23 DAVID
Haʼe oñemoĩ peteĩ higántere
GOLIAT oñemboʼy hína Elá Ñu ypýpe ha David omaña hese mombyry guive. Goliat ndive oĩ pe soldádo oraháva chupe ijeskúdo. Ñamañávo upe soldádore ha Goliat rehe jahechakuaa tuichaitereiha la diferénsia. Mombyry guive jepe ojekuaa vaʼekue Goliat tuichaitereiha. Haʼe ijyvate voi 3 métrorupi ha imbareteterei. Upévare umi ohecháva guivénte chupe oime vaʼerã okyhyjeterei raʼe ha oñandu voi ndahaʼeiha mbaʼevete la hovake. Upéicharõ jepe, David ohechárõ guare Goliátpe, ótra kosaite opensa ha upéva la ombopyʼaguasu vaʼekue chupe.
Oñepresenta mboyve ko situasión Davídpe, proféta Samuel oñohẽma kuri aséite iñakãre ha heʼíma chupe amo gotyove haʼe ogovernataha Israélpe. Upe guive Jehová espíritu oñepyrũma oipytyvõ Davídpe ojapo hag̃ua heta mbaʼe ndaijojaháiva. Upéicha rupi David rehe ojeʼéma voi ‘ipyʼaguasu, imbarete ha oñorairõkuaaha’, jepe imitãiti oike hag̃ua pe ehérsitope. Péro ko kásope David oho kuri pe gerrahápe iñermanokuéra rendápe itúa heʼi haguérente chupe, ohecha hag̃ua mbaʼéichapa oho hína hese hikuái. Itúa heʼírõ guare chupe upéva, posívlemente David neʼĩra oreko ni 20 áño.
David og̃uahẽvo Elá Ñúme, ohechakuaa pe ehérsito israelita ha pe ehérsito filisteo oñemoĩ hague ojovaiete. Semánarema oĩ hikuái upéicha, péro avavénte ndokuʼéi. Upéi David ohendu sapyʼa peteĩ soldádo filisteo oñepyrũha osapukái ha oñembohory umi israelítare. David ni ndoroviaséi la ohendúva. ¡Upe soldádo oadoráva umi dios guaʼu oñembohory hína Jehováre! David oñepyrũ oporandu umi soldádope mbaʼépa rréi Saúl omeʼẽta upe ojukávape Goliátpe. Upéi ou iñermáno Eliab, oñepyrũ ojaʼo Davídpe ha heʼi chupe haʼe ou hague okuriosea hag̃uánte. Upéicharõ jepe, David osegi oñeʼẽ umi soldádope ha omokyreʼỹ chupekuéra.
Upéi oñemombeʼu rréi Saúlpe la David heʼi vaʼekue, ha haʼe ohenoika chupe. David oho hendápe ha oñehaʼã omokyreʼỹ chupe heʼívo: “Aníke avave okyhyje Goliátgui”. Ha upéi heʼi: “Chete aháta añorairõ pe filistéondi”. Ñepyrũrã Saúl ndoipotái kuri David oho pórke oĩ segúro ojejukataha chupe. David omombeʼu Saúlpe mbaʼéichapa Jehová oipytyvõma vaʼekue chupe okuida aja itúa ovechakuérare. Upévare haʼe ikatúma voi kuri ojuka peteĩ león ha peteĩ ósope. Amo ipahápe Saúl oheja chupe oho, péro omeʼẽ Davídpe oraha hag̃ua umi mbaʼe haʼe oipurúva jepi gerrahápe. David ndojepokuaái kuri oipuru koʼã mbaʼe, upévare ohejapa jeýnte. Haʼe ojagarránte oraha umi mbaʼe oipurúva jepi voi odefende hag̃ua ijovechakuérape, umíva apytépe hiʼónda.
David ohokuévo ojotopa hag̃ua Goliat ndive, ohasa peteĩ rrío ypýrupi. Upépe haʼe opyta ha ojagarra 5 ita ijapuʼa ha ifíno asýva. Upéi David osegi hape og̃uahẽ meve pe ñorairõ oikohápe. Goliat ohechávo ko mitãrusúpe, oñepyrũ opuka ha oñembohory hese ou haguére chupe “peteĩ garróte” reheve. Posívlemente heʼi chupe upéicha ohechávo David ogueruha pe yvyra oipurúva jepi okuida hag̃ua umi ovecháre. Ikatu voi oime Goliat ndohechái raʼe David orekoha pe ónda. Hiʼarive péva haʼe kuri peteĩ árma oikoitéva peteĩ persóna oipurukuaávape g̃uarã. Upéi Goliat oñepyrũ “omaldesi Davídpe idioskuéra rérape” ha heʼi voi omeʼẽtaha heʼongue umi guyra ha animalkuérape hoʼu hag̃ua.
David imitãrõ guare, oñemoĩ vaʼekue peteĩ higántere odefende hag̃ua Jehová réra
David katu osẽ heʼi chupe: “Nde ningo regueru peteĩ espáda, peteĩ lánsa tuicháva ha peteĩ lánsa michĩva reñorairõ hag̃ua chendive. Che katu aju ndéve Jehová rérape, pórke nde redesafia chupe. Haʼe hína Israel Jára ha odirihi Israel ehérsito ha avei umi ehérsito yvagapegua”. Péicha David ohechauka kuri mbaʼérepa la ipyʼaguasuete. David nopensái kuri haʼe michĩetereiha Goliat rovake, síno haʼe opensa mbaʼeichaitépa Goliat michĩraʼymi Jehová rovake. Upévare David oĩ kuri segúro ipuʼakataha ko higántere ha pe ehérsito filisteo operde vaipaitetaha.
Upéi David oñepyrũ odipara Goliat gotyo, onohẽ ivosaʼígui peteĩ ita, omoĩ hiʼóndape ha oñepyrũ ovolea. Oimérõ Goliat koʼág̃a ramo ohecha David orekoha peteĩ ónda, tárde jepéma chugui. David ohaʼã Goliátpe pe itaʼípe ha ojasertaite voi. Ojapi chupe isyva mbytetépe ha pe ita oike voi hese. Upepete pe higánte “hoʼa otĩoite”. Upévo David pyaʼe odipara, oho Goliat hoʼa haguépe, oipeʼa chugui ijespáda ha oñakaʼõ chupe. Péva ombopyʼaguasúma Israel ehérsitope. Upépe umi kuimbaʼe oñepyrũ osapukaipa ha omuña umi filistéope. Upérõ guare Jehová siervokuéra ogana vaipaite chupekuéra. David ipyʼaguasu rupi upérõ, ombopyʼaguasu vaʼekue avei umi ótrope, ha iñehémplo osegi ñanepytyvõ koʼag̃aite peve.
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa David ipyʼaguasu hague imitãrõ guare?
Einvestigamína
1. ¿Máva mávapa rakaʼe umi David ypykue ohechaukáva avei ipyʼaguasuha? (Mat. 1:5, 6; Luc. 3:31-38; w12-S 1/10 24 párr. 2-wcgr).
2. ¿Oĩpa pruéva ohechaukáva umi mbaʼe ojeʼéva ko rrelátope añetehápe oiko hague? (wp16.5 13). A
Collection the Israel Antiquities Authority. Photo © The Israel Museum, by Meidad Suchowolski
Taʼanga A: Peteĩ ita pedáso orekómava 2800 áñorupi, heʼíva hese “David róga”
3. Emombeʼumína mbaʼéichapa oikóne rakaʼe David oñangareko aja umi ovecháre (w11 1/10 27 párr. 1–28 párr. 1). B
Todd Bolen/BiblePlaces.com
Taʼanga B
4. ¿Mbaʼérepa jaʼekuaa pyʼỹinte ojeapoʼi hague Davídpe? (w21.03 3 párr. 6; it “Eliab” Núm. 4 párr. 1-wcgr).
Ejepyʼamongetamína ndejehe
¿Mbaʼéichapa David ehémplo ikatu nepytyvõ...
... rejepyʼapy térã rekyhyje jave? C
Taʼanga C
... ndepuʼaka hag̃ua peteĩ deséo vaíre?
Nde ndepyʼaguasúramo, ¿mbaʼéichapa ne ehémplo ikatu oipytyvõ umi ótrope? (1 Sam. 17:50-53).
¿Mbaʼéicha javépa ikatu avei rehechauka ndepyʼaguasuha David ipyʼaguasu haguéicha ko kásope?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
Alee rire ko rrelátope la ohasa vaʼekue David, ¿mbaʼépa aporandúne chupe Jehová omoingove jey vove chupe?
Reikuaave hag̃ua
Ehechávo ko purahéi mitãme g̃uarã, reaprendéta mbaʼérepa David ipyʼaguasuete vaʼekue.
¿Mbaʼépa ojapo vaʼerã ermanokuéra oipotáramo umi ótro orrespeta chupekuéra?
Mitãrusukuéra, ¿mbaʼépa ikatu pejapo oñekonfia hag̃ua penderehe? (w21.03 2-5 párr. 1-11).