Rreferénsia ojepurútava rreunionhápe Mbaʼéichapa Jaiko ha Japredika vaʼerã
© 2025 Watch Tower Bible and Tract Society of Pennsylvania
1-7 DE SEPTIEMBRE
TESÓRO OĨVA ÑANDEJÁRA ÑEʼẼME PROVERBIOS 29
Errechasa umi kreénsia ha kostúmbre ndogustáiva Jehovápe
wp16.06 6, rrekuádro
Visión ohechaukáva umi oikóvape yvágape
Hetaiterei hénte oguerovia umi aguería térã superstisión ha okyhyje umi espíritu añágui. Ha haʼete voi ku oĩva préso, pórke ndaikatúi ojei koʼã mbaʼégui. Haʼekuéra oipuru amuléto ha hetave mbaʼe opensáva orekoha podér ojeprotehe hag̃ua. Péro natekotevẽi rejapo koʼã mbaʼe. La Biblia ñanekonsola heʼívo: “[Ñandejára] omaʼẽ opa mbaʼe ko yvy ári ojehúvare, oipytyvõ hag̃ua umi hese añetehápe ojeroviávape” (2 Crónicas 16:9). Jehová ningo Ñandejára tee, ha ipoderosoiteve Satanásgui ha ndeprotehéta rejeroviáramo hese.
Jehová ndeprotehe hag̃ua, tekotevẽ reaprende mbaʼépa ogusta chupe ha ejapo upéva. Por ehémplo, umi apóstol tiémpope umi kristiáno oikóva Éfesope ombyatypa vaʼekue ilivrokuéra oñeʼẽva máhiare ha ohapypa (Hechos 19:19, 20). Péicha avei, Ñandejára ndeprotehe hag̃ua, ehundipaite vaʼerã oimeraẽ mbaʼe oúva umi demóniogui. Por ehémplo, umi amuléto, lívro oñeʼẽva máhiare, ha umi mbaʼe oipurúva jepi umi hénte openságui orekoha podér, omomombyryha umi espíritu aña térã omeʼẽha suérte.
Ñadefendékena la Biblia heʼíva pe ñemanóre
13 Oiméramo ndereikuaaporãi peteĩ kostúmbrepa oñemoĩ la Biblia heʼívare, reñemboʼe vaʼerã Jehovápe ha ejerure chupe tanemoarandu (elee Santiago 1:5). Upéi iporãta rehekáramo informasión ñane puvlikasionkuérape. Ha tekotevẽramo, ikatu voi reporandu umi ansiáno oĩvape ne kongregasiónpe. Haʼekuéra ndeʼimoʼãi ndéve mbaʼépa rejapo vaʼerã, péro ikatu nepytyvõ retopa hag̃ua la Bíbliape umi konsého ideprovéchotava ndéve, por ehémplo, umi koʼág̃a jahecháva rehegua. Rejapóramo koʼã mbaʼe ikatúta ‘reipuru meme ne akã’, ha upéva nepytyvõta reikuaa hag̃ua “mbaʼépa iporã ha mbaʼépa ivai” (Heb. 5:14).
“Asegíta pe añetegua rapére”
12 Umi kostúmbre ha práktika ndogustáiva Ñandejárape. Ñane hentekuéra, ñane kompañerokuéra de traváho, de eskuéla térã kolehiopegua oipota jepi ñakomparti hendivekuéra umi mbaʼe haʼekuéra ofesteháva. ¿Mbaʼépa ikatu ñanepytyvõ ani hag̃ua jasegi umi kostúmbre ha práktika Jehovápe ndogustáiva? Tekotevẽ hesakã porã ñandéve mbaʼérepa Jehovápe ndogustái heta festého ojapóva umi hénte. Iporãta jahekáramo ñane puvlikasiónpe ikatu hag̃uáicha ñanemanduʼa mbaʼéichapa oñepyrũ vaʼekue umi festého oikóva koʼág̃arupi. Jajepyʼamongetárõ koʼã mbaʼére, ñaiméta konvensído jahechakuaaha “mbaʼépa oguerohory ñande Ruvicha” ha jasegíta jaiko upe tapére (Efes. 5:10). Jajeroviákena Jehováre ha Iñeʼẽre, péicha ndajakyhyjemoʼãi umi ótro opensávagui (Prov. 29:25).
Óro kuʼi oĩva la Bíbliape
Jajapóva rupive jahechauka japorohayhu añeteha
11 Jafelisitákena ñane ermanokuérape ñande pyʼaite guive. Jaaprovecha vaʼerã oimeraẽ oportunida jafelisita hag̃ua ñande rapichápe, umi mbaʼe katuete omombaretéta chupe (Efes. 4:29). Péro jajapo vaʼerã upéva ñande pyʼaite guive, ndahaʼéi japyta porã hag̃uánte peteĩ persónandi. Ndovaléi avei japorofelisita guaʼúnte, ni ñakirirĩnte tekotevẽ jave ñameʼẽ konsého (Prov. 29:5). Ñanderovamokõita hína jaguerohorýramo peteĩ persónape ha upéi jatakýramo hese ñaime jave ótrondi. Apóstol Pablo ohechauka vaʼekue oporohayhu añeteha. Peteĩ okasiónpe haʼe ofelisita kuri umi ermáno Corintoguápe umi mbaʼe porã ojapóvare (1 Cor. 11:2). Péro omeʼẽ avei chupekuéra konsého ha pyʼaguapýpe porãnte ontendeka chupekuéra mbaʼépepa tekotevẽ omehora (1 Cor. 11:20-22).
8-14 DE SEPTIEMBRE
TESÓRO OĨVA ÑANDEJÁRA ÑEʼẼME PROVERBIOS 30
“Ani remeʼẽ chéve rrikésa ni mboriahu”
¿Mbaʼépa jahayhu vaʼerã javyʼa añete hag̃ua?
10 Añetehápe ningo entéronte ñaikotevẽ plátare pórke ideprovécho ñandéve (Ecl. 7:12). Péro, ¿ikatúta piko lomímonte javyʼa jarekóramo ñaikotevẽmívante? Si ikatu (elee Eclesiastés 5:12). Peteĩ eskritór bíblico heʼi: “Ani reheja chemboriahu ni chepláta heta, pe tembiʼu aikotevẽvante emeʼẽ chéve”. Ndahasýi ñantende hag̃ua mbaʼérepa ojerure ani hag̃ua imboriahueterei, haʼe ningo ndoipotái upéva káusare ou omonda mbaʼe ha upéicha omotĩ Ñandejárape. Péro, ¿mbaʼérepa pe eskritór bíblico heʼi avei ani hag̃ua ou irrikoiterei? Haʼe heʼi: “Ani ág̃a cheryguatãmarõ aiko haʼe upérupi: ‘¿Máva piko aipo Jehová?’” (Prov. 30:8, 9, TNM). Oime vaʼerã katuete jaikuaa oĩha persóna ojeroviavéva iplátare ojerovia rangue Ñandejárare.
11 Ñandejára ndoguerohorýi umi iplatarayhúvape. Jesús heʼi vaʼekue: “Avave ndaikatúi ombaʼapo tembiguáiramo mokõi patrónpe g̃uarã. Peteĩme ohayhúta ha pe ótrore ndaijaʼemoʼãi, peteĩre ojepokuaavéta ha pe ótrope omboykéta. Upéicha avei, peẽ ndaikatúi peiko Ñandejára rembiguáirõ ha avei peiko pláta rapykuéri”. Haʼe heʼi avei: “Anive pembyaty mbaʼerepy ko yvy ape ári, ikatutahápe havẽmba ha vícho hoʼupa pendehegui, térã mondaha ou oike mbaretépe ha oguerahapa pendehegui. Upéva rangue, pembyaty mbaʼerepy yvágape. Upépe nahavẽmoʼãi, ndoʼumoʼãi vícho ha umi mondaha ndoikemoʼãi mbaretépe ogueraha pendehegui” (Mat. 6:19, 20, 24).
12 Heta ermáno ohechakuaa oikóramo sensillomínte, ovyʼa ha itiempoveha Jehovápe g̃uarã. Por ehémplo, peteĩ ermáno Estados Unidosgua hérava Jack ojapo vaʼekue upéva. Haʼe oreko vaʼekue peteĩ óga tuicháva ha peteĩ negósio, péro ovendepa umíva ha oservi de prekursór hembirekóndi. Jack heʼi: “Rombyasyeterei kuri rovendétarõ guare ore róga porãite ha pe terréno roreko vaʼekue. Péro ahechakuaa avei heta tiémpore ndavyʼái hague ag̃uahẽvo ógape, pórke chemonguerái umi provléma arekóva che travahohápe. Che rembireko katu upe tiémpope oservíma vaʼekue kómo prekursóra ha siémpre ovyʼa. Haʼe heʼími vaʼerã chéve: ‘Che areko pe patrón ikalidavéva’. Koʼág̃a che ajapóma avei che prekursorádo ha mokõivéva rombaʼapóma la mísma persónape g̃uarã, Jehová”.
“¿Ndépa cherayhuve koʼã mbaʼégui?”
15 Heta persóna oipotaiterei umi mbaʼe osẽ ramovéva, tahaʼe ao, komputadóra, selulár ha umícha. Upévare oñehaʼãmbaite okonsegi hag̃ua umíva. Koʼãichagua héntepe pe pláta ha umi mbaʼerepy la iñimportantevéva. Péro, ¿mbaʼépa omotenonde vaʼerã Jehová siervokuéra? Iporã ñañeporandumi koʼã mbaʼe: “¿Aikópa apensaiterei umi áuto último modélore ha umi ao oĩvare a la móda, térãpa aipuruve che tiémpo ajeprepara hag̃ua rreunionrã? ¿Cherembiapoitereípa ha upévare saʼíma chetiémpo añemboʼe ha alee hag̃ua la Biblia?”. Nañañatendéiramo, ikatu hína jahayhuve umi mbaʼerepy, jahayhu rangue Jesúspe. Upévare iporã jajepyʼamongeta haʼe heʼi vaʼekuére: “Peñatende porãke ha ani pendetaryrýi mbaʼevére” (Luc. 12:15). ¿Mbaʼérepa Jesús heʼi vaʼekue upéva?
16 Jesús heʼi vaʼekue: “Avave ndaikatúi ombaʼapo tembiguáiramo mokõi patrónpe g̃uarã”. Upéi heʼi avei: “Peẽ ndaikatúi peiko Ñandejára rembiguáirõ ha avei peiko pláta rapykuéri”. Jaikóramo umi mbaʼerepy rapykuéri, ndaikatumoʼãi jaservi Jehovápe ñande pyʼaite guive. ¿Mbaʼérepa? Pórke pe persóna ojapóva upéva “peteĩme ohayhúta ha pe ótrore ndaijaʼemoʼãi”, térã “peteĩre ojepokuaavéta ha pe ótrope omboykéta” (Mat. 6:24). Ñande ningo ñaneimperfékto, upéicha rupi ñañehaʼã vaʼerã ñamboyke “ñande rete rembipota vai”. Upéva heʼise avei ndajaikói vaʼerãha umi mbaʼerepy rapykuéri (Efes. 2:3).
17 Heta persóna omotenonde rupi umi mbaʼe oipotáva ha chupekuéra ogustáva, ndohechái hekópe porã umi mbaʼerepy (elee 1 Corintios 2:14). Avei ndohechakuaái mbaʼépa iporã ha mbaʼépa ivai (Heb. 5:11-14). Koʼãichagua persóna kon el tiémpo oipota potave umi mbaʼerepy, ha amáske oreko noñekontentái (Ecl. 5:10). Péro oĩ hína peteĩ mbaʼe ikatúva jajapo ani hag̃ua ova ñanderehe umi hénte opensa lája. Por ehémplo, jalee meméramo la Biblia ñanepytyvõta ani hag̃ua jahayhu umi mbaʼerepy (1 Ped. 2:2). Jesús ojepyʼamongeta vaʼekue Jehová arandúre, upéicha rupi omboyke umi tentasión omoĩ vaʼekue chupe Satanás (Mat. 4:8-10). Ani hag̃ua jaju ñamotenonde umi mbaʼerepy, jasegi vaʼerã umi konsého omeʼẽva ñandéve Jehová. Péicha jajapóramo, jahechaukáta jahayhuveha Jesúspe jahayhu rangue umi mbaʼerepy.
Jaiporu porãkena pe jahupytymíva
Embyaty raẽ nde pláta. Ani hag̃ua repyta redeve ne akã meve iporãta rejepokuaáramo reñongatuʼimi nde pláta rejogua mboyve peteĩ mbaʼe. Ñandejára Ñeʼẽ heʼi ikatuha ñaaprende peteĩ mbaʼe iñimportánteva umi tahýigui. Heʼi hesekuéra iñaranduha ombyatýgui ‘hembiʼurã kóga oñemonoʼõ aja’, ani hag̃ua ofalta chupekuéra og̃uahẽ vove ára roʼy (Proverbios 6:6-8; 30:24, 25). Ijetuʼúramo jepe ñambyaty raẽ ñande pláta, jajapóramo upéicha jajeíta heta provlémagui ha ndajaikomoʼãi japaga interés.
Japytákena Jehová rógape pára siémpre
18 Iporã ningo ñapensa mbaʼéichapa jahecha hína pe pláta. Ñañeporandumína: “¿Apensa memépa plátare ha mbaʼépa ikatu ajogua hína? Aipuru jave pláta che rapichágui, ¿ndajapuráipa apaga jey hag̃ua apenságui haʼe noikotevẽmoʼãiha voi? ¿Añemoinportantesevépa che rapichágui chepláta haguérente? ¿Ijetuʼúpa chéve chepojera hag̃ua? ¿Apensápa peteĩ ermáno térã ermána ohayhuveha umi mbaʼerepy Jehovágui ipláta haguérente? ¿Aipotápa che amigorã umi ipláta hetávante ha napenaguasúi umi imboriahúvare?”. Iñimportánte ningo ñañeporandu koʼã mbaʼe pórke jareko la oportunida ijojahaʼỹva ñaimévo Jehová rógape. Péro jasegi hag̃ua upépe ñañatende vaʼerã ani hag̃ua ñandeplatarayhu. ¡Jajapóramo upéicha Jehová núnka nañanderejamoʼãi! (elee Hebreos 13:5).
Óro kuʼi oĩva la Bíbliape
w09 15/4 17 párr 11-13
Jehová rembiapokuére jahechakuaa haʼe iñaranduha
11 Peteĩ mymba hérava damán ningo ñanemboʼe avei heta mbaʼe (jaleemína Proverbios 30:26). Upe mymbaʼi ningo ojogua peteĩ apereʼápe, hetyma mbyky ha inambi apuʼaʼi. Avei ohecha porãiterei. Ha oiko umi itakuáre, okañy pyaʼe hag̃uáme umi mymba ojukasévagui chupe. Umi damán ningo oiko oñondivepa, upéicha oñangareko ojuehe hikuái ha oñombyaku roʼy tiémpope.
12 ¿Mbaʼépa ñanemboʼe pe damán? Primero, upe mymbaʼi nosẽi umi ojukaséva chupe raperãme. Haʼe ningo ohecha porãiterei rupi mombyry guive ohecháma umi omoñuhãsévape chupe ha umi itakua ypy rupínte voi oiko okañy pyaʼe hag̃ua. Upéicha avei ñande jaikuaa porã vaʼerã Ñandejára Ñeʼẽ heʼíva jahechakuaa hag̃ua umi ñuhã Satanás omoĩva. Upévare, apóstol Pablo heʼivaʼekue: ‘Peneakãguapy ha peñeñangarekókena, Satanás pe ijaʼeʼỹva penderehe ojere rupi ku leõ pochýicha oheka mávapepa omokõta’ (1 Ped. 5:8, JMP). Ha Jesús oĩrõ guare ko yvy ape ári, akóinte oñeñangarekovaʼekue ani hag̃ua hoʼa Satanás ñuhãme (Mat. 4:1-11). Upéicha haʼe peteĩ ehémplo iporãva ñandéve g̃uarã.
13 Ñande ñañeñangareko hag̃ua jahejavaʼerã Jehová ñanepytyvõ. Upearã akóinte jastudiavaʼerã la Biblia ha jaha meme rreunionhápe (Luc. 4:4; Heb. 10:24, 25). Avei, umi damán oikoháicha oñondivepa, ñande ñañemoag̃uivaʼerã ermanokuérare ikatu hag̃uáicha ‘ñañomokyreʼỹ’ (Rom. 1:12, BNP). Péicha jajapóramo, ikatúta jaʼe David heʼi haguéicha: ‘Jehová, nde reñangareko cherehe, ne rendápe ag̃uahẽ akañy hag̃ua, nde reime che jerére, nde upe cherenohẽva jejopy vaígui. Ne rendápe ag̃uahẽramo nde chepytyvõ’ (Sal. 18:3 [18:2, NM]).
15-21 DE SEPTIEMBRE
TESÓRO OĨVA ÑANDEJÁRA ÑEʼẼME PROVERBIOS 31
¿Mbaʼépa ñaaprende umi konsého omeʼẽvagui peteĩ sy imembýpe?
Jahejákena ñandegia ñande jerovia
11 Oĩ ningo heta ermáno ha ermána osegíva Jehová konsého oiporavóta jave mávarepa omendáta. ¡Oiméne ovyʼaite Jehová hesevekuéra! Por ehémplo haʼekuéra ojagarra ensério pe konsého heʼíva iporãveha ohaʼarõ omenda hag̃ua, ha ani ojapo upéva imitãiterei reheve (1 Cor. 7:36). Koʼã ermáno ha ermána, ojasegura pe persóna orekópa hína umi kualida Jehová heʼíva oreko vaʼerãha peteĩ ména térã tembireko (Prov. 31:10-13, 26-28; Efes. 5:33; 1 Tim. 5:8). Ha oimérõ peteĩ ndahaʼéiva Testígo ojegusta hesekuéra, koʼã ermáno ha ermána imanduʼa pe konsého heʼívare omenda vaʼerãha peteĩ ‘ñande Ruvicha disípulore’ (elee 1 Corintios 7:39). Haʼekuéra oheja ijerovia ogia chupekuéra, ha oĩ segúro Jehová siémpre okuidataha hesekuéra ovyʼa ha oñeñandu porã hag̃ua (Sal. 55:22).
Jahechákena pe vevída Jehová ohechaháicha
¿Haʼúpa vevída añemoĩ porã hag̃uánte umi ótrondi? Éxodo 23:2 heʼi: “Ani remoirũ umi héntepe”. Koʼápe Jehová heʼi porã vaʼekue umi israelítape ani hag̃ua ojoguase umi ndoadoráivape chupe. Ko konsého ningo ideprovechoiterei umi kristiáno koʼag̃aguápe avei. Jahejáramo ova ñanderehe la hénte opensáva vevídare, mbeguekatúpe ikatu ñamboyke Jehová heʼíva ha ñambyai ñane amista hendive (Rom. 12:2).
¿Haʼúpa vevída ahechauka hag̃ua chembarete ha chepyʼaguasuha? Oĩ lugár ndojehechavairihápe peteĩ persóna pyʼỹi omokõramo térã hoʼu rasáramo pe vevída (1 Ped. 4:3). Péro jahechamína la heʼíva 1 Corintios 16:13: “Siémpreke peñatende porã, pesegi pejerovia mbarete, pendepyʼaguasu ha peñehaʼã penembareteve hag̃ua”. ¿Ikatu piko pe vevída omombarete ha ombopyʼaguasu peteĩ persónape? Ndahaʼeiete katu upéicha, pe persóna hoʼúva vevída ikatu pyaʼeterei nopensaporãvéi ha upéi ni ndopillavéima la ojapóva. Upéicharõ, pe persóna hoʼu rasáva vevída ndohechaukái imbareteha, síno itavyetereiha. Isaías 28:7-pe oñeñeʼẽ peteĩ oho vaímavare hína hoʼu rasa rupi vevída ha upéva káusare ovavapa, oñepysanga ha hoʼa.
Jehová añoite la ikatúva ñanembopyʼaguasu jajapo hag̃ua iporãva. Ha ‘upearã tekotevẽ ñañatende porã ha jasegi jajerovia mbarete’ (Sal. 18:32). Jajapo hag̃ua upéva ñañehaʼã jajei umi pelígrogui ha ñamboyke entéro mbaʼe ikatúva ombyai ñane amista Jehovándi. Oĩrõ guare ko yvy ape ári, Jesús oreko vaʼekue peteĩ amista imbaretéva Jehovándi. Upévare heta hénte orrespeta vaʼekue chupe ohechávo ipyʼaguasuha ha ojedesidieteha ojapo siémpre iporãva.
Jehová ipojera ha noñemohatãi haʼe heʼívape
11 Ikatu avei ñandepojera Jehová ndive. La Biblia heʼi: “Emombaʼe Ñandejárape opa mbaʼe rerekóvape” (Prov. 3:9). Heʼívo ko téxtope “opa mbaʼe” oñeʼẽ hína entéro mbaʼe ikatúvare jaiporu Jehová servísiope, por ehémplo ñane tiémpo, ñane mbaretekue ha ñande pláta. Umi mitã jepe oaprendekuaa mbaʼéichapa ikatu ipojera Ñandejára ndive. Peteĩ túva hérava Jason omombeʼu: “Romeʼẽ jave ore kontrivusión Salón del Rréinope, roheja ore famíliape omoĩ pe pláta káha de kontrivusiónpe. Ojapóvo upéicha, haʼekuéra voi heʼi oñeñandu porãitereiha omeʼẽgui peteĩ mbaʼe Jehovápe”. Taʼyrakuéra imitãite guive omeʼẽrõ ikontrivusión, ndahasymoʼãi osegi hag̃ua ipojera Ñandejára ndive ág̃a okakuaapa vove (Prov. 22:6).
Óro kuʼi oĩva la Bíbliape
Mitãkuñanguéra, peñehaʼãkena pejerovia mbarete
12 Peaprende peñemongetakuaa hag̃ua pende rapichándi. Entéro kristiáno tekotevẽ oaprende upéva. Santiago omeʼẽ vaʼekue peteĩ konsého iporãitereíva. Haʼe heʼi: “Enterovéva oĩ vaʼerã preparádo ohendu hag̃ua, péro ndojapurái vaʼerã oñeʼẽ” hag̃ua (Sant. 1:19). Mitãkuñanguéra, pejapysaka porãrõ ótro oñeʼẽ aja pehechaukáta ‘peñemoĩha pende rapicha lugárpe’ (1 Ped. 3:8). Ha oimérõ napentendeporãi mbaʼépa álgien heʼise térã oñandu, peporandukuaánte vaʼerã chupe ha upéi pepensa porã raẽ peñeʼẽ mboyve (Prov. 15:28). Káda uno oñeporandu vaʼerã: “¿Siértopa la haʼéva ha oporomokyreʼỹtapa? ¿Ahechaukátapa apororrespeta ha chembaʼeporãha?”. Ou porãitereíta ningo peẽme pesegíramo pe ehémplo omoĩva umi ermána ojapysakakuaáva ha oñeʼẽva mborayhúpe (elee Proverbios 31:26). Peñatende porã mbaʼéichapa oñeʼẽ koʼã ermána ha mbaʼépa heʼi hikuái. Amedída ke peñemongetakuaa pende rapichándi, ifasilvéta peẽme pejogueraha porã hag̃ua hendivekuéra.
22-28 DE SEPTIEMBRE
TESÓRO OĨVA ÑANDEJÁRA ÑEʼẼME ECLESIASTÉS 1, 2
Jasegíkena ñamboʼe umi imitãvévape
“Umi mbaʼe emoĩ umi kuimbaʼe iñeʼẽrendúva kárgope”
3 Ñande ningo javyʼa jaservívo Jehovápe ha javaloraiterei umi asignasión jarekóva. Heta oĩ ñande apytépe ohayhuetereíva iñasignasión ha hiʼãnte voi chupe siémpre ojapo la mísma kósa. Péro ñambyasýramo jepe, ñandeeda jave ndaikatuvéima jajapo heta mbaʼe ñanemitãrõ guaréicha (Ecl. 1:4). Sapyʼánte koʼã mbaʼe ijetuʼu Jehová puévlope g̃uarã. Ñane tiémpope, ojepredika arakaʼeve ojejapoʼỹ haguéicha. Avei Jehová organisasión oipuru meme pe teknolohía ikatu hag̃uáicha oñemog̃uahẽ opárupi pe marandu porã. Péro sapyʼánte ijetuʼu upéva umi ijedavévape, pórke tekotevẽ oaprende heta mbaʼe ha ojeadapta (Luc. 5:39). Avei naimbaretevéima hikuái ymave guaréicha (Prov. 20:29). Upéicha rupi iporãiterei umi iñexperiensiavéva ombokatupyrýramo umi imitãvévape, ikatu hag̃uáicha orekove rresponsavilida Jehová organisasiónpe (elee Salmo 71:18).
4 Añetehápe ningo heta vése ndahaʼéi la ifasilpáva umi orekóvape heta priviléhio omeʼẽve hag̃ua rresponsavilida umi imitãmiévape. Umi iñexperiensiavéva ikatu ombyasy operdéta haguére peteĩ asignasión omombaʼetereíva, térã omeʼẽta rupi peteĩ priviléhio ogustáva chupekuéra. Avei ikatu ojepyʼapy openságui umi imitãvéva ndaikatumoʼãiha ojapo porã umi asignasión. Térã ikatu voi opensa naitiempoiha okapasita hag̃ua ótrope. ¿Ha mbaʼépa ikatu jaʼe umi imitãvévare? Tekotevẽ ipasiénsia hikuái noñemeʼẽiramo chupekuéra hetave rresponsavilida.
Óro kuʼi oĩva la Bíbliape
Mitãrusukuéra, pende Apohare oipota pevyʼa
14 Salomón ningo haʼe vaʼekue peteĩva umi kuimbaʼe irrikovéva ha omanda guasuvéva oiko vaʼekue ko yvy ape ári. Haʼe okomprovase kuri peteĩ mbaʼe. Salomón heʼi: “Koʼág̃a aiko porã ha ajedivertíta, péicha aikuaáta mbaʼépepa ideprovécho upéva” (Ecl. 2:1-10). Salomón ojapo umi óga iporãitereíva ha odiseña umi hardín ha párke neporãmba jepéva. Añetehápe ojapo la oñantoháva chupe. ¿Oñekontentápa la ojapóvare? ¿Ombovyʼápa chupe? Haʼe ohecha entéro mbaʼe ojapóva ha heʼi: “Ahechakuaa opa mbaʼe vyroreiha”. Ha heʼi avei: “Ndaipóri mbaʼeve ovalemíva ko yvy ape ári” (Ecl. 2:11). ¿Rehechakuaápa siertoha la oaprendéva Salomón?.
29 DE SEPTIEMBRE AL 5 DE OCTUBRE
TESÓRO OĨVA ÑANDEJÁRA ÑEʼẼME ECLESIASTÉS 3, 4
Pemombaretékena pene matrimónio
Pehejákena Jehová tapenepytyvõ pene matrimóniope
14 Añetehápe ningo la Biblia heʼi oĩha “ára oñekirirĩ hag̃ua” (Ecl. 3:7). Péro upéva ndeʼiséi umi omendáva noñeʼẽvéi vaʼerãha ojupe ipochy jave. Peteĩ ermána Alemaniagua heʼi: “Oĩ jave provléma ha ñañemokirirĩnterõ, ikatu ñamoñeñandu vaive ñane rembiayhúpe. Upéicha avei, ivaíta ndajajokóiramo ñande juru ha jaʼepaite jaʼeséva guive ñanenervióso haguérente. Peichaháguinte ikatu hína jaʼe ñapensaʼỹre peteĩ mbaʼe olastimátava ñane rembiayhúpe ha ñambyaivéta ñane situasión”. Umi matrimónio nosolusionamoʼãi iprovléma ojoguerosapukáiramo térã noñeʼẽvéiramo ojupe. Upéva rangue, oñehaʼã vaʼerã oñontendeve hikuái ha ani oiko ojodiskutipa rei. Upéichamante ikatúta omombareteve imatrimónio.
15 Ména ha tembireko ojoayhuvéta oñemotiémporamo oñemongeta hag̃ua umi mbaʼe opensa ha oñandúvare. Péro imanduʼa vaʼerã hikuái iñimportanteha oñatende mbaʼépa heʼíta ha mbaʼéichapa heʼíta. Upévare, ñañehaʼãkena ñañeʼẽ torýpe ha mborayhúpe ñambohováiramo jepe umi provléma ijetuʼúva. Upéicha ndahasymoʼãi ñane rembiayhúpe ñanerendu porã hag̃ua (elee Colosenses 4:6). Jaʼe vaʼerã ñane ména térã ñane rembirekópe “umi mbaʼe iporãva ha oporomombaretétava oñekotevẽ jave” (Efes. 4:29).
Aníkena ogue pe mborayhu oúva Jehovágui
12 ¿Mbaʼéichapa umi omendáva ikatu osegi Áquila ha Priscila ehémplo? Ikatu pepensa umi mbaʼe pejapo vaʼerãre káda uno. ¿Ndaikatuichéne piko pejapo umi mbaʼe oñondive, pejapo rangue peneañónte? Por ehémplo Áquila ha Priscila opredika vaʼekue oñondive. Ha peẽ, ¿pejepokuaápa pepredika jepi oñondive? Áquila ha Priscila ombaʼapo vaʼekue avei oñondive. Siérto, ikatu káda uno pembaʼapo diferénte lugárpe péro oĩ avei umi tembiapo ogapypegua. ¿Ndaikatuichénepa umíva pejapo oñondive? (Ecl. 4:9). Peñopytyvõramo pehecháta igustoha pembaʼapo oñondive ha ikatúta peñemongeta porã. Por ehémplo Robert ha Linda ojapóma mas de 50 áño omenda hague. Robert heʼi: “Legálmente saʼi oretiémpo, péro chembovyʼaiterei rojapo jave álgo oñondive ogapýpe. Por ehémplo che ajohéi jave umi tembiporu che rembireko ou omokã, ha asẽ jave amopotĩ pe korapy haʼe avei chemoirũ. Koʼã mbaʼe rojapóva oñondive oreunive ha péicha rojoayhuve”.
13 Péro pereko vaʼerã enkuénta peĩ haguérente oñondive ndeʼiseiha peñemoag̃uivetamaha ojuehe. Peteĩ tembireko Brasilpegua heʼi: “Koʼág̃arupi oĩ hetaiterei mbaʼe ejapo hag̃ua, upéicha rupi ikatu epensa rehasaha tiémpo ne ména térã ne rembirekóndi peiko haguérente el mísmo ógape. Upévare ahechakuaa ndahaʼeiha aĩnte vaʼerã che ména oĩháme, síno aaprovecha porã vaʼerãha pe tiémpo ahasáva hendive ha ani ajapo jey ótra kósa”. Por ehémplo Bruno ha hembireko Tays omombeʼu la ojapóva ohasa jave tiémpo oñondive. Bruno heʼi: “Roaprovecha porã hag̃ua pe tiémpo rohasáva oñondive, romboyke voi ore selulár”.
14 ¿Ha mbaʼépa oikóta oimérõ ndaigústoi peẽme pehasa tiémpo oñondive? Ikatu oime napendegustái la mísma kósa, térã ensegída voi perrenegáma ojuehe. ¿Mbaʼépa ikatu pejapo oimérõ péicha la pende káso? Ñanemanduʼami jeýna pe tata ñañeʼẽ vaʼekuére. Oñepyrũrõ guare ojepota michĩmínte kuri hendy, péro amedída ke ñamoĩ la jepeʼa tuichavéma hendy. Péicha avei ñepyrũrã ikatu peñehaʼã pehasa tiémpo oñondive michĩ mimi jepe káda día. Upearã ikatu peheka pejapo álgo mokõivévape pendegustáva ha ndokreamoʼãiva provléma (Sant. 3:18). Peñepyrũ jeýrõ mbeguekatúpe ha michĩ mimi, kon el tiémpo pejoayhuve jeýta.
Aníkena ogue pe mborayhu oúva Jehovágui
3 Ani hag̃ua opa pe mborayhu oúva Jehovágui, pe ména ha tembireko oñehaʼã vaʼerã oreko peteĩ amista imbaretéva Jehovándi. ¿Mbaʼérepa upéva iñimportánte? Pórke mokõivéva omombaʼéramo iñamista Jehovándi oñehaʼãta kyreʼỹme osegi ikonsého. Upéva oipytyvõta chupekuéra ani hag̃ua iprovléma ha oñepresentárõ katu osolusionakuaa hag̃ua hikuái (elee Eclesiastés 4:12). Avei umi Jehová amígo oñehaʼã ojogua chupe, por ehémplo iñamávle, ipasiénsia ha oporoperdonakuaa (Efes. 4:32–5:1). Peteĩ matrimónio oñehaʼãramo ohechauka koʼã kualida porã, ifasilvéta amás día ojoayhuve hag̃ua hikuái. Peteĩ ermána hérava Lena ojapóma mas de 25 áño omenda hague, ha haʼe heʼi voi: “Ifásil jahayhu ha jarrespeta peteĩ persóna ohayhúvape Jehovápe”.
Óro kuʼi oĩva la Bíbliape
¡Ikatu jaiko pára siémpre!
7 Jehová ningo ñandekreárõ guare omeʼẽ vaʼekue ñandéve pe deséo jaikovese hag̃ua pára siémpre (Ecl. 3:11). Upévare ningo pe ñemano ñane enemigoite voi (1 Cor. 15:26). Ñapensamína ko mbaʼére: Ñamoĩna chupe ñanderasyeteha, ¿ñandépa upéicha jave ñañentregántema ha ndajajapói mbaʼevete? Nahániri. Upéva rangue pyaʼe voi jaháta doktórpe ha jaʼúta umi pohã omeʼẽva ñandéve ikatu hag̃uáicha jakuera jey. Ñande ningo jajapo voi opa ikatúva ani hag̃ua ñamano. Ha omano jave ñandehegui peteĩ jahayhúva katu ñañeñandu vaieterei ha upéva ndohasái voi sapyʼaitépe (Juan 11:32, 33). Jaikuaa porãiterei ningo ñande Kreadór ñanderayhuetereiha, ha upévare haʼe nomeʼẽmoʼãi kuri ñandéve pe deséo ha kapasida jaiko hag̃ua pára siémpre, ndahaʼéirire upéva la ipropósito ñandéve g̃uarã. Péro jareko hína hetave rrasón jaguerovia hag̃ua ikatuha jaikove pára siémpre. Jahechamína umi mbaʼe Jehová ojapóma vaʼekue ha ojapóva hína koʼág̃a, ohechaukáva haʼe nokambiaiha pe ipropósito oguereko vaʼekue iñepyrũme.
6-12 DE OCTUBRE
TESÓRO OĨVA ÑANDEJÁRA ÑEʼẼME ECLESIASTÉS 5, 6
¿Mbaʼéichapa jahechauka jarrespetaha ñande pyʼaite guive Ñandejárape?
Jahechaukákena ñamombaʼeha Jehovápe ñande reko potĩ rupi
17 La Biblia ohechauka ñande reko potĩ vaʼerãha ñamombaʼeguasu jave Jehovápe. Eclesiastés 5:1-pe, [ÑÑB] heʼi voi: ‘Nde reho jave Ñandejára rógape, eñangareko porãke’ ndejehe. Moisés ha Josué ohechaukavaʼekue omombaʼeha Ñandejárape oipeʼávo isandália opyrũ mboyve yvy marangatúpe (Éxo. 3:5; Jos. 5:15). Umi saserdóte katu oiporuvaʼerã kasõ mbyky línogui ojejapóva ani hag̃ua ojehechapa chupekuéra (Éxo. 28:42, 43). Péicha ndoikomoʼãi mbaʼeve omotĩtava chupekuéra ombaʼapo jave altárpe. Avei umi saserdóte rogayguakuéra heko potĩ vaʼerã, ndojapoivaʼerã mbaʼeve omotĩtava ifamiliakuérape.
18 Upéicharõ, ñamombaʼeguasu hag̃ua Jehovápe, tekotevẽ jarrespeta chupe ha ñande reko potĩ. Ha jarrespetavaʼerã ningo ñande rapichakuérape, jaipotáramo haʼekuéra ñanderrespeta avei. Jehová ningo ohecha oĩva ñande pyʼapýpe, upévare ndahaʼeivaʼerã japororrespeta guaʼúnteva (1 Sam. 16:7; Pro. 21:2). Ñañehaʼãramo ñamombaʼe ñande rapichakuérape, jatrata porãvéta chupekuéra ha ñandepyʼaguapýta. Enterove ohechakuaáta ñane ñeʼẽ ha jajapóvare ñamombaʼeha Jehovápe ha ñande rapichakuérape. Jaiko ha ñañemonde lájare ikatu jahechauka ñande reko potĩha. Ha jajapoha avei apóstol Pablo heʼíva: ‘Roñehaʼã opaite mbaʼépe ani hag̃ua rojapo mbaʼeve oporomoñepysangavaʼerã, ani hag̃ua oñeñeʼẽ vai ore rembiapo rehe. Upéva rangue, opa mbaʼépe rohechauka Ñandejára rembiguaiha ore’ (2 Cor. 6:3, 4, JMP). ‘Opavave ohecháta iporãha Ñandejára ñanemboʼéva’ (Tito 2:10, BNP).
Ñahesaʼỹijóramo la Biblia ñañemboʼe porãvéta Jehovápe
21 Jesús avei ojeroviavaʼekue Jehováre ha omombaʼe chupe oñemboʼe jave. Pór ehémplo, omoingove jey mboyve Lázarope, ‘Jesús ojesaupi yvága rehe ha heʼi: “Che Ru, aagradese ndéve cherendu haguére. Che niko aikuaa tapiaite cherenduha”’ (Juan 11:41, 42, BNP). Ha ñandépa jajerovia avei péicha Jehováre ha ñamombaʼe chupe ñañemboʼe jave? Ñahesaʼỹijóramo pe padrenuéstro, jahechakuaáta Jesúspe g̃uarã iñimportanteveha oñemopotĩ ha oñemombaʼeguasu Jehová réra, ou pe Irréino ha ojejapo hembipota (Mat. 6:9, 10). Koʼág̃a ñapensami mbaʼéichapa ñande ñañemboʼe jepi. Ojekuaápa ñane ñemboʼére iñimportanteveha ñandéve g̃uarã Ñandejára Rréino, hembipota ha jaipotaha oñemopotĩ héra?
“Oimérõ rejapo peteĩ promésa, ekumplíkena”
12 Jajevautisárõ guare, ñapromete kuri Jehovápe jaservitaha chupe ñande pyʼaite guive, ha jajapotaha opa ikatúva ñaneñeʼẽrendu hag̃ua chupe. Péro añetehápe jajevautisávo ñañepyrũ ramo hína. Upévare ohasávo pe tiémpo iporã ñañeporandu: “¿Añemoag̃uivépa Jehováre ajevautisa rire? ¿Asegípa aservi chupe che pyʼaite guive? (Col. 3:23). ¿Añemboʼe memépa? ¿Aleépa la Biblia káda día? ¿Añehaʼãmbaitépa ani hag̃ua afalta rreunionhápe? ¿Asẽ memépa apredika? ¿Chekyreʼỹpa hína ajapo hag̃ua koʼã mbaʼe?”. Apóstol Pedro heʼi vaʼekue ñañatende hag̃ua pono jaju ñanekangy espirituálmente. Upévare iporãta ñañehaʼã jajeroviave, jaikuaave Ñandejára Ñeʼẽ, ñaaguanta ha ñamombaʼeguasu Jehovápe (elee 2 Pedro 1:5-8).
Óro kuʼi oĩva la Bíbliape
Oñeporandúva jepi
Eclesiastés 5:8-pe oñeñeʼẽ peteĩ governánte otrata vaívare umi imboriahúvape ha ndojapóivare chupekuéra hustísia. Upe governánte imanduʼa vaʼerã ikatuha oĩ peteĩ ikárgo yvatevéva, térã ótro omanda guasuvéva chugui pe goviérnope okontroláva hína chupe. Ha ikatu voi oĩ umi ikárgo yvateve jeýva umi ótrogui. Péro ñambyasýramo jepe, umi goviérno umánope, enterove umi omandáva ikatu hína ikorrúpto, ha umi hénte oiko vaʼerã osufri upéva káusare.
Péro haʼetéramo jepe ndaipóriva esperánsa, tuicha ñanembopyʼaguapy jaikuaávo Jehová ‘okontrolaha hína umi ikárgo yvatevévape’ jepe oĩva umi goviérnope. Ñande ikatu jajerure Ñandejárape tañanepytyvõ ha ñamoĩ ipópe umi mbaʼe ñandepyʼapýva (Sal. 55:22; Filip. 4:6, 7). Ñande ningo jaikuaa ‘Jehová omaña porãha hína opa mbaʼe oikóvare ko yvy ape ári, ohechauka hag̃ua ipodér umi ojeroviávape hese ikorasõ mbytete guive’ (2 Crón. 16:9).
Upéicharõ Eclesiastés 5:8 ñanemomanduʼa mbaʼe situasiónpepa oĩ umi goviérno: Siémpre oĩha peteĩ ikárgo yvatevéva. Péro iñimportanteveha, ko versíkulo ñanepytyvõ ñanemanduʼa hag̃ua Jehová haʼeha pe Governánte Tuichavéva ha Ijojahaʼỹva. Koʼág̃a haʼe ogoverna hína Itaʼýra Jesucristo rupive, haʼéva pe Rréi ogovernáva hína pe Rréinope. Pe Todopoderóso ohecháva opa mbaʼe ihustoiterei ha Itaʼýra upéichante avei.
13-19 DE OCTUBRE
TESÓRO OĨVA ÑANDEJÁRA ÑEʼẼME ECLESIASTÉS 7, 8
“Reho omanovahápe”
Mbaʼépa jajapovaʼerã javyʼa hag̃ua?
8 Ha jaikoitereíramo vyʼarã rapykuéri ndaikatumoʼãi ñamotenonde umi mbaʼe iñimportantevéva. Ñanemanduʼavaʼerã mbykyminteha ñande rekove, ha enterove ikatuha ñanderasy ha jajejopy vai. Upévare, Salomón heʼivaʼekue ñaimerangue vyʼahápe iporãveha jaha omanovahápe (koʼýte oiméramo oservíraʼe Jehovápe) (jaleemína Eclesiastés 7:2, 4). Mbaʼérepa upéva? Ñahendúvo pe diskúrso ojejapóva upépe, jajepyʼamongetavaʼerã mbaʼéichapa pe ermáno oservirakaʼe Jehovápe omano meve. Upéva ñanepytyvõta jahecha hag̃ua mbaʼépa jajapoñaína ñande rekovépe. Ikatu jahecha mbaʼéichapa jaiporu porãvéta ñande rekove (Eclesiastés 12:1).
Ñaipytyvõkena ñane ermanokuérape ogueropuʼaka hag̃ua umi situasión ijetuʼúva
15 Ojapo unos kuánto áño William rembireko omano hague, haʼe omombeʼu: “Amombaʼeterei oĩ jave omombeʼúva chéve umi mbaʼe porã ojapo vaʼekue che rembireko. Upéva ohechauka chéve che rembirekópe ojehayhu ha ojerrespeta hague. Tuichaiterei ningo chepytyvõ péicha imanduʼa jave hese hikuái. La heʼíva hikuái tuichaiterei chekonsola, pórke che ahayhueterei vaʼekue che rembirekópe ha haʼe iñimportanteterei chéve g̃uarã”. Peteĩ viúda hérava Bianca heʼi: “Chekonsolaiterei ningo oĩ jave oñemboʼéva chendive ha olee chéve peteĩ térã mokõi téxto bíblico. Avei chepytyvõ oñeñeʼẽramo che ménare ha cherendúramo hikuái añeʼẽ jave hese”.
“Penerasẽ umi hasẽva ndive”
16 Ñane ñemboʼe ikatu avei okonsola umi ermáno oñembyasývape. Ikatu ñañemboʼe hesekuéra térã hendivekuéra. Péro jaikuaaháicha, sapyʼánte ijetuʼu ñañemboʼe hendivekuéra umícha jave, pórke ikatu jakyhyje ñanerasẽrõ g̃uarã. Ñañemboʼéramo hendivekuéra ñande pyʼaite guive ikatu hína tuichaiterei ñakonsola chupekuéra. Dalene heʼi: “Sapyʼánte umi ermána ou jave chekonsola, ajerure chupekuéra ndaikatuichénepa oñemboʼemi. Oñepyrũvo oñemboʼe hikuái ndaikatúi oñeʼẽ porã, péro ensegidamínte itrankilavéma ha pe orasión opokoiterei cherehe. Haʼekuéra ohechauka ojeroviaitereiha Jehováre, añetehápe oñeinteresaha cherehe ha cherayhuha. Koʼã mbaʼe chepytyvõ ajeroviave hag̃ua”.
“Penerasẽ umi hasẽva ndive”
17 Káda uno ñanediferénte, upévare ndajaikuaái mboy tiémporepa peteĩ persóna osegíta oñembyasy. Ñepyrũrã heta amígo ha pariénte oĩ pe osufrívandi ha okonsola chupe. Péro upe rire enterovéva hembiapopa jeýma vaʼerã, ha hasyvéma oĩ hag̃ua hikuái pe oñembyasývandi. Upéicharõ jepe, oikotevẽ gueteri oñekonsola chupe. Proverbios 17:17 heʼi: “Peteĩ amígo verdadéro nderayhúta tódo el tiémpo, haʼete voi ne ermáno oĩva nde ykére rehasa asy jave” (TNM). Añetehápe iporã ñakonsola pe persóna osufrívape oikotevẽha peve (elee 1 Tesalonicenses 3:7).
18 Ñanemanduʼa vaʼerã pe persóna omanóva chugui peteĩ ohayhúva, ikatuha peichaháguinte oñeñandu vaieterei jey. Upéva ikatu oiko pórke og̃uahẽ peteĩ fécha espesiál, ohendu peteĩ músika, ohecha peteĩ fóto, ohetũ peteĩ mbaʼe ryakuã, ha umícha. Upéicha avei pe viúdo térã viúdape ikatu ijetuʼueterei ojapo jave primera ves peteĩ mbaʼe haʼeño, por ehémplo oho asambleahápe térã Konmemorasionhápe. Peteĩ ermáno heʼi: “Apensa kuri og̃uahẽvo che aniversário de kasamiénto añeñandu vaietereitaha, ha upeichaite oiko. Péro unos kuánto ermáno oprepara peteĩ atyʼi oĩtahápe che amigokuéra ani hag̃ua ahasa upe día cheaño”.
19 Jahechaháicha, umi oñembyasýva oikotevẽ konsuélo ha oñemokyreʼỹ chupekuéra umi fécha espesiálpe. Péro ndahaʼéi upe moméntopente la oikotevẽva hikuái. Junia omombeʼu: “Ndahaʼéiramo jepe peteĩ fécha espesiál, ideprovechoitereínte avei oĩrõ ñandeapojáva ha ohasáva tiémpo ñanendive. Koʼã moménto ningo ñanemokyreʼỹ ha ñanekonsolaiterei”. Jaikuaaháicha, ndaikatúi jajapo mbaʼeve anivéma hag̃ua ñande rapicha osufri térã ponove ojopy chupe pe techagaʼu. Upéicharõ jepe, lomímonte ñakonsolakuaa chupe heta hendáicha (1 Juan 3:18). Gaby heʼi: “Aagradeseterei Jehovápe umi ansiáno chepytyvõ rupi mborayhúpe, ha ndacherejái haguére cheaño ijetuʼuve jave chendive. Upéicha rupi, añandu Jehová cheañuaha tódo el tiémpo mborayhúpe”.
Óro kuʼi oĩva la Bíbliape
“Entéro umi hénte oikuaáta peẽ haʼeha che disípulo”
18 Sapyʼánte ñañandu ñañeʼẽmante vaʼerãha pe ermáno ñaneofende vaʼekuéndi. Péro jajapo mboyve upéva iporãta ñañeporandumi: “¿Chépa antende porã la oiko vaʼekue?” (Prov. 18:13). “¿Noiméipa pe ermáno ndopilláinte raʼe la ojapo vaʼekue?” (Ecl. 7:20). “¿Chépa sapyʼánte naofendéi avei péicha ótrope?” (Ecl. 7:21, 22). “Ha añeʼẽramo pe ermánondi, ¿serápa la ndaikomoʼãi ambotuichave rei hína la provléma?” (elee Proverbios 26:20). Jajepyʼamongetáramo koʼã porandúre, ikatu hína jahechakuaa iporãvetaha ñambohasa reínte la oiko vaʼekue ha péicha jahechauka japorohayhuha.
20-26 DE OCTUBRE
TESÓRO OĨVA ÑANDEJÁRA ÑEʼẼME ECLESIASTÉS 9, 10
Mbaʼéichapa jahecha vaʼerã umi provléma
Aníkena ‘ñandepochy Jehová ndive’
20 Ehechakuaákena mávapa oreko la kúlpa. Ikatu ñande káusare voi ñaneprovléma hína. Oiméramo upéicha, ñarrekonose vaʼerã upéva (Gál. 6:7). Ñandevyroitereítama jakulpáramo Ñandejárape. ¿Mbaʼérepa? Ñamoĩmína peteĩ ehémplo. Peteĩ áuto ojefavrika ikatu hag̃uáicha hatã oiko. Ñamoĩ chupe pe omaneháva ohoha hatãiterei, ha og̃uahẽvo peteĩ kúrvape ndaikatuvéima ojapo mbaʼeve ha ojevolka. ¿Jakulpátapa pe favrikántepe oiko haguére pe aksidénte? Nahániri, pe omaneháva oreko la kúlpa. Péicha avei Jehová omeʼẽ ñandéve liverta jadesidi hag̃ua mbaʼépa jajapóta, péro avei omeʼẽ heta konsého ñanepytyvõtava jadesidi porã hag̃ua. Ajépa ndaikatúi jakulpa ñande Apoharépe jajavy haguére.
21 Añetehápe ningo naentéroi umi provléma jahupyty jajavy rupi térã jajapógui mbaʼe vai. Heta vése jahasa asy oikógui “umi mbaʼe ñahaʼarõʼỹva” (Ecl. 9:11, NM). Péro ndovaléi ñanderesarái Satanás káusare oikoha heta mbaʼe vai (1 Juan 5:19; Rev. 12:9). Haʼe hína ñane enemígo, ndahaʼéi Jehová (1 Ped. 5:8).
Jehová ohayhu umi isiérvo iñumíldevape
10 Ñaneumílderamo ikatúta avei jagueropuʼaka umi situasión ijetuʼúva. Ñande ningo sapyʼánte ikatu hína jahecha térã jahasa peteĩ situasión ñandéve g̃uarã iñinhústova. Rréi Salomón heʼi vaʼekue: “Che ahecha umi siérvo oikoha kavaju ári, ha umi governánte iñimportánteva katu oiko yvýrupi oikoháicha umi esklávo” (Ecl. 10:7). Sapyʼánte noñemombaʼéi umi ikatupyrývape, ha sapyʼánte katu umi ndaikatupyrýivape la oñemombaʼe. Upévare Salomón orrekonose iporãveha jaaseptánte umi mbaʼe oikóva, jaiko rangue jajesarekoiterei umi mbaʼe vaíre ha japyta ñandepochy (Ecl. 6:9). Ñaneumílderamo ifasilvéta jaaseptánte hag̃ua umi mbaʼe oikóva ha nañandegustáiva.
Jaiporavo porãpa umi vyʼarã?
ÑANDEJÁRA Ñeʼẽme ojehechauka heta hendápe Jehová ndoipotaiha jaikovénte, síno oipotaha enterovéva jaiko vyʼápe. Pór ehémplo, Salmo 104:14, 15 heʼi: “Nde remoheñói [...] yvy arigua rembiʼurã voi. Ha víno ombopyʼarory kuimbaʼe ha kuñanguérape, pe aséite ombovera yvy arigua rova, ha pán rupi remombarete chupekuéra” (ÑÑB). Ñandejára ñanderayhuetéva omoheñói ñandéve g̃uarã umi kóga ha upéicha jahupyty semílla, aséite ha víno. Péro pe víno ndahaʼéi jaʼu hag̃uánte, síno avei “ombopyʼarory [hag̃ua] kuimbaʼe ha kuñanguérape” (Ecl. 9:7; 10:19). Ojekuaa porã Jehová oipotaitereiha yvyporakuéra ovyʼa ha oiko ‘pyʼarorýpe’ (Hech. 14:16, 17, NM).
2 Upéicharõ, Ñandejára rembiguaikuéra noñeñanduvairivaʼerã oiporu haguére sapyʼapyʼa itiémpo ojedivertimi hag̃ua. Pór ehémplo, oĩ heta tapicha ‘omañáva umi guyráre’ térã ‘umi líriore oĩva ñúre’, ha upéva ombopyʼarory chupekuéra ha oaprende hetave mbaʼe (Mat. 6:26, 28, NM; Sal. 8:3, 4). Añetehápe, ‘Ñandejára omeʼẽ ñandéve’ hetaiterei mbaʼe ikatu hag̃uáicha javyʼa ha ñaneresãi (Ecl. 3:12, 13). Avei pe tiémpo hembýva ñandéve jaiporu hag̃ua umi vyʼarãme ou Jehovágui, upévare jajapovaʼerã opa mbaʼe haʼe oipotaháicha.
Óro kuʼi oĩva la Bíbliape
¿Mbaʼépa oiko ñandehegui ñamano rire?
1. ¿Mbaʼépa oiko umi omano vaʼekuégui?
Jesús heʼi vaʼekue peteĩ persóna omanóva ojoguaha álgien oketévape. ¿Mbaʼérepa ojapo vaʼekue upe komparasión? Peteĩ persóna oketéva ningo ni noñandúi la oikóva ijerére. Upéicha avei peteĩ omanóva noñandúi mbaʼevete ni ndosufríri. Katuete pe persóna omano vaʼekue ohayhueterei kuri ihénte ha iñamigokuérape, péro omano rire noñanduvéima mbaʼevete. La Biblia heʼi voi: “Umi omanómava ndoikuaavéima mbaʼevete asy” (elee Eclesiastés 9:5).
27 DE OCTUBRE AL 2 DE NOVIEMBRE
TESÓRO OĨVA ÑANDEJÁRA ÑEʼẼME ECLESIASTÉS 11, 12
Ñañehaʼã ñaneresãi ha jadisfruta
Peipuru pe kreasión pemboʼe hag̃ua pene famíliape
16 Jehová kreasión ningo oipytyvõkuaa entéro famíliape ojediverti ha oĩ hag̃ua trankílo, ha upéva ikatu ounive chupekuéra. La Biblia heʼi voi oĩha “tiémpo japuka” ha “tiémpo japopo” hag̃ua (Ecl. 3:1, 4, nóta). Jehová ningo ojapo vaʼekue umi lugár iporãitereíva ikatuhápe jajapo umi mbaʼe ñanembovyʼáva. Heta famíliape ogustaiterei ohasa tiémpo oñondive umi kámpore, umi arrójore téra umi sérrore. Oĩ mitã ovyʼaitereíva ikatu jave ohuga umi plásare, ohecha umi animál térã oyta umi rríope. Jaʼe porãsérõ g̃uarã, oĩ hetaiterei oportunida jadisfruta hag̃ua pe naturalésa ha entéro mbaʼe Jehová ojapo vaʼekuégui.
Ñamombaʼékena ñande rekove, pe rregálo porãite oúva Ñandejáragui
6 La Biblia ndahaʼéi peteĩ lívro oñeʼẽva mbaʼéichapa jakuida vaʼerã ñande salúre térã mbaʼéichapa jakaru vaʼerã, péro si ohechauka ñandéve mbaʼépa Jehová opensa koʼã mbaʼére. Haʼe heʼi voi ñandéve: “Ejehekýi umi mbaʼe ikatúvagui ndeperhudika”, térã umi mbaʼe ikatúvagui ñanembohasy (Ecl. 11:10). La Biblia heʼi porã voi ñandéve ndovaleiha jakaru rasa ni jaʼu rasa vevída, pórke koʼãva ñandeperhudika ha oapeligra voi ñande rekove (Prov. 23:20). Jehová ningo oipota ñande jajejokokuaa koʼýte jakaru térã jaʼu jave vevída (1 Cor. 6:12; 9:25).
7 Ñande jaipuru porãramo ñane akã ikatúta jadesidi porã ha upéicha umi mbaʼe jadesidíva rupi jahechaukáta ñamombaʼetereiha ñande rekove, pe rregálo oúva Ñandejáragui (Sal. 119:99, 100; elee Proverbios 2:11). Ha upéva ikatúta jahechauka jadesidíta jave mbaʼéichapa ñañalimentáta. Por ehémplo ñandéve ikatu ñandegusta peteĩ tembiʼu, péro jaikuaa upéva ñanembohasytaha. Upéicha rupi ñande ndajaʼúinte pe tembiʼu. Avei ñande jahechauka jaipuru porãha ñane akã jake porãramo, jajapóramo ehersísio, ñanepotĩramo ha avei ñamopotĩramo ñande róga.
Jajapókena Ñandejára Ñeʼẽ heʼíva
2 Ñande jaservíva Jehovápe javyʼa heta mbaʼére. Péro la ñanembovyʼavéva haʼe hína jalee meme Ñandejára Ñeʼẽ ha ñañehaʼã jajapo umi mbaʼe ñaaprendéva (elee Santiago 1:22-25).
3 Tuichaiterei ideprovécho ñandéve ‘jajapo Ñandejára ñeʼẽ heʼíva’. Por ehémplo, jasegíramo umi konsého oĩva Ñandejára Ñeʼẽme ñambovyʼa Jehovápe ha upéva ñanembovyʼa ñandéve avei (Ecl. 12:13). Jajapóramo la Biblia heʼíva, jajogueraha porãve ñande rogayguándi ha umi ermanokuérandi. Katuete nde kásope rehecháma upéva siertoha. Avei jajei umi provléma orekóvagui umi hénte naiñeʼẽrendúiva Jehovápe. Siertoite la heʼi vaʼekue rréi David peteĩ purahéipe. Haʼe oñeʼẽ vaʼekue Jehová léi ha mandamientokuérare ha upéi heʼi: “Umi ojapóva nde léi heʼíva ohupytýta hetaiterei mbaʼe porã” (Sal. 19:7-11).
Óro kuʼi oĩva la Bíbliape
Jehová ohayhu umi oaguanta ha osegívape opredika
16 Nañapensái vaʼerã japredika reiha, haʼetéramo jepe avave nañanerenduséiva (elee Eclesiastés 11:6). Ani ñanderesarái umi persóna ohechaha la jajapóva. Haʼekuéra oñemeʼẽ enkuénta ñañemonde porãha, ñandeedukádo ha siémpre ñanderoryha. Kon el tiémpo, umi opensa vaíva ñanderehe jepe ikatu okambia ohechávo ñanekondúkta porãha. Upéva ohechakuaa Sergio ha Olinda, ñañeʼẽ hague párrafo 1-pe.
17 Sergio omombeʼu: “Peteĩ tiempoʼimi roju kuri orerasy ha ndaikatuvéi roho pe plásape. Upéi roñepyrũ jey roho ha umi hénte oporandu oréve: ‘¿Mbaʼéiko oiko raʼe pendehegui? Pejechagaʼu koʼárupi’”. Olinda katu opukavy ha heʼi: “Umi chofér ohasakuévo oresaluda, ha oĩ avei ijapytepekuéra osapukáiva oréve: ‘Pendeguapoterei’. Hiʼarive ojerure oréve rrevísta”. Peteĩ vuéltape, oiko peteĩ mbaʼe osorprendéva Sergio ha Olíndape. Peteĩ kuimbaʼe oñemboja pe karríto ypýpe orregala hag̃ua chupekuéra peteĩ rrámo yvoty, ha oagradese hag̃ua opa mbaʼe ojapóvare hikuái.
18 La Biblia heʼi: “Ani repytuʼu”. Upévare, esegíkena epredika pe mensáhe oñeʼẽva Ñandejára Rréinore. Rejapóramo upéva, reipytyvõta ojepredika hag̃ua “opa tetãrupi” (Mat. 24:14). Ha iñimportanteveha, reñeñandu porãta reikuaágui péicha rembovyʼaha Jehovápe. Haʼe ohayhueterei entéro umi osegívape oprodusi iservísiope, “oaguantáramo jepe heta mbaʼe ijetuʼúva”.