Reikuaasevépa la Biblia heʼíva?
Mbaʼérepa iporã relee la Biblia?
LA BIBLIA oguereko ipype Ñandejára ñemoñeʼẽ ohechaukáva ñanderayhuha, ha upévare ndaipóri lívro ikatúva oñembojoja hese (1 Tesalonicenses 2:13). Reiporúrõ upépe omboʼéva, reguenohẽta chugui heta mbaʼe porã. Rehayhuvéta Ñandejárape ha reñemoag̃uivéta hese, haʼéva “opaichagua jopói ha opa mbaʼe porã ha hekopegua” Meʼẽha (Santiago 1:17). Reikuaáta mbaʼéichapa reñemboʼevaʼerã chupe ha, rejejopy jave, rehecháta mbaʼéicha Ñandejára nepytyvõ. Remoĩrõ nde rekove Bíbliape oñemboʼeháicha, Ñandejára omeʼẽta ndéve tekove opaʼỹva (Romanos 6:23).
La Biblia oguereko heta mbaʼe añetegua ñanderesapeʼáva. Ohupytýva konosimiénto chugui ojehekýi heta mbaʼe oñemboʼe vaívagui, odomináva hetaiterei tapicha rekove. Pór ehémplo, jaikuaárõ añetehápe mbaʼépa ojehu oñemano rire, oipeʼáta ñandehegui kyhyje omanovaʼekue ikatuha ojapo mbaʼe vai ñanderehe, térã umi ñande rogaygua térã ñane amigokuéra omanovaʼekue ohasa asyha hína (Ezequiel 18:4). Pe doktrína omboʼéva la Biblia omanovaʼekue oikove jeytaha omeʼẽ konsuélo umi omanovaʼekue hentekuérape (Juan 11:25). Jaikuaárõ pe añetegua umi ánhel añágui, ñanderesapeʼa umi mbaʼe vai oguerúvagui espiritísmo ha ñanepytyvõ jahechakuaa hag̃ua mbaʼérepa oĩ hetaiterei provléma ko múndope.
Umi prinsípio Ñandejára omoĩva Bíbliape ñanemboʼe mbaʼéichapa jaikovaʼerã ñane resãive hag̃ua. Pór ehémplo, oiporúva moderasión ikatu hesãive (1 Timoteo 3:2). ‘Ñañemopotĩrõ opa mbaʼe omongyʼávagui ñande rete ha ñande espíritu’, nañambyaimoʼãi ñande rete (2 Corintios 7:1). Ojeporúrõ Ñandejára konsého oĩva Bíbliape oipytyvõ umi omendávape oguereko hag̃ua vyʼa, ha avei tapicha oguerekove hag̃ua rrespéto ijehe voi (1 Corintios 6:18).
Nde reikórõ Ñandejára Ñeʼẽ heʼiháicha, revyʼavéta. Pe konosimiénto Bíbliagui omeʼẽ pyʼaguapy, pyʼarory ha esperánsa. Ñanepytyvõ ñamoheñói hag̃ua umi kualida ojeguerohorýva. Umíva apytépe oĩ poriahuvereko, mborayhu, tory, pyʼaguapy, pyʼaporã ha fe. Koʼã kualida ñanepytyvõ ojapo hag̃ua ñandehegui ména, tembireko, túva, sy, taʼýra ha tajýra ikatupyryvéva (Gálatas 5:22, 23; Efesios 4:24, 32).
Reñeporandúmapa mbaʼépa ñaneraʼarõ tenonderãme? Umi profesía oĩva Bíbliape ohechauka ñandéve moõitépa ñaime ko ára ohasávape. Ndahaʼéi omombeʼúnteva umi ojehuvahína ko múndope, ohechauka avei Ñandejára ojapotaha koʼẽrõite ko Yvýgui peteĩ paraíso (Revelación [Apocalipsis] 21:3, 4).
Pytyvõ la Biblia ñantende hag̃ua
Ikatu oime reñehaʼãma relee la Biblia, péro retopa hasyha rentende hag̃ua. Ikatu ndereikuaái moõpa rehekáta ipype retopa hag̃ua umi rrespuésta porandukuéra reguerekóvape. Upéicharamo, naneñói. Opavave ñaikotevẽ ñepytyvõre ñantende hag̃ua Ñandejára Ñeʼẽ. Testigos de Jehová omeʼẽ kúrso vívliko reiete hetaiterei tapichápe, 235 tetãme rupi, ha vyʼápe nepytyvõta ndéve avei.
Iporãve ojestudia la Biblia mbegue mbeguépe. Ikatu reñepyrũ umi doktrína ndahasyivévagui (Hebreos 6:1). Reikuaavévo rehóvo, ndahasymoʼãi ndéve reikũmby “pe tembiʼu ipohyivéva”, kóva heʼise umi enseñánsa hasyvéva (Hebreos 5:14, JMP). La Biblia haʼe pe autorida. Heta kuatiañeʼẽ oñerenohẽ chugui, umíva apytépe pe lívro Mbaʼépa añetehápe omboʼe La Biblia?, nepytyvõtava reikuaa hag̃ua mbaʼépa heʼi la Biblia heta mbaʼére.
Reiporusépa ne tiémpo restudia hag̃ua la Biblia káda semána?
Pe estúdio vívliko ikatu reguereko peteĩ óra ha moõ opyta porãvehápe ndéve. Heta oĩ oguerekóva estúdio hogaitépe. Oĩ avei ostudiáva teléfono rupive. Ojejapo ojeporu hag̃ua oimeraẽ estudiánte ndive, ha chupe ikatuháicha. Ndahaʼéi aty guasúpe g̃uarã. Ojejapo avei iñarandu ha iñaranduʼỹvape g̃uarã. Ndojejapói eysámen ha avave nanemotĩmoʼãi. Upépe oñekontestáta ndéve umi porandu reguerekóva Biblia rehegua ha reikuaáta mbaʼéichapa ikatu reñemoag̃ui Ñandejárare.
Natekotevẽi repaga mbaʼeve reguereko hag̃ua pe estúdio vívliko (Mateo 10:8). Oñemeʼẽ reiete tapichakuérape oguerekóva oimehaichagua rrelihión, ha avei umi ndoguerekóivape, pero oikuaasevéva añetehápe Ñandejára Ñeʼẽgui.
Mávapa ikatu opartisipa? Opavave nde rogaygua ha ne amigokuéra reipotáva. Térã ne añónte avei, reipotárõ upéicha.
Heta oĩ omboykéva una óra káda semána oguereko hag̃ua pe estúdio de la Biblia. Péro, hiʼãrõ ndéve restudia hetave, térã saʼive káda semána ndahetáigui ne tiémpo, Testigokuéra oñehaʼãmbaitéta nepytyvõ.
Peteĩ invitasión reaprende hag̃ua
Rojapo ndéve peteĩ invitasión reñemongeta hag̃ua testigos de Jehová ndive. Upearã ikatu rehai oimeraẽ direksiónpe oñemeʼẽháicha koʼápe. Haʼekuéra ohecháta peteĩ omeʼẽvaʼerã ndéve pe estúdio vívliko reiete ha nde rogaitépe.
□ Peguerahauka chéve pe lívro Mbaʼépa añetehápe omboʼe La Biblia?
□ Aipota pemombeʼu chéve umi estúdio vívlikogui peguerekóva ogapýpe ha ndojepagáiva.
Ñandejára Ñeʼe ojeporúva Traducción del Nuevo Mundo de las Santas Escrituras, NM upeichaʼỹrõ ojeporu Jesucristo Marandu Porã, JMP (ortografía y gramática actualizadas).