37 DANIEL
Haʼe ojedesidi ifieltaha Jehovápe
¿AVÁIKO oimoʼãta? Ótro ladoitéma ikoʼẽ Daniel. Umi babilonio ojagarrárõ guare Judá, ogueraha vaʼekue hetaiterei hénte Babilóniape, umíva apytépe Daniel ha ihentekuérape. Hiʼarive upe viáhe ipuku vaʼekue amo 4 méserupi. Upéi pe rréi omanda ojeheka hag̃ua umi hénte apytépe unos kuánto mitãrusu ikatu vaʼerã oservi chupe pe palásiope. Koʼãva apytépe oĩ vaʼekue Daniel, Ananías, Misael ha Azarías. ¿Maʼerãpa ojegueraháta chupekuéra pe palásiope? Oiko hag̃ua chuguikuéra babilonioite.
Daniélpe ojejopy vaipaite oheja hag̃ua Jehovápe, hiʼarive mombyry oĩ ihentekuéragui
Primeroite voi Nabucodonosor omanda Aspenázpe, haʼéva pe ofisiál iñimportantevéva, okambia hag̃ua koʼa mitãrusúgui la herakuéra. ¿Mbaʼérepa? Heta téra oĩva hebréope omombaʼeguasu vaʼekue Ñandejára teépe. Por ehémplo, Daniel réra heʼise: “Ñandejára hína che hués”. Péro umi téra oreko vaʼekue umi babilonio omombaʼeguasu idioskuérape. Upémarõ Daniélpe oñembohéra “Beltsasar” heʼiséva: “Eprotehemína pe rréipe”. Péva haʼe vaʼekue peteĩ ñemboʼe ojejapóva pe dios Bélpe. Pe rréi oipota vaʼekue avei koʼã mitãrusu oiko ha opensa peteĩ babilonioichaite. Upévare omanda oñemboʼe hag̃ua chupekuéra olee ha oskrivikuaa hag̃ua umi caldeokuéra idiómape, ikatu hag̃uáicha upéi oservi pe palásiope. Péro upéva ndahaʼéiti kuri mbaʼeve, upe rire la hendýta.
Pe rréi omanda Aspenázpe osupervisa hag̃ua la ojejapóva guive oñembokatupyry hag̃ua koʼã mitãrusúpe. Chupekuéra oñemeʼẽ vaʼerã kuri pe tembiʼu ha pe víno hevéva hoʼúva avei pe rréi. Pe iporãngueténte ojeservi vaʼerã chupekuéra. Ikatu oime algúno mitãrusu ovyʼaiterei raʼe ojetrata haguére chupekuéra péicha. Péro koʼã mbaʼe nombovyʼaiete Daniélpe ni umi ótro 3 iñamígope, oipyʼapy katu chupekuéra. ¿Mbaʼérepa?
Daniel oime vaʼerã opensa raʼe péicha: “Koʼã babilonio ningo oikuaa oĩha tembiʼu Jehová ndoipotáiva ore roʼu. Péro roʼúramo koʼã mbaʼe naoreñeʼẽrendumoʼãi Jehovápe. ¿Noiméi piko upéva voi la oipotáva hína hikuái? Ha oservíramo oréve soʼo ovaléva roʼu, ¿ojehuguyʼóta piko Jehová omandaháicha? ¿Térã heʼi guaʼútante oréve ojehuguyʼo porã hague orembotavy hag̃ua? Ha oiméramo jepe ojehuguyʼo porã, ¿akarúramo hendivekuéra piko namombaʼeguasumoʼãi hína idioskuérape? Ha omeʼẽramo oréve hikuái heta víno, ¿mbaʼépa ajapóta pono ahasa la rrája ha ajapo vyrorei?”.a
Katuete Daniel oñemboʼéne raʼe ko témare ha oñeʼẽ umi mbohapy iñamígondi. Haʼe “odesidi ipyʼapýpe” ndojapomoʼãiha mbaʼeve ndogustáiva Ñandejárape. Upémarõ oho ojerure Aspenázpe animínte hag̃ua oñemeʼẽ chupe ni umi mbohapy iñamígope umi tembiʼu omandáva pe rréi. Jehová oipytyvõ rupi Daniélpe, Aspenaz ikalida hendive. Upéicharõ jepe, Aspenaz heʼi avei Daniélpe oipyʼapyha chupe la ikatúva oiko haʼekuéra ndokaruporãiramo. Aspenaz oikuaa Nabucodonosor okulpataha chupe upévare ha noponderamoʼãiha hese. Daniel ontende chupe ha ndoprotestái. Upéi Aspenaz oheja peteĩ guárdia oñangareko hag̃ua umi mitãrusúre ha oikuaa rire hikuái mbaʼépa ojapóta, Daniel heʼi pe guárdiape: “Epermitína toñemeʼẽ oréve ore rembiʼurã verdúra ha ýnte 10 díare”. Ha upéi Daniel heʼive chupe: “Upéi egueru umi ótro mitãrusúpe hoʼúva hína umi tembiʼu porãite orekóva pe rréi, ha ekompara ipintakuéra ore píntare”. ¡Oiméne ovyʼaite raʼe hikuái pe guárdia oasepta haguére la ipropuésta!
¿Reikuaápa mbaʼépa oiko ohasa rire umi 10 día? Umi 4 mitãrusu ipínta porãve enterovetégui. Upévare pe guárdia opermiti chupekuéra tosegi toʼu la ojerure vaʼekue. Ojekuaa porã Jehová ovendesi hague koʼã mitãrusúpe ojerovia ha ipyʼaguasu haguére. Núnka ndahesaráiri hikuái ko oiko vaʼekuégui.
Pe sigiénte kapítulope jahecháta Daniel amigokuéra ohasa hague peteĩ mbaʼe ijetuʼuetereíva, tekotevẽ haguépe ojerovia mbarete ha ipyʼaguasu. Daniel oikove vaʼekue oreko peve 100 áñorupi. Ha tekotevẽ vaʼekue avei ohechauka heta vése ipyʼaguasuha. Por ehémplo, haʼe omombeʼu vaʼerã kuri Nabucodonosórpe mbaʼépa heʼise umi suéño Jehová ohechaukáva chupe. Upéva ijetuʼu vaʼekue, pórke Daniel ndoikuaái mbaʼéichapa orreaksionáta ko rréi ijejapoitéva oikuaávo umi mbaʼe vai oikótava hese ha irréinore. Heta áño upe rire, haʼe omombeʼu jey peteĩ notísia peichagua rréi Belsasárpe. Upérõ guare ojaparese peteĩ po ha oñepyrũ oskrivi pe parére peteĩ mensáhe okondenáva pe rréipe. Ha Daniel pyʼaguasúpe oexplika chupe mbaʼépa heʼise upéva. Ha ijeda riréma, ojepoi chupe peteĩ pósope león vareʼa apytépe. Káda situasiónpe, Daniel ohechauka vaʼekue ipyʼaguasuha, ojapo haguéicha voi imitãvépe. Ndareíri peteĩ Jehová ánhel heʼi vaʼekue hese haʼeha “peteĩ persóna Ñandejára ohayhuetereíva”.
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa Daniel ipyʼaguasu hague?
Einvestigamína
1. ¿Oñokontradesi piko Daniel 1:1 ha Jeremías 25:1? (dp 18, 19 párr. 14, 15-wcgr).
2. Daniel 1:2 heʼi Nabucodonosor oreko hague peteĩ tesorería “oñeñongatuhápe idiós tesorokuéra”. ¿Mbaʼépa ojetopa vaʼekue ohechaukáva upéva siertoha? (it “Tesorería” párr. 3-wcgr). A
© The Trustees of the British Museum. Licensed under CC BY-NC-SA 4.0. Source. Modifications: Box added
Taʼanga A: Koʼápe Nabucodonosor oñeʼẽ pe tesoreríare, haʼéva pe lugár “oñeñongatuhápe idiós tesorokuéra”, oĩva Merodac témplope
3. ¿Mbaʼe funsiónpa okumpli vaʼekue umi ‘saserdóte ojapóva máhia’? (Dan. 1:20; it “Máhia ha echisería” párr. 2-6-wcgr). B
Taʼanga B: Peteĩ tavlíta de serámikare ojeskrivi mbaʼéichapa “oñemonguera” vaʼerã peteĩ persónape, oimérõ póra la ojapóva hese mbaʼe vai
4. Daniel ojerure vaʼekue oñemeʼẽ hag̃ua chupekuéra verdúra. ¿Mbaʼe mbaʼépa ikatu oime oike raʼe upévape? (Dan. 1:12; dp 40 párr. 25-wcgr).
Ejepyʼamongetamína ndejehe
¿Mbaʼéichapa Daniel ehémplo ikatu oipytyvõ umi imitãvape ifiél hag̃ua Jehovápe, sapyʼánte noĩriramo jepe ihentekuérandi?
Daniel ‘odesidíma kuri ipyʼapýpe’ iñeʼẽrendutaha Jehovápe (Dan. 1:8). ¿Mbaʼéichapa upéva oipytyvõ chupe ipyʼaguasu hag̃ua? ¿Mbaʼéichapa ikatu jajogua chupe? C
Taʼanga C
¿Mbaʼéicha javépa ikatu avei rehechauka ndepyʼaguasuha Daniel ipyʼaguasu haguéicha?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
¿Mbaʼépa aporandúne Daniélpe Jehová omoingove jey vove chupe?
Reikuaave hag̃ua
Ehechamína ko vidéope umi mbaʼe oñemombeʼúva ko rrelátope.
Daniel: Ojerovia oikove aja pukukue (párte 1, vidéo mbykyvéva) (13:07).
¿Mbaʼéichapa umi imitãva ikatu ipyʼaguasu ha ifiél Daniélcha?