Mayo

Ohecha rire umi 144.000-pe, apóstol Juan ohecha avei “peteĩ aty guasu”. Péro péva pe grúpope oĩ hetaiterei persóna, ha upéicha rupi pe aty guasu ndaikatúi voi ni oñekonta mboýpa oĩ. ¿Mbaʼépa jaikuaa ko grúpogui? Peteĩ ánhel oexplika Juánpe: “Koʼãva hína umi osẽva pe jehasa asy guasúgui, haʼekuéra ojohéi ijao pe Ovecha Raʼy ruguýpe ha ijaokuéra opyta morotĩ asy” (Apoc. 7:14). Ko grúpo ningo ojesalva pe jehasa asy guasu aja, ha opa rire upéva ohupytýta hikuái hetaiterei vendisión iporãitereíva ko yvy ape ári (Sal. 37:​9-11, 27-29; Prov. 2:​21, 22; Apoc. 7:​16, 17). Umi mokõi grúpo oñeñeʼẽha lívro de Apocalipsis kapítulo 7-pe ningo ohupytýta hetaiterei vendisión. ¿Ikatúpa ñañeimahina ñande ñaimeha ijapytepekuéra? Oiméramo upéicha iporãiterei upéva. Jehová ningo tuichaiterei ovendesíta mokõive grúpope, ha upe tiémpope javyʼaitereíta jadesidi haguére jaapojataha Jehová goviérno. w22.05 16 párr. 6, 7

¿Ndépa redesidíma raʼe peteĩ mbaʼe iñimportantetereíva? Oiméramo upéicha katuete ejeruréne raʼe Jehovápe tanemoarandu edesidi porã hag̃ua (Sant. 1:5). Ha upéva iporãiterei, pórke Salomón heʼi vaʼekue voi: “Pe arandu ningo pe iñimportantevéva hína” (Prov. 4:7). Jaikuaa ningo Salomón noñeʼẽi hague pe arandu kaʼatýre, síno oñeʼẽ vaʼekue pe arandu Jehová voi omeʼẽvare ñandéve. ¿Péro ikatu piko upéva ñanepytyvõ koʼág̃arupi jadesidi porã hag̃ua heta mbaʼe? Si ikatu. ¿Mbaʼépa ikatu jajapo ñanearandu hag̃ua? Upearã por ehémplo ikatu ñaanalisa umi konsého omeʼẽ vaʼekue mokõi kuimbaʼe iñaranduetereíva. Peteĩva hína Salomón. La Biblia ningo heʼi hese Ñandejára omeʼẽ hague chupe “arandu ijojahaʼỹva” (1 Rey. 4:29). Ha segundo, ikatu jahecha Jesús ehémplo, pórke ndaipóri vaʼekue voi ótro haʼéicha iñarandúva (Mat. 12:42). La Biblia heʼi voi Jehová espíritu oĩ hague hendive ha upévare ‘haʼe iñarandu ha iñentendído’ (Is. 11:2). w22.05 20 párr. 1, 2

Aníkena núnka ñapensa ñandeedáma haguére ndaikatumoʼãveimaha jahupyty umi méta jarekóva. Ñapensamíntena por ehémplo peteĩ ermána héravare Beverley. Haʼe ningo oreko 75 áño ha hasypaitéma anga, upéicha rupi ndaikatuvéima oguata porã. Péro haʼe lomímonte oapojase kuri pe kampáña espesiál oñeinvita hag̃ua la héntepe Konmemorasionhápe. Upévare haʼe omoĩ umi méta ijespesífikova ha ovyʼaiterei ohupytýrõ guare umíva. Ha ndahaʼéi voi upévante, iñehémplo omokyreʼỹ avei kuri umi ótro ermanokuérape osegi hag̃ua oñehaʼãve predikasiónpe. ¡Katuete ningo Jehová omombaʼeterei la traváho ojapóva ñane ermáno ha ermanakuéra ijedáva ha iguapoitéva! (Sal. 71:17). Upéicharõ, ¡ñamoĩkena umi méta si ikatútava jahupyty! Upearã, ñañehaʼãkena jareko umi kualida porã Jehová amás día ñandeguerohory hag̃ua. Ñaaprendékena umi mbaʼe pyahu Jehová servísiope ñandedeprovechove hag̃ua chupe ha iñorganisasiónpe. Ha jahechákena avei mbaʼe mbaʼépa ikatu jajapove ikatu hag̃uáicha ñaipytyvõ ñane ermáno ha ermanakuérape. Oiko haguéicha Timotéore, Jehová katuete avei ñanepytyvõta ikatu hag̃uáicha ‘enterove ohechakuaa ñañakãrapuʼãha jahávo’ (1 Tim. 4:15). w22.04 27 párr. 18, 19

Oiméramo nde eñehaʼãmbaite hína ne familiakuéra oservi hag̃ua Jehovápe péro upéicharamo jepe peteĩva ijapyteguikuéra ndoservisevéi chupe, aníkena repensa rejapo vai hague nde traváho. Jehová ningo omeʼẽ enterovépe pe liverta jadesidi hag̃ua jaservítapa chupe térã nahániri. Ani reperde la esperánsa, haʼe ikatu hína algún día oservi jey Jehovápe. Upéicha jave nemanduʼa vaʼerã pe ehémplo Jesús oipuru vaʼekue oñeʼẽrõ guare pe taʼýra ofalla vaʼekuére (Luc. 15:​11-19, 22-24). Pe ehémplope upe mitãrusu osẽ kuri pe tape porãgui, péro upéi ou jey. Tuakuéra, peẽme ningo oñemeʼẽ peteĩ priviléhio iporãitereíva: Peipytyvõ pene famíliape oservi hag̃ua Jehovápe (Sal. 78:​4-6). Upéva ningo ndahaʼéi hína la ifasilpáva, koʼýte koʼã tiémpope. Peẽ pejapo opa ikatúva peipytyvõ hag̃ua chupekuéra ohayhu hag̃ua Jehovápe, pemongakuaa, pekorrehi ha peñemoñeʼẽ chupekuéra, ikatu peime segúro ñande Túa Jehová ovyʼaitereiha pendereheve (Efes. 6:4). w22.05 30, 31 párr. 16-18

Oĩ hag̃ua pyʼaguapy ha unida kongregasiónpe, káda uno tekotevẽ ñañehaʼãmbaite jajapo pe iporãvéva. Ñapensamíntena umi kristiáno ypykuére, haʼekuéra ningo oreko vaʼekue diferénte avilida ha asignasión (1 Cor. 12:​4, 7-11). Péro haʼekuéra ndoikói vaʼekue okompeti ni ojedividipa upe haguére. Upéva rangue Pablo omokyreʼỹ káda únope ojapo hag̃ua la ikatúva entéro “omombarete hag̃ua Cristo rete”. Pablo oskrivi vaʼekue voi umi efésiope: “Káda párte ojapo porãvo hembiapo otokáva chupe, oipytyvõ pe hetépe okakuaa ha oñemombarete hag̃ua ohóvo mborayhúpe” (Efes. 4:​1-3, 11, 12). Koʼág̃arupi, umi ojapóva upéicha oñehaʼãmbaite hína oĩ hag̃ua pyʼaguapy ha unida ñane kongregasionkuérape. Jajerresolvékena ndajaikomoʼãiha ñañekompara ótrore. Upéva rangue ñaaprende vaʼerã Jesúsgui, ha ñañehaʼãmbaite jasegi iñehémplo jareko hag̃ua umi kualida haʼe oreko vaʼekue. Ha jasegi aja jajapo hína pe iporãvéva Jehovápe g̃uarã, jajeroviákena hese. La Biblia heʼi voi: “Ñandejára ningo ihústo hína ha ndahesaraimoʼãi umi mbaʼe pejapo vaʼekuégui” (Heb. 6:10). Haʼe omombaʼeterei umi mbaʼe jajapóva ñande pyʼaite guive jaipotágui haʼe ñandeguerohory. w22.04 14 párr. 15, 16

Ajépa javyʼaite jaikuaávo ñande natekotevẽiha jadesidi Jehovápa operdónata térãpa nahániri peteĩ opeka vaʼekuépe. Péro si oĩ peteĩ mbaʼe ñande jadesidi vaʼerã. ¿Mbaʼépa hína upéva? Ikatu voi oĩ peteĩ ofalla vaíva ñane kóntrape, ha ikatu ojerure ñandéve perdón térã avei nahániri. Upéicha jave ñande jahecha vaʼerã ñaperdonátapa chupe upe mbaʼe vai ojapo vaʼekuére ñanderehe, térãpa japytáta ñandepyʼaro ha ñandepochy upe persónandi. Ndahaʼéi ningo sapyʼaitépe ñanderesaráitava peteĩ mbaʼe vai ojejapo vaʼekuégui ñanderehe, koʼýte oiméramo igráve raʼe térã ñanembohasa asyeterei raʼe upéva. Pe rrevísta La Atalaya 15 de septiembre de 1994 heʼi: “Peteĩ kristiáno operdona jave ndahaʼéi ku ndaivaíriva chupe g̃uarã pe pekádo. Upéva rangue heʼise ohejaha Jehová kárgope ojeroviágui haʼe ojapotaha hustísia. Haʼe ningo hína pe Hués ihustovéva oĩva ko univérsope, ha katuete omoĩta hustísia itiempoitépe”. w22.06 9 párr. 6, 7

Jehová oprometéma vaʼekue ñane tiémpope oĩtaha heta hénte de diferénte puévlo, trívu ha oñeʼẽva diferénte idióma oadoráva chupe haʼe oipotaháicha. Koʼág̃arupi ko grúpo de héntepe oñehenói “aty guasu” (Apoc. 7:​9, 10). Ko aty guasúpe oĩramo jepe kuña, kuimbaʼe ha imitãva ko múndo tuichakuére, haʼekuéra oiko mborayhu ha pyʼaguapýpe peteĩ famíliaicha (Sal. 133:1; Juan 10:16). Avei umi oĩva ko aty guasúpe kyreʼỹme opredika. Haʼekuéra siémpre oĩ oñeʼẽ hag̃uáicha pe esperánsa porãite oguerekóvare umi ohendusévape guive chupekuéra (Mat. 28:​19, 20; Apoc. 14:​6, 7; 22:17). Ha nde reiméramo pe aty guasúpe, katuete remombaʼeterei pe esperánsa porãite erekóva. Satanás ningo oipeʼase ñandehegui pe esperánsa porãite jarekóva. Haʼe oipota voi ñapensa Jehová nañanderayhuiha ha nokumplimoʼãiha umi promésa ojapóva ñandéve. Ha Satanás oipeʼáramo ñandehegui ko esperánsa jaguerekóva ikatu voi jaju nañandepyʼaguasuvéi ha jaheja Jehovápe. w22.06 20, 21 párr. 2, 3

Tekotevẽ jajerovia mbarete omehorataha katuete pe situasión jahasáva, ha upéva ñanepytyvõta ñambohovái porã hag̃ua umi pruéva ojoguáva umi torménta hatãitereívape. Ñanemanduʼa vaʼerã Jesús ñandeavisa hague jajepersegitaha (Juan 15:20). Upévare jajepyʼamongetáramo Jehová promesakuérare, katuete ñanepytyvõta jasegi hag̃ua jaservi chupe. Jahechamína mbaʼéichapa pe esperánsa oipytyvõ vaʼekue Jesúspe osegi hag̃ua ifiél oikuaáramo jepe omano asyetereitaha. Pe Pentekostés áño 33-pe, apóstol Pedro osita peteĩ profesía oĩ vaʼekue lívro de Sálmope, ohechaukáva mbaʼéichapa Jesús itrankílo vaʼekue: “Aikove aja arekóta esperánsa, pórke nde ndacherejamoʼãi pe Sepultúrape, ha nde nderehejamoʼãi pe iñeʼẽrendúva ipyʼaite guive retekue oñembyai. [ . . . ] Nde chemyenyhẽta vyʼágui ne renondépe” (Hech. 2:​25-28; Sal. 16:​8-11). Jesús ojeroviaiterei Ñandejára omoingove jeytaha chupe ha ikatutaha oĩ jey Itúandi yvágape (Heb. 12:​2, 3). w22.10 25 párr. 4, 5

Peteĩ jey, Santiago ha Juan ojerure isýpe heʼi hag̃ua Jesúspe omeʼẽ hag̃ua chupekuéra peteĩ posisión iñimportánteva Irréinope (Mat. 20:​20, 21). Péicha Santiago ha Juan ohechauka kuri ijorgullóso ha iñimportanteseveha umi ótrogui (Prov. 16:18). Ndahaʼéi kuri Santiago ha Juan añónte la ijaktitu vai vaʼekue upérõ. Jahechamína mbaʼéichapa orreaksiona umi ótro apóstol. La Biblia heʼi: “Umi ótro 10 disípulo ohendúvo la oikóva, ipochy umi mokõi ndive” (Mat. 20:24). Ikatu voi ñañeimahina ojodiskuti hague oñondive Santiago, Juan ha umi ótro apóstol. ¿Mbaʼépa ojapo raʼe Jesús upérõ guare? Haʼe ndaipochýi kuri hendivekuéra, haʼe ndeʼíri ohekataha ótro apóstol iñumildevéva ha ojoayhuvéva. Upéva rangue, Jesús mborayhúpe oñeʼẽ hendivekuéra pórke oikuaa haʼekuéra ojaposeha avei iporãva (Mat. 20:​25-28). Jesús osegi kuri otrata chupekuéra mborayhúpe. w23.03 28, 29 párr. 10-13

Nde ningo hetáma estudia porã la Biblia, oiméne voi heta áñorema. Ha restudia rupi péicha, reiméma konvensído la Biblia haʼeha Ñandejára Ñeʼẽ. Ha ndahaʼéi upéva añónte, koʼág̃a nde reikuaáma ha rehayhúma la Biblia Apoharépe. Nde rehayhueterei rupi Jehovápe, emeʼẽma chupe nde rekove ha ejevautisáma, péicha oikóma ndehegui peteĩ Jehová siérvo. ¡Ajépa iporãite upéva! Nde oiméne heta mbaʼe embohovái raʼe ejevautisa mboyve ha ijetuʼu kuri ndéve ndefiél hag̃ua Jehovápe. Péro upéva ndopái upépe, amedída ke reprogresa rehóvo, embohováita hetave pruéva. Satanás oñehaʼãta omokangy ndehegui pe mborayhu reñandúva Jehováre ha oñehaʼãmbaitéta anivéma hag̃ua reservi chupe (Efes. 4:14). Aníkena reheja oiko nderehe upéva. ¿Mbaʼépa nepytyvõta esegi hag̃ua siémpre neñeʼẽrendu Jehovápe ha ekumpli ne promésa reservitaha chupe? Upearã esegi vaʼerã eprogresa, ‘esegi ekakuaapa peve Ñandejára servísiope’ (Heb. 6:1). w22.08 2 párr. 1, 2

Entéro jareko la rresponsavilida nañamosarambírivo umi mbaʼe oikóva ñande rogapýpe. Por ehémplo, peteĩ ména ikatu opensa peteĩ kostúmbre orekóvare hembireko ikatuha ojepuka. ¿Péro oĩ porãtapa pe ména omombeʼu ótrope upéva omotĩ hag̃ua hembirekópe? Ni mbaʼevéicharõ ndojapomoʼãi upéva. Pe ména ningo ohayhu hembirekópe, upévare arakaʼeve ndojaposéi peteĩ mbaʼe omotĩ térã omoñeñandu vaítava chupe (Efes. 5:33). Umi sy ha túa imanduʼa vaʼerã avei umi ifamília imitãvape ogustaha ojetrata chupekuéra kon rrespéto. Upévare nomotĩmoʼãi avei chupekuéra omombeʼúvo ótrope mbaʼe mbaʼépepa ojavy hikuái (Col. 3:21). Umi mitã tekotevẽ avei oaprende okirirĩkuaa hag̃ua ha oĩha algúna kósa natekotevẽiva omombeʼu ani hag̃ua omotĩ ifamíliape. Káda uno umi oĩva peteĩ famíliape oñehaʼãmbaitéramo ani hag̃ua omosarambi umi mbaʼe oikóva hogapýpe, ifamília oĩvéta unído. w22.09 10 párr. 9

Jehová voi omomanduʼa Jóbpe mbaʼeichaitépa Haʼe iñarandu ha otrataha mborayhúpe opa mbaʼe okrea vaʼekuépe. Haʼe oñeʼẽ chupe heta animál ijojahaʼỹvare (Job 38:​1, 2; 39:​9, 13, 19, 27; 40:15; 41:​1, 2). Avei Jehová omondo peteĩ kuimbaʼe imitãvape hérava Elihú omokyreʼỹ ha okonsola hag̃ua chupe. Haʼe oasegura Jóbpe Jehová siémpre ovendesiha umi oadorávape chupe ha upekuévo oaguantávape heta mbaʼe. Péro Jehová ojevale Elihúre omeʼẽ hag̃ua chupe unos kuánto konsého. Mborayhúpe Elihú oipytyvõ Jóbpe ani hag̃ua opensaiterei ijehe ha omomanduʼa chupe haʼe michĩetereiha oñekomparáramo Jehováre, haʼéva hína pe univérso Apohare. Jehová avei heʼi Jóbpe ojapo hag̃ua peteĩ mbaʼe: Oñemboʼe vaʼerã umi mbohapy iñamígo opeka vaʼekue rehehápe (Job 42:​8-10). ¿Mbaʼéichapa Jehová ñanepytyvõ koʼág̃arupi jahasa jave umi situasión ijetuʼuetereíva? Jehová noñeʼẽi ñandéve diréktamente oñeʼẽ haguéicha Jóbpe. Péro haʼe ojevale Iñeʼẽ la Bíbliare oñekomunika hag̃ua ñanendive (Rom. 15:4). w22.08 11 párr. 10, 11

Yma pe kongregasión oĩvape Rómape oĩ vaʼekue umi kristiáno judíova ha umi ndahaʼéiva judío. Ha pe léi mosáika ojepeʼárõ guare, natekotevẽvéima vaʼekue oñekumpli umi léi heʼíva mbaʼeichagua tembiʼúpa ikatu ojeʼu térã nahániri (Mar. 7:19). Upe tiémpo guive oĩ umi kristiáno judío oñandúva ikatumaha hoʼu opaichagua tembiʼu. Péro oĩ avei umi kristiáno judío noñanimáiva hoʼu umichagua tembiʼu. Upéva káusare pe kongregasión ojedividi. Apóstol Pablo ontende vaʼekue iñimportanteha jaiko pyʼaguapýpe. Haʼe oipytyvõ vaʼekue umi kristianokuérape ohechakuaa hag̃ua upeichagua diskusión ikatuha operhudika vai chupekuéra, ha avei pe kongregasión kompletoitépe (Rom. 14:​19, 20). Ha haʼe voi oĩ vaʼekue dispuésto okambia hag̃ua mbaʼéichapa oñekomporta ani hag̃ua omoñepysanga ótrope (1 Cor. 9:​19-22). Upéicha avei ñande ikatu ñamombarete ñane ermanokuérape, jajejokóramo ani hag̃ua ñañentremete umi mbaʼe káda uno ikatúvape odesidi. w22.08 22 párr. 7

Oiméramo jareko hína peteĩ méta Jehová servísiope, jasegi vaʼerã ñañehaʼãmbaite jahupyty hag̃ua upéva. Upéicha avei ñañehaʼãmbaite vaʼerã jajapo umi mbaʼe ihústova. Jehová ipasiénsia ha ñanepytyvõta japrogresa hag̃ua ha amás día ñamehorave hag̃ua jahávo (Sal. 84:​5, 7). Jehová ningo mborayhúpe ñanemomanduʼa ndahaʼeiha la hasyetereíva jajapo umi mbaʼe haʼe heʼíva iporãha (1 Juan 5:3). Umíva ningo ñandeprotehe, ha ñande ñaikotevẽ voi káda día upe proteksión. Ñanemanduʼamínte pe armadúra Pablo oñeʼẽ vaʼekuére (Efes. 6:​14-18). ¿Mbaʼe pártepa upe armadúragui oprotehe ñane korasõ? Pe párte ‘omoʼãva ñande pytiʼa hustísiape’, ha upéva orrepresenta hína umi mbaʼe Jehová odesidíva iporãha. Upe párte pe armadúragui oproteheháicha ñane korasõ, upéicha avei umi mbaʼe Jehová heʼíva oĩ porãha oprotehe ñane korasõ térã mbaʼeichagua persónapa ñande ñande pyʼapýpe. Upéicharõ iñimportanteterei hína ñamoĩ pe armadúra orekóva pe párte omoʼãva ñande pytiʼa hustísiape (Prov. 4:23). w22.08 29 párr. 13, 14

Ñandejára Ñeʼẽ ningo hetaiterei áñorema ideprovécho umi kuimbaʼe ha kuña ifiélvape. ¿Péro mbaʼéicha rupípa oiko upéva? Jehová oñenkarga vaʼekue ojekopia hag̃ua pe oĩva Iñeʼẽme, og̃uahẽ hag̃ua ñane tiémpo peve. Umi okopia vaʼekue la Biblia heʼíva ningo iñimperfékto vaʼekue, péro haʼekuéra oñatende porã vaʼekue ojapo hag̃ua upe traváho. Peteĩ expérto pe Escrituras Hebreaspegua heʼi: “Ndaipóri ningo ótro lívro yma guare peichaite peve ojekopia porãva”. Ikatu ñaime segúro jalee jave la Biblia jatopaha pype Jehová pensamiénto. Jehovágui ningo ou “entéro mbaʼe porã ha rregálo iporãva” (Sant. 1:17). Ha la Biblia haʼe hína peteĩva umi rregálo iporãvéva Jehová omeʼẽ vaʼekue ñandéve. Peteĩ persóna ñanderregaláramo álgo, upe rregálo ohechauka ñandéve upe persóna ñandekuaa porãha ha oikuaaha mbaʼépa la ñaikotevẽva. Upeichaite avei pe omeʼẽ vaʼekuégui ñandéve la Biblia. Jajepyʼamongetávo ko rregálo Jehová omeʼẽ vaʼekuére ñandéve, ikatu jaikuaa hetaiterei mbaʼe chugui. Jahechakuaa haʼe ñandekuaa porãitereiha ha oikuaa porãha avei umi mbaʼe ñaikotevẽva. w23.02 2, 3 párr. 3, 4

¡Ajépa javyʼaitéta oiko vove pe rresurreksión ko yvy ape ári Jesús Goviérno de 1.000 áño aja! Katuete ningo oiméne jahechasetereíma umi ñane hénte térã ñane amígo omano vaʼekuépe. Ha Jehová ningo upeichaite avei oñeñandu (Job 14:15). Epensamína mbaʼeichaitépa ojevyʼáta ko yvy ape ári oiko vove upéva. “Umi ihústova” orekóva herakuéra pe lívro de la vídape “orresusitáta oikove hag̃ua” (Hech. 24:15; Juan 5:29). Ikatu hína umi jahayhúva omano vaʼekue orresusita oikove hag̃ua oñepyrũvo pe rresurreksión ko yvy ape ári Armagedón riremi. Avei ‘umi iñinhústova’ ndoguerekói vaʼekue pe oportunida oaprendévo Jehovágui térã oservi hag̃ua chupe fiélmente omano mboyve, “orresusitáta ojehusga hag̃ua”. Enterovete umi orresusitátava ningo oikotevẽta oñemboʼe chupekuéra (Is. 26:9; 61:11). Upévare tekotevẽta ojejapo pe traváho tuichaitéva ojejapótava oñemboʼe hag̃ua la héntepe (Is. 11:10). w22.09 20 párr. 1, 2

Jehová ohechaukáma ipoderosoveha enterovete umi goviernokuéra oñeunívagui ogoverna hag̃ua. Haʼe oñorairõ vaʼekue umi israelita rehehápe ha oipytyvõ chupekuéra ojagarra hag̃ua hikuái tuicha párte pe Tiérra Prometída (Jos. 11:​4-6, 20; 12:​1, 7, 24). Heta vésema ningo Jehová ohechauka haʼeha pe Ñandejára Ijojahaʼỹva. Rréi Nabucodonosor de Babilonia oñemombaʼeguasu vaʼekue ipoderóso haguére, oreko haguére autorida ha omanda guasu haguére. Upéicha ojapo rangue, haʼe orrekonose vaʼerã kuri umíldemente Jehová haʼeha pe omereséva oñemombaʼeguasu. Upémarõ Ñandejára ombotavyrai chupe. Upéi oĩ porã rire jeýma, Nabucodonosor omombaʼeguasu “Ñandejára Ndaijojaháivape” ha orrekonose Jehová haʼeha ‘pe ogovernáva opa ára g̃uarã ha irréino osegitaha ohasáramo jepe heta henerasión’. Haʼe heʼi avei: “Ndaipóri ikatu vaʼerã ojoko chupe” (Dan. 4:​30, 33-35). Pe salmísta heʼi vaʼekue: “Ovyʼa umi hénte oadoráva Jehovápe, haʼekuéra hína pe puévlo Ñandejára oiporavo vaʼekue imbaʼerã” (Sal. 33:12). ¡Upéva ohechauka ñandéve mbaʼérepa jasegi vaʼerã ñandefiél Jehovápe! w22.10 15, 16 párr. 13-15

Jaikuaávo heta profesía bíblica oñekumplimaha, upéva omombarete ñande jerovia Ñandejára okumplipaitetaha umi mbaʼe opromete vaʼekue. Ñañeñandu voi pe salmísta heʼi vaʼekuéicha Jehovápe: “Hiʼãitereíma og̃uahẽ pe tiémpo nde chesalva hag̃ua. Che areko esperánsa ne promésare” (Sal. 119:81). Jehová ningo mborayhúpe oofrese ñandéve la Biblia rupive ‘esperánsa ñaneraʼarõha heta mbaʼe porã’ (Jer. 29:11). Pe esperánsa jarekóva amo gotyove g̃uarã ningo odepende hína umi promésa Jehová ojapóvare, ndahaʼéi umi umáno promésare. Upévare jasegíkena ñañehaʼãmbaite jastudia umi profesía bíblica ikatu hag̃uáicha ñamombareteve ñande jerovia Ñandejára Ñeʼẽ heʼívare. Ótra pruéva jaguerekóva ñakonfia hag̃ua la Bíbliare haʼe hína oipytyvõ rupi hetaiterei persóna osegívape ikonsého (Sal. 119:​66, 138). Por ehémplo heta matrimónio oĩva kuri ojedivorsia hag̃uáicha, koʼág̃a ovyʼa hikuái ha oĩ unído. Upéicha rupi umi mitã oĩva koʼã famíliape ovyʼa, oñeñandu segúro ha ojehayhuha chupekuéra (Efes. 5:​22-29). w23.01 5 párr. 12, 13

Ñapensa umi mbaʼe Jehová ojapómavare ñanderehehápe. Ñapensamína mbaʼéichapa ñande kásope oñekumplíma heta promésa oĩva la Bíbliape. Por ehémplo Jesús opromete vaʼekue Itúa omeʼẽtaha ñandéve entéro mbaʼe ñaikotevẽva jaikove hag̃ua (Mat. 6:​32, 33). Jesús heʼi vaʼekue avei Jehová omeʼẽtaha ñandéve espíritu sánto jajeruréramo chupe (Luc. 11:13). Jehová okumplíma koʼã promésa, ha oiméne ou avei ndéve ne akãme ótra promésa oñekumpli vaʼekue nde kásope. Por ehémplo Jehová neperdonataha, nekonsolataha ha omeʼẽtaha ndéve reikotevẽva esegi hag̃ua ndejerovia mbarete (Mat. 6:14; 24:45; 2 Cor. 1:3). Jajepyʼamongetáramo entéro mbaʼe Ñandejára ojapóma vaʼekuére ñanderehehápe, katuete ñaiméta segúro haʼe okumplitaha entéro mbaʼe oprometéva amo gotyove g̃uarã. Ñande avei ni michĩmi ndajadudái Jehová okumplitaha katuete ipromesakuéra. Pe salmísta oskrivi vaʼekue: ‘Ovyʼa pe persóna orekóva esperánsa Jehováre. Siémpre ikatu ñakonfia hese’ (Sal. 146:​5, 6). w22.10 28 párr. 15, 17

¿Oñekumplípa ko ñane tiémpope pe profesía heʼíva ojeadora jeytaha Jehovápe haʼe oipotahaichaite? Si. Áño 1919 guive hetaiterei persóna ikatúma osẽ Babilonia Guasúgui, orrepresentáva entéro rrelihión fálsa oĩva ko yvy ape ári. Entéro koʼã persónape ojegueraha hína peteĩ lugár iporãvéva pe Tiérra Prometídagui, ha upéva hína pe paraíso espirituál (Is. 51:3; 66:8). Áño 1919 guive umi unhído odisfrutáma hína ko paraíso espirituálgui. Ha ohasávo ohóvo pe tiémpo, umi oguerekóva la esperánsa oikóvo ko yvy ape ári, umi “ótro ovechakuéra”, ikatúma avei odisfruta ko paraíso espirituálgui. Ha upevakuére ohupytýma hetaiterei vendisión Jehovágui (Juan 10:16; Is. 25:6; 65:13). Upéicharõ, noimportái moõpa ñande jaiko, ikatu hína jadisfruta ko paraíso espirituálgui ñande jaapojáma guive ñande pyʼaite guive pe adorasión verdadéra. w22.11 11, 12 párr. 12-15

¿Ndévepa ijetuʼu rentende hag̃ua Jehová siémpre oexisti hague ha siémpre oexistitaha? (Is. 40:28). Heta persónape g̃uarã ningo ijetuʼu ontende hag̃ua upéva. Elihú heʼi vaʼekue Ñandejárare: “Avave ndaikatúi okonta mboy áñomapa haʼe oikove” (Job 36:26). Péro ñande nañantendéi haguére peteĩ mbaʼe ndeʼiséi hína ndasiertoiha. Por ehémplo, ñande nañantendeporãiramo jepe mbaʼéichapa ofunsiona pe elektrisida, upéva ndeʼiséi hína ndoexistiriha, ¿ajépa? Upéicha avei ikatu ndaijái ñane akãme la Jehová siémpre oexisti hague ha siémpre oexistitaha, péro upéva ndeʼiséi ndasiertoiha (Rom. 11:​33-36). Haʼe ningo oexistíma vaʼekue voi ndaipóri mboyve mbaʼeve ko univérsope, umíva apytépe oexisti mboyve pe kuarahy ha estrellakuéra. Jehová oexistíma vaʼekue ‘oipyso mboyve pe yvága’ (Jer. 51:15). w22.12 2, 3 párr. 3, 4

Sapyʼánte ikatu ojejerure ñandéve ñañemboʼe hag̃ua ótro renondépe. Por ehémplo peteĩ ermána ojapóva peteĩ estúdio bíblico ikatu ojerure oñemboʼe hag̃ua pe ermána omoirũvape chupe. Upe ermána ikatu ndoikuaaporãi pe estudiántepe, upévare ikatu haʼe ojeofrese ojapo hag̃ua pe ñemboʼe opakuevogua pe estúdio. Upéicha ojapóramo, ifasilvéta chupe oikuaa hag̃ua mbaʼépa heʼíta oñemboʼe jave pe estudiántere. Peteĩ ermánope ikatu ojejerure oñemboʼe hag̃ua pe aty ojejapóvape oñesẽ hag̃ua predikasiónpe térã peteĩ rreunionhápe kongregasiónpe. Umi ermanokuéra orekóva ko priviléhio imanduʼa vaʼerã maʼerãpa ojejapo hína pe rreunión. Oñemboʼekuévo noñemoĩri vaʼerã omeʼẽ konsého pe kongregasiónpe térã ojapo peteĩ anúnsio. La majoría umi kongregasionkuéra rreunionhápe oñemeʼẽ 5 minúto ikatu hag̃uáicha ojepurahéi ha oñeñemboʼe. Upéicharõ pe ermáno oñemboʼétava natekotevẽi “oñemboʼe puku”, koʼýte oñepyrũta jave peteĩ rreunión (Mat. 6:7). w22.07 24 párr. 17, 18

Jesús ningo oprofetisa vaʼekue koʼã ára pahápe oĩtaha “opaichagua mbaʼasy” (Luc. 21:11). ¿Mbaʼérepa ñandepyʼaguapy jaikuaa haguére upéva? Pórke jaikuaáma voi kuri oikotaha, ha upévare nañanesorprendéi. Jahechakuaa oñekumpliha Jesús heʼi hagueichaite. Haʼe heʼi vaʼekue voi: “Ani peñemondýi”, ha ñande ñañehaʼã hína jasegi upe konsého. Oĩramo peteĩ mbaʼasy pyaʼeterei okorréva ningo ndaikatúi jajapo heta mbaʼe. Péro ndajahejái vaʼerã ñandejoko jajapo hag̃ua ñande estúdio personál o jaha meme hag̃ua rreunionhápe. Ñane puvlikasionkuéra ha vidéope jatopa umi experiénsia ohechaukáva mbaʼéichapa ñane ermanokuéra ohasa avei peichagua situasión ha osegi ifiél Jehovápe. w22.12 17 párr. 4, 6

Entéronte ningo ohechakuaa vaʼekue Jacob ohayhuetereiha itaʼýra Josépe (Gén. 37:​3, 4). Ha upéicha rupi ndochaʼeiete vaʼekue Josére umi iñermáno majór. Ha orekórõ guare hikuái la oportunida, ovende chupe de esklávo unos kuánto madianítape. Haʼekuéra ogueraha Josépe mombyryeterei hógagui. Oho hikuái Egíptope, ha upépe ovende jey chupe ótro karaípe, hérava Potifar. Ajépa pyaʼete okambia kuri la José situasión. Haʼe ningo oiko porãhágui hógape, oiko chugui derrepentete peteĩ esklávo Egíptope (Gén. 39:1). Ñande kristianokuéra jarekónte avei provléma enterove orekoháicha (1 Cor. 10:13). Péro upéva ári jahasa avei heta situasión ijetuʼúva jaservi haguére Jehovápe. Por ehémplo oĩ jepi oñembohorýva ñanderehe, oñemoĩva ñane kóntrape, térã ñandepersegíva (2 Tim. 3:12). Péro tahaʼe haʼéva la jahasáva, Jehová siémpre oĩta ñande ykére ha katuete ñanevendesíta. w23.01 14, 15 párr. 3, 4

Sapyʼánte ñañandu ñañeʼẽmante vaʼerãha pe ermáno ñaneofende vaʼekuéndi. Péro jajapo mboyve upéva iporãta ñañeporandumi: “¿Chépa antende porã la oiko vaʼekue?” (Prov. 18:13). “¿Noiméipa pe ermáno ndopilláinte raʼe la ojapo vaʼekue?” (Ecl. 7:20). “¿Chépa sapyʼánte naofendéi avei péicha ótrope?” (Ecl. 7:​21, 22). “Ha añeʼẽramo pe ermánondi, ¿serápa la ndaikomoʼãi ambotuichave rei hína la provléma?”. Jajepyʼamongetáramo koʼã porandúre, ikatu hína jahechakuaa iporãvetaha ñambohasa reínte la oiko vaʼekue ha péicha jahechauka japorohayhuha. ¿Ha mbaʼépa ikatu jajapo káda uno? Jahechaukáramo jahayhuha ñane ermanokuérape iñimperféktoramo jepe ojekuaáta avei ñande haʼeha Jesús segidór. Jajapóramo upéicha, ñaipytyvõta umi persónape ohechakuaa hag̃ua mávapa pe rrelihión verdadéra. Upéva ikatu omomýi chupekuéra oadorase hag̃ua avei Jehovápe. Upévare jajedesidíkena jasegitaha jahayhu ñane ermanokuérape, ha péicha tojekuaa ñanderehe haʼeha kristiáno tee. w23.03 31 párr. 18, 19

La Biblia ningo ohechauka porãiterei pe kualida iñimportantevéva orekóva Jehová haʼe: Pe mborayhu. Ha Jehová ñanderayhu rupi, nomoĩri la Bíbliape hetaiterei informasión térã detálle ndaideprovechomoʼãiva jaservi hag̃ua chupe ha ñanderesareapa reítava (Juan 21:25). Jehová ohechauka ñanemombaʼe ha ñanderayhuha oñekomunika lájare ñanendive, ha omeʼẽvo ñandéve la oportunida ñandete jadesidi hag̃ua mbaʼépa jajapóta. Upévare haʼe nomoĩri la Bíbliape umi rrégla opa mbaʼépe g̃uarã ñande rekovépe. Upéva rangue haʼe omeʼẽ ñandéve umi ehémplo, umi profesía ha konsého ideprovéchotava ñandéve jadesidi porã hag̃ua. Péicha Ñandejára Ñeʼẽ ñanemomýi jahayhu ha ñaneñeʼẽrendu hag̃ua chupe ñande pyʼaite guive. La Biblia ohechauka avei Jehová oñeinteresaha ñanderehe. Upéva jaikuaa pórke pype jatopa heta rreláto ohechaukáva mbaʼéichapa Jehová siervokuéra oñeñandu vaʼekue. Jaleévo umíva ñantende mbaʼéichapa oñeñandu vaʼekue hikuái, pórke “peteĩ yvypóra ñandeichaguánte avei” haʼekuéra (Sant. 5:17). Jahechakuaa avei “Jehová oporombyasy ha oporoporiahuverekoha” pe otrata lájare umi isiérvo yma guarépe (Sant. 5:11). w23.02 6 párr. 13-15

Pe último lívro oĩva la Bíbliape oñepyrũ péicha: “Koʼã mensáhe Jesucristo orresivi Ñandejáragui ha koʼág̃a oikuaauka hína. Haʼe orresivi koʼã mbaʼe ohechauka hag̃ua Ñandejára esklavokuérape umi mbaʼe oikótava koʼẽrõite” (Apoc. 1:1). Avése ñande jaikuaaseterei voi umi mbaʼe oikóva ko múndo tuichakuére ha mbaʼéichapa umíva ohechauka hína oñekumpliha umi profesía. Upévare ikatu ñañemongetaseterei voi ñande rapichándi umi mbaʼe oiko vaʼekuére. Ñañeʼẽ jave ñane ermanokuérandi umi profesía bíblica oñekumplívare hína tekotevẽ ñañatende la jaʼétavare. ¿Mbaʼérepa? Ñande ndajaʼeséi umi mbaʼe ñandénte ñapensáva, pórke ikatu ogueru joavy kongregasiónpe. Por ehémplo ikatu umi governánte oñeʼẽ umi idéa haʼekuéra oguerekóvare ogueru hag̃ua pyʼaguapy ha segurida ko yvy ape ári, ha ikatu voi ñapensa haʼekuéra heʼívo koʼã mbaʼe okumpliha 1 Tesalonicenses 5:3 heʼíva. Péro péicha ñapensa rangue iñimportanteve jaikuaa umi informasión ipyahuvéva Jehová organisasión oguenohẽ vaʼekue. Upéicharõ ñañemongeta jave ñane ermanokuérandi umi profesía oñekumplívare ñane tiémpope ha mbaʼéichapa omyesakã ohóvo ñandéve Jehová organisasión, ñaipytyvõta hína pe kongregasiónpe ani hag̃ua oĩ joavy ha jaiko hag̃ua peteĩ ñeʼẽme (1 Cor. 1:10; 4:6). w23.02 16 párr. 4, 5

¿Mbaʼérepa nde rehayhu Jesucrístope? Jesús ningo ohayhu pe añetegua, iñumílde ha ihústo. Ha nde rehayhúramo pe añetegua ha umi mbaʼe oĩ porãva, katuete rehayhúta avei Jesucrístope. Ñapensamíntena mbaʼeichaitépa haʼe pyʼaguasúpe odefende vaʼekue pe añetegua ha umi mbaʼe oĩ porãva (Juan 18:37). Péro, ¿mbaʼéichapa Jesús ñanemokyreʼỹ ñaneumílde hag̃ua? Jesús ningo iñehémplo rupive ñanemokyreʼỹ ñaneumílde hag̃ua. Por ehémplo haʼe siémpre oipota ñamombaʼeguasu Itúape, ndahaʼéi chupe (Mar. 10:​17, 18; Juan 5:19). ¿Mbaʼéichapa nde reñeñandu reikuaávo haʼe iñumildetereiha? ¿Nanemokyreʼỹipa upéva ehayhu hag̃ua Ñandejára Raʼýpe ha esegi hag̃ua iñehémplo? Katuete ningo upéicha hína. ¿Péro mbaʼérepa Jesús iñumílde? Pórke Itúa voi iñumílde, ha haʼe ohayhu rupi Itúape osegi iñehémplo (Sal. 18:35; Heb. 1:3). Ajépa upéva nemoag̃uive Jesúsre, pórke ndaipóri voi haʼéicha ótro ohechaukáva umi kualida Jehová orekóva. w23.03 3, 4 párr. 6, 7

La Biblia oñeʼẽ mokõi grúpo de persóna orresusitátavare ha orekóva la esperánsa oikóvo pára siémpre ko yvy ape ári, “umi ihústova” ha ‘umi iñinhústova’. “Umi ihústova” haʼe hína umi oservíva Jehovápe fiélmente oikove aja, ha ‘umi iñinhústova’ katu ndoservíri kuri Jehovápe fiélmente. Koʼã mokõi grúpo orresusitáta rupi, ¿ikatúpa jaʼe ojeskriviha herakuéra pe lívro de la vídape? “Umi ihústova” omano mboyve, herakuéra ojeskrivíma pe lívro de la vídape. ¿Ojevorrápa herakuéra pe lívrogui omano rire hikuái? No, pórke haʼekuéra ‘oikove’ gueteri Jehová memóriape. “Haʼe hína umi persóna oikovéva Jára, ndahaʼéi umi omano vaʼekue Jára. Ñandejárape g̃uarã enterove haʼekuéra oikove gueteri” (Luc. 20:38). Upéva heʼise umi ihústova orresusita rire ko yvy ape ári, herakuéra oĩta pe lívro de la vídape, ndahaʼéiramo jepe permanénte gueteri la ojeskrivíva upépe (Luc. 14:14). w22.09 16 párr. 9, 10

Jehová oipota kuri pe primer umáno odisfruta pe ikreasióngui. Upévare omoĩ kuri Adánpe peteĩ hardín neporãmba jepévape ikatu hag̃uáicha haʼe oiko upépe, ombaʼapo pe yvýre ha ombotuicha pe hardín (Gén. 2:​8, 9). Adán oreko kuri peteĩ priviléhio tuichaitereíva okuidávo pe yvýre. Ikatu ñañeimahina mbaʼéichapa oñeñandu rakaʼe ohechávo umi semílla heñoiha ha umi plánta ipotypaha. Jehová ojerure avei Adánpe ombohéra hag̃ua umi animálpe (Gén. 2:​19, 20). Ñandejára ikatúnte avei kuri ojapo ijeheguiete upéva, péro odesidi omeʼẽ Adánpe ko traváho porãite. Ombohéra hag̃ua umi animálpe, oiméne Adán omaña porã raẽ hesekuéra, mbaʼépa ojapo ha oñekomporta lája. Katuete haʼe odisfrutáne raʼe ojapóvo upe traváho ha upe aja ohecha mbaʼeichaitépa Jehová ivale, iñinhenióso ha iñarandu. w23.03 15 párr. 3

Gran Bretaña ha Estados Unidos haʼe pe última poténsia mundiál oĩtava heʼi haguéicha la Biblia, ha pe estátua py orrepresenta hína chupe (Dan. 2:​31-33). Ko última poténsia mundiál rire ndaiporimoʼãvéima ótro goviérno opuʼãtava upe rire. Upéva rangue, oñehundietéta chupe Armagedónpe entéro umi ótro goviérnondi (Apoc. 16:​13, 14, 16; 19:​19, 20). ¿Mbaʼéichapa ñanevenefisia ko profesía? Pe profesía de Daniel omeʼẽve ñandéve pruéva ohechaukáva jaikomaha pe ára pahápe. Ojapóma mas de 2.500 áño, peteĩ profesíape Daniel heʼi hague Babilonia rire opuʼã jeytaha 4 poténsia mundiál. Ha koʼãva oreko vaʼekue la podér tahaʼe operhudika térã oipytyvõ hag̃ua Ñandejára puévlope. Daniel profesía ohechauka avei koʼã poténsia mundiál apytégui Gran Bretaña ha Estados Unidos haʼetaha pe última poténsia oĩtava. Ko profesía omeʼẽ ñandéve konsuélo ha esperánsa koʼẽrõitéma Ñandejára Rréino ohundipaitetaha umi goviérno umáno ha ogovernataha ko yvy tuichakuére. w22.07 4 párr. 9; 5 párr. 11, 12