40 NEHEMÍAS
Haʼe omopuʼã jey pe murálla
NEHEMÍAS oiko vaʼekue Súsape (Persia). Péro chupe hiʼãiterei oho oiko Jerusalénpe pórke Jehová témplo oĩ upépe. Jehová rupive, umi judíope oñepermiti oho jey hetãme, oiko rire hikuái heta tiémpore Babilóniape. Upéicharõ jepe, ijetuʼu vaʼekue chupekuéra oadora hag̃ua Jehovápe haʼe oipotaháicha. Ha ivaive hag̃ua, pe siuda murálla hoʼapa. Upe tiémpope avave ndoikoséi vaʼekue peichagua siudápe, pórke oimeraẽvante ikatúta oataka chupekuéra.
Nehemías haʼe vaʼekue peteĩ ofisiál iñimportánteva ombaʼapóva rréi Artajérjespe g̃uarã. Péro avei, Nehemías oservi vaʼekue Jehovápe fiélmente. Peteĩ jey, Nehemíaspe oho ovisita iñermáno ha omombeʼu chupe ivaietereiha umi judiokuéra situasión. Umi hénte oikóva ijererekuéra ombohasa asy chupekuéra ha pe murálla katu hoʼapa.
Nehemías opyta oñekevrantaiterei. Haʼe heʼi voi: “Aguapy cherasẽ ha añembyasyeterei heta díare”. Haʼe oñemboʼe Jehovápe ha ojerure asy chupe taimanduʼami ipuévlore ha toipytyvõ chupekuéra. Upe rire, Nehemías oservi aja víno Artajérjespe, pe rréi opilla hese hovasyha ha oporandu chupe mbaʼépa la oikóva. Upéva omondýi Nehemíaspe, péro lomímonte omombeʼu chupe la oikóva hína Jerusalénpe. Upémarõ pe rréi oporandu chupe mbaʼépa haʼe ojapose. Upepete Nehemías ‘oñemboʼe Ñandejára yvagapeguápe’. Upéi Nehemías heʼi chupe ohoseha Jerusalénpe peteĩ tiémpore omopuʼã jey hag̃ua pe siuda murálla. ¡Ha pe rréi omeʼẽmbaite chupe la oipotamíva guive!
Nehemías osẽ oho Jerusalénpe oikuaáramo jepe ipukutaha la viáhe ha ipeligrosoha. Og̃uahẽ rire upépe, peteĩ pyhare osẽ oho orrevisa pe murálla. Upéi oorganisa pe puévlope ha omokyreʼỹ chupekuéra omopuʼã jey hag̃ua pe murálla. Haʼe ndahaʼéi heʼínteva upéva, haʼe voi avei oho ombaʼapo hendivekuéra. Pe puévlo omoirũ chupe, umi ipláta hetáva ha omanda guasúva entéro, umíva apytépe umi ombaʼapóva órore ha umi prínsipe. Pe rreláto heʼi voi peteĩva umi prínsipe ombaʼapo hague pe murállare itajyrakuérandi.
Umi judío oreko vaʼekue heta enemígo ndoipotáiva haʼekuéra oñakãrapuʼã ha omopuʼã jey pe murálla. Ñepyrũrã koʼã hénte aña oñembohory umi judíore omokangy hag̃ua chupekuéra. Peteĩva heʼi voi peteĩ aguara jepe ikatutaha oitypa jey chuguikuéra imurálla. Péro Nehemías nopenái hesekuéra ha osegi omokyreʼỹ umi ombaʼapóvape.
Oĩramo jepe oñembohorýva, oamenasáva ha omongyhyjeséva chupe, lomímonte omopuʼã jey Jerusalén murálla
Upéi ijetuʼuvéntema la situasión. Umi judío omopuʼãrõ guare pe murálla alamitaha peve, iñenemigokuéra oplanea oataka hag̃ua chupekuéra opáguio ládo. Nehemías oikuaa rire upéva, ojapo la tekotevẽva oprotehe hag̃ua pe puévlope. Iñenemigokuéra okairo oikuaávo upéva ha ojedeha jeýnte la ijidéagui. Upe tiémpo guive Nehemías odividi umi travahadórpe mokõi grúpope. Peteĩ grúpope heʼi osegínte hag̃ua ombaʼapo, ha pe ótrope katu heʼi toraha árma ijehekuéra ha toĩ preparádo odefende hag̃ua pe puévlope. ¿Serápa upépe oñekalmáma iñenemigokuéra?
Upe rire haʼekuéra opaga peteĩ proféta japúpe heʼi hag̃ua Nehemíaspe iñenemigokuéra ouha hína ojuka hag̃uáicha chupe. Ko proféta japu heʼi Nehemíaspe oho hag̃ua okañy Jehová témplope. Péro Nehemías ndojaposéi upéva pórke pe léi oproivi. Upéi heʼi pe profétape: “¿Peteĩ kuimbaʼe cheichagua piko ohóta okañy?”. Nehemías osegínte ombaʼapo pe murállare oikuaágui Jehová oipytyvõtaha chupekuéra oñekumpli hag̃ua ivolunta. Ha ojekuaa Jehová ovendesi hague chupekuéra, pórke 52 díapente haʼekuéra omopuʼãmbaitéma pe murálla. ¡Tuicha ñemotĩ hoʼu iñenemigokuéra!
Péro Nehemías ipyʼaguasu vaʼerã kuri avei ogia hag̃ua pe puévlope oservi porã hag̃ua Jehovápe. Por ehémplo, umi irríkova oipuruka kuri oikóvo pláta umi imboriahúvape, péro hetaiterei okovrase la interés ha ojopy hendivekuéra. Nehemías kyhyjeʼỹme okorrehi koʼã ipláta hetávape. Tiémpo rire, oikuaárõ guare oĩha unos kuánto omendáva kuña extranhérare, haʼe pyʼaguasúpe okorrehi chupekuéra ha odefende Ñandejára léi.
Peteĩ vuéltape pe puévlo ou oñedesanimaite pórke ohechakuaa ofalla ha opeka hague Jehová renondépe. Upépe Nehemías oaprovecha omboʼe hag̃ua chupekuéra peteĩ mbaʼe iporãitereíva. Haʼe heʼi: “Pe vyʼa Jehová omeʼẽva peẽme pendeprotehéta”. Nehemías oikuaa vaʼekue ikatuha javyʼa ñande pyʼaite guive jaservívo Jehovápe. Upéva la añetehápe ikatúva ñandeprotehe, ndahaʼéi voi peteĩ murálla ni peteĩ fortalésa. Ñapensa porãrõ hese, pe vyʼa Jehová omeʼẽva ñandéve ñandeprotehe ha ñanembopyʼaguasu koʼag̃aite peve.
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa Nehemías ipyʼaguasu hague?
Einvestigamína
1. ¿Mbaʼépa ojapo vaʼekue Nehemías pe palásiope ha mbaʼe rresponsavilidápa oguereko vaʼekue? (w10-S 1/7 9 párr. 5-7-wcgr). A
National Museum of Iran, Tehran, Iran/Bridgeman Images
Taʼanga A: Peteĩ taʼanga ojapo vaʼekue umi persa. Upépe ojekuaa peteĩ kopéro oserviha hína rréi Daríope, haʼéva Artajerjes avuélo
2. ¿Mbaʼépepa idiferénte vaʼekue Salum rajykuéra ha umi tecoíta? (Neh. 3:5, 12; w19.10 23 párr. 11).
3. ¿Mbaʼéichapa umi oguerojáva umi kárga ombaʼapo vaʼekue “un ládo ipópente”? (Neh. 4:17, 18; w06 1/2 9 párr. 1-wcgr). B
Taʼanga B
4. ¿Mbaʼérepa Nehemías ojepyʼapyete vaʼekue ohechávo umi judío raʼykuéra noñeʼẽkuaaiha hebreo? (Neh. 13:23-27; w16.10 14 párr. 4).
Ejepyʼamongetamína ndejehe
¿Mbaʼéichapa Nehemías ehémplo ikatu oipytyvõ ansianokuérape...
... ojerovia hag̃ua Jehováre? (Neh. 1:4-11; 4:14; 13:1-3).
... ombaʼapose hag̃ua ermanokuérandi? (Neh. 4:15, 21-23).
... ohenduse hag̃ua ermanokuérape? (Neh. 5:1-7). C
Taʼanga C
Nehemías oiko porã vaʼekue pe palásiope, péro oheja upéva oservi porãve hag̃ua Jehovápe. ¿Mbaʼépa ñanemboʼe upéva?
¿Mbaʼéicha javépa ikatu avei rehechauka ndepyʼaguasuha Nehemías ipyʼaguasu haguéicha?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
¿Mbaʼépa aporandúne Nehemíaspe Jehová omoingove jey vove chupe?
Reikuaave hag̃ua
¿Mbaʼéichapa Nehemías ehémplo ohechauka Jehová ñanepytyvõtaha ñañemboʼéramo chupe?
Ehechamína ko vidéope mbaʼeichaitépa Nehemías ipyʼaguasu vaʼekue oĩrõ guare oñemoĩva hese.
Nehemías: “Pe vyʼa Jehová omeʼẽva peẽme pendeprotehéta” (párte 1, vidéo mbykyvéva) (5:22).