PEMUJ̈UJIOBILIWAISI NAKAEMONAENEJ̈A | PEWÜJÜAWI, PEJANAWI YAJAWA
¿Dej̈ua beitsimü itsa itsajiwiyo kamuj̈ujioba?
PIAYAPÜBEJELIWAISI
“Itsajiwiyo nakamuj̈ujioba pibisiakuene waj̈aej̈anaej̈ae. Itsiata baitsi jane, aponakatsitaj̈anepanae” (jai Amanda, 17 pawaibeje).a
Pajiwiyo apojitsipae pemuj̈ujiobijawatsi, bajarapajiwi bepilotonükuenia aviónjawata apojitsipae pejumetaenej̈a pekaponaponaenü torre de controljawata, nej̈ata pibisiakuene tokopiapatsianatsi.
¿J̈amünej̈a katsitaayapübeje itsa kamuj̈ujioba aj̈a, ena yajawa, nijaamo yajawa pekakujarubiwi pibisiakuene nej̈anaej̈ae? Mapabaj̈utoje kayawenonaena bajarapaliwaisijawanüta yabara.
J̈UA BEYAPÜTANEME
Daj̈itatsi namatawenonatsi wajanakamuj̈ujiobijawa.
“Daxitatsi vaxaitsi itsajavata banacajumejemaba pibisiacuenia vajacuaicuaijainexa, pacuenia picani apo becuaicuaijaitsi” (Santiago 3:2).
“Pütsa auramü itsa itsajiwiyo kamuj̈ujioba pibisiakuene naej̈anaej̈ae” (jai Jessica).
Itsa kamuj̈ujioba, apo yabara jumaitsitsi pibisiakuene neitsitsabiabijawa daj̈itakuenejawanü.
“Pacuenia pexi pexainaejiwi, pexi piasiwaxae, itawetabiaba pibisiacuene itsa exana, bajarapijinia pacuenia Dioso pijajiwi piasiwaxae, itawetabiaba pijajiwi pibisiacuene itsa exana” (Proverbios 3:12).b
“Itsa itsajiwiyo nebijatane, bajaraj̈ua itsi taneasiwaj̈ae apotoyapüj̈anepanae atatsi” (jai Tamarawünüwa).
Pekamuj̈ujiobiliwaisijawanü kayawenonaena.
“Namuj̈unaewere pekaitawetsiliwaisi nej̈ata yapütaename j̈aniawaetsia.” (Proverbios 8:33).
“Itsa jitsipame nejamatabükuenenaweretsinej̈a, nej̈ata namatawenoname itsajiwiyo pekakuene itawetsinej̈a. Bajaraj̈ua kayawenonaena neyapütaenej̈a j̈ua itsamonae najamatabüj̈aina j̈amü yabara. Nej̈ata bajarapakuenia papibisiakuenejawanü itsimü benakueneitawetame” (jai Diana).
J̈UA BEITSIMÜ
Yapütaema j̈aniawaetsia. ¿Dej̈ua beitsimü itsa jamatabükueneanaepaname itsajiwiyo pekakueneitawetsij̈ae? Bepijiayo pütsa anaepaname, najamatabükuenekataire j̈ua jamatabüitsimü. Kanaüjüre, j̈amü meta kueneitawetsipame itsajiwiyo papibisiakuenej̈awa yabara j̈amü ata itsimü. Bajarapajiwiyo meta nejuyapijinü tsipae. Nekanaüjütsikujinae, ¿jumeyapütaneme baja dej̈uajitsia kaitaweta? (Bibliabaj̈uto jumaitsi: Eclesiastés 7:9).
“Apobeanaepanaemü, pajiwi kamuj̈ujioba apojitsipae nenajamatabüj̈ainaeyaniwa, biji rajane jitsipa pekayawenonaenej̈a” (jai Teresa).
Beweliajamatabükuenemüre. Itsa kamuj̈ujioba itsajiwiyo, pütsa ayaijamatabükuenemü. Yajawa pütsa bitso najamatabüj̈ainame itsakuenejawa nenajamatabükuenej̈anebij̈ae. Itsa beweliajamatabükuene nataneme nej̈ata bajaraj̈ua kayawenonaena. Kanaüjüre: paliwaisi meta bitso katsiatane bajarapaliwaisi meta namatawenonajitsipame pekajumaitsinej̈a. Itsa apojumekowünütsimü pekamuj̈ujiobijawa, nej̈ata bajaraj̈ua apokajamatabükueneyawenonaejitsipae nejamatabükuenenaweretsinej̈a. (Bibliabaj̈uto jumaitsi: Proverbios 16:18).
Paliwaisi katsiatane ata, bajarapaliwaisi meta namatawenonatsijitsipame pekajumaitsinej̈a.
“Namatawenoname pekamuj̈ujiobijawa nejamatabükuenenaweretsinej̈a. Itsa apojumekowünütsimü, itsa aponajamatabükuenej̈anebimü nej̈ata pibisiakuenia ponaponaename” (jai Lena).
Siwajamatabükuenebarüyamüre. Katsitaayapübeje ata nejumekowünütsijawanej̈a, itsiata besiwabarüyamü pajiwiyo kamuj̈ujioba tsipaji bajarapajiwi jitsipa nejamatabükuenebarüyajawa. (Bibliabaj̈uto jumaitsi: Salmo 141:5).
“Pepoj̈anepana itsa siwajamatabükuenebarüyamü pajiwiyo kamuj̈ujioba. Tsipaji bajarapamonae apotsiyapüj̈anepanaetsi” (jai Carla).
a Pabaj̈utota itsa wünüanü wünürubatsi bajarapamonae.
b Bibliabaj̈üto yapütaeyaej̈ana Dioso pewünü Jehová.