J̈aniawaetsia nenayapütaej̈ae ayailiwaisi katokopiapatsi ata, yasipitsapaename.
PEWÜJÜAWINEJ̈A, PEJANAWINEJ̈A ATA
9. Nijakuata nayapütaema
¿DEJ̈UA BEYAPÜTANETSI BAJARAPALIWAISI YABARA?
J̈amü apojamatabükuenejüpaemü itsamonaejawabelia, tsipaji j̈amü kaenümü, nijapej̈aniakuene j̈ainame, nejumekowünütsijawanua j̈ainame.
¿DEJ̈UAJITSIA META PENAMATAMOTSILIWAISI?
Itsa j̈aniawaetsia nayapütaneme, apokopatsimü tsane nejumej̈aniataejawa neitsinej̈a j̈ua itsapewüjüawi pekatojitsipaekuenia.
Adrian jumaitsi: “Itsamonae bepamuñeco penubenaewi pese pekanajetsibojawata. Bajarapamuñeco apoitapetsi pakuenia naj̈atatsijitsia, itsajiwiyo j̈atatabiabatsi”, jai bajaraponü.
Courtney jumaitsi: “Najamatabükueneweretajü pej̈aniakuene taitsinej̈a aponetsiyapüj̈anepanae ata. Yapütaniji pajiwiyo bepanajuajinawanapajü itsa pej̈aniakuene paej̈anabiabajü, bajaraj̈ua neyapütaeyaej̈ana bajarapamonae pej̈aniajamatabükuenewi”, jai bajarapowa.
BIBLIABAJ̈UTO JUMAITSI: “Pëtsa paexanavanapame pacuenia exanavanapa Dioso apo pejumecovënëtsivi. Biji rajane panajamatabëcuenecopare Diosojavabelia papecarajutsinexa pejanajamatabëcuene” (Romanos 12:2).
¿DEBEITSIMÜ TSIPAE?
Nenayapütaenej̈a nijakuene aekonoj̈aeta, pakuenia jamatabükueneitsimü tsipae, kanaüjüre papej̈aniakuene itsimü tsabiabi, j̈ua abaj̈ü katosajina, kanaüjürenua j̈ua jumej̈aniataneme. Nej̈anaenej̈a bajarapakuenia nayanijobare paliwaisije:
Papej̈aniakuene itsimü tsabiabi: “¿Dej̈ua meta yapütaniji taitsijawa? ¿Najamatabükuenekataitabiabajü pibisiakuene taitsiyaniwa? ¿J̈anü meta bepijiayo bapatajü, pej̈aniajamatabükuenenünü, ayaikuenia nakuenebabiabajünua? ¿Dej̈uajawanü ej̈anajü j̈aniawaetsia?”
TAEMA PEMUJ̈UJIOBILIWAISI: Itsa katsiakuenebi neyapütaenej̈a nijakuene, wajüre aj̈a, ena, pejamatabükuenej̈anepanaejiwiyo pekayawenonaenej̈a.
BIBLIABAJ̈UTO JUMAITSI: “Pajivi pexaniacuene exanaponapona, bajarapajivi jamatabëcuenebarëya Dioso pitabarata. Itsiata baitsi jane [...] apo bejamatabëjumaitsi mapacueniaje: “Xanë itsamonaevecua pexaniacuene Dioso toexanaponaponajë,” apo bejamatabëjai.” (Gálatas 6:4).
J̈ua abaj̈ü katosajina: “¿Dej̈ua netosajina tanajamatabükuenej̈anetsinej̈a? ¿Depaepatota najamatabüj̈ainabiabajü pibisiakuene yabara? ¿Depaepatota meta benajamatabükuenekataitajü?”
BIBLIABAJ̈UTO JUMAITSI: “Itsa jumaitsitsi: “Vaxaitsi cajena aneconijibitsi”[…], itsa jaitsi, nexata saya jamatabëcuenenavëxaniabatsi” (1 Juan 1:8).
J̈ua jumej̈aniataneme: “¿Depapej̈anialiwaisi meta nematakapona? ¿Dej̈uajitsia? ¿Najamatabükuenekopatajü Diosojawabelia? ¿Dej̈uajitsia jumej̈aniataniji Dioso peponaponaejawa? ¿Dej̈ua netsitapibisiajamatabükuenejawanü? ¿Dej̈uajitsia? ¿Depakuenia najamatabüj̈ainajü tawajünaeyabelia?”
BIBLIABAJ̈UTO JUMAITSI: “Itsa natsiwajünaekanaüjütame neitsiwajünaeya, j̈aniawaetsia ponaponaename. Nenatsiwajünaetaejawa j̈aniawaetsia kajamatabükueneewetsiana” (Proverbios 2:11).