Bajarapamonae apojamatabüjumekowünütsi Jehová

Bej̈uakujinae j̈ua abaj̈ü israelitawi jinawanapa petusatojawata, Coré, Datán, Abiram yajawa 250 papebibeje apojumekowünütsi Moisésjawabelia, jumaitsitsi: “¡Pajamatabükuenekueranajü baja paj̈amübeje yabara! ¿Dej̈uajitsia j̈amü bepanematakaponame? ¿Dej̈uajitsia Aarón sacerdotewi pematakaponaenü? Jehová üpaj̈amübeje apopakayajawabeje biji rajane, daj̈ita nakayajawa”. Jehová apotsitaj̈anepanaetsi j̈ua jumaitsi bajarapamonae apopejumeyaiyataej̈aetsi.

Moisés jumaitsi Coréjawabelia, peyajawajinawanapaewitsijawabelia ata: “Merawia paponarenamüre tabernáculobojawawerena yajawa pakaponaremena panijawaj̈ij̈i wünükaeya inciensojawanüta. Jehová nakatsitajütsiana pajiwiyo itapetsiana”.

Itsamatakabita, Coré yajawa 250 papebibeje nakaetuana Moisésjawabelia pitabarata tabernáculobota. Bajarajota nej̈ata besacerdotewikuenia, bajarapamonae taj̈uj̈uaba petajuitsinej̈a inciensojawa. Nej̈ata Jehová jumaitsi Moisésjawabelia, Aarónbejejawabelia: “Pawekuanatsare Coré, peyajawajinawapanapaewitsi ata”.

Coré pona tabernáculobojawabelia itsajota Moisés nuka, itsiata Datán, Abiram, pijamonae ata apoponae bajarabelia. Jehová jumaitsi israelitawijawabelia: “Pawekuanatsare pijataj̈unaebonüwekua Coré, Datán, Abiram ata”. Israelitawi nej̈ata wekuanatsata naj̈atsiayo. Datán, Abiram, pijamonae ata nubena bajarapamonae pijataj̈unaebonüta pepünüjawata. Jemata, ira napata baja daj̈ita apopejumekowünütsiwitsi kijonetsi. Nej̈ata tabernáculobojawata runaika pinijiisotoj̈aneto atjübüwetsika, bajarapakuenia werebiaba Coré yajawa 250 papebibeje peyajawajinawapanapaewitsi.

J̈uakujinae Jehová jumaitsi Moisésjawabelia: “Kaepematakaponaenü kanakujitsia nakaemonaewi pakaponaremena pijanaebonü. Pawünü yakinare kaepematakaponaenü kanakujitsia pijanaebojawata. Itsiata, Levípijinü pemomoj̈i pijanaebojawata, wünüyakinare Aarón. Daj̈ita bajarapanaebojawanü pajebare tabernáculoboünüjawata. Ponü pijanaebo toitapetsianajü, tojuwianatsi peneta pematonotonü”.

Itsamatakabijawabelia, Moisés kapitsapa daj̈ita naebojawanü, itajüta pematakaponaewijawabelia. Aarón pijanaebo tojuwatsi pematonotonü, tojuwatsinua almendranaekuaitonü. Bajarapakuenia Jehová tsitajüta bajarapamonaejawabelia pitapetsikuenia Aarón sacerdotewi pematakaponaenünej̈a.