¿Deitsi tsane Pematakaitorobinü Jesús daj̈itanakuapijiwinej̈a Dioso pejamatabükueneta?

JESÚS MATAKAITOROBAPONA

Nakujarubatsi baja pakuenia Jesús tajüwelia wajunupaeba. Bajaraj̈uata jumeyapütanetsi Jesús matakaitorobapona atjübütatsia tsipaji tanetsi bajaraj̈uanü.

Bibliabaj̈uto jumaitsi pamatakabi Jesús taj̈uj̈uaba pematakaitorobinej̈a atjübütatsia, j̈uabika atjübüwetsika Dowatji, pijajiwi yajawa. Ajena pamatakabi bajarapamonae toakuenebitsi peponaenej̈a atjübüabetsia. Bajaraj̈uata 1914 pawaikujinae, ayaikuenia bejiobiaej̈anawanapa panakuapijiwije (Apocalipsis 12:7, 9).

Ajena pamatakabijawa, pikani jiwi bitso bejiobi tsawanapae, Jesús yawenonatsi Dioso Pematakaitorobijawata. Bajaraponü matakapona pijajiwi daj̈itanakuajawa petsipaebinej̈a Dioso Pejumeliwaisi itsamonaejawabelia. Bajarapakuenia ayaibitsaüto jiwi nakujarubabiaba pejumekowünütsinej̈a Dioso pemuj̈ujiobiliwaisi (Isaías 2:2-4). Bajarapamonae jumeyapütane pakuenia bej̈ana pejinawanapaenej̈a barüyaya pijamonae yajawa. Nakuenebabiabanua pej̈ainaenej̈a penamatawenonaejawa, aponakofünütsinejewa Dioso pijakuene. Pejumekowünütsij̈ae Bibliabaj̈uto barüyaya jinawanapa. Bajarapamonae pej̈aniajamatabükuenewi, bajaraj̈uata Dioso Pematakaitorobijawata pej̈aniakuene rajutsianatsi.

NEJ̈ATA, ¿DEITSI TSANE JESÚS, DIOSO PEJAMATABÜKUENETA?

Atjübütatsia Jesús matakaitorobapona, pikani panakuataje abaj̈ü jiwi matakaitoroba. Itsiata Dioso jumaitsi Jesúsjawabelia: “Kueneamoneyabanajetarukare nekueyawijawabelia”, jai (Salmo 110:2). Nej̈ata kaeepatoyokujinae saya pewerebiabinej̈a Jesús pekueyawi, werebiabiananua j̈ua Dioso pijajiwi bejiobiaej̈anabiabatsi.

Bajarapamatakabi, Dioso pejamatabükueneta Jesús ej̈anaena pakueniaje:

• Weretsiana jema ikelesiajawanü. Jema ikelesiajawanü penajumetsünütsiliwaisi kujarubabiaba Dioso yabara, bajaraj̈uata jiwi tsitaayapübejetsi pejamatabükueneimoj̈oyobinej̈a Dioso. Bibliabaj̈uto, jema ikelesiajawanü kuenekatane bepenaperabükanajetsiwa. Kaeepatoyokujinae saya werebiabianatsi. Bajarapamatakabi, ayaibitsaüto jiwi jamatabükuenenabenajakaena (Apocalipsis 17:15, 16).

• Werebiabiana jiwi pematakaitorobikuene. Dioso pejamatabükueneta, Jesucristo ajibiaej̈anaena jiwi pematakaitorobikuene (Apocalipsis 19:15, 17, 18).

• Piajamatabükuenebejewi ajibi tsane. Pamonae ej̈anabiaba üpejitsipaekuenia apojumekowünütsinejewa Dioso, werebiabianatsi (Proverbios 2:22).

• Ajibiaej̈anaena Dowatji, pijajiwi yajawa. Dowatji, pijajiwi yajawa “apo caëjëpaetsi tsane peyamaxëitojorobinexa mapanacuapijivi”(Apocalipsis 20:3, 10).

Itsiata, ¿depakuenia jinawanapaena pamonae itapeta Jesús pematakaitorobinej̈atsi?

¿DEPAKUENIA YAWENONAENA DIOSO PEMATAKAITOROBIJAWATA PANAKUAPIJIWIJE?

Jiwi pematakaitorobiwi itsajawata tsitaakuenebitsi j̈aniawaetsia pewetsinej̈a, Jesús juya, atjübüwetsika j̈aniawaetsia yawenonaena jiwi. Dioso itapeta 144.000 pajiwibeje panakuapijiwiwekua peyawenonaenej̈a Jesús Pematakaitorobijawata (Apocalipsis 5:9, 10; 14:1, 3). ¡J̈aniajai kajena! Jesús ej̈anaena Dioso pejitsipaekuenia panakuataje. ¿Depakuenia yawenonaena jiwi?

• Ajibiaej̈anaena domae, petüpaejawa ata. Kaejiwi ata apojumaitsi tsane: “nedomaeba”, apojai tsane. “Ajibi baja tsane petëpaecuene” (Isaías 33:24; Apocalipsis 21:4).

• Ajibiaej̈anaena penabejawa. “Nej̈i jamatejemaya jinawanapaena”. “Kaejiwi kanakujitsia ekaena pijauvanaebüj̈üpanata, pijahigonaebüj̈üpanata ata. Itsajiwiyo ata apobenajakae tsanetsi” (Isaías 54:13; Miqueas 4:4).

• Pej̈aniakuene rajutsiana penakuenebinej̈a. “Taitapetsiwi nakobekowü barüyataena. Aponakueratsi tsane, itsa nakuenebiana” (Isaías 65:22, 23).

• J̈anetsiana panakuaje. Pebarüyakuene yakaüjüpaena petsewitusatonüjawa, yawünükaena pej̈aniamatatonotonü (Isaías 35:1).

• Kujarubiana jiwimonae penajinawanapaenej̈a daj̈itamatakabijawabelianej̈a. “Matacabi apo pevereverecaejava pexainaevinexa, cayapëtane baja caenëmë pepo Diosonëcuenemë. Bajarapamonae neyapëtanenua baja Jesucristonë athëbëvetsica taneitorobinëmëtsica” (Juan 17:3).

Dioso jitsipa pej̈aniakuenia neponaponaenej̈a (Isaías 48:18). Aekonoj̈aeta nakujarubianame pakuenia bej̈aname ajenapamatakabi, Dioso pekarajutsinej̈a bajarapakuene.