46 MARÍA MAGDALENA
“¡Ahecha ñande Ruvichápe!”
MARÍA Magdalena ningo hetaiterei osufri vaʼekue. ¡Eñeimahinamíntena! Haʼe ningo oreko vaʼekue voi “7 demónio”. ¡Mbaʼeichaitéiko oiméne oreko asy raʼe chupe koʼãva! Péro isituasión okambiaite oikuaárõ guare Jesúspe, pórke haʼe omosẽ umi 7 demóniope. Upépe por fin María ojelivera ha upe guive haʼe pyʼaguasúpema ojapo la ikatúva guive oipytyvõ hag̃ua Jesúspe.
Haʼe ningo ohayhueterei vaʼekue Jesúspe ha ohenói voi chupe “Rabbóni” heʼiséva “Mboʼehára”. Upéva ohechauka haʼe orrespetaiterei hague chupe. Jesús ha umi 12 apóstol oviaha vaʼekue opárupi oñeʼẽ hag̃ua la héntepe Ñandejára Rréinore. María Magdalena ohecha haʼekuéra ohejaha itraváho entéro ojapo hag̃ua ko tembiapo iñimportantetéva ha opokoiterei hese. Upévare oiméne haʼe oikuaase raʼe mbaʼéichapa ikatu oipytyvõ chupekuéra.
María Magdalena hetaiterei osufri, péro oikuaa rire Jesúspe ojedesidi siémpre oipytyvõtaha chupe ha isegidorkuérape
María haʼe vaʼekue peteĩva umi kuña “oipurúva ipláta ha umi mbaʼe orekóva” oñatende hag̃ua Jesús rehe ha umi isegidorkuérare. Umíva apytépe oĩ vaʼekue umi 12 apóstol ha avei hetave kuña ha kuimbaʼe. Oiméne oĩ voi raʼe mas de 20 la oviaháva Jesúsndi “umi siuda ha puevlokuérarupi” opredika hag̃ua. Upe tiémpope umi judíope g̃uarã irraroiterei vaʼekue la ohecha peteĩ kuña omoirũha peteĩ mboʼehárape. Upévare ikatu oime oĩ raʼe la oñembohorýva koʼã kuñáre. Péro haʼekuéra omombaʼeterei kuri pe priviléhio orekóva, upévare pyʼaguasúpe omoirũ hikuái Jesúspe ha nopenái la ojeʼévare hesekuéra.
Mbaʼeichaitéiko oiméne María ombyasy raʼe ojejagarrárõ guare Jesúspe pe Páskuape Jerusalénpe. Upe pyharépe ojeakusa reiete Jesúspe oñeʼẽ vaiha Ñandejárare ha upéi oñekondena chupe omano hag̃ua peteĩ yvyráre. Péro María osegi ipyʼaguasu. Haʼe oho voi kuri Jesús sýndi ha hetave ótro kuña ifiélvandi omoirũ hag̃ua Jesúspe oikotevẽvérõ guare. Haʼekuéra ohechauka kuri ohayhuetereiha Jesúspe, oĩha ijykére ha oapojaha chupe. Jesús osufrietereíramo jepe oĩ aja pe yvyráre, oiméne okonsolaite raʼe chupe ohechávo koʼã Jehová siérva ndohejareiriha chupe. Haʼekuéra katu ohecha vaʼekue mbaʼeichaitépa Jesús ifiél ha ojapopaite la Itúa omanda vaʼekue chupe omanoite peve. María Magdalena oĩ vaʼekue upépe Jesús omanórõ guare.
Jesúspe ojejukárõ guare, oĩ vaʼekue avei upépe umi rrománo ha líder judío ojukauka vaʼekue chupe. Upévare ikatu jaʼe María Magdalena ha hetave kuña ifiélva ipyʼaguasueterei hague hasẽ hag̃ua Jesúsre koʼãva rovake. María Magdalena oñembyasyetereíramo jepe, haʼe odesidíma kuri ojapovetaha álgo ohechauka hag̃ua ohayhuetereiha Jesúspe. Upe lugárpe ningo hakueterei, upévare umi omanóva retekue pyaʼe oñembyaipa jepi. Ani hag̃ua upéva omolesta umi ohóvape hasẽ pe omanóvare, la hénte ojepokuaámi omoĩ aséite hyakuã asýva pe omanóva retekuére oñeñotỹ mboyve. Péro upéva ndaikatúi kuri ojejapo Jesús kásope. Upévare María ohecha kuri ojapo hag̃ua upéva Jesús oñeñotỹ riréma. Ohasa rire pe sábado, haʼe ha umi ótro kuña oho ojogua la tekotevẽva guive ojejapo hag̃ua pe aséite perfumádo. Upéi oho hikuái pe sepultúrape voi porã omoĩ hag̃ua upéva Jesús retekuére.
Oiméne María raẽvete og̃uahẽ raʼe pe sepultúrape ha tuichaiterei oñesorprende ohechávo oĩha aviérto ha ndaiporiha pype mbaʼeve. Upémarõ haʼe odipara ha oho omombeʼu upéva Pedro ha Juánpe. Haʼe ou jeýrõ guare pe sepultúrape umi ótro kuña ohopa jeýma kuri. Upéi María omaña pe sepultúra ryepýpe ha ohecha “mokõi ánhel ijao morotĩva oguapýva hína oĩ haguépe Jesús retekue”. Oñemongetaʼimi rire hendivekuéra, haʼe ojere ha ohecha oĩha upépe peteĩ karai ha opensa haʼeha pe hardinéro. Pe karai heʼi chupe: “¿Mbaʼére piko nerasẽ?”. Upépe María oporandu chupe Jesús retekuére ha heʼi voi: “Oimérõ nde regueraha raʼe, eréna chéve moõpa reheja aha hag̃ua aheka”. Jahechaháicha, María okalkuláma voi ohotaha oheka Jesús retekue ha ogueru jey pe sepultúrape. ¿Mbaʼéicha piko peteĩ kuña haʼeñónte ipuʼakáta Jesús retekuére? María ni nopensái upévare. Haʼe ojedesidíma kuri ojapotaha la ikatúva entéro Jesús rehehápe.
María oñembyasyeterei hína kuri, upémarõ pe karai heʼi chupe: “¡María!”. Upepete haʼe opilla haʼeha Jesús ha hasẽhágui hína ojere oñasaingo hese ha heʼi: “¡Rabbóni!”. Jesús heʼi chupe anivéma hag̃ua oñasaingo hese ha omeʼẽ chupe peteĩ asignasión iñimportantetereíva. Heʼi voi Maríape: “Tereho che ermanokuéra oĩháme”. Upéva iñimportánte kuri ha ohechauka Jesús okonfiaitereiha hese, pórke ojerure chupe oho hag̃ua omombeʼu pe notísia iñimportantevéva: Jesús oikove jeýma hague. María upepete voi osẽ oho. Primerorã umi disípulo ndogueroviái chupe. La Biblia heʼi voi haʼekuéra opensa hague “naisentidoiha la heʼíva”. Péro upéva ndojokói kuri María Magdalénape osegi hag̃ua omombeʼu enterovévape Jesús oikove jeýma hague, ha upéva ohechauka haʼe ipyʼaguasueterei hague.
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa María Magdalena ipyʼaguasu hague?
Einvestigamína
1. ¿Mbaʼéichapa María Magdalena ha hetave kuña oipytyvõ vaʼekue Jesúspe ha ijapostolkuérape? (ijwia artíkulo 6 párr. 5, 6-wcgr). A
Taʼanga A
2. ¿Mbaʼérepa María primerorã ndopillái kuri pe kuimbaʼe oñeʼẽva chupe haʼeha Jesús? (ijwia artíkulo 6 párr. 16-wcgr).
3. ¿Mbaʼérepa Jesús heʼi kuri María Magdalénape anivéma hag̃ua oñasaingo hese? (w08 1/4 32 párr. 8).
4. Umi apóstol opensa kuri “naisentidoiha” la heʼíva María Magdalena. ¿Mbaʼérepa oiméne opensa raʼe hikuái upéicha? (Luc. 24:11; w12 1/10 10 párr. 4, 5).
Ejepyʼamongetamína ndejehe
María Magdalena iñumílde vaʼekue ha naiprovlémai ojapo hag̃ua oimeraẽ mbaʼe oporopytyvõ hag̃ua. ¿Mbaʼéichapa ikatu jasegi iñehémplo? B
Taʼanga B
¿Mbaʼéichapa ikatu jasegi María Magdalena ehémplo oĩ jave nañanerenduséiva predikasiónpe? (Luc. 24:10, 11).
¿Mbaʼéichapa ikatu ndepyʼaguasu María Magdalena ipyʼaguasu haguéicha?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
Posívlemente Maríape ojeporavo ogoverna hag̃ua Jesúsndi yvágape, ¿mbaʼérepa reagradese Jehovápe upévare?
Reikuaave hag̃ua
¿Mbaʼépa heʼi jepi la hénte María Magdalénare? Péro, ¿mbaʼépa heʼi hese la Biblia?
¿Mbaʼéichapa Jesús otrata vaʼekue María Magdalénape ha umi ótro kuñáme? ¿Mbaʼépa ñaaprende upévagui?
Ojerrespeta ha oñemombaʼe vaʼerã umi kuña ifiélvape (w95 15/7 15-18 párr. 3-8-wcgr).