Nejumekowünütsijawa aj̈a, enabeje, bepekowaitsikuene palata bancojawata. Itsa matamotame pekatsikopatsipalata bancojawata, nej̈ata katsikopatsipa ikatsia. Bajarapakuenia najüpabeje itsa aj̈a, enabeje jumekowünütaponame, nej̈ata kajumej̈aniataena nej̈aniajainüj̈ae.
PEWÜJÜAWINEJ̈A, PEJANAWINEJ̈A ATA
10. Pej̈aniajaijiwi
¿DEJ̈UA BEYAPÜTANETSI BAJARAPALIWAISI YABARA?
Pej̈aniajaijiwi yaiyatane jiwi pitorobiliwaisianü, pakuenia jumaitsi baej̈ana, jumaitsi tsabiabi pej̈aniajailiwaisi, bajarapakuenia paj̈ajiwi, penajiwi ata, peyapütaewi, petuj̈anewi ata yaiyatanetsi.
¿DEJ̈UAJITSIA META PENAMATAMOTSILIWAISI?
Itsa aj̈a, ena katane pej̈aniakuenejawa nej̈anaejawa, nej̈ata kakopatsiana nejamatabükueneta nej̈anaenej̈a.
Sarai jumaitsi: “Aj̈a, ena ata kajamatabükueneyapütaena nej̈aniajaijawa itsa j̈aniawaetsia ponaponame bajarapamonaeta, pakujinae imasia ponaponame ata”, jai bajarapowa.
BIBLIABAJ̈UTO JUMAITSI: “Panajamatabükueneliwaisiüjüre itsa j̈aniajai bajarapakuenia pajamatabüitsimü” (2 Corintios 13:5 TNM).
¿DEBEITSIMÜ TSIPAE?
Aj̈a, ena yajawa pekajamatabüj̈aniataenej̈a beitsimü pakueniaje:
Kuaikuaijamüre pej̈aniajailiwaisi. Itsa jemaliwaisi kuaikuaijamü, nej̈ata itsamonae apokajumej̈aniatae tsipae. Biji rajane itsa kuaikuaijamü tsabiabi pej̈aniajailiwaisi, pibisiakuene ej̈anae atamü, nej̈ata itsamonae kajumej̈aniataena.
Carlos jumaitsi: “Yapüj̈anepana netsipaebinej̈a pej̈aniajailiwaisi pakujinae pej̈aniakuene ej̈aname, itsiata kajamatabüj̈aniajaitaena itsa tsipaebame pej̈aniajailiwaisi pakujinae katoayapübeje ata”, bajaraponü jai.
BIBLIABAJ̈UTO JUMAITSI: “Pajitsipaj̈u j̈aniajaikuenia patajinawanapaejawa” (Hebreos 13:18 TNM).
Pej̈aniajaijamatabükuene: Estados Unidos nakuajawata, jiwi ayaibitsaüto recursos humanos peyapütaewi, yapütaeyaej̈ana pakuenia petsitanamatamotsikuenetsi pej̈aniajaijamatabükuenewi penakuenebijawa pej̈ainaenej̈a. Itsa pej̈aniajaijamatabükuene j̈ainame kayawenonaena ata nenaweretsinüjawabelia.
Sara jumaitsi: “Itsa ej̈anajü bitso aponeitorobinejewa, bajaraj̈ua taj̈a, taenabeje yapütaena. Itsa pej̈aniajaijamatabükuene j̈ainajü nejumej̈aniajaitaena”, jai bajarapowa.
BIBLIABAJ̈UTO JUMAITSI: “Yapütaniji tanejumekowünütsijawanej̈a takaitorobikuenia, yapütanijinua matatoj̈enetsia itsimü tsane takaitorobikuenia” (Filemón 21 TNM).
Najamatabükueneewere. Itsa itsajiwiyo witsaba yapüj̈anepana wajayapütaejawa, biji rajane apoyapütaetsi pejamatabükuenenaweretsijawa.
Brandon jumaitsi: “Aj̈a, ena, itsamonae yajawa pekajumej̈aniataenej̈a, benajamatabükuenesaütame pej̈aniajaijamatabükuene nej̈ainabiabinej̈a”, bajaraponü jai.
BIBLIABAJ̈UTO JUMAITSI: “Pajamatabëcuenesaëmë tsavanapae tsane itsamonae, bajayajebi pacaitsacueniababiabi ata” (Colosenses 3:12).