Octubre

¿Ijetuʼúpa sapyʼánte ñaneñeʼẽrendu hag̃ua? Rréi Davídpe ijetuʼu vaʼekue, ha upévare ojerure Ñandejárape: “Chepytyvõna cheñeʼẽrenduse hag̃ua ndéve” (Sal. 51:12). David ohayhúramo jepe Jehovápe sapyʼánte ijetuʼu vaʼekue chupe iñeʼẽrendu hag̃ua. Ñanderehe avei ikatu oiko upéva. ¿Mbaʼérepa? Primero, ñanase voi nañaneñeʼẽrenduséi. Segundo, Satanás ojapo opa ikatúva ñapuʼã hag̃ua Jehováre, haʼe ojapo haguéicha (2 Cor. 11:3). Tercero, jaiko peteĩ múndo henyhẽvape hénte rrevéldegui. La Biblia oñeʼẽ pe ‘espíritu iñasãivare opárupi yvytúicha ha omomýiva umi hénte naiñeʼẽrendúivape’ (Efes. 2:2). Ñande jalucha vaʼerã ñane imperfeksión kóntrape, Satanás ha ko múndo kóntrape. Upéicharõ añoite ikatúta ñaneñeʼẽrendu Jehovápe ha umi haʼe omoĩ vaʼekuépe ñandegia hag̃ua. w23.10 6 párr. 1

Peteĩ milágro rupive Jesús ojapo ýgui víno. ¿Mbaʼépa ñanemboʼe ko milágro? Ñaneumílde vaʼerãha. Jesús núnka ndoikói vaʼekue oñemombaʼeguasu umi milágro ojapo vaʼekuére. Upéva rangue, haʼe iñumílde vaʼekue, siémpre omombaʼeguasu Itúape, ha orrekonose opa mbaʼe ojapo hague Itúa rupivénte (Juan 5:​19, 30; 8:28). Ñande avei jasegíramo Jesús ehémplo ñaneumíldeta ha ndajaikomoʼãi ñañemombaʼeguasu umi mbaʼe jajapóvare. Ndovaléi ñañemombaʼeguasu upévare, síno siémpre ñamombaʼeguasu vaʼerã ñande Túa ijojahaʼỹvape (Jer. 9:​23, 24). Siémprekena ñamombaʼeguasu chupe haʼe omereseháicha, pórke heseʼỹ ñande ndaikatumoʼãi mbaʼevete jajapo (1 Cor. 1:​26-31). Peteĩ persóna iñumíldeva noñemombaʼeguasúi ótro ojapo porãramo peteĩ traváho haʼe oipytyvõ rupi chupe. Upéva rangue haʼe ovyʼáma oikuaa haguére Jehová ohecha ha ovaloraitereiha umi mbaʼe ojapo vaʼekue (ekompara Mateo 6:​2-4; Heb. 13:16 heʼívare). Jehová ningo ovyʼaiterei ohecha jave jasegiha Jesús ehémplo ha ñaneumílde (1 Ped. 5:6). w23.04 4 párr. 9; 5 párr. 11, 12

Apóstol Pablo rupive Jehová omokyreʼỹ vaʼekue umi kristiánope ojepyʼapy hag̃ua umi ótrore. ¿Mbaʼéichapa ñande ikatu jajapo upéva umi rreunionhápe? Jaraha vaʼerã enkuénta umi ótro okomentaseha avei. Ñamoĩmína peteĩ ehémplo ñanepytyvõtava ñantende hag̃ua upéva. Ñañemongeta jave ñane amigokuérandi, ndahaʼéi ñandénte la ñañeʼẽva, síno ñameʼẽ avei oportunida umi ótrope oñeʼẽ hag̃ua, ¿ajépa? Ñande ñahenduse enterovévape. Upéicha lénto avei oiko ñane rreunionkuérape. Jaipota ikatumíva guive okomenta pe rreunionhápe. Añetehápe, ikatu hína ñamokyreʼỹ umi ótrope ñameʼẽvo chupekuéra la oportunida oñeʼẽ hag̃ua umi mbaʼe ogueroviávare (1 Cor. 10:24). Iporãta ñakomentárõ mbykymi. Jajapóramo upéva oĩvéta tiémpo hetave okomenta hag̃ua. Ñane komentário mbyky vaʼerã ha natekotevẽi ñañeʼẽ heta idéare. Ñañeʼẽramo pe párrafo kompletoitére, nahembymoʼãvéima umi ótrope mbaʼeve okomenta hag̃ua. w23.04 22, 23 párr. 11-13

Ñanemanduʼa vaʼerã okambia jave ñane situasión, iñimportanteha jasegi ñaipytyvõ ótrope espesiálmente predikasión rupive. Predikasiónpe avei tekotevẽ jajahustaʼimi jepi. Ñande japredika opaichagua héntepe, orekóva diferénte kultúra ha kreénsia. Apóstol Pablo ojadapta vaʼekue opredika hag̃ua ha ñande ikatu jasegi iñehémplo. Jesús omondo kuri chupe oipytyvõ hag̃ua “umi ndahaʼéivape judío” (Rom. 11:13). Upéicha rupi apóstol Pablo opredika vaʼekue umi judío, griego, ijestúdio porãva, kampesíno mimi, governánte ha rreikuérape. Koʼã hénte idiferenteterei ojuehegui, péro Pablo ‘ojapo entéro mbaʼe oipytyvõ hag̃ua opaichagua persónape’ (1 Cor. 9:​19-22). Pablo oreko vaʼekue enkuénta moõguipa ou umi hénte ha mbaʼépa ikreénsia, upéicha rupi haʼe ikatu vaʼekue ojadapta káda persónare og̃uahẽ hag̃ua ikorasõme. Ñande avei jahupytýta heta mbaʼe porã predikasiónpe jajadaptáramo umi héntere ha ñapensáramo mbaʼéichapa ikatu ñaipytyvõ káda únope. w23.07 23 párr. 11, 12

Pe persóna orreaksionáva pyʼaguapýpe porãnte ndohechaukái ikangy térã iñarruinadoha, síno ohechauka orekoha la fuérsa ojejoko hag̃ua ha osegi trankílonte umi situasión ijetuʼúvape. Pe palávra griega ojetradusíva “pyʼaguapy” térã “akãguapy” haʼe peteĩva umi “mbaʼe porã oúva Ñandejára espíritugui” (Gál. 5:​22, 23). Ko palávra ojepuru vaʼekue oñeñeʼẽ hag̃ua peteĩ kavaju hesaitéva oñedoma pyrévare. Peichagua kavaju oñamansárõ jepe ndeʼiséi ikangy ha iñarruinadoha, síno osegi gueteri oreko la ifuérsa. ¿Mbaʼéichapa ñande ikatu ñarreaksiona trankílo porãnte ha jahechauka nañanekangyiha? Ndaikatúi jajapo upéva ñandejehegui reínte. Upéva rangue jajerure vaʼerã Ñandejárape ijespíritu ikatu hag̃uáicha jahechauka ko kualida. Oĩ heta ehémplo ohechaukáva ikatuha ñaaprende jajejokokuaa ha ñarreaksiona porã hag̃ua. Heta ermáno ha ermána osegi ipyʼaguapy oĩrõ guare otrata vaíva chupekuéra, ha upéva oipytyvõ la hénte oñeʼẽ porã hag̃ua Testigokuérare (2 Tim. 2:​24, 25). w23.09 15 párr. 3

Peteĩ visión rupive apóstol Juan ohecha vaʼekue 24 ansiáno oadoraha Jehovápe yvágape. Haʼekuéra omombaʼeguasu Jehovápe heʼívo haʼe omereseha ‘oñemombaʼe, oñembotuicha ha orresivi pe podér’ (Apoc. 4:​10, 11). Umi anhelkuéra avei oreko hetaiterei rrasón omombaʼeguasu hag̃ua Jehovápe. Haʼekuéra oĩ ijykére yvágape ha oikuaa porãiterei chupe, ohecha hikuái umi kualida porãite Jehová orekóva umi mbaʼe ojapóva rupive. Ha upéva voi omomýi umi anhelkuérape omombaʼeguasu hag̃ua chupe (Job 38:​4-7). Ñande avei ñamombaʼeguasuse Jehovápe ñañemboʼe jave. Upearã ikatu jaʼe Ñandejárape mbaʼérepa jahayhu ha jarrespeta chupe. Jalee ha jastudia jave la Biblia ñañehaʼã vaʼerã jahechakuaa umi kualida Jehová orekóva ñandegustaitéva (Job 37:23; Rom. 11:33). Upéi jaʼe chupe mbaʼéichapa ñañeñandu jaikuaávo haʼe orekoha umi kualida. Avei ikatu ñamombaʼeguasu Jehovápe ñanepytyvõ haguére ñandéve ha avei ñane ermanokuérape (1 Sam. 2:​1, 2). w23.05 3, 4 párr. 6, 7

Áño 1919-pe Ñandejára puévlo osẽ umi rrelihión fálsa poguýgui. Upe áñope “pe esklávo de konfiánsa ha iñarandúva” oñepyrũ ombaʼapo ikatu hag̃uáicha umi persóna isinsérova oguata pe ‘Tape Sagrádore’ (Mat. 24:​45-47; Is. 35:8). Pe traváho ojejapo vaʼekue anteve oipytyvõ umi oguatávape koʼág̃a pe ‘Tape Sagrádore’ oikuaave hag̃ua Jehová volunta (Prov. 4:18). Avei koʼã persóna ikatu vaʼekue ojapo umi mbaʼe Jehová ohaʼarõva chuguikuéra, péro haʼe nohaʼarõi vaʼekue koʼã hénte okambia entéro mbaʼépe una vetépe. Síno mbeguekatúpe haʼe omopotĩ ohóvo kuri ipuévlope. ¡Ajépa javyʼaitéta og̃uahẽ vove pe tiémpo ikatutahápe jajapo entéro mbaʼe Jehová oipotahaichaite! Umi tape osegi hag̃ua iporã ojejapómante vaʼerã chupe mantenimiénto. Upéicha rupi áño 1919 guive ojejapo umi traváho oñemantene hag̃ua pe “Tape Sagrádo”, ha péicha hetave persóna osẽ Babilonia Guasúgui. w23.05 17 párr. 15, 16

Pe Kuérpo Governánte ombokatupyry unos kuánto ermánope oservi hag̃ua kómo ajudánte umi komite orekóvape pe Kuérpo Governánte. Koʼã ajudánte oreko heta rresponsavilida ha ojapo porã hembiapo. Upévare ndajadudái haʼekuéra oĩmaha preparádo osegi hag̃ua okuida Cristo ovechakuérare. Opa potávo pe jehasa asy guasu ha umi unhído ohopa vove yvágape, Jehová puévlo osegíta ifiél ha oadora chupe ko yvy ape ári. Jesús, ñande Líder, ñanepytyvõ rupi ndajaguevimoʼãi ni michĩmi. Jaikuaaháicha, upe tiémpope Gog de Magog haʼéva peteĩ grúpo de nasión oatakáta Ñandejára puévlope (Ezeq. 38:​18-20). Péro upe atáke sapyʼaitemítante ha nosẽporãmoʼãi. Ndaikatumoʼãi ojoko hikuái Jehová puévlope osegi hag̃ua oadora chupe. ¡Ndajadudái Jehová osalvataha isiervokuérape! Peteĩ visión rupive, apóstol Juan ohecha pe “aty guasu” haʼéva umi ótro ovechakuéra. Upéi ojeʼe chupe pe “aty guasu” osẽha “pe jehasa asy guasúgui” (Apoc. 7:​9, 14). Upévare ndajadudái ojesalvataha hikuái. w24.02 5, 6 párr. 13, 14

¿Mbaʼépa ikatu jajapo Jehová omeʼẽ hag̃ua ñandéve ijespíritu sánto? Ñañemboʼe, jastudia Iñeʼẽ ha ñaime pe iñorganisasión haʼe odirihívape ijespíritu rupive. Jajapóramo koʼã mbaʼe jarekóta “umi mbaʼe porã oúva Ñandejára espíritugui” (Gál. 5:​22, 23). Haʼe omeʼẽ espíritu sánto sólamente umi osegívape ipensamiénto ha ikondúkta potĩ. Ndajahejái vaʼerã umi mbaʼe vai oñembohapo ñane korasõme ha ipuʼaka ñanderehe pórke péicha japerdéta Ñandejára espíritu (1 Tes. 4:​7, 8). Avei apóstol Pablo heʼi vaʼekue: “Aníkena pedespresia umi profesía” (1 Tes. 5:20). Pe palávra “profesía” ojepurúva koʼápe oñeʼẽ umi mensáhe Ñandejára omeʼẽvare ijespíritu rupive. Umíva apytépe oĩ pe oñeʼẽva ‘Jehová árare’ ha mbaʼeichaitépa hiʼag̃uimbaitéma. Ñande nañapensái hetaiterei gueteri ofaltaha upearã térã ndajahechamoʼãiha pe Armagedón. Upéva rangue siémpre jareko ñane akãme upe ára, ha káda día ‘ñane kondúkta potĩ’ ha ‘jaadora Ñandejárape ñande pyʼaite guive’ (2 Ped. 3:​11, 12). w23.06 12 párr. 13, 14

¿Mbaʼépa jajapo vaʼerã derrepentete ojaparesérõ ñandéve peteĩ taʼanga tieʼỹ selulár, távletpe térã ótro aparáto elektrónikope? Ni mbaʼevéicharõ ndajapytái vaʼerã ñamaña hese. Ifasilvéta jajapo hag̃ua upéva ñanemanduʼárõ mbaʼeichaitépa ivalióso ñandéve g̃uarã ñane amista Jehovándi. Péro jareko vaʼerã enkuénta oĩha umi taʼanga ndahaʼéiva katuete pornografía péro ikatúva ñanemoakãraku ñanderekovai hag̃ua. ¿Tekotevẽpa ñamboyke avei koʼã? Si, pórke ndajaipotái ni oñantoha ñandéve ñanderekovai (Mat. 5:​28, 29). Peteĩ ansiáno hérava David, oikóva Tailándiape heʼi: “Che apensa jepi péicha: ‘Ko taʼanga ndahaʼéirõ jepe pornografiaite, ¿ogustátapa Jehovápe apytárõ amaña hína hese?’. Apensa haguére péicha ifasilve chéve adesidi porã hag̃ua”. Ñañehaʼãrõ siémpre jarrespeta Jehovápe ndajajaposemoʼãi mbaʼeve ndogustáiva chupe ha upéva ñanepytyvõta jadesidi porã hag̃ua. La Biblia heʼi: “Nearandu hag̃ua, primeroite rerrespeta vaʼerã Jehovápe”. w23.06 23 párr. 12, 13

Oime vaʼerã pe palávra ‘koty’ heʼise umi kongregasión. Pe jehasa asy guasu aja ñaiméramo unído ñane ermanokuérandi, Jehová ñandeprotehéta haʼe opromete haguéicha. Upévare ndahaʼéi sólamente ñañoaguantánte vaʼerã, síno jajoayhu vaʼerã koʼág̃ama voi. Ñande rekove odepende upévare. “Jehová ára guasu” ou vove ojehasa asyetereíta ko múndo tuichakuére (Sof. 1:​14, 15). Jehová siervokuéra ohasáta avei umi situasión ijetuʼúva. Péro koʼág̃ama voi jajepreparárõ ikatúta ñaime trankílo ha ñaipytyvõta ótrope. Jasegíta ñaaguanta oimeraẽ provléma oñepresentáva. Ñane ermanokuéra ohasa asy vove jaiporiahuverekóta chupekuéra ha jajapóta opa ikatúva oreko hag̃ua hikuái la oikotevẽva. Jahayhu rupi chupekuéra jasegíta ñaĩ unído hendivekuéra. Jehová ñanevendesíta opermitívo ñandéve jaikove pára siémpre peteĩ múndo pyahúpe ndaiporimoʼãihápe desástre ni sufrimiénto (Is. 65:17). w23.07 7 párr. 16, 17

La Biblia oñeʼẽ jave Jehová siervokuéra yma guarére heʼi hesekuéra ipoderosoha, péro pe imbaretevéva jepe sapyʼánte ikangy vaʼekue. Por ehémplo, rréi David peteĩ vuéltape heʼi vaʼekue ‘imbareteha peteĩ montáñaicha’, péro upéi heʼi avei ‘ou hague ikangy ha okyhyjeterei’ (Sal. 30:7). Ñandejára espíritu sánto omombareteterei vaʼekue avei Sansónpe, péro haʼe orrekonose Ñandejára noipytyvõiramo chupe ‘ikangýta hague oimeraẽ ótro kuimbaʼéicha’ (Juec. 14:​5, 6; 16:17). Jehová la omombarete vaʼekue koʼã mokõi isiérvo ifiélvape. Apóstol Pablo orrekonose vaʼekue oikotevẽ hague Ñandejára omombarete chupe (2 Cor. 12:​9, 10). Haʼe hasy vaʼekue, ha sapyʼánte ijetuʼu chupe ojapo hag̃ua iporãva (Rom. 7:​18, 19; Gál. 4:​13, 14). Pablo avei oñekevranta ha okyhyje vaʼekue la ikatúvagui oiko hese (2 Cor. 1:​8, 9). Péro haʼe heʼi vaʼekue: “Chekangy jave, chepoderóso hína”. Jehová omeʼẽ rupi chupe pe fuérsa oikotevẽva haʼe oaguanta umi mbaʼe ohasáva. w23.10 12 párr. 1, 2

Sapyʼánte ikatu ñañandu ndajavaleiha mbaʼeverã. Péro ñanemanduʼa vaʼerã Jehovaite voi ñanemoag̃ui hague ijehe (Juan 6:44). Haʼe ohecha umi mbaʼe porã jarekóva, ñande ndajahechakuaáiramo jepe ñandejehe umíva, ha oikuaa porã mbaʼeichagua persónapa ñande (2 Crón. 6:30). Upévare ndajadudái vaʼerã haʼe heʼi jave ñandevaliosoha chupe g̃uarã (1 Juan 3:​19, 20). Ñande apytépe ikatu oĩ umi oiko mboyve chugui Testígo ojapo vaʼekue heta mbaʼe vai, ha umíva omoñeñandu vai chupe koʼág̃a peve (1 Ped. 4:3). Oĩ avei heta áñorema oservíva Jehovápe ha osegíva olucha pono ojapo umi mbaʼe vai oitiráva chupe. ¿Ndépa epensámava Jehová ndaikatumoʼãiha voi neperdona? Oimérõ upéicha, nekonsoláta reikuaávo oĩ hague ótro Jehová siérvo ifiélva oñeñandu vaʼekue péicha. Por ehémplo apóstol Pablo oñandu vaʼekue ivaietereiha la isituasión opensávo umi mbaʼe ndojapoporãivare (Rom. 7:24). Jaikuaa Pablo oñarrepenti hague umi ipekádogui ha ojevautisa, péro osegi vaʼekue opensa ijehe haʼeha “pe michĩvéva umi apóstol apytépe”. Ha heʼi avei umi pekadór apytépe haʼeha “pe ipekádo vaive vaʼekue” (1 Cor. 15:9; 1 Tim. 1:15). w24.03 27 párr. 5, 6

Rréi Jehoás ehémplo ñanemboʼe tekotevẽha jaiporavo ñane amigorã umi ohayhúva Jehovápe ha ombovyʼaséva chupe. Koʼãichagua amígo ñanepytyvõta jajapo hag̃ua iporãva. Ñane amigokuéra ikatu ijedave térã imitãve ñandehegui. Ñanemanduʼa vaʼerã Jehoás tuicha imitãve hague pe saserdóte Jehoiadágui. Koʼág̃a epensami ne amigokuérare ha eñeporandu: “¿Chepytyvõpa hikuái ajeroviave hag̃ua Jehováre? ¿Ojapópa hikuái Ñandejára heʼíva ha chemokyreʼỹ ajapo hag̃ua avei upéicha? ¿Oñeʼẽpa hikuái Jehováre ha umi mbaʼe oaprendévare la Bíbliagui? ¿Heʼípa chéve la ahendusévante térãpa chekorrehi hikuái aikotevẽ jave?” (Prov. 27:​5, 6, 17). Oimérõ ne amigokuéra ndohayhúi hína Jehovápe, nde nereikotevẽi umichagua amígore. Péro oimérõ ne amigokuéra ohayhu Jehovápe, eñakarama hatãkena hesekuéra, pórke haʼekuéra siémpre nepytyvõta resẽ porã hag̃ua (Prov. 13:20). w23.09 9, 10 párr. 6, 7

Pe avesedário griégope “Alfa” haʼe pe primera létra ha “Omega” haʼe hína pe último. Jehová heʼírõ guare ijehe haʼeha “Alfa ha Omega” ñanepytyvõ ñantende hag̃ua haʼe oñepyrũ jave álgo katuete omohuʼãtaha. Jehová okrea rire Adán ha Évape heʼi: “Penefamília retákena ha peñemboheta hetave ha pemyenyhẽ ko yvy ha peipuru” (Gén. 1:28). Upérõ guare Jehová primera ves heʼi vaʼekue mbaʼépa ivolunta, ha haʼete heʼíva “Alfa”. Ivolunta hína Adán ha Eva familiare iperféktova ha iñeʼẽrendúva omyenyhẽ ko yvy ha ojapo chugui peteĩ paraíso. Ág̃a Jehová okumplipa vove ivolunta haʼetéta heʼíva “Omega”. Ojapopa rire pe yvága ha ko yvy ha entéro mbaʼe oĩva pype, Jehová omeʼẽ peteĩ garantía ohechaukáva katuete okumplitaha ivolunta. Haʼe heʼi sagradoha pe séptimo día, péicha haʼete heʼíva ivolunta katuete oñekumplipaitetaha oñemohuʼãvo upe día (Gén. 2:​1-3). w23.11 5 párr. 13, 14

Pe viáhe Babilonia guive Israel peve ipukúta kuri 4 méserupi ha ijetuʼúta. Péro Jehová opromete oipeʼataha haperãguikuéra entéro umi mbaʼe ikatúva ojoko chupekuéra. Umi judío ifiélva oikuaa vaʼekue umi sakrifísio ojapótava, ndahaʼeiha mbaʼeve okomparátarõ umi vendisión ohupytýtavare oho jey rupi Israélpe. ¿Mbaʼépa pe vendisión tuichavéva orresivítava hikuái? Oadora jeýta kuri Jehovápe haʼe oipotahaichaite. Babilóniape ndaipóri vaʼekue peteĩ témplo Jehovápe g̃uarã. Ndaipóri vaʼekue altár ni umi saserdóte ikatu hag̃uáicha ojeofrese umi sakrifísio Moisés léi heʼiháicha. Avei hetaitereive vaʼekue umi ndoadoráiva Jehovápe ha ndorrespetáiva chupe. Upévare hetaiterei judío ifiélvape g̃uarã hiʼãitereíma kuri oho jey Israélpe oadora hag̃ua Jehovápe haʼe oipotahaichaite. w23.05 14, 15 párr. 3, 4

Ñaikotevẽ Ñandejára espíritu sántore jasegi hag̃ua jaiko “umi oĩva lus rendýpe oikoháicha”. ¿Mbaʼérepa? Pórke ijetuʼueterei jasegi ñanepotĩ Jehová renondépe ko múndo ikyʼaitévape (1 Tes. 4:​3-5, 7, 8). Pe espíritu sánto ikatu ñanepytyvõ ani hag̃ua ñapensa umi hénte ko mundopegua opensaháicha, pórke haʼekuéra heʼíva ndohoiete Ñandejára opensa lájare. Pe espíritu sánto ñanepytyvõta avei ‘ñandehústo ha jaiko hag̃ua tape porãre’ (Efes. 5:9). Ñañemboʼe vaʼerã Jehová omeʼẽ hag̃ua ñandéve ijespíritu sánto. Jesús heʼi vaʼekue Ñandejára omeʼẽtaha “espíritu sánto umi ojerurévape chupe” (Luc. 11:13). Avei jarresivi pe espíritu sánto ñamombaʼeguasu jave Jehovápe umi ermanokuérandi rreunionhápe (Efes. 5:​19, 20). Pe espíritu sánto tuicha ñanepytyvõ jaiko hag̃ua Jehová oipotaháicha. w24.03 23, 24 párr. 13-15

¿Tekotevẽpa nepasiensiave? Oimérõ upéicha, eñemboʼékena Jehovápe pórke pe pasiénsia ou pe espíritu sántogui (Gál. 5:​22, 23). Upévare ikatu jajerure Jehovápe ijespíritu ha tañanepytyvõ jareko hag̃ua umi mbaʼe porã oúva ijespíritu sántogui. Oimérõ ñambohovái hína peteĩ situasión ijetuʼuhápe ñanepasiénsia hag̃ua, ‘jasegíkena jajerure’ Jehovápe ijespíritu sánto ñahaʼarõkuaa hag̃ua (Luc. 11:13). Ikatu avei jajerure Jehovápe ijespíritu sánto jahecha hag̃ua pe situasión haʼe ohechaháicha. Upéi ñañemboʼe ha ñañehaʼãmbaite jajapo opa ikatúva káda día ñanepasiénsia hag̃ua. Péicha jajapórõ Jehová katuete ñanepytyvõta ñanepasiensiave hag̃ua, ñande ndahaʼéiramo jepe kuri peteĩ persóna ohaʼarõkuaáva. Ñanepytyvõta avei jajepyʼamongeta umi ehémplo oĩvare la Bíbliape, upépe oñeñeʼẽ heta persóna ipasiénsia vaʼekuére. Jajepyʼamongetárõ umívare, ñaaprendéta mbaʼéichapa jahechauka vaʼerã ñanepasiensiaha. w23.08 22, 23 párr. 10, 11

Jesús oasegura vaʼekue apóstol Pédrope Jehová oñangarekotaha hese. Ha orresusita rire, peteĩ milágro rupive oipytyvõ jey Pedro ha umi ótro apóstolpe ojagarra hag̃ua hetaiterei pira (Juan 21:​4-6). Ko milágro katuete oasegura rakaʼe Pédrope, Jehová omeʼẽtaha chupe umi mbaʼe oikotevẽva. Upépe oiméne Pedro imanduʼa raʼe Jesús heʼi hague Jehová okuidataha umi ‘omotenonde memévare Ñandejára Rréino’ (Mat. 6:33). Koʼã mbaʼe oipytyvõ vaʼekue Pédrope omotenonde hag̃ua pe predikasión ha ndahaʼéi pe inegósio de péska. Haʼe pyʼaguasúpe opredika vaʼekue áño 33-pe Pentekostés díape, ha upérõ oipytyvõ hetaitereípe ohendu hag̃ua umi notísia porã (Hech. 2:​14, 37-41). Upéi Pedro oipytyvõ vaʼekue umi samaritano ha umi ndahaʼéivape judío oikuaa ha omoirũ hag̃ua Jesúspe (Hech. 8:​14-17; 10:​44-48). Jahechakuaa Jehová ojevale hague Pédrore oipytyvõ hag̃ua opaichagua héntepe oĩ hag̃ua pe kongregasiónpe. w23.09 20 párr. 1; 23 párr. 11

Dos añokuérarupi oñehundi haguépe Jerusalén, pe rréi Nabucodonosor ohecha iképe peteĩ estátua tuichaitereíva ha la osoña vaʼekue okevrantaiterei chupe. Oamenasa voi entéro umi kuimbaʼe iñarandúvape, umíva apytépe Daniélpe, ojukataha chupekuéra ndaipóriramo álgien omombeʼúva chupe la osoña vaʼekue ha la heʼiséva (Dan. 2:​3-5). Daniel ojapo vaʼerã álgo ensegída, pórke osino heta hénte omanóta. Upémarõ haʼe “oho pe rréi rendápe ha ojerure chupe tiémpo ikatu hag̃uáicha omombeʼu chupe mbaʼépa heʼise pe osoña vaʼekue” (Dan. 2:16). La ojapóva rupive Daniel ohechauka ojerovia ha ipyʼaguasu hague. Pórke la Biblia ndeʼíri haʼe omombeʼúma hague voi mbaʼépa heʼise umi suéño. Upémarõ Daniel ojerure umi iñamigokuérape “tojerure Ñandejárape toiporiahuvereko chupekuéra, ha toipytyvõ chupe ontende hag̃ua mbaʼépa osoña pe rréi” (Dan. 2:18). Jehová okontesta chupekuéra ha oipytyvõ Daniélpe omombeʼu hag̃ua mbaʼépa heʼise pe rréi osoña vaʼekue. Upévare Daniel ha iñamigokuéra nomanói. w23.08 3 párr. 4

Ñapensa umi mbaʼe porã jahupytýtavare ñanepasiénsia haguére. Ñanepasiénsiarõ javyʼave, jaiko trankilove ha ñaneresãive. Avei jajogueraha porãve ótrondi ha ñane kongregasión iñunidove. Nañandepochyreíri rupi oĩ jave ñanemorrenegáva, ndajaikói ñambotuichave la provléma (Sal. 37:8; Prov. 14:29). Péro la iñimportantevéva, jasegi ñande Túa yvagapegua ehémplo ha ñañemoag̃uive hese. Ajépa iporãite ñanepasiénsia ha hetaite mbaʼe porã jahupyty upe haguére. Sapyʼánte ijetuʼu ñanepasiénsia hag̃ua, péro Jehová ñanepytyvõ rupi ikatu jasegi ñanepasiénsia. Ha ñahaʼarõ aja pe múndo pyahu ikatu ñaime segúro ‘Jehová oporohayhu ha ndofallaiha avavéndi, upévare umi orrespetáva chupe ikatu ojerovia hese, haʼe siémpre omaña hesekuéra’ (Sal. 33:18). Upévare enterovékena jajedesidi jasegitaha ñanepasiénsia. w23.08 22 párr. 7; 25 párr. 16, 17

Santiago heʼi vaʼekue peteĩ persóna heʼíramo jepe ojeroviaha Ñandejárare, umi mbaʼe ojapóvare ohechauka ndaupeichaiha (Sant. 2:​1-5, 9). Avei oñeʼẽ peteĩ persóna ohechávare iñermánope ndorekoiha ijaorã ni hembiʼurã, péro ndojapói mbaʼeve oipytyvõ hag̃ua chupe. Upe persóna heʼíramo jepe ojeroviaha Ñandejárare umi mbaʼe ojapóvare ohechauka ndaupeichaiha (Sant. 2:​14-16). Santiago heʼi vaʼekue Rahab ohechauka hague ojeroviaha Ñandejárare umi mbaʼe ojapóva rupive (Sant. 2:​25, 26). Haʼe ohendu vaʼekue umi mbaʼe Jehová ojapóva ha ohechakuaa Ñandejára oipytyvõ hague umi israelítape (Jos. 2:​9-11). Rahab ijerovia mbarete rupi oprotehe umi mokõi espía israelítape ani hag̃ua ojejuka chupekuéra. Upéicha rupi Rahab iñimperfékta ha ndahaʼéiramo jepe israelita ojeʼe vaʼekue hese ihustaha ojeʼe haguéicha avei Abrahán rehe. Rahab ehémplo ñanemboʼe iñimportanteha jahechauka umi mbaʼe jajapóva rupive jajeroviaha Ñandejárare. w23.12 5 párr. 12, 13

Jastudiávo ndahaʼéi jaikuaasénteva umi mbaʼe isensillovéva omboʼéva la Biblia, síno pe espíritu sánto rupive jaikuaase umi mbaʼe hypyʼũvéva omboʼéva Ñandejára Ñeʼẽ (1 Cor. 2:​9, 10). Upearã ikatu jastudia porã umi mbaʼe ñanemoag̃uivétava Jehováre. Por ehémplo, ikatu jastudia mbaʼéichapa Jehová ohechauka vaʼekue ohayhuha umi isiervokuéra yma guarépe, ha mbaʼéichapa upéva ohechauka ñanderayhuha avei ñandéve. Ikatu jahecha mbaʼéichapa Jehová oipota vaʼekue oadora chupe umi israelita, ha mbaʼéichapa oipota ñande jaadora chupe koʼág̃arupi. Térã ikatu ñainvestiga porã umi profesía Jesús okumpli vaʼekue oĩrõ guare ko yvy ape ári. Katuete jadisfrutáta jastudiávo koʼã téma, ha upearã ikatu jaipuru pe Índice de las publicaciones Watch Tower ha Gía oipurúva testígo de Jehová otopa hag̃ua informasión. Jastudia porãvo la Biblia ñamombaretéta ñande jerovia ha ‘jaikuaa porãta Ñandejárape’ (Prov. 2:​4, 5). w23.10 18, 19 párr. 3-5

Pe palávra apóstol Pedro oipurúva ha ojetradusíva “pende pyʼaite guive” heʼise “ojepyso”. Pe segunda párte pe versíkulope katu ohechauka mbaʼépa jajapóta japorohayhúrõ ñande pyʼaite guive. Heʼi ‘siémpre ñaĩtaha ñaperdona hag̃uáicha ñande rapichápe’. Ñamoĩ chupe jarekoha peteĩ mesa ikuaʼipáva térã imanchapáva. Katuete jaipysóta peteĩ mantél pe mesa ári siémpre ñamoʼã hag̃ua kompléto umi mbaʼe vai orekóva, ha ndahaʼéi peteĩ térã mokõi mbaʼénte. Péicha avei japorohayhúrõ ñande pyʼaite guive, siémpre ñaĩta ñaperdona hag̃uáicha entéro umi fálla orekóva ñane ermanokuéra jaipuruháicha pe mantél ñamoʼã hag̃ua umi mbaʼe vai orekóva pe mesa. Japorohayhúrõ ñaĩta ñaperdona hag̃uáicha ñane ermanokuérape ijetuʼúramo jepe (Col. 3:13). Ñaperdona jave, jahechauka jahayhuha ñane ermanokuérape ñane korasõ mbytete guive ha ñambovyʼaseha Jehovápe. w23.11 10-12 párr. 13-15

Rréi Josías orekórõ guare 26 áño omyatyrõka vaʼekue pe témplo. Ojejapo aja pe traváho ojetopa “Jehová lívro de la léi, pe oñemeʼẽ vaʼekue Moisés rupive”. Pe rréi ohendúrõ guare mbaʼépa heʼi pe léi, ensegída voi okambia heta mbaʼe ojejapo hag̃ua la heʼíva upe léi (2 Crón. 34:​14, 19-21). Ha nde, ¿releesépa la Biblia káda día? Oimérõ reñehaʼã rejapo upéva, ¿ndegustápa nde lektúra? ¿Reanotápa umi versíkulo nepytyvõtava? Josías orekórõ guare 39 áñorupi ou kuri ofalla ha omano. Josías ojerovia ijehe, ha ndojeruréi Jehovápe ogia hag̃ua chupe (2 Crón. 35:​20-25). Ápe ñaaprende álgo iñimportantetereíva: Jepe ñandeedáma térã hetáma jastudia la Biblia, lomímonte jasegi vaʼerã ñañemoag̃ui Jehováre. Upéva heʼise jasegi vaʼerãha ñañemboʼe ha jajerure chupe tañandegia, jastudia Iñeʼẽ ha ñahendu umi konsého porã omeʼẽva ñandéve umi kristiáno ijerovia mbaretéva. Upéva ñanepytyvõta ani hag̃ua tuicha jajavy ha javyʼa hag̃ua (Sant. 1:25). w23.09 12 párr. 15, 16

La Bíbliape oñeñeʼẽ umi kuña oheja vaʼekuére ehémplo porã. Haʼekuéra ohayhu Jehovápe ha iñeʼẽrendu chupe. Avei ‘ojejokokuaa vaʼekue entéro mbaʼépe ha ohechauka vaʼekue ijerovia entéro mbaʼe ojapóvape’ (1 Tim. 3:11). Umi ermána imitãva ikatu otopa ikongregasiónpe ehémplo porã. Umi mitãkuña ikatu oaprende heta mbaʼe umi kristiána ijerovia mbaretévagui ohayhúva Jehovápe. Mitãkuñanguéra, pepensamína unas kuánta ermána omoĩvare ehémplo porã. Peñatendemi ilájare ha mbaʼe kualida porãpa oreko hikuái. Upéi pekalkula mbaʼéichapa peẽ ikatu pejogua chupekuéra. Oiko hag̃ua ñandehegui peteĩ kristiáno ijerovia mbaretéva tekotevẽ ñaneumílde. Peteĩ ermána iñumílderamo oĩ porãta Jehovándi ha ojogueraha porãta hapichándi. Por ehémplo peteĩ ermána ohayhúramo Jehovápe iñumíldeta ha odesidíta ojegia la heʼívare 1 Corintios 11:​3-pe. Upépe Jehová oexplika mávapepa omeʼẽ la rresponsavilida omoakãvo pe kongregasión ha pe família. w23.12 19 párr. 3-5

Jehová oipota umi ména ohayhu hembirekópe, omoĩ chupe umi mbaʼe oikotevẽva, oapoja chupe iñamigoitéramo ha oipytyvõ hembirekópe oñemoag̃ui hag̃ua Jehováre. Umi ermáno tekotevẽ opensa porã la ojapótavare, ohechauka vaʼerã omombaʼeha kuñanguérape ha oiko vaʼerã chugui peteĩ persóna de konfiánsa. Pemendárõ ikatu penefamília hína. Jehová peteĩ ehémplo iporãitereíva tuakuérape g̃uarã (Efes. 6:4). Haʼe naiprovlémai vaʼekue heʼi hag̃ua ohayhuha Itaʼýra Jesúspe ha oguerohoryha chupe (Mat. 3:17). Upévare pejúrõ penefamília, peje memékena chupekuéra pehayhuha ha pyʼỹi pefelisita chupekuéra umi mbaʼe porã ojapóvare. Umi túa osegíva Jehová ehémplo oipytyvõ ifamíliape oiko hag̃ua chuguikuéra kristiáno ijerovia mbaretéva. Peẽ ikatu koʼág̃ama pejeprepara pekuidávo ótrore kongregasiónpe, pene hentekuérare ha pejepokuaávo peje chupekuéra pehayhuha ha pemombaʼeha (Juan 15:9). w23.12 28, 29 párr. 17, 18

Jaservíramo jepe fiélmente Jehovápe lomímonte ikatu ñaneprovléma ha ñanderasy, oikoháicha umi hénte ndoservírivare Jehovápe. Hiʼarive sapyʼánte umi ndochaʼéiva Jehová puévlore oñemoĩ ñanderehe ha ñandepersegi. Jehová ndojokóiramo jepe koʼã provléma, haʼe si opromete ñanepytyvõtaha (Is. 41:10). Jehová oĩ rupi ñande ykére, ñande ikatu javyʼa, jadesidi porã ha jasegi jaservi chupe fiélmente hendýramo jepe ñanendive. Jehová opromete omeʼẽtaha ñandéve ‘ipyʼaguapy’ (Filip. 4:​6, 7). Upe trankilida térã pyʼaguapy ikatu ñañandu sólamente Jehová haʼe haguére ñane amigoite. La Biblia heʼi ‘Ñandejára pyʼaguapy tuichaveha entéro mbaʼe yvyporakuéra ikatúvagui ontende’. Upéva heʼise ndaikatuiha ni ñañeimahina mbaʼeichaite pevépa Ñandejára ikatu ñanembopyʼaguapy. ¿Oikómapa ñanderehe la ñañemboʼe Jehovápe ñande pyʼaite guive ha upéi ñanesorprende mbaʼeichaitépa ñanetrankílo japytávo? Upéva hína “Ñandejára pyʼaguapy”. w24.01 20 párr. 2; 21 párr. 4

Umi ohayhúva Jehovápe, ipyʼaite guive omombaʼeguasuse héra. Rréi David oikuaa vaʼekue omombaʼeguasu jave Jehová réra, omombaʼeguasuha hína Jehovaitépe voi. Ñahendu jave Jehová réra ñapensa mbaʼeichaguápa haʼe, ñanemanduʼa umi kualida porã orekóvare, ha umi mbaʼe ijojahaʼỹva ojapóvare. Davídpe g̃uarã sagrádo vaʼekue Jehová réra, upévare omombaʼeguasuse héra porãite ‘ipyʼaite guive’. Upeichaite vaʼekue avei umi levita, haʼekuéra púntape voi omombaʼeguasu vaʼekue Jehovápe iñermanokuéra apytépe. Umi levita iñumílde ha orrekonose la umi mbaʼe heʼíva rupivénte ndaikatumoʼãiha omombaʼeguasu Jehovápe la omereseháicha (Neh. 9:5). Oiméne Jehová ovyʼaite rakaʼe ohendúrõ guare omombaʼeguasuha chupe hikuái ipyʼaite guive. w24.02 9 párr. 6

Jehová nopensamoʼãi ndajavaleiha mbaʼeverã ndaikatúiramo jahupyty ñane méta (2 Cor. 8:12). Ha ñande ikatu ñaaprende umi situasión ijetuʼúvagui. Avei ñanemanduʼa vaʼerã umi mbaʼe jahupytýmavare. La Biblia heʼi: “Ñandejára ningo ihústo hína ha ndahesaraimoʼãi umi mbaʼe pejapo vaʼekuégui” (Heb. 6:10). Upévare ndovaléi avei ñande ñanderesarái umi mbaʼe jajapóma vaʼekuégui Jehová servísiope. Ñanemanduʼa vaʼerã umi méta jahupytýmavare, por ehémplo oikóma ñandehegui Jehová amígo, japredikáma ha avei jajevautisáma. Umi mbaʼe jahupytýmava anteve, ohechauka ikatuha jasegi japrogresa ñakumpli peve pe méta jarekóva koʼág̃a. Ñande ikatu jahupyty ñane méta Jehová ñanepytyvõ rupi. Jadisfrutákena jahechávo mbaʼéichapa Jehová ñanepytyvõ ha ñanevendesi jajapo aja tekotevẽva guive jahupyty hag̃ua ñane méta (2 Cor. 4:7). Ha nañañentregáiramo jarresivíta hetave vendisión (Gál. 6:9). w23.05 31 párr. 16-18

Jehová oheka oportunida ohechauka hag̃ua ohayhuha isiervokuérape ha oguerohoryha chupekuéra. La Biblia omombeʼu 2 vése Jehová heʼi hague Jesúspe haʼe haʼeha Itaʼýra ohayhuetéva ha oguerohorýva (Mat. 3:17; 17:5). ¿Ndépa reipota Jehová heʼi ndéve ndeguerohoryha? Jehová noñeʼẽi ñandéve yvága guive, péro si oñeʼẽ ñandéve la Biblia rupive. Jalee jave mbaʼéichapa Jesús oñeʼẽ vaʼekue mborayhúpe idisipulokuérape, haʼetévaicha Jehová heʼíva ñandéve umíva. Jesús ningo ojoguaiterei Itúape. Haʼe heʼi vaʼekue ohayhuha idisipulokuéra ifiélvape iñimperféktoramo jepe. Jalee jave upéva ikatu ñañeimahina Jehová heʼiha hína ñandéve voi (Juan 15:​9, 15). Ani ñapensa Jehová nañandeguerohoryveimaha jahasa haguére umi situasión ijetuʼúvare. Sino ñapensa vaʼerã upéicha jave jarekoha la oportunida jahechauka hag̃ua mbaʼeichaitépa jahayhu Ñandejárape ha ñakonfiaha hese (Sant. 1:12). w24.03 28 párr. 10, 11