Ñañehaʼãkena iñeʼẽtépe ñamombeʼu opavavépe pe marandu porã
1. Mbaʼeichagua tapichárepa jajuhu jepi japredika jave?
1 Koʼág̃a rupi, pyʼỹinte pe siudaháre jajuhu heta ñande rapicha oñeʼẽva ótro idióma. Ha sapyʼánte katu kampañaháre jepe jajuhu avei umichaguáre. Hiʼãiténingo ñamog̃uahẽ avei chupekuéra pe marandu porã Ñandejára goviérno rehegua (Rev. 14:6). Heta mbaʼe sapyʼánte oiko ñamog̃uahẽ jave pe marandu porã umi ñande rapicha oñeʼẽvape ótro idióma. Upévare jahecháta mbaʼéichapa ikatúta ñamog̃uahẽ porãve chupekuéra pe marandu porã.
2. Maʼerãpa ñasẽ japredika?
2 Ñaipytyvõkena ñande rapichápe oservi hag̃ua avei Jehovápe. Ñanemanduʼavaʼerã japredikahañaína ñaipytyvõségui ñande rapichápe oikuaa hag̃ua Ñandejárape ha ojapo hag̃ua opa mbaʼe Haʼe ohaʼarõva ñandehegui (Mat. 28:19, 20). Ñamboʼevaʼerã chupekuéra pe idióma ontende porãvétavape (1 Cor. 14:9). Heta vése ningo ijetuʼu ñandéve jajapo hag̃ua upéva. Heta hendápe peteĩ kongregasiónte opredikavaʼerã peteĩ territóriope ha ojuhu jepi hikuái umi tapicha noñeʼẽporãiva iñidiomapekuéra. Upéicharõ, mbaʼéichapa ikatu oñepytyvõ chupekuéra oikuaa hag̃ua Ñandejárape?
3. Mbaʼéichapa ikatu ñamombeʼu pe marandu porã umi ñande rapicha oñeʼẽvape ótro idióma?
3 Japredikátaramo peteĩ ñande rapicha noneʼẽivape ñane idióma, jaiporuvaʼerã pe folléto Notísia porã opavave tapichakuérape g̃uarã. Upéicha ñamombeʼuʼimítama chupe pe marandu porã ha jahechakuaátama hese oikuaasépa Ñandejárape. Ha oikuaaséramo katu ñaikuaveʼẽvaʼerã chupe peteĩ puvlikasión oĩva iñeʼẽme. Upe rire, ikatu ñaporandu umi ansiáno térã superintendénte de sirkuítope ndaipóripa upérupi peteĩ grúpo térã kongregasión ojejapohápe rreunión upe óga jára idiómape ikatu hag̃uáicha umi ermáno oipytyvõ chupe. Ha ndaipóriramo, ikatu hína oĩ peteĩ ermáno jepe oñeʼẽkuaáva upe óga jára idiómape ha haʼe oipytyvõkuaa chupe oikuaave hag̃ua Ñandejárape. Upeichaiténte avei jajapovaʼerã jajuhu jave predikasiónpe umi séñape oñeʼẽvare.
4, 5. Mbaʼéichapa ikatu ñaipytyvõ ñande rapichápe ndaipóriramo peteĩ grúpo térã kongregasión ojapóva rreunión iñeʼẽme?
4 Ikatu avei ndaipóri upérupi peteĩ testígo oñeʼẽva upe óga jára idiómape ha oikuaasevéramo jepe hasy oñepytyvõ hag̃ua chupe. Mbaʼépa ikatu jajapo upéicharõ? Oĩ puvlikadór oiporúva pe folléto Eñangapyhy opavave ára nde rekove ko Yvy ape ári! Ha katuete oipytyvõvéta pe óga járape oĩramo iñeʼẽme ko folléto. Ikatu jaiporu umi taʼanga oĩva pype ha jajerure chupe olee hag̃ua la Bíbliape umi téysto oĩva upépe. Upéicha ontendetahína umi mbaʼe iñimportantevéva oĩva Ñandejára Ñeʼẽme. Ikatu avei oĩ hogaygua ontende porãva ñane idióma ha ikatúva heʼi chupe iñeʼẽme umi mbaʼe ñamboʼevañaína.
5 Ndojejapóiramo jepe umi rreunión pe óga jára idiómape, ñamokyreʼỹntevaʼerã avei chupe oho hag̃ua ñane rreunionhápe. Ohohaguérente voi ñane rreunionhápe tuicha omokyreʼỹta chupe. Ha mbeguekatúpe ikatu oaprendehína ñane idióma oikuaave hag̃ua Ñandejárape (Mat. 18:20). Aníkena ñanderesarái ñande ñaipytyvõvaʼerãha ñande rapichápe oservi hag̃ua Jehovápe.
6. Mbaʼépa ikatu jajapo oĩramo mokõi kongregasión opredikáva peteĩ territóriope?
6 Mbaʼéichapa ikatu japredika ñande territóriope oñeñeʼẽramo heta idióma. Sapyʼánte mokõi kongregasiónpe oñemeʼẽ peteĩ territórionte, péro káda únope oñemeʼẽ mbaʼe idióma oñeʼẽvapepa oipytyvõvaʼerã. Upéicharõ umi puvlikadór oñehaʼãvaʼerã opredika umi iñidiómape oñeʼẽvapente. Sapyʼánte ningo ikatu mokõive kongregasionpegua og̃uahẽ jepi peteĩ ógape opredika hag̃ua. Péro umi ansiáno ohecháta mbaʼe idiómapepa oñeʼẽve umi hénte ha upéicha oñemombeʼu hag̃ua chupekuéra iñeʼẽtépe pe marandu porã. Upearã ñaanotavaʼerã moõitépa oiko ha ñameʼẽ pe kongregasión oñeʼẽvape upe idiómape (Fili. 2:4). Iporã avei mokõive kongregasionpegua puvlikadór ontende oñemeʼẽha chupekuéra iterritoriorã oĩhápe umi hénte oñeʼẽva iñidiómape. Jahechakuaáramo pe óga jára ontendeveha ambue idióma, jahejavaʼerã pe ótro kongregasión oñeʼẽva upe idióma toipytyvõ chupe. Jajapóramo upéicha ñaipytyvõtañaína umi hénte oikuaasevévape Ñandejáragui oho hag̃ua pe kongregasión iñidiómape oñeʼẽvape.
7. Jajuhúramo ñande territóriope peteĩ tapicha noñeʼẽiva ñane idióma, mbaʼépa ikatu jajapo oñemog̃uahẽ hag̃ua chupe iñeʼẽtépe pe marandu porã?
7 Jajuhúramo ñande territóriope peteĩ tapicha ohenduʼỹva térã oñeʼẽva ótro idióma, ñamyenyhẽvaʼerã pe formulário Sirvase visitar (S-43-S). Ñamyenyhẽvaʼerã ko kuatia noñatendeporãiramo jepe ñanderehe pe óga jára. Ndajaikuaáiramo jepe héra, ikatu ñaanota moõitépa oiko ha mbaʼe idiómapepa oñeʼẽ. Ko kuatia ñamyenyhẽmba rire ñamoĩvaʼerã pe káha infórme oñemoĩhápe. Pe sekretário kongregasionpegua ohechavaʼerã oĩ porãmbápa, ha upe rire omondovaʼerã pe kongregasión oñeʼẽvape upe idióma. Upéicha upe tapichápe oñemog̃uahẽta iñeʼẽtépe pe marandu porã.
8. Mbaʼépa jajapovaʼerã ñamog̃uahẽ hag̃ua pe marandu porã umi ñande rapicha oñeʼẽvape ótro idióma?
8 Heta mbaʼe porã ningo jahupytýta ñaipytyvõramo oñemog̃uahẽ hag̃ua pe marandu porã umi tapicha noñeʼẽivape ñane idióma. Jajepyʼapyvaʼerã ningo ñande rapicháre ha jahechakuaavaʼerã oikotevẽha oikuaa Ñandejárape (Juan 13:34, 35; Fili. 2:14; Sant. 3:17, 18). Ñamotenondevaʼerã umi ñande rapicha ipyʼaporãvape ha ñaipytyvõ chupekuéra oservi hag̃ua Ñandejárape. Jajapóramo upéicha ñaipytyvõta opa tetãyguápe omombaʼeguasu hag̃ua ñanendive Ñandejára Jehovápe (Isa. 2:2, 3).