Junio

Job ningo oreko vaʼekue peteĩ amista iporãitereíva Jehovándi. Avei oguereko peteĩ família tuicháva, ovyʼáva ha ipláta hetáva (Job 1:​1-5). Upéi peteĩ díapente operdepa lénto umi mbaʼe orekóva. Primerorã operde umi mbaʼerepy oguerekóva (Job 1:​13-17). Upe rire omanombaite chugui ifamiliakuéra haʼe ohayhuetéva. Ñañeimahinamíntema mbaʼeichaitépa oiméne ojedesespera, oñembyasy ha ojaheʼo Job ha hembireko oikuaárõ guare umi 10 ifamília omanombaite hague. Ndareíri ningo Job omondoro pe ijao ha hoʼa yvýpe ohechauka hag̃ua mbaʼeichaitépa oñembyasy (Job 1:​18-20). Upe rire Satanás ombou Jóbpe peteĩ mbaʼasy ivaietereíva ha oporombojeguarúva (Job 2:​6-8). Umi hénte omombaʼeterei vaʼekue Jóbpe ha oho voi hendápe omeʼẽ hag̃ua chupekuéra konsého (Job 31:18). Péro koʼág̃a katu ndojeheʼaséi hese iñermanokuéra, iñamigokuéra ha umi isirviénte jepe orrechasa chupe (Job 19:​13, 14, 16). w22.06 21 párr. 5, 6

Jajevautisa rire enterove tekotevẽterei jasegi pe konsého Pablo omeʼẽ vaʼekue umi kristiáno oĩvape Éfesope. Haʼe omokyreʼỹ chupekuéra oiko hag̃ua chuguikuéra “peteĩ kuimbaʼe okakuaapámava” (Efes. 4:13). Upéicha haʼete heʼíva chupekuéra: “Pesegíkena peprogresa”. Nde ningo ehayhuetereíma Jehovápe, péro ikatu ehayhuetevéntema chupe. ¿Mbaʼéichapa ikatu ejapo upéva? Pablo oñemboʼe vaʼekue ikatu hag̃uáicha pe mborayhu orekóva umi kristiáno Filiposgua ‘okakuaave ohóvo’ (Filip. 1:9). Upéicharõ ikatu ñamongakuaa pe mborayhu ñañandúva Jehováre. ¿Mbaʼéichapa? ‘Jaikuaa porãvo Ñandejára rembipota ha ñantende porãvo upéva’. Amáske jaikuaa porãve Jehovápe, jahayhuvéta chupe ha ñamombaʼevéta entéro mbaʼe ojapóva ñanderehehápe. Avei ñantende porãvéta mbaʼérepa odesidi térã ojapo peteĩ mbaʼe. Ñande siémpre jajapose umi mbaʼe ombovyʼáva Jehovápe ha núnka ndajajaposéi peteĩ mbaʼe omoñeñandu vaítava chupe. Ñañehaʼã voi jaikuaa mbaʼépa Jehová oipota jajapo ha mbaʼéichapa ikatu jajapo upéva. w22.08 2, 3 párr. 3, 4

Pe lívro de Apocalipsis ndojeskrivíri enterove persónape g̃uarã, síno ñande jaservívape g̃uarã Jehovápe. Ha ñande ñaipytyvõ hína oñekumpli hag̃ua umi profesía oĩva ko lívrope. Apóstol Juan ohechauka vaʼekue upéva heʼírõ guare: “Pe espíritu sánto rupive ojehechauka chéve umi mbaʼe oikótava ñande Ruvicha díape” (Apoc. 1:10). Juan oskrivi vaʼekue kóva áño 96-pe d.C. Ha upérõ hetáiti ofalta kuri og̃uahẽ hag̃ua pe ‘ñande Ruvicha día’ (Mat. 25:​14, 19; Luc. 19:12). Péro umi profesía bíblica ohechauka upe día oñepyrũ hague 1914-pe, Jesús oñepyrũrõ guare ogoverna yvágape. Upe áño guive oñepyrũma kuri oñekumpli umi profesía oĩva lívro de Apocalípsispe, ha jarekóvo enkuénta upéva ikatu jaʼe jaikoha hína “ñande Ruvicha díape” (Apoc. 1:3). w22.05 2 párr. 2, 3

Oikove aja gueteri pe animál salváhe ha pe proféta japu, ojepoi chupekuéra pe lágo oĩháme tatarendy ha asúfre. Ko profesía ohechauka koʼã goviérno omanda aja gueteri Jehová ohundietetaha chupekuéra. ¿Mbaʼérepa iñimportánte ñandéve g̃uarã koʼã mbaʼe? Ñande kristiáno ningo ñandefiél vaʼerã Jehovápe ha Irréinope (Juan 18:36). Nañañentremetéi polítikare. Ha upéva ikatu sapyʼánte ijetuʼu, pórke umi goviérno oexihi ñandéve jaapoja hag̃ua chupekuéra tahaʼe umi mbaʼe jaʼéva térã jajapóvape. Ha umi oapojáva chupekuéra orresivi pe animál salváhe márka (Apoc. 13:​16, 17). Péro Jehová ndoguerohorymoʼãi ni peteĩva umi orresivívape ko márka, ha upéicha rupi haʼekuéra ndaikatumoʼãi oiko pára siémpre (Apoc. 14:​9, 10; 20:4). Iñimportanteterei ñande jaapoja sólamente Jehová goviérno, oĩrõ jepe heta ñandejopýva jaapoja hag̃ua umi goviérnope. w22.05 11 párr. 12, 13

Ikatu ñamoĩ la méta ñaaprende hag̃ua peteĩ mbaʼe ipyahúva. Ñaaprendéramo umi mbaʼe pyahu, ikatúta jahupyty hetave rresponsavilida Jehová organisasiónpe. Ñapensamíntena mbaʼeichaitépa oñembaʼapo vaʼerã oñemopuʼã hag̃ua peteĩ sukursál, peteĩ Salón de Asambléa, térã Salón del Reino. La majoría umi ermáno ombaʼapóva umichahárupi oaprendénte kuri tapére umi ótro ermáno iñexperiensiavévagui. Koʼág̃arupi, tahaʼe ermáno térã ermána, lomímonte ikatu ñaaprende heta mbaʼe ideprovéchotava jajapo hag̃ua mantenimiénto umi Salón del Réinope ha Salón de Asambléape. La Biblia heʼi Jehová haʼeha pe “Rréi opa ára g̃uarã”, ha heʼi avei Jesús haʼeha pe “Rréi omandavéva entéro umi ótro rréigui”. Ha haʼekuéra ohupyty hína hetaiterei mbaʼe porã ojevale rupi koʼã ermáno ha ermána ivaletévare (1 Tim. 1:17; 6:15). Ñande ñambaʼapose Jehovápe g̃uarã ha jaipuruse umi mbaʼe jajapokuaáva ñamombaʼeguasu hag̃ua chupe, ha ndahaʼéi ñane venefisiorãnte (Juan 8:54). w22.04 24 párr. 7, 11

Salomón ningo irrikoiterei vaʼekue. Haʼe oiko vaʼekue voi lúho apytépe (1 Rey. 10:​7, 14, 15). Péro Jesús katu imboriahu vaʼekue. Haʼe ndorekoguasúi vaʼekue heta mbaʼe ha ni ndahógai vaʼekue (Mat. 8:20). Péro la isituasionkuéra idiferénteramo jepe, haʼekuéra lomímonte nopensái vaʼekue pe pláta iñimportantetereiha, pórke Jehová voi la omoarandúva chupekuéra. Salomón orrekonose vaʼekue pe pláta ñanepytyvõha jajogua hag̃ua umi kósa ñaikotevẽva ha sapyʼánte ikatu voi jajogua umi kósa ñandegustáva. Péro Salomón ohechakuaa avei oĩha heta mbaʼe iñimportantevéva pe plátagui. Por ehémplo, haʼe heʼi: “Ikuentave umi hénte imanduʼa porã nderehe, ndepláta heta rangue” (Prov. 22:1). Haʼe opilla vaʼekue avei umi hénte ipláta hetáva pyʼỹinte ndovyʼaiha (Ecl. 5:​10, 12). Ha heʼi avei ani hag̃ua jajeroviaiterei pe plátare, pórke ikatu peteĩ tesapirĩme opa ñandehegui (Prov. 23:​4, 5). w22.05 20, 21 párr. 4, 5

Jajepyʼamongetáramo umi vendisión jahupytýva Jehovágui koʼág̃ama voi, pe amista jaguerekóva hendive imbaretevéta. Ha ñapensárõ umi vendisión Jehová omeʼẽtava ñandéve amo gotyove, ñanepytyvõta jaservise hag̃ua chupe pára siémpre. Entéro koʼã mbaʼe ñanepytyvõta vyʼápe jaservi hag̃ua Jehovápe. Jehová ningo “opuʼãta” ha ñanedefendéta ág̃a ohundi vove umi hénte añáme. Haʼe ningo peteĩ Dios ihustoitereíva, upévare ikatu jajerovia haʼe ohunditaha itiempoitépe Satanás múndo (Is. 25:9). Ñande ningo Jehováicha avei ñahaʼarõ pasiéntemente og̃uahẽ peve pe día Ñandejára ñandesalva hag̃ua ñane enemigokuéragui. Og̃uahẽ aja upe tiémpo, jajedesidíma javalorataha pe priviléhio jarekóva ñañemboʼévo chupe, jastudia Iñeʼẽ, jajapo umi mbaʼe ñaaprendéva, ha jajepyʼamongeta umi vendisión jahupytývare. Jasegírõ jajapo koʼã mbaʼe, Jehová ñanepytyvõta jasegi hag̃ua vyʼápe ñaaguanta. w22.11 13 párr. 18, 19

La Biblia nomombeʼúi ñandéve mbaʼe mbaʼépa oiko vaʼekue Timoteo ojevautisárõ guare. Upéicharõ jepe, ndahasýi ñañeimahina hag̃ua mbaʼeichaitépa oiméne ovyʼa rakaʼe isy Eunice (Prov. 23:25). Eunice oipytyvõ vaʼekue imembýpe ohayhu hag̃ua Jehovápe ha avei Itaʼýra Jesucrístope. Timoteo tuakuéra ndorekói vaʼekue la mísma rrelihión. Itúa haʼe vaʼekue griego, ha isy ha ijavuéla judía vaʼekue (Hech. 16:1). Timoteo posívlemente imitãiti vaʼekue Eunice ha Lóidagui oikórõ guare kristiáno. Péro itúa ndoaseptái vaʼekue upéva ha nokambiái la irrelihión. ¿Mbaʼépa ojapóta Timoteo ko situasiónpe? Ñane tiémpope avei, umi sy oservíva Jehovápe ohayhueterei la imembykuérape. Upévare haʼekuéra ojapose opa ikatúva oipytyvõ hag̃ua chupekuéra ohayhu ha oñemoag̃ui hag̃ua Jehováre. ¡Ha Jehová ovaloraiterei voi la ojapóva hikuái! (Prov. 1:​8, 9). Jehová oipytyvõma hetaiterei ermánape omongakuaa porã hag̃ua imembykuérape, ha péicha oiko hag̃ua chuguikuéra Jehová siérvo. w22.04 16 párr. 1-3

Koʼẽrõitéma Jehová omoĩta umi goviérno ‘akãmekuéra peteĩ plan ojapo hag̃ua haʼe oipotáva’. ¿Mbaʼépa oikóta upe rire? ‘Umi 10 rréi’ térã umi goviérno oatakáta umi rrelihión fálsape ha ohundietéta chupekuéra (Apoc. 17:​1, 2, 12, 16). ¿Mbaʼéichapa ikatu jaikuaa pe Babilonia Guasu oñehundi potaitemaha? Jaikuaa hag̃ua upéva ikatu ñapensa pe Babilonia yma guarére, hese ojere vaʼekue pe Rrío Éufrates ha upéva oprotehe chupe. La Biblia okompara voi ‘ýre’ umi hénte oapojávape Babilonia Guasúpe (Apoc. 17:15). Pe lívro de Apocalipsis heʼi avei pe y ‘hypataha’, upéva heʼise umi oapojáva umi rrelihión fálsape saʼivetaha ohóvo (Apoc. 16:12). Koʼág̃arupi jahecha porã oñekumpliha ko profesía, pórke hetaiterei hénte oheja pe irrelihión ha oheka ajúda ótro hendápe osolusiona hag̃ua umi iprovlemakuéra. w22.07 5, 6 párr. 14, 15

Ñaperdona jave jahechauka jaagradesetereiha Jehová imbaʼeporã haguére ñanendive. Jesús peteĩ ehémplo rupive okompara Jehovápe peteĩ karai operdona vaʼekue peteĩ déuda tuichaitereíva peteĩ esklávope. Péro upéi ko esklávo noperdonái peteĩ hapicha odeve michĩvévape chupe (Mat. 18:​23-35). ¿Mbaʼépa ñanemboʼese raʼe Jesús ko ehémplo rupive? Añetehápe jaagradeséramo Jehovápe imbaʼeporã haguére ñanendive, upéva ñanemomýita ñaperdona hag̃ua ñande rapichápe (Sal. 103:9). Heta tiémpoma pe rrevísta Ñemañaha oñeʼẽvo ko témare heʼi kuri: “Ñande ñaperdona hetavéramo ñande rapichápe, upéva ndaikatuiha ñambojoja mbaʼeichaitépa Jehová imbaʼeporã ñanendive ñaneperdonávo Jesús rupive”. Ñaporoperdonáramo, Jehová ñaneperdonáta avei. Jehová oiporiahuvereko umi oiporiahuverekóvape hapichápe (Mat. 5:7). Jesús omyesakã porã ko téma omboʼérõ guare idisipulokuérape mbaʼéichapa oñemboʼe vaʼerã (Mat. 6:​14, 15). w22.06 10 párr. 8, 9

Jesús ou vaʼekue peteĩ yvypóraicha ko yvy ape ári. Haʼe ohechauka porãiterei mbaʼeichaguápa Itúa (Juan 14:9). Upévare ñaaprendévo Jesúsgui jaikuaa ha jahayhu avei Ñandejára Jehovápe. Avei ñanevenefisia umi mbaʼe Jesús omboʼéva, ha mbaʼéichapa haʼe odirihi pe kongregasión koʼág̃arupi. Haʼe ñanemboʼéma avei mbaʼéichapa jaiko vaʼerã ñaime porã hag̃ua Jehová renondépe. Ha Jesús omano haguére enterovépe ikatu ñanevenefisia. Haʼe orresusita rire, opresenta Jehovápe pe huguy repykue ‘ñanemopotĩva opaichagua pekádogui’ (1 Juan 1:7). Koʼág̃a oikóma chugui peteĩ Rréi ipoderósova ha ikatuʼỹva omano (Gén. 3:15). Katuete oñembochipéta pe mbói akã. Añetehápe Ñandejára siervokuéra ovyʼaitereíta ág̃a Satanáspe oñehundi vove. Péro upe tiémpo og̃uahẽ mboyve, aníkena ñañentrega. Jajeroviákena Jehováre. Haʼe oguerúta hetaiterei vendisión ‘entéro nasiónpe’. w22.07 18 párr. 13; 19 párr. 19

Ñamoĩ jave peteĩ méta jareko vaʼerã avei enkuénta ñane situasión ikatuha okambia, ha tekotevẽtaha jajadapta. Ñapensamína por ehémplo apóstol Páblore. Haʼe ningo Tesalónicape oipytyvõ oñeforma hag̃ua peteĩ kongregasión. Péro upe riremínte oñepyrũma ojepersegi chupekuéra, upévare Pablo ohómante vaʼerã kuri upégui pono oapeligra iñermanokuérape (Hech. 17:​1-5, 10). Péro Pablo noñedesanimái upe haguére. Haʼe ojadaptánte la isituasión pyahúre, ha tiémpo rire omondo Timotéope ohecha hag̃ua mbaʼetekópa oĩ la ermanokuéra upépe (1 Tes. 3:​1, 2). Umi ermáno oĩva Tesalónicape ovyʼaitereíne raʼe. ¿Mbaʼépa ñanemboʼe apóstol Pablo ehémplo? Ñande avei sapyʼánte ikatu ñamoĩ peteĩ méta, péro upéi jahechakuaa ñane situasión nopermitiriha ñandéve jahupyty upéva (Ecl. 9:11). Oimérõ nde rejecha hína upe situasiónpe aníkena eñedesanima, eiporavokuaánte ótra méta si ikatútava ehupyty. w22.04 25, 26 párr. 14, 15

Jehová ñanekonsola omombeʼúvo ñandéve oĩha peteĩ esperánsa iporãitereíva amo gotyove g̃uarã. Jahechamína unos kuánto pensamiénto bíblico ikatúva ñanekonsola jahasa jave umi situasión ijetuʼúvare. La Bíbliape Jehová oasegura ñandéve mbaʼeve ‘ndaikatumoʼãiha ñandepeʼa Ñandejára mborayhúgui’, ni umi pruéva ijetuʼuvéva jepe (Rom. 8:​38, 39). Avei oasegura ñandéve ‘Jehová ndohejaiha umi hese ojeroviávape’ ha oñemboʼévape chupe (Sal.145:18). Jehová heʼi avei jajeroviáramo hese ñaaguantataha oimehaichagua pruéva ha javyʼataha jasufríramo jepe (1 Cor. 10:13; Sant. 1:2). La Biblia avei oasegura ñandéve umi pruéva jahasáva koʼág̃a mbykyetereiha ñakomparáramo umi vendisión porãite Jehová oprometévare ñandéve amo gotyove g̃uarã (2 Cor. 4:​16-18). Jehová opromete oipeʼaitetaha entéro mbaʼe omoñepyrũva umi provléma. Haʼe ohundíta Satanáspe ha entéro umi iñañávape haʼéicha avei (Sal. 37:10). ¿Reaprendémapa de memória algúno versíkulo nepytyvõtava reaguanta hag̃ua umi pruéva ikatúva rehasa amo gotyove? w22.08 11 párr. 11

¿Ndépa ejepyʼapy epensávo esegítapa eiko Jehová omandaháicha káda día, káda áño ohasáva? Jehová opromete vaʼekue pe ‘ñande hustísia ojoguataha umi oláda marpeguápe’ (Is. 48:18). Eñeimahinamíntena eimeha pe mar oríllape ha emañaha umi oláda ou ha ohóvare, núnka voi ndopáivare. Katuete ningo nembopyʼaguapýta peichagua lugár. Ha eime jave peichagua lugár itrankiloitévape, ¿eñekevrantátapa peteĩ díape opárõ g̃uarã umi oláda? Nahániri, nde reime segúro osegitaha péicha. ¿Péro mbaʼéichapa nde hustísia ikatu ojogua umi oláda marpeguápe? Nde edesidíta jave peteĩ mbaʼe, primero ereko vaʼerã enkuénta mbaʼépa Jehová oipota rejapo. Upéi emoĩ en práktika upéva. Ijetuʼuetereírõ jepe upe mbaʼe redesidítava, nde Túa Jehová nderayhuetéva siémpre oĩta nde ykére ikatu hag̃uáicha nemombarete ha nepytyvõ rejapo hag̃ua iporãva káda día (Is. 40:​29-31). w22.08 30 párr. 15-17

Satanás oĩta préso umi 1.000 áño aja. Upe tiémpope avavépe ndaikatumoʼãi ombotavy. Péro ohasa rire umi 1.000 áño, Satanáspe ojepoi jeýta pe oĩhágui préso. Upe rire oprokurapaitéta ombotavy hag̃ua umi persóna perfektóvape. Enterove ningo oguerekóta la oportunida ohechauka hag̃ua iñeʼẽrendútapa Jehovápe ha oñemoĩtapa igoviérno poguýpe (Apoc. 20:​8-10). Asegún mbaʼéichapa káda persóna ombohovái ko pruéva, ojehecháta ojeskrivítapa herakuéra pára siémpre pe lívro de la vídape. Oĩta unos kuánto, ndajaikuaái mboýpa, péro oĩta unos kuánto ohechaukáva ojoguaha Adán ha Évape naiñeʼẽrendúivo Jehovápe ha orrechasávo igoviérno. ¿Ha mbaʼépa oikóta chuguikuéra? Apocalipsis 20:15 heʼi ñandéve: “Avei entéro umi noĩriva pe lívro de la vídape ojepoi pe lágo oĩháme tatarendy”. Koʼã rrevéldepe oñehundíta pára siémpre. Péro la majoría umi persóna perféktova ohasáta pe pruéva finál. w22.09 23, 24 párr. 15, 16

Síglo primérope oĩ vaʼekue kongregasiónpe umi oipotáva oñesirkunsida umi ndahaʼéivape judío ha oiko vaʼekue chugui kristiáno. Ikatu oime upéicha rakaʼe okyhyjégui hikuái oĩrõ g̃uarã oñeʼẽ vaíva hesekuéra (Gál. 6:12). Apóstol Pablo noĩriete vaʼekue de akuérdo, péro oñemombarete rangue la haʼe opensávapente, haʼe iñumílde ha ojerure konsého umi apostolkuéra ha ansiáno oĩvape Jerusalénpe (Hech. 15:2). Ha Pablo ojapo rupi péicha, oipytyvõ umi kristianokuérape osegi hag̃ua ovyʼa ha oiko pyʼaguapýpe kongregasiónpe (Hech. 15:​30, 31). Jajoavy mbaʼéramo álgiendi, ñañehaʼãnte jaiko pyʼaguapýpe. Upearã jajerure konsého umi ermanokuéra Jehová onombra vaʼekuépe kongregasiónpe. Pyʼỹinte jatopa pe gía ñaikotevẽva ñane puvlikasionkuérape, térã umi instruksión omeʼẽvape Jehová organisasión. Ha jasegírõ umi instruksión jaiko rangue jaipota ojejapo la ñande ñapensávante, ñaipytyvõta hína oĩ hag̃ua pyʼaguapy kongregasiónpe. w22.08 22 párr. 8, 9

La majoría ñaikotevẽ peteĩ amígo ñamombeʼu hag̃ua chupe mbaʼéichapa ñañeñandu. Péro upéva sapyʼánte ijetuʼu, pórke ndajajepokuaái ñamombeʼu mbaʼéichapa añetehápe ñañeñandu hína. Ha la ñamombeʼu sapyʼárõ katu, ha upéi jaikuaa pe ñane amígo omombeʼu hague ótrope umi mbaʼe jaʼe vaʼekue chupe, katuete ñañeñandu vaietereíta. Péro ajépa ñamombaʼete jarekóramo peteĩ ñane amígo haʼéva de konfiánsa ha ikatúva jajerovia hese. Umi ansiáno ndoikóiva omombeʼu upérupi umi mbaʼe oñekonfiáva chupekuéra, “haʼetetéta peteĩ lugár ikatuhápe ñañemoʼã yvytu atãgui”, ha “peteĩ lugár ikatuhápe ñakañy” (Is. 32:2). Ñande ñañeñandu porã hendivekuéra ha ndakyhyjéi ñamombeʼu hag̃ua chupekuéra peteĩ mbaʼe, pórke jajerovia nomombeʼumoʼãiha ótrope. Avei ndajajopýi chupekuéra omombeʼu hag̃ua ñandéve peteĩ mbaʼe nokorrespondéiva jaikuaa. Avei ñamombaʼeterei umi ansiáno rembirekópe, pórke ndoikói oporandu iménape umi mbaʼe natekotevẽiva oikuaa. Añetehápe tuichaiterei mbaʼe peteĩ ansiáno ndeʼíriramo hembirekópe umi mbaʼe omombeʼúva chupe ermanokuéra. w22.09 11 párr. 10, 11

Ikatu ñaime segúro Jehová osalvataha isiervokuéra ifiélvape pe “jehasa asy guasu” aja (Mat. 24:21; Dan. 12:1). Haʼe ojapóta upéva pe grúpo de nasión, oñehenóiva Gog de Magog, oataka vaieterei vove ko múndo tuichakuére Jehová siervokuéra ifiélvape. Ko grúpo de nasiónpe oĩramo jepe umi 193 miémbro oĩva pe Naciones Unídaspe, ndohupytymoʼãi asy pe Ñandejára Ijojahaʼỹvape ha ijehérsito yvagapeguápe. Jehová opromete voi: “Katuete añemombaʼeguasúta ha añesantifikáta, ha ajekuaaukáta heta nasión renondépe, ha oikuaáta hikuái che haʼeha Jehová” (Ezeq. 38:​14-16, 23). Gog ningo oatakáta hína Jehová puévlope ha upéva omoñepyrũta pe gérra de Armagedón, upépe Jehová ohundíta ‘entéro umi rréi ko yvy ariguápe’ (Apoc. 16:​14, 16; 19:​19-21). Péro “umi hembiapo porãva añoite opytáta ko yvy ape ári, umi hénte siémpre iñeʼẽrendúva osegíta oikove ko yvýpe” (Prov. 2:​21, nóta). w22.10 16, 17 párr. 16, 17

Ñande ndajaikuaái mbaʼépa oreko ñande rapichakuéra ikorasõme, Jehová añoite pe ikatúva ohecha “mbaʼépa oĩ umi hénte korasõme” (Prov. 16:2). Haʼe ohayhu opaichagua persónape, taidiferénte jepe raʼe mbaʼéichapa oñemongakuaa vaʼekue, mbaʼe edukasión ha kultúrapa oreko. Ha Jehová ñanemokyreʼỹ voi ‘jahayhuve hag̃ua’ enterovépe (2 Cor. 6:13). Ñande jahayhuse enterove ñane ermanokuérape, ha ndajaikoséi jahusga chupekuéra. Ndovaléi avei jaiko jahusga umi noĩrivape kongregasiónpe. Ñandépa ñapensámava peteĩ ñane pariénte ndahaʼéivare Testígo: “Kóva núnka ndoservimoʼãi Jehovápe”. Ndovaléi jajapo upéicha, pórke osino ñañemombaʼeguasúta ha ñapensátama voi ñandehustoveha chugui. Jehová osegi omeʼẽ oportunida ‘enterove yvypórape oñarrepenti hag̃ua’ (Hech. 17:30). Siémprekena ñanemanduʼa Jehovápe g̃uarã pe opensáva ihustoveha ótrogui iñinhustoha hína. Ñande ñamombaʼeterei umi mbaʼe Jehová heʼíva oĩ porãha. Ha upéva ñanembovyʼa ha ñanepytyvõ ñamoĩ hag̃ua ehémplo porã ótrope. Péicha haʼekuéra ñanderayhúta ñandéve ha koʼytevéntema ohayhúta Ñandejárape. w22.08 31 párr. 20-22

Ñande jaikuaa oĩtaha umi oñemoĩva ñane kóntrape japredika haguére, ha amo gotyove ikatu hína hetave oĩ ojapóva upéva (Dan. 11:44; 2 Tim. 3:12; Apoc. 16:21). Upéicharõ jepe ñaimekuaa segúro Jehová katuete ñanepytyvõtaha ñaikotevẽ jave. ¿Mbaʼérepa? Jehová siémpre oipytyvõ vaʼekue isiervokuérape okumpli hag̃ua iñasignasión, tahaʼe haʼéva umi situasión ijetuʼúva ombohováiva hína hikuái. Jahechamína la oiko vaʼekue proféta Ezequiel rehe, haʼe opredika vaʼekue umi judío ojegueraha vaʼekuépe Babilóniape. ¿Mbaʼeichagua persónapepa Ezequiel opredika vaʼerã kuri? Jehová heʼi hesekuéra “hovaʼatã”, ‘ikaprichóso’, ha ‘oñemoĩha hikuái ikóntrape’. Haʼekuéra oporokutu rasy voi umi ñuatĩcha ha ipeligróso umi alakráncha. Ndareíri Jehová heʼi vaʼekue Ezequiélpe heta vése: “Ani rekyhyje” (Ezeq. 2:​3-6). Ezequiel ikatu okumpli pe asignasión oñemeʼẽ vaʼekue chupe opredika hag̃ua pórke Jehová omondo chupe, omombarete chupe Ñandejára espíritu, ha Ñandejára ñeʼẽ omombarete chupe ijerovia. w22.11 2 párr. 1, 2

Jaikuaa ningo umi mbaʼe Jehová okrea vaʼekue ko yvy ape ári omano vaʼerãha kon el tiémpo, péro ñandéve nañandeapói vaʼekue upéicha. Jehová ningo ñandekreárõ guare omeʼẽ vaʼekue ñandéve pe deséo jaikovese hag̃ua pára siémpre (Ecl. 3:11). Upévare pe ñemano ñane enemigoite voi (1 Cor. 15:26). Ñapensamína ko mbaʼére: Ñamoĩna chupe ñanderasyeteha, ¿ñandépa upéicha jave ñañentregántema ha ndajajapói mbaʼevete? Nahániri. Upéva rangue pyaʼe voi jaháta doktórpe ha jaʼúta umi pohã omeʼẽva ñandéve ikatu hag̃uáicha jakuera jey. Ñande ningo jajapo voi opa ikatúva ani hag̃ua ñamano. Ha omano jave ñandehegui peteĩ jahayhúva katu ñañeñandu vaieterei ha upéva ndohasái voi sapyʼaitépe (Juan 11:​32, 33). Jaikuaa porãiterei ningo ñande Kreadór ñanderayhuetereiha, ha upévare haʼe nomeʼẽmoʼãi kuri ñandéve pe deséo ha kapasida jaiko hag̃ua pára siémpre, ndahaʼéirire upéva la ipropósito ñandéve g̃uarã. w22.12 3 párr. 5; 4 párr. 7

Jajapo vaʼerã ikatúva guive jasegi hag̃ua ñañekomunika ñane ermanokuérandi. Oĩ jave peteĩ mbaʼasy pyaʼeterei okorréva ikatu ñandejoko ani hag̃ua ñakomparti hendivekuéra. Jajecháramo peichagua situasiónpe ikatu ñañeñandu apóstol Juan oñeñandu haguéicha. Haʼe ohechase vaʼekue peteĩ iñamigoite héravape Gayo (3 Juan 13, 14). Péro haʼe heʼi peteĩ tiémpore ndaikatúi hague ojapo upéva. Upéicharamo jepe, haʼe ojapo ikatúva guive oñekomunika hag̃ua hendive ótro hendáicha. Ñande ndaikatúiramo jajotopa en persóna ñane ermanokuérandi, iporãta avei ñahenói mimíramo chupekuéra térã ñaenvia algún mensáhe chupekuéra. Jajapóramo upéva, ñanepytyvõta ani hag̃ua ñañeñandu ñaneañoiterei ha avei ñaime hag̃ua trankílo. Ha jahechakuaáramo jajepyʼapyetereiha, ¿mbaʼe ikatu jajapo? Ikatu ñañeʼẽ umi ansianokuérandi, ha haʼekuéra katuetei mborayhúpe ñanepytyvõta (Is. 32:​1, 2). w22.12 17, 18 párr. 6, 7

La Biblia omombeʼu ñandéve oĩ hague moménto Josépe oñeenkadena hague, ha oñeñapytĩ chupe ipy ha ijajúragui (Sal. 105:​17, 18). Jahechaháicha, José situasión amás día ivaive kuri ohóvo. Oĩhágui de esklávo, koʼág̃a oikéma katu peteĩ kársel ndevaipa jepévape. ¿Erekómavapa raʼe peteĩ provléma ijetuʼuetereíva, ha eñemboʼéramo jepe Jehovápe nomehorái la situasión? Oimérõ upéicha, jareko vaʼerã enkuénta Jehová nañandeprotehemoʼãiha ani hag̃uáicha ñanderupyty ni peteĩ provléma, pórke ko múndo oĩ hína Satanás poguýpe (1 Juan 5:19). Péro si ñanemanduʼa vaʼerã Jehová oikuaaha entéro mbaʼe jahasáva ha ojepyʼapyeterei ñanderehe jajecha vai jave (Mat. 10:​29-31; 1 Ped. 5:​6, 7). Haʼe opromete voi ñandéve: “Núnka ndorohejamoʼãi ha núnka nderepytamoʼãi neaño” (Heb. 13:5). Haʼetéramo jepe la ñane provléma ndorekoveimaha solusión ha ñañandúramo jepe nañameʼẽveimaha, ikatu ñaĩ segúro Jehová siémpre oĩtaha ñande ykére. w23.01 15, 16 párr. 7, 8

La Bíbliape jatopa avei ótra fórma ohechaukáva ñandéve Jehová ñanderayhuha. Jafalla jave hendive haʼe oasegura ñandéve nañanderejamoʼãiha. Por ehémplo, umi israelita ofalla vaietereíramo jepe heta vése Jehovándi, haʼe operdona vaʼekue chupekuéra oñarrepentírõ guare ipyʼaite guive. Umi kristiáno síglo primérope guare ohecha vaʼekue avei Jehová ohayhuha chupekuéra. Apóstol Pablo rupive, Jehová heʼi vaʼekue chupekuéra operdona ha okonsola vaʼerãha pe kuimbaʼe opeka vaʼekuépe péro upe rire oñarrepentívape (2 Cor. 2:​6, 7; 1 Cor. 5:​1-5). ¡Ajépa javyʼaite Jehová nañanemboykéi haguére jajavýramo jepe! Upéva rangue haʼe ñandekorrehi ha ñanepytyvõ ñaime porã jey hag̃ua hendive. Ha haʼe ohechauka voi oĩha operdona hag̃uáicha enterove oñarrepentívape (Sant. 4:​8-10). La Biblia ohechauka ñandéve Ñandejára ihústo, iñarandu ha ñanderayhuetereiha. Kóva haʼe peteĩ pruéva ohechauka porãva Jehová oipotaha jaikuaa porã chupe ha jaiko iñamígoramo. w23.02 7 párr. 16, 17

Ñande jaikuaase mbaʼéichapa umi mbaʼe oikóva ko múndope okumpli hína umi profesía oĩva la Bíbliape. Jesús heʼi vaʼekue unas kuánta kósa oikótava jaikuaa hag̃ua ko múndo aña oñehundi potaitemaha (Mat. 24:​3-14). Apóstol Pedro heʼi vaʼekue ñañatende porã hag̃ua koʼã profesíare ñande jerovia imbarete hag̃ua (2 Ped. 1:​20, 21). Haʼe ñanepytyvõ jahecha hag̃ua hendaitépe umi profesía, ha ñanemokyreʼỹ siémpre ñahaʼarõ ha ñanemanduʼa meme hag̃ua Jehová árare (2 Ped. 3:​11-13). ¿Mbaʼérepa? Péva ndahaʼéi jaikuaa hag̃ua ‘mbaʼe día ni mbaʼe órapa’ oúta Jehová ára guasu, síno jaipuru hag̃ua pe tiémpo hembýva ñandéve jasegi hag̃ua ‘ñanekondúkta potĩ ha jaadora hag̃ua Ñandejárape ñande pyʼaite guive’ (Mat. 24:36; Luc. 12:40). Ñande jasegise jajapo umi mbaʼe ogustáva Jehovápe ha jahechauka jahayhuha chupe, péro upearã tekotevẽ avei ñañatende porã ñandejehe. w23.02 16 párr. 4, 6

Umi “ótro ovechakuéra” orekóva la esperánsa oikóvo pára siémpre ko yvy ape ári tekotevẽ ojapo heta mbaʼe oiko hag̃ua pe paraísope. Péro upearã jasegi vaʼerã Jesús ehémplo. Por ehémplo, tekotevẽ jatrata porã umi unhídope ha ñaipytyvõ chupekuéra. Jesús ohechauka vaʼekue voi orekotaha enkuénta mbaʼéichapa jatrata chupekuéra ág̃a ñandehusgáta vove (Mat. 25:​31-40). Ikatu avei ñaipytyvõ umi unhídope jaapojávo pe predikasión (Mat. 28:​18-20). Ñande ningo koʼág̃ama voi ikatu ñañehaʼã ha jaiko Jehová oipotaháicha, natekotevẽi ñahaʼarõ og̃uahẽ raẽ pe paraíso upearã. Por ehémplo koʼág̃ama voi ñañehaʼã vaʼerã ikatu hag̃uáicha ñaneonrrádo, ñandefiél Jehovápe, ñane ermanokuérape ha ñane ména térã ñane rembirekópe. Koʼág̃ama voi jajapóramo koʼã mbaʼe ifasilvétama ñandéve jajapo hag̃ua upéva ág̃a ñaime vove pe paraísope. Avei ñañehaʼã vaʼerã jareko umi avilida ha kualida ñaikotevẽtava upépe. w22.12 11, 12 párr. 14-16

Ñande jaipotaiterei voi Jesúspe ñande rreirã, pórke haʼe hína pe mehór governánte oĩva. Jehová voi ontrena vaʼekue Itaʼýrape ha onombra chupe ogoverna hag̃ua (Is. 50:​4, 5). Ñapensamíntena avei mbaʼeichaitépa ñanderayhúgui Jesús ojesakrifika vaʼekue (Juan 13:1). Ha Jesús haʼe rupi ne governánte haʼe omerese avei nde pyʼaite guive rehayhu chupe. Haʼe heʼi vaʼekue umi añetehápe ohayhúva chupe haʼeha voi iñamígo, ha ohechaukaha ohayhuha chupe okumplívo umi mbaʼe haʼe omanda vaʼekue (Juan 14:15; 15:​14, 15). ¡Ajépa tuichaite mbaʼe jaiko Jehová Raʼy amígoramo! Avei reikuaa Jesús iñumildeha ha osegi porãha Itúa ehémplo. Ha reaprendéma haʼe omongaru hague hetaitereípe, okonsola umi oñedesanimávape ha omonguera umi hasývape jepe (Mat. 14:​14-21). Rehecháma avei mbaʼéichapa haʼe odirihi pe kongregasiónpe ko tiémpope (Mat. 23:10). Nde reikuaa Jesús haʼe rupi rréi Ñandejára Rréinope ojapotaha hetaiterei mbaʼe ijojahaʼỹva ñanderehehápe. ¿Mbaʼéichapa ikatu rehechauka rehayhuha chupe? Upearã resegi vaʼerã iñehémplo eñemeʼẽvo Jehovápe ha ejevautisávo. w23.03 4 párr. 8, 10

Jehová ndahaʼéi pe yvágapente okreáva hetaite mbaʼe porã, síno avei ko yvy ape ári ha pe márpe. Ha ikatu ñaaprende heta mbaʼe koʼã kreasióngui (Sal. 104:​24, 25). Avei ñapensamíntena peteĩ mbaʼére. Ñandejára ñandeapo vaʼekue voi ñandegusta hag̃uáicha umi mbaʼe iporãva. Avei ñandeapo vaʼekue jadisfruta hag̃ua umi mbaʼe jaʼúva, ñahetũ hag̃ua umi mbaʼe hyakuã asýva ha avei japoko, ñahendu ha jahecha hag̃ua la oĩva ñande jerére. La Biblia heʼi avei ñandéve mbaʼérepa iñimportánte jajepyʼamongeta pe kreasiónre: Pórke péicha ikatúta jaikuaa porãve Jehovápe (Rom. 1:20). Umi mbaʼe Jehová okrea vaʼekue ohechauka haʼe iñaranduha, ha umi atyraite mbaʼe omoĩva ñandéve jaʼu hag̃ua ohechauka ñanderayhuetereiha. Jajepyʼamongetávo Jehová kreasiónre ikatu jahecha umi kualida porã haʼe orekóva, ha péicha jaikuaa porãve chupe ha ñañemoag̃uiseve hese. w23.03 16 párr. 4, 5

La situasión ko múndope amás día ivaive, ha upévare avei ijetuʼuvéntema la héntepe ojerovia hag̃ua la Bíbliare. Ikatu oĩ oñehaʼãva ñanemboduda la Biblia omboʼeha la verda, ha Jehová onombra hague pe esklávo de konfiánsa ha iñarandúvape ogia hag̃ua isiervokuérape ko tiémpope. Péro jajeroviáramo Ñandejára Ñeʼẽ haʼeha la verda, jagueropuʼakáta umi atáke ha mbaʼeve nomokangymoʼãi ñande jerovia. Ñande jaʼéta voi: “Che adesidíma che pyʼaite guive siémpre ajapotaha umi mbaʼe remandáva. Cheñeʼẽrendúta aikove aja pukukue” (Sal. 119:112). Ñande ‘ni mbaʼevéicharõ nañatĩmoʼãi’ ñañeʼẽ hag̃ua ñande rapichakuérape la verdáre ha ñamokyreʼỹ hag̃ua chupekuéra osegi hag̃ua umi konsého oĩva la Bíbliape (Sal. 119:46). Ha ñande ikatúta jagueropuʼaka umi situasión ijetuʼuvéva jepe, umíva apytépe pe persekusión. La Biblia heʼi voi ikatutaha ‘ñanepasiénsia ha javyʼa jagueropuʼaka aja entéro mbaʼe’ (Col. 1:11; Sal. 119:​143, 157). La verda ñanepytyvõ ñañeñandu hag̃ua trankílo ha jajerovia hag̃ua. Avei omeʼẽ ñandéve esperánsa jaiko porãvetaha amo gotyove Ñandejára Rréino poguýpe. w23.01 7 párr. 16, 17

Pe pyhare omano mboyve Jesús oñemboʼe heta tiémpore idisipulokuéra rehehápe, ojerure Itúape ‘oñangareko hag̃ua hesekuéra oĩgui Satanás’ (Juan 17:15). Upéva ohechauka mbaʼeichaitépa Jesús ohayhu chupekuéra. Upérõ haʼe oikuaa hetaiterei ohasa asytaha, péro lomímonte ojepyʼapy ijapostolkuérare. Jasegi hag̃ua Jesús ehémplo nañapensái vaʼerã ñande ñaikotevẽvarente. Upéva rangue pyʼỹinte ñañemboʼe vaʼerã ñane ermanokuérare. Jajapórõ upéicha, ñaneñeʼẽrendu Jesúspe pórke haʼe omanda vaʼekue jajoayhu hag̃ua, ha avei jahechauka Jehovápe mbaʼeichaitépa jahayhu ñane ermanokuérape. Ñañemboʼéramo hesekuéra ndahaʼemoʼãi japerdéva ñane tiémpo. La Biblia heʼi voi ñandéve: “Peteĩ kuimbaʼe ihústova oñemboʼéramo ipyʼaite guive, upe ñemboʼe oreko podér ha imbareteterei” (Sant. 5:16). Ñane ermanokuéra ningo oikotevẽ ñane ñemboʼére, pórke haʼekuéra ombohovái hetaiterei situasión ijetuʼúva. w22.07 23, 24 párr. 13-15