Leksión 14

Emyesakã porã umi mbaʼe iñimportantevéva

Hebreos 8:1

MBAʼÉPA HEʼISE: Eipytyvõ vaʼerã umi nerendúvape ontendepaite hag̃ua umi mbaʼe iñimportánteva remboʼeséva nde diskúrsope, ha mbaʼéichapa ideprovéchota chupekuéra umíva.

MBAʼÉICHAPA IKATU REJAPO

Eikuaa vaʼerã mbaʼépa rehupytyse. Epensa vaʼerã mbaʼépa rehupytyse nde diskúrsope, por ehémplo, emombeʼusépa peteĩ oiko vaʼekue, eipytyvõsépa umi nerendúvape oguerovia hag̃ua peteĩ mbaʼe térãpa emokyreʼỹse chupekuéra, ha nemanduʼa vaʼerã koʼã mbaʼére ejeprepara jave. Umi mbaʼe iñimportantevéva erétava oipytyvõ vaʼerã umi nerendúvape opilla hag̃ua pe rehupytyséva.

Eñeporandumína: “¿Mbaʼépa oiméne hasýta chupekuéra ontende ha oguerovia hag̃ua? ¿Mbaʼépa aexplika vaʼerã primeroite hesakã porãve hag̃ua chupekuéra la haʼeséva?”. Embohovái rire koʼã porandu, emohenda umi mbaʼe erétava ikatu hag̃uáicha ontende hikuái la nde diskúrso ha ohechakuaa hag̃ua siertoha la remboʼéva hína.
Emyesakã porã nde diskúrso téma. Ejapo aja nde diskúrso, emensiona jepi pe téma oguerekóva. Upearã ikatu eipuru umi palávra oĩva voi pype térã ótro ojoguáva umívape.
Umi mbaʼe iñimportantevéva isensíllo ha oñentende vaʼerã. Eiporavo reexplika hag̃ua umi mbaʼe ojogueraháva pe témandi añónte, ha emyesakã vaʼerã umíva pe tiémpo oñemeʼẽvape ndéve. Natekotevẽi reiporavo hetaiterei mbaʼe reexplika hag̃ua, péro umi reiporavo vaʼekue emyesakã porã vaʼerã. Eñatende avei ani hag̃ua embojeheʼapa umi mbaʼe eréva.

Oñepyrũre nde diskúrso ikatúma ere mbaʼe mbaʼépa hína umi mbaʼe iñimportantevéva remyesakãtava, upéicha umi nerendúva oikuaátama umíva. Upéi opakuévo ikatu emensiona jey koʼã mbaʼe pono hesarái chugui hikuái.