Oñepytyvõ umi osufrívape oiko rupi umi sarambi

Áño 2020-pe oiko kuri hetaiterei desástre naturál, ha oñepyrũ avei pe pandémia de COVID-19. ¿Mbaʼéichapa umi testígo de Jehová oipytyvõ raʼe umi osufrívape koʼã mbaʼe káusare?

Pe áño de servísio 2020-pe,a pe Komite de Koordinadór del Kuérpo Governánte omeʼẽ permíso ojepuru hag̃ua 28 millón de dólar (mas de 194 mil millón de guarani) oñepytyvõ hag̃ua umi lugár oiko haguépe sarambi. Upéva ojepuru oñepytyvõ hag̃ua umi ohasa asývape mas de 200 desástre naturál káusare, umíva apytépe oike pe pandémia de COVID-19, heta torménta ivaietereíva, umi inundasión oiko vaʼekue Áfricape, pe ñembyahýi oĩva Venezuélape, ha avei pe séka vaiete oĩva Zimbábuepe. Umi kontrivusión rupive ojejogua tembiʼu, y, ao, pohã, ha peteĩ lugár oikomi hag̃ua hikuái. Avei ojejogua umi prodúkto de limpiésa, ha umi materiál de konstruksión ojepurútava ojearregla térã oñemopuʼã jey hag̃ua umi lugár oñehundi vaʼekue. Jahechamína unos kuánto ehémplo ohechaukáva mbaʼéichapa ojejapo raʼe upéva.

COVID-19. Pe pandémia ningo oafektáma hetaiterei ermáno ha ermánape ko múndo tuichakuére, tahaʼe físika, emosionál térã ekonómikamente. Upévare oñeforma mas de 800 Komite de Sokórro oñepytyvõ hag̃ua chupekuéra. Koʼã Komite kontinuadoite ohecha mbaʼépa oikotevẽ ñane ermanokuéra, ha upéi omondo umi infórme ikatu hag̃uáicha pe Komite de Koordinadóres oikuaa mbaʼéichapa oñepytyvõ porãvéta koʼã ermánope.

Pe áño pukukue, umi Komite de Sokórro oipytyvõ hetaitereípe okonsegi hag̃ua hikuái tembiʼu, ao, y, pohã, ha umi prodúkto de limpiésa oñekotevẽvéva ojahu ha ipotĩ hag̃ua hikuái. Heta lugárpe umi Komite de Sokórro ombaʼapo avei umi ansiánondi, ikatu hag̃uáicha umi ermáno okonsegi pe ajúda omeʼẽva umi goviérno.

Umi ndahaʼéiva Testígo ohechakuaa avei ñaipytyvõ hague umi oikotevẽvape. Por ehémplo, Field Simwinga, peteĩ karai omanda guasúva Nakonde, Zámbiape, heʼi ñane ermanokuérape: “Roagradeseterei ningo peẽme, pórke pe ajúda peẽ pembou vaʼekue og̃uahẽ hiʼoraitépe umi família oikotevẽvape”.

Ijakáso la hiʼupy Angólape. Pe pandémia de COVID-19 káusare, ijakasopaite la hiʼupy Angólape ha ojupipaite la présio. Upévare heta ermáno ha ermánape ijetuʼuetereive ojogua hag̃ua hoʼumi vaʼerã.

Pe sukursál de Brasílpe ojejerure kuri oipytyvõ hag̃ua umi ermáno oikóvape Angólape, oguerahakávo chupekuéra umi kit de aliménto. Ikatu hag̃uáicha ojepuru porã umi kontrivusión, umi ermáno oinvestiga mbaʼéichapa iporãvéta oñekonsegi ha oñemondo umi hiʼupy. Upévare ojogua hikuái umíva al por majór. Upéicha rupi, en promédio ojegasta 22 dólarnte (150.000 guaranírupi) ojejogua ha oñemondo hag̃ua káda kit, ha oreko haimete 20 kílo hiʼupy, oñemoĩ pype arro, kumanda ha aséite umíva. Koʼág̃a peve oñemondóma 33.544 kit (mas de 654.000 kílo). Koʼã hiʼupy ha umi oñekonsegi vaʼekue Angólape ojepuru oñemongaru hag̃ua mas de 50.000 persónape.

¿Mbaʼéichapa oñeñandu ñane ermanokuéra péicha oñepytyvõ haguére chupekuéra? Alexandre, oikóva mombyryeterei Angólape, heʼi: “Kóva ohechauka Jehová cherayhuha ha naimeiha cheaño. Añandu chevaloraha Jehová organisasión”. Mariza, peteĩ ermána omongakuaáva haʼeño imembykuérape, heʼi: “Jehová ohendu la ajerure asýva chupe. Upévare aagradese chupe ha iñorganisasiónpe”.

Séka vai Zimbábuepe. Pe áño de servísio 2020-pe, Zimbábuepe ou kuri peteĩ séka ivaietereíva, ha upévare millones umi hénte iñembyahyipa. Ha hetaiterei ermáno oikóva Zimbábuepe ndorekovéima avei sufisiénte hiʼupy.

Oñeforma 5 Komite de Sokórro ojeguerahaka hag̃ua hiʼupy ñane ermanokuérape. Hetaiterei ermáno oipytyvõ oñeempaketa hag̃ua umi hiʼupy, ojekarga hag̃ua umi veíkulope, térã oipuruka voi hikuái la iveíkulo upearã.b Pe áño de servísio 2020-pe, ojepuru 691.561 dólar (mas de 4.700 millón de guarani) oñemongaru hag̃ua mas de 22.700 persónape.

Og̃uahẽrõ guare pe ajúda, heta ermáno ndorekovéima kuri mbaʼevete hoʼumi vaʼerã hógape. Ha oñemog̃uahẽrõ guare chupekuéra umi hiʼupy, ñane ermanokuéra omombaʼeguasu Jehovápe. Oĩ voi umi oñepyrũva opurahéi umi kántiko.

Peteĩ lugárpe, mokõi ermána viúda oho peteĩ rreunión ojapóvape ivesinokuéra. Upépe ojehecháta kuri mbaʼéichapa ojerrepartíta umi hiʼupy omboúva peteĩ organisasión ndahaʼéiva pe goviernopegua. Péro amo ipahápe, upe rreuniónpe oñepyrũ oñeʼẽ hikuái polítikarentema. Upévare umi ermána odesidi ndaikatumoʼãiha ojapo umi mbaʼe ojeruréva hikuái ojerresivi hag̃ua pe ajúda. Ha haʼekuéra osẽnguévo upe rreunióngui, umi hénte oñembohory hesekuéra ha heʼi: “¡Animoʼãke peju koʼápe peheka pene rembiʼurã!”. Péro 2 semána haguépente, og̃uahẽ ñane ermanokuéra upe lugárpe ha omeʼẽ hiʼupy umi ñane ermánape. Ha upéva oiko heta tiémpo og̃uahẽ mboyve pe ajúda omeʼẽta vaʼekue pe organisasión ndahaʼéiva pe goviernopegua.

Pe ajúda oñemondo vaʼekue Zimbábuepe ideprovécho avei ojepredika hag̃ua. Por ehémplo, jahechami la ohasa vaʼekue Prisca, oikóva peteĩ komunida michĩvape. Ijetuʼúramo jepe pe séka tiémpope, Prisca lomímonte opredika jepi miércoles ha vierneskue, umi hénte opreparaha tiémpope jepe ikokue oñemitỹ hag̃ua. Upévare umi ikomunidagua oñembohory hese ha heʼi: “Nde emoñembyahyipáta ne familiakuéra epredika haguére eikóvo”. Prisca katu heʼi chupekuéra: “Jehová ningo arakaʼeve ndohejareíriva isiervokuérape”. Tiémpo riremínte, haʼe orresivíma pe ajúda ñane organisasióngui. Upéva ohecharamoiterei la ivesinokuéra, ha heʼi hikuái Príscape: “Ñandejára ningo núnka nanderejareíri, upévare roaprendeseve chugui”. Koʼág̃a 7 ivesinokuéra ohendu umi rreunión oñembohasáva rrádiope.

Amáske hiʼag̃ui pe fin, oikóta gueteri heta desástre naturál (Mat. 24:3, 7). Roagradeseterei ningo peẽme pendepojera haguére pemeʼẽvo pene kontrivusión, peipurúvo umi diferénte fórma oĩva oñedona hag̃ua donate.jw.org. Upéva ojepuru porãta oñepytyvõ hag̃ua itiempoitépe umi oikotevẽvape.