Septiembre

Ñande jaipuru porãramo ko rregálo Jehová omeʼẽ vaʼekue ñandéve, jahechauka hína avei haʼeha isiérvo. Ha ñaipytyvõ umi héntepe ohechakuaa hag̃ua tuichaitereiha la diferénsia éntre “peteĩ oadoráva Ñandejárape ha peteĩ ndoadoráiva chupe” (Mal. 3:18). Jahechamína mbaʼépa oiko vaʼekue peteĩ ermána héravare Kimberly. Chupe ningo ikoléhiope oñemeʼẽ vaʼekue peteĩ traváho práktiko ha ojeʼe chupe ojapo vaʼerãha upéva peteĩ ikompañérandi. Ojapo aja hikuái pe projékto, ko kuñataĩ ohechakuaa Kimberly tuichaiterei idiferenteha. Haʼe noñeʼẽvaíri ótrore ha naitieʼỹi, síno siémpre oñeʼẽ porã hapichakuérare. Upéva ombokuriósa ko ikompañérape, ha upévare tiémpo rire oñepyrũ ostudia la Biblia. Oiméne Jehová ovyʼaite ohechávo ñande jaipuru porãha pe rregálo haʼe omeʼẽ vaʼekue ñandéve, ha péicha ñaipytyvõ la héntepe oñemoag̃ui hag̃ua avei hese. Ñande siémpre jaʼese umi mbaʼe omombaʼeguasútava Jehovápe. w22.04 5, 6 párr. 5-7

Jesús olivera María Magdalénape 7 demónio oatormentávagui chupe. Haʼe oagradeseterei rupi Jesúspe, oipuru imbaʼerepy oñangareko hag̃ua Jesúsre ha omoirũ hag̃ua chupe (Luc. 8:​1-3). María omombaʼeterei la Jesús ojapóva hesehápe, péro oiméne ndoikuaáiti raʼe mbaʼeichaitépa ivalióso pe rregálo Jesús omeʼẽtava upe rire: Haʼe ontregáta hekove ikatu hag̃uáicha “umi ohechaukáva ojeroviaha hese” oikove pára siémpre (Juan 3:16). María siémpre oapoja Jesúspe, péicha ohechauka oagradeseha chupe. Por ehémplo, Jesúspe ojeklavárõ guare pe yvyráre, María oĩ ijykére oapoja hag̃ua chupe ha avei umi ótro oĩvape upépe (Juan 19:25). Ha Jesús oĩrõ guare pe sepultúrape, haʼe ha mokõi kuña oraha aséite perfumádo omoĩ hag̃ua Jesús retekuére (Mar. 16:​1, 2). María ovyʼaiterei vaʼekue ohecha haguére Jesúspe oñemoingove jey rire ha oñeʼẽ hendive. Ko oportunida ndorekói kuri heta disípulo (Juan 20:​11-18). w23.01 27 párr. 4

Nañapensái vaʼerã umi mbaʼe jajapo vaʼekue yma ovalemaha. Ikatu oime koʼág̃a ndaikatuvéima jajapo heta mbaʼe anteve guaréicha, péro lomímonte ñañehaʼãmbaite vaʼerã jajapo la ikatúva guive “ñande Ruvicha servísiope”, ha jajapo vaʼerã upéva og̃uahẽ meve pe fin (1 Cor. 15:58; Mat. 24:13; Mar. 13:33). Ñañatende vaʼerã ani ñandepyʼamokõi. Kongregasión de Laodicéape katu Jesús heʼi vaʼekue orekoha ótro provléma. Heʼi vaʼekue chupekuéra ‘ojoguaha y tíviope’, pórke ndoadoravéima Jehovápe ipyʼaite guive. Upévare haʼe heʼi vaʼekue chupekuéra ‘ivaipaitemaha la isituasión ha imboriahuha’ hikuái. Upévare haʼekuéra okambiámante vaʼerã ha oñepyrũ oadora jey Jehovápe ipyʼaite guive (Apoc. 3:​16, 17, 19). ¿Mbaʼépa ñanemboʼe upéva? Oiméramo ñande nañanekyreʼỹguasuvéi Jehovápe g̃uarã, ñañehaʼãmbaite vaʼerãha ñapensa entéro mbaʼe Jehová omeʼẽ vaʼekuére ñandéve ha ñamombaʼe umíva (Apoc. 3:18). Ñañatende vaʼerã avei ñandejehe ani hag̃ua jaiko porãségui, jaju ñambotapykue Jehová servísio. w22.05 3, 4 párr. 7, 8

Hetaiterei áñoma ojapo Jehová oskrivi hague oikóvo peteĩ lívro espesiál. Ko lívrope oĩ umi téra, ha oñepyrũ pe primer Testígo ifiélva réragui voi: Abel (Luc. 11:​50, 51). Upe tiémpo guive Jehová oanotave ohóvo upe lívrope umi téra. Koʼág̃a g̃uarã oĩma hetaiterei persóna réra pýpe. Ko lívrope la Biblia ohenói “peteĩ lívro orekóva umi hénte réra, umi haʼe imanduʼátavare”, ‘pe lívro de la vída’ ha ‘pe rróllo de la vída’ (Mal. 3:16; Apoc. 3:5; 17:​8, nóta). Ko lívro espesiálpe oĩ enterove umi persóna réra oadoráva Jehovápe ha okyhyjéva chugui, térã umi orrespetáva chupe ipyʼaite guive ha omombaʼetereíva Jehová réra. Umi persóna oguerekóta la oportunida oikovévo pára siémpre. Koʼág̃arupi ñande réra ikatu hína oñeanota upe lívrope jarekóramo Jehovápe ñane amigoitéramo. Upearã jajevale vaʼerã Itaʼýra Jesucristo sakrifísiore (Juan 3:​16, 36). Enterove jaipotaiterei ñande réra oĩ upe lívrope, tahaʼe jepe raʼe jareko la esperánsa jaikóvo yvágape térã ko yvy ape ári. w22.09 14 párr. 1, 2

Lívro de Apocalípsispe oñeñeʼẽ ‘peteĩ dragón guasu pytãitévare’ (Apoc. 12:3). Péva pe dragón oñorairõ Jesús ha hiʼanhelkuéra kóntrape (Apoc. 12:​7-9). Avei oataka Ñandejára puévlope ha omeʼẽ autorida umi animál salváhepe (Apoc. 12:17; 13:4). ¿Ha mávapa hína pe dragón? Péva “pe mbói ypykue oñehenóiva Diablo ha Satanás” (Apoc. 12:9; 20:2). Ha Satanás oreko ipoguýpe entéro umi ótro Jehová kontrariokuérape. ¿Mbaʼépa ojehúta pe dragónpe? Apocalipsis 20:​1-3 heʼi Satanás ha idemoniokuérape oñemombotaha pe yvykua pypukúpe, ha upéva ikatu ñakompara peteĩ kársel rehe. Satanás ha idemoniokuéra oĩ aja upépe ndaikatumoʼãvéima “ombotavy umi tetãnguérape opa peve umi 1.000 áño”. Upe rire Satanás ha idemoniokuérape oñehundíta pára siémpre. Upévare la Biblia heʼi ojepoitaha chupekuéra “pe lágo oĩháme tatarendy ha asúfre”. ¡Epensamíntena mbaʼeichaitépa javyʼáta ág̃a ndoexistivéi vove Satanás ha idemoniokuéra! ¡Impresionánte mbaʼeichaitépa la jaiko porãta! w22.05 14 párr. 19, 20

Jesús itravahadór vaʼekue, haʼe imitãme ombaʼapo vaʼekue de karpintéro (Mar. 6:3). Ha katuete haʼe perfékto rupi itraváho porã vaʼekue, ha umi hénte oipota la itravahokue. Upévare tuichaiterei oiméne oipytyvõ raʼe ifamíliape oñemantene hag̃ua. Péro haʼe ombaʼapóramo jepe de karpintéro siémpre oaparta vaʼekue tiémpo Jehovápe g̃uarã (Juan 7:15). Ha tiémpo rire haʼe oñepyrũma voi opredika de tiémpo kompléto, ha upévare ikatu vaʼekue omeʼẽ ko konsého: “Ani pembaʼapo pe tembiʼu ikatúvare oñehundi, síno pembaʼapo vaʼerã pe tembiʼu núnka noñehundimoʼãivare, omeʼẽva jeikove opaveʼỹva” (Juan 6:27). Pe Sermón del Móntepe Jesús heʼi vaʼekue avei: “Pembyaty tesóro yvágape” (Mat. 6:20). Umi konsého Jehová omeʼẽva ñandéve ñanemoarandu ha ñanepytyvõ jahecha hag̃ua hendápe porã la ñande traváho. Por ehémplo, la Biblia heʼi ñandéve ‘ñambaʼapo pohýi vaʼerãha’ ha jajapo porã vaʼerãha la ñande traváho. w22.05 22 párr. 9, 10

Eunice omoĩ vaʼekue peteĩ ehémplo iporãitereíva imemby Timotéope g̃uarã. Ha Timoteo oiméne ohecha voi raʼe mbaʼéichapa isy ojerovia, ohayhueterei Jehovápe ha ovyʼaitereiha iservísiope. Upéicha avei, ñane tiémpope oĩ heta ermána omoĩva ehémplo iporãitereíva hogapýpe. Upéicha rupi ikatu oipytyvõ imembykuérape ha iménape avei ‘heʼiʼỹre chupekuéra mbaʼeve’ (1 Ped. 3:​1, 2). ¿Mbaʼéichapa nde avei ikatu ehupyty upéva? Eñehaʼãmbaitékena ekuida ne amista Jehovándi (Deut. 6:​5, 6). Katuete nde rejapo vaʼerã heta sakrifísio ekuida hag̃ua ne membykuérare. Ha upearã eipuru heta tiémpo, pláta, a vése ni nderekéi, ha ejapo heta mbaʼe ani hag̃ua mbaʼeve ofalta chupekuéra. Péro eñehaʼãmbaitékena ani hag̃ua embotapykue ne amista Jehovándi eñekonsentraiterei rupi umívare. Iñimportanteterei ndete eñemotiémpo eñemboʼe hag̃ua, ejapo hag̃ua nde estúdio personál, ha eho hag̃ua rreunionhápe. Ejapóramo koʼã mbaʼe, nde voi reñemoag̃uivéta Jehováre, ha emoĩta peteĩ ehémplo iporãitereíva ne famíliape ha ermanokuérape g̃uarã. w22.04 16 párr. 1; 19 párr. 12, 13

Ajépa tuichaite ñandepyʼaguapy jaikuaávo ñande natekotevẽiha jadesidi mbaʼéichapa ojehusga vaʼerã peteĩ persónape. Jehová hína pe Hués Ijojahaʼỹva ha haʼe ojapóta ko traváho iñimportantetéva (Rom. 14:​10-12). Ikatu jajerovia ñande pyʼaite guive haʼe osegitaha pe iléi perfékta ohusga hag̃ua mbaʼépa la iporãva térã ivaíva (Gén. 18:25). Haʼe núnka ndojapomoʼãi mbaʼeve iñinhústova. Ñandéve hiʼãitéma og̃uahẽ pe tiémpo Jehová oipeʼapaitetaha entéro mbaʼe vai ñanderupytýva ñaneimperfékto ha pekadór haguére. Upe tiémpope, entéro mbaʼe hasýva ñandéve tahaʼe ñanderasykatu rupi térã umi mbaʼe ñanemoñeñandu vaíva, ojeietétama ñandehegui (Sal. 72:​12-14; Apoc. 21:​3, 4). Umívare núnka mas nañanemanduʼamoʼãvéima. Ha ñahaʼarõ aja og̃uahẽ umi mbaʼe iporãitéva, jaagradeseterei Jehovápe omeʼẽ haguére ñandéve pe kapasida jasegi hag̃ua iñehémplo ha ñaporoperdona. w22.06 13 párr. 18, 19

Peteĩ vuén hués oikuaa porã vaʼerã umi léi. Avei tekotevẽ oikuaa porã mbaʼépa oĩ porã ha mbaʼépa oĩ vai. ¿Mbaʼépa oreko vaʼerã avei peteĩ vuén hués? Oreko vaʼerã la kapasida oikuaapaite hag̃ua entéro mbaʼe oiko vaʼekue, péicha ikatúta odesidi porã. Ha upévape Jehová ndaijojahái, pórke haʼe oikuaapaite entéro mbaʼe oikóva. Upévare Jehová haʼe peteĩ Hués ndaijojaháiva. Jehová idiferénte umi hués oĩvagui ko yvy ape ári, pórke haʼe oikuaa porãiterei opa mbaʼe oiko vaʼekue (Gén. 18:​20, 21; Sal. 90:8). Haʼe ndahaʼéi yvypóraicha ojegiáva umi mbaʼe ohecha térã ohendúvarente. Upéva rangue haʼe oporohusgáta jave ogueraha enkuénta heta mbaʼe. Por ehémplo haʼe oikuaa porã mbaʼéichapa oñemongakuaa peteĩ persónape, moõpa oiko raʼe, mbaʼépa opensa, oñandu ha mbaʼépa oĩ ikorasõme. Upéicha rupi haʼe oikuaa mbaʼérepa peteĩ persóna ojapo kuri peteĩ mbaʼe. Ndaipóri mbaʼeve ni avave okañýva Ñandejáragui (Heb. 4:13). Upévare ikatu jaʼe Jehová ñaneperdona jave, haʼe oikuaapaiteha entéro mbaʼe oiko vaʼekue. w22.06 4 párr. 8, 9

Jajapo porãta jajesarekóramo umi mbaʼe Satanás ojapo vaʼekuére Job kóntrape, pórke umíva ojoguaiterei umi mbaʼe haʼe oipurúvape koʼág̃arupi ñane kóntrape avei. Satanás heʼi ñande ndajahayhuiha Jehovápe ñande pyʼaite guive, ha ñande rekove ojapeligráramo jahejataha chupe. Heʼi avei Jehová nañanderayhuiha ha nomombaʼeiha umi mbaʼe jajapóva. Ñande jaikuaáma mbaʼeichagua ñuhãpa Satanás oipuru ha jajerovia rupi Jehováre, haʼe nañanembotavyvéima. Umi pruéva jahasáva haʼe vaʼerã ñandéve peteĩ oportunida jajekuaa porãve hag̃ua. Umi mbaʼe Job ohasa vaʼekue, oipytyvõ chupe opilla hag̃ua mbaʼépepa omehora vaʼerã. Por ehémplo haʼe ohechakuaa tekotevẽha iñumildeve (Job 42:3). Ñande avei ikatu jajekuaa porãve jahasa jave algúna pruévare. Ha japilla rire mbaʼépepa ifálta ñamehora, ikatu ñañehaʼã jajapo porã upéva. w22.06 23 párr. 13, 14

Jehová opromete ñandéve ñanepytyvõtaha. Por ehémplo, Jehová heʼi mboyvemínte: “Peẽ hína che testígo”, heʼi: “Nde rehasa vove oĩhárupi y, che aĩta nendive. Ha rehasa vove umi rríore, nderejahogamoʼãi. Rehasa vove tata mbytérupi, nde nderekaimoʼãi, pe tata nanderapymoʼãi ni michĩmi” (Is. 43:2). Japredika jave sapyʼánte jahasa heta mbaʼe ijetuʼúva, ha ikatu voi ñambojoja umíva peteĩ inundasiónre, ha umi pruéva ijetuʼuetereíva ikatu ñakompara tata rehe. Upéicharõ jepe Jehová ñanepytyvõ rupi jasegi japredika (Is. 41:13). Koʼág̃arupi hetaiterei hénte orrechasa pe mensáhe. Ñanemanduʼa vaʼerã haʼekuéra ñanderrechasávo ndeʼiseiha ndajapredikaporãiha. Jehová ñandeguerohory japredika jave fiélmente, ha upéva ñanemokyreʼỹ ha ñanemombarete. Apóstol Pablo heʼi vaʼekue: “Káda únope ojepagáta hembiapokuére” (1 Cor. 3:8; 4:​1, 2). w22.11 4 párr. 5, 6

Koʼág̃arupi jahecha porãiterei mbaʼéichapa oñekumplipaite umi profesía oĩva la Bíbliape. Hetaiterei persóna “oñeʼẽva opaichagua idióma oĩva umi nasiónpe” oaprende hína ‘peteĩ idióma ipotĩva’ la Biblia rupive (Zac. 8:23; Sof. 3:9). Mas de 8 millón de persóna oĩva 240 paíspe oĩ Jehová organisasiónpe. Avei káda áño ojevautisa millones de persóna. Péro pe kantida ndahaʼéi la iñimportantevéva, síno umi kualida espirituál térã “pe kondúkta pyahu” orekóva koʼã kristiáno pyahu (Col. 3:​8-10). Hetaiterei oĩ ymave hekovai, iviolénto, oapoʼi vaʼekue hapichápe, ha ifanatikoiterei vaʼekue hetãre, péro upéi okambiaite. Pe profesía oĩva Isaías 2:​4-pe oñekumpli hína, pépe heʼi ‘noñemboʼemoʼãveimaha chupekuéra mbaʼéichapa oñorairõ vaʼerã’. Ñande ñañehaʼãmbaitéramo ñamonde pe kondúkta pyahu, ñaipytyvõta umi persónape oñemoag̃ui hag̃ua Jehová organisasiónre, ha avei jahechaukáta jasegiha Cristo Jesús ehémplo, haʼéva pe ñandegiáva (Juan 13:35). ¿Péro mbaʼéicha rupi oiko koʼã mbaʼe? Sólamente Jesús omeʼẽ rupi ñandéve pe ajúda ñaikotevẽva. w22.07 9 párr. 7, 8

Ñañemboʼe jave Jehovápe jahechauka vaʼerã jarrespetaha chupe ñande pyʼaite guive. Ñapensamíntena pe visión ijojahaʼỹva ohecha vaʼekuére Isaías, Ezequiel, Daniel ha Juan. Umi visiónpe ojehechauka Jehová haʼeha peteĩ Rréi ipoderosoitereíva. Por ehémplo Isaías ohecha “Jehová oguapyha itrónope oĩva yvatete” (Is. 6:​1-3). Ezequiel katu ohecha Jehovápe oguapyha ikárro yvagapeguápe ha ojere hese “peteĩ árko íris” omimbipáva (Ezeq. 1:​26-28). Daniel katu ohecha “pe Karai Ijedaitéva” orekoha ao morotĩ ha itrónogui katu osẽ tatarendy (Dan. 7:​9, 10). Juan ohecha Jehovápe oguapyha itrónope ha itróno jerére oĩ peteĩ árko íris ojoguáva esmeráldape (Apoc. 4:​2-4). Jajepyʼamongetávo mbaʼeichaitépa Jehová ndaijojahái, jahechakuaa tuichaiterei mbaʼeha ikatu haguére ñañemboʼe chupe, ha iñimportantetereiha jarrespeta chupe ñañemoag̃uívo hese. w22.07 20 párr. 3

Nde nemitãva tekotevẽ reikuaa Satanás ndoipotaieteha eprogresa espirituálmente. Haʼe ikatu ojapo upéva nembodudávo umi mbaʼe la Biblia omboʼévagui. Por ehémplo ikatu hína etopa umi ogueroviáva pe evolusión, ha upéva oheja vaieterei Ñandejárape. Ikatu oime anteve nemitãvépe nerepensáiva upe témare, péro koʼág̃a rekakuaáma ha ikatu voi oñemboʼe nde eskuélape pe evolusión. Péro haʼete la regueroviaséva umi nde profesorkuérape oñeʼẽ jave upe témare. Upéicharõ jepe, ikatu hína haʼekuéra núnka noñehaʼãiva oheka umi pruéva ohechaukáva oĩha peteĩ Kreadór. Nemanduʼákena pe konsého jatopávare Proverbios 18:​17-pe: “Pe omombeʼu raẽva la oiko vaʼekue haʼetévaicha heʼíva siertogua, péro upéi ou pe ótra persóna ha ojapo heta pregúnta ojekuaa porã hag̃ua upe oiko vaʼekue”. Reguerovia rangue entéro mbaʼe oñemboʼéva nde eskuélape, iporãvéta ndete voi restudiáramo umi mbaʼe omboʼéva la Biblia ha avei umi informasión oñeʼẽva upe témare ñane puvlikasionkuérape. w22.08 2 párr. 2; 4 párr. 8

Ñande ñantendese la jaleéva Ñandejára Ñeʼẽme. Pórke ndahaʼéiramo upéicha, ndaideprovechopái hína ñandéve la jaleéva. Por ehémplo, jahechamína la oiko vaʼekue Jesús oñemongetárõ guare ‘peteĩ kuimbaʼe ostudia vaʼekuéndi umi léi’ (Luc. 10:​25-29). Upe kuimbaʼe oporandúrõ guare mbaʼépa oikotevẽ ohupyty hag̃ua pe vída etérna, Jesús imanduʼa chupe Ñandejára Ñeʼẽre ha heʼi: “¿Mbaʼépa heʼi pe léi? ¿Mbaʼépa nde rentende?”. Pe kuimbaʼe okontesta porã vaʼekue chupe upe pregúnta, haʼe imanduʼa Ñandejára Ñeʼẽme heʼiha jahayhu vaʼerãha Ñandejárape ha ñande rapichápe (Lev. 19:18; Deut. 6:5). Péro upéi haʼe heʼi vaʼekue chupe: “¿Máva piko añetehápe che rapicha?”. Upe kuimbaʼe ohechauka vaʼekue nontendeporãiha mbaʼépa heʼise añetehápe la olee vaʼekue. Ñande ñaikotevẽ Ñandejára ñanepytyvõ ñantende hag̃ua la Biblia heʼíva, upévare jajerure chupe ijespíritu sánto ikatu hag̃uáicha ñañekonsentra ha tañanepytyvõ ñamoĩ hag̃ua en práktika umi mbaʼe jalee vaʼekue. w23.02 9 párr. 4, 5

“¿Mbaʼéichapa nde eikuaa raʼe pe añetegua?”. Oiméne heta vésema oñeporandu ndéve upéva. Katuete peteĩ ermáno térã ermána ndekuaa ramóva la oporandúva ndéve. Ñandéve ñandegustaiterei ñahendu peteĩ ermáno omombeʼúrõ mbaʼéichapa oikuaa rakaʼe pe añetegua, ha ñande avei javyʼaiterei ñamombeʼu jave mbaʼérepa ñamombaʼete pe añetegua (Rom. 1:11). Ñañeʼẽvo koʼãichagua témare, ñanemomanduʼa mbaʼérepa javaloraite pe añetegua, ha upéva ñanemokyreʼỹ jasegi hag̃ua jaguata “pe añetegua rapére”. Upéva heʼise jasegitaha jaiko Jehová oipotaháicha haʼe ñanevendesi ha ñandeguerohory hag̃ua. Ñande ñamombaʼe pe añetegua heta mbaʼére. Péro la iñimportantevéva hína: Jahayhueterei Jehovápe, pórke chugui ou pe añetegua. La Biblia rupive ndahaʼéi jaikuaánteva Jehová ipoderosoitereiha ha okrea hague entéro mbaʼe yvágape ha ko yvy ape ári, síno jaikuaa avei haʼeha ñande Túa ñanderayhuetéva ha ojepyʼapýva ñanderehe (1 Ped. 5:7). w22.08 14 párr. 1, 3

Pablo omokyreʼỹ umi ermanokuérape oporohayhu hag̃ua ‘ojapóvo iporãva’ (Heb. 10:24). Haʼe oipytyvõ vaʼekue umi ermánope ndahaʼéi umi mbaʼe heʼíva rupivénte, síno umi mbaʼe ojapóva rupive avei. Por ehémplo, umi ermáno oĩva Judéape ohasárõ guare ñembyahýi, Pablo ogueru vaʼekue chupekuéra umi mbaʼe oikotevẽva (Hech. 11:​27-30). Pablo hembiapo heta vaʼekue opredika ha oporomboʼe hag̃ua. Upéicharõ jepe haʼe siémpre ohecha mbaʼéichapa ikatu oipytyvõ umi oikotevẽvape algitomi. Upéicha omombarete umi ermánope ojerovia hag̃ua Jehová oñangarekotaha hesekuéra. Koʼág̃arupi avei oiko jave peteĩ desástre naturál, ñande jajeofrese ha jaipuru ñane tiémpo, fuérsa ha umi avilida jaguerekóva ñamombarete hag̃ua ñane ermanokuéra jerovia. Upéicha avei ikatu ñameʼẽ ñane kontrivusión pe óvra mundiálpe g̃uarã. Koʼã mbaʼe ha hetave hendáicha voi ikatu ñaipytyvõ ñane ermanokuérape ojerovia hag̃ua Jehová núnka ndohejareimoʼãiha chupekuéra. w22.08 23 párr. 14

La Bíbliape oĩ hetaiterei profesía oñekumplíma vaʼekue, ha oĩ voi umi ojeskrivi vaʼekue hetaiterei áño upe mboyve. Pe istória okonfirma umi profesía oñekumpli hague. Ha upéva ñandéve nañanesorprendéi, pórke jaikuaa umi profesía ou hague Jehovaitégui voi. Ñapensamíntena mbaʼéichapa oñehundi vaʼekue pe siuda de Babilonia. Éntre umi áño 778 ha 732 a.C., Jehová ojevale vaʼekue proféta Isaíasre opredesi hag̃ua Babilonia ojejagarrataha. Hiʼarive haʼe heʼi vaʼekue Ciro herataha pe ojagarrátava upe siuda, ha oexplika vaʼekue en detálle mbaʼéichapa ojapóta upéva (Is. 44:27–45:2). Isaías oprofetisa vaʼekue avei tiémpo rire Babilonia oñehundietetaha, ha avave ndoikomoʼãvéima upépe (Is. 13:​19, 20). Babilonia haʼe vaʼekue peteĩ siuda ipoderosoitereíva, péro umi medo ha persa ojagarra vaʼekue áño 539 a.C.-pe. Ha koʼag̃aite peve eskómbro reínte opyta. w23.01 4 párr. 10

Jehová ningo ñandeelehi ñaime hag̃ua ifamíliape. Epensamíntena pe priviléhio ndaijojaháiva jarekóvare ha umi mbaʼe porã jahupytývare upéva rupive (Mar. 10:​29, 30). Ko múndo tuichakuére jaguereko heta ermáno ñandéicha avei ohayhúva Jehovápe, ha oñehaʼãmbaitéva oiko haʼe oipotaháicha. Ñande jahayhu chupekuéra, jarekóramo jepe diferénte idióma, kultúra térã ñañemonde diferénte ha primera ves jaikuaáramo jepe chupekuéra. Javyʼaiterei voi ñaime jave hendivekuéra ñamombaʼeguasu ha jaadora hag̃ua Jehovápe. Ha avei ñaikotevẽterei ñaime en unida ñane ermanokuérandi (Sal. 133:1). Sapyʼánte haʼekuéra ikatu ñanepytyvõ jagueraha hag̃ua umi ñande kárga pohýi (Rom. 15:1; Gál. 6:2). Haʼekuéra ñanemokyreʼỹ jasegi hag̃ua jaservi Jehovápe ha jareko chupe ñane amígoramo (Heb. 10:​23-25). Ñapensamíntena ndajaguerekóirire ñane ermanokuérape, ajépa ijetuʼuete vaʼerãmoʼã ñandepuʼaka hag̃ua umi ñane enemígore, haʼéva Satanás ha ko múndo aña. w22.09 2, 3 párr. 3, 4

Ikatu hína ijetuʼu ñandéve jajejokokuaa hag̃ua jaipuru jave umi rred sosiál. Ha nañañatendéiramo ikatu ñamombeʼu peteĩ informasión konfidensiál hetaiterei persónape. Ñamosarambi rire pe informasión elektrónikamente, ndaikatumoʼãvéima ñakontrola mbaʼéichapa ojepurúta pe informasión ha mboy provlémapa oguerúta upéva. Jajejokokuaáramo avei ñanepytyvõta ñanembotavyse jave umi oñemoĩva ñanderehe ñamombeʼu hag̃ua umi mbaʼe ikatúva oapeligra ñane ermanokuérape. Upéva ikatu oiko umi polisía ñaneinterroga jave peteĩ país ojeproivihápe ñane rembiapo. Koʼãva ha avei ótra situasiónpe ikatu ñanemanduʼa Salmo 39:1 heʼívare, upépe heʼi: “Aĩ aja umi iñañáva renondépe, añatendéta la haʼévare ha ambotyetéta la che juru”. Jahechaháicha iñimportanteterei jahechauka ikatuha ojejerovia ñanderehe, tahaʼe ñane famíliandi, ñane amigokuérandi ha ñane ermanokuérandi. Jajejokokuaáramo jahechaukáta ñande haʼeha peteĩ persóna de konfiánsa. w22.09 13 párr. 16

Javyʼa hag̃ua tekotevẽ jalee ha jastudia Ñandejára Ñeʼẽ. Jesús okompara voi Ñandejára Ñeʼẽ pe aliméntore. Upéicha rupi Jesús heʼi vaʼekue: “Yvypóra noikotevẽi pan añónte oikove hag̃ua, síno oikotevẽ opaite mbaʼe Jehová heʼíva” (Mat. 4:4). Upéicharõ ndajahejái vaʼerã ohasa ni peteĩ día jaaprovechaʼỹre pe aliménto espirituál térã jaleeʼỹre Ñandejára Ñeʼẽ la Biblia. Jehová ñanderayhu rupi oskrivika vaʼekue la Bíbliape hetaiterei informasión iñimportantetereíva ohechaukáva mbaʼépa jajapo vaʼerã javyʼa hag̃ua ñande rekovépe. Avei omombeʼu ñandéve maʼerãpa jaikove, mbaʼéichapa ikatu ñañemoag̃ui hese, ha mbaʼe mbaʼépa jajapo vaʼerã haʼe operdona hag̃ua umi ñande pekádo. Avei omombeʼu ñandéve oĩha peteĩ esperánsa iporãitereíva amo gotyove g̃uarã (Jer. 29:11). Entéro koʼã mbaʼe ñaaprende jastudiágui la Biblia, ha añetehápe ñanembovyʼaiterei jaikuaávo koʼã mbaʼe. Ñañedesanima jave jahasa rupi heta provléma tekotevẽ ñañemotiempove jalee ha jajepyʼamongeta hag̃ua la Biblia heʼívare. w22.10 6, 7 párr. 4-6

La Biblia ñanemokyreʼỹ ani hag̃ua jaiko umi ‘ndorekóivaicha experiénsia’. Ñande jarekóta pe arandu oúva Jehovágui ñamoĩramo en práktika umi konsého bíblico. Mbeguekatúpe jahecháta mbaʼéichapa koʼã konsého ñanepytyvõ ani hag̃ua jaike provlémape ha jadesidi porã hag̃ua. Iporãitereíta voi ñapensáramo upévare jadesidi mboyve peteĩ mbaʼe. Oiméramo jastudiáma la Biblia peteĩ tiémpore ha jaha meme rreunionhápe, iporãta ñañeporandu mbaʼérepa neʼĩra jajedesidi ñañemeʼẽ Jehovápe ha jajevautisa. Ha oiméramo jajevautisáma, ¿jasegípa japrogresa japredika ha ñaporomboʼe porãve hag̃ua? Umi mbaʼe jadesidívare jahechauka jahejápa umi konsého oĩva la Bíbliape ñandegia. ¿Jahechaukápa umi kualida porã jatrata lájare ñane ermanokuérape? Oiméramo jahechakuaa tekotevẽha ñamehora peteĩ púntope, jasegíkena umi Jehová konsého, pórke “umíva ningo omoarandu umi ndoikuaáivape mbaʼeve” (Sal. 19:7). w22.10 20 párr. 8

Ezequiel ohecha vaʼekue mbaʼeichaitépa ipoderóso Ñandejára espíritu. Peteĩ visión rupive haʼe ohecha vaʼekue pe espíritu sánto oipytyvõha umi ánhel ipoderosoitévape ha omonguʼeha hína pe kárro selestiál (Ezeq. 1:21). ¿Mbaʼépa ojapo raʼe upérõ Ezequiel? Haʼe heʼi: “Ahechárõ guare upéva, añesũ ha amboja che rova yvýre”. Ezequiel oñesorprendeterei ha upévare oñesũete pe yvýpe (Ezeq. 1:28). Upéi Ezequiel opensávo pe visión ijojahaʼỹva ohecha vaʼekuére, oiméne oasegura chupe Ñandejára espíritu rupive ikatutaha okumpli iñasignasión. Jehová heʼi vaʼekue Ezequiélpe: “Yvypóra raʼy, eñemboʼy añeʼẽ hag̃ua nendive”. Upéva omokyreʼỹ vaʼekue Ezequiélpe ha pe espíritu sánto omeʼẽ chupe pe fuérsa oikotevẽva opuʼã hag̃ua pe yvýgui (Ezeq. 2:​1, 2). Upéi Ezequiel opredika aja entéro, ogia chupe Ñandejára espíritu sánto (Ezeq. 3:22; 8:1; 33:22; 37:1; 40:1). w22.11 4 párr. 7, 8

Koʼápe Isaías heʼi Jehová ojoguaha peteĩ mboʼehára oguatáva ohóvo iñestudiantekuéra rapykuéri, oñatende ha ogiáva chupekuéra moõrupipa oho vaʼerã. ¿Mbaʼéichapa koʼág̃arupi ñahendu Ñandejára ñeʼẽ ñande kupépe? Jaleévo la Biblia. Upépe jatopáta Jehová ñeʼẽ ojeskrivi vaʼekue ymaitereíma ijespíritu rupive. Upéicharõ jalee jave la Biblia haʼete ku Jehová oñeʼẽva hína ñandéve ñande kupéguio ládo (Is. 51:4). ¿Mbaʼéichapa ikatu jaaprovechapaite pe gía Jehová omeʼẽva ñandéve? Jareko vaʼerã enkuénta mokõi mbaʼe Isaías heʼi vaʼekue. Primero haʼe heʼi: “Kóva hína pe tape iporãva”, ha upéi heʼi: “Eho koʼárupi”. Upéicharõ ndeʼiséi sólamente jaikuaa vaʼerãha pe tape iporãva, síno jaha vaʼerã avei upérupi. La Biblia ha iñorganisasión rupive ikatu jaikuaa umi mbaʼe Jehová ojeruréva ñandehegui, ha mbaʼéichapa umíva ikatu ñamoĩ en práktika. Ñande jajapo vaʼerã katuete koʼã mokõi mbaʼe vyʼápe ñaaguanta hag̃ua jaservívo Jehovápe. Upéicharõ añoite jareko la segurida Jehová ñanevendesitaha. w22.11 10, 11 párr. 10, 11

Omano rire la majoría Jesús apostolkuéra, oñepyrũma ojagarrapaite umi kristiáno guaʼu (Mat. 13:​24-27, 37-39). Haʼekuéra omboʼe vaʼekue “umi mbaʼe noĩporãiva ogueraha hag̃ua hapykuéri umi disípulope” (Hech. 20:30). ¿Mbaʼépa la omboʼe vaʼekue hikuái ajeve ojeʼe noĩporãiha? Por ehémplo, la Biblia heʼi ‘Cristo oñemeʼẽ hague ñanderehehápe una vénte ogueraha hag̃ua heta héntegui ipekádo’, péro haʼekuéra heʼi upéva ndahaʼeiha siérto ha Jesucristo sakrifísio tekotevẽha ojejapo manterei (Heb. 9:​27, 28). Koʼág̃arupi hetaiterei persóna ipyʼaporãva oguerovia koʼã japu, upévare oho jepi misahápe okomulga hag̃ua. Oĩ ohóva káda tánto ha algúno káda día voi. Oĩ avei hetave rrelihión nogueromanduʼáiva Jesús sakrifísio la pyʼỹieterei, ha umíva apytépe la majoría nontendeporãi mbaʼépa ojehupyty Jesús sakrifísio rupive. w23.01 21 párr. 5

Jesús goviérno poguýpe umi 1.000 áño aja umi omano vaʼekue oñemoingove jeýta, ha umi persóna iñeʼẽrendúva katu perféktotama. Umi ihústovape Jehová ‘omeʼẽta ko yvy ha oikóta pype opa ára g̃uarã’ (Sal. 37:​10, 11, 29). Oiko rire opa koʼã mbaʼe, oñehundíta pe “ñane enemígo ultimoite” haʼéva pe ñemano (1 Cor. 15:26). La Biblia ohechauka porã ñande ikatuha jaikove pára siémpre. Ko esperánsa ñanepytyvõ jasegi hag̃ua ñandefiél Jehovápe koʼã ára paha ijetuʼuetévape. Péro jaipotáramo Jehová ñandeguerohory, ndajaservíri vaʼerã chupe jaikoséguinte pára siémpre, síno jahayhúgui chupe ha Itaʼýra Jesúspe ñande pyʼaite guive (2 Cor. 5:​14, 15). Pe mborayhu ñanemomýita jasegi hag̃ua iñehemplokuéra ha ñakomparti hag̃ua ótrondi pe esperánsa jarekóva (Rom. 10:​13-15). Avei ñañehaʼãramo ñanembaʼeporã ha nañapensái ñandejehénte, la ñane amista Jehovándi imbaretevéta, ha jasegíramo jajapo upéicha oikóta ñandehegui Jehová amígo pára siémpre. w22.12 6, 7 párr. 15, 16

Jajepersegi jave ikatu ojepeʼa ñandehegui heta mbaʼe ñanembopyʼaguapýva. Oiko jave koʼã mbaʼe ikatu jajepyʼapyeterei ha jakyhyje la ikatúvagui oiko ñanderehe amo gotyove. Normál ningo la péicha ñañeñandu, péro ñañatende vaʼerã ani hag̃ua jajepersegi rupi jaju ndajajeroviavéi Jehováre, Jesús heʼi haguéicha idisipulokuérape (Juan 16:​1, 2). Jesús heʼi vaʼekue voi jajepersegitaha, péro oasegura avei ikatutaha jasegi ñandefiél Jehovápe (Juan 15:20; 16:33). Ojeproivi mbaʼéramo ñande aktivida, la sukursál ha umi ansiáno omeʼẽta ñandéve umi instruksión jajekuida hag̃ua, jasegi hag̃ua jarresivi umi informasión omombaretétava ñande jerovia ha jasegi hag̃ua japredika ikatumiháicha. Iñimportánte jasegi koʼã instruksión (Sant. 3:17). Avei ñañatende vaʼerã ani hag̃ua ñamombeʼu mbaʼeveichagua informasión ñane ermanokuéragui umi persóna natekotevẽivape oikuaa (Ecl. 3:7). w22.12 20, 21 párr. 14-16

Jesús koʼág̃arupi ñandegia hína japredika hag̃ua Ñandejára mensáhe ko yvy ape ári. Haʼe opromete haguéicha, Jehová organisasión rupive Jesús ñanemboʼe ha omeʼẽ ñandéve umi erramiénta ñaikotevẽva japredika hag̃ua (Mat. 28:​18-20). Ñandéve otoka japredika ñande rapichakuérape ha ñamboʼe chupekuéra kyreʼỹme, ha avei jasegi vaʼerã ñañatende porã ñahaʼarõ aja Jehová ohundi ko múndo aña. Jasegíramo pe konsého jatopáva Hebreos 6:​11, 12-pe ñanepytyvõta ñañakarama hatã hag̃ua ñane esperánsare “ipahaite peve”. Jehová omoĩma peteĩ día arakaʼetépa ohundíta ko múndo aña. Ha og̃uahẽ vove upe día, haʼe okumplipaitéta umi profesía jatopáva la Bíbliape. Sapyʼánte ikatu ñapensa heta gueteri ofaltaha og̃uahẽ hag̃ua pe fin, péro Jehová ára “ni mbaʼevéicharõ ndotardamoʼãi” (Hab. 2:3). Upévare ñaime desidído jajapotaha la heʼíva Miqueas 7:7: “Asegíta ahaʼarõ la Jehová ojapótava. Ahechaukáta ahaʼarõkuaaha ha arekoha esperánsa Ñandejárare, haʼe hína upe chesalváva”. w23.02 19 párr. 15, 16

Jajupi jave peteĩ sérro ningo ñag̃uahẽsetereíma jepi pe yvate, pe huʼãitépe. Péro lomímonte tapére ikatu japyta mimi ha ñamaña jepi pe paisáhere. Upéicha avei jahasa jave peteĩ situasión ijetuʼúva pyʼỹinte jaipota opa. Péro opa mboyve ikatu avei japyta mimi ha ñapensa mbaʼéichapa Jehová ñanepytyvõ hína ñaaguanta hag̃ua upe situasión. Por ehémplo, káda pyhare ikatu ñapensa: “¿Mbaʼéichapa Jehová chepytyvõ raʼe koestedía aaguanta hag̃ua ko provléma?”. Ñakontesta hag̃ua ko pregúnta, ikatu ñapensa una o dos kósa ojapo vaʼekuére ñanderehehápe upe díape. Ijetuʼu jave la ñane situasión, pyʼỹinte ñañemboʼe Jehovápe ha jajerure chupe opamíntema hag̃ua pe provléma (Filip. 4:6). Péro upe provléma ndopáitiramo jepe ikatu ñapensa mbaʼéichapa Jehová ñanemombarete ha ñanepytyvõma ñaaguanta hag̃ua upe situasión ijetuʼúva. Siémprekena jaagradese chupe upe haguére. Jajapóramo entéro koʼã mbaʼe, jahecháta avei mbaʼeichaitépa Jehová ñanepytyvõ ha oĩ ñande ykére (Gén. 41:​51, 52). w23.01 19 párr. 17, 18

Ikatu ñapensami koʼã pregúntare: “¿Ahechaukápa aiko lájare siémpre arekoha enkuénta pe fin hiʼag̃uimbaitemaha? ¿Aelehípa che traváho ha che estudiorã opermitítava chéve aservi porã Jehovápe? ¿Aimépa segúro Jehová siémpre omeʼẽtaha chéve umi mbaʼe aikotevẽva?”. Epensamíntena mbaʼeichaitépa oiméne Jehová ovyʼa ohecha jave ñañehaʼãmbaiteha jajapo ivolunta (Mat. 6:​25-27, 33; Filip. 4:​12, 13). Pyʼỹinte tekotevẽ ñaanalisa mbaʼetekópa jaha hese, ha upearã ñaanalisa vaʼerã umi mbaʼe ñapensáva ha ñañandúva. Ha peichahágui japilláramo tekotevẽha ñakambia álgope, pyaʼe jajapo vaʼerã upéva. Apóstol Pablo heʼi vaʼekue voi umi Corintoguápe: “Pesegíkena peñatende pendejehe pehecha hag̃ua peikópa hína heʼiháicha umi enseñánsa Cristo omeʼẽ vaʼekue. Pesegíkena pehecha mbaʼeichagua persónapa peẽ” (2 Cor. 13:5). Upearã tekotevẽ jalee Ñandejára Ñeʼẽ, ñañehaʼã ñapensa haʼéicha ha ñakambia tekotevẽhápe ñaime hag̃ua porã Jehovándi (1 Cor. 2:​14-16). w23.01 9 párr. 5, 6