Balaam pijaburro pesorowato kuaikuaijai

Israelitawi jinawanapa bejamatabü 40 pawaibeje petsewiiratusatojawata. Bajarapamonae kueneamoneyaba baja piasaübejetomaraj̈anetonü. Nej̈ata juya ej̈ana pijataj̈unaebojawanü pejinawanapaenej̈a petsewitusato Moab nakuajawata, Jordán menewetsina, tsikirijawayo saya baja sajina pikani pejonenej̈a Papej̈aniaira Dioso Rajutsiapaebatsi. Balac, pematakaitorobinü Moab nakua, bajaraponü junawa israelitawi pewekuapitsiyaniwatsi pijaira. Bajaraj̈uata junata Balaamwününü peponaenej̈a Moab nakuajawabelia pejumaitsinej̈a pibisialiwaisianü israelitawijawabelia petokopiapatsinej̈atsi.

Jehová itsiata jumaitsi Balaamjawabelia: “Pütsa wajunupaebame pibisialiwaisianü petsijopaeyaniwatsi israelitawijawabelia”. Nej̈ata Balaam apojitsipae peponaejawa Moab nakuajawabelia. Itsiata peyanakuaewetsinü Balac junata ikatsia, rajutsiapaebanua j̈ua bajaraponü jitsipa, itsiata Balaam apojumejejai peponaeyaniwa. Nej̈ata Dioso jumaitsi bajaraponüjawabelia: “Kakopatatsi bajarabelia neponaenej̈a. Itsiata baitsi jane, newajunupaebianame j̈ua j̈anü kajumaitsitsi”.

Balaam pona pijaburro pesorowato pejumata Moab nakuajawabelia. Bajaraponü jitsipa pewajunupaebinej̈a pibisialiwaisianü israelitawijawabelia petokopiapatsinej̈atsi, Jehová jumeitawetsi atatsi. Nej̈ata Jehová pijaángelnü tsitanaitajütatsi akueyabi j̈uabeje bajarapanamutojawata. Balaam apotae pikani ángelnü, itsiata pijaburro pesorowato tane bajarapaángelnü. Kopiaya bajarapaburro pesorowato pitsapa namutowekua, jopajoneka wayafojawabereka. J̈uakujinae bajarapaburro pesorowato nuka pona nakataetsiaya ibopanajawabelia nej̈ata taj̈utsapanaj̈uaba Balaam. Bej̈uakujinae baja, bokajopa bajarapaburro pesorowato namutotuatuajüta. Bajarapaepatobeje, Balaam konibaba pijaburro pesorowato naebota.

J̈uakujinae bajarapaburro pesorowato Jehová kuaikuaijaiyaej̈ana. Bajarapaburro pesorowato yanijoba Balaamjawabelia: “¿Dej̈uajitsia nekonibabame?”. Balaam jumekanawiata: “Tsipaji bejemanükuene netaeyaej̈aname. Itsa j̈ainaejitsipajü espadajawa, kabeyaj̈uabijitsipatsi aekonoj̈aeta”. Burro pesorowato nej̈ata jumekanawiata: “Bajayatamikujinae baja kajena kajumaponaponatsi. Itsiata, ¿itsamatakabitami bajarapitsikuene kaitsitsi?”.

Nej̈ata Jehová taeyaej̈ana Balaamjawabelia ángelnü. Bajarapaángelnü jumaitsi: “Jehová kaitaweta newajunupaebiyaniwa pibisialiwaisi israelitawijawabelia”. Balaam jumepita: “J̈aniajamü apokajumekowünütsitsi. Nawiatsianajü kaewüalia tajaboyabelia”. Itsiata ángelnü jumepitatsi: “Nawiaremelia Moab nakuajawabelia, itsiata saya jumaitsimü tsane j̈ua Dioso kajumaitsi”.

¿Dejumaitsimü tsipae? ¿Balaam meta itsi pakuenia Dioso jitsipa? Jume, tsipaji pikani bajaraponü pibisialiwaisi wajunupaebijitsia akueyabi j̈uabeje israelitawijawabelia. Itsiata bajarapaakueyabi j̈uabeje Jehová jumaitsiayaej̈ana pej̈anialiwaisi, pibisialiwaisiwekua. J̈uakujinae israelitawi barünabia Moab nakuapijiwi, Balaam nej̈ata baja tüpa. Itsa kopiayamatakabianütakujinae Balaam jumekowünütsipa Dioso nej̈ata apotüpae tsipae, ¿tsikaena jane?