Bajayata, pakujinae Dioso matakaitoroba panakuaje, daj̈itakuene bitso j̈anepana.
¿Dej̈uajitsia meta namatawenonatsi Dioso Pematakaitorobijawa?
Petaj̈uj̈uabimatakabita, pakujinae kopiaya jiwibeje ponaponabeje, Wajanakaej̈anaenü, Jehová pewünü, übajaraponü matakaitorobabiaba. Asiwaya ewetabiaba jiwi. Bajaraj̈uata, nakuenebabuata pej̈anianakua Edén nakuajawata peponaponaenej̈abeje. Bajarajota pej̈aejawa apaj̈ayo. Rajutanua pej̈aniakuene penakuenebinej̈abeje barüyaya (Génesis 1:28, 29; 2:8, 15). Itsa pajiwibeje namatakaitorobiaej̈anaejitsipa Diosota, nej̈ata bajarapakuenia barüyaya jinawanapaejitsipatsi.
Adán, Evabeje apojitsipaebeje Dioso pematakaitorobinej̈atsi.
Bibliabaj̈uto nakayapütaeyaej̈ana pakuenia ángelnü piajamatabükuenebejenü Satanás, baitsi Dowatji, jumaitsi Dioso apobematakaitorobi. Jumaitsinua jiwi barüya tsipae itsa wekuanatsata Dioso. Itsiata Adán, Evabeje pünaponabeje Satanás, apojumekowünütsibeje Dioso (Génesis 3:1-6; Apocalipsis 12:9).
Adán, Evabeje j̈uaba pej̈anianakua, naj̈uabanua matakabi apopewerewerekaejawa adomaejibikuenia tsipaji apojumekowünütsibeje Dioso (Génesis 3:17-19). Bej̈uakujinae, bajarapajiwibeje pej̈i, pemomoj̈i ata j̈aina. Bajarapamonae ayailiwaisi tsijopatsi Adán, Evabeje pejamatabükueneta. Bibliabaj̈uto jumaitsi: “Adánpijinë, pibisiacuene exana. Nexata mapanacuataje daxitajivi pibisiacuene pexanaejavanexa, taxuxuaba. Taxuxuabanua jivi petëpaejavanexa” (Romanos 5:12). Jiwi pijanekoni yabara apoyapütae j̈aniawaetsia pematakaitorobinej̈a (Eclesiastés 8:9). Bajaraj̈uata, ayailiwaisi wünüka daj̈itanakuajawa.
JIWI PEMATAKAITOROBIJAWA TAJ̈UJ̈UABA
Nemrod apojumeyaiyatae Jehová.
Bibliabaj̈uto jumaitsi ponü kopiaya matakaitoroba pewünü Nemrod. Bajaraponü apoyaiyatae Jehová Pematakaitorobijawa. Nej̈ata bajaraj̈uakujinae, itsapematakaitorobiwi ata, bejiobiaej̈ana. Bajaraj̈uata, bajayatami 3.000 pawaibeje panepa baja, peyanakuaewetsinü Salomón yakina: “Taniji bepejiobiwi pitaj̈utobarümene, itsiata itsajiwiyo ajibi pejamatabükuenebabatsinej̈atsi. Pebejiobiaej̈anabiabiwitsi jamatabükueneitorobabiabatsi” (Eclesiastés 4:1).
Aekonoj̈ae pamatakabi bajarapakuene tsiteka. Pawaita 2009, Organización de las Naciones Unidas jumaitsi pakuenia ayaibitsaüto jiwi najamatabüj̈aina “ayailiwaisi nakatsijopa pibisiamatakaitorobikuenejawawerena pitsapa”, jai.
PEJ̈ANIAKUENE NAMATAWENONATSI PEMATAKAITOROBIJAWA
Daj̈itatsi namatawenonatsi pejamatabüj̈anepanaewi j̈aniawaetsia wajanakamatakaitorobinej̈a. Nej̈ata bajarapajume Dioso nakanajumerajuta.
Jiwi pematakaitorobikuene tsitaakuenebitsi piajibiaej̈anaenej̈a j̈ua nakabejiobiaej̈anabiaba.
Dioso ajibiaej̈anaena jiwi pematakaitorobijawa. “ÜDioso Pematakaitorobijawa tsitekaena daj̈itamatakabijawabelianej̈a” (Daniel 2:44). Bajaraj̈uata ayaibitsaütomonae wajükabiaba Dioso Pematakaitorobijawa pekopiapatsinej̈a (Mateo 6:9, 10, TNM). Dioso itapeta itsanü Pematakaitorobinünej̈a. Bajayata bajaraponü ponapona pairataje bejiwitonükuenia. ¿Deponü meta?