Notakuéra
1. ¿Mávapa hína Babilonia Guasu?
¿Mbaʼéichapa jaikuaa “Babilonia Guasu” orrepresentaha entéro umi rrelihión fálsape? (Apocalipsis 17:5). Jahechamína mbohapy mbaʼe la Biblia heʼíva Babilonia Guasúre:
Ko múndo tuichakuére oreko ipoguýpe heta mbaʼe ha okontrola umíva. La Biblia heʼi Babilonia Guasu oguapyha heta “puévlo” ha “tetãnguéra” ári. Heʼi avei orekoha “peteĩ rréino ogovernáva umi rréi yvy ariguáre” (Apocalipsis 17:15, 18).
Ndahaʼéi peteĩ goviérno ni umi negósio oĩva ko múndope. “Umi rréi” ha “umi komersiánte” noñehundimoʼãi Babilonia Guasu oñehundi vove (Apocalipsis 18:9, 15).
Oheja vai Ñandejárape. La Bíbliape oñekompara chupe peteĩ prostitútare, pórke pláta rehehápe oñentremete polítikare térã ojerure favór umi goviérnope (Apocalipsis 17:1, 2). Haʼe ombotavy heta hénte oparupiguápe ha ikáusare hetaitereíma oĩ omanóva (Apocalipsis 18:23, 24).
2. ¿Arakaʼépa ojeporavóta kuri pe Mesíaspe?
La Bíbliape ojeprofetisa vaʼekue ohasa vaʼerãha kuri 69 semána pe Mesías ou mboyve (elee Daniel 9:25).
¿Arakaʼépa oñepyrũ raʼe umi 69 semána? Upéva oñepyrũ kuri áño 455-pe ántes de Cristo. Upe áñope pe governadór Nehemías oho kuri ‘omyatyrõ ha omopuʼã jey’ hag̃ua Jerusalén (Daniel 9:25; Nehemías 2:1, 5-8).
¿Mboy tiémpopa añetehápe odura umi 69 semána? Sapyʼánte umi profesía bíblicape un día orrepresenta un áño (Números 14:34; Ezequiel 4:6). Upéicha rupi jaʼekuaa una semána orrepresentaha hína 7 áño. Upéicharõ, ko profesía orekóva 69 semána orrepresenta 483 áño (69 multiplikádo por 7).
¿Arakaʼépa opa raʼe umi 69 semána? Ñakontáramo 483 áño, pe áño 455 ántes de Cristo guive, ñag̃uahẽ áño 29 peve.a Ha kavalete upe áñope Jesús ojevautisa ha oiko chugui pe Mesías (Lucas 3:1, 2, 21, 22).
3. Tratamiénto ojepuruhápe tuguy
Oĩ tratamiénto médiko ojepuruhápe pe pasiénte ruguy. Péro koʼãva apytépe oĩ unos kuánto umi kristiáno ndoaseptáiva. Por ehémplo, oĩ oñongatukáva huguy ojopera mboyve omoĩka jey hag̃ua upéi, ha oĩ avei odonáva huguy ótrope g̃uarã (Deuteronomio 15:23).
Péro oĩ avei umi tratamiénto ha análisis heta kristiáno odesidíva oasepta. Por ehémplo, ojapoka análisis de sángre, hemodiálisis, hemodilusión, ha avei oipuru umi mákina orrekuperáva huguy ha umi mákina ombaʼapóva ikorasõ ha ipulmón vése.b Káda kristiáno odesidi vaʼerã mbaʼéichapa ojepurúta huguy peteĩ operasión aja, ojapokáta jave análisis térã osegíta jave peteĩ tratamiénto. Umi doktór ojapo jepi koʼã tratamiénto diferénte hendáicha. Upévare edesidi mboyve ejoperátapa ha ejapo mboyve peteĩ análisis térã peteĩ tratamiénto, tekotevẽ rentende porã mbaʼéichapa ojepurúta hína nde ruguy. Upévare, eñeporandumína koʼã mbaʼe:
Peteĩ tratamiéntope ojepeʼáramo michĩmi che ruguýgui ha ndokorrevéi che retepýpe, ¿opermitínepa chéve che konsiénsia amoĩka jey? ¿Apensánepa upéva haʼeha gueteri che ruguy ha upévare natekotevẽiha ‘oñeñohẽ yvýpe’? (Deuteronomio 12:23, 24).
¿Chemolestánepa che konsiénsia aaseptáramo peteĩ tratamiénto térã peteĩ operasión ojepeʼahápe chehegui michĩmi che ruguy, ha oñekambiaʼimi rire oñemoĩ jeýramo chéve? ¿Aaseptánepa ojepurúramo che ruguy ojejapo hag̃ua chugui pohã ojepurútava pe erídare pe operasión aja?
4. Separasión
La Biblia heʼi umi omendáva ndojeseparái vaʼerãha, ha heʼi porã umi ojapóva upéva ndaikatuiha omenda jey (1 Corintios 7:10, 11). Péro sapyʼánte peteĩ kristiáno ikatu hína odesidi ojesepara hembireko térã iménagui ohasáramo koʼã situasión:
Nomanteneséi ifamíliape: pe ména nomeʼẽséiramo chupekuéra umi mbaʼe oikotevẽva, térã ohejáramo chupekuéra mbaʼeveʼỹre ha ndaikatuvéi ojogua hikuái ni hembiʼurã (1 Timoteo 5:8).
Oinupã vaipáramo chupe iména térã hembireko: ohechakuaáramo ikatumaha operhudika chugui isalu, térã ikatuha voi ojuka chupe (Gálatas 5:19-21).
Iména térã hembireko omomombyryse chupe Jehovágui: ojapóramo ikatúva entéro pono oservi Jehovápe, térã siémpre oovligaséramo chupe ojapo hag̃ua umi mbaʼe Jehovápe ndogustáiva (Hechos 5:29).
5. Umi arete ha fiésta
Ñande kristiáno ndajafestehái umi arete Jehovápe ndogustáiva. Péro oĩ heta situasión tekotevẽhápe peteĩ kristiáno oipuru ikonsiénsia oikuaa hag̃ua mbaʼépa ojapóta. Jahechamína unos kuánto ehémplo:
Oĩramo heʼíva ndéve “Felís Navidad”. Ikatúnte ere chupe: “¡Grásia!”. Ha pe persóna oikuaasevéramo, ikatu reexplika chupe mbaʼérepa nderefestehái Navidad térã ótra fiésta.
Ne ména térã ne rembireko ndahaʼéiva Testígo neinvitáramo reho hag̃ua rekaru ihentekuérandi ojefesteha jave peteĩ arete. Ne konsiénsia opermitíramo ndéve reho, ikatu hína reexplika porãnte ne ména térã ne rembirekópe nderesegimoʼãiha umi kostúmbre Ñandejára ndoguerohorýiva ojejapóva upe aretépe.
Ne patrón orregalaséramo ndéve plataʼimi peteĩ arete aja. ¿Errechasa vaʼerãpa upéva? Odepende. ¿Opensátapa ne patrón repartisipaha hendivekuéra pe aretépe reaseptáramo pe rregálo? ¿Térãpa omeʼẽsénte ndéve upéva ohechauka hag̃ua oagradeseha nde traváhore?
Oĩramo álgien omeʼẽséva ndéve peteĩ rregálo peteĩ arete aja. Ikatu pe persóna heʼínte ndéve: “Aikuaa nde nderefestehaiha ko arete. Péro arregalase ningo ndéve kóva”. Ikatu oime pe persóna ikalidánte nendive. Péro ñamoĩ chupe ojapoha upéva oipotágui voi refesteha upe arete térã ohechaségui ndefiéltapa. ¿Mbaʼépa rejapóta upe situasiónpe? Ejepyʼamongeta porã vaʼerã hese, ha upéi ndete redesidi vaʼerã mbaʼépa rejapóta. Tahaʼe haʼéva upe redesidíva, nemanduʼa vaʼerã iñimportanteveha nekonsiénsia potĩ ha ndefiél Jehovápe (Hechos 23:1).
6. Mbaʼasy ikontahiósova
Jahayhu rupi ñande rapichakuérape, ñañatendeterei ani hag̃ua jaguerova hesekuéra peteĩ mbaʼasy ikontahiósova. Jajapóta upéva oñekomprováramo jaguerekoha peteĩ mbaʼasy, térã ñapensáramo ikatu hague ova ñanderehe ndajarekóiramo jepe umi síntoma. Ñande jajapo péicha pórke la Biblia omanda voi ñandéve: “Rehayhu vaʼerã nde rapichápe nde voi rejehayhuháicha” (Romanos 13:8-10).
¿Mbaʼéichapa peteĩ persóna orekóva peteĩ mbaʼasy ikontahiósova ikatu ojapo ko téxto heʼíva? Por ehémplo naiporãmoʼãi oañuã térã ohetũramo ótrope. Ndovaléi avei ipochy oĩramo noinvitaséiva chupe hógape oproteheségui ifamíliape. Ojevautisa mboyve, oavisa vaʼerã pe koordinadórpe orekoha pe mbaʼasy ikatu hag̃uáicha ojejapo umi arréglo ojeprotehe hag̃ua umi ótro ojevautisátavape. Avei, peteĩ persóna opensáramo ikatu hague ova hese peteĩ mbaʼasy ikontahiósova, iporãta ojapokáramo análisis de sángre oñemoĩ mboyve de nóvio. Orekóramo enkuénta entéro koʼã mbaʼe ohechaukáta ‘ndojepyʼapyiha umi mbaʼe chupe okonvenívarente, síno ojepyʼapyha avei umi ótrore’ (Filipenses 2:4).
7. Umi negósio ha demánda
Ikatu jajehekýi hetaiterei provlémagui japreparáramo umi dokuménto jajapo jave negósio ótra persónandi, tahaʼe jepe raʼe peteĩ ermánondi (Jeremías 32:9-12). Péro jajapóramo jepe upéva, ikatu hína mokõi kristiáno iprovlemaʼimi oñondive plátare térã ótra kósare. Upéicha jave, mokõivéva omoĩ vaʼerã ipárte ikatu hag̃uáicha osolusiona pe provléma pyaʼe ha trankílo porã haʼeñoháme.
Péro, ¿mbaʼépa jajapokuaa oikóramo peteĩ fráude, térã oĩramo ijapúva ñane kóntrape a propósito ñandereja vai hag̃ua? (Elee Mateo 18:15-17). Jesús heʼi vaʼekue oĩha mbohapy mbaʼe jajapo vaʼerã:
Mokõivéva oñehaʼã vaʼerã osolusiona hag̃ua pe provléma haʼeñoháme (ehecha jey versíkulo 15).
Ndaikatúiramo osolusiona hikuái upéicha, ojerure vaʼerã peteĩ térã mokõi ermáno iñakãguapývape oipytyvõ hag̃ua chupekuéra (ehecha jey versíkulo 16).
Ndaikatúiramo oñesolusiona pe provléma ni upeichavérõ, ojerurekuaa umi ansiánope oipytyvõ hag̃ua chupekuéra (ehecha jey versíkulo 17).
Naiporãmoʼãi umi ermáno oñodemandáramo, pórke upéva káusare ikatu oñeñeʼẽ vai Jehováre ha pe kongregasiónre (1 Corintios 6:1-8). Upéicharõ jepe, oĩ situasión tekotevẽhápe ojejapo peteĩ demánda. Por ehémplo: oĩramo ojedivorsiáva, ojehecha hag̃ua peteĩ mitã opytátapa itúa térã isýndi, peteĩ ermána oexihi hag̃ua iménape omeʼẽ hag̃ua ifamíliape hemikotevẽ haʼe peve majór de eda, ojekovra hag̃ua peteĩ segúro, peteĩ ermáno térã ermána heʼi hag̃ua pe goviérnope ndorekoiha opaga hag̃ua idéuda, térã oñekumpli hag̃ua heʼíva peteĩ testaméntope. Peteĩ kristiáno oipuru porãramo umi léi ha trivunál osolusiona hag̃ua koʼãichagua provléma, osegíta hína avei pe konsého oĩva la Bíbliape.
Upéicha avei peteĩ ermáno térã ermána ikatu odesidi oporodemanda oĩramo oporovioláva, oavusáva mitãre, oapeligráva hapichápe ojahéi vaipa rupi hese, oporomondáva térã oporojukáva. Ha ojapóramo upéicha, ikatu jaʼe osegitanteha avei pe konsého oĩva la Bíbliape.
a Áño 455 ántes de Cristo guive áño 1 ántes de Cristo peve, ohasa 454 áño. Áño 1 ántes de Cristo guive áño 1 después de Cristo peve ohasa 1 áño, pórke pe áño 0 ndoexistíri. Áño 1 después de Cristo guive áño 29 después de Cristo peve, ohasa 28 áño. Ñasumambáramo koʼã mbaʼe ohupyty en totál 483 áño.
b Rentende porãve hag̃ua koʼã mbaʼe ehecha pe artíkulo hérava “Oñeporandúva jepi” osẽ vaʼekue ko rrevístape: La Atalaya 15 de octubre de 2000.