11. Benakuenebame ayaikuenia

¿DEJ̈UA BEYAPÜTANETSI BAJARAPALIWAISI YABARA?

Ayaikuenia penakuenebiwi apojamatabünatsijepae penakuenebijawa. Bajarapajiwi banakueneba bitso jamatejema pekaj̈itajarabinej̈a j̈ua namatawenona, peyawenonaejawanua itsamonae apoyapüj̈anepanae ata penakuenebijawa.

¿DEJ̈UAJITSIA META PENAMATAMOTSILIWAISI?

Kaematakabi kanakujitsia benakuenebatsi wajakueneta. Wajamatakabita ayaibitsaütoj̈aneto apotsitaj̈anepanaetsi ayaikuenia penakuenebijawa, bajaraj̈uata itsa najamatabüsaütatsi wajanakuenebinej̈a j̈aniawaetsia, bitso j̈anepana (Eclesiastés 3:13).

Reyon jumaitsi: “Jamatabükuenebarüyanü tsabiabi itsa ayaikuenia nakuenebajü, bajaraj̈uata bitso jitsipabiabajü tanakuenebinej̈a, itsa j̈aniawaetsia nakuenebabiabatsi itsamonae nej̈ata nakayaiyataena”, jai bajaraponü.

BIBLIABAJ̈UTO JUMAITSI: “Pajiwi nacueneba, xainabiaba pexainaejawa. Xainabiabanua pexaejawa-ata” (Proverbios 14:23).

¿DEBEITSIMÜ TSIPAE?

Papemuj̈ujiobiliwaisianüje kayawenonaena nej̈ainaenej̈a pej̈aniajamatabükuene nenakuenebijawata.

Yapütaema j̈aniawaetsia nenakuenebinej̈a. Itsa nakuenebaponaponame nijabota, itsa yakinamenua escuelajawata, itsa nakuenebamenua, pütsa najamatabüepatajürübame itsakuenejawanüta. Itsa nakuenebame j̈aniawaetsia najamatabüsaüre bepijiayokuenia neweretsinej̈a, itsa bajarapakuene itsimü, barüyamü tsane.

BIBLIABAJ̈UTO JUMAITSI: “¿Deitsi meta tsane pajiwitonü j̈aniawaetsia tonakueneba? Nukaena peyanakuaewetsinü pitabarata, saya apoüjiwi pitabarata” (Proverbios 22:29).

Siwanajamatabüj̈ainare itsamonae. Itsa j̈aniawaetsia ej̈aname pakuenia kaitoroba, nej̈ata itsamonae kasiwajamatabükuenebarüya tsane. Itsa jumekowünütame j̈ua aj̈a, ena kaitoroba neitsinej̈a nijabota, daj̈ita nijamonae tsitaj̈anepanaenatsi.

BIBLIABAJ̈UTO JUMAITSI: “Bitso jamatabëcuenebarëyatsi itsa rajutatsi itsamonaejavabelia vajanacarajutsijava matatoxenetsia” (Hechos 20:35).

J̈aniawaetsia betonakuenebame. Pütsa ej̈aname üpekaitorobijawa, ej̈anare itsajawayo ata, bajarapakuenia j̈aniawaetsia j̈amü natsiwajünaeyapütaename. Ayaikuenia nakuenebare nejamatabükueneta, ej̈anare itsakuenejawayo apokaitorobinejewa (Mateo 5:41).

BIBLIABAJ̈UTO JUMAITSI: “Itsa j̈aniawaetsia nakuenebame, pütsa ej̈aname pekaitorobij̈ae, biji rajane nakuenebare nejitsipaej̈ae” (Filemón 14, TNM).

Najamatabütaeya nakuenebare. J̈aniawaetsia penakuenebiwi aponakuenebi üdaj̈itajebi. Itsa nakuenebatsi barüyaya nej̈ata benakueraewetatsi yajawa.

BIBLIABAJ̈UTO JUMAITSI: “J̈anepana wajanakueraewetsijawa, tsipaji itsa aponakueraewetsitsi nej̈ata bewajabarajinaekuene jowibo” (Eclesiastés 4:6).