Jehová itapeta Josué

Bajayajebi Moisés matakapona israelitawi, itsiata baja pakujinae tokopiapatsijitsiatsi petüpaenej̈a. Jehová jumaitsi: “J̈amü apomatakaponaemü tsane israelitawi papej̈aniairajawabelia pakarajutsiapaebatsi. Itsiata kopatsianajü netaenej̈a bajarapaira”. Nej̈ata, Moisés wajüta Jehovájawabelia pitapetsinej̈a pematakaponaenü pewetsinej̈a pijajiwi. Jehová jumepitatsi: “Barükuaikuaijamüre Josúe, jumaitsimüre j̈anü bajaraponü itapetajü”.

Moisés yapütaeyaej̈ana israelitawijawabelia bajaraponü kaeepatoyokujinae baja tüpaena, itsiata Jehová itapeta Josué pematakaponaenej̈a Pairajawabelia Rajutsiapaebatsi bajarapamonae. Nej̈ata Moisés jumaitsi Josuéjawabelia: “Pütsa junawame. Jehová kayawenonaena”. Bej̈uakujinae, Moisés junaya Nebowünü tsutojumajawabetsia. Bajarajota, Jehová tsitajütatsi Paira Rajutsiapaebami Abrahán, Isaac, Jacob yajawa. Pakujinae Moisés j̈aina 120 pawaibeje bajaraponü baja tüpa.

Jehová jumaitsi Josuéjawabelia: “Nikabare Jordánmene, jonenamenua Canaán nakuajawabelia. J̈anü kayawenonaenatsi, pakuenia bayawenonajü Moisés. Pütsa nakofünütame nelebijawa kaematakabi kanakujitsia tajumeliwaisi. Pütsa junawame, jamatabükueneaitatsakamüre. Ponare, itsimürenua pakuenia kaitorobatsi”.

Josué itoroba anijapeyaenebinübeje Jericó tomarajawabelia. Itsaliwaisita, yapütaenatsi j̈ua itsi tsane bajarajota. Pakujinae nawiatabeje peyaenebinübeje Jericó tomarajawawerena, tsipaebabeje yapüj̈anepana baja pejonenej̈a Canaán nakuajawabelia. Itsamatakabikujinae, Josué jumaitsi israelitawijawabelia: “Pekawarapaenej̈a pijataj̈unaebonü”. Kopiaya, itoroba Jordán menejawabelia sacerdotemonae pekaponaenej̈a Jehová pijapenamatamotsibaulajawa. Itsiata mene awajubua nej̈ata pakujinae sacerdotewi nonota bajarapamenejawabelia tsewareka, mene aponawotsi ata. Nej̈ata sacerdotewi najetarubena petsewiirajawabelia. Itsa baja tuatuajüta patajopanubena, bajarajota penikabinej̈a israelitawi itsapanabelia. Pakujinae bajarapamonae tane paayaikuenejawa, ¿dejumaitsimü tsipae?, ¿bajarapamonae meta najamatabünapita j̈ua Jehová itsi Rojowünü manuamenejawatami?

Itsawaibejekujinae, israelitawi jane baja matapania pata Papej̈aniaira Dioso Rajutsiapaebatsi. Bajarajane nakuenebijitsipa pijabonü, pijatomaraj̈anetonü yajawanua. Nakuenebijitsipa pijapabianü, vinoranü ej̈anaejitsipa yajawa ubijitsipa. Bajarapairata yawünüka pej̈aniapej̈aejawanü, piapairanünua, bajaraj̈uata bajarapaira wünürutatsi “Paira lechera, banara ata”, pejaiwünü.