47 MARÍA, LÁZARO ERMÁNA
“Haʼe ojapo pe ikatumíva”
MARÍA ningo ohayhueterei vaʼekue Jesúspe, pórke haʼe imbaʼeporãiterei hendive, iñermána Mártandi ha iñermáno Lázarondi. Oiméne ndoikuaái voi raʼe mbaʼéichapa oagradesepáta chupe la ojapóva. Jesús ovisita jave Betania, heta vése opytámi hogapekuéra ha péicha jave omboʼémi chupekuéra heta mbaʼe iñimportánteva. Ojekuaa Jesús ohayhueterei hague koʼã iñamígope. ¡Ndareíri Lázaro omanórõ guare haʼe omoingove jey chupe!
María ojapose avei álgo iporãva Jesús rehehápe. Haʼe oguereko vaʼekue peteĩ frásko de alavástrope “médio lítrorupi aséite perfumádo hepyetereíva, upéva ojapo nárdo púrogui”. Upe tiémpope, upéva hepyeterei vaʼekue. Peteĩ persóna oipotáramo upe kantida aséite perfumádo, ombaʼapo vaʼerã kuri haimete un áño. Ndajaikuaái mbaʼéichapa ni arakaʼe guivépa María oguereko ko aséite, péro ndorekoichéne raʼe álgo hepyvéva upévagui.
Haʼe omeʼẽseterei kuri Jesúspe peteĩ rregálo iporãitereíva, péro oikuaa upéva ndogustamoʼãiha enterovévape
María oikuaárõ guare Jesús oĩha Betániape, odesidi oho hendápe. María og̃uahẽrõ guare, Jesús osena hína kuri. Upémarõ oñemboja hendápe, oavri pe frásko ha omoĩmbaite ipýre ha iñakãre pe aséite perfumádo. Pe aséite oñepyrũ osyry Jesús pýre, upémarõ María oipeʼa iñakã rehegua ha oñepyrũ omokã chupe iñakãranguépe. Upe tiémpope, umi judiokuérape g̃uarã naiporãiete vaʼekue la peteĩ kuña oipeʼa iñakã rehegua. Péro upe moméntope, María nopensái voi hína kuri ijehe, síno mbaʼépa ikatu ojapo omombaʼe hag̃ua Jesúspe. Haʼe ojapo upéva opyta vaítaramo jepe ótra persóna renondépe. ¡Ajépa iñumildete!
Sapyʼaitérõ g̃uarã pe aséite ryakuã ojagarrapaitéma pe óga. Péro naentéroipe ogusta kuri la oiko vaʼekue. Judas Iscariote ojepichaite voi, ha por lo vísto omboliga avei umi ótro apóstolpe ojeplagea hag̃ua hendive. Judas heʼi: “¿Mbaʼére piko noñevendéi pe aséite hyakuã asýva 300 denáriore ha oñemeʼẽ umi imboriahúvape?”. Eñeimahinamína mbaʼéichapa oiméne oñeñandu raʼe María. Haʼe ningo ojagarra kuri omeʼẽ pe iporãvéva orekóva, ha koʼág̃a Jesús apostolkuéra voi la ojaʼóva chupe. ¡Aichejáranga haʼe! Oiméne opyta otĩete raʼe. ¿Péro mbaʼépa ojapo Jesús?
Jesús heʼi: “Ehejána chupe”. Katuete oiméne upépe oñekirirĩmbaite raʼe. Upéi Jesús heʼi jey: “Iporãiterei ningo pe ojapóva cherehe”. Upéva ohechauka ogusta hague Jesúspe la María ojapo vaʼekue. María oiméne ni noñeimahinái raʼe saʼipaitéma ofaltaha Jesús omano hag̃ua. Péro Jesús heʼi péicha ojepreparáma hague chupe la hete oñeñotỹ hag̃ua. Jesús oikuaa vaʼekue María ojapo hague upéva ohayhu rupi chupe, upévare heʼi voi: “Haʼe ojapo pe ikatumíva”. Ha oasegura voi: “Entéro lugár ojepredikahápe umi notísia porã ko yvy ape ári, oñemombeʼúta avei ko kuña ojapo vaʼekue. Péicha umi hénte imanduʼáta hese”. Jesús ohechakuaa vaʼekue Maríare mbaʼeichaitépa ipyʼaguasu ha imbaʼeporã. Koʼãichagua persóna ipojerávape oñemombaʼe vaʼerã, itristetereíta ningo la oñeñeʼẽ vai mbaʼéramo hese.
Upe rire avave noñanimavéima heʼi mbaʼeve. Judas osẽ voi ohopa hese ha oñepyrũma oplanea mbaʼéichapa otraisionáta Jesúspe. María katu oiméne ovyʼaiterei raʼe ohendúvo la Jesús heʼíva hese. Ohasa rire unos kuánto día, Jesúspe ojeakusa reiete, ojejuka peteĩ yvyráre ha upéi oñeñotỹ. Oikopa rire koʼã mbaʼe, upépe ae oiméne María ontende raʼe la Jesús heʼi vaʼekue. Upéicharõ jepe, hasýne raʼe chupe la oikóva iñamígore. ¡Mbaʼeichaitépa oiméne hasẽ ha oñembyasy raʼe hese! Péro katuete oiméne oipytyvõ raʼe chupe imanduʼávo umi mbaʼe porãita Jesús heʼi vaʼekuére hese.
Tres día Jesús omano rire, Jehová ojapomi peteĩ milágro impresionánte: ¡Omoingove jey Jesucrístope! Upe rire Jesús ojaparese idisipulokuérape oñembyatýrõ guare hikuái mas de 500 persóna. Posívlemente upérõ haʼe omanda chupekuéra opredika hag̃ua umi notísia porã “umi hénte entéro paisguápe” (Mat. 28:19, 20). Ha Jesús heʼi vaʼekue oimeha lugár ojepredikahápe “umi notísia porã” oñemombeʼutaha avei la María ojapo vaʼekue hesehápe. Péicha enterovéva oikuaáta mbaʼeichaitépa haʼe iñumílde ha imbaʼeporã vaʼekue. Katuete María ovyʼaitereíne raʼe oñembopyʼaguasu haguére ha omeʼẽ Jesúspe pe iporãvéva orekóva. Siémpre imanduʼáne raʼe Jesús ofelisita hague chupe ojerovia ha ipyʼaguasu haguére heʼírõ guare: “Haʼe ojapo pe ikatumíva”.
¿Moõpa oñeñeʼẽ hese la Bíbliape?
¿Mbaʼépa ere chupe?
¿Mbaʼérepa jaʼekuaa María ipyʼaguasu hague?
Einvestigamína
1. ¿Mbaʼéichapa vaʼekue María ha Marta? (Luc. 10:39, 40; Juan 11:20; ia 199 párr. 5, 6; 204 párr. 17). A
Taʼanga A
2. ¿Mbaʼérepa jahecharamoite Jesús naiprovlémai haguére omboʼe hag̃ua Maríape ha hetave kuñáme? (w99 1/9 30 párr. 1-4-wcgr).
3. ¿Mbaʼérepa jaʼekuaa tuichaiterei mbaʼe hague la María ojapóva Jesús rehehápe? (nóta de estúdio “aséite perfumádo hepyetereíva” oĩva Mat. 26:7-pe, nwtsty-wcgr). B
Indian nard: © Haijie Lu, licensed under CC BY-NC 4.0. Source; dried jatamansi: wasanajai/stock.adobe.com; alabaster jar: © The Trustees of the British Museum. Licensed under CC BY-NC-SA 4.0. Source
Taʼanga B: Nárdo poty ha hapokue, ha peteĩ frásko de alavástro. Pe aséite María oñohẽ vaʼekue Jesúsre provávlemente ojejapo pe plánta héravagui Nardostachys jatamansi
4. María omoĩ vaʼekue aséite Jesús pýre ha iñakãre. ¿Mbaʼépa ohechauka upéva? (w11 1/1 6 párr. 4, nóta).
Ejepyʼamongetamína ndejehe
Jesús heʼi vaʼekue María oelehi hague “pe párte iporãvéva” pórke haʼe omboyke hembiapo ojapysaka hag̃ua hese (Luc. 10:42). ¿Mbaʼéichapa ikatu jasegi iñehémplo? C
Taʼanga C
Jesús ofelisita vaʼekue Maríape pórke “haʼe ojapo pe ikatumíva”. ¿Mbaʼéichapa upéva ohechauka ñandéve mbaʼépa la añetehápe Jehová omombaʼéva ñanderehe? (Mar. 12:29, 30; 14:8).
¿Mbaʼéichapa ikatu ndepyʼaguasu María ipyʼaguasu haguéicha?
Ejepyʼamongetamína Jehováre
Alee rire ko rreláto, ¿mbaʼépa aaprendeve Jehovágui?
Alee rire ko rreláto, ¿mbaʼépa aaprendeve Jehová rembipotágui ha pe téma prinsipál orekóvagui la Biblia?
Posívlemente Maríape ojeporavo ogoverna hag̃ua Jesúsndi yvágape, ¿mbaʼérepa reagradese Jehovápe upévare?
Reikuaave hag̃ua
María, Marta ha Jesús oñoamigoite vaʼekue. ¿Mbaʼéichapa iñehemplokuéra ikatu oipytyvõ umi imitãvape otopa hag̃ua iñamigorã?
Jesús omombaʼe vaʼekue pe rregálo hepyete omeʼẽva María ha avei umi mokõi monedaʼi omeʼẽva pe viúda mboriahumi. ¿Mbaʼépa ñanemboʼe upéva?