Umi hénte ndojeroviavéi umi politikokuérare: ¿Mbaʼépa heʼi la Biblia?

Ko áño 2024-pe oikóta hetaiterei eleksión polítika ko múndo tuichakuére, arakaʼeve ndoikóiva peichaite peve. Péro heta hénte koʼág̃arupi nokonfiavéi umi politikokuérare.

• La majoría umi enkuésta ojejapóva Estados Unídospe ohechauka “hetave polítikope ointeresaha mbaʼe venefísiopa ikatu ohupyty”, opensa rangue umi héntere (centro de investigación Pew Research Center, 19 de septiembre de 2023).a

Heta mitãrusu ha mitãkuñanguéra ndojeroviavéi avei umi polítikore.

• “Koʼág̃arupi umi mitãrusu ha mitãkuña ohecha mbaʼéichapa ikatu oñesolusiona umi provléma igravevéva. Péro haʼekuéra heʼi umi enkuéstape ke umi polítiko ndotopaiha la solusión” (The New York Times, 29 de enero de 2024).

• “Peteĩ enkuésta ohechauka umi mitãrusu ha mitãkuñanguéra ojeroviaveha umi persóna ifamósovare oĩva rred sosiálpe orekóva heta segidór, ojerovia rangue umi polítikore” (The Korea Times, 22 de enero de 2024).

¿Ikatúpa jajerovia umi polítiko omeʼẽtaha ñandéve peteĩ futúro iporãva? ¿Mávarepa añetehápe ikatu jajerovia?

Eñatendékena mávarepa ejerovia

Iporã ningo ñañatende mávarepa jajeroviáta. La Biblia heʼi voi: “Pe ivýrova oguerovia ojeʼéva guive chupe, pe iñarandúva katu opensa porã ojapo mboyve álgo” (Proverbios 14:15).

• ¿Mbaʼépa ikatu nepytyvõ eikuaa hag̃ua mbaʼeichagua informasiónpa heʼi pe siertoguáva ha mávapa ijapu? Elee ko artíkulo “Cómo protegerse de la información falsa”.

Ha oĩramo jepe polítiko iñonrrádo ha iñintensión porãva, oĩ heta mbaʼe haʼekuéra ndaikatúiva ojapo ni ojaposevéramo jepe. Upévare la Biblia ñaneakonseha:

• “Ani pejerovia umi governánte rehe, ni ótro kuimbaʼére, pórke koʼã persóna ndaikatúi ñandesalva” (Salmo 146:3).

Peteĩ líder ikatúvare ekonfia

La Biblia heʼi Ñandejára oelehi hague peteĩ líder de konfiánsa ndaijojaháiva, upéva hína Jesucristo (Lucas 1:32, 33). Jesús haʼe pe Rréi Ñandejára Rreinopegua, ha haʼe ogovernáta yvága guive (Mateo 6:10).

• ¿Mbaʼérepa ikatu jajerovia Jesús rehe, ha mbaʼéichapa osolusionáta umi provléma jarekóva? Elee pe artíkulo hérava “¿Mávapa ogovernáta Ñandejára Rréinope?” ha “¿Mbaʼe mbaʼépa ojapóta Ñandejára Rréino?”.