Ojejerure chupe peteĩ mbaʼe ijetuʼuetereíva

ABRAHÁN ningo hetáma oviaha hekovépe, péro katuete kóva haʼe pe viáhe ijetuʼuvéva chupe g̃uarã. Upéicharõ jepe, oguata ohóvo itaʼýra ykére og̃uahẽ hag̃ua pe lugár Jehová heʼíma haguépe chupe. Ijetuʼuetereíramo jepe Abrahánpe, ndaiporivéima mbaʼeve omboguevi vaʼerã chupe.

Osẽ guive og̃uahẽ meve, Abrahán oime vaʼerã opensa ohóvo la Jehová ojerure vaʼekuére chupe. Haʼe heʼi kuri Abrahánpe: “Ejagarramína nde raʼy peteĩete rehayhuetéva, Isaácpe, ha tapeho oñondive pe lugár héravape Moria. Ha eg̃uahẽ vove upépe, che ahechaukáta ndéve mbaʼe montáñapepa reofreséta chéve nde raʼy peteĩ ofrénda ojehapývaicha”. Jehová ningo oikuaa porã mbaʼeichaitépa Abrahán ohayhu itaʼýra peteĩmíme. ¿Mbaʼéreiko upéicharõ ojerure chupe osakrifika hag̃ua itaʼýra ohayhuetévape? ¿Ha mbaʼéiko la oipytyvõ vaʼekue Abrahánpe ikatu hag̃uáicha ojerovia ha ipyʼaguasu ojapo hag̃ua upéva?

La Biblia heʼi Abrahán haʼeha “entéro umi ojeroviáva túa” (Rom. 4:11). Ojapo mboyve ko viáhe, Abrahán ohechaukáma vaʼekue voi ojeroviaitereiha. Péro ohasávo umi áño Jehová voi avei oipytyvõ chupe ojeroviave hag̃ua. Por ehémplo, heta áño upe mboyve, Jehová heʼi kuri Abrahánpe ohunditaha Sodoma ha Gomorra pórke desástre umi hénte oikóva umi siudápe. Ohendúvo upéva Abrahán oñepyrũ ojepyʼapyeterei ha oporandu Jehovápe: “¿Rehundíta piko umi ihústova umi iñañávandi?”. Upérõ Jehová ipasiénsia ha ojapysaka porãnte Abrahán rehe, ha heʼi chupe haʼe nohundimoʼãiha umi siuda otopáramo mbovymi jepe la ihústova (Gén. 18:​16-33). Upérõ guare Abrahán oaprende vaʼekue Jehová ihustoha ha oporoporiahuverekoha. Upéva opytaite vaʼekue chupe iñakãme.

Abrahán ohechakuaa vaʼekue ijehe ha Sárare la hetekuéra nomeʼẽveimaha ifamília hag̃ua, pórke umi párte orekóva hikuái upearã haʼete vaʼekue voi la omanómava. ¡Péro Jehová ojapo peteĩ milágro hesehapekuéra! Sara orekómarõ jepe haimete 90 áño ha Abrahán katu 100 potaite, Jehová oipytyvõ chupekuéra oreko hag̃ua peteĩ mitã. Upe mitãme ombohéra hikuái Isaac. Upérõ Abrahán oaprende peteĩ mbaʼe: Jehová ikatúramo omoingove jey umi mbaʼe haʼetéva la omanómava, upéicharõ ndaipóri mbaʼeve Jehová ikatuʼỹva ojapo (Rom. 4:​18, 19; Heb. 11:​12, nóta).

Ohasa rire 25 áñorupi oiko hague koʼã mbaʼe, Abrahán oime vaʼerã imanduʼáiti raʼe la oaprende vaʼekuére. Koʼýte koʼág̃a oñemoag̃uívo ohóvo Móriare, pe lugár Jehová heʼi haguépe chupe oho hag̃ua. Abrahán oikuaa porã vaʼekue peteĩ mbaʼe: Isaac omanóramo jepe, Jehová ikatúta omoingove jey chupe ha ojaposéta voi upéva (Heb. 11:19). Abrahán ipyʼaguasu kuri okontinua hag̃ua la iviáhe pórke oreko esperánsa Jehováre.

Abrahán ohechárõ guare mombyry guive pe montáña Jehová oelehi vaʼekue, oheja isiervokuérape tapére. Haʼe heʼi chupekuéra ohaʼarõ hag̃ua upépe, haʼe ha Isaac oho aja ojapo pe sakrifísio. Oasegura avei chupekuéra mokõivéva ou jeytaha oñondive. Upéi hasypeve Abrahán ha itaʼýra oĩma pe montáñape haʼeñomi ha og̃uahẽma pe moménto Abrahán ojapo hag̃ua la Jehová ojerure vaʼekue chupe. Isaac imbaretevéramo jepe itúagui, haʼe oñentregaiténte chupe. Upémarõ Abrahán oipykua ha oipokua itaʼýrape ha omoñeno chupe pe altár ári. ¡Noimoʼãieténgo la tekotevẽtava ojapo! Upéicharõ jepe, Abrahán oñakarama hatã porã pe kysére, ha ohupívo ipo yvate, peteĩ ánhel ohenói chupe hérarupi ha heʼi: “Ani rejapo hese mbaʼeve ivaíva”.

Upéi Ñandejára oguerohory Abrahánpe ojerovia ha iñeʼẽrendu haguére. Upépe Jehová opromete jey Abrahánpe ovendesitaha chupe, ombohetataha ifamiliare ha ovendesitaha entéro nasión oĩva ko yvy ape ári. Entéro koʼã mbaʼe ojehupyty Abrahán iñeʼẽrendu haguére peichaite peve.

Pe promésa Jehová ojapo vaʼekue Abrahánpe osegi gueteri oñekumpli koʼag̃aite peve. Upe promésa rupive umi hénte orresivíta umi vendisión odurátava pára siémpre. Umi mbaʼe ohasa vaʼekue Abrahán ha Isaac, ñanepytyvõ ñantende porãve hag̃ua mbaʼépa la Jehová tekotevẽ vaʼekue ohasa ikatu hag̃uáicha osalva entéro persóna ifiélvape. Abrahán oĩma kuri ontrega hag̃uáicha itaʼýra peteĩmíme. Jehová avei upéicha ontregáta kuri itaʼýra peteĩmíme ikatu hag̃uáicha entéro persóna ohupyty heta mbaʼe iporãitereíva (Juan 3:16). Jahechávo mbaʼeichaitépa tuicha pe sakrifísio Abrahán ojapomoʼã vaʼekue, ñantende porãve avei mbaʼeichaite pevépa Jehová ñanderayhu.

Abraháncha ñande avei ikatúta káda día jajeroviave Jehováre jajepyʼamongetáramo umi mbaʼe haʼe heʼi ha ojapóma vaʼekuére ymave. Amáske jajeroviave, ñandepyʼaguasuvéta avei. Ñande natekotevẽi jajepyʼapy Jehová ojeruréramo g̃uarã ñandéve la ojerure vaʼekue Abrahánpe. Haʼe ndojerurevéima upéva avavépe. Péro oĩ peteĩ mbaʼe jaikuaa porãva: Tahaʼe haʼéva la Jehová ojeruréva ñandéve, ikatúta ñandepyʼaguasu ñakumpli hag̃ua jajerovia rupi hese. Ha ñaneñeʼẽrendúramo chupe, haʼe ñanevendesíta hetaiterei hendáicha ha omeʼẽta ñandéve umi mbaʼe ni nañaimoʼãiva.

¿Moõpa oñeñeʼẽ hese la Bíbliape?

• Génesis 22:​1-19

• Hebreos 11:​11, 12, 17-19

¿Mbaʼépa ere chupe?

¿Mbaʼérepa jaʼekuaa Abrahán ipyʼaguasu hague ko kásope?

Einvestigamína

1. 1. ¿Mbaʼe pruévapa jareko jaʼe hag̃ua Abrahán añetehápe oexisti hague? (g 5/12 18, rrekuádro-wcgr; it “Abrahán” párr. 22, 23-wcgr). A

   Rrespuésta

   

Ejepyʼamongetamína ndejehe

• ¿Mbaʼéichapa pe esperánsa oipytyvõ raʼe Abrahánpe ipyʼaguasu hag̃ua? ¿Mbaʼéichapa ñapensa meméramo ñane esperánsare ñanepytyvõta ñandepyʼaguasu hag̃ua? C

  Rrespuésta

  

• ¿Mbaʼéichapa ñande avei ikatu ñandepyʼaguasu Abraháncha ha ñameʼẽ ñande sakrifísio...

  • ... oñepresenta jave peteĩ oportunida japredika hag̃ua? (Heb. 13:15).

    Rrespuésta

  • ... jadesidíta jave mbaʼéichapa jaipurúta umi mbaʼerepy jarekóva? (Prov. 3:9).

    Rrespuésta

  • ... jaikuaárõ peteĩ ermáno oikotevẽha ñanderehe? (Filip. 4:18).

    Rrespuésta

• ¿Mbaʼe mbaʼépa ikatu rejapove rehechauka hag̃ua ndepyʼaguasuha Abrahán ipyʼaguasu haguéicha ko kásope?

  Rrespuésta

Ejepyʼamongetamína Jehováre

• Alee rire ko rreláto, ¿mbaʼépa aaprendeve Jehovágui?

  Rrespuésta

• Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?

  Rrespuésta

• ¿Mbaʼépa aporandúne Abrahánpe térã Isaácpe Jehová omoingove jey vove chupekuéra?

  Rrespuésta

Reikuaave hag̃ua

Ehechamína mbaʼeichaitépa oiko raʼe umi mbaʼe jalee vaʼekue ko rrelátope.

Jajeroviákena haʼekuéraicha: Abrahán (párte 2) (11:10).

¿Mbaʼéichapa Jehová ha Abrahán ou vaʼekue oñoamigoite? ¿Ha mbaʼéichapa nde avei ikatu ehupyty upéva?

Jehová heʼi hese haʼeha iñamígo (w16.02 8-12).