7. Bekujaruba pej̈aniakuenejawanü

¿DEJ̈UA BEYAPÜTANETSI BAJARAPALIWAISI YABARA?

Pej̈aniajamatabükuenejawanü nakayawenona wajapej̈aniajamatabükuenewinej̈a. ¿J̈amü nej̈aniajainü? Itsa bajarapakuenia itsimü, nej̈ata nej̈i ata bajarapakuenia itsi tsane.

Pej̈aniajamatabükuenenü banakueneba, pewünüjiwi namatajüpaeya batane, pitaj̈utotsoniataenünua. Bajarapaliwaisianü j̈ainanajetaruka pewitsabanajetarukaekujinae.

BIBLIABAJ̈UTO JUMAITSI: “Kujarubare pejewaj̈inükujinae pakuenia beponapona, nej̈ata itsa perujunüyo aponakofünütsi tsane” (Proverbios 22:6).

¿DEJ̈UAJITSIA META PENAMATAMOTSILIWAISI?

Ajena pamatakabi pej̈aniajamatabükuenejawanü namatamota bitso. “Ajena pamatakabi ayapübeje wajaj̈i wajaewetsinej̈a pibisiakuenewekua itsa taeyeka celularjawata, computadorajawata. Itsa wajaj̈ijiwiyo nakamuj̈uneniaeka kuenekaüjüpatsi petaeyekaejawa piabejekuene”. Bajarapakuenia jumaitsi pej̈i pej̈ainaewa Karynwünüwa.

BIBLIABAJ̈UTO JUMAITSI: “Pejamatabëcuenevitsabivi […] najamatabëxainabiaba pexanaenexa ëpexaniacuene. Apo jitsipae pibisiacuene pexanaejava” (Hebreos 5:14).

Penajamatabükueneitajütsijawa itsamonaejawabelia namatamota bitso. Itsa jumaitsitsi “pej̈aniakuene”, “j̈anepana”, itsa yawenonanajetarukatsi itsamonae pepopej̈aniakuene bajaraj̈ua. Itsiata itsamonae bajarapakuene apoitsi. Taenajetarubenatsi bitso jiwi jamatabükueneenanajetarubenatsi pijacelular yabara.

BIBLIABAJ̈UTO JUMAITSI: “Xua pexaniacuene, paxamë pajitsipame itsamonae papecatoexanaenexa, copiaya paxamë bajarapapexaniacuene patoexanare bajarapamonaejavabelia” (Lucas 6:31).

¿DEBEITSIMÜ TSIPAE?

J̈aniawaetsia tsipaebare j̈ua beitsi. Ajena pamatakabi itsamonae peyapütaewi jumaitsi: “Itsa pej̈i pej̈ainaewi muj̈ujioba pejewaj̈ijawaweliakujinae penaperabükenetsiataeyaniwa tsipaji piabejekuene, nej̈ata pej̈i apoitsi tsane bajarapakuenia”, jai bajarapamonae.

TAEMA PEMUJ̈UJIOBILIWAISI: Taema paliwaisianü pitsapa noticiajawa nekujarubinej̈a nej̈i pej̈aniakuenejawanü yabara. Pakuene jumetaneme penabejawa kueneitoyajawa yabara, jumaitsimü tsipae: “Abeje saya ¿dej̈uajitsia bajarapamonae bajarapakuenia nakueneitajüba?” jamü tsipae.

Brandon jumaitsi: “Pejewaj̈i peitapetsinej̈a pej̈anialiwaisi, kopiaya beyapütane j̈ua j̈anepana, j̈ua abeje”, bajaraponü jai.

Kujarubare pej̈aniajamatabükuene pej̈ainaenej̈a. Tsikirijiwiyojawaweliakujinae itsa yapütane peyaiyataekuene itsamonae, nej̈ata jumaitsi tsipae “pej̈aniakuene”, “j̈anepana”. Itsa pejewaj̈i j̈aniawaetsia yapütane apobenasiwakanaüjütsi übajaraponünej̈a, biji rajane beyawenona pijamonae, peyakinaewi, peponaponaetomarapijiwi, bajarapakuenia nej̈ata jamatabükueneyawenonaena itsamonae”, bajarapaliwaisi rubena pabaj̈utota Padres sin fronteras pejaibaj̈uto.

TAEMA PEMUJ̈UJIOBILIWAISI: Itorobare nej̈i peitsinej̈a itsakuenejawa, bajarapakuenia yapütaena peyawenonaenej̈a itsamonae.

Tara jumaitsi: “Itsa nej̈i yapütane penakuenebijawa nijabota pejewaj̈ijawaweliakujinae, nej̈ata pakujinae nawereta itsakuenejawa apotsitaayapübejetsi tsipaji baja kujarubame bajarapakuene”, jai bajarapowa.