45 PEDRO
“Chéngo pekadór”
PEDRO haʼe vaʼekue peskadór ha ombaʼapo vaʼekue upévape ihentekuérandi. Haʼe ipyʼaguasueterei vaʼekue péro sapyʼánte opoi rei reínte ijurúgui. Ha ohechakuaárõ tekotevẽha ojejapo álgo pyaʼe voi okuʼe upearã. Peteĩ jey iñermáno Andrés vyʼápe ou heʼi chupe: “Rotopa pe Mesíaspe”. Pedro oho ohecha Jesúspe ha upéi oñepyrũma osegi chupe.
Unos kuánto mése upe rire, Jesús oho Pedro vállepe Capernaúmpe. Pedro ningo tódo el pyharéma opeska hína kuri péro ni peteĩ pira noguenohẽi. Upéi ou Jesús ha heʼi chupe oho hag̃ua pe hypyvehápe ha oity jey hag̃ua la irréd. Pedro opensa ndoikomoʼãiha upéva. ¡Ni pyharekue noguenohẽi mbaʼeve piko de diakue oguenohẽta! Upévare Pedro heʼi voi Jesúspe: “Tóda la nóche ningo roñehaʼã ropeska ha noronohẽi mbaʼevete”. Upéicharõ jepe Pedro openánte Jesúsre. Upéi sapyʼaitérõ g̃uarã oguenohẽmi hikuái hetaiterei pira ha mokõi varkoʼi voi omyenyhẽte hikuái. Upévare umi mokõi varkoʼi oñepyrũma katu oñapymi. Upépe Pedro tuichaiterei oñemondýi, oñesũ Jesús renondépe ha heʼi chupe: “Che Ruvicha, che namereséi ni aime nde ypýpe, pórke chéngo pekadór”. Pédrope osupera vaipaite pe milágro ohecha vaʼekue. Upévare oñandu ni nomereseiha oĩ Ñandejára Raʼy ypýpe. Péro Jesús osẽ heʼi chupe: “Ani rekyhyje, koʼág̃a guive rejagarráta hénte, rejagarraháicha pira”.
Jesús ohechakuaa vaʼekue Pédrore heta mbaʼe iporãva, upévare tiémpo rire oelehi voi chupe oĩ hag̃ua umi 12 apóstol apytépe. Pedro ohechauka vaʼekue ipyʼaguasuha heta hendáicha. Por ehémplo, avése Jesús heʼími vaʼerã peteĩ mbaʼe avave ndaikatúiva ontende, ha ni umi disípulo noñanimái oporandu chupe. Péicha jave Pedro ni ndahesapirĩri ha oporandúma hína Jesúspe mbaʼépa la heʼise vaʼekue. Ha Jesús oguatárõ guare pe y ári, Pedro pyʼaguasúpe heʼi chupe haʼe ojaposeha avei upéva.
Pedro opoi rei reínte vaʼekue ijurúgui, upévare ipyʼaguasúmante vaʼerã oasepta hag̃ua ojekorrehi jave chupe ha okambia
Pedro ohechauka vaʼekue avei ipyʼaguasuha ojavy jave. ¿Mbaʼérepa? Pórke peteĩ persóna ipyʼaguasúmante vaʼerã oasepta hag̃ua ojavy hague ha okambia. Ha upevaite la Pedro ojapo vaʼekue heta vése. Por ehémplo, Jesús omombeʼúrõ guare ijapostolkuérape omanotaha, Pedro ojaʼo chupe ha heʼi: “Che Ruvicha, ejeporiahuverekomína nde avei”. Péro Jesús ojere okorrehi chupe okontrea haguére Ñandejárape ojapoháicha Satanás. Upérõ guare Pedro oasepta ojavy hague ha okambia.
Pe pyhare omano mboyve, Jesús omboʼese kuri ijapostolkuérape iñumílde vaʼerãha. Upearã ojagarra ombojepyhéi ijapostolkuérape. ¡Hiʼarive upéva esklávo rembiapónte! Pedro oñesorprende ohechávo la Jesús ojapóva ha heʼi chupe: “Che Ruvicha, ¿mbaʼéicha piko nde rejohéita chéve che py?”. Upépe Jesús okorrehi Pédrope ha oexplika chupe mbaʼérepa ojapo upéva. Péro Pedro ohasa jeýma la rrája ha heʼi voi Jesúspe ojohéi hag̃ua avei chupe ipo ha iñakã. Upépe Jesús okorrehi jey chupe heʼi haguére upéicha. Upéi Jesús heʼi ijapostolkuéra ohejapa reitaha chupe. Ha Pedro opo voi ha heʼi umi ótro ojapóramo jepe upéva, haʼe núnka ndohejamoʼãiha Jesúspe. Péro Jesús heʼi chupe upe pyharépe voi haʼe onegataha chupe 3 vése.
Upe riremínte umi soldádo oúma ojagarra Jesúspe. Pedro pyʼaguasúpe osegi Jesúspe mombyrymi guivénte ha oho og̃uahẽ meve pe súmo saserdóte róga korapýpe. Upépe ojeraha kuri ojehusga hag̃ua Jesúspe, péro upéva rangue omaltrata ha omotĩ hikuái chupe. Pedro oĩ aja hína upépe, oĩ imanduʼáva haʼe okorre hague avei Jesúsndi. Péro haʼe 3 vése voi onega oikuaaha jepe Jesúspe. Péicha oñekumpli la Jesús heʼi vaʼekue chupe.
Upe javete Jesús osẽ pe ógagui ha omaña Pédrore derechoite. Upépe Pedro oñeñandu vaieterei ha “osẽ okápe hasẽ soro”. Péro upe riréngo oiméne la oñeñandu vai raʼe oikuaávo iñamígo ohayhuetéva omano asyeterei hague. Oñeñandúramo jepe yvýre, Pedro oñehaʼã jey ijehe oñakãrapuʼã hag̃ua. ¿Mbaʼépa ojapo raʼe? Haʼe oho jey umi ótro apóstol rendápe. Upéi, oikomi peteĩ mbaʼe haʼe ni nohaʼarõi vaʼekue. Jesús ojaparese chupe orresusita rire. La Biblia nomombeʼúi mbaʼépa Jesús heʼi raʼe chupe upérõ guare, péro katuete haʼe omokyreʼỹ ha omombareténe raʼe Pédrope.
Unos kuánto semána upe rire, Jesús ojotopa jey ijapostolkuérandi Mar de Galilea ypýpe. Upérõ haʼe ojapo peteĩ mbaʼe iporãitereíva Pedro rehehápe. Pedro ningo onega kuri Jesúspe 3 vése, upévare Jesús omeʼẽ jey Pédrope la oportunida heʼi hag̃ua ohayhuha chupe 3 vése. Upéi Jesús ohechauka ojeroviaitereiha Pédrore ha omeʼẽ chupe peteĩ asignasión iñimportantetereíva. Haʼe heʼi chupe: “Emongaru umi che ovecha mimi”. Jahechataháicha kapítulo 49-pe, Pedro okumpli porã vaʼekue la Jesús ojeruréva chupe, oñepresentáramo jepe chupe umi situasión tekotevẽ haguépe ipyʼaguasu mas ke núnka.
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa Pedro ipyʼaguasu hague?
Einvestigamína
1. ¿Mbaʼéichapa ombaʼapo vaʼekue umi peskadór Pedro tiémpope? (it “Kasadór ha peskadór” párr. 6, 7-wcgr). A
Taʼanga A
2. ¿Mbaʼérepa Jesús ombohéra vaʼekue Simónpe Cefas (Pedro)? (Juan 1:42; ia 210 párr. 8).
3. ¿Mbaʼépa Jesús la ontendekase vaʼekue heʼírõ guare Pedro ha Andréspe ‘ojagarrataha hénte ojagarraháicha pira’? (Mat. 4:18-20; w16.05 9 párr. 3, 4). B
Taʼanga B
4. Jesús oho mboyvemi yvágape heʼi vaʼekue Pédrope: “¿Ndépa cherayhuve koʼã mbaʼégui?”. ¿Mbaʼépa la ontendekase vaʼekue Jesús? (nóta de estúdio “¿ndépa cherayhuve koʼã mbaʼégui?” oĩva Juan 21:15-pe nwtsty-wcgr).
Ejepyʼamongetamína ndejehe
Oimérõ Pédroicha ereko peteĩ devilida, ¿mbaʼéichapa iñehémplo ikatu nemokyreʼỹ lomímonte esegi hag̃ua eservi Jehovápe? C
Taʼanga C
Jehová ha Jesús naiprovlemaiete vaʼekue operdona hag̃ua Pédrope heta vése. ¿Mbaʼéichapa upéva nemokyreʼỹ?
¿Mbaʼéichapa ikatu ndepyʼaguasu Pedro ipyʼaguasu haguéicha?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
¿Mbaʼérepa reagradese Jehovápe oiporavo haguére Pédrope ogoverna hag̃ua Jesúsndi yvágape?
Reikuaave hag̃ua
Ehechamína ne famíliandi Pedro ehémplo ha peanalisa mbaʼeichaitépa Jehová oiporiahuvereko vaʼekue chupe.
Pedro ifiél vaʼekue oĩramo jepe heta oheja reíva Jesúspe.