Diciembre

¿Orekópa Jehová pe podér omoingove jey hag̃ua umi omano vaʼekuépe? Si oreko. Haʼe hína “Ñandejára Todopoderóso” (Apoc. 1:8). Ha oreko pe podér ohundi hag̃ua oimehaichagua enemígope, umíva apytépe pe ñemano jepe (1 Cor. 15:26). Jaikuaa avei Jehová ikatuha omoingove jey umi omano vaʼekuépe, pórke haʼe imanduʼa entéro mbaʼére. La Biblia heʼi haʼe ohenoiha káda estréllape hérarupi (Is. 40:26). Péicha avei haʼe ndahesaráiri umi omano vaʼekuégui (Job 14:13; Luc. 20:38). Jehovápe ndoforsaiete imanduʼa hag̃ua umi omoingove jeýtavare, mbaʼeichagua persónapa rakaʼe, ilája, ipínta, ha umi mbaʼe ohasa vaʼekuére hikuái. Jahecháma haguéicha, ikatu jajerovia pe rresurreksiónre pórke Jehová oreko pe deséo ha podér okumpli hag̃ua pe promésa. Jaikuaa avei Ñandejára ikatuha oporomoingove jey pórke yma ojapóma vaʼekue voi upéva. Jehová omeʼẽ vaʼekue pe podér ojapo hag̃ua upéva unos kuánto kuimbaʼépe, umíva apytépe Jesúspe. w23.04 9 párr. 7-9

Ñaneamávle ha ñañeʼẽrõ pyʼaguapýpe porã, umi hénte ikatu ohenduseve la jaʼéva ha osegi oñemongeta ñanendive. Oĩramo ojodiskutisénteva térã ñanemotĩséva, natekotevẽi ñambopuku la konversasión (Prov. 26:4). Péro saʼi oĩta la upeichaguáva, hetave persóna ohenduséta la jaʼéva. Ikatu jahupyty heta mbaʼe porã ñañehaʼãrõ ñandepyʼaguapy. Jajerurékena Jehovápe tomeʼẽ ñandéve la fuérsa ikatu hag̃uáicha jajejokokuaa ha ñakontesta porã osẽ jave umi téma helikadoʼíva térã oĩ jave oñeʼẽ vaisénteva ñanderehe. Oĩrõ opensa diferénteva ñandehegui, ñakontesta vaʼerã trankílonte ani hag̃ua opa diskusión vaípe. Ñañatendérõ la jaʼévare ha ñarreaksiona porãnte, heta hénte ikatu okambia la opensáva ñanderehe ha la Bíbliare. Upévare ‘siémprekena ñaime preparádo ñadefende’ hag̃ua la jagueroviáva ha ‘jajapo upéva pyʼaguapýpe porãnte ha jarrespeta ñande rapichakuérape ñande pyʼaite guive’ (1 Ped. 3:15). Jahechaukákena jarekoha la fuérsa jajejoko ha ñakontesta porã hag̃ua enterovépe. w23.09 19 párr. 18, 19

Jahechami 4 mbaʼe ñanepytyvõtava jahechauka hag̃ua ñanepasiensiaha. Primero, peteĩ persóna ipasiénsiava ndaipochyreíri. Haʼe opytánte trankílo ha norreaksionavaíri oĩ jave ombopochyséva chupe ha ojepyʼapy jave ndojahéiri ótrore (Éx. 34:6). Segundo, pe ipasiénsiava ohaʼarõkuaa trankílo. Tekotevẽrõ ohaʼarõ hetave tiémpo la oimoʼã vaʼekuégui, pe persóna ipasiénsiava oñehaʼã ani hag̃ua inervióso térã orrenega (Mat. 18:​26, 27). Tercero, peteĩ persóna ipasiénsiava ndojapurái ojapo hag̃ua álgo opensa porãʼỹre. Pe ipasiénsiava orekórõ álgo iñimportánteva ojapo vaʼerã, ndaipyʼaʼapurádoi oñepyrũ hag̃ua ojapo ni oterminántema hag̃ua. Upéva rangue oñemotiémpo okalkula hag̃ua mbaʼéichapa ojapóta upe mbaʼe. Upéi oipuru pe tiémpo tekotevẽva ojapo porã hag̃ua hembiapo. Cuarto, pe ipasiénsiava oñehaʼã ogueropuʼaka umi situasión ijetuʼúva ojekehaʼỹre. Oñehaʼãmbaite avei opensa umi mbaʼe porã orekóvare, ha ojapo opa ikatúva osegi hag̃ua oservi Jehovápe vyʼápe (Col. 1:11). Jehová siervokuéra ipasiénsia vaʼerã entéro koʼã situasiónpe. w23.08 20, 21 párr. 3-6

Ñande ñañatende ñane korasõre pórke Jehová omaña mbaʼépa oĩ ñande pyʼapýpe. ¿Mbaʼépa heʼise upéva? Jehová ohecha mombyryveha la héntegui ha oikuaa porãha opa mbaʼe jarekóva ñande pyʼapýpe. Haʼe ñanderayhúta jasegírõ ñapensa umi konsého haʼe omeʼẽvare ha ñanepytyvõtava jaikove hag̃ua pára siémpre. Péicha jajapóramo núnka nañapermitimoʼãi ñandegueraha vai umi hénte rekovai ni ndajagueroviamoʼãi umi japu omosarambíva Satanás ha ko múndo aña (Juan 4:14; 1 Juan 5:​18, 19). Jahayhu ha jarrespetavéta Jehovápe amáske ñañemoag̃ui hese, upéicha rupi ndajajaposemoʼãi mbaʼeve omoñeñandu vaítava ñande Ru yvagapeguápe ha ni noñantohamoʼãi ñandéve jajapo álgo ivaíva chupe g̃uarã. Marta, peteĩ ermána oikóva Croáciape omombeʼu oñepresenta hague chupe peteĩ tentasión hekovai hag̃ua. Haʼe heʼi: “Ijetuʼu kuri chéve apensa porã hag̃ua ha ani hag̃ua ajapo peteĩ mbaʼe ivaíva, péro arrespetágui Jehovápe ndahái pe tape vaíre ha upéva cheprotehe”. ¿Mbaʼépa ojapo raʼe Marta? Haʼe heʼi opensa hague mbaʼe konsekuénsiapa orekóta odesidi vaírõ. Ñande ikatu jajapo upéicha oñepresenta jave ñandéve peteĩ tentasión. w23.06 20, 21 párr. 3, 4

Jehová ndoipotavéima avave oñeʼẽ vai hérare, síno oipota oñemombaʼeguasu la héra ha oñesantifika. Jesús oikuaa rupi upéva heʼi vaʼekue idisipulokuérape oñemboʼe hag̃ua péicha: “Ore Ru reiméva yvágape, toñembotuicha nde réra” (Mat. 6:9). Jesús oikuaa vaʼekue upéva haʼeha la iñimportantevéva ko univérsope. Ndaipóri voi ótro haʼéicha oñehaʼã vaʼekue omopotĩ hag̃ua Ñandejára réra. Péro iñenemigokuéra ojagarrárõ guare chupe heʼi hese haʼe oñeʼẽ vaiha Ñandejárare. Jesúspe g̃uarã upéva haʼe vaʼekue la pekádo ivaivéva, ombojeguaru voi chupe opensa haguérente upévare. Ndareíri oñeñandu vaieterei vaʼekue oikuaágui oñekondenataha chupe oñeʼẽ vai haguére Ñandejárare. Upéva oiméne la okevrantave vaʼekue Jesúspe ojejagarra mboyve chupe (Luc. 22:​41-44). w24.02 11 párr. 11

Jahechauka vaʼerã jahayhuveha Jehová ha Jesúspe ñane parientekuéragui jepe (Mat. 10:37). Upéva ndeʼiséi jaheja rei vaʼerãha ñane rresponsavilida ñane famíliandi, ñaimoʼãgui upéva ñandejokotaha jaservi porã hag̃ua Jehovápe. Añetehápe, Jehová ha Jesús ñandeguerohory hag̃ua tekotevẽ ñakumpli porã pe rresponsavilida jarekóva ñane famíliandi (1 Tim. 5:​4, 8). Jajapórõ péicha javyʼavéta. Jehová oikuaa peteĩ família oikotaha vyʼápe pe ména ha tembireko ojoayhu ha ojorrespetárõ, tuakuéra ohayhu ha ohekomboʼe porãrõ ifamíliape ha umi mitã iñeʼẽrendúrõ ituakuérape (Efes. 5:33; 6:​1, 4). Jasegíkena la Biblia konsého tahaʼe haʼéva pe rresponsavilida otokáva ñandéve ñane famíliape. Ani jajapo umi mbaʼe ñande ñapensávante oĩ porãha, ni jajegiánte umi kostúmbre oĩvare ñande jaikohápe térã umi expérto heʼívare. Jaipuru porãkena umi puvlikasión bíblica. Umíva ohechauka ñandéve mbaʼéichapa ikatu jasegi umi konsého oĩva la Bíbliape. w23.08 28 párr. 6, 7

Umi ermána tekotevẽ oaprende umi mbaʼe ideprovéchotava chupe. Heta mbaʼe oaprendéva umi ermána imitã aja, oipytyvõ chupekuéra oikove aja pukukue. Por ehémplo ikatu eñehaʼã eskrivi ha eleekuaa hag̃ua. Heta paíspe oñepensa naiñimportanteiha kuñanguéra oaprende oskrivi ha oleekuaa hag̃ua. Péro añetehápe peteĩ kristiáno oaprendémante vaʼerã umi mbaʼe (1 Tim. 4:13). Upévare, mitãkuñanguéra aníkena peheja mbaʼeve pendejoko peaprende hag̃ua koʼã mbaʼe. ¿Mbaʼéichapa upéva penepytyvõta? Ikatúta pekonsegi pende travahorã, avei pestudia ha pemboʼekuaáta la Biblia. Ha iñimportanteveha katu peñemoag̃uíta Ñandejárare, pórke ikatúta pelee ha pejepyʼamongeta la Biblia heʼívare (1 Tim. 4:15). w23.12 20 párr. 10, 11

Jajerure Jehovápe tañanepytyvõ ani hag̃ua ñandereity umi tentasión. Ñaneimperfékto rupi ñandestira umi mbaʼe ivaíva, ha upévare kontinuadoite jagerrea vaʼerã. Upéva ári jey, Satanás ojapo ikatúva guive jajapo hag̃ua umi mbaʼe ñandestiráva. Por ehémplo, haʼe oñehaʼã omongyʼa la ñapensáva umi diversión ikyʼáva rupive. Koʼã diversión omyenyhẽ ñane akã umi pensamiénto ikyʼávagui ikatúva ñandereja vai Jehová renondépe ha ojapoka ñandéve umi mbaʼe ivaietereíva (Mar. 7:​21-23; Sant. 1:​14, 15). Ani hag̃ua jaʼa umi tentasiónpe, ñaikotevẽmante Jehová ñanepytyvõ. Jesús heʼi vaʼekue voi iñemboʼépe: “Ani reheja roʼa ñuhãme, síno oresalva Satanásgui” (Mat. 6:13). Jehová ningo ñanepytyvõse, péro upearã jajerure vaʼerã chupe ajúda. Avei ñamoĩ vaʼerã ñande párte ha ñañemboʼe rire jajapo ikatúva guive ñamboyke hag̃ua umi tentasión. w23.05 6, 7 párr. 15-17

Umi omendáva omombaʼéramo iñamista Jehovándi oñehaʼãta kyreʼỹme osegi ikonsého. Upéva oipytyvõta chupekuéra ani hag̃ua iprovléma ha oñepresentárõ katu osolusionakuaa hag̃ua hikuái. Avei umi Jehová amígo oñehaʼã ojogua chupe, por ehémplo iñamávle, ipasiénsia ha oporoperdonakuaa (Efes. 4:32–5:1). Peteĩ matrimónio oñehaʼãramo ohechauka koʼã kualida porã, ifasilvéta amás día ojoayhuve hag̃ua hikuái. Peteĩ ermána hérava Lena ojapóma mas de 25 áño omenda hague, ha haʼe heʼi voi: “Ifásil jahayhu ha jarrespeta peteĩ persóna ohayhúvape Jehovápe”. Jahechamína peteĩ ehémplo oĩva la Bíbliape. Entéro umi David familiare apytégui, Jehová oelehi vaʼekue José ha Maríape omongakuaa hag̃ua pe Mesíaspe. ¿Mbaʼérepa oelehi chupekuéra? Pórke mokõivéva Jehová amigoite vaʼekue, ha Jehová oikuaa porã haʼekuéra siémpre omotenondetaha chupe imatrimóniope. w23.05 21 párr. 3, 4

Ñande Líder Jesús ningo perfékto, péro umi ermáno haʼe onombra vaʼekue ko yvy ape ári iñimperfékto. Upévare sapyʼánte ijetuʼu ñandéve ñaneñeʼẽrendu hag̃ua chupekuéra. Koʼýte ojerurérõ ñandéve hikuái peteĩ mbaʼe ndajajaposéiva. Por ehémplo apóstol Pédrope oñemeʼẽ vaʼekue peteĩ instruksión ñepyrũrã ndosegiséiva. Upérõ peteĩ ánhel heʼi Pédrope hoʼu hag̃ua umi animál ikyʼáva roʼokue ha ojeproivíva pe léipe. Péro haʼe oñenega, ndahaʼéi una vénte síno 3 vése voi (Hech. 10:​9-16). Haʼe oñenega pórke pe instruksión pyahu naisentídoi chupe. Apóstol Pablo iñeʼẽrendu vaʼekue umi kristiáno ijedávape oĩvape Jerusalénpe heʼírõ guare chupe ogueraha hag̃ua hendive 4 kuimbaʼépe pe témplope oñemopotĩ hag̃ua pe léi heʼiháicha, ha péicha ohechauka hag̃ua orrespetaha pe léi. Pablo oikuaa umi kristiáno natekotevẽveimaha okumpli upe léi ha haʼe ndojapói hague mbaʼeve ivaíva. Upéicharõ jepe al ótro día Pablo ogueraha hendive umi kuimbaʼe pe témplope, ha ojapo hikuái la tekotevẽva “ipotĩ hag̃ua pe léi heʼiháicha” (Hech. 21:​23, 24, 26). Pablo iñeʼẽrendu rupi oipytyvõ oĩ hag̃ua unida ermanokuéra apytépe (Rom. 14:​19, 21). w23.10 10 párr. 15, 16

Jehová ñandeguerohory ha imbarete hag̃ua ñane amista hendive tekotevẽ jakyhyje chugui. Ikatu oime aréma jaservi hague Jehovápe térã ramoite guivénte, péro tahaʼe haʼeháicha enterovénte jakyhyje vaʼerã Jehovágui hendaitépe. ¿Péro mbaʼépa heʼise jakyhyje Jehovágui? Pe persóna okyhyjéva Jehovágui orrespeta Ñandejárape, ohayhu chupe ha ndojaposéi mbaʼeve ikatúva ombyai iñamista hendive. Jesús orrespeta vaʼekue Ñandejárape ha péicha omoĩ ñandéve pe ehémplo iporãvéva (Heb. 5:7). Haʼe ndahaʼéi oryryipáva okyhyje Jehovágui, síno ohayhu chupe ipyʼaite guive ha ojapose umi mbaʼe haʼe omandáva (Is. 11:​2, 3; Juan 14:​21, 31). Jesús ojapo haguéicha, ñande avei jarrespeta ha ñamombaʼe Jehovápe ñande pyʼaite guive pórke haʼe oporohayhu, iñarandu, ihústo ha ipoderóso. Jaikuaa haʼe ñanderayhuha ha oipotaha jasegi igía ha jajapo haʼe omboʼéva. Nañapenáiramo Jehováre haʼe ombyasyeterei, péro ñaneñeʼẽrendúramo chupe haʼe ovyʼaiterei (Sal. 78:41; Prov. 27:11). w23.06 14 párr. 1, 2; 15 párr. 5

Rréi Uzías oúrõ guare ipoderóso, hesarái Jehovánte omeʼẽ hague chupe entéro mbaʼe porã orekóva. ¿Mbaʼépa ñaaprende? Ani ñanderesarái entéro vendisión ha priviléhio jarekóva Jehová servísiope ouha chugui. Ñañemombaʼeguasu rangue umi mbaʼe jahupytývare, siémpre jaagradese vaʼerã Jehovápe umi mbaʼe ikatúvare jajapo (1 Cor. 4:7). Avei ñaneumílde vaʼerã ñarrekonose hag̃ua ñaneimperfektoha ha ñaikotevẽha jajekorrehiʼimi. Peteĩ ermáno orekóva 60 áñorupi heʼi voi: “Aaprendéma ndachepochýi ha nañedesanimái vaʼerãha afalla jave. Sapyʼánte vyrorei ajapo ha oĩ chekorrehíva, péro péicha jave añehaʼã amehora ha asegi aservi Jehovápe iporãveháicha”. Upéicharõ ikatu jaʼe jarrespetáramo Jehovápe ha jasegíramo ñaneumílde javyʼataha katuete (Prov. 22:4). w23.09 10 párr. 10, 11

Umi kristiáno síglo primeropegua tekotevẽ vaʼekue iñaguánte. Haʼekuéra oreko vaʼekue umi provléma orekónteva voi umi hénte upe tiempopegua. Upéva ári opersegi vaʼekue chupekuéra umi autorida Romapegua, umi líder rrelihióso judío ha ihentekuéra jepe oñemoĩ hesekuéra (Mat. 10:21). Avei pe kongregasiónpe oĩ vaʼekue umi apóstata oñehaʼãva odividipa umi ermánope (Hech. 20:​29, 30). Péro haʼekuéra osegi vaʼekue oaguanta (Apoc. 2:3). ¿Mbaʼépa oipytyvõ chupekuéra? Haʼekuéra ojepyʼamongeta vaʼekue umi Ñandejára siervokuéra ehémplore, umíva apytépe Job rehe (Sant. 5:​10, 11). Avei oñemboʼe meme vaʼekue Jehovápe ha opensa umi mbaʼe porã ohupytýtavare osegírõ oaguanta (Hech. 4:​29-31; 5:41). Ñande avei ikatu ñaneaguánte. Upearã jajepyʼamongeta vaʼerã Ñandejára siervokuéra ehémplore jatopáva la Bíbliape ha ñane puvlikasionkuérape. w23.07 3 párr. 5, 6

Jehová ha Jesús nopensamoʼãi ñanderehe nañanepohãveimaha. Apóstol Pedro onega rire Jesúspe, odesidi vaʼerã kuri peteĩ mbaʼe iñimportánteva: Osegítapa oservi Jesús disípuloramo térãpa ojedehátantema. Jesús oñemboʼéma kuri Pedro rehehápe ani hag̃ua ikangy ijerovia. Upéi heʼi Pédrope oñemboʼe hague hesehápe ha okonfiaha hese haʼe ikatutaha omombarete iñermanokuérape (Luc. 22:​31, 32). ¡Mbaʼeichaitépa oiméne Pedro ikyreʼỹ imanduʼávo la Jesús heʼi vaʼekuére! Ñande jadesidíta jave álgo iñimportánteva, Jehová ikatu ojevale umi ansiáno ñanderayhúvare oasegura hag̃ua ñandéve ikatuha jasegi ñandefiél chupe (Efes. 4:​8, 11). Jehová omeʼẽ vaʼekue umi mbaʼe oikotevẽva Pedro ha umi ótro apóstolpe. Upéicha avei oñangarekóta ñanderehe ha omeʼẽta ñandéve umi mbaʼe ñaikotevẽva ñamotenondéramo iservísio. w23.09 24, 25 párr. 14, 15

Jehová ohechapaite umi mbaʼe michĩvéva jepe jajapóva ótro rehehápe. Chupe g̃uarã haʼete opytáva odeve ñandéve pe jajapóvare. Oimérõ nde reservi raʼe anteve de siérvo ministeriál térã ansiáno ikatu reĩ segúro Jehová siémpre imanduʼaha la rejapo vaʼekuére rehayhúgui chupe (1 Cor. 15:58). Avei ojesareko umi mbaʼe resegívare rejapo rehayhu rupi chupe. Jehová oipota jahayhuve chupe ha avei ñande rapichakuérape. Ñande ikatu jahayhuve Jehovápe jaleévo la Biblia, jajepyʼamongetávo hese ha kontinuadoite ñañemboʼévo chupe. Ñane ermanokuérape avei ikatu jahayhuve ñaipytyvõvo chupekuéra umi mbaʼe oikotevẽvape. Japorohayhuvévo ñañemoag̃uivéta Jehováre ha avei ñane ermáno ha ermanakuérare, ha koʼã amista oduráta tóda la vída. w23.07 10 párr. 11; 11 párr. 13; 13 párr. 18

Káda kristiáno odesidi vaʼerã mbaʼépa ojapóta okuida hag̃ua isalúre. Jadesidíta jave mbaʼe tratamiéntopa jasegíta jareko vaʼerã enkuénta Ñandejára léi heʼiha ndajaipurúi vaʼerãha tuguy ni espiritísmo (Hech. 15:20; Gál. 5:​19, 20). Péro ótra kosarã káda únoma ikatu odesidi mbaʼe tratamiéntopa osegíta. Ikatu oime ñande ñaĩ konvensído peteĩ tratamiénto iporãha térã ivaiha, upéicharõ jepe jarrespeta vaʼerã ñane ermáno odesidíva okuida hag̃ua isalúre. Ha siémpre ñanemanduʼa vaʼerã koʼã mbaʼére: 1) Ñandejára Rréino añoiténte oipeʼapaitéta umi mbaʼasy (Is. 33:24). 2) Káda uno oĩ vaʼerã segúro oĩ porãha pe odesidíva (Rom. 14:5). 3) Ani jahusga avavépe ni jajapo álgo ikatúva oofende ótrope (Rom. 14:13). 4) Kristianokuéra japorohayhu ha jaikuaa pe unida oĩva kongregasiónpe iñimportanteveha la ñande ñapensávagui (Rom. 14:​15, 19, 20). w23.07 24 párr. 15

¿Remombaʼépa ne amista Jehovándi? Katuete ningo. Ymaite guive hetaiterei persónama ojapo vaʼekue upéva (Sal. 104:​33, 34). Oĩ umi heta ojesakrifika vaʼekue Jehová rehehápe, por ehémplo yma Israélpe oĩ umi nazareo “oñemeʼẽva Ñandejárape”. Upéva opyta porãiterei vaʼekue umi nazaréore, pórke haʼekuéra ojapo peteĩ promésa espesiál oservi hag̃ua Ñandejárape. Okumpli hag̃ua upe promésa tekotevẽtamante kuri ojesakrifika hikuái. Según Moisés léi peteĩ kuña térã peteĩ kuimbaʼe ikatu vaʼekue ojapo koʼãichagua promésa oservi hag̃ua de nazareo peteĩ tiémpore (Núm. 6:​1, 2). Ojapóvo ko promésa haʼe oñekompromete kuri osegitaha unos kuánto léi umi ótro israelita natekotevẽi vaʼekue osegi. ¿Mbaʼére peteĩ israelita odesidíta ojapo upéva? Ohayhúgui Jehovápe ha ohechaukaségui ijagradesidoha ovendesi heta haguére chupe (Deut. 6:5; 16:17). w24.02 14 párr. 1, 2

La Bíbliape pyʼỹinte jatopa pe palávra hebrea ojetradusíva “mborayhu ifiélva”. Ko palávra ojepuru ojehechauka hag̃ua mbaʼeichaitépa Ñandejára ohayhu isiervokuérape ha ndohejareiriha chupekuéra. Avei ojepuru ojehechauka hag̃ua mbaʼeichaitépa Ñandejára siervokuéra ojoayhu ha ifiél ojupe (2 Sam. 9:​6, 7, nóta). Amás día ikatu jahechauka porãve ñandefielha Ñandejárape. Jahechamína mbaʼéichapa ojapo vaʼekue upéva proféta Daniel. Oikove aja pukukue Daniel heta vése tekotevẽ vaʼekue ohechauka ifiéltapa Jehovápe. Orekórõ guare mas de 90 áño oiko vaʼekue peteĩ mbaʼe ijetuʼuetereíva. Umi ofisiál oservíva pe rréipe ndochaʼéi Daniel rehe ha ndorrespetái pe Dios haʼe oadorávape. Upévare haʼekuéra okalkula mbaʼéichapa ojukáta Daniélpe ha onohẽka pe rréipe peteĩ léi omoĩtava a pruéva Daniélpe. Umi ótro hénteicha avei Daniel ohechaukánte vaʼerã kuri iñeʼẽrenduha pe rréipe ha noñemboʼevéi Jehovápe 30 díare. Péro Daniel nomboykéi Jehovápe (Dan. 6:​12-15, 20-22). w23.08 5 párr. 10-12

Jehová oipota jasegi jahayhu ñane ermanokuérape. Oimérõ peteĩ ermáno térã ermána nañandetratái raʼe peteĩ kristiáno ojapo vaʼerãháicha, ani ñaimoʼã ojapo hague a propósito síno ñapensa oñehaʼãha avei ojapo la iporãva (Prov. 12:18). Jehová ohayhu isiervokuéra ifiélvape iñimperféktoramo jepe. Ha jajúramo jajavy katu Jehová ndopytái ipyʼaro ñanderehe, síno osegi ñandeguereko iñamígoramo (Sal. 103:9). Ajépa iñimportantete jasegi Jehová ehémplo ha ñaperdona ñande rapichakuérape (Efes. 4:32–5:1). Ñanemanduʼákena hiʼag̃uimbaitemaha ohóvo pe fin. Upévare jasegi vaʼerã ñaime unído ermanokuérandi. Amo gotyove ikatu hína jajepersegi ha jajegueraha kárselpe. Oikórõ koʼã mbaʼe koʼýte ñaikotevẽta ñane ermanokuérare (Prov. 17:17). w24.03 15, 16 párr. 6, 7

La Biblia oñeʼẽ umi mitãrusu oñemoag̃ui vaʼekuére Jehováre, ombovyʼáva chupe ha osẽ porã vaʼekue hikuái. Umíva apytépe oĩ David. Haʼe imitãite guive odesidi vaʼekue oadorataha Ñandejárape, ha kon el tiémpo oiko chugui peteĩ rréi iñeʼẽrendúva Jehovápe (1 Rey. 3:6; 9:​4, 5; 14:8). Restudiáramo David ehémplo nekyreʼỹvéta reservi hag̃ua Jehovápe fiélmente. Ikatu avei reaprende heta mbaʼe restudiávo Marcos térã Timoteo ehémplo. Haʼekuéra odesidi vaʼekue iñeʼẽrendutaha Jehovápe imitãite guive, ha osegi oservi chupe fiélmente. Umi mbaʼe rejapóva koʼág̃a ikatu ndeperhudika térã nepytyvõ amo gotyove. Ndereikóiramo rejerovia ndejehe síno Jehováre, ikatúta nearandu, redesidi porã ha revyʼa. Ani nderesarái Jehová ovaloraitereiha la rejapóva chupe g̃uarã. Núnka nerembyasymoʼãi redesidíramo reservi ñande Ru yvagapeguápe, pórke ndaipóri mbaʼeve iporãvéva upévagui. w23.09 13 párr. 18, 19

Apóstol Pablo oreko vaʼekue enkuénta umi ermanokuéra iñimperfektoha. Por ehémplo haʼe oñepyrũrõ guare oho pe kongregasión oĩvape Jerusalénpe, oĩ vaʼekue umi odudáva chugui (Hech. 9:26). Upéi oĩ vaʼekue oñeʼẽ vaíva hese oheja vai hag̃ua chupe (2 Cor. 10:10). Apóstol Pablo ohecha vaʼekue avei peteĩ ansiánope odesidi vai, ha upe situasión ikatu vaʼekue ombopochy hetápe (Gál. 2:​11, 12). Avei Páblope tuichaiterei odesepsiona vaʼekue Marcos, peteĩva umi omoirũ vaʼekue chupe (Hech. 15:​37, 38). Pablo ikatu vaʼekue omboykéntema umi ombopochy vaʼekuépe chupe. Péro upéva rangue haʼe osegi omombaʼe umi ermánope ha oservi Jehovápe fiélmente. ¿Mbaʼépa la oipytyvõ vaʼekue Páblope? Haʼe ohayhu vaʼekue umi ermanokuérape. Upévare ndoikói vaʼekue opensa meme mbaʼépepa ojavy raʼe hikuái, síno oreko enkuénta umi mbaʼe porã ojapóva. Avei Pablo oporohayhu rupi ikatu vaʼekue oporoperdona heʼiháicha pe téxto koestediagua. w24.03 15 párr. 4, 5

La Bíbliape oĩ heta ehémplo ohechaukáva iporãha ñarreaksiona pyʼaguapýpe porã. Jahechamína Isaac ehémplo. Peteĩ tiémpore haʼe oiko vaʼekue Guerárpe, haʼéva umi filisteo território. Upérõ umi oikóva ijerére oenvidia chupe, upévare oho ojatypa umi póso Isaac túa ojoʼoka vaʼekue isiervokuérape. Isaac oho rangue orreklama iderécho ha oiko vai umi pósore, ovánte upégui ha oho ojoʼo ótro póso (Gén. 26:​12-18). Péro umi filisteo heʼi jey pe y oñenohẽva umi pósogui haʼeha imbaʼekuéra. Oikórõ jepe koʼã mbaʼe Isaac orreaksiona pyʼaguapýpente (Gén. 26:​19-25). Isaac oaprendéne raʼe ituakuéra ehémplogui ipyʼaguapy hag̃ua umi ótro haʼetéramo jepe ohekáva ládo ombopochy hag̃ua chupe. Abrahán oñehaʼã vaʼekue oiko pyʼaguapýpe porãnte umi ótrondi, ha Sara avei ‘ipyʼaguapy ha iñakãguapy’ (1 Ped. 3:​4-6; Gén. 21:​22-34). w23.09 15 párr. 4

Jehová ombou vaʼekue Itaʼýrape ko yvy ape ári itiempoitépe, péicha Jesús omboʼe vaʼekue la héntepe pe Rréinogui ha omeʼẽ hekove ñanderreskata hag̃ua pe pekádo ha ñemanógui. Upéi Jehová omoingove jey Jesúspe yvágape ogoverna hag̃ua Ñandejára Rréinope. Pe téma iñimportantevéva la Bíbliape haʼe: Oñesantifika Jehová réra. Upéva ojehupytýta haʼe okumplívo ohóvo hembipota ko yvýpe g̃uarã, upearã oipurúta pe Rréino ogovernahápe Jesucristo. Jehová rembipota ndaikatúi okambia, haʼe ogarantisa vaʼekue entéro mbaʼe haʼe heʼíva oikotaha (Is. 46:​10, nóta; Heb. 6:​17, 18). Ko yvýgui oikóta peteĩ paraíso ha upépe oikóta Adán ha Eva familiare perféktotava, ha “haʼekuéra oikóta vyʼápe opa ára g̃uarã” (Sal. 22:26). Péro Jehová voluntápe oike ótra kósa tuichaitereíva: Enterove oĩva yvágape ha ko yvy ape ári oservíta chupe en unida. Upéicha enterove iñeʼẽrendúta Jehovápe ipyʼaite guive igovernánteramo (Efes. 1:​8-11). ¡Ñanesorprende Jehová okumpli lája ohóvo ivolunta! w23.10 20 párr. 7, 8

Umi judío osẽva Babilóniagui, og̃uahẽmírente Jerusalénpe ijetuʼúma chupekuéra omeʼẽ ifamíliape la oikotevẽva. Oĩ kuri provléma polítiko ha heta país oĩva ijerére oñemoĩ hesekuéra. Upévare algúnope ijetuʼu kuri omotenonde hag̃ua pe traváho iñimportantevéva orekóva hikuái: Omopuʼã jey Jehová témplo. Upévare Jehová omondo proféta Ageo ha Zacaríaspe omokyreʼỹ hag̃ua pe puévlope ha tuicha oipytyvõ hikuái (Ageo 1:1; Zac. 1:1). Péro 50 áñorupi upe rire umi judío oñedesanima jey vaʼekue, upévare Esdras oho Babilóniagui Jerusalénpe. Haʼe ivale vaʼekue okopia hag̃ua Ñandejára Ñeʼẽ. Esdras oho omokyreʼỹ hag̃ua umi judíope omotenonde hag̃ua pe adorasión verdadéra (Esd. 7:​1, 6). Ageo ha Zacarías profesía oipytyvõ vaʼekue Ñandejára puévlope osegi hag̃ua ojerovia Jehováre oĩrõ guare oñemoĩva hesekuéra. Péicha avei umi profesía ikatu ñanepytyvõ jasegi hag̃ua ñakonfia Jehováre tahaʼe haʼéva la oikóva (Prov. 22:19). w23.11 14, 15 párr. 2, 3

Jahechaukáta jahayhuha ñane ermanokuérape ñakonsolárõ chupekuéra, ha jasegíta ñaporokonsola, jaiporiahuverekórõ ñande rapichápe (1 Tes. 4:18). ¿Mbaʼéichapa jasegíta jajoayhu ñande pyʼaite guive? Tekotevẽ ñaperdona ñane ermanokuéra fálla mimi ijetuʼúrõ jepe sapyʼánte. ¿Mbaʼérepa koʼág̃arupi koʼýte iñimportánte jajoayhu? Apóstol Pedro omombeʼu ñandéve mbaʼérepa: ‘Hiʼag̃uimbaitéma entéro mbaʼe oñemohuʼã hag̃ua. Upévare koʼýte pejoayhu vaʼerã pende pyʼaite guive’ (1 Ped. 4:​7, 8). Ko múndo aña oñehundi potaitéma ha amedída ke hiʼag̃ui pe fin, ¿mbaʼépa oikóta? Jesús heʼi vaʼekue: “Umi hénte opa tetãygua ndaijaʼemoʼãi penderehe peẽ haʼe haguére che disípulo” (Mat. 24:9). Ñaaguanta hag̃ua upe situasión ñaikotevẽmante ñane ermanokuérare ha jasegi vaʼerã ñaĩ unído. Jajoayhúramo, Satanás ni mbaʼevéicharõ ndaikatumoʼãi ñandedividi (Filip. 2:​1, 2). w23.11 13 párr. 18, 19

Ndaijojahái umi mbaʼe ikatúva jahupyty Ñandejára Ñeʼẽ rupive. Ñamboʼe jave la héntepe pe añetegua, haʼekuéra oñepyrũ oikuaa porãve Jehovápe ha upéicha jave jahecha peteĩ mbaʼe iporãitereíva. Mbeguekatúpe, umi hénte Satanás omohesatũ vaʼekue, oñepyrũma opilla hetave mbaʼe ha ohayhu Jehovápe ñande jahayhuháicha chupe. Ha ndahaʼéi upévante, osorprendeterei chupekuéra mbaʼeichaitépa Jehová ipoderóso (Is. 40:26). Haʼekuéra ojerovia hese ohechávo ihustoitereiha (Deut. 32:4). Ojesapeʼa hikuái ohechávo mbaʼeichaitépa Jehová iñarandu (Is. 55:9; Rom. 11:33). Tuicha ipyʼaguapyve hikuái oaprendévo Jehová mborayhu memeteha (1 Juan 4:8). Oñemoag̃uívo Jehováre, oikuaa hikuái ikatuha oiko chuguikuéra Jehová família ha ogueroviavéntema ikatutaha oikove pára siémpre amo gotyove. ¡Tuichaite mbaʼe ñaipytyvõ umi héntepe oñemoag̃ui hag̃ua Jehováre! Péicha Jehová heʼi ñanderehe ñande haʼeha ‘iñajudánte’ (1 Cor. 3:5). w24.02 12 párr. 15

Oiméramo peteĩ Testígo nemboʼe hína la Biblia heʼíva, térã nde tuakuéra nemboʼe nemichĩete guive, ¿repensámapa rejevautisávo? Iporãitereíta ningo rejapóramo upéva. Péro rejevautisa mboyve reñemeʼẽ vaʼerã Jehovápe. ¿Mbaʼépa rejapo vaʼerã upearã? Repromete vaʼerã Jehovápe peteĩ ñemboʼépe readorataha chupe añoite ha ivolunta haʼetaha la iñimportantevéva ndéve g̃uarã. Péicha repromete rehayhutaha Jehovápe “nde pyʼaite guive, nde rekove kompletoite reheve, entéro ne pensamiénto reheve, ha ne mbaretekue omeʼẽmíva reheve” (Mar. 12:30). Ko promésa rejapóva Jehovápe, nde ha Jehovánte peikuaa, pórke upéva neañohápente rejapo. Pe vautísmo katu idiferentete, upéva ojejapo umi ótro rovake ikatu hag̃uáicha umi hénte ohechakuaa reñemeʼẽma hague Jehovápe. Upe moméntope rejapo hína peteĩ promésa tuichaitereíva ha reñehaʼã vaʼerã rekumpli. Jehová voi ohaʼarõ ndehegui upéva (Ecl. 5:4). w24.03 2 párr. 2; 3 párr. 5

Entéro matrimónio oreko provléma. La Biblia heʼi porã ‘umi omendáva heta iprovlemataha’ (1 Cor. 7:28). ¿Mbaʼérepa? Pórke ne ména térã ne rembireko ningo iñimperfékto, penediferénte ojuehegui ha pendegusta diferénte kósa. Ikatu voi peẽ diferénte paisgua ha pereko ótro kostúmbre. Tiémpo rire ikatu ehechakuaa ne ména térã ne rembireko orekoha umi defékto nderehechakuaái vaʼekue peimérõ guare de nóvio. Entéro koʼã mbaʼe ikatu ogueru provléma. Ikatu mokõivéva naperrekonoséi pejavyha ha peñepyrũ pejokulpa ojupe, peñehaʼã rangue pesolusiona la provléma. Upéicha rupi pepensa iporãvetaha pejesepara térã pejedivorsiánteramo. ¿Upévapa hína la solusión? Nahániri. Jehová oipota umi omendáva orrespeta imatrimónio ha osegi oñondive, ijetuʼúramo jepe ojogueraha porã iména térã hembirekóndi. w24.03 16 párr. 8; 17 párr. 11

Ñañemeʼẽ rire Jehovápe ha jajevautisa, jasegi jajeroviave jaikotaha peteĩ paraísope ko yvy ape ári pórke jaikuaa porãve ha jahayhuve Ñandejárape (Heb. 5:13–6:1). Ñanderehe oñekumplíma la heʼíva Romanos 5:​2-4. Jahasa heta situasión ijetuʼúvare, péro ñaaguanta umíva ha upévare ñañandu Jehová ñandeguerohoryha. Jaikuaa rupi Ñandejára ovyʼaha ñandereheve, jagueroviavéntema jarresivitaha umi mbaʼe porã oñepromete vaʼekue ñandéve. Jahechakuaa jajeroviaveha koʼág̃a ñane esperánsare la yma guarégui. Koʼág̃a ñamombaʼeve ñane esperánsa ha ndajadudái ni michĩmi oñekumplitaha, ha upéva ogia entéro mbaʼe jajapóva. Upévare jatrata porãve ñane famíliape, jadesidi porãve ha jaipuru porãve ñane tiémpo. Ñañandu rire Ñandejára ñandeguerohoryha jajeroviavéntema ñane esperánsare. Apóstol Pablo oexplika rire upéva oasegura ñandéve ñane esperánsa katuete oñekumplitaha (Rom. 15:13). w23.12 12, 13 párr. 16-19

Jahasa jave peteĩ situasión ivaietereíva, ñañepyrũ ñapensa ha jajapo umi mbaʼe ndajajapomoʼãiva jepi la ñaĩ porãrõ. Por ehémplo peteĩ várkope ojagarrárõ peteĩ torménta vai, umi oláda ikatu oñepyrũ ojapete chupe ápe ha pépe. Péicha avei ikatu haʼete ñandéve ñane provléma ñandejapetéva ápe ha pépe. ¿Mbaʼéichapa Jehová ñanepytyvõ péicha jave? La Biblia heʼi Jehová ñanembopyʼaguapytaha. Upe palávra ikatu avei ojetradusi Jehová ndohejamoʼãiha jakacha vaipa. Oñepyrũ jave peteĩ torménta vai, umi várko ikatu okacha vaipa ha upéva ipeligrosoiterei. Ani hag̃ua oiko upéva, heta várko oreko jepi mokõive ládo peteĩ aléta oipytyvõva chupe ijestávle hag̃ua ha pono okachaiterei. Péicha umi hénte oviaháva pe várkope oĩ trankílo ha segúro. Péro pe várko osegi vaʼerã la hape ikatu hag̃uáicha umi aléta okumpli la ifunsión. Péicha avei, jaipotáramo Jehová ñanepytyvõ pono mbaʼeve ñanembokacha vaipa, tekotevẽ jasegi tenonde gotyo. Upéva heʼise jasegi vaʼerãha jaservi chupe fiélmente. w24.01 22 párr. 7, 8

Oimérõ ekyhyje hína, epensami la Jehová ojapómavare nderehehápe. Tuicha nepytyvõta ‘emaña porãramo’ umi mbaʼe Jehová okrea vaʼekuére. Jajesarekórõ umi yvoty ha guyrakuéra rehe jahecháta mbaʼéichapa Jehová okuida ha oprotehe chupekuéra. Koʼãvape haʼe ndojapói vaʼekue ijoguaháramo ha ndorekói pe kapasida oadora hag̃ua chupe. Upévare ñapensávo ko mbaʼére jahechakuaáta mbaʼeichaitépa Jehová okuidáta avei ñanderehe (Mat. 6:​25-32). Iporãta avei jajepyʼamongetárõ mbaʼépa Jehová ojapóma isiervokuéra rehehápe. Ñahesaʼỹijórõ peteĩ personáhe bíblico, jahecháta mbaʼéichapa Jehová oñangareko vaʼekue umi isiervokuéra iñeʼẽrendúvare. Avei ikatu jalee umi ermanokuéra experiénsia ko tiempopegua. Ñapensakuaa avei mbaʼéichapa Jehová okuidáma ñanderehe ha ñañeporandu: ¿Mbaʼéichapa Jehová chepytyvõ kuri aikuaa hag̃ua chupe? (Juan 6:44). ¿Mbaʼéichapa haʼe okontestáma che ñemboʼe? (1 Juan 5:14). ¿Mbaʼéichapa káda día chepytyvõ Jesús sakrifísio porãite? (Efes. 1:7; Heb. 4:​14-16, nóta). w24.01 4 párr. 6; 7 párr. 17