Mbaʼéichapa ojegrava raʼe Jesús rembiasakue

Ñande testígo de Jehová ningo ñahaʼarõitereíma kuri osẽ ko áñope pe série Jesús rembiasakue Párte 1. Hetaiterei persónama ohecha ko dráma, kóva haʼe pe primera párte umi 18 párte orekótavagui. ¿Mbaʼéichapa ojegrava hína ko série? ¿Ha mbaʼéichapa ne kontrivusión oipytyvõ osẽ porã hag̃ua ko dráma?

Ojekuida porã umi oaktuávare ha umi ótro ermánore

Pe sukursál de Australásiape ojegrava haimete entéro umi párte ko seriepegua, ha káda eséna ojegraváta jave oĩ upépe éntre 50 ha 80 persóna.a Ha entéro umi ombaʼapóvape ojeservi tembiʼu, séna ha algúna ótra kósa ojepyʼajoko hag̃ua. Voi reheve oñeplaneapáma umi tembiʼu oñemeʼẽtava chupekuéra. Esther, peteĩ ermána ombaʼapóva pe Departaménto de Servísio de Aliméntope, heʼi: “Siémpre roñehaʼã rokonsegi umi prodúkto iporãvéva ha ndahepýiva avei, upévare rojogua diferénte lugárgui”. Haʼe omombeʼuve: “Avei roreko enkuénta mboy persónapa oĩta ha asegún upéva ojeahusta umi rreséta, ani hag̃ua oñehundi rei umi tembiʼu”. Ojekalkula ojegastaha 4 dólar rupi pe tembiʼúre por persóna.b

Umi ermáno ombaʼapóva ndahaʼéi tembiʼu añónte la oikotevẽva, síno tekotevẽ avei ojeprotehe chupekuéra. ¿Mbaʼéguipa? Austráliape hakueterei, ha pe kuarahy ojope jave ikatu hína ipeligróso, upévare ojejapo ikatúva guive ojeprotehe porã hag̃ua pe ára hakúgui umi ermánope ha ani hag̃ua upéva omokangypa chupekuéra. Por ehémplo, omoĩ hikuái umi tóldo ha hetave lugár umi ermáno oho hag̃uáicha oñembopiroʼy. Avei ojasegura hikuái umi ermáno oreko hag̃ua protektór solár, sombrílla ha y. Kevin, ombaʼapóva Áudio ha Vidéope, heʼi: “La majoría koʼã ermáno ha ermána haʼe voluntário extérno ombaʼapóva Betélpe g̃uarã. Haʼekuéra iñumílde, ha kyreʼỹme ojapo la itraváho. Legálmente naorepytyvõirire hikuái nosẽmoʼãi kuri ko projékto”.

Ojegrava ótro lugárpe

Sapyʼánte oĩ eséna ndaikatúiva ojegrava pe sukursál terrénope ni umi estúdio de gravasiónpe, péicha jave ojehómante vaʼerã ótro lugárpe. Umi lugár yma guare oñeñeʼẽva la Bíbliape ningo ndorekói vaʼekue elektrisida, asfálto ni umi óga modérno koʼág̃a oĩháicha. Upévare umi ermáno ohómante vaʼerã umi lugár mombyryvehápe ograva hag̃ua. Péva heʼise umi ekípo, ao ha entéro mbaʼe oipurútava hikuái, ojeguerahapaite vaʼerãha pe lugár ojegravatahápe, ha oñeg̃uahẽ rire upépe oñeñongatu porã vaʼerã. Oñepyrũ mboyve umi gravasión, umi koordinadór de produksión auxiliár ojasegura oĩpa umi transformadór, água potávle ha váño. Entéro umi ombaʼapóva ojegrava hag̃ua ko série de vidéo, opyta jepi umi ermáno imbaʼeporãitéva rógape. Térã avei umi kása rrodánte, otél térã kaváñape.

Ojegravátaramo ótro lugárpe ijetuʼuve, pórke tekotevẽ hetave tiémpo, ojegasta hetave pláta ha umi ermáno ikaneʼõve. Upévare áño 2023-pe, pe Kuérpo Governánte oaprova ojejogua hag̃ua peteĩ pantálla higanteichagua, haʼéva unas kuánta pantálla ojagarrapáva peteĩ pare ha ovaléva 2 millón imédio de dólar. Ko teknolohía iñavansadoiterei rupi, entéro umi pantálla ohechauka umi imáhen al mísmo tiémpo, ha péicha oñeforma peteĩ imáhen tuichávante. Ha detánto ke iporã la kalida orekóva, ndojepillái haʼeha peteĩ fóto térã vidéonte, síno haʼete voi ojegrava vaʼekue okápe. Péicha ojeaorrave pláta ha tiémpo, ojeho rangue ótro lugárpe. Darren, peteĩ ermáno oĩva pe Komite de Sukursál de Australásiape, heʼi: “Ko sistéma ojepuru rupi saʼive ikaneʼõ umi aktór. Ha algúna eséna tekotevẽramo ojegrava jey, ifasilvéma ojejapo hag̃ua. Por ehémplo, roĩrire okápe ha rogravase peteĩ kuarahy reike, rojapura vaʼerã pórke sapyʼaitépe ja okañýma la kuarahy. Péro ko teknolohía rupive natekotevẽi rojepyʼapy upévare, pórke tekotevẽramo rograva peteĩ eséna heta vése, romoĩnte pe pantállape pe kuarahy reike”.

“Chéve g̃uarã ndahaʼeiete vaʼekue peteĩ sakrifísio”

Ojegrava hag̃ua ko série Jesús rembiasakue, káda párte oikotevẽ hetaiterei aktór, cientos voi, ha hetave jey umi oipytyvõva chupekuéra. ¿Mbaʼéichapa oñeñandu hikuái ohechávo pe sukursál oñatende porãitereiha hesekuéra?

Peteĩ ermána hérava Amber, oikóva Mélbournepe, oviaha mas de 700 kilómetro oipytyvõ hag̃ua ko projéktope. Haʼe heʼi: “Ag̃uahẽ guive pe aeropuértope, umi ermáno Betelpegua okuida porãiterei cherehe. Heta oĩ cheinvitáva akaru hag̃ua hendivekuéra, térã roʼu hag̃ua te. Ha entéro umi ombaʼapóva pe gravasiónpe ikalida ha iñamavleterei. Añeñandu porãiterei hendivekuéra. Ko viáhe chéve g̃uarã ndahaʼeiete vaʼekue peteĩ sakrifísio, pórke ahecha mbaʼéichapa Jehová chevendesi”.

Peteĩ ermáno hérava Derek, ombaʼapóva pe ekípo de produksiónpe, heʼi: “Oñepyrũ guive ko projékto oĩ hetaiterei ermáno orepytyvõva. Aagradeseterei umi ermáno ha ermána ojesakrifika vaʼekuépe omeʼẽvo itiémpo, imbaretekue ha ipláta jepe oipytyvõ hag̃ua ko projéktope. Haʼekuéra ningo siémpre iñamávle ha oĩ oporopytyvõ hag̃uáicha. Ojekuaa porãiterei mbaʼéichapa Jehová ovendesi chupekuéra ha oréve avei. Jehovápe g̃uarã iñimportánte ojejapo porã ko traváho, ha avei iñimportánte chupe g̃uarã ojejapo vyʼápe”.

Ko série hérava Jesús rembiasakue, ndaikatumoʼãi kuri ojejapo peẽ napemeʼẽirire pene kontrivusión, umíva apytépe umi pemeʼẽ vaʼekue donate.jw.org rupive. ¡Roagradeseterei ningo peẽme ermanokuéra péicha pendepojera haguére!