3. Panenayaiyataekuenejawa

¿DEJ̈UA BEYAPÜTANETSI BAJARAPALIWAISI YABARA?

Penakojiobijiwi nayaiyatane, nasiwanua bitso kaeliwaisi apoj̈ainae ata. Pabaj̈utota Diez claves para transformar tu matrimonio, ruka pamuj̈ujiobiliwaisije: “Penakojiobijiwibeje nayaiyatanebeje, nabarükuaikuaijaibeje piayapübejeliwaisi yabara, nej̈ata yaiyataeya najumetanebeje piajibiaej̈anaenej̈abeje bajarapaliwaisianü. Bajarapakuenia barüyaya ponaponaenabeje”.

BIBLIABAJ̈UTO JUMAITSI: “Pajivi asiva itsamonae ata, daxita xua xanepana, ëponënexa apo natonajamatabëxainae” (1 Corintios 13:4, 5).

Miqueas jumaitsi: “Yaiyataniji tajawa tsipaji bitso asiwanü, apojamatabükuenebejiobiaej̈anaenü tsipae, asiwanü patanakojiobijawabeje”, bajaraponü jai.

¿DEJ̈UAJITSIA META PENAMATAMOTSILIWAISI?

Penakojiobiliwaisi peyapütaewi, bajumaitsi: “Penakojiobijiwibeje itsa aponayaiyataebeje nabarükuaikuaijaibeje pibisialiwaisi, piabejejume, pebijiajume ata, nej̈ata naj̈uabijitsipabeje”, bajai.

Brian jumaitsi: “J̈amü itsa barükuaikuaijamü nijawa pebijiajumeta, itsa kapokaponame, nej̈ata jamatabükuenebejiobi tsipae bajarapowa, nijawa aponajamatabükuenekopatsi tsipae j̈amüjawabelia”, bajaraponü jai.

¿DEBEITSIMÜ TSIPAE?

NAKUENEKANAÜJÜRE

Najamatabünapire pakuenia panabarükuaikuaijamübeje pasemanajawawerena. J̈uakujinae nayanijobare:

• ¿Depaepatobeje jumeaebame pekuaikuaijaijawa? ¿Depaepatobeje barükuaikuaijamü pej̈aniajumeta?

• ¿Depakuenia najamatabükueneitajütame neyaiyataejawa?

PEBI, PIJAWA PENABARÜKUAIKUAIJAINEJ̈ABEJE

• ¿Dej̈ua beitsitsibeje meta wajanayaiyataenej̈abeje?

• ¿Dej̈ua ej̈anatsibeje, najumaitsitsibeje namataenetsia apowajanayaiyataekuenebeje?

TAEMA PEMUJ̈UJIOBILIWAISIANÜ

• Kaejiwi kanakujitsia payakinarebeje akueyabi paliwaisibeje kajamatabükueneitajütsipa pekayaiyataenej̈a. J̈uakujinae panatsitajürebeje paliwaisi payakinamebeje, panajamatabükuenesaümürebeje ata paneitsinej̈abeje bajarapakuenia.

• Najamatabüj̈ainare nijawa, itsa jume, amona pej̈aniakuene pej̈ainaejawa. Jumeitsimürenua: “Barüyanü pej̈aniajamatabükuene nej̈ainaej̈ae”.

Megan jumaitsi: “Tayaiyataenej̈a tamona najamatabükuenesaütajü j̈aniawaetsiakuenia taponaponaenej̈a, tabarüyaej̈anaenej̈a bajaraponü. Itsajawata tsikirikuenejawayo ata, bajarapakuenia najamatabükueneitajütajünua tayaiyataejawa”, bajarapowa jai.

Kuenej̈anepana nijawa, itsa jume, amona itsa jumaitsi: “Jamatabükuenebarüyanü taneyaiyataej̈ae”.

BIBLIABAJ̈UTO JUMAITSI: “Dioso bitso pacaasiva. Pacaitapetanua papijajivinexamë. Bajaraxuata paitaxutotsoniataeyabiabianame itsamonae ata. Nexata ëpexaniajamatabëcueneta pajinavanapaename. Beveliajamatabëcuenevi nataeya pajinavanapaename. Pajamatabëcuenesaëmë tsavanapae tsane itsamonae, bajayajebi pacaitsacueniababiabi ata” (Colosenses 3:12).