“¿Jitsipaejitsipame nej̈i pekajamatabükuenejüpaejawa?”
PEJ̈I PEJ̈AINAEWINEJ̈A
8. Pej̈aniakuene betsitaitsi
¿DEJ̈UA BEYAPÜTANETSI BAJARAPALIWAISI YABARA?
Pej̈i pej̈ainaewi pej̈aniakuene betsitaitsi pakuenia kujaruba. Itsa kujaruba pej̈ijiwiyo penajumetsünütsinej̈a itsa jaitatsi, j̈uakujinae nej̈ata apobeewetsi pej̈ijiwiyo pej̈aniajailiwaisi pekuaikuaijainej̈a.
David jumaitsi: “Itsamonae bajumaitsi: ‘Ej̈anare pakuenia kajumaitsitsi, pütsa itsimü pakuenia ej̈anajü’, bajaraj̈ua apoyapüj̈anepanae pej̈ijiwiyonej̈a. Pakuenia esponjajawa batsutsune, pejewaj̈i ata baitsi. Itsa kujarubatsi itsaliwaisi, j̈uakujinae apoej̈anaetsi bajarapakuenia, nej̈ata nakanajamatabünapitsiaej̈anaena j̈ua itsitsi”, jai bajaraponü.
BIBLIABAJ̈UTO JUMAITSI: “‘Pëtsa panacobetoxotame’, pajamë tsabiabi itsamonaejavabelia. Itsiata paxamë panacobetoxotabiabame” (Romanos 2:21).
¿DEJ̈UAJITSIA META PENAMATAMOTSILIWAISI?
Pejewaj̈ijiwiyo ata, pewüjüawi, pejanawi ata, jitsipa pekuenepitsinej̈a pakuenia tane paj̈ajiwi, penajiwi ata. Nej̈ata itsa panej̈i panej̈ainaewi paitsimü pakuenia pajumaitsimü, bajarapakuenia pamatakaponaename panej̈ijiwiyo pej̈anianamutojawabelia.
Nicole jumaitsi: “Itsajawata ayapübeje wajayapütaenej̈a itsa wajaj̈ijiwi nakanamuj̈unaeweta, itsiata nakayapütaeyaej̈anaena itsa apoej̈anaetsi pakuenia jumaitsitsi. Wajaj̈i nakanaitaj̈utokaeweta apoyapütaenejewatsi”, bajarapowa jai.
BIBLIABAJ̈UTO JUMAITSI: “Pamonae Dioso pejamatabükueneta jumeyapütane peliwaisijawanü, apoyamaj̈üitojorobabiabi” (Santiago 3:17 TNM).
¿DEBEITSIMÜ TSIPAE?
Nayanijobare: “¿J̈aniawaetsia meta barüponaponajü tajawa, itsa jume, tamona, taj̈i yajawa? ¿Dej̈ua bataniji televisiónjawata? ¿Depamonae banaimoj̈oyobajü? ¿Depakuenia siwanajamatabüj̈ainajü itsamonae?”. Itsiata, ¿jitsipaejitsipame nej̈i pekajamatabüjüpaejawa?
Cristina jumaitsi: “Apopaitorobinübeje pataj̈i pejumeyaiyataenej̈a j̈ua paj̈anübeje apopajumeyaiyataenübeje”, bajarapowa jai.
Itaj̈utotsoniataema. Pej̈ijiwiyo yapütane pakuenia paj̈a, pena ata nekoni j̈ainaejitsipabeje, bajaraj̈uata itsa wajütame nijawa, itsa jume, amona, nej̈ijawabelia ata, pekabarajamatabükuenej̈anepanaenej̈a, bajarapakuenia kujarubianame pej̈aniajaijiwinej̈a, beweliajamatabükuenewi penataenej̈anua.
Robin jumaitsi: “‘Neitaj̈utotsoniataemaʼ, bejaitsi pakujinae jamatabükuenebijianatsi itsamonae, nej̈ata wajaj̈i yapütaena pakuenia beitsi”, jai bajaraponü.
Wendell jumaitsi: “Pakuenia waj̈aitsi ej̈anatsi, nej̈ata bajarapakuenia itsi tsane wajaj̈i. Pej̈aniakuene beitsitsi tsabiabi tsipaji wajaj̈i nakanaitaj̈utokaeweta. Bajarapakuenia nej̈ata daj̈itamatakabi kanakujitsia kujarubabiabatsi pej̈aniakuenejawa”, jai bajaraponü.