6. Bekueneitaweta pej̈i

¿DEJ̈UA BEYAPÜTANETSI BAJARAPALIWAISI YABARA?

Disciplinajume jumaitsi pakuenia wajakujarubinej̈a wajaj̈i j̈aniawaetsia pejinawanapaenej̈a. Itsiata kaematakabi kanakujitsia pej̈i pej̈ainaewi betsipaeba pej̈ijawabelia pej̈anialiwaisi pekuenej̈anetsinej̈a, bajarapakuenia nej̈ata pej̈anialiwaisi peitapetsinej̈a.

¿DEJ̈UAJITSIA META PENAMATAMOTSILIWAISI?

Ajena pamatakabi itsamonae pej̈i pej̈ainaewi tsitaayapübejetsi pekuenej̈anetsinej̈a pejamatabükuenebijianaeyaniwa pej̈i. Itsiata baitsi jane pej̈aniajamatabükuenewi pej̈i pej̈ainaewi pej̈anialiwaisianü rajuta pej̈ijawabelia, kujarubanua pejumekowünütsinej̈a bajarapaliwaisianü.

Pamela jumaitsi: “Pej̈i pej̈ainaewi apobetokopatsi pej̈ijawabelia pijakuata pejitsipaekuene peitsinej̈a, nej̈ata itsa atiri tsane pej̈aniakuene itsi tsane. Itsa bajaraj̈ua apoitsi tsane, nej̈ata pej̈i bejera tsane apopej̈ainaenü pekatoketsijawa. Itsamatakabi nej̈ata pibisianamuto itapetsiana”, jai bajarapowa.

¿DEBEITSIMÜ TSIPAE?

Itsimüre j̈ua jumaitsimü. Nej̈ünato itsa apokajumeyaiyatae, yapütaeyaej̈anare nekuenej̈anetsinej̈a bajaraj̈ua yabara. Itsa kajumekowünüta pijinia, nej̈ata barüyataema.

Christine jumaitsi: “Wajamatakabita pejewaj̈i itsajawata apojumekowünütsi pijamonae, bajaraj̈uata barüyataeyabiabajü itsa taj̈i nejumekowünütabiaba. Nej̈ata bajarapakuenia taj̈i toyapüj̈anepanatsi takuenej̈anetsijawa”, bajarapowa jai.

BIBLIABAJ̈UTO JUMAITSI: “Pajivi pibisiacuene exana, bajarapajivi juya pibisiacuene tocopiapatsianatsi” (Gálatas 6:7).

Pej̈aniajamatabükuenenümüre. Itsa nej̈i muj̈ujiobijitsiamü kopiaya beyapütaneme pijawai, pekuenekaüjüpaejawatsi, pakuenia papibisiakuenenua itsi. Kuenej̈anere nej̈ijiwiyo papibisiakuenejawa yabara ej̈ana. Kanaüjüre, itsa nej̈ünato apokajumekowünütsi celular pekanamuj̈usitsikuene yabara, nej̈ata meta bewekuapitame. Beayailiwaisi pütsa taneme itsa tsikiriliwaisiyo.

Wendell jumaitsi: “Najamatabükuenekataitabiabajü tayapütaenej̈a itsa taj̈ünato pibisiakuene ej̈ana apoyapütaenejewa. Wajakuenej̈anetsinej̈a wajaj̈i, bejumeyapütanetsi: ¿Dej̈uajitsia wajaj̈i apojumekowünütsi?”, bajaraponü jai.

BIBLIABAJ̈UTO JUMAITSI: “Paxamë pijinia panexi panexainaevi, pëtsa panexi anaeya paitorobabiabame papecajumecovënëtabiabinexa xua paitorobame. Tsipaji saya belia panexi jamatabëcuenefaefaenaejitsipa” (Colosenses 3:21).

Pajamatabükuenej̈anepanare. Itsa panej̈i pakuenej̈anetame jamatabüj̈anepanaeyakuenia paej̈anare, bajarapakuenia toyapüj̈anepanaenatsi pekajumekowünütsinej̈a, yapütaenanua j̈ua ej̈ana.

Daniel jumaitsi: “Pakujinae taj̈ünato jamatabükuenenawüj̈aniabiaya itsakuene itsi, pajumaitsinübeje: ‘Ajena meta j̈anepanaeya apoej̈anaemü, itsiata jamatejemamüre tsipaji pej̈aniakuenia ej̈anabiabame itsajawanüta. Paj̈anübeje pakayawenonaenatsibeje nejamatabükuenej̈anetsinej̈a’, pajanü tsabiabibeje”, jai bajaraponü.

BIBLIABAJ̈UTO JUMAITSI: “Majamatabëcueneitsije pajivi asiva itsamonae ata. Bajarapajivi bajayajebi itsacueniabi atatsi, ajamatabëcuenesaë bajarapamonaejavabelia. Pajivi asiva itsamonae ata, itaxutotsoniatane bajarapamonae” (1 Corintios 13:4).