Mbaʼépa heʼise koʼã mbaʼe oikóva koʼág̃a rupi?
JESUCRISTO heʼivaʼekue ‘ko sistéma ojeikoha og̃uahẽ vove huʼãme’ ojehechavaʼerã oiko gérra, ñembyahýi, péste ha yvyryrýi opárupi (Mateo 24:1-8; Lucas 21:10, 11).
Pe áño 1914 guive, umi gérra ojapóva umi tetãnguéra térã umi grúpo ndahaʼéiva ojorrása rehegua, omongyʼa yvyporakuéra istória. Koʼã ñorairõ pyʼỹi oiko umi líder rrelihióso oike rupi polítikape, ha koʼág̃a avei pe terrorísmo rupi.
Ojehupytýramo jepe heta mbaʼe porã pe siénsia rupi, pe ñembyahýi ojuka millónespe káda áño. Ha oĩ avei cientos de millones ohasa asýva ko múndope ndoguerekói rupi hoʼuvaʼerã.
Umi péste, térã epidémia, haʼe avei peteĩ señál Jesús omeʼẽvaʼekue. Opa rire pe primera gérra mundiál pe epidémia grípe rehegua ojuka hetaitereípe. Umi omanovaʼekue ohasa veintiún millones. Ndojoguái umi plága ymave guarépe, ombohasýva umi tapicha oikóvape peteĩ lugárpente. Upe grípe katu isarambi heta tetãre, umi ísla mombyryvévape jepe. Koʼág̃a rupi, pe sida isarambi pyaʼe opárupi. Pyaʼe isarambi oñembojarõguáicha tata peteĩ kapiʼity ipirupáva rehe. Avei pe mbaʼasypoʼi, akãnundu roʼy, dengue ha mal de Chagas oĩ gueteri umi tetã imboriahúvape.
Káda áño oiko hetaiterei yvyryrýi, tuicháva ha michĩva. Ojeguerekóramo jepe umi erramiénta ojekuaa hag̃ua oikotaha peteĩ yvyryrýi, pyʼỹi oñehendu ojapohague heta sarambi umi hénte hetahárupi.
La Biblia heʼimavaʼekue: ‘Reikuaavaʼerã ko mbaʼe, pe ára pahápe og̃uahẽta umi tiémpo ijetuʼúva ojeiko hag̃ua. Pórke yvyporakuéra ojehayhúta ijupénte, ipláta rayhúta, ijejapóta, oñemombaʼeguasúta, oñeʼẽ vaíta Ñandejárare, naiñeʼẽrendumoʼãi ituvakuérape, idesagradesídota, ndoguerekomoʼãi lealta, ndohayhumoʼãi hogayguápe, nog̃uahẽsemoʼãi peteĩ ñeʼẽme hapichándi, oñeʼẽ reíta hapicháre, ndaipuʼakamoʼãi ijehe, ipyʼahatãta, ndohayhumoʼãi pe iporãva, itraisionérota, oñemombaretéta pe heʼívapente, ojejapóta tuichaiterei mbaʼéramo, ohayhuvéta umi vyʼa ohayhuve rangue Ñandejárape, oguerekótavaicha peteĩ devosión Ñandejárare, péro ndahaʼemoʼãi upéicha; ha koʼãvagui rejeivaʼerã’ (2 Timoteo 3:1-5).
Mbaʼépa nde ere, jaikómapa koʼág̃a umi ‘tiémpo ijetuʼúvape’?
Ndépa rehechakuaa koʼág̃a rupi la hénte opensaha ijehénte, oñemombaʼeguasuha ha oikoha pláta rapykuérinte?
Mávapa ikatu onega ko múndo henyhẽha umi hénte oipotávagui ojejapo haʼe heʼívante, ndoagradeséiva mbaʼevére, ndoguerekóiva lealta ha noñemoĩséiva peteĩ ñeʼẽme hapichándi?
Ndépa rehechakuaa mbaʼéichapa hetaitereive ohóvo umi naiñeʼẽrendúiva ituvakuérape ha ndaiporiveiha pe joayhu, ndahaʼéi peteĩ hendápente síno opárupi?
Oimevaʼerã nde rehechakuaa avei jaikoha peteĩ múndope oikóva vyʼa rapykuérinte ha ndohayhúiva pe iporãva. Upéicha heʼi la Biblia ojeikotaha ‘pe ára pahápe’.
Tekotevẽpa oñemeʼẽve ñandéve pruéva jaikuaa hag̃ua mbaʼe tiémpopepa jaiko? Jesús heʼivaʼekue avei ko tiémpope ojepredikavaʼerãha opa ojeikohárupi umi notísia porã Ñandejára Rréino rehegua (Mateo 24:14). Ojejapopahína ko mbaʼe?
La Atalaya, peteĩ rrevísta oñeguenohẽva la Bíbliagui ha omombeʼúva umi notísia porã Ñandejára Rréino rehegua, haʼe pe puvlikasión oñeguenohẽ meméva hetaitereive ñeʼẽme oimeraẽvagui.
Káda áño, testigos de Jehová oiporu mil millones de óra rupi oñeʼẽ hag̃ua hapichápe Ñandejára Rréinogui.
Avei, oguenohẽ hikuái puvlikasión oñeʼẽva la Bíbliagui haimete 400 idiómape. Umíva apytépe oĩ umi mbovymínte oñeʼẽva ha umi lugár mombyryeterei opytávape. Testigos de Jehová ogueraha umi notísia porã opa tetã rupi. Opredika avei hikuái heta íslape ha umi lugár michĩetereívape, ndoguerekóiva importánsia pe polítika mundiálpe. Umi tetã rupi oguereko hikuái peteĩ prográma omboʼe hag̃ua la Biblia.
Upeichaite, umi notísia porã Ñandejára Rréino rehegua ojeguerahahína opa ojeikohárupi ko Yvy ape ári, ndahaʼéi oñekambia hag̃ua ko múndo, síno la hénte oikuaa hag̃ua. Opárupi oñemeʼẽ ñande rapichakuérape pe oportunida ohechauka hag̃ua oikuaasépa pe yvága ha Yvy Apoharépe, ha omombaʼétapa iléi ha avei ohayhútapa hapichápe (Lucas 10:25-27; Revelación [Apocalipsis] 4:11).
Koʼẽrõite, Ñandejára Rréino omopotĩta ko Yvy opa mbaʼe vaígui ha ojapóta chugui peteĩ paraíso (Lucas 23:43).
[Rrekuádro oĩva páhina 6-pe]
Mbaʼépa heʼise pe ára paha?
Ndeʼiséi yvyporakuéra omanombataha. Pórke la Biblia heʼi umi ojapóva Ñandejára volunta oikotaha opa ára g̃uarã (Juan 3:16, 36; 1 Juan 2:17).
Ndeiséi avei oñehunditaha ko Yvy. Pórke Ñandejára Ñeʼẽ opromete ko Yvy ape ári ojeikotaha opa ára g̃uarã (Salmo 37:29; 104:5; Isaías 45:18).
Pe ára paha heʼise opataha ko sistéma henyhẽva violénsiagui ha ndaiporihápe mborayhu ha umi oapojáva chupe (Proverbios 2:21, 22).
[Rrekuádro oĩva páhina 7-pe]
Haʼépa la Biblia añetehápe Ñandejára Ñeʼẽ?
Umi proféta vívliko oskrivivaʼekue heta hendápe: ‘Kóicha heʼi Jehová’ (Isaías 43:14; Jeremías 2:2). Ñandejára Raʼy Jesucristo jepe heʼivaʼekue haʼe ‘noñeʼẽiha ijehegui reínte’ (Juan 14:10). La Biblia voi heʼi porã: ‘Ñandejára oinspira opavave Eskritúra’ (2 Timoteo 3:16).
Ndaipóri ótro lívro ojejapóva hetave ñeʼẽme (ohasa dos mil doscientos, heʼiháicha Sociedades Bíblicas Unidas) ni hetave oñeguenohẽva (oĩ cuatro mil millones rupi). Ndahaʼeivaʼerãpa upéicha pe mensáhe oúva Ñandejáragui yvyporakuérape g̃uarã?
Pe lívro La Biblia... ¿la Palabra de Dios, o palabra del hombre?, og̃uenohẽvaʼekue testigos de Jehová, oanalisa mbaʼérepa ojeʼe la Biblia ouha Ñandejáragui.
Releéramo la Biblia regueroviágui haʼeha añetehápe Ñandejára Ñeʼẽ rehupytýta heta mbaʼe porã.
[Rrekuádro oĩva páhina 8-pe]
Mbaʼépa pe Ñandejára Rréino?
Haʼe peteĩ goviérno oĩva yvágape oguerekóva Ñandejára Jehová, yvága ha Yvy Apohare (Jeremías 10:10, 12).
La Biblia heʼi Ñandejára omeʼẽhague autorida Jesucrístope ogoverna hag̃ua (Revelación 11:15). Oĩrõ guare Yvy ape ári, Jesús ohechaukavaʼekue upéva ipuʼakávo umi fuérsa pe naturalésape oĩvare, omonguerávo opaichagua mbaʼasy ha omoingove jeývo umi omanovaʼekuépe jepe (Mateo 9:2-8; Marcos 4:37-41; Juan 11:11-44). Peteĩ profesía vívlika heʼi avei Ñandejára omeʼẽtaha chupe ‘governasión ha mombaʼeguasu ha rréino, ikatu hag̃ua yvyporakuéra, tetãnguéra ha opa ñeʼẽmegua oservi chupe’ (Daniel 7:13, 14). Upe goviérnope ojeʼe Rréino yvagapegua, ha yvága guive Jesucristo ogovernáma koʼág̃a.
[Nóta oĩva taʼanga ndive páhina 7]
Umi notísia porã oñemog̃uahẽ opárupi