¿Depakujinae ewetsiana pairaje?

Itsamonae Jesús pijajiwiyajuwünüwi jitsipa peyapütaenej̈a pamatakabi Dioso matakaitorobijitsia panakuaje. Itsiata Jesús jumaitsitsi: “Apo pacatocopatsi paneyapëtaenexa pamatacabita, paepatota ata”, jaitsi (Hechos 1:6, 7). Itsamatakabi Jesús jumaitsitsi baja j̈uajawanü itsijitsia pewajünaeyawelia. Bajarapaliwaisi yapütaeyaej̈anatsi kaeepatoyokujinae saya, Dioso Pematakaitorobijawa kopiapatsijitsia panakuaje (Lucas 21:31).

¿DEJ̈UAJAWANÜ YABARA TAJÜWELIA JESÚS WAJUNUPAEBA?

Bajaraponü jumaitsi: “Itsaviriavi nabena itsaviriavijavabelia. Itsanacuanëpijivi pijinia nabena itsanacuanëpijivijavabelia. Ira najëabiana ayaicuenia nacuanëjava. Nacuanëjava ayaijaniboxaneto najetarucaena, piavitanecuene yajava”, jai (Lucas 21:10, 11). Pakuenia yapütanetsi naejawanae penaekuaitsiwajünaeya banamatatonota, bajarapakuenia j̈uajawanü tanetsi, nakayapütaeyaej̈ana imoj̈oyo baja pewajünae Dioso Pematakaitorobijawa kopiapatsijitsia panakuataje. ¿Bajaraj̈uanü tanetsi daj̈itanakuajawata? Kanaüjüre paliwaisije:

1. PENABEJAWA

Aviónmo, tanquemo, misilnae penabenej̈a.

Perujuliwaisi pepaebiwi paeba 1914 pawaita pakujinae ayaikuene apaj̈ayo penabejawa. Bajarapapenabekuenejawa bejiobiaej̈ana daj̈itajiwimonae, daj̈itanakuajawa. Nej̈ata nabeya bajarapamonae juka tanquemo, bomba pematatsünüwetsika ata, ametralladoranae ata, piatanetuj̈ujawanü ata, itsawirianaenü ata pebeyapenetsinej̈a. Bajarapawaiwaj̈unaeya jiwi aponabe bajarapakuenia. J̈uakujinae, Segunda Guerra Mundial-jawata kapitsapa bomba atómica. 1914 pawaikujinae penabejawa wünüka pairaje. Bajaraj̈uata ayaibitsaütomonae tüpa.

2. IRANAJÜABIJAWA

Enciclopediabaj̈uto Britannica Academic yapütaeyaej̈ana pakuenia kaewai kanakujitsia, bejamatabükuene 100 pakuenebeje iranajüabijawa tobijiana jiwi pekobekowü. Jumaitsi Servicio Geológico Estados Unidos nakuata: “Pakuenia payakinajü 1900 pawaiwerenakujinae, daj̈itawai kanakujitsia baewetatsi 16 pepo ayaikuene iranajüabijawa”, jai. Itsiata itsamonae meta jumaitsi tsipae: “Bajayatami ira banajüaba ata”, jai tsipae itsamonae. Itsiata baitsi jane, ajena pamatakabi ayaibitsaüto jiwi nabejiobitawanapa, batüpanua iranajüabij̈ae.

3. SAJINA PEJ̈AEJAWA

Penabejawa, jiwi ayapübeje pej̈ainaenej̈a palata, itsamonae yamaj̈üitojorobabiaba, itsamonae apoubi j̈aniawaetsia peewetsinej̈a ira, itsajawata daj̈ita batsewa, itsajawata babubuta. Daj̈ita bajarapitsikuene ajibiaej̈ana pej̈aejawa. Programa Mundial de Alimentos petsipaebiliwaisi jumaitsi: “Daj̈itanakuajawata, 821 millone pajiwibeje apoj̈ainae pej̈aejawa, bajarapajiwiyajuwünüwi 124 millone pajiwibeje imoj̈o petüpae pej̈aejawa piajibij̈ae” (2018 Year in Review). Kaewai kanakujitsia, 3 millone cien mil papejewaj̈ibeje jiopa pej̈aejawa apopej̈ainaej̈ae tüpa. 2011 pawaita, daj̈itanakuajawa pejewaj̈i bitso ayaikuenia tüpa. Bajarapamonaeyajuwünüwi ayaibitsaüto pejewaj̈i piajani yatüpa.

4. DOMAE APAJ̈AYO

Pitaneto nayajiwitaeyaej̈ana bacteria bitso ayai.

Organización Mundial de la Salud petsipaebiliwaisi jumaitsi: “2000 pawaitakujinae tanetsi piayaidomae. Perujudomae ikatsia naitajüba, pakuenia cóleradomae, pestedomae ata, fiebre amarilladomae ata. Kopiapatatsinua pejanadomae, pakuenia síndrome respiratorio agudo gravedomae, gripe pandémicadomae ata, síndrome respiratoriodomae Oriente Medio nakuata ata, éboladomae ata, zikadomae ata”. Juya pijinia yakaüjüpanajetaruka Covid-19domae daj̈itanakuanüjawa. Pikani científicomonae, médicomonae ata, bitso nakujaruba, apokuenekaüjüpaetsi piajibiaej̈anaenej̈a domaekuene.

5. DIOSO PELIWAISI DAJ̈ITANAKUAJAWA YAKAÜJÜPA

Dioso Pejumeliwaisi daj̈itanakuajawa yakaüjüpa.

Tajüwelia Jesús wajunupaebanua: “Itsamonae tsipaebaponaena daj̈itanakuapijiwi peyapütaenej̈a pej̈anialiwaisi Dioso Pematakaitorobijawa yabara daj̈itanakuajawa. Nej̈ata, bajaraj̈uakujinae kopiapatsiana pewerewerekaejawa” (Mateo 24:14, TNM). Pikani yakaüjüpa ata ayailiwaisi pairataje, 8 millone pajiwibeje daj̈itanakuawerena, tsipaebapona pej̈anialiwaisi Dioso Pematakaitorobijawa yabara 240 nakuajawa, mil pawiriajumenüta ata. Ajenakonoj̈aeta tanetsi bajaraj̈ua.

¿DEJ̈UAJITSIA META BEYAPÜTANETSI BAJARAPAPENAMATAMOTSILIWAISI?

Daj̈itaj̈ua Jesús tajüwelia wajunupaeba, ajena pamatakabi najumekapanepanajetaruka. ¿Dej̈uajitsia benajamatabüj̈ainatsi bajarapaliwaisijawabelia? Benajamatabünapitatsi j̈ua Jesús jumaitsi: “Itsa pataename pecopiapatsijava xua yabara pacatsipaebatsi, nexata payapëtaename imoxoyo baja pevajënae pekopiapatsijavanexa tsane [Dioso Pematakaitorobijawa]” (Lucas 21:31).

Jesús tronoeka atjübüwetsika matakaitoroba pej̈anianakua. — Kaeepatoyokujinae, Jesús matakaitorobiana panakuaje petoej̈anaenej̈a Dioso pejitsipaekuenia.

1914a pawaita, atjübütatsia Dioso matakaitorobiaej̈ana pej̈ünato Jesucristo. Bajarapakuenia nuta Pematakaitorobijawa. Yapütanetsi bajarapaliwaisi tsipaji Jesús tajüwelia wajunupaeba, Bibliajawata tokaüjütanua peyapütaenej̈a bajaraj̈ua (Salmo 2:2, 4, 6-9). Kaeepatoyokujinae, Jesús matakaitorobiana panakuaje. Kopiarukaeyaej̈anaena jiwi pematakaitorobikuene. Nakatoej̈anaena pej̈aniaira wajajinawanapaenej̈a daj̈itamatakabijawabelianej̈a.

Imoj̈oyo baja pewajünae tsane, Dioso najumekapanepaena j̈ua Jesús wajüta: “Pajitsipajü pekopiapatsijawa Nematakaitorobikuene panakuataje. Pajitsipajünua nej̈anaenej̈a nejitsipaekuenia pakuenia atjübütatsia, iratanej̈a ata”, jai Jesús Diosojawabelia (Mateo 6:10, TNM). Nej̈ata, ¿deitsi Pematakaitorobinü 1914 pawaikujinae Dioso pejamatabükueneta? ¿Deitsi tsane daj̈itanakuapijiwinej̈a?

a Itsa jamatabüyapütaneme 1914 pawaikuene, lebare liwaisita 32 ¡Barüyaya ponaponare daj̈itamatakabijawabelia!, pejaibaj̈uto, (Jehová petotsipaebaponaewi yakina).