Doce ponübeje peyaenebiwi

Israelitawi wekuapona Sinaíyenepanatsutowekua. Najetarubena Paránwünü petsewitusatojawaberena pepatsinej̈a Cadéswünüjawata. Nej̈ata bajarajota Jehová jumaitsi Moisésjawabelia: “Itorobare 12 ponübeje kaenakaemonae kanakujitsia, kaepebi itapere peyaenebinej̈a Canaán nakua, paira rajutsianajü israelitawinej̈a”. Nej̈ata Moisés itapeta 12 ponübeje, jumaitsinua: “Paponare Canaán nakuajawabelia, payaenebare itsa bajarapairata j̈anepana wajaubinej̈a. Payaenebarenua itsa bajarajota jinawanapa jiwi piasaübejewi, itsa jume, piasaüjibiwi itsa jinawanapanua pijataj̈unaebonüta, itsa jume, ayaitomaraj̈anetonüjawata”. Nej̈ata naropoba 12 peyaenebinübeje Canaán nakuajawabelia. Bajarapamonaeta najetarukabeje Josuéwününü, Calebwününü yajawa.

Pepuayaenebiweretsi bajarapaira 40 pamatakabibejekujinae nawiabarena. Kaponarena higokuai, granadakuai, uvakuai ata, tsipaeba paliwaisi ataje: “Canaán bitso pej̈anianakua, itsiata baitsi jane jinawanapa piasaübejewi, bajarapanakuata j̈ainanua peyanaitakaranatsijawanü”. Nej̈ata Caleb jumaitsi: “¡Kueneamoneyabijitsipatsi! Ponaliatsi bajarabelia”. ¿Dej̈uajitsia bajaraj̈ua jumaitsi Caleb? Tsipaji bajaraponü, Josué ata najamatabürutabeje Jehovájawabelia. Itsiata 10 peyaenebinübejewekua jumaitsi: “Apoponae tsanetsi, bajarapamonae piapiawi, piasaübejewinua waj̈aitsiwekua. Waj̈aitsi saya baja betübütoj̈itsi”.

Nej̈ata israelitawi jamatabükuenefaefaena, bajaraj̈uata barakuaikuaijai Moisés, Aarónbeje yabara, nej̈ata bajarapamonae barajumaitsi: “Itapetatsi nej̈ata itsawajanakamatakaponaenü, nawiabaliatsi kaewüalia Egipto nakuajawabelia. ¿Dej̈uanej̈a ponaenatsi Canaán nakuajawabelia? ¿Wajanakabeyaj̈uabinej̈a?”. Josué, Calebbeje jumaitsibeje: “Bejumekowünütatsi Jehová. Bajaraponü nakaewetsiana. Pütsa pajunawame”. Itsiata israelitawi apojumekowünütsitsi. Biji rajane, jamatabübeyaj̈uaba Josué, Calebbeje.

¿Dej̈ua itsi Jehová? Bajaraponü jumaitsi Moisésjawabelia: “Pej̈aniakuene siwaitsinü israelitawijawabelia..., itsiata bajarapamonae aponejumekowünütsi tsawanapae. Bajaraj̈uata jinawanapaeyaej̈anaenajü petsewitusatojawata 40 pawaibeje ata petokopiapatsijawabeliatsi petüpaenej̈a. Saya baja pej̈i, Josué, Caleb ata jinawanapaena paira rajutsiapaebajü israelitawi”.