Agosto

Ko téxto ohechauka Jehová orekoha “peteĩ lívro” oanotahápe umi hénte réra. ¿Péro mbaʼeichagua persónapepa Jehová oanota? Umi oñemongetáva oñondive Jehováre ha ojepyʼamongetáva hérare. ¿Péro mbaʼérepa Jehovápe g̃uarã iñimportantete umi mbaʼe jaʼéva? Pórke umíva ohechauka mbaʼépa oĩ ñane korasõme. Jesús voi heʼi vaʼekue: “Umi mbaʼe omyenyhẽva ñane korasõ osẽ ñande jurúrupi” (Mat. 12:34). Jehová oipota umi ohayhúva chupe oiko pára siémpre pe múndo pyahúpe. ¿Mbaʼérepa iñimportantete avei umi mbaʼe jaʼéva? Pórke upévare odepende Jehovápa oaseptáta la ñane adorasión térãpa nahániri (Sant. 1:26). Umi hénte oĩva ko múndope iñeʼẽ arhél, ojahéi hapicháre, ha ijejapo (2 Tim. 3:​1-5). Péro ñande ndajajoguaseiete chupekuéra, ñande jaipota Jehová oguerohory umi mbaʼe jaʼéva. ¿Ha mbaʼépa Jehová opensáta ñanderehe ñanevuenoite guaʼúrõ rreunionhápe ha predikasiónpe, péro ñamaltrata ñane hentekuérape ñande rógape? (1 Ped. 3:7). w22.04 5 párr. 4, 5

Ñandejára omoĩta pe animál salváhe 10 hatĩva akãme peteĩ plan ohundi hag̃ua Babilonia Guasu. Jahechaháicha, Jehová omomýita umi goviérnope oipuru hag̃ua pe animál salváhe pytãitévape térã pe Organización de las Naciones Unídaspe ohundiete hag̃ua umi rrelihión fálsape (Apoc. 18:​21-24). ¿Mbaʼérepa iñimportánte ñandéve g̃uarã koʼã mbaʼe? Pórke ñanepytyvõ ñantende hag̃ua mbaʼépa jajapo vaʼerã ñameʼẽ hag̃ua Jehovápe “pe adorasión ipotĩva ha ndaikyʼáiva” henondépe (Sant. 1:27). Ñande ni mbaʼevéicharõ ndajaipotái ñanembotavy umi enseñánsa japu, avei ndajapartisipái umi fiésta oúvape umi rrelihión fálsagui, siémpre ñañehaʼãmbaite ñanderekopotĩ oiméramo jepe koʼág̃arupi la héntepe noimportavéima upéva, ha ni mbaʼevéicharõ ndajapraktikaséi mbaʼeveichagua espiritísmo. Avei ñañehaʼãmbaite ñaipytyvõ la héntepe oheja hag̃ua koʼã práktika, haʼete voi jaʼéva chupekuéra “pesẽke chugui”. Péicha ndojapomoʼãi hikuái mbaʼeve oheja vaítava chupekuéra Ñandejára renondépe (Apoc. 18:4). w22.05 11 párr. 17; 14 párr. 18

Tuakuéra, pehekákena oportunida peñeʼẽ hag̃ua pene famíliape Jehováre. Pemombeʼu chupekuéra umi mbaʼe haʼe ojapómava penderehehápe (Deut. 6:​6, 7). Koʼýte iñimportanteterei pejapo upéva oiméramo pene ména térã pene rembireko ndahaʼéi Testígo, ha upévare ndaikatúi pestudia la Biblia káda semána pene familiakuérandi. Peteĩ ermána hérava Cristina heʼi: “Heta vése ijetuʼueterei oréve roreko hag̃ua oportunida rostudia hag̃ua oñondive. Upévare añehaʼãmbaite aaprovecha káda ves ke ikatu ajapo upéva”. Peñehaʼãmbaitékena peñeʼẽ porã Jehová organisasiónre ha ermanokuérare. Ha iñimportanteterei avei peñeʼẽ porã umi ansiánore, upéicha pene família oikotevẽ vove ajúda ndokyhyjemoʼãi oñemoag̃ui hag̃ua hesekuéra. Peñehaʼãmbaitékena peiko hag̃ua pyʼaguapýpe pende rógape. Oimérõ nde peteĩ sy, siémprekena ehechauka ehayhuha ne ména ha ne membykuérape. Eñeʼẽ porã vaʼerã ne ménare ha ehechauka errespetaha chupe, emboʼe avei ne membykuérape ojapo hag̃ua upéva. Upéicha eipytyvõta hína ne família kompletoitépe ojogueraha porã hag̃ua, ha ifasilvéta ndéve emboʼe hag̃ua chupekuéra Jehovágui (Sant. 3:18). w22.04 18 párr. 10, 11

Jesús oguerohory vaʼekue pe kongregasión de Éfesope oaguanta haguére heta mbaʼe, ha osegi haguére oservi Jehovápe iprovléma hetáramo jepe. Péro heʼi avei chupekuéra ndohayhuveimaha hikuái Jehovápe anteve guaréicha, ha tekotevẽha ojapo upéva Jehová oasepta hag̃ua la iñadorasión. Ha upéicha avei ñande ndahaʼéi ñaaguanta reínte vaʼerã, pórke Jehovápe g̃uarã iñimportánte la jajapóva, péro iñimportánte hína avei mbaʼérepa jajapo upéva. Haʼe oipota ñande jaadora chupe jahayhúgui chupe ha ñambovyʼaségui chupe (Prov. 16:2; Mar. 12:​29, 30). Jasegi vaʼerã ñanekyreʼỹ Jehová servísiope. Umi ermáno oĩva kongregasión de Sárdispe oreko vaʼekue ótro provléma. Haʼekuéra ñepyrũrã ikyreʼỹeterei vaʼekue Jehovápe g̃uarã, péro tiémpo rire ou ikaigue hikuái. Upévare Jesús heʼi upe kongregasiónpe: “Epáykena” (Apoc. 3:​1-3). Jehová ningo ndahesaraimoʼãi umi mbaʼe jajapo vaʼekuégui anteve (Heb. 6:10). w22.05 3 párr. 6, 7

Ñambaʼapo pohýi jave ningo javyʼaiterei. Salomón heʼi vaʼekue péva haʼeha peteĩ rregálo Ñandejára omeʼẽva ñandéve (Ecl. 5:​18, 19). Ha Salomón heʼi vaʼekue upéva por experiénsia, pórke haʼe itravahadór vaʼekue. Haʼe omopuʼã vaʼekue heta óga, oreko heta parralty, umi hardín neporãva, heta póso, ha omopuʼã vaʼekue avei heta siuda (1 Rey. 9:19; Ecl. 2:​4-6). Salomón ojapo hag̃ua koʼã mbaʼe heta ombaʼapo vaʼerã kuri, ha upéva katuete ombovyʼáne raʼe chupe. Péro haʼe orrekonose oĩ hague ótra kósa ikatúva ombovyʼave chupe, upévare haʼe ombaʼapo vaʼekue Jehovápe g̃uarã. Por ehémplo, haʼe oñenkarga vaʼekue oñemopuʼã hag̃ua Jehová témplo, peteĩ projékto ipukúva 7 áño (1 Rey. 6:38; 9:1). Jahechaháicha, Salomón ojapo vaʼekue opaichagua traváho, péro upéi haʼe orrekonose ñambaʼapóramo añoite Jehová servísiope javyʼataha. Upévare haʼe heʼi: “Jahecha rire entéro koʼã mbaʼe, peteĩ mbaʼénte la iñimportánteva: rerrespeta vaʼerã Ñandejárape ha ejapo imandamiénto heʼíva” (Ecl. 12:13). w22.05 22 párr. 8

La Bíbliape jatopa hetaiterei ehémplo ohechaukáva Jehová oporoperdonaseha. ¿Mávapa ou ne akãme repensávo upévare? Oiméne repensa rréi Manasés rehe. Haʼe ojapo hetaiterei mbaʼe ivaíva Jehová kóntrape. Haʼe omokyreʼỹ vaʼekue umi héntepe oadora hag̃ua umi dios fálsope, ha umi itaʼýra teépe jepe ohapy sakrifísioramo umi dios fálsope. Avei omoĩ Jehová témplope umi dios raʼanga haʼe ojapo vaʼekue. La Biblia heʼi hese: “Haʼe ojapo hetaiterei mbaʼe ivaíva Jehová renondépe ombopochy hag̃ua chupe” (2 Crón. 33:​2-7). Manasés ojapóramo jepe koʼã mbaʼe, upe rire ohechauka oñarrepenti hague ipyʼaite guive, ha Jehová operdona chupe (2 Crón. 33:​12, 13). Térã ikatu avei repensa rréi David rehe. Haʼe ningo opeka kuri avei Jehová kóntrape, por ehémplo hekovaírõ guare ha oporojuka. Upéicharamo jepe, haʼe oñarrepentírõ guare ipyʼaite guive, Jehová operdona avei chupe (2 Sam. 12:​9, 10, 13, 14). Upévare ñande ñaimekuaa segúro Jehová oĩha ñaneperdona hag̃uáicha. w22.06 4 párr. 7

Heta vése ijetuʼu siémpre imbarete hag̃ua ñane esperánsa Jehováre. Sapyʼánte ikatu jaju nañanepasiensiavéi ñahaʼarõ aja Ñandejára okumpli ipromesakuéra. Péro Jehová etérno, ha haʼe ndohechái pe tiémpo ñande jahechaháicha (2 Ped. 3:​8, 9). Haʼe katuete okumplíta iporãveháicha umi ipromesakuéra, péro ikatu ndojapói upéva ñande ñahaʼarõháicha. ¿Mbaʼépa ñanepytyvõta ñamombarete hag̃ua ñane esperánsa ha jasegi vyʼápe ñahaʼarõ oñekumpli umi promésa? (Sant. 5:7). Jasegi Jehová ykére, pórke haʼe hína upe ogarantisáva oñekumplitaha katuete. La Biblia heʼi voi jareko hag̃ua esperánsa tekotevẽha jajerovia Jehová “oexistiha ha omyengovia porãha umi oñehaʼãvape ipyʼaite guive oadora chupe” (Heb. 11:​1, 6). Ñande pyʼaite guive jagueroviáramo Jehová oexistiha, ñaimevéta segúro haʼe okumplitaha ipromesakuéra. Osegi hag̃ua imbarete ñane esperánsa, tekotevẽ ñañemboʼe Jehovápe ha jalee Iñeʼẽ. Añetehápe ñande ndaikatúi jahecha Jehovápe, péro si ikatu oiko ñandehegui iñamígo. Ikatu ñañeʼẽ chupe ñañemboʼe jave, ha ñaime segúro haʼe ñanerendutaha (Jer. 29:​11, 12). w22.10 26, 27 párr. 11-13

Ñañeimahinamíntena Jóbpe oguapyha hína tanimbu kuápe ha osufriha ára ha pyhare (Job 2:8). Ha iñamigokuéra katu osegi oataka Jóbpe ha ojapo voi opa ikatúva oheja vai hag̃ua chupe. Koʼã mbaʼe ningo oheja yvýre Jóbpe, ha hiʼarive haʼe oñembyasyeterei kuri omanombaite haguére umi ifamiliakuéra. Primerorã Job ndeʼíri kuri mbaʼevete (Job 2:13). Oiméramo koʼã iñamígo guaʼu oimoʼã Job oheja reitaha Jehovápe, tuichaiterei ojavy hikuái. Peteĩ moméntope Job omaña iñamigokuéra guaʼúre ha heʼi chupekuéra: “Amano meve asegíta cheñeʼẽrendu” (Job 27:5). ¿Mbaʼépa oipytyvõ raʼe Jóbpe imbarete ha ipyʼaguasu hag̃ua ohasáramo jepe umi situasión ijetuʼuetéva? Pe ivaivérõ guare la isituasión jepe, haʼe ndodudái Jehová oipytyvõtaha chupe. Haʼe oikuaa omanóramo jepe, Jehová ikatuha omoingove jey chupe (Job 14:​13-15). w22.06 22 párr. 9

Pe yvága ha ko yvy Apohare ningo omeʼẽ ñandéve peteĩ rregálo ijojahaʼỹva: Haʼe opermiti ñandéve ñañemboʼe chupe. Epensamíntena ko mbaʼére: Ñande ikatu jaʼepaite Jehovápe umi mbaʼe jarekóva ñane korasõme oimeha óra ha oimeraẽ idiómape. Ñande ikatu ñañemboʼe chupe ñaiméramo tupápe peteĩ ospitálpe, térã kárselpe peteĩ kalavósope, ha jajerovia ñande Ru ñanderayhuetéva ñanerendutaha. ¡Ajépa tuichaite mbaʼe ko rregálo oñemeʼẽva ñandéve! Rréi David omombaʼeterei vaʼekue ikatu haguére oñemboʼe. Haʼe opurahéi voi Jehovápe: “Aipotaite che orasión oñepresenta ne renondépe pe insiénsoicha” (Sal. 141:​1, 2). David tiémpope pe insiénso sagrádo ojepuru vaʼekue ojeadora hag̃ua Jehovápe, ha umi saserdóte oñatende porã vaʼekue oprepara hag̃ua upéva (Éx. 30:​34, 35). Péicha avei David opensa porãse vaʼekue umi mbaʼe heʼítavare oñemboʼe jave Jehovápe, ha ñande avei jajaposeterei upéicha. Jaipota voi Jehovápe ogustaiterei umi ñane ñemboʼe. w22.07 20 párr. 1, 2; 21 párr. 4

Jahejákena Jehová pópe pe vengánsa. Jehová ningo nomeʼẽi ñandéve permíso ñañevenga hag̃ua umi opeka vaʼekuére ñane kóntrape (Rom. 12:​20, 21). Ñaneimperfékto rupi ndajahechái entéro mbaʼe oikóva, upévare ndaikatúi jahusga porã Jehová ojapoháicha (Heb. 4:13). Ikatu voi ipuʼaka ñanderehe umi mbaʼe ñañandúva ha ojapoka ñandéve peteĩ mbaʼe noĩporãiva. Jehová heʼi vaʼekue voi Santiago rupive: “Peteĩ kuimbaʼe ipochýva ndojapói iporãva Ñandejára renondépe” (Sant. 1:20). Ikatu ñaime segúro Jehová ojapotaha pe iporãvéva ha oñevengataha itiempoitépe. Ñaporoperdona jave jahechauka jajeroviaha Jehová hustísiare. Jahejáramo Jehová pópe koʼã mbaʼe, jahechaukáta hína jajeroviaha haʼe osolusionambaitetaha umi mbaʼe jahupytýva pe pekádo káusare. Pe múndo pyahu Jehová oprometévape, avave naimanduʼamoʼãvéima umi mbaʼe omoñeñandu vai vaʼekuére chupe ha ‘ojeietétama voi ikorasõgui’ (Is. 65:17). w22.06 10, 11 párr. 11, 12

Ikatu ñaime segúro umi hénte ndaijaʼéi rupi ñanderehe ohechaukaha Jehová ñandeguerohoryha (Mat. 5:​11, 12). Pe Diablo oñemoĩ ñane kóntrape, péro Jesús ipoderosoitereive chugui. Jesús osegi rupi ñanepytyvõ, ñande ikatúta japredika opárupi ko yvy tuichakuére. Jahechamína algúno ehémplo. Ñande japredikáva umi notísia porã ñambohovái avei ótra kósa ijetuʼúva: Japredika vaʼerã diferénte idiómape. Apóstol Juan ohecha vaʼekue peteĩ visión, upépe Jesús heʼi vaʼekue ñane tiémpope ojesupera vaʼerãha heta mbaʼe ijetuʼúva ojepredika hag̃ua umi notísia porã (Apoc. 14:​6, 7). Koʼág̃a ñande ñameʼẽ hína heta persónape la oportunida odesidi hag̃ua oaseptátapa umi notísia porã. Ñane tiémpope ko yvy tuichakuére heta persóna ikatu olee hetaiterei informasión bíblica ñande sítio jw.org-pe, pórke pype oĩ mas de 1.000 idiómape umi informasión. Pe Kuérpo Governánte oaprova kuri ojetradusi hag̃ua mas de 700 idiómape pe lívro ¡Jaikóta vyʼápe pára siémpre! w22.07 9 párr. 6, 7

Jesús ningo ombyasyeterei vaʼekue umi héntepe. Apóstol Mateo heʼi vaʼekue: “Jesús omañávo umi héntere ombyasyeterei chupekuéra, pórke ohecha mbaʼéichapa oñemaltrata umi héntepe ha isarambipaha hikuái. Umi hénte ojogua umi ovecha ndorekóivape pastór” (Mat. 9:36). ¿Ha mbaʼéichapa oñeñandu Jehová? Jesús heʼi: “Che Ru oĩva yvágape ndoipotái oñehundi ni peteĩ koʼã che disípulo iñumíldeva mitãicha jepe” (Mat. 18:14). ¡Ajépa ñanembovyʼaite upéva! Upévare amáske jaikuaa porãve Jesúspe, jahayhuvéta Jehovápe. Nde ikatu avei esegi eporohayhuve ha eprogresa ehasavéramo tiémpo umi ermáno ijerovia mbaretéva oĩvandi ne kongregasiónpe. Péicha ehechakuaáta mbaʼéichapa haʼekuéra ovyʼa ha noñarrepentíri odesidi haguére oservi Jehovápe. Ejerure chupekuéra tomombeʼu ndéve umi experiénsia porã oguereko vaʼekue oservívo Jehovápe. Ha oiméramo redesidi vaʼerã peteĩ mbaʼe iñimportánteva, ejerurékena chupekuéra konsého. Nemanduʼákena, “opa mbaʼe osẽ porãve oĩháme heta persóna omeʼẽva konsého”. w22.08 3 párr. 6, 7

Entéronte ñambohováita algúna pruéva, péro núnka nañaimemoʼãi ñaneaño. Ojapoháicha peteĩ túa iñamorósova, Jehová siémpre omaña ñanderehe. Haʼe oĩ ñanendive ha siémpre ñanerendu jajerure asy jave chupe ñanepytyvõmi hag̃ua. Ha avei oĩ ñande ykére ñandeapoja hag̃ua (Is. 43:2). Ñande ñaime segúro ikatuha ñambohovái umi situasión ijetuʼúva, pórke Jehová omeʼẽ ñandéve entéro mbaʼe ñaikotevẽva ñaaguanta hag̃ua. Por ehémplo, pe ñemboʼe, la Biblia, heta informasión omombaretéva ñande jerovia, umi ermáno ñanderayhuetereíva ha ñanepytyvõva ñaikotevẽ jave. Ñande jaagradeseterei jareko haguére peteĩ Túa oĩva yvágape ha omañáva ñanderehe. Añetehápe upéva ‘ñanembovyʼaiterei’ (Sal. 33:21). ¿Mbaʼéichapa ikatu jaagradese Jehovápe okuida porãite haguére ñanderehe? Jaaprovechapaite entéro mbaʼe haʼe omeʼẽva ñandéve ñanepytyvõ hag̃ua, ha ñamoĩ ñande párte haʼe osegi hag̃ua okuida ñanderehe. Upéva heʼise tekotevẽha ñañehaʼãmbaite siémpre ñaneñeʼẽrendu chupe ha jajapo umi mbaʼe haʼe heʼíva oĩ porãha. Upéicha jajapóramo, haʼe omañáta ñanderehe pára siémpre. w22.08 13 párr. 15, 16

Heta hénte ningo koʼág̃arupi ndoikuaavéima mávarepa ikatu okonfia. Heta oĩ orrespetáva umi polítikope, umi sientífiko ha umi komersiántepe, péro ndoikuaái hikuái iñintensión porãpa hína. Avei ndorrespetái hikuái umi líder rrelihiósope heʼíva ijehe kristianoha. Upévare ndajahecharamói koʼã hénte ndojeroviaiha la Bíbliare, pórke umi líder rrelihióso heʼi guaʼu osegiha pe gía omeʼẽva la Biblia. Enterove Jehová siervokuéra ñaime konvensído Ñandejáragui ouha pe añetegua, ha haʼe siémpre oipotaha pe iporãvéva ñandéve g̃uarã (Sal. 31:5; Is. 48:17). Ñande jaikuaa porã umi mbaʼe jaleéva la Bíbliape haʼeha la verda. Ñande ñaime de akuérdo peteĩ biblista heʼi vaʼekuéndi: “Ñandejára ningo ndaijapúi ni michĩmi entéro mbaʼe heʼívape, ha ndaipóri ni peteĩ posivilida haʼe ojavýne hag̃ua. Ñandejára puévlo ojerovia la haʼe heʼívare, pórke haʼekuéra okonfia hese”. w23.01 2 párr. 1, 2

Ñande ñamokyreʼỹ hína ñane ermanokuérape ñamombarete jave ijeroviakuéra Jehováre. Oĩ umi oaguanta vaʼerã umi hénte ndahaʼéiva Testígo oñembohory jave hesekuéra. Oĩ avei umi orekóva umi mbaʼasy igráveva, térã ijetuʼúva chupe ombohovái hag̃ua umi mbaʼe omoñeñandu vaíva chupe. Nañanderesaráiri avei umi ojapómavagui hetaiterei áño ohaʼarõha oñehundi ko múndo aña. Koʼã situasión ikatu omoĩ a pruéva ñane ermanokuéra jerovia koʼág̃arupi. Apóstol Pablo oipuru vaʼekue Ñandejára Ñeʼẽ omombarete hag̃ua umi ermanokuéra upe tiempopeguápe. Por ehémplo, ikatu oime umi kristiáno judío ndoikuaái mbaʼépa heʼíta umi ihentekuéra heʼi jave chupekuéra: “Umi mbaʼe ogueroviáva umi judío ningo iporãve umi mbaʼe ogueroviávagui umi kristiáno”. Katuete pe kárta Pablo oskrivi vaʼekue umi hebréope tuichaiterei omombarete vaʼekue chupekuéra (Heb. 1:​5, 6; 2:​2, 3; 9:​24, 25). Umi mbaʼe heʼíva Pablo oipytyvõne raʼe chupekuéra oikuaa hag̃ua mbaʼépa heʼíta umi oñemoĩvape hesekuéra. w22.08 23 párr. 12-14

Umi hénte ko mundopegua ndoikuaái máva rehepa okonfiáta. Chupekuéra pyʼỹinte odesepsiona umi komersiánte, umi polítiko ha umi rrelihión omoakãva. Upéva káusare ijetuʼúma avei chupekuéra okonfia hag̃ua iñamigokuérare, ivesínore ha ifamíliare jepe. Péro upéva nañanesorprendéi, pórke la Biblia heʼi voi: ‘Umi ára pahápe umi hénte ombotavýta hapichápe, oñeʼẽ reíta ótrore, itraisionérota’. Upéva heʼise umi hénte okopiataha Satanás lája, upévare ndaikatúi ñakonfia hesekuéra (2 Tim. 3:​1-4; 2 Cor. 4:4). Péro ñande jaikuaa ikatuha jajerovia Jehová rehe ñande pyʼaite guive. Ñande jaikuaa porã haʼe ñanderayhuha, ha ‘núnka ndohejareimoʼãiha’ umi iñamigokuérape (Sal. 9:10). Avei ñande ikatu ñakonfia Jesúsre, pórke haʼe omeʼẽ vaʼekue hekove ñanderehehápe (1 Ped. 3:18). Ha jahecháma avei la Biblia ikatuha ñanepytyvõ ha jajeroviakuaaha hese (2 Tim. 3:​16, 17). w22.09 2 párr. 1, 2

Peteĩ persóna ovyʼa añetéva ndahaʼéi ovyʼáva sapyʼaiténte ha upéi ndovyʼavéi jeýmava, síno tódo el tiémpo oñeñandu porã. ¿Mbaʼérepa ikatu jaʼe upéva? Jesús oexplika vaʼekue pe Sermón del Móntepe: “Ovyʼa umi ohechakuaáva oikotevẽha Ñandejárare” (Mat. 5:3). Jesús oikuaa vaʼekue yvyporakuérape ojejapo hague oreko hag̃ua pe deséo oikuaa ha oadora hag̃ua Ijapohare Jehovápe. Ha upéva hína la heʼiséva ‘jahechakuaa ñaikotevẽha Ñandejárare’. Jehová haʼe ‘Ñandejára ovyʼáva’, upévare entéro umi oadoráva chupe ikatu avei ovyʼa (1 Tim. 1:11). ¿Heʼisépa upéva javyʼa añete hag̃ua ndajarekói vaʼerãha provléma? Nahániri. Pe Sermón del Móntepe Jesús heʼi vaʼekue ovyʼaha “umi oñembyasýva” ha ‘umi ojepersegíva’ (Mat. 5:​4, 10, 11). Jesús ñanemboʼe vaʼekue javyʼa hag̃ua nodependeiha umi mbaʼe jahasávare, síno jahechakuaa vaʼerãha ñaikotevẽha Ñandejárare ha ñañemoag̃ui hese (Sant. 4:8). w22.10 6 párr. 1-3

Pe arandu oipytyvõ peteĩ kristiánope oikuaa hag̃ua arakaʼépa ‘pe tiémpo okirirĩ hag̃ua ha pe tiémpo oñeʼẽ hag̃ua’ (Ecl. 3:7). Oĩ kultúra ojepuruhápe ko ñeʼẽnga: “Umi mbaʼe jaʼéva ojogua plátape, péro oroite hína ñakirirĩramo”. Upéva heʼise hetave vése iporãveha ñakirirĩ, ñañeʼẽ rangue. Jahechamína peteĩ ansiáno de experiénsia ehémplo. Chupe ningo pyʼỹinte ojejerure oipytyvõ hag̃ua diferénte kongregasiónpe ombohováiva hína algún provléma. Ótro ansiáno heʼi voi ko ermánore: “Haʼe ningo siémpre oñatende ani hag̃ua omombeʼu umi informasión ndovaléiva ojekuaa umi kongregasión rehegua”. Ko ansiáno iñexperiénsiava iñarandu rupi, umi ótro ansiáno ikongregasiongua orrespeta chupe, pórke oikuaa porã ndoikomoʼãiha omombeʼu umi téma konfidensiál. Ñaneonrrádoramo avei tuichaiterei ñanepytyvõta oñekonfia hag̃ua ñanderehe. Ndahasyiete ñakonfia hag̃ua peteĩ persóna iñonrrádovare, pórke jaikuaa haʼe siémpre heʼitaha la siertoguáva (Efes. 4:25; Heb. 13:18). w22.09 12 párr. 14, 15

Heta oĩ orrechasáva pe arandu añeteguáva, nohenduséi hikuái ‘pe arandu oñeʼẽ jave pe kállere’ (Prov. 1:20). Heʼiháicha la Biblia oĩ tres grúpo de persóna orrechasáva pe arandu: Umi ‘kuimbaʼe ndorekóiva experiénsia’, ‘umi oñembohorýva hapicháre’, ha ‘umi ivýrova’ (Prov. 1:​22-25). Umi ‘ndorekóiva experiénsia’ oguerovia entéro mbaʼe ojeʼéva chupe ha ifásil oñembotavy hag̃ua chupekuéra (Prov. 14:​15, nóta). Ñapensamíntena umi persóna tuicha ombotavývare chupekuéra umi omoakãva irrelihión térã umi polítiko. Heta vése tuicha oñemondýi hikuái oikuaa jave umi omoakãva chupekuéra ijapuha oikóvo. Péro heʼiháicha Proverbios 1:​22, umi kuimbaʼe ndorekóiva experiénsia osegise péicha ha nokambiaséi (Jer. 5:31). Umichagua orrechasa la Biblia heʼíva, pórke noĩséi hikuái rresponsávle umi mbaʼe ojapóvare. Ajépa ndajajoguaseiete peichagua persónape, ndohechaukáiva ni michĩmi iñaranduha (Prov. 1:32; 27:12). w22.10 19 párr. 5-7

Jehová organisasión pyʼỹinte omeʼẽ ñandéve umi instruksión jajeprotehe hag̃ua oiko jave sarambi. Sapyʼánte ñanemomanduʼa jey ñameʼẽ vaʼerãha ñane número de teléfono umi ansiánope, oñekomunika hag̃ua ñanendive oikórõ g̃uarã algúna emerhénsia. Jehová organisasión ikatu avei omeʼẽ ñandéve umi instruksión jajeprotehe hag̃ua, jaheja peteĩ lugár, o ñakonsegi hag̃ua umi mbaʼe ñaikotevẽva oiko jave sarambi. Ha ikatu avei heʼi ñandéve arakaʼe ha mbaʼéichapa ikatu ñaipytyvõ ótrope. Nañaneñeʼẽrendúiramo, ikatu jajapeligra ñande voi ha avei umi ansiánope. Haʼekuéra oñehaʼãmbaite hína ñandeprotehe hag̃ua (Heb. 13:17). Oiko rupi sarambi térã umi hénte oñorairõmba rupi oñondive, heta ermáno ova pe lugár oikohágui. Péro ojapo ikatúva guive ojadapta hag̃ua hikuái upe situasión pyahúre, ha osegi hag̃ua oĩ aktívo Jehová servísiope. Okambiáramo jepe isituasionkuéra ha oiko peteĩ lugár pyahúpe, haʼekuéra ensegída oñehaʼã opredika jey ojapo haguéicha avei umi kristiáno ojepersegi vaʼekue síglo primérope (Hech. 8:4). Pe predikasión oipytyvõiterei chupekuéra opensa meme hag̃ua Ñandejára Rréinore ha ani iprovlemakuérare. Upéicha rupi osegi ovyʼa ha ipyʼaguapy hikuái. w22.12 19, 20 párr. 12, 13

Jehová ñandevalora káda únope. Jesús omondo mboyve idisipulokuérape opredika hag̃ua, oipytyvõ chupekuéra ani hag̃ua okyhyje oĩrõ g̃uarã oñemoĩva hesekuéra (Mat. 10:​29-31). Upearã oñeʼẽ chupekuéra peteĩ guyra ikonosidoitereívare oĩva Israélpe: Pe gorrión. Upe tiémpope umi gorrión varatoiterei vaʼekue. Upéicharõ jepe Jesús heʼi chupekuéra: “Ni peteĩ gorrión ndoʼái yvýpe pende Ru oĩva yvágape oikuaaʼỹre”, ha oasegura idisipulokuérape: “Peẽ ningo pevaleve heta gorrióngui”. Péicha Jesús omboʼe idisipulokuérape Jehová ovaloraha káda únope. Upéva oipytyvõ chupekuéra ani hag̃ua okyhyje pe persekusióngui. Katuete umi disípulo imanduʼáne raʼe Jesús ehémplore káda ves ke ohecha umi gorrión opredika jave umi puévlo ha aldéarupi. Nde avei rehecha vove peteĩ guyraʼi nemanduʼákena nde Ru yvagapegua ndevaloraitereiha, pórke nde ‘revaleve heta gorrióngui’. Ha Jehová nepytyvõ rupi ikatúta regueropuʼaka oimérõ oĩ oñemoĩva nderehe. w23.03 18 párr. 12

Sapyʼánte ikatu ñambohovái diferénte provléma, ikatu ñane hentekuéra oñemoĩ ñanderehe térã japerde ñande traváho. Ñaaguanta jave peteĩ provléma heta tiémporema, ikatu japerde la esperánsa ha ñañedesanima. Satanás oaprovecha koʼã situasión ñapensa hag̃ua Jehová nañanderayhuiha. Haʼe oipota jaduda ha ñapensa Jehová térã iñorganisasión kúlpare la jasufriha. Upéicha lénto oiko vaʼekue unos kuánto israelítare Egíptope. Ñepyrũrã haʼekuéra oguerovia vaʼekue Jehová onombra hague Moisés ha Aarónpe oguenohẽ hag̃ua chupekuéra Egíptogui (Éx. 4: 29-31). Péro upéi Faraón oúrõ guare ombohasa asyeterei chupekuéra, oñepyrũ okulpa hikuái Moisés ha Aarónpe (Éx. 5: 19, 20). ¡Ajépa ñambyasyete haʼekuéra okulpa haguére koʼã Ñandejára siérvo ifieletévape! Oiméramo nde heta tiémporema reaguanta umi provléma, emombeʼupaite Jehovápe umi mbaʼe reñandúva ha eheja haʼe tanepytyvõ. w22.11 15 párr. 5, 6

Jehová omeʼẽ vaʼekue ñandéve la vída, ha avei oreko la kapasida omoingove jeývo umi omano vaʼekuépe. Haʼe omeʼẽ vaʼekue upe podér proféta Elíaspe omoingove jey hag̃ua peteĩ viúda memby oikóvape Saréptape (1 Rey. 17:​21-23). Tiémpo rire, proféta Eliseo rupive Jehová omopuʼã vaʼekue peteĩ kuñakarai Sunemgua membýpe (2 Rey. 4:​18-20, 34-37). Koʼãva ha hetave rresurreksión ohechauka porãiterei Jehová orekoha pe podér omoingove jey hag̃ua umi omano vaʼekuépe. Ha Jesús oĩrõ guare ko yvy ape ári ohechauka porã Jehová omeʼẽ hague avei chupe upe podér (Juan 11:​23-25, 43, 44). Koʼág̃a Jesús oĩma yvágape ha oñemoĩma ipoguýpe “entéro mbaʼe oĩva yvágape ha ko yvy ape ári”. Upéicha rupi haʼe ikatúta okumpli pe ipromésa: “Enterove umi oĩva pe sepultúrape” oikove jeýta oreko hag̃ua la oportunida oikovévo pára siémpre (Mat. 28:18; Juan 5:​26-29). w22.12 5 párr. 10

Umi hénte orrechasávo Ezequiélpe, orrechasa hína Jehovaitépe voi. La heʼíva pe téxto koestediagua oasegura Ezequiélpe umi hénte ndorrechasái hague chupe ojapo vai haguére hembiapo kómo proféta. Jehová oasegura vaʼekue avei Ezequiélpe ág̃a oñekumpli vove pe huísio oanunsiáva, umi hénte oikuaataha “peteĩ proféta oĩ hague ijapytepekuéra” (Ezeq. 2:5; 33:33). ¡Mbaʼeichaitépa oiméne ombopyʼaguapy rakaʼe koʼã mbaʼe Ezequiélpe ha omombarete chupe osegi hag̃ua opredika! Ñandéve avei ñanemombarete jaikuaávo Jehová ñanemondo hague japredika hag̃ua. Haʼe ñanemombaʼe heʼívo ñanderehe haʼeha Itestígo (Is. 43:10). ¡Ajépa tuichaite priviléhio upéva! Jehová heʼi hagueichaite Ezequiélpe: “Ani rekyhyje”, koʼág̃arupi heʼi avei ñandéve: “Ani pekyhyje” (Ezeq. 2:6). ¿Mbaʼérepa ndajakyhyjéi vaʼerã umi oñemoĩvagui ñane kóntrape? Pórke Ezequiel rehe oiko haguéicha, ñandéve ñanemondo hína Jehová ha haʼe ñandeapoja (Is. 44:8). w22.11 3, 4 párr. 4, 5

Ñande ñamombaʼeterei umi ansiáno ha siérvo ministeriál oĩva ñane kongregasiónpe ohechaukáva ikatuha ojejerovia hesekuéra. Añetehápe jahechakuaa umi ansiáno ha siérvo ministeriál okuida porãitereiha ñanderehe. Jaagradese Jehovápe omeʼẽ haguére ñandéve koʼã ermáno. ¿Péro mbaʼéichapa ñande ikatu jahechauka haʼeha peteĩ persóna de konfiánsa? Ñande jahayhueterei ñane ermanokuérape, ha jajepyʼapy umi mbaʼe ohasávare hikuái. Péro ñandeekilivrádo vaʼerã ha jarrespeta chupekuéra. Pe kongregasión kristiána síglo primero guarépe oĩ vaʼekue ‘umi ichismósova, oñentremetéva ótro ojapóvare ha oñeʼẽva oñeʼẽʼỹ vaʼerãre’ (1 Tim. 5:13). Añetehápe ñande ndajajoguaséi chupekuéra. Epensamíntena peteĩ persóna omombeʼuha ñandéve peteĩ mbaʼe, ha ojerure ani hag̃ua ñamombeʼu ótrope. Por ehémplo, peteĩ ermána ikatu omombeʼu ñandéve oguerekoha peteĩ mbaʼasy térã ohasaha hína peteĩ situasión ijetuʼúvare, ha ojerure ani hag̃ua ñamombeʼu ótrope. Upéicha jave jarrespeta vaʼerã chupe, ha jajapo la haʼe ojeruréva ñandéve. w22.09 10 párr. 7, 8

Pe téxto heʼi ñambopyahu vaʼerãha ‘ñapensa lája’, upéva ndeʼiséi jajapónte vaʼerãha iporãva. Upévare ikatu jaʼe upe kámbio ñañepyrũ vaʼerãha jajapo ñande pyʼapýgui voi. Upéicha rupi tekotevẽ ñanesinséro porã, ha jahecha mbaʼépa ñapensa ha ñañandu. Ha japilláramo oĩha álgo noiporãiva, pyaʼe ñakambiaite vaʼerã ikatu hag̃uáicha jajoguave Jehovápe. Ha upéva ndaikatúi jajapo una vénte, síno jajapo vaʼerã kontinuadoite voi. Ág̃a ñandeperfékto vove ikatúta jajapo porã entéro mbaʼe ha siémpre ñambovyʼáta Jehovápe. Péro koʼág̃a jasegímante vaʼerã ñañehaʼã ñakambia hag̃ua. Romanos 12:​2-pe apóstol Pablo ohechauka ñambopyahu vaʼerãha ñapensa lája ñantende hag̃ua mbaʼépa Jehová oipota jajapo. Upévare ndaikatúi japyta jajekuʼako ha ñapermiti mbeguekatúpe ko múndo opensa lája ova ohóvo ñanderehe. Upéva rangue, jahecha vaʼerã mbaʼetekópa ñaime ha ñapensápa hína Jehová opensaháicha ha upéva ogiáta umi mbaʼe jadesidíva ha jajaposéva. w23.01 8, 9 párr. 3, 4

¿Serápa Jehová oñentremete entéro umi pruéva jahasávape? ¿Serápa Jehová omaneha entéro mbaʼe vai ojehúva ñandéve orekógui álgo planeádo ñandéve g̃uarã? Nahániri, la Biblia ndeʼíri upéva (Ecl. 8:9; 9:11). Péro si ikatu ñaĩ segúro Jehová oikuaaha entéro mbaʼe jahasáva ha ohenduha jajerure asy jave chupe ajúda (Sal. 34:15; Is. 59:1). Ha la iporãveha haʼe ikatu ñanepytyvõ ñaaguanta hag̃ua oimeraẽ situasión ijetuʼúva jahasáva. ¿Mbaʼéichapa haʼe ojapo upéva? Por ehémplo, Jehová ñanepytyvõ, ñanekonsola ha ñanemokyreʼỹ itiempoitépe (2 Cor. 1:​3, 4). ¿Ha mbaʼépa ikatu jaʼe ñandejehe? ¿Ñanemanduʼápa Jehová ñanepytyvõ, ñanekonsola ha ñanemokyreʼỹ hague ñaikotevẽve jave? Pyʼỹinte opa rire ae peteĩ situasión ijetuʼúva japilla mbaʼéichapa Jehová oĩ kuri ñande ykére tódo el tiémpo. w23.01 17, 18 párr. 13-15

Juan ohecha peteĩ animál salváhe ojoguaitereíva pe animál salváhe 7 iñakãvape, péro oĩ peteĩ diferénsia, ko animál salváhe pytãite. Avei ojeʼe hese haʼeha pe “animál salváhe raʼanga” ha peteĩ rréi, “pe ochoha” (Apoc. 13:​14, 15; 17:​3, 8). Ko rréire ojeʼe oexisti hague, péro upéi ndoexistivéima hague ha amo ipahápe oaparese jey hague. Péva pe deskripsión opyta porãiterei pe Organización de las Naciones Unidas rehe, hiʼarive ko organisasión siémpre omotenonde umi mbaʼe oipotáva umi polítiko oĩva ko múndope. Ko organisasión oexistíma vaʼekue anteve ha oñehenói chupe Líga de Naciones. Péro upe organisasión opaite vaʼekue pe segunda gérra mundiál aja, ha upéi katu oaparese jey ñane tiémpope péro oñehenóima chupe Organización de las Naciones Unidas térã ONU. Umi goviérno omosarambi heta propagánda omomýi hag̃ua la héntepe opuʼã hag̃ua Jehová puévlore. Upéicha haʼete ombyatýva hikuái ‘entéro umi rréi ko yvy ariguápe’ oñorairõ hag̃ua pe gérra de Armagedónpe, haʼéva pe gérra “oikótava Ñandejára Todopoderóso ára guasúpe” (Apoc. 16:​13, 14, 16). w22.05 10 párr. 10, 11

Jesús oaprende vaʼekue olee hag̃ua ijeheguiete Ñandejára Ñeʼẽ. Upévare haʼe ndahaʼéi oikuaa porãnteva Ñandejára Ñeʼẽ heʼíva, síno omombaʼeterei ha oheja voi ogia chupe umi mbaʼe ojapóvape. Por ehémplo, oiméne ñanemanduʼa la oiko vaʼekuére pe témplope Jesús orekórõ guare 12 áño. Upépe oĩ vaʼekue umi mboʼehára oikuaa porãva Moisés léi, ha haʼekuéra “tuicha oñesorprende ohechávo mbaʼeichaitépa [Jesús] ontende heta mbaʼe ha okontesta la oñeporandúva chupe” (Luc. 2:​46, 47, 52). Ñande avei ikatu jaikuaa ha ñamombaʼeterei Ñandejára Ñeʼẽ amedída ke jalee. Upéva ñanemboʼéta la Jesús heʼi vaʼekue umi oikuaa porãvape pe Moisés léi, umíva apytépe umi eskríva, umi fariséo ha umi saduséo. Umi líder rrelihióso pyʼỹinte olee vaʼekue Ñandejára Ñeʼẽ, péro chupekuéra ndaideprovéchoi la oleéva. Jesús ohechauka vaʼekue mbohapy mbaʼe ikatúva ojapo hikuái ideprovechove hag̃ua chupekuéra Ñandejára Ñeʼẽ. Umi mbaʼe ñandéve avei ñanepytyvõta: 1) Ñantende hag̃ua mbaʼépa la jaleéva, 2) jatopa hag̃ua umi tesóro, ha 3) jaheja hag̃ua Ñandejára Ñeʼẽ ñandegia. w23.02 8, 9 párr. 2, 3

Umi mbaʼe la Biblia heʼíva ñamboyke vaʼerãha apytépe oike hína: Jajegustapa rei, ñamokõ rasa, umi entretenimiénto naiporãiva ha pornografía (Sal. 101:3). Satanás kontinuadoite oñehaʼã ñanemomombyry Jehovágui, ha péicha ombyai hag̃ua pe amista jarekóva hendive (1 Ped. 5:8). Upévare japillaʼỹre ikatúma jaju ñaneenvidióso, nañaneonrradovéi, ñandetaryrýi, ndajachaʼéi ñande rapicháre, ñandeorgullóso, térã ñandepyʼaro (Gál. 5:​19-21). Peteĩ plántaicha avei ikatu koʼã mbaʼe oñepyrũ oñembohapo ñane korasõme, okakuaa, ha upéi ñaneprovléma (Sant. 1:​14, 15). Peteĩva umi pelígro ikatúva oñepresenta ñandéve ñañemeʼẽʼỹre enkuénta haʼe hína umi júnta vai. Ñande ñaneamávle enterovéndi, péro ñanemanduʼa vaʼerã ñane júnta oafektaha umi mbaʼe ñapensáva ha jadesidíva (1 Cor. 15:33). Jasegíramo Jesús konsého ndajahasamoʼãi hetaiterei tiémpo umi ndahaʼéivandi Testígo (Luc. 21:34; 2 Cor. 6:15). Ha jahechakuaáta umi pelígro oñepresenta mboyve jepe ha jajehekýita umívagui. w23.02 16 párr. 7; 17 párr. 10, 11

Nde ningo amás día rehayhuve Jehovápe pórke reikuaa porãve chupe. Katuete reñemoag̃uiseve hese koʼág̃a ha avei pára siémpre voi. Ha ikatu rejapo upéva. Haʼe mborayhúpe nemokyreʼỹ embovyʼa hag̃ua ikorasõ (Prov. 23:​15, 16). Upéva ikatu rejapo ndahaʼéi umi mbaʼe eréva rupivénte síno umi mbaʼe rejapóva rupive avei. Upévare reikóramo Jehová oipotaháicha, rehechaukáta rehayhuha chupe. Ha upéva hína pe mbaʼe iporãvéva ikatúva redesidi. ¿Mbaʼéichapa ikatu rehechauka rehayhuha Jehovápe? Primerorã, ejapo vaʼerã peteĩ orasión espesiál ere hag̃ua pe úniko Dios verdadérope emeʼẽha chupe nde rekove (Sal. 40:8). Upéi, ejevautisa vaʼerã umi hénte renondépe ojekuaa hag̃ua reñemeʼẽma hague Ñandejárape. Javyʼaiterei jajevautisa jave, ha upéva haʼe peteĩ día iñimportantetereíva. Upe día guive ndereikovéima remeʼẽ hag̃ua gústo ndejupe, síno reikove Jehovápe g̃uarã (Rom. 14:8; 1 Ped. 4:​1, 2). Upéva haʼetévaicha peteĩ desisión iñimportantetereíva, ha añetehápe upéicha hína. Péro upéva omeʼẽta ndéve la oportunida ereko hag̃ua peteĩ vída ijojahaʼỹva. w23.03 5, 6 párr. 14, 15