Noviembre

Oiméramo ereko mitã michĩva, eipytyvõkena chupe oprepara hag̃ua umi komentário asegún la ijeda. Umi rreuniónpe oñeanalisa jepi umi téma iseriovéva. Por ehémplo oñeñeʼẽ jepi umi provléma orekóvare umi matrimónio térã tekovaíre. Upéicharõ jepe ikatu hína oĩ peteĩ térã mokõi párrafo ikatuhápe okomenta umi mitã. Avei iporãta eipytyvõramo ne famíliape ontende hag̃ua ndaikatumoʼãiha okomenta káda ves ke omopuʼã la ipo. Reexplikáramo upéva ne famíliape, haʼe noñembyasymoʼãi oñemeʼẽ jave ótrope la oportunida okomenta hag̃ua (1 Tim. 6:18). Entéro ikatu japrepara umi komentário omombaʼeguasútava Jehovápe ha omokyreʼỹtava ermanokuérape (Prov. 25:11). Sapyʼánte ikatúramo jepe ñamombeʼu mbykymi peteĩ experiénsia jahasa vaʼekue, ndovaléi ñañeʼẽterei ñandejehe (Prov. 27:2; 2 Cor. 10:18). Upéva rangue ñañekonsentra vaʼerã Jehováre, Iñeʼẽ la Bíbliare ha ipuévlore (Apoc. 4:11). w23.04 24, 25 párr. 17, 18

Tekotevẽ japorohayhu jasegi hag̃ua japayhápe ha ñapensa hag̃ua hendaitépe (Mat. 22:​37-39). Jahayhu rupi Jehovápe jasegi japredika umi héntepe, ikatúramo jepe ñanemoprovléma upéva (2 Tim. 1:​7, 8). Avei jahayhu rupi umi ndoservírivape Jehovápe japredika meme chupekuéra, tahaʼe teléfono térã kárta rupive. Ndajaperdéi la esperánsa koʼã hénte ikatuha okambia ha oñepyrũ ojapo la iporãva (Ezeq. 18:​27, 28). Jahayhu ñane ermanokuérape ha upévare ‘ñañomokyreʼỹ ha ñañomombarete’ (1 Tes. 5:11). Umi soldádo oĩva gerrahápe oñomokyreʼỹ ha oñomombarete. Ñande sapyʼánte kongregasiónpe ikatu ñamoñeñandu vai peteĩ ermánope japillaʼỹre, péro núnka ndajajapomoʼãi upéva jajaposégui voi térã ñañevenga hag̃ua (1 Tes. 5:​13, 15). Jahechaukáta avei japorohayhuha jarrespetáramo umi ermáno ñandegiávape kongregasiónpe (1 Tes. 5:12). w23.06 10 párr. 6; 11 párr. 10, 11

Jajepyʼamongetárõ pe rreskátere ñamombaretéta ñande jerovia. Pe rreskáte oasegura ñandéve oñekumplitaha katuete umi mbaʼe Jehová opromete vaʼekue. Iñimportánte ñañemotiémpo jajepyʼamongeta hag̃ua mbaʼérepa Jehová omeʼẽ vaʼekue pe rreskáte, ha mbaʼépa osakrifika vaʼekue ñanderehehápe. Péicha ndajadudamoʼãi Jehová oguerutaha peteĩ múndo iporãvéva ikatutahápe jaiko pára siémpre. ¿Mbaʼérepa ikatu jaʼe upéva? Ñapensamíntena, ¿mbaʼépa heʼise pe rreskáte? Jehová ningo ombou vaʼekue Itaʼýra peteĩetépe haʼéva iñamigoite, ikatu hag̃uáicha onase ko yvy ape ári peteĩ kuimbaʼe perféktoicha. Jesús oĩrõ guare ko yvy ape ári ohasa vaʼekue heta situasión ijetuʼúva, osufri ha omano asyeterei. ¡Ajépa hepyete opaga vaʼekue Jehová! Haʼe oporohayhueterei ha núnka ndohejamoʼãi kuri Itaʼýra ohasa peichagua sufrimiéntore, upéi oheja jeýtarõ jaiko porã sapyʼamínte (Juan 3:16; 1 Ped. 1:​18, 19). Jehová hepyeterei opaga rupi ojaseguráta jaiko hag̃ua para siémpre pe múndo pyahúpe. w23.04 27 párr. 8, 9

¿Orekópa Jehová pe deséo omoingove jeývo umi omano vaʼekuépe? Si, ha ndajadudái upévagui. Haʼe ojevale vaʼekue unos kuánto eskritór de la Bíbliare oskrivi hag̃ua ko promésa (Is. 26:19; Apoc. 20:​11-13). Ha Jehová opromete jave peteĩ mbaʼe, katuete okumpli (Jos. 23:14). Jehová ningo omoingoveseterei umi omano vaʼekuépe. Ñapensamína Job heʼi vaʼekuére. Haʼe oĩ vaʼekue segúro omanóramo, Jehová ohechaseterei jeytaha chupe (Job 14:​14, 15). Peichaite avei Jehová ohechaseterei jey entéro isiervokuéra omano vaʼekuépe. Haʼe ningo omoingovese chupekuéra ikatu hag̃uáicha oikove jey, hesãi ha ovyʼa. ¿Ha mbaʼépa oñandu Jehová entéro umi hénte omano vaʼekuére oikuaaʼỹre chupe? Ñande Túa ñanderayhuetéva omoingovese jey avei chupekuéra (Hech. 24:15). Haʼe oipota oiko chuguikuéra iñamígo ha oikove ko yvy ape ári pára siémpre (Juan 3:16). w23.04 9 párr. 5, 6

¿Mbaʼéichapa ikatu ñamombarete ñane esperánsa? Jarekórõ pe esperánsa jaikóvo ko yvy ape ári peteĩ paraísope, ikatu jalee umi téxto bíblico oñeʼẽva pe paraísore ha jajepyʼamongeta hese (Is. 25:8; 32:​16-18). Ñapensa mbaʼéichapa jaikóta pe múndo pyahúpe. Siémpre ñañemotiémporõ upearã, jahechakuaáta ‘umi sufrimiénto jahasáva koʼág̃a ivevýi ha sapyʼami g̃uarãnteha’ (2 Cor. 4:17). Pe esperánsa Jehová omeʼẽva ñandéve ikatu ñanepytyvõ ñaaguanta hag̃ua oimehaichagua provléma. Haʼe omeʼẽma voi ñandéve umi mbaʼe ñanemombaretétava. Upévare, ¿mbaʼépa jajapóta ñaikotevẽ jave ajúda ñakumpli hag̃ua peteĩ asignasión, ñaaguanta hag̃ua peteĩ situasión ijetuʼúva térã jasegi hag̃ua javyʼa? Ñañemboʼékena Jehovápe ñande pyʼaite guive ha jaheka igía jastudiávo Iñeʼẽ. Jaaseptákena ñane ermanokuéra ajúda ha ñapensa meme umi mbaʼe porã ñaneraʼarõvare amo gotyove. Péicha ‘Ñandejára ñanemombaretéta ipodér tuichaitéva rupive, ikatúta ñanepasiénsia ha javyʼáta jagueropuʼakávo entéro mbaʼe’ (Col. 1:11). w23.10 17 párr. 19, 20

Jareko hetaiterei mbaʼe jaagradese hag̃ua Jehovápe ñane ñemboʼépe. Ikatu jaagradese chupe entéro mbaʼe porã jaguerekóvare, pórke chugui ou opa mbaʼe iporãva (Sant. 1:17). Por ehémplo ikatu jaagradese chupe ko yvy porãitére, ikreasiónre, ñande rekovére, ñane famíliare, ñane amigokuérare ha ñane esperánsare. Jaagradesese avei chupe opermiti haguére ñandéve ñañemoag̃ui hese ha oiko ñandehegui iñamígo. Tekotevẽ káda uno ñañehaʼã ñapensa mbaʼérepa jaagradese vaʼerã Jehovápe. Ñande jaiko peteĩ múndo la hénte imalagradesidohápe. Haʼekuéra opensánte oikóvo la ikatúvare okonsegi oagradese rangue umi mbaʼe orekómavare voi. Ñañepyrũramo jajogua umi héntepe, ikatu hína ñañemboʼe jave ñambohysýinte umi mbaʼe jaipotáva, jaagradese rangue Ñandejárape. Ani hag̃ua oiko kóva ñanderehe, tekotevẽ siémpre ñañehaʼã jaheka mbaʼérepa ikatu jaagradese Jehovápe ha jahechauka ñamombaʼeha opa mbaʼe haʼe omeʼẽ vaʼekue ñandéve (Luc. 6:45). w23.05 4 párr. 8, 9

Jehová ñanderayhu, upévare ndoipotái jasufri (Is. 63:9). Upéicharõ jepe, sapyʼánte jahasa umi situasión ijetuʼúva, haʼete voi jahasáva hína peteĩ rríore térã tata mbytérupi (Is. 43:2). Jehová ndoipeʼapái ñandehegui koʼã provléma, péro si opromete ñanepytyvõtaha jahasa jave umichagua situasión. Tahaʼe haʼéva la jahasáva haʼe siémpre ñanepytyvõta jaservi hag̃ua chupe. Ha omeʼẽta ñandéve ijespíritu sánto ipoderosoitéva ñaaguanta hag̃ua (Luc. 11:13; Filip. 4:13). Entéro koʼã mbaʼére ikatu ñaĩ segúro siémpre jarekotaha la ñaikotevẽva ñaaguanta ha jasegi hag̃ua ñandefiél Jehovápe. Haʼe oipota jajerovia hese (Heb. 11:6). Sapyʼánte ijetuʼúgui la jahasáva ñapensáma voi ndajagueropuʼakamoʼãiha, ha ñapensa Jehová ndaikatumoʼãiha ñanepytyvõ. Péro la Biblia opromete Ñandejára ikatuha ‘ñanemombarete jahasa hag̃ua umi murálla ári jepe’ (Sal. 18:29). Upévare ñañemboʼékena ñande pyʼaite guive ha jajerovia Jehová okontestataha ñane ñemboʼe (Sant. 1:​6, 7). w23.11 22 párr. 8, 9

¡Iporãitépa ko téxto! Koʼápe ohechauka pe mborayhu oñandúva ojuehe umi omendáva ikatuha odura tóda la vída ha ogueropuʼaka entéro mbaʼe. Pe ména ha tembireko oñehaʼãmante vaʼerã osegi hag̃ua ojoayhu tóda la vída. Ñapensamíntena: Pe tata siémpre ikatu hendy péro upearã oĩmante vaʼerã ojatapýva ha omoĩvéva jepeʼa, osino pe tata oguéta. Péicha avei pe ména ha tembireko osegi hag̃ua ojoayhu ipyʼaite guive, ojapo vaʼerã káda uno ipárte. Péro sapyʼánte umi omendáva ou oreko provléma ekonómiko, hasykatu térã ijetuʼu chupekuéra omongakuaa umi mitãme. Upéicha rupi, kon el tiémpo ou oñandu hikuái ndojoayhuveimaha yma guaréicha. Ani hag̃ua opa pe mborayhu oúva Jehovágui, pe ména ha tembireko oñehaʼã vaʼerã oreko peteĩ amista imbaretéva Jehovándi. w23.05 20, 21 párr. 1-3

¿Mbaʼépa ikatu jajapo ñandepyʼaguasu hag̃ua? Umi tuakuéra oiméne oipotaiterei ifamiliakuéra ipyʼaguasu, péro haʼekuéra ipyʼaguasu haguére ndeʼiséi ifamiliakuéra upeichatamaha. Ñandepyʼaguasu hag̃ua ñamoĩ vaʼerã ñande párte, haʼete ku ñaaprendéva jajapo hag̃ua álgo ipyahúva. Ñaaprende jave álgo ñamaña porã jepi mbaʼépa ojapo ñande profesór ha upéi ñandehaitéma jajapo. Upéicha avei ñandepyʼaguasu hag̃ua tekotevẽ ñañatende porã mbaʼépa ojapo umi ipyʼaguasúva ha upéi jasegi iñehemplokuéra. Daniel ojapo haguéicha tekotevẽ jaikuaa porã Ñandejára Ñeʼẽ heʼíva. Ñañemoag̃uive vaʼerã Jehováre ñamombeʼu memévo chupe entéro mbaʼe ñañandúva. Avei tekotevẽ jajerovia Jehováre ha ñaĩ segúro haʼe siémpre ñanepytyvõtaha. Jajapóramo koʼã mbaʼe, pyʼaguasúpe ñambohováita umi situasión ijetuʼúva. Ñandepyʼaguasúramo la hénte ikatu ñandevalora ha ñanderrespetave. Ha ikatu ñaipytyvõ ótrope oñemoag̃ui hag̃ua Jehováre. Legálmente iñimportanteterei ñañehaʼã ñandepyʼaguasu. w23.08 2 párr. 2; 4 párr. 8, 9

Pe palávra griega ápe ojetradusíva “pehechákena siértopa”, ojepuru jepi oñeñeʼẽ hag̃ua pe traváho ojejapóvare ojehecha hag̃ua pe óro térã pe pláta ndahaʼéipa hína fálso. Ñande avei tekotevẽ jajasegura siértopa hína umi mbaʼe ñahendu ha jaleéva. Koʼýte koʼág̃a hiʼag̃uívo pe jehasa asy guasu iñimportánte jajapo upéva. Ndovaléi jaiko jaroviapa la ojeʼéva, upéva rangue jaipuru vaʼerã ñane akã ha ñakompara la jaleéva ha ñahendúva umi mbaʼe la Biblia ha Jehová organisasión heʼívare. Péicha nañanembotavymoʼãi umi japu heʼíva umi demoniokuéra (Prov. 14:15; 1 Tim. 4:1). Ñaĩ segúro Ñandejára puévlo ohasataha pe jehasa asy guasu, péro ndajaikuaái mbaʼépa ñaneraʼarõ káda únope amo gotyove (Sant. 4:14). Ikatu jahasa kon vída pe jehasa asy guasu térã ñamano upe mboyve, péro tahaʼe haʼeháicha jaikuaa Jehová omeʼẽtaha ñandéve pe vída etérna jasegíramo ñandefiél chupe. Upéva oiko mboyve, tekotevẽ ñapensa meme pe esperánsa jarekóvare, ha siémpre ñaime preparádo ‘Jehová árape’ g̃uarã. w23.06 13 párr. 15, 16

Oĩ profesía ndajaikuaáiva mbaʼeichaitépa oñekumplíta (Dan. 12:​8, 9). Péro upéva ndeʼiséi ndoikomoʼãiha. Ikatu ñaĩ segúro Jehová ñanepytyvõtaha ñantende hag̃ua la tekotevẽva hiʼoraitépe ojapóma haguéicha anteve. Ojejapóta hína pe anúnsio heʼíva ‘jaikomaha pyʼaguapýpe ha segúro porã’ (1 Tes. 5:3). Upéi umi goviérno ko mundopegua oatakáta ha ohundíta pe rrelihión fálsa (Apoc. 17:​16, 17). Upéi oatakáta avei hikuái Ñandejára puévlope (Ezeq. 38:​18, 19). Ha koʼã mbaʼe oiko rire oñepyrũtama pe Armagedón (Apoc. 16:​14, 16). Ikatu ñaĩ segúro koʼẽrõitéma oikotaha koʼã mbaʼe. Upe aja jasegíta jahayhu ñande Ru yvagapeguápe. Jahechaukáta upéva ñañatende porãvo mbaʼéichapa oñekumpli umi profesía ha ñaipytyvõvo la héntepe ojapo hag̃ua avei upéicha. w23.08 13 párr. 19, 20

Apóstol Pablo oñeʼẽrõ guare pe jerovia, esperánsa ha mborayhúre, ultimoitépe heʼi vaʼekue ‘pe iñimportantevéva koʼãvagui haʼeha hína pe mborayhu’ (1 Cor. 13:13). ¿Mbaʼérepa haʼe heʼi vaʼekue upéva? Ñapensamína, oñekumplipa vove Ñandejára promesakuéra pe múndo pyahúpe, natekotevẽmoʼãvéima jajerovia umívare pórke oikopátama. Péro siémpre jahayhu vaʼerã umi héntepe ha Jehovápe, ha opa árare jahayhuvéta jahávo chupekuéra. Iñimportanteterei jajoayhu pórke Jesús heʼi vaʼekue péicha umi hénte ohechakuaataha ñande haʼeha kristiáno verdadéro. Haʼe heʼi vaʼekue ijapostolkuérape: “Peẽ pejoayhúramo, entéro umi hénte oikuaáta peẽ haʼeha che disípulo” (Juan 13:35). Avei iñimportánte jajoayhu ñaime hag̃ua unído. Pablo heʼi vaʼekue: “Pe mborayhu oipytyvõ enterovépe oĩ hag̃ua unído oñondivepa” (Col. 3:14). Apóstol Juan heʼi vaʼekue umi ermánope: “Pe ohayhúva Ñandejárape ohayhu vaʼerã avei iñermánope” (1 Juan 4:21). Upéicharõ, jajoayhúramo jahechauka hína jahayhuha Ñandejárape. w23.11 8 párr. 1, 3

La Biblia heʼi peteĩ kristiáno rekove ojoguaha peteĩ karrérape. Umi omohuʼãva pe karréra orresivíta vída etérna (2 Tim. 4:​7, 8). Ñañehaʼãmbaite vaʼerã ko karrérape, koʼýte koʼág̃a pórke ñamohuʼã mbotaitéma hína. Apóstol Pablo heʼi vaʼekue mbaʼépa ñanepytyvõta ñagana hag̃ua. Haʼe heʼi: ‘Jaipeʼákena ñande avei entéro umi kárga. Jasegíkena jadipara ha ñaaguanta pe karréra oĩva ñane renonderãme’ (Heb. 12:1). ¿Heʼisépa raʼe haʼe ndajaguerahamoʼãiha mbaʼeveichagua kárga? Nahániri. Haʼe oñeʼẽ kuri umi kárga natekotevẽivare jagueraha. Koʼãichagua kárga ikatu ñanemokaneʼõ ha ñandejoko ñamohuʼã hag̃ua pe karréra. Upévare ñaaguanta hag̃ua tekotevẽ jaikuaa mbaʼépa umi kárga natekotevẽiva jaraha ha pyaʼe jaipeʼa ñandejehegui. Péro nañamboykéi vaʼerã umi kárga okorrespondéva ñandéve jaraha, péicharõmante jasegíta japartisipa ko karrérape (2 Tim. 2:5). w23.08 26 párr. 1, 2

Ndajaikóirõ ñañemohatã ñande jaʼévapente jarrespetáta ótro opensáva ha odesidíva. Por ehémplo oĩ ermána oipurúva makilláhe, ha ótra katu nahániri, oĩ ermáno odesidíva ndoʼumoʼãiha vevída, péro oĩ odesidíva hoʼutaha. Avei káda uno ikatu odesidi mbaʼéichapa okuidáta isalúre, pórke entéronte ñaneresãise. Ñañatende vaʼerã ani ñañemombarete ha ñapensa la ñande jadesidívante iporãha. Upéva ipeligróso pórke ikatu ñainsisti ótro avei odesidi hag̃ua ojapo la ñande jajapóva, ha amo ipahápe ñaofende chupe ha ñande káusare oĩma división kongregasiónpe (1 Cor. 8:9; 10:​23, 24). Jehová ndeʼíri mbaʼeichaitépa ñañemonde vaʼerã, péro si omeʼẽ konsého jareko hag̃ua enkuénta. Ñañemonde lájare jahechauka vaʼerã ñamombaʼeguasuha Ñandejárape, ‘japororrespetaha ha ñaneakãguapyha’. Ndajaikoséi ñañemonde oñemañamba hag̃uáicha voi ñanderehe (1 Tim. 2:​9, 10). Umi konsého oĩva la Bíbliape oipytyvõkuaa avei umi ansiánope ani hag̃ua oiko omoĩ rrégla heʼíva mbaʼéichapa oñemonde ha oreko vaʼerã iñakãrangue umi ermáno ha ermána. w23.07 23, 24 párr. 13, 14

Jehová omoĩ ñandéve mbaʼépa jajapo vaʼerã javyʼa hag̃ua. Umi oaseptáva pe “kuña naiñarandúiva” invitasión oimoʼã ovyʼataha oikóramo hekovai. Amo ipahápe, haʼekuéra ohóta “opyta pe Sepultúrape” (Prov. 9:​13, 17, 18). Idiferentete la ohaʼarõva umi oaseptávape pe “arandu añeteguáva” invitasión (Prov. 9:1). Ñande ñaaprende jahayhu hag̃ua umi mbaʼe Jehová ohayhúva ha ndajachaʼéi hag̃ua umi mbaʼe Jehová ndochaʼéivare (Sal. 97:10). Avei javyʼa pórke ikatu ñainvita ótrope oikuaa hag̃ua pe ‘arandu añetegua’. Jajogua umi sirviénta oñemensionávape Provérbiospe. Haʼekuéra oho “oñemoĩ umi lugár ijyvatevehárupi pe siudápe” ha heʼi: “Oimeraẽ ndoikuaáiva mbaʼeve, tou koʼápe”. Ñande ha entéro umi oaseptáva pe invitasión ñasẽ porãta koʼág̃a, ha amo gotyove avei pórke ikatúta jaiko pára siémpre jasegíramo ‘jaguata pe tape ñanepytyvõtavare ñaneentendído hag̃ua’ (Prov. 9:3, 4, 6). w23.06 24 párr. 17, 18

Ikatu oime nenerviosoʼimi ne kompañéro de traváho térã de koléhio oporandu jave ndéve álgo ne rrelihiónre. La majoría ñañeñandu jepi péicha, péro koʼã situasiónpe jareko hína peteĩ oportunida jaikuaa hag̃ua mbaʼépa opensa ha oguerovia pe persóna ha péicha ifasilvéta japredika hag̃ua chupe. Péro sapyʼánte oĩ oporandúva ñandéve álgo ndogustáigui chupe la ñapensáva térã ojodiskutiséguinte. Upéva nañanesorprendéi, pórke heta vése la hénte ohendu umi japu ojeʼéva ñanderehe (Hech. 28:22). Avei jaikuaa jaikoha “umi ára pahápe” umi hénte ‘ndoikoporãséi avavéndi’ ha hiʼarive ‘isalváhe hikuái’ (2 Tim. 3:​1, 3). Oiméne eñeporandu: “¿Mbaʼépa ikatu ajapo asegi hag̃ua cheamávle oĩramo ojodiskutiséva peteĩ mbaʼe agueroviávare?”. Tuichaiterei nepytyvõta ndepyʼaguapýramo. Peteĩ persóna ipyʼaguapýva opytánte trankílo porã ndoikuaáirõ jepe mbaʼéichapa okontestáta álgo térã oĩrõ jepe ombopochyséva chupe. w23.09 14 párr. 1, 2

Sapyʼánte Jehová organisasión omeʼẽ ñandéve konsého ani hag̃ua ñandeplatarayhu ha pono jajapo umi mbaʼe Jehovápe ndogustáiva. Jasegíramo Jehová gía, ou porã ñandéve (Is. 48:​17, 18; 1 Tim. 6:​9, 10). Ndajadudái Jehová osegitaha ojevale unos kuánto kuimbaʼére ñandegia hag̃ua pe jehasa asy guasu aja ha Jesús ogoverna aja mil áñore. Upe tiémpope, ¿jasegítapa pe gía omeʼẽva ñandéve hikuái? Koʼág̃ama voi ñaneñeʼẽrendúramo, upépe ndahasymoʼãiete ñandéve ñaneñeʼẽrendu hag̃ua avei. Upévare siémprekena jasegi Jehová gía og̃uahẽva avei ñandéve umi kuimbaʼe haʼe oiporavo vaʼekue rupive (Is. 32:​1, 2; Heb. 13:17). Ko múndope oĩ heta mbaʼe ikatúva ñandeapeligra péro ¡ndaipóri jakyhyje hag̃ua! Ñande jajerovia Jehová ñandegia porãtaha ñag̃uahẽ hag̃ua pe múndo pyahúpe ikatutahápe jaiko pára siémpre. w24.02 25 párr. 17, 18

Apóstol Pablo ovyʼa vaʼekue oservívo Jehovápe, péro ombohovái vaʼekue avei heta mbaʼe ijetuʼúva. Por ehémplo oviaha vaʼerã kuri mombyrymbyry ha upe tiémpope ndahaʼéi la ifasilpáva ojeviaha. Haʼe pyʼỹi ‘ojapeligra vaʼekue rríope’ ha avei “mondaha káusare”, sapyʼánte katu iñenemigokuéra oinupã vaʼekue chupe (2 Cor. 11:​23-27). Ha umi ermáno ndahaʼéi vaʼekue siémpre oagradeséva Páblope la ojapóvare hesehapekuéra (2 Cor. 10:10; Filip. 4:15). ¿Mbaʼépa oipytyvõ rakaʼe apóstol Páblope osegi hag̃ua oservi Jehovápe? Haʼe oĩ vaʼekue segúro Jehová ohayhuha chupe. Pablo ohechakuaa vaʼekue mbaʼeichagua Dióspa Jehová, Iñeʼẽ ha umi mbaʼe ohasa vaʼekue rupive (Rom. 8:​38, 39; Efes. 2:​4, 5). Haʼe ou ohayhueterei Jehovápe, upévare ‘osegi vaʼekue oservi umi ermánope’ (Heb. 6:10). w23.07 9 párr. 5, 6

Heta persóna orrekonose iñimportanteha oĩ umi ogovernáva ha ñakumpli mimi vaʼerãha umi léi omoĩva “umi autorida omandáva”. Péro koʼã persóna nokumpliséi jepi umi léi haʼetévaicha chupekuéra iñinhústova térã ndogustáiva chupekuéra. La Biblia orrekonose yvyporakuéra goviérno ombosufriha la héntepe, oĩha Satanás poguýpe ha koʼẽrõitéma oñehunditaha (Sal. 110:​5, 6; Ecl. 8:9; Luc. 4:​5, 6). Péro la Biblia heʼi avei ‘umi oñemoĩva umi autorida kóntrape, oñemoĩha pe órden Ñandejára omoĩ vaʼekuére’. Jehová opermiti umi goviérnope omanda ani hag̃ua ojeiko sarambikuépe, ha oipota ñaneñeʼẽrendu chupekuéra. Upévare ñameʼẽ vaʼerã “káda únope okorrespondéva chupe”, umíva apytépe japaga impuésto, jarrespeta ha ñaneñeʼẽrendu umi goviérnope (Rom. 13:​1-7). Ikatu oime ñapensa peteĩ léi nokonveniriha ñandéve, iñinhústo térã ijetuʼuha ñakumpli hag̃ua. Péro ñaneñeʼẽrendu umi goviérnope, pórke Jehová heʼi ñandéve jajapo hag̃ua upéva, ndojeruréima guive ñandéve ani hag̃ua ñakumpli Jehová mandamiénto (Hech. 5:29). w23.10 8 párr. 9, 10

Sansón onasérõ guare, umi filisteo ogoverna vaʼekue Israélpe ha ojopyeterei hendivekuéra (Juec. 13:1). Umi israelita ohasa asy vaʼekue umi filisteo iñañaiterei rupi. Upévare Jehová oiporavo Sansónpe ‘osalva hag̃ua Israélpe umi filistéogui’ (Juec. 13:5). Upe asignasión ijetuʼu kuri, upévare Sansón ojeroviámante vaʼerã Jehováre. Peteĩ vuéltape, umi soldádo filisteo ou ojagarra hag̃ua Sansónpe peteĩ lugár héravape Lehí, provávlemente oĩva Judápe. Umi kuimbaʼe upepegua okyhyjeterei kuri, upévare odesidi ontrega hikuái Sansónpe iñenemigokuérape. Umi hénte Sansón paisgua voi “oñapytĩ chupe mokõi pióla pyahúpe” ha ogueraha ontrega umi filistéope (Juec. 15:​9-13). Péro “Jehová espíritu omombarete Sansónpe” ha haʼe omondoho umi pióla ojepurúva oñeñapytĩ hag̃ua chupe. “Upéi ojuhu peteĩ vúrro omano ramoitéva rañykãngue”, ojagarra ha ojuka upévape 1.000 filistéope (Juec. 15:​14-16). w23.09 2, 3 párr. 3, 4

Jehová oikuaauka mbeguekatúpe la Biblia rupive “pe hembipota oĩva yma guive ha opa ára g̃uarãva”. Tahaʼe haʼeháicha, Jehová siémpre osẽ porã pórke haʼe “ojapo tekotevẽva guive oñekumpli hag̃ua ivolunta” (Prov. 16:4). Jehová ojapóva guive opytáta pára siémpre. ¿Mbaʼépa Jehová rembipota ha mbaʼépa haʼe okambiaʼimíma oñekumpli hag̃ua upéva? Ñandejára heʼi vaʼekue umi primer yvypórape mbaʼépa hembipota chupekuéra g̃uarã. Ha heʼi: ‘Penefamília retákena ha peñemboheta hetave ha pemyenyhẽ ko yvy ha peipuru. Pereko pende poguýpe entéro umi animál oikóva pe yvy tuichakuére’ (Gén. 1:28). Adán ha Eva opuʼãrõ guare Ñandejárare, oike vaʼekue pe pekádo yvyporakuéra apytépe péro upéva ndojokói Jehovápe okumpli hag̃ua hembipota. Haʼe okambiaʼimínte mbaʼéichapa okumplíta ohóvo ivolunta. Upévare ensegidamínte odesidíma omoĩtaha peteĩ goviérno yvágape okumplítava hembipota ko yvy ha yvyporakuérape g̃uarã (Mat. 25:34). w23.10 19, 20 párr. 6, 7

Jehová ikatu ñanepytyvõ ani hag̃ua ñañentrega. Ndahaʼéi siémpre la ifasilpáva jajapo hag̃ua upéva, koʼýte oimérõ heta tiémporema jalucha jaikóvo peteĩ devilida kóntrape. Sapyʼánte ikatu voi haʼetévaicha tuichavéva pe devilida ñambohováiva, umi ombohovái vaʼekuégui apóstol Pedro. Péro Jehová ikatu omeʼẽ ñandéve la fuérsa ani hag̃ua ñañentrega (Sal. 94:​18, 19). Jahechamína peteĩ ermáno káso. Oiko mboyve chugui Testígo, heta áñore haʼe vaʼekue omosexuál. Upéi haʼe odesidi vaʼekue okambiaite oiko hag̃ua la Biblia heʼiháicha. Péro sapyʼánte oreko jey umi deséo vai. ¿Mbaʼépa oipytyvõ chupe? Haʼe heʼi: “Jehová chemombarete, ijespíritu rupive aaprende ikatuha asegi aiko haʼe oipotaháicha. Jehová ningo ojevaléma cherehe heta hendáicha ha cheimperféktoramo jepe haʼe osegi chemombarete”. w23.09 23 párr. 12

Mitãrusukuéra, ndoikomoʼãi pendehegui péicha reínte kristiáno ijerovia mbaretéva. Tekotevẽ peiporavo ehémplo porã, pepensa porã la pejapótavare ha oiko vaʼerã pendehegui peteĩ persóna de konfiánsa. Avei peaprende vaʼerã umi mbaʼe ideprovéchotava peẽme ha pejeprepara pekumpli hag̃ua umi rresponsavilida ikatúva pereko amo gotyove. Pepensávo entéro umi mbaʼe tekotevẽváre pejapo ikatu peñandu hetaitereimaha, péro katuete pesẽ porãta. Penemanduʼákena Jehová penepytyvõsetereiha (Is. 41:​10, 13). Avei umi ermáno ha ermána kongregasionpegua pendeapojáta. Pehecháta mbaʼeichaitépa pevyʼáta oiko vove pendehegui peteĩ kristiáno ijerovia mbaretéva Jehová oipotaháicha. Aníkena penderesarái ermanokuéra penderayhuetereiha. Hiʼãite Jehová penevendesi peñehaʼã aja oiko pendehegui kristiáno ijerovia mbaretéva. w23.12 29 párr. 19, 20

Ñapensami ñañembyatyha ermanokuérandi ñande rógape. Upéi ñasẽ oñondivepa la fótope ha ñanohẽ voi unos kuánto oĩrõ g̃uarã nosẽporãiva. Upéi jatopa peteĩva umi fótope peteĩ ermáno nosẽporãi hague. Upévare ñaeliminánte, pórke jareko hetave fóto enterovéva osẽ porã haguépe ha pe ermáno avei opukavy haguépe. Ñande jareko heta rrekuérdo porã hendivekuéra, péro ñamoĩ chupe upeichahágui peteĩ ermáno térã ermána ojapoha álgo nañandegustapáiva. ¿Jasegítapa ñapensa upévare térã jaipeʼáta ñane akãgui ñaeliminarõguáicha ñande selulárgui peteĩ fóto osẽ vai haguépe álgien? (Efes. 4:32). Ikatúta ñanderesarái pórke jahasáma hetaiterei mbaʼe porã hendivekuéra ha ñanemanduʼave umívare ke la idefektokuérare. Upévare, ñañehaʼãkena siémpre ñanemanduʼa umi mbaʼe porã jahasávare ñane ermanokuérandi. w23.11 12 párr. 16, 17

Pe palávra griega ojepurúva ko téxtope heʼise kuñanguéra siémpre oñemonde porã vaʼerãha ha ohechauka vaʼerã hikuái orrespetaha umi ótrope. ¡Ñamombaʼete ñane ermanakuérape oñemonde rupi hekoitépe! Entéro ermána ijerovia mbaretéva tekotevẽ avei iñentendída. Upéva heʼise odiferensiakuaa vaʼerãha mbaʼépa iporã ha ivai ha odesidi vaʼerãha pe iporãva. Jahechamína Abigaíl ehémplo. Iména odesidi vaʼekue álgo ivaíva ha upéva tuicha operhudikáta kuri entéro hogayguápe. Abigaíl iñentendída rupi ensegída voi odesidi ojapo iporãva, ha péicha osalva hetaiterei héntepe (1 Sam. 25:​14-23, 32-35). Peteĩ ermána iñentendídava ohechakuaáta avei mbaʼe moméntopepa oñeʼẽ vaʼerã ha mbaʼe moméntopepa okirirĩ vaʼerã. Avei oñeinteresáta ótrore oporopytyvõ hag̃ua, péro oñatendéta ani hag̃ua iñentremetída (1 Tes. 4:11). w23.12 20 párr. 8, 9

Apóstol Pablo oskrivi vaʼekue koʼã mbaʼe umi kristiáno Romaguápe. Haʼekuéra oikuaáma kuri Jehová ha Jesúspe, ojerovia hesekuéra ha oikóma chuguikuéra kristiáno. Jehová heʼíma vaʼekue koʼã kristiánore ‘ihustoha ojerovia rupi’, ha ounhi chupekuéra espíritu sánto rupive (Rom. 5:1). Péicha oñemeʼẽ koʼã kristiánope peteĩ esperánsa iporãitereíva ha ikatu kuri oĩ hikuái segúro orresivitaha upéva. Upe rire Pablo oskrivi umi kristiáno unhído Efesoguápe oñeʼẽ hag̃ua pe esperánsa Ñandejára omeʼẽ vaʼekuére chupekuéra. Haʼekuéra orresivi pe esperánsa ‘oñepromete vaʼekue umi ojeporavo vaʼekuépe’ (Efes. 1:18). Ha umi kristiáno Colosasguápe, Pablo oexplika moõpa orresivíta hikuái iñesperánsa. Heʼi chupekuéra ‘pe esperánsa Ñandejára oñongatuha chupekuéra g̃uarã yvágape’ (Col. 1:​4, 5). Upéicharõ umi kristiáno unhído orresusitáta yvágape oiko hag̃ua pára siémpre ha ogovernáta Jesucristo ndive (1 Tes. 4:​13-17; Apoc. 20:6). w23.12 9 párr. 4, 5

Pe palávra griega ojetradusíva ‘oñangareko’ ojepuru vaʼekue yma oñeñeʼẽ hag̃ua umi soldádo oguardiávare peteĩ siuda. Haʼekuéra oñangareko vaʼekue pe siudáre ani hag̃ua ojeataka upévare umi hénte oĩ vaʼekue trankílo porã. Péicha avei Ñandejára pyʼaguapy oñangareko rupi ñane korasõre ha la ñapensávare, ñaĩ trankílo ha pyʼaguapýpe pórke ñañeñandu segúro porã (Sal. 4:8). Ana ehémplo yma guare ikatu ñanepytyvõ, pórke ñane situasión nokambiáiramo jepe ensegidaite, lomímonte ikatu ñanetrankílo ha ndajaikovéi ñañekevranta (1 Sam. 1:​16-18). Ñaiméramo pyʼaguapýpe, ikatu ifasilve ñandéve ñapensa ha jadesidi porã. Yma umi hénte pe siudapegua ikatu vaʼekue ohenói umi guárdiape oprotehe hag̃ua chupekuéra. Péicha avei jajejopy jave, ikatu jajerure Jehovápe ajúda. Ñañemboʼékena ñañandu peve Jehová omeʼẽha ñandéve ipyʼaguapy (Luc. 11:9; 1 Tes. 5:17). Jahasárõ peteĩ situasión ijetuʼúva, jasegíkena ñañemboʼe ha Jehová oñangarekóta ñane korasõre ha umi mbaʼe ñapensávare (Rom. 12:12). w24.01 21 párr. 5, 6

Ombotuicha hag̃ua Itúa réra, Jesús oheja vaʼekue ojetortura chupe, oñeñeʼẽ vai hese ha ojeakusa rei chupe. Haʼe iñeʼẽrendu vaʼekue Itúape opa mbaʼépe ha ndojapói mbaʼeve ombyasýtava upe rire (Heb. 12:2). Upe moménto ijetuʼúvape, Jesús oikuaa vaʼekue Satanás direktoite oataka hague chupe (Luc. 22:​2-4; 23:​33, 34). Satanás oipota vaʼekue Jesús opeka ha oheja Jehovápe, péro nosẽi la ijidéape. Upéicha Jesús ohechauka porã vaʼekue ndaiporiha ijapuvéva Satanásgui, ha Jehová orekoha isiérvo osegítava ifiél chupe ohasáramo jepe umi situasión ijetuʼuvéva. ¿Mbaʼépa ikatu rejapo rembovyʼa hag̃ua Jesúspe? Esegíkena emombaʼeguasu Ñandejára réra ha eipytyvõ ótrope oikuaa porã hag̃ua chupe. Péicha rejapóramo resegíta hína Jesús ehémplo (1 Ped. 2:21). Ha Jesús ojapo haguéicha, rembovyʼáta Jehovápe ha rehechaukáta iñenemígo Satanás haʼeha peteĩ tekove japu. w24.02 11 párr. 11-13

Umi 5 áño ohasa vaʼekuépe, mas de un millón de persóna ojevautisa ha oiko chuguikuéra testígo de Jehová. Reñemeʼẽvo Jehovápe redesidi oikotaha ndehegui Jesucristo disípulo ha Ñandejára volunta haʼetaha la iñimportantevéva nde rekovépe. ¿Mbaʼépa tekotevẽta rejapo upearã? Jesús heʼi vaʼekue: “Oĩramo chemoirũséva, toñembyesarái ijehegui” (Mat. 16:24). Pe fráse “toñembyesarái ijehegui” ikatu avei ojetradusi péicha: “Heʼi vaʼerã no ijupe”. Peteĩ persóna oñemeʼẽva Jehovápe ndojapomoʼãi mbaʼeve ndogustáiva chupe (2 Cor. 5:​14, 15). Upéicha rupi ndojapomoʼãi ‘umi mbaʼe vai ogustáva ñande rete imperféktope’, umíva apytépe pe tekovai. Orrechasávo koʼã mbaʼe upe persóna heʼi hína no ijupe (Gál. 5:​19-21; 1 Cor. 6:18). ¿Reiko asýtapa rekumplíramo koʼã léi? Rehayhúrõ Jehovápe ha regueroviárõ haʼe heʼíva iporãveha, ndereikoʼasymoʼãi ni michĩmi (Sal. 119:97; Is. 48:​17, 18). w24.03 2 párr. 1; 3 párr. 4

Jehová omeʼẽ ijespíritu sánto umi haʼe oguerohorývape (Mat. 12:18). Ikatu ñañeporandu: “¿Ahechaukápa che rekovépe umi mbaʼe porã oúva espíritu sántogui?”. Por ehémplo, ekomparárõ mbaʼéicha vaʼekuépa nde reikuaa mboyve Jehovápe ha koʼág̃a, ¿rehechakuaápa nepasiensiaveha? Amáske ojekuaa nderehe umi mbaʼe porã oúva pe espíritu sántogui, ikatu reimeve segúro Jehová ovyʼaha ndereheve. Jehová oipuru pe rreskáte umi haʼe oguerohorýva rehehápe (1 Tim. 2:​5, 6). Péro jajeroviáramo jepe pe rreskátere ha jajevautisáma, ¿mbaʼépa ikatu jajapo ndajagueroviapáirõ Jehová ñandeguerohoryha? Ñanemanduʼákena ndaikatuiha siémpre ñakonfia la ñande ñañandúvarente, péro si ikatu ñakonfia Jehováre. Ñandejára renondépe umi ojeroviáva pe rreskátere ihústo hína, ha opromete voi ovendesitaha chupekuéra (Sal. 5:12; Rom. 3:26). w24.03 30 párr. 15; 31 párr. 17