¡Beyawenonatsi aekonoj̈ae Dioso Pematakaitorobijawa!
Itsatomaranakuajawa manuamenejawata bakopiapata pinijijowiboj̈aneto. Bajarapajowiboj̈aneto babijiana daj̈itabonü, jiwi ata. Bajaraj̈uata, itsa naimoj̈oyoba, bepijiayo jumaitsi jiwi pematakoitorobiwi: “¡PAPITSAPARE, PAJAIRENUA PANENAEWETSINEJ̈A!”, jai. J̈amü, ¿deitsimü tsipae? ¿Jaitsipame nej̈ata nenamatayabinej̈a?
Bajarapaliwaisi kuenejüpa Jesús peliwaisi. Bajaraponü nakayapütaeyaej̈ana pakuenia kaeepatoyokujinae patsijitsia “bajarapamatacabi bitso jivi bejiobi tsane” (Mateo 24:21). ¿Depakuenia nej̈ata beitsitsi wajapanepaenej̈a?
Jesucristo nakaitoroba: “Bajaraxuata, daxita xua panamatavenoname, matatoxenetsia, Dioso pijacuene bitso pasivanajamatabëxainabiabianame panetoexanavanapaenexa pacuenia Dioso pacaitoroba” (Mateo 6:33). ¿Dejüa nakakujaruba?
“Pajaitabiabare kopiaya Dioso Pematakaitorobijawa”. Nej̈ata baitsi jane, kopiaya betonakuenebatsi Dioso Pematakaitorobijawa itsakuenewekua (Mateo 6:25, 32, 33, TNM). ¿Dej̈uajitsia benajamatabüj̈ainatsi bajarapakuenia? Tsipaji waj̈aitsi jiwitsi aponakakuenekaüjüpae wajaj̈anetsinej̈a ayaikuenejawanü. Dioso kaenü kuenekaüjüpatsi pej̈anetsinej̈a.
“Pajumekowünütawanaparenua Dioso papekatojitsipaekuenia”. Nej̈ata baitsi jane, benajamatabükuenesaütatsi wajajumekowünütsinej̈a Dioso pitorobiliwaisianü. ¿Dej̈uajitsia? Tsipaji, itsa itapetatsi wajajamatabükueneta j̈ua pej̈aniakuene, j̈ua pibisiakuene, nej̈ata ayailiwaisi nakatsijopaena (Proverbios 16:25). Biji rajane, itsa jumekowünütatsi Jehová pitorobiliwaisianü, jamatabükuenebarüyayaej̈anaenatsi, j̈aniawaetsia jinawanapaenatsinua (Santiago 1:25).
¿Dej̈uajitsia meta Jesús jumaitsi, “pajaitabiabare kopiaya Dioso Pematakaitorobijawa, pajumekowünütawanaparenua Dioso papekatojitsipaekuenia”? Tsipaji Jesús yapütane pakuenia itsamonae meta kopatsipa Dioso pijakuene, ayaijawa palata pej̈ainaenej̈a jamatejemaya pejinawanapaenej̈a. Itsamonae, jamatabükueneenabiabatsi pej̈ainaenej̈a pej̈aejawa, pese ata, bajaraj̈uata nakofünütsipa Dioso Pematakaitorobijawa (Mateo 6:19-21, 25-32).
Itsiata, Jesús najumekapanepaeya jumaitsi pijajiwijawabelia, itsa yawenona Dioso Pematakaitorobijawa, nej̈ata j̈ainaena daj̈ita j̈ua namatawenona, pewajünaeyabelia pej̈aniakuene rajutsianatsinua (Mateo 6:33).
Jesús pijamatakabita, pijajiwi kopiaya jaita Dioso Pematakaitorobijawa, jumekowünütanua Dioso petojitsipaekueniatsi. Itsiata pakujinae bajarapamonae tüpa, Dioso abaj̈ü apoajibiaej̈anae ayaikuene panakuataje. Itsiata Dioso ewetatsi. ¿Depakuenia?
Pejumeyaiyataej̈ae Dioso pitorobiliwaisianü, jamatejemaya jinawanapa, biji rajane, apopejumekowünütsiwi jamatabübüjai tsabiabi. Jesús pijajiwi ayailiwaisi tsijopatsi ata, itsiata pejumej̈aniataej̈ae Dioso Pematakaitorobijawa, apojamatabükuenefaefaenae. “Ajamatabëcuenesaë tsavanapae Dioso pesaëta” (2 Corintios 4:7-9).
JAIRE KOPIAYA DIOSO PEMATAKAITOROBIJAWA
Bajayatami, pakujinae Jesús pairataje ponapona, pepünaponaewitsi kopiaya jaita Dioso Pematakaitorobijawa. Tsipaebawanapa pijanakuapijiwi pej̈anialiwaisi Dioso Pematakaitorobijawa yabara (Colosenses 1:23). Ajena pamatakabi, ¿depamonae itsi bajarapakuene?
Jehová petotsipaebaponaewi. Bajarapamonae yapütane bewelia sajina Dioso Pematakaitorobijawa peweretsinej̈a panakuapijikueneje. Bajaraj̈uata, najamatabükuenesaüta pejumekowünütsinej̈a paliwaisi Jesús jumaitsi: “Itsamonae tsipaebaponaena daj̈itanakuapijiwi peyapütaenej̈a pej̈anialiwaisi Dioso Pematakaitorobijawa yabara daj̈itanakuajawa. Nej̈ata, bajaraj̈uakujinae kopiapatsiana pewerewerekaejawa” (Mateo 24:14, TNM).
¿Deitsimü tsipae itsa jumetaejitsipame bajarapapej̈anialiwaisi? Bajayatami, apóstol Pablo tsipaeba pej̈anialiwaisi Dioso Pematakaitorobijawa Berea tomarapijiwijawabelia. Bajarapamonae “bitso jitsipa pejumetaenexa Dioso pitorobilivaisi [...]. Pijacuata Dioso pejumelivaisibaxutota xaniavaetsia nacujarubabiaba peyapëtaenexa xaniajai bajarapacuenia itsa jumaitsi Pablo petsipaebabiabilivaisi” pejumekowünütsinej̈a (Hechos 17:11, 12).
Itsa jitsipame, j̈amü ata itsimü tsipae. Itsa jaitsipame Dioso Pematakaitorobijawa, jumekowünütsipamenua Dioso pitorobiliwaisi, nej̈ata bajaraponü aekonoj̈aeta kaewetsiana, newajünaeyabelia jamatejemaya neponaponaenej̈a daj̈itamatakabijawabelianej̈a.