4. Pebarajamatabükuenej̈anepanaejawa

¿DEJ̈UA BEYAPÜTANETSI BAJARAPALIWAISI YABARA?

Pajiwi siwajamatabükuenekopata itsamonae itsakueniababiabi atatsi, bajayajebi apojamatabütsitekae. Peitsinej̈a bajaraj̈ua apobesiwajamatabükuenebarüya itajara.

BIBLIABAJ̈UTO JUMAITSI: “Itsa pacaitsacueniaba itsajivi, bajarapajivijavabelia pabarajamatabëcuenexanepanare” (Colosenses 3:13).

Aaron jumaitsi: “Itsa asiwamü itsajiwiyo, aposiwanajamatabüj̈ainaemü pijanekoni, biji rajane siwanajamatabüj̈ainame penajamatabüsaütsijawa pejamatabükuenej̈anetsinej̈a”, bajaraponü jai.

¿DEJ̈UAJITSIA META PENAMATAMOTSILIWAISI?

Itsa itoyamü tsipae bajayajebikujinae kajamatabükueneromaebijitsipa, nejamatabükuene katobijianaejitsipa, nenakojiobijawa katobijianaejitsipanua.

Julia jumaitsi: “Itsamatakabi tamona pijaliwaisi netsiatane, j̈uakujinae nejumaitsi: ‘nebarajamatabükuenej̈anepanare’ nejai. Netsiayapübeje ata, barajamatabükuenej̈anepanaj̈ü baja. Itsa bepijia barajamatabükuenej̈anepanaejitsipaj̈ü, bajayajebi namataenetsia aponajamatabübijianaebeje tsipae”, bajarapowa jai.

¿DEBEITSIMÜ TSIPAE?

NAKUENEKANAÜJÜRE

Itsa nijawa, itsa jume, amona kajamatabükuenebejiobiaej̈anaejitsipa, kanaüjüre pakueniaje:

• ¿J̈anü meta bepijia jamatabükuenenatsoninabiabajü?

• Itsa tajawa, itsa jume, tamona nejamatabükuenebejiobiaej̈ana, ¿namatawenonajü tanewajükaejawa taitaj̈utotsoniataenej̈a? Itsa jume, ¿saya baja najamatabükuenekopatajü?

PEBI, PIJAWA PENABARÜKUAIKUAIJAINEJ̈ABEJE

• ¿Bepijia panaitaj̈utotsoniatanetsibeje?

• ¿Dej̈ua beitsitsibeje wajanasiwajamatabükuenej̈anepanaenej̈abeje?

TAEMA PEMUJ̈UJIOBILIWAISIANÜ

• Pütsa jamatabüjumaitsimü nijawa, itsa jume, amona yabara: “Neitsi bajaraj̈ua yapütae ata”, pütsa jamatabüjamü.

• Jamatabükueneyapütaema nijawa, itsa jume, amona. Najamatabünapire pakuenia “daxitatsi vaxaitsi itsajavata banacajumejemaba pibisiacuenia” (Santiago 3:2).

Kimberly jumaitsi: “Itsa panajamatabükuenebejiobiaej̈anaejitsipajübeje namataenetsia, yapüj̈anepana patanaitaj̈utotsoniataenej̈abeje, itsiata ayapübeje itsa kaejiwi nanekonita. Wajabarajamatabükuenej̈anepanaenej̈a itsajiwiyo beweliajamatabükuenewi benatanetsi”, bajarapowa jai.

BIBLIABAJ̈UTO JUMAITSI: “Xaniavaetsia [bepijiakuenia] panabarëcuaicuaijamürebeje panenasivajamatabëxanepanaenexabeje” (Mateo 5:25).