Julio

Ñande jareko la kapasida ñañeʼẽ hag̃ua, ha upéva peteĩ rregálo iporãitereíva Jehová omeʼẽ vaʼekue ñandéve. Péro upe kapasida ojepuru vai vaʼekue. Satanás ijapu vaʼekue Évape ha upéicha rupi koʼág̃a ñande japeka ha ñamano (Gén. 3:​1-4). Upéi Adán oipuru vai vaʼekue upe avilida okulpa rupi Évape ha Jehovápe jepe la mbaʼe vai haʼe ojapo vaʼekuére (Gén. 3:12). Caín avei ijapu vaʼekue Jehovápe ojuka rire iñermáno Abélpe (Gén. 4:9). Koʼág̃arupi umi pelíkulape kási siémpre osẽ umi persóna ijurutieʼỹva. Ha jahecha avei mbaʼéichapa umi huventu ha umi mitã jepe iformaleterei ha itieʼỹeterei, ha umi kakuaa upéichante avei. Ikatu hína jajepokuaaitereíma ñahendu umichagua mbaʼe, ha upéicha rupi jajedeskuida ha ñañepyrũma avei ñañeʼẽ haʼekuéraicha. Péro ñande kristianokuéra ñambovyʼase Jehovápe, upévare ndajaikói vaʼerã ñandejurutieʼỹ. Ñande jaipuruse ko kapasida jarekóva ñamombaʼeguasu hag̃ua Jehovápe. w22.04 4 párr. 1-3

Jesús ohechakuaa vaʼekue avei pe pláta iñimportanteha, ha ndahaʼéi vaʼekue ku oiko asýva tódo el tiémpo (Luc. 19:​2, 6, 7). Por ehémplo pe primer milágro haʼe ojapo vaʼekuépe okonverti vaʼekue y peteĩ víno iporãitereívape (Juan 2:​10, 11). Ha avei haʼe omano mboyvemi oipuru vaʼekue peteĩ ao hepyetereíva (Juan 19:​23, 24). Péro upéicharõ jepe, Jesúspe g̃uarã pe pláta ndahaʼéi vaʼekue pe iñimportantevéva. Jesús heʼi vaʼekue ñande ñamotenondéramo Ñandejára Rréino, Jehová katuete omeʼẽtaha ñandéve umi mbaʼe ñaikotevẽva (Mat. 6:​31-33). La Bíbliape jatopa heta konsého porã oñeʼẽva pe plátare, ha hetápe ovenefisiáma koʼã konsého. Por ehémplo, peteĩ ermáno hérava Daniel heʼi: “Chemitãme che adesidi vaʼekue amotenondetaha Jehová servísio”. Daniel oiko rupi sensillomínte orekóma la priviléhio opartisipávo hetaiterei projékto ojapóvape Jehová organisasión”. Haʼe heʼi: “Ndaipóri pláta ikatu vaʼerã omeʼẽ chéve umi mbaʼe porãita ahupytýva aservi rupi Jehovápe”. w22.05 21, 22 párr. 6, 7

Ikatu jahechauka javaloraha pe añetegua, jastudia meméramo la Biblia ha umi ñane puvlikasionkuéra. Noimportái mboy tiémpomapa jaservi Jehovápe, siémpre ikatu jasegi ñaaprendeve chugui. Traváho pohýi hína jastudia, péro ovale la péna ñañehaʼã hese. Naentéroipe ñandegusta jalee térã jastudia. Péro Jehová ñaneinvita ‘jasegi hag̃ua jaheka’ ikatu hag̃uáicha ñantende porãve pe añetegua (Prov. 2:​4-6). Ha ñande jajapóramo upéicha, katuete ñañevenefisiáta. Oñeʼẽvo pe ijestúdio personál rehe, Corey heʼi oñehaʼãha ostudia porã peteĩ versíkulo. Haʼe omombeʼu: “Alee káda nóta, aheka káda rreferénsia ha ahekave informasión oñeʼẽva upe versíkulore. Astudiávo péicha aaprendeve la Biblia omboʼéva”. Oiméramo jajepokuaa jastudia péicha térã ótro hendáicha, ñañemotiémpo vaʼerã ha ñañehaʼã jastudia jahechauka hag̃ua ñamombaʼeha pe añetegua (Sal. 1:​1-3). w22.08 17 párr. 13; 18 párr. 15; 19 párr. 16

Jesús oĩrõ guare ko yvy ape ári oñeʼẽ vaʼekue pe kreasiónre oipytyvõ hag̃ua idisipulokuérape oikuaave hag̃ua Jehovápe. Jahechamína mbaʼépa omboʼe vaʼekue. Jehová ohayhu enterovépe. Pe Sermón del Móntepe, Jesús oñeʼẽ mokõi mbaʼe Jehová okrea vaʼekuére: Pe kuarahy ha pe ama. Sapyʼánte ndajahecharamovéi koʼã mokõi mbaʼe, péro añetehápe iñimportanteterei jasegi hag̃ua jaikove. Jehová oporohayhu rupi oheja osẽ pe kuarahy ha omongy enterovépe g̃uarã, ha ndahaʼéi isiervokuérape g̃uarãnte (Mat. 5:​43-45). Jesús oipuru ko ehémplo omboʼe hag̃ua idisipulokuérape Jehová oipotaha jahayhu enterovépe. Upéicharõ, ág̃a jahecha jey vove pe kuarahy pytãite oikeha ohóvo, térã ñañandu mbaʼéichapa ipiroʼy opytávo oky kangymi rire, ñanemanduʼákena Jehová ohayhuha enterovépe ha nomboykeiha avavépe. Jajepyʼamongetárõ Ñandejára ehémplore, ñanekyreʼỹvéta japredika hag̃ua entéro héntepe jahayhúgui chupekuéra. w23.03 17 párr. 9, 10

¿Mbaʼéiko osorprendete apóstol Juánpe? Haʼe heʼi ohecha hague peteĩ kuña oĩha peteĩ animál salváhe pytãitéva ári. Heʼi péva haʼeha peteĩ “kuña rekovai” oñehenóiva avei “Babilonia Guasu”. Ha heʼi hese ‘umi rréi yvy arigua hekovaiha hendive’ (Apoc. 17:​1-5). ¿Mávapepa orrepresenta “Babilonia Guasu”? Ko kuña ndaikatúi orrepresenta umi goviérnope, pórke ojeʼe hese hekovaiha umi rréi ko yvy ariguándi (Apoc. 18:9). Avei haʼe oñehaʼã okontrola koʼã goviérnope, upévare ojeʼe hese oĩha pe animál salváhe ári. Ndaikatúi avei jaʼe ko kuña orrepresentaha pe sistéma komersiál oĩvape Satanás múndope, pórke la Biblia oñeʼẽ apárte ‘umi komersiánte yvy ariguáre’ (Apoc. 18:​11, 15, 16). Entéro umi enseñánsa japu oĩva koʼág̃arupi oñepyrũ vaʼekue Babilóniape. Jarekóvo enkuénta koʼã mbaʼe, ikatu jaʼe Babilonia Guasu orrepresentaha entéro umi rrelihión fálsape (Apoc. 17:​5, 18). w22.05 11 párr. 14-16

Oiméne umi sy opensa jepi imembykuérare ha okalkula serápa oservíta avei Jehovápe. Haʼekuéra oikuaa porã mbaʼéichapa Satanás múndope heta mbaʼe ijetuʼu la ifamiliakuérape. Avei, heta ermána omongakuaa imembykuérape iména reheʼỹ, térã iména ndahaʼéi Jehová siérvo. Umi orekóva iména térã hembireko ndahaʼéiva Testígo ombohovái heta mbaʼe ijetuʼúva, péro ndahaʼéi haʼekuérante la ombohováiva koʼã mbaʼe. Umi sy ha túa oservívape oñondive Jehovápe ijetuʼúnte avei heta mbaʼe. Ha heta oñehaʼã vaʼerã og̃uahẽ hag̃ua ifamiliakuéra korasõme ha oipytyvõ hag̃ua chupekuéra oservi hag̃ua Jehovápe. Oiméramo reime ko situasiónpe, Jehová ndoipotái ejepyʼapyeterei, haʼe katuete nepytyvõta. Ikatu voi eporandu umi sy ha túa iñexperiénsiavape mbaʼéichapa oipuru umi erramiénta omeʼẽva ñane organisasión estudia hag̃ua ne familiakuérandi (Prov. 11:14). Katuete Jehová nepytyvõta avei eñemongeta porã hag̃ua ne membykuérandi. Ejerurékena chupe omeʼẽ hag̃ua ndéve umi idéa eikuaa hag̃ua mbaʼépa ere vaʼerã ne membykuérape, omombeʼu hag̃ua ndéve la oñandúva hikuái (Prov. 20:5). w22.04 17 párr. 4, 7; 18 párr. 9

Jesús oĩrõ guare ko yvy ape ári ohechauka porãiterei vaʼekue mbaʼeichaguápa Itúa Jehová. Upévare amáske jaikuaa porãve Jesúspe, jahayhuvéta avei Jehovápe (Heb. 1:3). Jaikuaa porã hag̃ua Jesúspe, iporãta jastudia porãrõ umi lívro de Mateo, Marcos, Lucas ha Juan. Oiméramo nderejepokuaái relee la Biblia káda día, iporãta eñepyrũramo elee koʼã lívro oñeʼẽva Jesúsre. Ha releévo umi rreláto, eñatende umi kualida porã haʼe orekóvare. Por ehémplo, la héntepe ndahasýi vaʼekue oñemongeta hag̃ua hendive, ha peteĩ jey ohupi ijyva ári umi mitãme jepe (Mar. 10:​13-16). Umi idisípulo ndokyhyjéi vaʼekue omombeʼu hag̃ua chupe la oñandúva (Mat. 16:22). Péicha Jesús osegi vaʼekue Itúa yvagapegua ehémplo, ha upévare jaikuaa ikatuha ñañemoag̃ui Jehováre. Haʼe naiprovlémai ohendu hag̃ua umi orasión jajapóva chupe ñande pyʼaite guive. Upévare ñañemboʼe jave ikatu ñamombeʼu Jehovápe enteroite mbaʼe ñañandúva, jaikuaágui haʼe nañanekondenamoʼãiha. Haʼe ñanderayhueterei ha ojepyʼapy ñanderehe (1 Ped. 5:7). w22.08 3 párr. 4, 5

Jehová ñandekuaa porãiterei haʼe rupi ñande Kreadór. Epensamíntena: Haʼe oikuaa porã káda persóna oĩvape ko yvy ape ári (Sal. 139:​15-17). Jehová ohechapaite umi imperfeksión ñanderupytýva ñande túa ypykuégui. Haʼe ontende umi mbaʼe ñapensáva ha jajapóva ha oikuaa mbaʼeichagua persónapa ñande. ¿Mbaʼépa ojapo Jehová ñandekuaa porãiterei rupi? Ñandeporiahuvereko (Sal. 78:39; 103:​13, 14). Jehová ohechaukáma ñaneperdonaseha. Haʼe oikuaa porã voi Adán ha Eva káusare ñaimeha pe pekádo ha ñemano poguýpe (Rom. 5:12). Ñandejehegui reínte ndaikatumoʼãi kuri ñasẽ ni ñaguenohẽ ótrope pe pekádo ha ñemano poguýgui (Sal. 49:​7-9). Jehová ohechauka imbaʼeporãha ñanendive ha ojapo álgo ñaneguenohẽ hag̃ua upe situasióngui. Heʼiháicha Juan 3:​16, Jehová ontrega Itaʼýra peteĩete omano hag̃ua ñanderehehápe (Mat. 20:28; Rom. 5:19). w22.06 3 párr. 5, 6

Ñaporoperdonáramo, Jehová ñaneperdonáta avei. Haʼe ñanemboʼéma voi ko mbaʼe la heʼi vaʼekuére Jóbpe. Ko kuimbaʼe ifiélva Jehovápe tekotevẽ kuri ombohovái umi mbaʼe vai heʼíva hese umi mbohapy iñamígo guaʼu: Elifaz, Bildad ha Zofar. Jehová omanda Jóbpe oñemboʼe hag̃ua koʼã mbohapy iñamígo guaʼúre. Ha Job ojapo rire upéva, Jehová ovendesi chupe (Job 42:​8-10). Pe pyʼaro ikatu tuicha ñandeperhudika. Jehová oipota voi jaipeʼa ñandejehegui pe pyʼaro ojoguáva peteĩ kárga ñanembohasa asývape (Efes. 4:​31, 32). Jehová heʼi voi: “Embohasa ndejehegui pe pochy ha ani ndepyʼaro” (Sal. 37:8). Jasegíramo ko konsého ou porãta ñandéve. Japytáramo ñandepyʼaro, upéva ikatu voi operhudika ñande salu (Prov. 14:30). Jaikórõ ñandepyʼaro haʼetéta hína jaʼúva venéno, ñandénte jajeperhudikáta ndahaʼéi pe ojapo vaʼekue ñanderehe mbaʼe vai. Péro ñaperdonáramo ñande rapichápe, ñandéve voi ou porãta upéva. Péicha ñañeñandúta pyʼaguapýpe ha ikatúta vyʼápe jaservi Jehovápe. w22.06 10 párr. 9, 10

Ñane esperánsa Jehováre oprotehe ñane akã peteĩ káskoicha ha ñanepytyvõ ani hag̃ua ñapensa ñandejehénte, pórke upéva ikatu ombyai ñane amista Jehovándi (1 Cor. 15:​33, 34). Ñane esperánsa ojoguáva peteĩ káskope ñandeprotehe avei ani hag̃ua ñapensa ijetuʼuetereiha Jehová ñandeguerohory hag̃ua. Ñanemanduʼamína Elifaz rehe. Haʼe ningo haʼe vaʼekue Job amígo guaʼu, ha heʼi vaʼekue avei Jóbpe: “¿Ikatu piko peteĩ persóna ipotĩ Ñandejára renondépe?”. Upéi heʼive: “Ñandejára ningo ndojeroviái ni hiʼanhelkuérare, ha pe yvága jepe naipotĩri chupe g̃uarã” (Job 15:​14, 15). Péro upéva japu. Ñanemanduʼa vaʼerã Satanás oipotaha ñapensa upéicha. Haʼe oikuaa porã jajúramo kontinuádo ñapensa upéicha, ikatuha japerde la esperánsa. Upévare ñañehaʼãmbaitékena ñamboyke pe japu. Aníkena núnka jaduda Jehová oipotaha jaiko pára siémpre, ha haʼe ñanepytyvõtaha jahupyty hag̃ua upéva (1 Tim. 2:​3, 4). w22.10 25, 26 párr. 8-10

Satanás oipota kuri Job opensa osufriha Jehová ndoguerohoryvéima haguére chupe. Upévare omondo peteĩ yvytu atã ha oity pe óga oĩhápe umi 10 Job familiakuéra oñembyatýva hína okaru hag̃ua (Job 1:​18, 19). Avei ombou tata yvágagui ha ojukapaite umi hymbakuéra ha umi oñatendévape hese (Job 1:16). Pe tata ha pe yvytu ou rupi yvágagui, Job opensa Jehová ombou hague koʼã mbaʼe ha ipochyha hendive. Upéicharamo jepe, Job nomaldesíri Itúa yvagapeguápe. Haʼe orrekonose Jehová omeʼẽ hague chupe hetaiterei mbaʼe porã ha oasepta haguéicha umi mbaʼe iporãva oaseptatanteha avei umi mbaʼe ivaíva. Upévare haʼe heʼi: “Siémpre toñembotuicha Jehová réra” (Job 1:​20, 21). w22.06 21 párr. 7

Jesús oavisa vaʼekue idisipulokuérape peichataha heʼiháicha Juan 17:​14-pe. Ha upeichaite oiko, ñande jahecháma mbaʼéichapa oñekumpli ko profesía, ha koʼytevéntema umi 100 áño ohasa vaʼekuépe. Jesúspe oñemoĩ riremi Rréiramo Ñandejára Rréinope áño 1914-pe, Satanáspe ojeity yvágagui. Haʼe koʼág̃a opyta ko yvy ape ári, ndaikatuvéi oho ótro ládo ha ohaʼarõ hína oñehundi chupe (Apoc. 12:​9, 12). Péro upe tiémpo guive haʼe ndahaʼéi opytánteva ohaʼarõ. Haʼe ipochy ha oataka Ñandejára puévlope (Apoc. 12:​13, 17). Péicha Satanás múndo koʼytevéntema ndaijaʼéi Ñandejára puévlore koʼág̃arupi. Péro ndajarekói mbaʼérepa jakyhyje hag̃ua Satanás ha isegidorkuéragui. Upéva rangue jajerovia apóstol Pablo heʼi vaʼekuére: “Ñandejára oĩramo ñanendive, ¿máva piko oñemoĩta ñanderehe?” (Rom. 8:31). Ñande jajerovia voi Jehováre ñande pyʼaite guive. w22.07 18 párr. 14, 15

Jesús ndojepyʼapýi vaʼekue saʼíta haguére umi opredikáva umi ára pahápe. Haʼe oikuaa porã oñekumplitaha ko profesía heʼíva: “Nde resẽ vove nde ehérsito reheve reñorairõ hag̃ua gerrahápe, nde puévlo kyreʼỹme oúta ojeofrese” (Sal. 110:3). Oiméramo nde repredika reikóvo, reapoja Jesúspe ha pe esklávo de konfiánsape ha eipytyvõ oñekumpli hag̃ua ko profesía. Koʼag̃aite peve ojesegi ojepredika, péro oĩ heta mbaʼe ijetuʼúva tekotevẽva ñambohovái. Peteĩva umi mbaʼe ombohovái vaʼerã umi opredikáva haʼe hína pe oposisión. Umi apóstata, líder rrelihióso ha polítiko omosarambi jepi umi japu oñeʼẽ vai hag̃ua pe predikasiónre. Oiméramo ñane hentekuéra, ñane konosído, térã ñane kompañéro de traváho térã de eskuéla oguerovia koʼã informasión ikatu hína ñandejopy anivéma hag̃ua jaservi Jehovápe ni japredika. Heta paíspe umi oñemoĩva ñane kóntrape ñandetrata vai, ñandeataka, ogueraha préso ermanokuérape ha algúnope omoinge voi kárselpe. w22.07 8 párr. 1; 9 párr. 5, 6

Jehová oipota ñañemotiémpo ha jajepokuaa jastudia la Biblia, ha jajepyʼamongeta hese. Jajapóramo umi mbaʼe ñaaprendéva, ñande jerovia imbaretevéta ha ñañemoag̃uivéta Jehováre. Upéva ñanemombaretéta ñaaguanta hag̃ua umi pruéva. Avei jajeroviáramo la Biblia heʼívare, Jehová omeʼẽta ñandéve ijespíritu sánto. Ha pe espíritu sánto omeʼẽta ñandéve “pe podér umi ótra hénte ndorekóiva” ñaaguanta hag̃ua oimehaichagua pruéva (2 Cor. 4:​7-10). Jehová oipytyvõ ‘pe esklávo de konfiánsa ha iñarandúvape’ omeʼẽ hag̃ua ñandéve hetaiterei artíkulo, vidéo ha purahéi ñanepytyvõva jasegi hag̃ua jajerovia mbarete ha ñañatende porã (Mat. 24:45). Jehová omboʼe isiervokuérape ojoayhu ha oñokonsola hag̃ua ohasa jave umi situasión ijetuʼúva (2 Cor. 1:​3, 4; 1 Tes. 4:9). Ñane ermanokuéra ojogua Elihúpe, pórke ñanepytyvõse jasegi hag̃ua ñandefiél Jehovápe ñambohovái jave umi situasión ijetuʼuetereíva. w22.08 12 párr. 12-14

Ñañeʼẽvo umi kualida porã orekóvare ñane ermanokuéra ñamombarete hína ñane amista ha pe mborayhu ñañandúva ojuehe kongregasiónpe. Sapyʼánte umi ermáno iñexperiénsiava jepe noĩri de akuérdo peteĩ mbaʼépe térã ojodiskuti oñondive. Upéva la oiko vaʼekue apóstol Pablo ha pe iñamigoite Bernabé rehe. Haʼekuéra tuichaiterei ojoavy ohechárõ guare oguerahátapa Márcospe hendivekuéra pe sigiénte viáhe ojapótavape opredika hag̃ua. Haʼekuéra “tuicha oiko vai” ha odesidi ndoviahamoʼãveimaha oñondive (Hech. 15:​37-39). Péro Pablo, Bernabé ha Marcos oiko porã jey oñondive. Upéi Pablo oñeʼẽ porã vaʼekue Bernabé ha Marcos rehe (1 Cor. 9:6; Col. 4:10). Ñande avei ñasolusiona vaʼerã oimeraẽ diferénsia jarekóva ótrondi kongregasiónpe, ha upéi jasegi ñañekonsentra umi kualida porã orekóvare. Péicha jajapóramo ñaipytyvõta oĩ hag̃ua pyʼaguapy ha unida. w22.08 22, 23 párr. 10, 11

Ñande ñañehaʼãse jaiko Jehová omandaháicha, ha upéva jajapokuévo ndajaikoséi japorohusga ha ñapensa ñandejehe ñandehustoitereiha. Ñanemanduʼa vaʼerã Jehová haʼeha “pe Hués ohusgáva ko yvy kompletoite” (Gén. 18:25). Jehová ndohejái ñande kárgope japorohusga hag̃ua. Jahechamína peteĩ kuimbaʼe ihústova ehémplo. Haʼe héra vaʼekue José. Haʼe ndoikói vaʼekue ohusga ótrope, ni umi otrata vai vaʼekuépe chupe. Umi iñermáno ombyepoti ha ovende chupe esklávoramo, ha ogueroviaka ituakuérape José omano hague. Heta áño rire José ojotopa jey ifamiliakuérandi. Upérõ guare José haʼéma peteĩ governánte ipoderósova, upévare ikatu kuri okastiga pohýi iñermanokuérape ha ohecha mbaʼéichapa oñevengáta hesekuéra. Umi iñermáno katu okyhyje chugui ojapórõ g̃uarã upéva. Hiʼarive haʼekuéra ipyʼaite guive ombyasy la ojapo vaʼekue. Péro José oasegura chupekuéra: “Anína pekyhyje. Chéngo ndahaʼéi Ñandejára aporohusga hag̃ua” (Gén. 37:​18-20, 27, 28, 31-35; 50:​15-21). José iñumílde vaʼekue ha ohechakuaa Jehová añoite orekoha derécho ohusgávo iñermanokuérape. w22.08 30 párr. 18, 19

Jehová ikatu ojevale ñanderehe ombohovái hag̃ua iñemboʼe algún ermánope, haʼe ikatu oipuru oimeraẽvape ñande apytépe upearã. Por ehémplo peteĩ Jehová siérvo ojerure asy jave chupe ajúda, haʼe ikatu oipuru umi ansiánope térã ótro ermánope okonsola hag̃ua chupe (Col. 4:11). Jaipotaiterei Jehová ojevale ñanderehe oipytyvõ hag̃ua ñane ermanokuérape oĩ jave peteĩ mbaʼasy pyaʼeterei okorréva, oiko jave peteĩ desástre naturál o jajepersegi jave. A lo mehór ñaipytyvõse ótrope, péro ñane família voi ohasa hína peteĩ situasión ijetuʼúvare. Jehová ovyʼaiterei ohecha jave mbaʼéichapa jajapo ikatumíva guive ñaipytyvõ hag̃ua ñane ermanokuérape (Prov. 19:17). w22.12 22 párr. 1, 2

Tekotevẽterei jajoayhu jajerovia hag̃ua ojuehe. Jesús heʼi vaʼekue voi umi mandamiénto iñimportantevéva haʼeha jahayhu Jehovápe ha ñande rapichápe (Mat. 22:​37-39). Jehová ohechauka entéro mbaʼépe haʼeha peteĩ persóna de konfiánsa, ha jahayhúgui chupe jasegise iñehémplo. Por ehémplo, jahayhu rupi ñane ermanokuérape ndajaikomoʼãi ñamombeʼu upérupi umi mbaʼe haʼekuéra okonfiáva ñandéve. Avei ni mbaʼevéicharõ nañamombeʼumoʼãi umi mbaʼe omoñeñandu vaítava, olastima térã omotĩtava chupekuéra. Pe umilda avei ñanepytyvõta oiko hag̃ua ñandehegui peteĩ persóna de konfiánsa. Peteĩ kristiáno iñumíldeva ndoikomoʼãi oñehaʼã haʼe hag̃ua pe primera persóna omombeʼúva peteĩ notísia oimpresiona hag̃ua ótrope (Filip. 2:3). Avei ndoikomoʼãi oñemoimportánte ontendekávo haʼe oikuaaha informasión ndaikatumoʼãiva omombeʼu ótrope. Ñaneumílderamo ndajaikomoʼãi ñamombeʼu umi idéa jarekóva peteĩ témare la Biblia ha ñane puvlikasión ndeʼírivare mbaʼeve. w22.09 12 párr. 12, 13

Peteĩ ánhel heʼi Daniélpe umi profesía oĩva pe lívro de Daniélpe ontende porãvetaha ohóvo Ñandejára puévlo, péro ‘ni peteĩ iñañáva nontendemoʼãiha koʼã mbaʼe’ (Dan. 12:10). Koʼág̃a hína la tiémpo jahechauka hag̃ua umi mbaʼe jajapóvare ndajajoguaiha umi iñañávape (Mal. 3:​16-18). Jehová koʼág̃a ombyaty umi haʼe ohayhúvape ha ‘ojapo chuguikuéra peteĩ puévlo espesiál’. Katuete ñande ñaimeseterei umíva apytépe. Koʼág̃a jaiko peteĩ tiémpo ijojahaʼỹvape. Péro koʼẽrõitéma oikóta heta mbaʼe ñanesorprendevétava, oñehundíta entéro mbaʼe vai ñanembohasa asyetéva. Upéi jahecháta mbaʼéichapa oñekumpli Jehová opromete vaʼekue Daniélpe: “Repuʼã jeýta rerresivi hag̃ua pe otokáva ndéve” (Dan. 12:13). ¿Ndépa reipotáma og̃uahẽ pe día Daniel ha umi persóna rehayhúva omano vaʼekue ‘opuʼã jey’ vove? Oiméramo upéicha, ejapókena opa ikatúva ndefiél hag̃ua Jehovápe, ha ikatu eime segúro nde réra osegitaha oĩ pe lívro de la vída Jehová orekóvape. w22.09 24 párr. 17; 25 párr. 19, 20

Ko téxto heʼíva katuete omombareténe raʼe Ezequiélpe, pórke haʼe oiméne imanduʼa Jehová heʼi hague avei la mísma kósa Moisés ha Isaíaspe (Éx. 3:10; Is. 6:8). Ezequiel oikuaa avei Jehová oipytyvõ hague umi mokõi profétape okumpli hag̃ua umi asignasión ijetuʼúva. Upévare Jehová heʼírõ guare Ezequiélpe dos vése: “Che romondo”, haʼe oĩ kuri segúro Jehová oĩtaha ijykére okumpli porã hag̃ua la iñasignasión. Ha heta vése oskrivi vaʼekue: “Jehová oñeʼẽ chéve”, ha “Jehová oñeʼẽ jey chéve” (Ezeq. 3:16; 6:1). Ezequiel oĩ vaʼekue segúro Jehová omondo hague chupe. Avei Ezequiel túa haʼe vaʼekue peteĩ saserdóte, ha oiméne omboʼe rakaʼe chupe Jehová siémpre heʼiha iprofetakuérape oipytyvõtaha chupekuéra. Por ehémplo, Jehová heʼi vaʼekue Isaac, Jacob ha Jeremíaspe: “Che aime nendive” (Gén. 26:24; 28:15; Jer. 1:8). w22.11 3 párr. 3

Adán ha Eva opeka vaʼekue, ha ikulpakuérare entéro ifamiliakuéra omano. Péro upéva ndeʼiséi Jehová propósito opyta rei hague (Is. 55:11). Haʼe oipotaiterei enterove persóna oreko la oportunida oikove hag̃ua pára siémpre. Jahechamína umi mbaʼe Jehová heʼíva ha ojapóva okumpli hag̃ua ipropósito. Jehová opromete haʼe omoingove jeytaha umi omano vaʼekuépe, ha omeʼẽtaha chupekuéra la oportunida oikove hag̃ua pára siémpre (Hech. 24:15; Tito 1:​1, 2). Job oĩ vaʼekue segúro Jehová omoingovesetereimaha umi omano vaʼekuépe (Job 14:​14, 15). Proféta Daniel oikuaa porã vaʼekue umi omanóva oikove jeytaha ha orekotaha la oportunida oikovévo pára siémpre (Sal. 37:29; Dan. 12:​2, 13). Umi judío avei oikuaa porã vaʼekue Jehová ikatuha omeʼẽ pe “jeikove opaveʼỹva” umi isiérvo iñeʼẽrendúvape (Luc. 10:25; 18:18). Jesús heta vése oñeʼẽ kuri ko promésare, ha chupe voi oñemoingove jey vaʼekue (Mat. 19:29; 22:​31, 32; Luc. 18:30; Juan 11:25). w22.12 4, 5 párr. 8, 9

Jehová ñaneinvita ñañemoag̃ui hag̃ua hese (Sant. 4:8). Haʼe oipota jahecha chupe ñande Túa ha ñane Amígoicha. Haʼe ombohovái umi ñane ñemboʼe ha ñanepytyvõ umi situasión ijetuʼúvape. Avei ojevale iñorganisasiónre ñanemboʼe ha ñandeprotehe hag̃ua. Ñande ikatu ñañemoag̃ui Jehováre ñañemboʼévo chupe, jaleévo Iñeʼẽ la Biblia ha jajepyʼamongetávo hese. Jajapóramo koʼã mbaʼe, jahayhuvéta Jehovápe ha jaapresiaitereíta chupe. Upéva ñanemomýita avei ñaneñeʼẽrendu hag̃ua ha ñamombaʼéta chupe haʼe omereseháicha (Apoc. 4:11). Amáske jaikuaa porãve Jehovápe, jajeroviavéta hese ha iñorganisasión haʼe omoĩvare okuida hag̃ua ñanderehe. Satanás oñehaʼã mbeguekatúpe omokangy ñane konfiánsa Jehováre ha iñorganisasiónre. Péro ikatu ñañedefende umi ijatakekuéragui. Ñande jerovia imbaretéramo ha ñakonfiáramo Jehováre ñande pyʼaite guive, núnka ndajahejamoʼãi chupe ni iñorganisasiónpe (Sal. 31:​13, 14). w22.11 14 párr. 1-3

Heta kristiáno oapeligra pe liverta orekóva ha oĩ voi omano hag̃uáicha ohayhúgui Jehovápe, haʼéva pe Governánte ogovernáva opa mbaʼe. Haʼekuéra osegi ifiél Jehovápe, ojerresolve voi umi mbohapy hebreo ojapo haguéicha, umi osegi vaʼekue ifiél Ñandejára Ijojahaʼỹvape, ha upéi haʼe osalva chupekuéra pe tatakua akúgui. Pe salmísta David oskrivi vaʼekue ohechauka iñimportantetereiha jasegi ñandefiél. Haʼe heʼi: “Jehová, nde rehusgáta umi tetãnguérape. Jehová, nde ningo rehecha umi mbaʼe porã che ajapóva, ha mbaʼeichaitépa cheñeʼẽrendu, eguerekomína umíva enkuénta chehusga vove” (Sal. 7:8). Upéi David heʼi jey: “Ñandejára, che ningo cheñeʼẽrendu ha ndajapói mbaʼeve ivaíva, aipotaite umíva cheprotehe” (Sal. 25:21). Jaiko porãiterei jasegíramo ñandefiél Jehovápe ha ñaneñeʼẽrendu chupe. Upéi ñañeñandúta avei pe salmísta heʼi vaʼekuéicha: “Ovyʼa umi siémpre iñeʼẽrendúva, umi oikóva Jehová léi heʼiháicha” (Sal. 119:​1, nóta). w22.10 17 párr. 18, 19

Oikove aja pukukue oiméne Job oñemongeta rakaʼe heta héntendi. Péro katuete ndahesaráiri la oñeʼẽ vaʼekuégui Jehovándi. Jehová heʼi Jóbpe omaña hag̃ua unos kuánto ikreasión ijojahaʼỹvare ha upéva oipytyvõtaha chupe ohechakuaa hag̃ua Jehová iñaranduha ha oñangarekoha isiervokuérare. Por ehémplo, Job ohechakuaa Jehová okuidárõ umi animál rehe, katuete okuidataha hese avei (Job 38:​39-41; 39:​1, 5, 13-16). Ojepyʼamongetávo Jehová kreasiónre, Job oikuaa porãve chupe. Ñande avei ikatu jaikuaa porãve Jehovápe jajepyʼamongetávo ikreasiónre, péro sapyʼánte ikatu ijetuʼu ñandéve. Por ehémplo jaikóramo siudaháre ikatu oime ni ndajahechái pe naturalésa, ha jaikóramo jepe kampañaháre, lomímonte ikatu nañanetiémpoi ñamaña hag̃ua pe kreasiónre. Péro iñimportánte ñañemotiémpo upearã. w23.03 15 párr. 1, 2

Jesús heʼi vaʼekue isegidorkuérape pe fin mboyve oikotaha umi “yvyryrýi tuicháva”, ha avei opaichagua desástre (Luc. 21:11). Heʼi avei hetavetaha umi hénte iñañáva. Ha amáske jaha heta hetave oĩ umi delinkuénte, umi ivioléntova ha umi atáke terrorísta (Mat. 24:12). Heta situasión ijetuʼúva ha desástre naturál ohupyty avei Jehová siervokuéra ifiélvape. Péro Jesús ndeʼíri vaʼekue koʼã mbaʼe vai oikotaha Jehová ndojepyʼapýi rupi ñanderehe (Is. 57:1; 2 Cor. 11:25). Ikatu Jehová nañandeprotehéi hína peteĩ milágro rupive jahasa jave koʼãichagua situasión, péro si omeʼẽta ñandéve ñaikotevẽva guive ñandepyʼaguapy hag̃ua. Upearã iñimportánte jajeprepara porã ántema voi. ¿Péro heʼisépa upéva ndajajeroviaiha Jehová ñanepytyvõtaha? Nahániri. Jajeprepara jave oikóramo g̃uarã peteĩ desástre, jahechauka jajeroviaha Jehováre okuidataha ñanderehe. ¿Mbaʼérepa jaʼe upéva? Pórke la Bíbliape oĩ umi konsého ñanemokyreʼỹva jajeprepara hag̃ua oiko mboyve peteĩ desástre. w22.12 18 párr. 9, 10

José oĩ aja kárselpe, Jehová ohechauka vaʼekue pe faraónpe iképe mokõi mbaʼe okevrantaitereíva chupe. Ha oikuaárõ guare José ikatuha oexplika upéva, pyaʼe ohenoika chupe. Oñeʼẽmba rire hendive, pe faraón opyta ohecharamoiterei mbaʼéichapa Jehová oipytyvõ Josépe oexplikakuaa hag̃ua umi suéño. Ha ohecharamoiterei avei pe konsého José omeʼẽ vaʼekue chupe. Upéicha rupi onkarga vaʼekue chupe odirihi hag̃ua pe traváho ombyaty hag̃ua tembiʼu Egipto tuichakuére (Gén. 41:​38, 41-44). Tiémpo rire oñekumpli la José heʼi vaʼekue, pórke ou peteĩ ñembyahýi guasu oafektáva Egíptope. Péro ohupyty vaʼekue avei Canaánpe, pe lugár oikohápe José hentekuéra. Upéicha, José oreko kuri la oportunida osalva hag̃ua ihentekuérape, ha tiémpo rire ifamiliarégui ikatúta kuri ou pe Mesías. ¿Mávapa rreálmente oipytyvõ raʼe Josépe ohupyty hag̃ua entéro koʼã mbaʼe? Ni michĩmi ndajadudái Jehová oipytyvõ hague chupe. Amo ipahápe, José ermanokuéra operhudikaséramo jepe chupe, Jehová omaneha la situasión oñekumpli hag̃ua ivolunta. w23.01 16, 17 párr. 11, 12

Peteĩ persóna oñatendéva, siémpre oĩ aténto la ikatúvare oapeligra iñamista Jehovándi, ha ojapo ikatúva guive ojehekýi hag̃ua umívagui, péicha rupi osegi oĩ Jehová mborayhúpe (Prov. 22:3; Jud. 20, 21). Apóstol Pablo omokyreʼỹ vaʼekue umi kristiánope oñatende hag̃ua ijehe. Por ehémplo haʼe heʼi vaʼekue umi kristiáno Efesoguápe: “Peñatende porãke peiko lájare, ani peiko umi itavývaicha, síno umi iñarandúvaicha” (Efes. 5:​15, 16). Koʼã ára pahápe ñande jerovia kontinuadoite oñemoĩ a pruéva. Upévare la Bíbliape oĩ peteĩ konsého heʼíva: “Pesegi pehecha mbaʼépa hína Jehová oipota pejapo”, péicha ikatúta ñambohovái kualkiér provléma ikatúva oapeligra ñane amista Jehovándi (Efes. 5:17). Upéicha jave jadesidi porã hag̃ua tekotevẽta ñañehaʼã ñapensa Jehová ha Jesucristo opensaháicha. ¿Péro mbaʼépa ñanepytyvõta jadesidi porã hag̃ua? Jastudia meme vaʼerã mbaʼépa ogusta Jehovápe ha jajepyʼamongeta umívare. Amáske ñantende mbaʼépa Jehová volunta ha ñapensa “Cristo opensaháicha”, ñanepytyvõta ñanearandu hag̃ua ndaipóriramo jepe peteĩ léi heʼíva mbaʼépa jajapo vaʼerã káda okasiónpe (1 Cor. 2:​14-16). w23.02 16, 17 párr. 7-9

¿Káda mboýpa nde emopotĩ jepi nde róga? Ikatu oime emopotĩ raʼe reva mboyve pype. ¿Péro mbaʼépa oikóta ohasávo pe tiémpo ha nerepenavéi hese? Pyaʼeterei ijyvytimbopa ha ikyʼapa jeýta la oĩva entéro. Upéicha rupi pyʼỹinte emopotĩ vaʼerã. Ha upéicha avei ñande jasegi vaʼerã jajapo ñamehora hag̃ua ñapensa lája ha mbaʼeichagua persónapa ñande. Káda uno ñañehaʼãmbaite kuri jajapo umi kámbio tekotevẽva jajevautisa mboyve, pórke heʼiháicha la Biblia “ñamopotĩ vaʼerã ñande rete ha ñane korasõ” (2 Cor. 7:1). Péro upe rire ‘jasegi vaʼerã ñambopyahu ñapensa lája’ (Efes. 4:23). Ko múndo opensa lája ikatu pyaʼeterei ova ñanderehe, haʼete voi pe óga ikyʼa ha ijyvytimbopa jeýva noñepenái rupi hese. Ñande ñaime porãse Jehová renondépe, ha jahupyty hag̃ua upéva pyʼỹi jarrevisa vaʼerã mbaʼetekópa ñaime hína. w23.01 8 párr. 1, 2

Eñeimahinamína ehenduha hína Jesúspe oporomboʼévo. Haʼe pyʼỹinte osita vaʼekue de memória Ñandejára Ñeʼẽ heʼíva. Jesús ojevautisa ha oñeunhírõ guare espíritu sánto rupive, imanduʼapaite jey oikórõ guare yvágape ou mboyve ko yvy ape ári. Por ehémplo, upéva jahechakuaa umi mbaʼe heʼi vaʼekuére ojevautisa riremínte ha omano mboyvemi (Deut. 8:3; Sal. 31:5; Luc. 4:4; 23:46). Ha umi 3 áño imédio aja, Jesús pyʼỹinte olee en púvliko, osita ha oexplika vaʼekue Ñandejára Ñeʼẽ (Mat. 5:​17, 18, 21, 22, 27, 28; Luc. 4:​16-20). Jesús heta áño oñepyrũ mboyve opredika, pyʼỹinte oleéma vaʼekue voi oikóvo Ñandejára Ñeʼẽ. Katuete María ha José omensiona vaʼekue chupe Ñandejára Ñeʼẽ (Deut. 6:​6, 7). Avei Jesús ohómi vaʼekue ifamília ndive sabadokue pe sinagógape (Luc. 4:16). Upépe oĩ aja, ojapysaka porãne rakaʼe ojelee jave Ñandejára Ñeʼẽ. w23.02 8 párr. 1, 2

Hetaiterei mbaʼére ikatu jahayhu Jehovápe. Por ehémplo, nde reaprende Ñandejára ‘omeʼẽha la vída enterovépe’ ha haʼe omeʼẽha “entéro mbaʼe porã ha rregálo iporãva” (Sal. 36:9; Sant. 1:17). Entéro mbaʼe porã erekóva ou hína Jehovágui, pe Ñandejára ñanderayhuetéva ha ipojeraitéva. Jehová oheja omano Itaʼýra ñandesalva hag̃ua, péva haʼe peteĩ rregálo ijojahaʼỹva haʼe omeʼẽ vaʼekue ñandéve. ¿Mbaʼérepa ikatu jaʼe upéva? Ñapensamíntena mbaʼéichapa ojoayhu Jehová ha Itaʼýra. Jesús heʼi vaʼekue: “Pe Túa cherayhu” ha ‘che ahayhu pe Túape’ (Juan 10:17; 14:31). Haʼekuéra ojoayhuvéntema ohasa rupi oñondive tiémpo umi miles de millones de áño aja (Prov. 8:​22, 23, 30). Mbaʼeichaitépa oiméne hasy asy rakaʼe Jehovápe opermitírõ guare Itaʼýra osufri ha omano. Péro Jehová ohayhueterei yvyporakuérape, umíva apytépe ndéve avei, upévare haʼe ontrega vaʼekue Itaʼýra ohayhuetéva peteĩ sakrifísioramo, ikatu hag̃uáicha nde ha umi ótra persóna oikove pára siémpre (Juan 3:16; Gál. 2:20). Kóva haʼe hína pe rrasón tuichavéva ñanemomýiva jahayhu hag̃ua Ñandejárape. w23.03 4, 5 párr. 11-13

Ñañatende vaʼerã ani hag̃ua ñanembotavy umi apóstata. Jesús okorrehi vaʼekue unos kuánto oĩvape pe kongregasión de Pérgamope, pórke omoingovai hikuái la ermanokuérape ha omoñepyrũ umi sékta (Apoc. 2:​14-16). Kongregasión de Tiatírape katu ofelisita unos kuánto ermánope, pórke omboyke hikuái “umi enseñánsa japu oúva Satanásgui”, upévare Jesús omokyreʼỹ chupekuéra ‘osegi hag̃ua oñakarama hatã’ pe añeteguáre (Apoc. 2:​24-26). Péro oĩ umi oheja vaʼekue ombotavy chupe umi enseñánsa japu, ha upévare haʼekuéra tekotevẽ kuri oñarrepenti ha okambia. ¿Mbaʼépa ñanemboʼe upéva? Ñande avei ñamboyke vaʼerãha entéro umi enseñánsa oñemoĩva la Biblia heʼívare. Oĩ apóstata “haʼetévaicha oservíva Ñandejárape, péro hekovére ohechaukáta ndoikoiha upéicha” (2 Tim. 3:5). ¿Mbaʼépa jajapo vaʼerã japilla hag̃ua oĩramo ñanembotavyséva? Jastudia porã vaʼerã Ñandejára Ñeʼẽ ha jaikuaa mbaʼépa la Jehová ñanemboʼéva (2 Tim. 3:​14-17; Jud. 3, 4). Jajasegura vaʼerã jaadoraha Jehovápe haʼe oipotaháicha, ha oiméramo jajapo algúna kósa ñandereja vaítava henondépe, upepete ñakambia vaʼerã (Apoc. 2:​5, 16; 3:​3, 16). w22.05 4 párr. 9; 5 párr. 11