande rapichakuérape? Por ehémplo japredikávo kyreʼỹme enterovépe, tahaʼe haʼéva ipire kolór, ikostúmbre, pe puésto orekóva, oimépa imboriahu térã ipláta heta. Péicha ñaipytyvõ hína Jehovápe, “haʼe ningo oipota opaichagua persóna ojesalva ha oikuaa porã pe añetegua” (1 Tim. 2:4). Jahayhúramo ñane ermanokuérape jahechaukáta avei jahayhuha Ñandejárape ha Crístope. Ñande ningo jajepyʼapy ñane ermáno ha ermanakuérare, káda únore voi, ha ñaipytyvõ chupekuéra ohasa asy jave. Omanóramo chuguikuéra peteĩ ohayhúva katu, ñakonsola chupekuéra. Avei javisita ñane ermanokuérape hasykatu jave, ha ñañehaʼãmbaite ñamokyreʼỹ umi oñedeprimívape (2 Cor. 1:​3-7; 1 Tes. 5:​11, 14). Ñañemboʼe avei ñane ermanokuérare, pórke “peteĩ kuimbaʼe ihústova oñemboʼéramo ipyʼaite guive, upe ñemboʼe oreko podér ha imbareteterei” (Sant. 5:16). w23.01 28, 29 párr. 7, 8

Peteĩ ombaʼapóva konstruksiónpe, tiémpo rire ojapo porãve ohóvo la itraváho. Upéicha avei ñande ñandevaleve jahávo ñañomokyreʼỹ hag̃ua. Ñande ningo ikatu ñaipytyvõ ótrope ogueropuʼaka hag̃ua umi pruéva. Ha upearã ñañeʼẽ chupekuéra umi ehémplo yma guarére, umi oaguantáma vaʼekuére heta mbaʼe (Heb. 11:​32-35; 12:1). Ñande ñaipytyvõta avei oĩ hag̃ua pyʼaguapy, ñañeʼẽvo umi mbaʼe porã orekóvare umi ótro, ñañehaʼãvo jaiko pyʼaguapýpe ijetuʼúramo jepe, ha jaiko porã jeývo jajoavy jave ótrondi (Efes. 4:3). Jasegíta avei ñamombarete ñane ermanokuéra jerovia ñakompartívo hendivekuéra umi mbaʼe iñimportánteva heʼíva la Biblia, ñaipytyvõvo chupekuéra oikotevẽ jave ha jaapojávo umi ou vaʼekuépe ijerovia kangy. Ñande ñaipytyvõramo opuʼã hag̃ua pe kongregasión, térã ñamombaretéramo umi ermanokuéra jerovia, javyʼa ha ñañeñandu porãta avei la jajapóvare. Por ehémplo, umi óga oñemopuʼãva ningo ohasávo la tiémpo oñembyai jey. Péro la ñande travahokue kongregasiónpe opytáta pára siémpre. w22.08 21 párr. 6; 25 párr. 17, 18

Jesús oñeʼẽ vaʼekue peteĩ kualida iñimportántevare ñanepytyvõtava jalee jave Ñandejára Ñeʼẽ, upéva hína pe entendimiénto (Mat. 24:15). ¿Ha mbaʼépa heʼise ñantende pe jaleéva? Heʼise jarekoha la avilida jahechakuaa hag̃ua mbaʼéichapa peteĩ idéa oñekonekta ótrondi, mbaʼéichapa upéva ikatu idiferénte ótra idéagui ha japilla hag̃ua peteĩ mbaʼe nahesakãporãiva. Avei Jesús ohechauka vaʼekue ñaikotevẽha entendimiénto jahechakuaa hag̃ua mbaʼéichapa umi mbaʼe oikóva okumpli hína peteĩ profesía oĩva la Bíbliape. Ñaikotevẽ avei ko kualida ideprovécho hag̃ua ñandéve opa mbaʼe jaleéva la Bíbliape. Jehová omeʼẽ isiervokuérape pe entendimiénto. Upévare ñañemboʼe vaʼerã chupe ha jajerure tañanepytyvõmi ikatu hag̃uáicha jareko ko kualida. ¿Mbaʼépa ikatu jajapo jahechauka hag̃ua jaipotaha pe jajeruréva ñane ñemboʼépe? Ñaanalisa porã vaʼerã pe jaleéva hína, ha jahechakuaa mbaʼéichapa oñekonekta umi mbaʼe jaikuaámavandi voi. Iñimportánte ñantende mbaʼépa heʼise peteĩ téxto bíblico ha jahechakuaa mbaʼéichapa ikatu ñamoĩ en práktika ñande rekovépe (Heb. 5:14). Jaipurúramo pe entendimiénto jalee jave, upéva katuete ñanepytyvõta ñantendeve hag̃ua jahávo Ñandejára Ñeʼẽ heʼíva. w23.02 10 párr. 7, 8

Eñeimahinamína peteĩ ne amígo orregalaha ndéve peteĩ óga hepyetereíva. Pe ógape ofaltáramo jepe ojarregla mimi, nde remombaʼeterei pórke reikuaa porã pe óga hepyetereiha, ha upévare eñehaʼãta voi reñangareko hese ha rearregla. Upéicha avei Jehová omeʼẽ ñandéve peteĩ rregálo ivaliosoitereíva, upéva ningo haʼe ñande rekove. Añetehápe ndaipóri voi ótra kósa ko univérsope ivaliosovéva Jehovápe g̃uarã la ñande rekovégui, upévare haʼe ontrega pe Itaʼýra Jesucristo rekove ñandesalva hag̃ua (Juan 3:16). Jehová ningo omeʼẽ la vída enterovépe (Sal. 36:9). Apóstol Pablo heʼi vaʼekue voi: “Haʼe rupive ningo jaikove, jakuʼe ha jaexisti” (Hech. 17:​25, 28). Upévare ikatu jaʼe pe ñande rekove haʼeha peteĩ rregálo oúva Ñandejáragui. Haʼe ningo ñanderayhúgui omeʼẽmbaite ñandéve umi mbaʼe ñaikotevẽva jaikove hag̃ua (Hech. 14:​15-17). Jehová ndojapói milágro ikatu hag̃uáicha ñande jasegi jaikove. Upéva rangue, haʼe ohaʼarõ ñande ñañehaʼãmbaite ñaneresãi hag̃ua, ha péicha jasegi jaservi chupe (2 Cor. 7:1). w23.02 20 párr. 1, 2

¡Ajépa jaagradesete Jehovápe omeʼẽ haguére ñandéve la Biblia! Pype ningo ikatu jatopa umi konsého ñanepytyvõva ñambohovái hag̃ua umi provléma oñepresentáva koʼág̃arupi. Avei jatopa umi esperánsa ñaneraʼarõva amo gotyove g̃uarã. Ha la iñimportantevéva katu, ohechauka ñandéve mbaʼeichaguápa hína Jehová ha mbaʼe kualidápa haʼe oreko. Opokoiterei ñanderehe jajepyʼamongetáramo umi kualida porãite Jehová orekóvare ha mbaʼeichaguápa haʼe. Upéva ñanemomýi voi ñañemoag̃ui hag̃ua hese ha oikose hag̃ua ñandehegui iñamigoite (Sal. 25:14). Jehová ningo oipota ñande jaikuaa chupe. Upéicha rupi yma haʼe omombeʼu vaʼekue umi suéño, visión ha anhelkuéra rupive mbaʼeichaguápa haʼe (Núm. 12:6; Hech. 10:​3, 4). Péro koʼã mbaʼe haʼe oikuaauka vaʼekue ndojeskrivíririre moõve hendápe, ndajaikuaamoʼãi kuri mbaʼeichaguápa haʼe. Upévare Jehová omanda vaʼekue ojeskrivi hag̃ua peteĩ lívrope opa mbaʼe haʼe oipotáva ñande jaikuaa. Ndareíri la Bíbliape heʼi voi hese: “Ñandejára ojapóva guive siémpre iporã”. Jahechakuaa Ñandejára oñekomunika rupi péicha ñanendive, ñanepytyvõiterei ha ideprovécho ñandéve g̃uarã (Sal. 18:30). w23.02 2 párr. 1, 2

Emoĩkena umi méta nepytyvõtava esegi hag̃ua eprogresa ha ndejerovia mbareteve hag̃ua (Efes. 3:16). Por ehémplo, ikatu ejedesidi estudia porãvetaha neañoháme ha eñehaʼãtaha elee la Biblia káda día (Sal. 1:​2, 3). Térã ikatu ehechakuaa tekotevẽha eñemboʼe pyʼỹive ha nde pyʼaite guive. Ikatu oime ifálta hína ndéve ejejokokuaave eelehi jave umi ne diversionrã térã mbaʼéichapa eipurúta ne tiémpo upearã (Efes. 5:​15, 16). Nde ningo esegíta emehora kómo kristiáno eipytyvõramo ótrope. Por ehémplo ikatu eipytyvõ umi ermáno ijedámava ha hasykatúvape oĩva ne kongregasiónpe. Ikatu embaʼejogua chupekuéra térã eipytyvõ chupekuéra oipurukuaa hag̃ua iteléfono térã itávlet. Ikatu avei ehechauka eporohayhuha eñeʼẽvo umi héntepe Ñandejára Rréinore (Mat. 9:​36, 37). Ha ikatúma guive, emoĩkuaa la méta eservi hag̃ua Jehovápe de tiémpo kompléto. w22.08 6, 7 párr. 16, 17