¿Deponü meta Dioso itapeta Pematakaitorobinünej̈a?

• Bajaraponü Dioso itapetatsi. “Xanë raja ta-itapetsinë, ewetsia-exanaenajë mapanacuaje [...]. Carajutsianatsi daxitanacuanëpijiwi neyanacua-ewetsinexa. Daxitanacuanë, tajënacuanë-ata, carajutsianatsi newetsinexa” (Salmo 2:6, 8).

• Nakuaewetsinü David pijasalinainümi. “Penacuentonëyo nacarajutsijitsia pebinëyo [...]. Bajaraponë xaniawaetsia yanacua-ewetsiana daxitanacuanë, jamatejema penajuajinawanapaenexa. Peyanacua-ewetsicuene apotocopiarucaetsi tsane [...]. Bajaraponë, David-pijinë pemomoxiyajuwënënëxae, canacopatsiana daxitamatacabijawabelinexa peyanacua-ewetsitaxunaemita pe-ecaenexa” (Isaías 9:6, 7).

• Naej̈ana Belén tomarata. “Belén [...], bajarapatomarayojawata naexanaena ponë [...] peyanacua-ewetsinënexa”. Daj̈ita nakuajawa nayapütaeyaej̈anaena ayaijamatabükuenenükuene (Miqueas 5:2, 4).

• Naitaj̈utojematabiabatsi, beyaj̈uabatsinua. “Bajaraponë taeyabiabianatsi bewelianëcuenia, nexata jiwi wecuanapënëyorotabiabiana [...], pepacuene bitso nawixaetaeya-exanaenatsi jiwi pijapibisiajamatabëcuene yabara” (Isaías 53:3, 5).

• Asaüyaej̈anatsi ikatsia peponaponaenej̈a atjübütatsia. “Aponecopatsi tsane bajayajebi tanacopatsinexa mëthëjawata [...]. Bajarajotalia pecujuanenia ponaponaenajë barëyaya daxitamatacabijawabelianexa” (Salmo 16:10, 11).

Jesús kuenekaüjüpatsi j̈aniawaetsia pematakaitorobinej̈a

Itsajiwi ata apokaüjüpaetsi pewetsinej̈a j̈aniawaetsia, itsiata Jesús kuenekaüjüpatsi. Itsamatakabi ángelnü jumaitsi María, Jesús penajawabelia: “Dioso nacuaevetsinë exanaenatsi. Pacuenia pijasalinainëmi Davidpijinë bajayata nacuaevetsinëmi, bajara icatsia itsane. Bajaraponë evetsiana [...] daxita matacabijavabelianexa, jai” (Lucas 1:31-33).

Jesús apomatakaitorobi pakujinae irata ponapona. Itsiata matakaitorobiana daj̈itajiwi atjübüwetsika Dioso Pematakaitorobijawata. ¿Dej̈uajitsia Jesús kuenekaüjüpatsi j̈aniawaetsia pematakaitorobinej̈a? Aekonoj̈ae yapütaenatsi j̈ua ej̈ana bajaraponü pakujinae pairataje ponapona.

• Jesús jamatabükueneenabiabatsi peyawenonaenej̈a itsamonae. Yawenonabiaba pebijiwi, petiriawi, pewüjüawi, perujuwi ata. Daj̈itawiriawi yawenonabiaba (Mateo 9:36; Marcos 10:16). Pakujinae peperabütsabanaenü jumaitsi Jesúsjawabelia: “Cacaëjëpa tanejamatejemayaexanaenexamë. Itsa jitsipame, nejamatejemayaexanare mapavitanevecuaje, jai”. Jesús nej̈ata itaj̈utotsoniatane jumeyaej̈ana (Marcos 1:40-42).

• Jesús nakakujaruba wajabarüyayaej̈anaenej̈a Dioso. Bajaraponü jumaitsi: “Pajivi bitso jitsipa Dioso, nexata itsa tonacueneba Dioso, acuenebi bitso pejitsipaejava palata, jai.” Jumaitsinua: “Xua pexaniacuene, paxamë pajitsipame itsamonae papecatoexanaenexa, copiaya paxamë bajarapapexaniacuene patoexanare bajarapamonaejavabelia”, jai. Nakakujarubanua Dioso yapütane wajajinawanapaekuenia, nakajamatabükueneyapütanenua. Bajaraj̈uata wajabarüyayaej̈anaenej̈a Dioso, üpej̈aniakuene benajamatabüj̈ainatsi (Mateo 5:28; 6:24; 7:12). Jesús muj̈ujioba pakuenia beyapütanetsi Dioso wajanakatojitsipaekuenia. Itsa jumekowünütatsi, barüyaya jinawanapaenatsi (Lucas 11:28).

• Jesús nakakujaruba wajaasiwanej̈a itsamonae. Pakuenia Jesús itsi, pakuenia kujarubanua, yawenonabiaba jiwi pejumekowünütsinej̈a Dioso. Bibliabaj̈uto jumaitsi: “Pejumetaevitsi bitso jamatabëcuenenabenajaca tsipaji Jesús livaisi tsipaeba pinijijamatabëcuene pexainaenëcuenia” (Mateo 7:28, 29). Bajaraponü itoroba: “Pasivamëre papecaitoyavi ata”, jai. Bajaraj̈uata towajüta pebeyaj̈uabiwitsi Diosojawabelia: “Axa, mapamonaeje itaxutotsoniataema. Vecuaxuare paneconi xaina pibisiacuene taneexanaexae mapacueniaje. Tsipaji raja apo yapëtae”, jai (Mateo 5:44; Lucas 23:34).

Jesús kuenekaüjüpatsi pematakaitorobinej̈a j̈aniawaetsia. Wajanakaasiwaj̈ae, bitso jitsipa wajanakayawenonaenej̈a. Itsiata ¿depakujinae ewetsiana pairaje?